رواية ولد راجل امي

#ولد_راجل_امى

بقلم زهور جمال الدين?
?الحلقه السادسه عشر ?
والاخيرة

–

فى المستشفى ….

حفيظ وصفيه واقفين عالدكتور …ويبانو امال وخولة واقفين بعيد عليهم
-صفيه تبكى/ كيف يا دكتور …معقولة!!
-الدكتور/ يابنتى ضغطتها ماتحملش الصدمه … وطول جتها الجلطه ..كانا زى ماقلتو الزوز توفو فى نفس الشهر..فمش غريبه اللى صارلها
-حفيظ متأثر/ باهى كيف تقعد عندكم ولا نطلعوها ..ولا كيف يصير…
-الدكتور/ لااا بتقعد عندنا اكيد .. لازم اراقبو ضغطها .. وعندها بعض الادوية
-صفيه تبكى / نقدر نقعد معاها يا دكتور
-الدكتور/ ايه مافيهاش باس..خليك ارقدى معاها..نستادنكم توة….
مشى الدكتور.. وجوهم امال وخولة ..بعد حفيظ شوى وخلاهم مع صفيه ..نوعه يتحشم
-امال / انتو زى وخيينى…واصغر منى ..ووالله اتأسف للى صار لبدريه…صح احنا وياها ديما نتخاصمو ..لكن انا انسان وعندى رحمه .. ربي يشفيها وينوضها بالسلامه
-صفيه تمسح فدموعها بالكلينكس/ يا امال حتى مصارين البطن تتعارك …والمرض مقدر ومكتوب من ربي
-امال / ربي كملك بعقلك حبيبتى .. وياسعد نادر بيك
-صفيه / ربى يحفظك

ومشو لغرفة بدريه .. لقو زوز ممرضات قدامها ..
-صفيه / ممكن نخش نشوف امى شوى ..الدكتور سمحلنا نشوفوها
-الممرضه/ منو الدكتور اللى سمحلكم …المريضه تعبانه وعاطيينها علاج ومسكين ..ممكن تفيق الا قالليل

طلعو قعمز فالممر … وخش نادر
-صفيه شافاته فرحت / نااادر
خش نادر سلم عليها وعلى اخته امال وخولة واقفين معاها
-نادر خاطره يحضنها ومتحشم قدام خوها واخته / شنحال امك توة باهيه
-صفيه / ربي يحفظها ويطول فى عمرها ..الدكتور قال جلطه
-نادر اتأسف / اوووو .. الف سلامه عليها انشاءالله
حفيظ واقف بعيد شافه جاه بسرعه / اهلين نادر
-نادر/ اهلا يا حفيظ ..كيف الحال..وانشاءالله لاباس عالوالدة
-حفيظ / الله يحفظك ..ولا يوريك باس ..

وقعدو يهدرزو ويحكو …صفيه تبكى على امها ونادر خاطره يحضنها وياخد بخاطرها …
وتناقشو على منو بيقعد معاها ومنو بيروح
-نادر/ خلاص امالا يا امال ..اطلعى معاى توة انتى خولة نوصلكم للحوش …وخلى يقعدو صفيه وحفيظ
-صفيه / انت بتروح للحوش
-نادر / انتى عارفه ضرفى ..وامى بروحها .. لو لقيت وحدة من بنات خالتى غادى تو نولى
-صفيه / لا لا اقعد مع امك….انا عارفه الظرف
-نادر / هوا هدا …

وبالفعل طلعت امال وخولة قبل نادر نزلو فالاسانسير .. وقعد نادر يحكى مع حفيظ …وبعتالى طلع بيروح ومشت صفيه تسقد فيه ….
قدام الاسانسير
-نادر/ نحبك
-صفيه / وانا نموووت فيك ومنستاحشك
-نادر/ دار النوم صعب نخشلها مدامك انتى مش معاى وجنبى
-صفيه / ربي يحفظك ليا يا غالى
-قرب من ودنها / خاطرى نبوسك ومتحشم من الناس
-بعدت صفيه / اوووف .. خيرها هكى قاعدة ريحه فمك .. حبيبي غير المعجون
-نادر يضحك/ مش عارف شن قصه ريحه فمى اللى معش عاجباتك
-صفيه تحشمت/ لا والله مش هكى ..انا قصدى
انفتح الاسانسير …
-نادر/ انتى تمونى عالراس.. وكل اللى تقولى فيه حلو .. فى امان الله توة …
وخش للاسانسير …وصفيه واقفه قدامه ..
-صفيه / فى امان الله …
وتصكر الاسانسير ….

صفيه رجعت لمكانها وانفتح الاسانسير طلع منه خالهم سعيد ..وينصدم بخبر الجلطه

______________________________________

–

فى حوش عبدالجبار فالدور الثانى ….

عبدالجبار يلوم على احمد …
-عبدالجبار/ كيف ماتوقفش معاى.. كيف تخليهم ايسيفو عليا ونقرا الفاتحه عليها
-احمد/ نخليك تقرا فاتحه ولا نخليهم يقتلوك ..الولد كان متحزز بيقتلك زايد ناقص
-عبدالجبار/ انا اقسم بالله ماكنت معاها البنت .. ولا عندى علاقه بيها ونتلاقو
-احمد/ هدا اللى تقول فيه انت .. لكن الظاهر واللى شفناه انها كانت معاك
-عبدالجبار/ انت معاى ولاضدى
-احمد/ انا لا معاك ولا ضدك ..انا مانبيهمش يقتلوك وخلاص
-عبدالجبار/ ياعنجد يقتلونى ..شنو تحسابنى فى ايامات الجاهليه امالا
-احمد / جبار سلم اوخى هادو مش صغار مدينه زينا..هادو
ماتلعبش معاهم فى عرضهم وكرامتهم..واللى يلعب بخواتهم مقتول مقتول
-عبدالجبار/ تو نورى امها بنت الكلب هادى…كانا مش من خفتها راهو ماصارش هدا كله
-احمد / شفت…يعنةدى انت بالفعل تعرفها
-عبدالجبار/ اووووووف علينا عاد

______________________________________

–
فى خيمه العزى

-خيريه/ لا حول ولا قوة الا بالله العلى العظيم ..معقولة بدريه جتها جلطه …
-امال / الله غالب يااام كاتبلها ربي
-خيربه وجعتها ضرتها / غير دوريلى احمد خلى نمشليها توة
-امال / نشبح فيه ركب مع جبار لحوشه ..
-خيريه / اركبى ناديهولى
-سالمه جارتهم تسمع فيهم / خيركم يا خيريه.. انشالله خير لون وجهك قلوب
-خيريه دموعها نازلات / توجعكش بدريه..يانارى جتها جلطه
-سالمه / يارررووحى .. ياكبدى حتى هيا زوز صغار اشتاقتهم
شن بتولى وقداش بتتحمل

وانتشر الخبر فالخيمه …وكلها انقلبت للمستشفى …اللى ينشد واللى يحمد بالسلامه …صفيه قالتلهم الدكتور مانع عليها الزيارة وحتى انا ماشفتهاش
نعيمه مرت بوهم جاها ولد خوها روح بيها خاطر حفيظ لاهى مع امه ….

______________________________________

–
بعد ثلاثه ايام …

الممرضه جت للكراسى اللى مقعمزين فيهم صفيه وحفيظ وخالهم سعيد ماسيبهمش بكل …ومعاهم نادر كيف وصل وخلى بنت خالته مع امه..ومقعمزة خيريه جنب صفيه .. واحمد واقف عالحيط
-الممرضه / المريضه فاقت ..
كلهم فرحو وفى صوت واحد / الحمدلله …
-الممرضه / وين بنتها .. اسمها صفيه
-صفيه / ايه انا صفيه بنتها …
-الممرضه / هيا طالبه تشوف صغارها اسمهم صفيه وحفيظ
– صفيه تلفتت لحفيظ / نوض يا حفيظ امى طالبة تشوفنا
-وقف حفيظ بسرعه /هى تعالى نخشولها
وتلفتت للمقعمزين / وين سعد
-سعيد / انا سعيد خوها انتى غالطه فالاسم يا اختى
-الممرضه / طالباتك انت ووحدة يقولولها خيريه .. لكن ايخشو صغارها وانتم بعدهم
-خيريه / ربحتى يا وخيتى اللى بتخلينى نخشلها
-الممرضه تلفتت لصفيه / يا ماما امك تعبانه …حاولى ماتخليهاش تجهد نفسها بالدوة…وبلاش دموع الدكتور ماصدق ضغطها استقر
وتلفتت لى حفيظ / وماتعطلوش عندها
-صفيه وحفيظ / حاضر ..

________________________________________

–

فى حوش عبدالكريم

هيفا اتغطى فى جهها بايديها وتبكى ..وامها تضرب فيها وناديه تحز فيهم …
خش عبدالكريم / والله ماتتحشمى..انا حكيتلك بيش تكونى فالصورةة …ماحكيتلكش بيش تضربها .. حولى عليها
-تلفتتله سعاد وهيا تبكى/ وانا شن مازالى غير وحدة من بناويتى اديرلى العار ويقرولها فاتحتها بالسر ..كيف تخلينى غافلة ثلاث ايام يابوى
-هيفا/ يااام من بكرى نحلفلك والله ماكنت فالحوش خشيت بالغلط
-سعاد/صكرى فمك والله كان مش جدك شادك عنده وحاميك مايبدو خوتك الا دابحينك
وحطت ايديها على وجهها / يا غبارتى ..مافكرتيش بوك ايطلقنى فى جرت عمايلك …
-عبدالكريم / خلاص قلتلك اطلعى ..البنت عندى وبوها خلاهالى معناها ماحد يمسها ولا يضربها..استرى يا بنتى
-ناديه / زى ماقالك جدى يااام …خلاص استرى واسكتى
..البنت تزوجت وكل شى تم ..زايد الكلام والعزار ..اسكتى حد من خوالى يسمعك
-سعاد/وشنو تحسابيها بتدرق..سيورهم يسمعو ببنت اختهم
دارت العيب
-هيفا تبكى/ ياام متقوليش هكى والله انا مظلومه
-سعاد/ ياريتك متى قبل ما اديريلى هالعمايل
وتلفتت لبوها / جبار هدا هوا نفسه اللى كان واخد صفيه ولا
-عبدالكريم /ايه هوا
-سعاد تضرب فى ايديها تسحن فى هيفا/ هوينها هيا خدت نادر العزرى .. وانتى خودى فضلتها …ماهو كل حد ونيته ..

_________________________________________

–

فى المستشفى

خشت صفيه وحفيظ لامهم ….
صفيه شافت امها كيف فمها وعينها اليمين مايلات بتنهار بالبكى …ولكن شدت روحها زى ماوصتها الممرضه..ومسحت دموعها
وصلت امها وهيا صوتها مغصوص / لاباس عليك ياااام ..ربى يحفظك لينا وينوضك لينا بالسلامه …
– حفيظ خدى يد امه وباسها / ربي يطولى فى عمرك وتعيشى تاج فوق راسى يا غاليه …
وتلفت للجهه الثانيه يمسح فدموعه …

-بدريه تتكلم بصعوبه /عااارفةة روحىى لوحتكم وانتوووو صغار.. لكن بالله علييييكم ماتلوحونى ياصغارى
-صفيه معش قدرت اتشد نفسها / والله مانلوحك يااام ..
نقطع من لحمى ونعطيك
-حفيظ / انتى جايبه راجل .. يحميك ويحطك فوق راسه
-بدريه / سلم صغارى .. ياااربي مانفقدكم ..

خشت الممرضه طلعتهم … وخش بعدهم سعيد وحتى هوا اتأثر بوضع اخته … وقعد يبكى ووصاته انه يطلعها لحوش صفيه بنتها ..هيا اللى المفروض تعانيها وتتكشف عليها ..
لانها لدت بالحفاظات
وخشت بعده خيريه .. انخلعت لما شافت بدريه قريب طاحت…استسمحت منها بدريه لو غلطت فيها اى يوم

وفى الممر برة واقفين سعيد ونادر وحفيظ يتناقشو
-نادر/ مرحبتين بيها …هادى نسيبتى وحسبت امى .. ونفس الوقت انا ربيبها وهيا مرت بوى
-حفيظ /انا توووة منخطب ومنتزوج .. ونبى نرفع امى عندى
-سعيد/ هادى امك وحقك ترفعها عندك ..لكن مبدئيا بما ان انت ماعندكش مكان .. خليها عند اختك
-نادر/ انت عليك بى بوى يا سعيد …مرات مايوافقش
-سعيد / تى هوا حتى الزيارة ما جاش قاللها انشالله لاباس .. مقعمز فالمربوعه يساير فاللى يجى يعزى ..تبيه ايعانيها وهيا بوضعها هدا
-نادر/ انت تعرف تفكير الشيابين يقولك عندى ناس وانا الكبير ولازم نساير
-سعيد / مادافعش على بوك يا نادر.. خلى ولده جبار يستقبل فالمربوعة وهوا جى..ماهيش صاعبه..شوف احمد اللى يعرف القدو كل يوم هنايا يجيب فى امه ولا العزى مش عليهم
-حفيظ يبي يغير الموضوع حس ان نادرانحرج / باهى خليها عند صفيه.. مابين ماتزوجت..مانعطلش انشاءللله
نادر / لاااا براحتك بالشوى عليك دور على بنت الحلال.. عمتى بدريه زيها زى امى..ماهمش مضايقين علينا

______________________________________

–

بعد عشرة ايام …

روحو بي بدريه لحوش صفيه … ولكنها قعدت تاعبه .. منها صغارها ماتو.. ومنها ضميرها اللى ايأنب فيها على صغارها الكبار اللى لوحتهم زمان وهما مالوحوهاش توة
سبحان الله ياناس العيل مهما صار بينه وبين امه مرجوعه ليها..الا القليل النادر….فى اللى سيبت صغارها بارادتها وفى اللى سيبتهم غصبا عنها .. بس فالاخر وفالحالتين اول ماترجعلهم امهم يرجعولها طول وينسو اى زعل

دخلوها لنفس الدار اللى فيها امباركه ..هيا اصرت انهم ايخلوها معاها …تبى راحة ولدها ..دارلوها سرير على يسار الدار …فالنهار صفيه تعانى وفالليل امباركه تراقبها وترد بالها عليها
سبحان الله شن قلب حال امباركه اللى كانت عندها حالة نفسيه وديما ساكته وماتدوى مع حد ..الى انسانه ناشطه وتصلى وتتكلم وتهدرز وتزبط الصايبه .. فى مستشفى جنبنا زمان حاطين لافته مكتوب عليها “المريض معامله”..يعنى تعامليه باهى وتحنى عليه نص مرحلة العلاج فوتيها ..وهدا اللى صار مع امباركه حنيه صفيه عليها خلت عقلها يرجع يخدم وخلتها تحس ان الحياة تستاهل الواحد يعيشها لان فيها احفاد بيجو وبيخلو الحياة ليها معنى

فى دار نوم نادر ..
واقفين ورا الباب …صفيه تبى تطلع ونادر ماسك الباب ويمنع فيها …
-نادر/ هادى ثانى ليله بنفس الطريقه ..خيرك شن صايرلك
-صفيه عارفه روحها غالطه/ ماصايرلى شى قلتلك امى تعبانه ونبى نمشى نرقد جنبها
– مسك يدها / نمشو كلنا نرقدو مع بعض ..لكن خليك توة شويا هنايا
-صفيه/ لااا قلتلك منطلع
-نادر/ خيرك معش تحبينى
-صفيه / لااا انا مقلتش هكى ..لكن الدار هادى كرهتها
-نادر يضحك / وكرهتينى انا
-صفيه / بلا برادة عاد .. وعلاش منكرهك
-نادر/ يابنتى بالك حامل ..زمان صاحبى مرته تطلع من الحوش وتمشى لى اماليها لما تحمل
-صفيه فرحت / منعرفش .. بالك
-حضنها / تعالى اقعدى جنبى مستاحشك ..ووالله ما حنضايقك …
-صفيه كبدها دارها / تى حول بنرجع …
-نادر يضحك / باهى بري .. وغدوة فيقى بكرى نمشو نديرو تحليل
-صفيه مبتسمه / حاضر..من الفجر تلقانى فايقه …
وطلعت مشت لدار عمتها فرشت جنب سرير امها ورقدت

__________________________________________

–

ثانى يوم …

فاق نادر قبل صفيه …مشى للدار فتحها وخش
-يهمس/ صفيه ..صفيه نوضى هيا كان منمشو
-فتحت عيونها / باهى هى …
امه فايقه وتشبح فيهم لاكن ساكته ودايرة روحها راقدة
مشى وقف جنب الباب …ووقفت صفيه بتطلع ..
طلع هوا وطلعت هيا وراه وسكرت الباب وراها .. تحركت خطوتين وجتها دوخه ..
مشالها نادر يجرى شدها / خيرك حبيبتى
-صفيه / مش عارفه خيرنى دخت
-نادر/ تعالى حبيبتى قعمزى عالصالون استريحى …

قعدو شوى ولبست صفيه وطلعو دارو تحليل ..وبالفعل طلعت صفيه حامل …وروحو للحوش جايبين شوكلاته وخضره ولحم ..ونادر فرحان وسعيد …
خشت صفيه لى دار عمتها …لقتها فايقه
-صفيه / صباح الخير يااام …
-امباركه تسلت فى شعرها / صباح النور بنيتى ..ناديتك مارديتيش
-مشت صفيه لامها شافتها / امى مازالت راقدة
-امباركه / راقدة ايه …خليها تستريح
-صفيه / قتلك كنا طالعين انا ونادر ..
-امباركه / ربي يهنيكم بنيتى
-صفيه متحشمه ومواطيه راسها / مشينا لمعمل التحاليل ودرت تحليل وطلعت حامل
-امباركه فرحانه/ الحمدلله ياربي اللى خليتنى نشوف خلفه ولدى قبل ما نموت …الحمدوالشكر ليك ياااارب
-بدريه فاقت تشبحلهم وتتكلم بصعوبه / خخخيركم
-امباركه / نوضى يا بدريه ..نوضى صفيه حامل
-طول الدموع بدو ينزلو من عيونها / الحممممدلله يااااربى
-امباركه / ارتاحى يابنيتى وماديري شى احنا ناكلو حتى زميطه المهم انتى تثبتى وتجيبى صغار يفرحونى ويشفو امك ….

وسمعو حوش عبدالكريم بحملها .. وهيفا قررريب ماتت ..وسعاد وناديه فرحولها هلبا …اما حوش خيريه لما سمعو ركن فرح وركن قال حاجه والله كبيرة …اما جبار لما سمع ضغطه شيط وقريب جاته جلطه لان الشيطان قاعد يلعب بيه ومصر يطلقها من نادر ..لكن توة كيف الراى ببعد حملت .. ومن لما سمع بحملها يتخايل فيها كيف راقدة مع خوه ويتعدب

________________________________________

–

بعد اربعين مهند …

عمران بلغ عبدالكريم انهم بيجو يرفعو البنت …مشالهم هوا وصغار عمه خطبوها رسمى من حوش جدها.. حضر بوها بس ..خوتها مابوش يحضرو …ودفعولها شرطها .. وعطوهم موعد الخميس الجاى بيجيبوها ….دارلها جدها حفله وعزمو الناس كلها ..وسط حيرة صفيه .. شن عرف جبار بى هيفا ..
-لكن فى خاطرها / ربي يهنيهم ..وان الطيور على اشكالها تقع …
كملو الحفله وجت رحمه واحمد روحو بيها …وصلو بيها للحوش ..مفيش عرس ولا ضيوف..دايرين سبلة جبار مطلق ومفيش داعى للعرس …وخيريه قريب تموت متحشمه لان جبار ماشى مزرد مع صحابه ثلاث ايام ???

ركبو العروس لحوشها فوق بروحها ..جبار يبيله ليلتين ثانيات بيش يروح ..
وروح الافندى بعد ثلاثه ايام خش للحوش لقى هيفا مقعمزة
خش للدار طول لا سلام ولا كلام

-لحقاته هيفا للدار/ غير قول السلام عليكم
وهوا متلفت لدولابه وساكت يبيش ايرد عليها
-هيفا/ اجعنك مارديت
وتلفتت بتمشى ..
يمشيلها يجرى يشدها من شعرها / تبى تقعدى باحترامك هالشهرين ولا الثلاثه اللى بتقعديهم ..اتصكرى فمك العافن اللى ينقط سم …خير ما نقصه من حيث مانبت
-فكت شعرها / حول ايدك يا مصخ ..واحترم نفسك ..وايدك معش تمدها لانقصهالك
-عبدالجبار/ يرحم ايامك يا صفيه …يابنت الناس يا عاقله صوتك ماكنتش نسمع فيه
-هيفا قريب بتموت / صفيه اللى تبكى عليها راقدة فى حضن راجل ثانى وطلعت حامل منه
-دفها / تى بري يا مصخة ..الراجل الثانى عييتى تجرى وراه وتبى تخليه ايطلقها
-هيفا/ تى برة يا ديوث ..كانك راجل ماتدكر راجل ثانى لمراة على دمتك
-مشالها يجرى / تو انوريك الراجل كيف شكله …
وشدها مرجها طريحه تستاهلها ..وهيا عياطات بواصى تعطى فيه ..لين ركبو خواته يطقطقو
-امال / يا جبار افتح ..عيب عليك امك بيرقالها السكر تسمع فعياط مرتك لعند لوطا
-هيفا تعيط / وووك علينا يا ناس تعالولى بيقتلنى
-جبار يعيط / صووتك مانسمعاش …يا وسخه
ومشى للباب فتحه لين تقربع عالحيط ونزل …يخشو خواته يلقوها رايحه دمايات …

العجيبه انها فى نفس الليله فالليل تهنت ..

اما احمد وسعيد دارو صحبه مع بعضهم فى ايامات وفاة سيف ومهند .. واستمرت الصحبة لان سعيد حس ان احمد رجال …ويختلف على جبار
-سعيد / والله شن منقولك يا احمد .. احنا عويله وحدة من زمان ويشرفنى انسابكم
-احمد / قصدك خواتى
-سعيد / انا ماتفرقش عندى.. اللى تعرفها مناسبه ليا اعطيهالى .. فى حال وافقت طبعا
” سعيد مايبيشى يشك انه يعرف وحدة منهم”
-احمد / وانا وين منلقى نسيب احسن منك .. لكن نشوف بوهم وامهم كانا يوافقو
-سعيد / بوك نعرفه مايردلكش كلمه ..انت غير اختارلى منهم
-احمد / نعطيك الكبيرة ولا الوسطانيه ..الصغيرة فيهم صغيرة عليك هلبا
-سعيد/ امالا اعطينى الوسطانيه .. كل ماتكون صغيرة كل ما خير
-احمد / باهى .. ربي يدير اللى فيه الخير .. نشاور بوى وامى والبنت .. وانشاءالله خير

وبالفعل احمد شاور بوه وامه وماكانش عندهم اعتراض…
ونادى غادة وشاورها وحتى هيا ماكنتش معترضه ..وبالفعل عطو غادة لى سعيد وقررو العرس بعد ثلاث شهور

وفاتو الثلاث شهور ودارو عرس غادة ..مشى نادر حضر لان صفيه تعبانه وماتقدرش اتسيب امها …
وفى نفس مدة العرس هيفا راميه .. حملت وضربها جبار رمت .. جتها اختها ناديه بتعول عليها ومنها تحضر العرس وفى هاديكا المدة زادت تقوت علاقه ناديه واحمد ..مالاول نضرات وابتسامات.. وبعتالى بدو هدرزة …هيا ضاربه صحبة مع امال وطول الوقت هيا فى حوش خيريه

________________________________________

–

بعد اربعه شهور …

صفيه حامل فى التاسع …وتعبانه هلباااااا ….
احمد جايب خيريه تشبح فى بدريه …وبالمرة جت معاهم هيفا لحوش جدها …قعدت خيريه للمغرب وروحت هيا وولدها وخلو هيفا عند حوش جدها ….

ثانى يوم الصبح جت هيفا طقت على حوش نادر..فتحلها هوا
-هيفا عيونها مدمعات / نبى صفيه
-نادر/ صفيه تعبانه ومنبيش اى حاجه تنرفزها
-هيفا صوتها مخنوق/ خايف عليها منى ..
-نادر تحشم / مش هكى المقصود …
ومد يده للباب / خشى تفضلى

خشت هيفا وخش نادر قدامها / صفيه فى دارها …
فتحلها باب الدار وخشت لقت صفيه راقدة على ضهرها..
وبطنها قدامها ورايحه منفخة مع بعضها …
نادر مش مطمن قعد واقف قدام الباب …ويسمع فيهم شن يقولو خايف هيفا ترمى لصفيه بعض الكدبات
خشت هيفا / السلام عليكم
-صفيه تعبانه / وعليكم السلام اهلين هيفا
-هيفا تبكى/ كيف حالك يا صفيه
-صفيه / خيرك اللطف يا هيفا
-هيفا / حياتى عداااب.. والمفروض نطلق من جبار من الشهور اللى فاتو ..لولا ان خوى فتحى يهدد فيه
-صفيه / بعيد السو عليك من الطلاق يا هيفا ليش تقولى هكى
-هيفا / حياتى مش حتتساوى لين انتى تسامحينى …
نادر انتبه للدوة
-صفيه / وعلى شنو بنسامحك
-هيفا/ اكيدة نادر ماقالكش كيف اتزوجنا انا وجبار
-صفيه / لا والله ماقالى كلمه
-هيفا/ فى وفاة خوك مهند .. شدونى انا وياه بروحنا فى حوش امك
-صفيه / اللطف…وانتى منين تعرفيه بيش يشدوكم مع بعض
-هيفا/ ماهو هوا هدا اللى نبيك تسامحينى عليه
-صفيه/ مفهمتكش
-هيفا / كان المفروض ايشدوك انتى وياه بيش نادر ايطلقك .. هكى كنا متفاهمين انا وجبار
نادر شد روحه عليها بالسيف …يبي يسمع باقى الدوة
-صفيه / كيف يشدونى انا وياه ..بعيد السو عليا
-هيفا/ تدكرى لما قلتلك امك جابوها لحوشها بري شوفيها
-صفيه / ايه ندكر..وطلعت لقيت خوى حفيظ ركبت معاه ومشيت لامى
-هيفا / ماهو نيتك صافيه وربي لطف بيك..كنا متفقين انا وجبار انك انتى اللى تمشى للحوش ويخش هوا ويصكر الباب وانادو نادر واحمد كشهود ويشدوكم مع بعض …
قعمزت على ركابها / ياوخيتى سامحينى ..حياتى زى الزفت من ورا نيتك

خش نادر شدها من كتفها ويلز فيها / تبيها تسامحك وانتى كنتى بديريلها قضيه اخلاقيه .. تبونى نطلقها يا مسخين انتى وراجلك
-هيفا تبيش تطلع / ياوخيتى سامحينى .. بالك حياتى تتعدل شوى
-صفيه تبكى وحاطه يدها على بطنها / مسامحاتك ياهيفا ..
مساااااا م حاا ااااه ….ااااه بطنى
-نادر مشى لصفيه يجرى/ صفيه خيرك
-صفيه / شكلى بنجيب يا نادر .. ناديلى خالتى سعاد
وشدوها نادر من جهه وهيفا من جهه وطلعوها من الدار وصلوها للصالة …
امباركه تنادى/ يانادر خيركم
-نادر/ امشى لامى بسرعه قوليلها صفيه بتجيب
قعدت صفيه متكيه على نادر .. اللى قامها بين ايديه وطلع بيها للسيارة ….
طلعت هيفا من الدار لقاته قايمها بين ايديه …عرفت ان صفيه سكنت قلب نادر …اللى مستحيل مزال تحصل فيه حتى شوووية مكان …
طلعت تجرى بلغت امها وطلعت طول مشت مع صفيه …
جابت صفيه ولد..وقعدت يومين فى المستشفى وروحت …
ايامات صفيه تعبانه وحتى فجيابها ..امباركه هيا اللى لاهيه بى بدريه ….سبحان الله عالدنيا

روحت صفيه للحوش بولدها …سماته حناه امباركه سيف
وداروله اسبوع كبير .. جوها حماواتها وعمتها خيريه .. غادة ورحمه باتو عندها ثلاث ايام …غادة محسوب مرت خالها ..
وحتى هيا حامل

وبعد شهرين خطب احمد ناديه …ودارو العرس طول

_________________________________________

–
.
.
.
.

بعد اربع سنوات …..

هيفا حاطه بنيه فى حجرها وتبكى
-خيريه/ يابنيتى شوفى اختك كيف متهنيه .. وجابت بنيه ووليد .. وغادة عندها ثلاث صغار ..وانتى قاعدة على هالحال من اول يوم اتزوجتى
-هيفا/ يضرب فيا يا عمتى ..وكل يوم يهدد فيا انه بياخد وحدة ثانيه عليا
-خيريه / يابنيتى راهو الراجل كيف العيل …زى ما عودتيه وزى ماعاملتيه
-هيفا/ الا هدا …واعر وايده والضرب

اما فى حوش نادر …

بدريه توفت العام اللى فات عند ولدها حفيظ …تزوج بنت عمته نبيلة .. بنيه زين ووسعت بال .. وسكن فى حوش جنب حوش اخته صفيه بيش يتعاونو فى امه ..ولكنها توفت وخلت حزن كبير فى قلب ولدها وبنتها …
حفيظ عنده زوز صغار …وصفيه عندها ثلاث اولاد …ردو لحناهم الروح …تخااف عليهم وترعش من نسمه الهوا تمسهم ..سرايرهم فى دارها …وهما متعلقين بيها هلبا
..سيف ويزن و صهيب ..
متكيه هيا ونادر على سريرهم …
-صفيه / يانادر حول ..نبيش نحمل تربح
-يبوس فيها / قلتلك مانبيكش توقفى جياب لين تجيبيلى بنوته قمر زيك
-صفيه تضحك / قلتلك حول عااااد ..ربي يهديك يا ولد راجل امى ??
-نادر/ نحبك يا بنت مرت بوى
-صفيه تضحك / تى حول …غير خلينى نعانى هالشباب اللى جبتهم فى جرت بعض وبعتالى ساهل..كيف حتى بنوكلوهم .. وكيف بنلبسهم وبنعانيهم
-نادر / نبى عشر صغار ..انتى مادخلكش لا فى اكلهم ولا فى شربهم ..وكانا اضايقتى والمصروف شويا قوليلى
-حضناته / ربي يحفظك لينا ..والله ما منقص علينا حتى حاجه ..ريتك راجل كل حبيب
-نادر يضحك / خلاص امالا علاش تحرمى فيا …ونزل يبوس فيها وهيا تضحك

________________________________________

تمت ???

يا اختى مدامك بديتى ام اهتمى بصغارك .. لقيتى زواجه ثانيه تسترك مافيهاش باس لو صغارك معاك او مع حد مطمنه عليهم عنده زى بوهم او امك …لكن ماتهتمى بصغارك الجدد وتلغى القدم من حياتك .. راهم حتى هما دم ولحم ويحسو وعندهم عطش لحنان الامومه ….

ربي يحفظكم جمهورى .. وانشالله مانفقدكم ..وسامحونى عالتاخير .. والله من النت مش منى

تحياتى للجميع ..

نحبككككم ❤