رواية ولد راجل امي

بقلم زهور جمال الدين??
?الحلقه الثانيه?

فى حوش ساسى

نعيمه اتسيق فالمطبخ .. وساسى طلع من الدوش
-نعيمه مبتسمه باستحياء / نعيماً..وجمعتك مباركه
-ساسى مبتسم / الله ينعم عليك ويرحم والديك .. وديما قولى جمعه طيبه افضل
-نعيمه / غير يا ريتك تقعد معانا يا راجل ..معقولة تغيب بالاسبوعين والثلاثه
-ساسى خش دار النوم وهيا لاحقاته / هادى خدمتى اللى نصرف عليكم منها ..امالا ثلاث صغار وانتى معاهم منين بنوكلكم
-نعيمه / باهى زى متحب ..وربي يعطيك صحيحتك
-قعمز عالسرير/ اللى يعجبنى فيك انك ديما هادية وقولت باهى هيا الاولة فى فمك
-نعيمه / هكى ربتنا امى
-ساسى / اياك الصغار مش متعبينك
-نعيمه تضحك / قول التوامه .. ماشالله هما قراب من بعضهم فالعمر زى التويمه
-ساسى/ الله الله فيهم يا نعيمه …رانى نخلى فيك ونمشى عابي عليك والعبي على الله ..ومعاملتك ليهم بينك بين ربك
-نعيمه / كانا غلطو نفهمهم زى اى ام.. هما الكبير فيهم صغير.
-ساسى/ ربي يحفظهولى علاء ..غير يكبر شوى وبنعلمه سواقة الطانطا ويعاون بوه
-نعيمه / علاء هوينا يمشى وبدى ينطق فى الكلام مرة مرة
…لكن صفيه قاعدة تمرد وحفيظ يادوبك عمره شهور
-ساسى/ ربي يعطيك حتى انتى..ولا قاعدة امأجلة الموضوع
-واطت راسها / كلام العقل ايقول مازال .. نشوف روحى تقبلونى ونقبلكم ولا لا..وبعتالى ساهل
-ساسى ضحك / كانك علينا احنا قبلنالك .. لكن انتى شوفى روحك تقبلينا ولا لا
-واطت راسها / انشاء الله خير
-ساسى/ هى نوضيلى الصغار …ستاحشتهم
-نعيمه / مش امبارح نوضتهم وشفتهم لما خشيت الساعه 3 فالليل
-ساسى يضحك / اى والله ..شفتهم لكن استاحشتهم ثانى
-نعيمه / شوياا بس نغيرلهم حفاضاتهم وندوشلهم ونجيبهملك
-ساسى/لااا وراس نعيمه جيبيهم كيف ماهما مستاحشهم هلبا فوق ماتتصورى ..

_________________________________________

فى حوش خيريه

عبدالجبار واحمد كل واحد فيهم جايب سطل اميه فى يده .. وهووب يحدفوه فى وجهه بدريه مرت بوهم
-بدريه / وووك عليا هدا شنو
-عمران انخلع / هدا شنو يا خيريه
وطلعو عبدالجبار واحمد يجرو خشو لدارهم …والبنات واقفات يتفرجو ويضحكو
-بدريه تكشخ/ هادى هيا مرتك الطيبه ..هادى هيا اللى كسرتلى راسى وانت تنق تبينى انزورها اليوم قبل غدوة
-وبدت تشالى بايديها / حول ..حول .. كمشه قرودة
-عمران / غير هدى روحك يابدريه
وتلفت لخيريه / هدا شنو اللى داروه الصغار
-خيريه خايفه منه / والله مندرى عليهم ..قالولى مش حنطلعو من الدار قلتلهم براحتكم
-بدريه ادف فى عمران / قلتلك حول ..حول …قلة ادب
وطلعت من الحوش رايحة كلها اميه اتقطر.. وعمران يجرى وراها ايطيبلها فى خاطرها وسكر الباب وراه

-رحمه / خيره بوى ولى هكى يااام ..عمرى ماشفته بالدل هدا
-خيريه / انتى مازلتى صغيرة شن عرفك فى معنى كلمه دل
..ديري لخواتك نفاص فيسع خلى يفطرو

وخشت لدار ولادها …

________________________________________

فى حوش بدريه ..

-عمران / ياودى هادو فروخ صغار تو بتحطى راسك براسهم
-بدريه / ورحمه امى وبوى كان ماتاخدلى حقى ماعاد قاعدتلك فيها
-عمران / غير صلى عالنبى توة وخشى غيري حوايجك
-بدريه خاشه لدارها / انا بدرية راهو …يضحكو عليا كمشه قرودة هما وامهم
-لحقها عمران / انا مقدر الموضوع اللى صار معاك .. لكن رانى مانرضاش تقولى على صغارى ومرتى الكلام هدا
-بدريه / مرتك !!.. وكانها مرتك الغاليه ومش طايق فيها الكلام علاش تزوجت عليها يا بابا
-عمران داس غضبه / لا حول ولا قوة الا بالله
وتلفت بيطلع من الدار
-بدريه / وين ماشى
-عمران/ بنمشى لخيريه نفهم منها
وطلع من الدار
وهيا تعيط وراه/ تى والله كان ماجبتهمش يبوسو راسى ويتأسفو ما يصير طيب بينى وبينك

طلع وقربع الباب وراها وخلاها

________________________________________

فى دار احمد وعبدالجبار

امهم تلوم عليهم

-خيريه / ليه عليكم هكى اديرو فالمراة ..انى ربيتكم هكى..
عبدالجبار/ تستاهل اكثر من هكى ..تى والله لما نجليها من الحوش .. تى والله لما نقتلها
-خيريه تبكى / يا غبارتى .. ياحليلى ياوليدى بتصبحلى مجرم من توة ..انا ربيتك هكى يا جبار.. منو علملك الكلام هدا
-احمد / خدت مننا بوى ..وتبينا نسكتولها ..تى والله مانا ساكتين
-خيريه / هدا انت العاقل يا احمد هكى ادير لامك …
وقعمزت على كرسى الزيانه وتبكى
-احمد مشالها يبوس على راسها / سامحينى يااام .. والله ماعاد نعاودها غير اسكتى بس
-خيريه تبكى / توة جاى تسكت فيا …ليش اديرو هكى لبوكم
.. ليش تحرجوه قدام عياله
-عبدالجبار ايعيط/ خايفه عليه وهوا لوحك وخدى عليك
-خيريه / لوحنى !! صحيت بارك الله فيك
-مشالها عبدالجبار / والله ماقصدى ياام ..
-خيريه / اسمعو انتو الزوز.. المراة اللى خداها كاتبله بيها ربي من قبل مايخلق …وهدا قضاء الله وقدره ولازم نرضو بيه

-عبدالجبار / ارضو بيه انتو .. انا مانرضاش ووالله مانى ساكت ومامخليها تتهنى ببوى
-خيريه / هدا عمرك عشرة سنين تقولى هكى امالا لما تكبر شن بدير

انفتح باب الدار …
خشت رحمه تجرى / بوى ينادى فيك وشكله متعصب يااام
-خيريه / يااااربي فوت هالنهار على خير ..غير وين كان مدسوسلى بس ..هكى اديرولى ياصغيويرتى

_________________________________________

فى حوش خليفه جد عفاف

-عفاف / انا يا جدى منبيش نتزوج توة
-خليفه / وعلاش ماتبيش تتزوجى..قرايتك وبطلتى منها ..وفي شنو تراجى
-عفاف / مانراجى فى شى .. لكن مزال مانبيش نسيبكم انت وحناى
-حناها صالحة/لا سلم بنتى..المراءة ماليها الا حوش راجلها وصغارها .. الراجل اللى جاك متعلم وبيرفعك معاه بلاد برة
-عفاف تبكى / يا حناى مانبيش نتزوج .. نبى نقعد معاكم..
مانبيش انسافر
-جدها زى شك فيها / كيف يعنى ماتبيش تتزوجى ..خيرك انتى علاش ماتبيش
-عفاف خافت / لااا يا جدى ..انا قصدى مانبيش نسافر برة
-خليفه استريح / امسحى دموعك سلم بنتى …الراجل اللى جاك كانا تلفى ليبيا كلها والله ماك محصلة زيه
-عفاف/ يا جدى تربح
-قص عليها / اييييه علينا عاااد .. الراجل ولد عمنا وقصدنا
…مانقدروش انردوه …وتى روحك بيجونا التريس الاسبوع الجاى
وقفت عفاف تبكى وخشت لدارها
-خليفه متعصب/ خيرها البنت …نوضى توووة اعرفيلى شن قصتها
-صالحه / مافيها الا الخير …غير مش قادة تفارقنا
-خليفه / هوينا اختها تزوجت بدل المرة اثنين وما دارات هالنواحات هادى كلها
-صالحه تضحك / وشنو عفاف زى بدريه … عفاف حنونه هلبا …وبدرية قلبها بارد

وعمتك عفاف يا ما صاير فيها من لما خشت لدارها وهيا تبكى قريب تموت …
طلع جدها للجمعه …قامت الارضى وتتصل بى حوش عبدالجليل وخدمته عارفاته يمشى الجمعه وشى ماردش
..بعد روح من الجمعه .. سمع تشرين التليفون فالحوش رد

-عبدالجليل / الوو
-عفاف تبكى / عبدالجليل …
-قص عليها متعصب/ قلنالك الرقم هدا معش تطلبيه ..انتى ماتفهميش ولا كيف
-عفاف / غير اسمعنى بس
-عبدالجليل / اووووف ..اهو تو نقطع خيط التليفون من حيث مانبت …
وبالفعل سل فيشة التليفون من بريزته …

______________________________________

طلعت خيريه من جنب ولادها مشت لى عمران ترعش

-خيريه / والله خشيتلهم توة ماخليت ماقلتلهم
-عمران شاد فيده سبحته عيونه نار/ رحمه نادى خوتك من دارهم
-خيريه تترجا/ بالله عليك ماتضربهم يا راجل ..مازالو صغيرين وما يلتاموش
-عمران / مش ضاربهم …غير ناديهم
خشت رحمه نادت خوتها …طلع احمد يرعش ..اما عبدالجبار طالع بكل انفه
-عمران / انتو مش حنحاسبكم ..لكن امكم تطلع توة لحوش بدريه تمشى تتأسفلها وتبوس على راسها
-عبدالجبار/ لاااا امى ما تواطيش روحها لحد ولا تتأسف منه
-عمران تلفت لخيريه / تمشى تتأسفى عاللى داروه ولادك ولا نعاقبهم بطريقتى
-خيريه / لا ماتضربهمش ..اهو نمشيلها توة ونبوس راسها وايديها

صغارها اتأثرو بالمشهد هلبا …وقعدو مصدومين
-عمران / انا لا كارهكم ولا كاره امكم .. لكن خودوها من اليوم كل ماتغلطو انتو تمشى امكم تتأسف ..واللى يرضاها لامه ايزيد ايعاودها
-احمد يبكى/ لاااا يام انتى ماتتأسفى لحد ..اهو تو نمشولها انا وجبار ونتأسفو منها
-عمران / لاااا ..امكم هيا اللى تتأسف
-خيريه?/ حاضر
وخشت لبست فراشيتها وطلعت معاه ..لانها لازم تطلع للشارع بيش تخش باب ضرتها وخلت صغارها يبكو ..

طلعو من باب الحوش ….
-عمران / اقعدى هنايا شويا وبعتالى ارجعى خشى لحوشك
-خيريه / مش بنركبو لحوش بدريه
-عمران / بالك تحسابي تهونى عليا انخليك اتبوسى راس بدرية .. انا درت هكى بيش انأدبهم بس لانى عارف قداش هما متعلقين بيك ..ولو صارلك هكى حيولو على تالياتهم
-خيريه فرحت / ربي يخليك لينا

وبالفعل قعدت شوى وبعتالى ولت لحوشها .. صغارها كلهم يبكو …
-احمد / سامحينى يااام والله ماعاد انعاودها
-عبدالجبار / تى والله مانى ساكت ..ومزال بنعاودها ميه مرة هيا مزال شن شافت
وتلفت لاحمد / اقعد انت يا دقن
-رحمه / تى صكر فمك فرخ عمرك عشرة سنين وتتفتى
-عبدالجبار يعيط / نكرهها …ووالله لما تشوفو اللى نديرهولها

______________________________________

بعد شهرين

بدريه وعمران ماشيين فالسيارة
-بدرية/ بات فى حوش جدى ليش مروح
-عمران / انتى بتحضرى عرس اختك ..وانا شن مقعدنى معاك ..تعرفينى مشغول هلبا
-بدريه / على راحتك

فى شهر 3 من سنه 82 ..كانت زفة عفاف على عريسها
العرس كله قضاته بكى لانه معطيه بالغصب .. وعبدالجليل لما سمع تأثر هلبا وندم على تصرفه لانه بالفعل ايحبها .. لكن توة خلاص البنت انقرت فاتحتها وفات الفوت لأى ندم

وفاتو ثلاثه ايام العرس ..وسافرت عفاف مع راجلها لامريكا يوم صباحهم ….ثانى يوم عمران كلم بدريه عالارضى يبي يروح بيها فقالتله بضم حوش جدها…ومازالت تبى تقعد مع صغارها .. لان ساسى رفعهملها

وصاته ايجيها الخميس نهايه الاسبوع ايروح بيها

يوم الاربعاء العشيه خوها سعيد كانت عنده كريه لطرابلس بيرفع بضاعه .. ماشالله سعيد عمره قريب 13 عام يقرا
اولى اعدادى ..بكرى دارله جده سيارة مالاول يكرى للمنطقه وبعتالى بدى يكرى لطرابلس لان جهامته كبيرة مايتوقعوشى صغير …
كلمت بدرية عمران تبى تقوله انها بتروح مع خوها لحوشها
..لكن هوا لا رد على ارضى الحوش ولا ارضى المكتب ..دارت بدريه حوايجها وروحت مع خوها …وصلو قيس الساعه 10 فالليل ..نزلها قدام الحوش ..فتحت الباب وحطلها شناطيه فى السقيفه وولع السيارة ومشى ..على قد ماشدت فيه اخته يبات .. قاللها شى بنروح للحوش مزال الوقت …

خشت بدريه للصالة …الحوش هدوء ..وتسمع فى ضحك فى دار نومها …خشت فتحت الباب تلاقى راجلها جايب مراة على سريرها ….

قعدت تعيط / وووك عليا ووووه ….هادى شكون …
وعمران والمراة جنبه مخلوعين .. مشتلهم تبى تحول عليهم الغطا وتفضحهم ..من هول الموقف طاحت دايخه

رفعها طول للمستشفى …قالوله هادى حالة اجهاض ….
قعدت يومين وروحت لحوشها … وعمران ياخد ويتعدر وقاللها هيا رمت روحها عليا راجلها فالصحراء ومخليه صغارها عند اهلها قالتلهم عندى ضمان فالحوش ….بدرية رضت وسكتت ..بالله وين بتروح ..والكل حيقول عليها مطلقه مرتين ..وبعدين حالة عمران المادية كويسه ..ومش من السهل تتخلى عالعز

ومرت الايام واستمرت مشاكلها مع راجلها يوم تشده فى استراحه مع امراة ويوم تلقاه جايب سكرتيرة قنينه تلزها .. وقعدت عراكاتها حتى مع ربايبها مستمرة …احمد عقل وسمع كلام امه وفات مرت بوه .. لكن عبدالجبار قعد حاطها فراسه وكل يوم يديرلها عملة..وزادو معاه خواته غادة ورانيه كبرو شوى وبدو يعاونو فيه
_________________________________________

ومرت عشرة سنين …..سنه 92

صفيه عمرها قريب 12 سنه ..تقرا صف السادس .. كبرت قبل وقتها ..اطيب واضم وتغسل وتسيق .. مرت بوها علمتها
كل شى ..

فى حوش ساسى

-نعيمه تلبس فى الردى/ يا صفيه…عينك على خوتك .. اهو بنمشى ومش معطله
-صفيه / يا عمتى مش قلتلك بيجينا خالى سعيد بيرفعنا لحوش جدى وقلتيلى باهى
-نعيمه / شفتاها بعينك عمتك نبيلة كلمتنى توة وقالتلى بيمشو اليوم لنفاس عمتك خديجة جارتنا.. ماكانش فى بالى هدا علاش قلتلك باهى
-صفيه بحشمه ?/ وتوة كيف بيصير يا عمتى
-نعيمه/ اهو بنمشى توة ومنعطلش …كانا جاكم ابعتيلى حفيظ تو نروح انا لخوتك
-صفيه/ باهى نرفعهم معاى وخلاص .. ولما تروحى كلمينى تو نقول لحفيظ ايجيبهملك مع خالى
-نعيمه / باهى ديري رايك

نعيمه جابت ولد وبنت اعمارهم 6 سنين و5 سنين ..من لما كانو صغار المهتمه بيهم اختهم صفيه .. هيا ادير المرضعه وتغير الحفاضات .. نعيمه حشيشتها طلوع ولمات ..بالرغم سايرة المركب بينها وبين صغار راجلها ..هيا متعلمه ومتحبش تضلمهم تتعامل معاهم عادى وخلاص ..لا فى حب ولا فى كره ..ماشية الامور وخلاص

ما عبدالجبار صار عمره 19 سنه .. كيف طلع من ثالثه ثانوى بتقدير ممتاز .. خش لكليه الاقتصاد …هوا ممتاز فقرايته تمناته امه يخش لكلية الطب لكن هوا يبي يطلع دكتور محاضر فالجامعات …
وبردو مشكلته مع مرت بوه ماخلصتش …لانها اصبحت حرب هوا يضرب وهيا ترد …ممكن لو سمعت كلام عمران لما يقوللها اهمليه راهو فاتها ..لكن هيا قعدت حاطاته فى راسها وبين عيونها من لما تسبب فطياحها من الدروج فى ثانى حمل ليها …ومنها ركب عليها الرمى وقعدت تحمل وترمى…

فى دار عبدالجبار ?

-عبدالجبار / نعم نعم …شرالها سيارة
-رانيه / ايه شراهالها من ثلاث ايام .. وهوينها مدرسه قدام حوشهم
-عبدالجبار / مانبداش راجل كان خليتها تتهنى بيها
انفتح الباب خشت خيريه / انتى عندك امتحانات ولا ..شن جايه توشوشى لخوك
-رانيه تلكلك خايفه / لاا انااا جاياته نبيه يشرحلى مسألة رياضيات
-خيرية زابطتهم / ومنين خوك بيعرف مسائل اولى اعدادى وهوا فالجامعه
-رانيه / تى ماهو قاريهم يااام خيرك
-خيريه / باهى باهى .. اطلعى اقري قرايتك غدوة عندك امتحان

بعد يومين سمعو صوت تفجير فالشارع قدام الحوش طلعو يجرو لقو سيارة مرت بوهم ركبت فيها النار والبومبا اللى فى وسطها هيا اللى تفجرت ..لما شافو لقو بيدون بنزينه تحتها ولعت فيه النار وتسبب فى حرق السيارة ??!!!

صفيه اتهمت عبدالجبار ان هوا ورا الحريقه .. لكن هوا اثبت انه وقتها كان فالجامعه وجاب واحد صاحبة شهد معاه
…سكتت مع انها متاكدة ان هوا ورا العملة
وفاتت ايام سود عليهم هما الزوز .. وصلت تعطي فى فلوس لواحد بلطجى بيش يضرب عبدالجبار فالجامعه ..وبالفعل.. ضربوه طريحه رقدوه فالمستشفى وفاتو عليه امتحانات هاداكة السمستر بيعاوده ياخسارة …
وبعد روح للحوش جت بدرية زعميتا تحمد بالسلامه …
مقعمزين جنب عبدالجبار وهوا راقد فسريره مكسرات ايديه الزوز ورجله اليمين ..
-عمران / ديما نقولك رد بالك من المشاكل

-عبدالجبار يتكلم فوق النفس?/ ومن امتى انا نديرلك فالمشاكل يابوى
ويشبح لبدرية / كان مش من صغار الحرام اللى مخلوش لصغار الحلال حاجه ..اهو حتى قرايتى وقفت
-بدريه شادة مروحه حمراء وتمروح على وجهها وتشبحله و مبتسمه بمكر/ معليش هوا سمستر ويفوت .. مش حاجه كبيرة تعوضه العام الجاى
-خيريه / ربي يبعد عليه صغار الحرام وليدى

-خشت رحمه للدار / بوى يبيك راجل قدام الباب
-عمران وقف / اهو جاى هى
وشبح لبدرية / شويا بس نشوف الراجل ونجى …
وطلع من الغرفه
-خيريه بهدوء/ خلى نجيب طاسه عصير
-بدريه بأنفه ?/ متعبيش روحك منشربش فيه
-خيريه / امالا خلى نجيبلك طاسه شاهى..غير البنات عندهم امتحانات يقرو فى دارهم …
وطلعت من الدار وقعدو بدرية وعبدالجبار يشبحو لبعضهم
-عبدالجبار/ اقسم بالله ماك باردة بيها يابنت الحرام
-بدريه وقفت وضمت المروحه ووجهتها عليه / بيش تعرف كيف تطاول على سيادك يا واطى
-عبدالجبار بيتحرك مقدرش/ ياعنشكلك يا حقيرة
-بدريه / المرة هادى كصرتلك ايديك …ومرة ثانيه نكصرلك راسك يا حيوان

وطلعت من الباب …
-بدريه / هى بالسلامه توة
-طلعت خيريه من المطبخ / خيرك اللطف هاك قاعدة
-بدريه / لا لا هوا هداكة حمدالله على سلامته

طلعت للممر وخيريه وراها …
انفتح الباب خش منه عبدالجليل …لقى بدريه قدامه ..
شبحلها شبحة حقد .. وخش
سقدت خيريه بدريه وسكرت وراها الباب وخشت للصالة
-عبدالجليل/ المصخة هادى شن ادير هنايا … وكيف تخليها تخش حوشك
-خيريه / جت مع عمران تحمد على عبدالجبار …شنو تبينى نلزها
-عبدالجليل/ لااا دخليها لحوشك لين تلزك هيا
-خيريه تبى تغير الموضوع / قالتك امى عاللموضوع اللى قلتهولها
-عبدالجليل / اى موضوع
-خيريه / موضوع البنت اللى قلتلها عليها
-تلفت لدار الاولاد / ولدك وينه
-خيريه / مش نكلم فيك انا ولا
-تلفتلها بحزم / موضوع الزواج انسيه نهائي …تفهمى ولا لا
-خيريه / يا اوخى
-عبدالجليل / خلاص عاااد

وخش لدار عبدالجبار وحكاله ان مرت بوه ورا حكايه ضربه وانها اعترفتله بلسانها …

واللى زاد العداوة بين بدرية وربايبها …لما جى عريس لاختهم رحمه جايبه خالها ..وقتها كان عمرها 22 سنه … دارو مقابله وعجباتها وعجبها ..دورة الولد اختفى .. زبط عبدالجبار ان بدرية ورا الموضوع
-احمد / يا راجل ديما وانت حاطها بين عيونك المراءة
-عبدالجبار / نخلصك الف جنيه كان ماتطلع هيا ورا الموضوع
-احمد / باهى شن بدير توة
-عبدالجبار / عندى موعد مع الولد فالقهوة بنحلفه يحكيلى خيره وخر ..وكان تطلع هيا لما نكرهها فحياتها

وبالفعل تلاقى عبدالجبار مع العريس وحلفه وقعد شاد فيه عالسبب اللى خلاه ايوخر .. وبعد اصرار من عبدالجبار اعترفله الولد قاله ان بدرية مرت بوك هيا اللى كلمت امى ودمت فى امك واختك ….

روح عبدالجبار وهوا ناويلها ايام سود ….وبالفعل مش لحوشها وتعارك معاها قدام بوه وسبها
-عمران / حاق انتى قلتى هكى للمراة
وهيا تحلف وتبكى يعطينى ويجينى كان قلتلها ….

المهم غصوروها عبدالجبار وبوه لين اعترفت واعتدرت

وهكدا … قعدو مد وجزر … رحمه واحمد هاديين مش متاع مشاكل …اما عبدالجبار وخواته الصغار قعدو واقفيلها زى الشوكه فالحلق
وبعد فترة خدى عمران ولده احمد معاه فى خدمته ..هداكا وين زادت شاط النار بينهم ..

_______________________________________

وفاتو 8 سنين …..وصلنا سنه 2000

فى الثمانيه سنين اللى فاتو جابت فيهم بدريه زوز ولاد على روس بعضهم سمتهم سيف ومهند …
وعبدالجبار تخرج من كليه الاقتصاد وقرى فى الاكاديميه وتخرج منها واصبح استاد محاضر فالجامعه
رحمه اختهم تزوجت … والبنات الثلاثه فى الجامعه .. امال الكبيرة تقرا فى كليه العلوم والعام هدا بتتخرج
صفيه بعد الثانويه قرت عامين فالتمريض وتخرجت .. بالرغم كانت ممتازة فالقرايه …لكن ساسى واعر هلبا مايمشيش معاه بنته تقرا فالجامعه فطرابلس وتخش الداخلى … ولكن معاملة نعيمه تغيرت مع ربايبها …بدت تفضل فصغارها كانا جاعو اطيب وكنهدا مفيش داعى .. وفالعيد الفلوس يادوبك يشرو للصغار حوايج ماهو مايفهموش الصغار وانتو الكبار عادى

علاء عمره 21 سنه بطل من قرايته فالاعدادى ويخدم مع بوه عالحماله يجيب فى بضايع من بنغازى وسبها …

روح عقاب الليل للحوش …
-علاء/ صفيه …صفيه
-صفيه راقدة عالفراشات وجنبها خوتها الصغار/ نعم
-علاء/ تعالى
زبطاته علاء فرحت …طلعت من الدار
-صفيه / اهلين يا علاء حمدالله على سلامتك
-علاء/ الله يسلمك يا وخيتى …اديريلى عشاء من الصبح مش ضايق حاجه
-صفيه / نفيص ساعه وتلقى عشاك واتى
-علاء مبتسم / تى عادى حتى نص بالدحى وخلاص
-صفيه / مزال والله … شوية وتلاقى المبكبكه واتيه
-علاء/ حفيظ وين
-صفيه / راقد فالمربوعه
-تلفت / خلى نمشى نشوفه

-وجهت ايدها على دارها/ ماتبيش تسلم على خوتك الصغار
-يضحك / انتى مامضيعك الا حنيتك الزايدة …وينهم خوتى
-صفيه / اهما لداخل خش شوفهم
خش علاء للدار نزل على ركابه وطبس على خوته باس عليهم …وطلع …
مشى للمربوعه نوض حفيظ سلم عليه وقعمز …
علاء وخوته الكبار متآلفين هلبا …لكن الصغار ماعنداش عليهم جو

طيبت صفيه المبكبة ورفعتها لخوتها فالمربوعه
-حفيظ / كان نقولك بمن كنت نحلم
-صفيه / انشالله خير .. بشكون
-حفيظ / بامى .. مش عارف شن جابها ليا قداش ليا ماشفتهاش
-تلفتله علاء/ من امتى ماشفتهاش
-حفيظ / 3 سنوات
-علاء/ معقولة !!
-حفيظ / والله الا زى مانحكيلك ..
-تلفت علاء لى صفيه / وانتى
-صفيه / زيه حتى انا …امى ليها ثلاثه سنين ماجتش حوش جدها وين منشوفوها
-علاء/ وعلاش ماتمشولهاش
-صفيه / عمرنا ما مشينا ..ومن لما جابت صغارها الصغيرين معش جت
-حفيظ/ اهو اختها عفاف بتروح تو تجيها تجرى ..الباقى احنا مش حاسبتنا
-صفيه / تى خيرك تتكلم على امك هكى ..عيب راهو
-حفيظ / وراس اوخيتى مدى الكاشيك ..حتى انتى تحشيلها وهيا ميته
-علاء/ باهى فكونا من هالموضوع

_______________________________________


بعد فترة ….

عمران ضاعو منه عشرين الف دينار …معش عرف روحه وين دسهم ..

نادى بدريه وجابها لحوش خيريه

ويعيط / عندى عشرين الف مالقيتهمش…الليله يطلعو والا الله مايصير خير الله
وتلفت لبدريه / ماحد ايقولى شوف احمد معاك …احمد هوا اللى عطاهملى وانا معش عرفت روحى وين دسيتهم
-بدريه تشالى / شن قصدك بيها …انا اقسم بالله ماخشولى دمه …هدا علاش منادينى هنايا بيش تخنبنى
-عمران / تى صكرى فمك لانحدفك باللى فيدى
-خيريه بهدوء/ عشرين الف مش مبلغ بسيط ..غير ادعى قول “اللهم اجمع بينى وبين ضالتى ”

وقعد قريب ساعه ايغصور فيهم الزوز ..ومفيش فايدة
طلع وخلاهم وروحت بدرية لحوشها متحبش تالاقى مع عبدالجبار

روح عبدالجبار لقى امه مضايقه

-عبدالجبار / خيرك يااام
-خيريه / ياوليدى بوك رايحات منه عشرين الف مالقاهمش
-غادة/ وجى حنبك فيهم
-عبدالجبار تعصب/ ااه .. جنبها
-خيريه / ضمى فمك واسكتى …
-عبدالجبار وقف / كيف خنبك هادى …فهميهالى ترا
-خيرية / ماخنبنيش انا بس .. نادى حتى بدريه وقالنا بالك شفتوهم
-عبدالجبار / منغير ما يشك فيك انتى يااام ..معروفه هاديكه العقرب هيا اللى خدتهم
-خيريه / ياوليدى خلى يقول اللى يقوله ليا انا على كيفه ..المهم ما خنبش واحد من صغارى عادى …انا خفته غير يقول على احمد
-عبدالجبار/ يا ريته قال الكلام هدا على احمد ولا قاله عليك
-خيريه / لااا ياوليدى ..غدوة تتزوج وتعرف قيمه الضنى .. الام دير فيها اى حاجه ماتحسش…لكن كبدها ماتتحملش فيها حتى حاجه
عبدالجبار جت بدريه بين عيونه / كيف ياااام
-خيريه / الام تموت وتنوض حيه لو حد دار فى ضناها حاجه …راهى كبد …مزال ماتعرفهاش لين تجربها
-عبدالجبار يخمم / يعنى ياام لو صار فى بناتك حاجه تدمرى
-خيريه / بعيد السو عليكم صغيويرتى …والله نموت وتدفنونى كان يصير فى حد منكم حاجه
-غادة/ بعيد السو عليك يااام …ربي يطولنا فى عمرك

شرين باب الحوش ….طلع عبدالجبار يخمم فى كلام امه ..فهم منه ان اللى تبى ادمره .. لازم تخشله عن طريق صغاره ….

لقى محمد جارهم قدام الباب يبي يهدرز … ركب معاه فى سيارته وقعدو يهدرزو … انفتح باب حوش بدريه وطلعت منه لابسه فراشيه وهيا ترعش
-محمد / شوف مرت بوك كيف تصفق
-عبدالجبار / وين ماشيه بنت الحرام هادى

وقفت قدام حوش خيريه وحدفت محرمه مربوطه ترا شن فيها
ويفتح عبدالجبار الباب ويمشيلها يجرى …ومحمد وراه

-عبدالجبار/ اوقفى ما مصخة شن حدفتى
-تعرى وجهها / ووك عليا منين طلعتلى انت
-عبدالجبار ايعيط / شدها يا محمد خلى مشبح الصرة شن فيها
قام عبدالجبار المحرمه وفتحها ويطيحو منها الفلوس
على فتحت خيريه فى الباب تفرجت عالفلوس طايحات
-بدريه / اهما الفلوس يا خيريه …طلع ولدك جبار هوا اللى خانبهم
-عبدالجبار شاده محمد صاحبه / انا خناب يا مصخة …كان مش شفتك لما لوحتيهم فم الباب انا ومحمد
-محمد / يا راجل هدى روحك .. بتضرب مرت بوك ولا كيف

ساعه زمان كان عمران فالحوش …
بدريه وعبدالجبار يتعاركو كل واحد ايعلى فى صوته وخيريه تحز
-بدريه / انت اللى خانب الفلوس يا كداب وشاكهم فيا
-عبدالجبار / تخنبى فيا يا مصخة …امالا شن اديرى قدام حوشنا لما شديتك
-خيريه / ياوليدى بوك واقف تحشم

عمران يسمع وساكت …عارف ان بدريه بالفعل هيا اللى خنبت الفلوس …لكن سكت

-عمران / بدريه روحى لحوشك
طلعت بدريه ولما قربت من عبدالجبار تلفتتله / خزى
وطلعت من الحوش
-عمران قرب من خيريه / سامحينى

وروح للحوش عطى لبدريه طريحه قريب قتلها … وكانت اول مرة يضربها

وبات عبدالجبار هاديكه الليله وهوا يخمم … المراة مهما اديرلها مادورش …الا ادا كان عصرتلها كبدها عن طريق صغاره

للصبح مرقدش وهوا يخمم …..

ثانى يوم الصبح طلع من داره لابس بدلة وقرواطه
-فتح دار امه / صباح الخير يااام
-خيريه / نهارك سعيد ومبارك ياوليدى
خش للدار وسكر الباب وراه
-عبدالجبار/ نبى نقولك حاجه يااام
-خيريه / قول وليدى
-قارن حواجبه / نويت نتزوج
-خيريه / هدا احلى خبر تقولهولى …لكن خيرك مش فرحان
-فاق بنفسه / لااا عادى
-خيريه / عندك وحدة معينه ولا تبى ندورلك
-عبدالجبار/ لا فى وحدة معينه نبيك تمشيلها
-خيريه فرحانه / ومنو هادى اللى حطيت عليها العين امها داعيتلها ليله القدر ياوليدى
-عبدالجبار/ ….

_______________________________________

تمت …….ويتبع ?

سامحونى عالتأخير حبايبي …بس مشيت مع امى العيادة..هوا هداكه الوقت …
لما عطلت طولت فالحلقه …

زعما عبدالجبار من بيتزوج … اكيدة كلكم عارفين
زعما بياخدها ولا بتوقفله امها فالموضوع .. الحلقات الجايه نشوفو

نحبكككككم

error: