رواية ولد راجل امي
?الحلقه الاولى ?
السلام عليكم ورحمه الله وبركاته ..
ستاحشتكم ياحلوات اول مرة نتأخر عليكم هكى قريب اكثر من اسبوعين ..
اولا نبي نرحب بيكم احباب قلبي وجمهورى القوى.. انتو رضا الله والوالدين عليا ..غمرتونى بكرمكم وحبك ربي مايحرمنى منكم ..ثانيا نبى نعتدر من كل البنات اللى اختارو رواية الرعب .. انا معدورة لانى درت تصويت وقلنا الروايه الاعلى تصويتا هي اللى بنختاروها ..بالرغم اقسم بالله حتى انا مايلة لرواية الرعب لكن الله غالب ربحو هما جماعة الرومنسيةلانهم اكثر مننا ?
المهم نرحب بيكم ياطيبات وطيبين .. كتبنا رواية على هيئة مسلسل…واللى تبى تنسخ الرواية وتنزلها فى اى قروب هيا ليها مفيش داعى تسألنى بس تخلى اسمى عليهاوماتمسحاش
نبدو روايتنا ??
–
سنه 78 فى وحدة من مناطق ليبيا خارج طرابلس .. كان عمك ساسى كيف متزوج العام هدا ومتهنى وفى خيار الخير
.. ساكن فوق اهله فالدور الثانى … حملت مرته.. وفى شهر 12 سنه 78 جابت ولد سموه علاء..ومن لما جابت يانارى معش مشت لقدام..مرضت جتها زى العين..هداكه الوليد تعانى فيها حماتها نبيله ..صبيه وقاعدة معاهم فى حوش بوها وقتها ..وبعد شهرين توفت مرت ساسى يانارى ..وخلتلهم هداكة الولد …
حزنو عليها قريب 6 شهور….وبعدها جماعه الجامع قالوله لم ولدك من حوش اهلك وخود مراءة تعمرلك واتربي ولدك
…مشى لاخته نبيله باعتبار امه كبيرة فالعمر
-ساسى/ والله شن منقولك يا نبيله .. اوخيتى تعبتك فى علاء كل ليله وانتى ساهرة عليه ..الحق عزمت ونويت نتزوج ونبيك تشوفيلى وحدة
-نبيله / خيار مادرت يا اوخى ..وعروستك عندى ليا فترة حاطه عليها العين
-ساسى/ منهيا ترا
-نبيلة / بدرية بنت عمى شعبان جارنا الله يرحمه
-ساسى/ تى كيف يا نبيله ..اولا بدرية صغيرة عليا هلبا .. ثانيا انا عندى ولد كيف بتتحمله وهيا طايشة ومش قد المسؤليه
-نبيلة / ماتخافش يا وخى ..كانا على ولدك ايدنا بيدها لين تتعلم وكانا عالزواج بدرية فادة من حوش جدها وتبى تتزوج بأى طريقه…وسيروها تتعلم عندك
-ساسى/ غير امتى كبرت هيا ..لما بوهم توفى ومشو لحوش جدهم كانو صغار هيا وخوتها
ومن هنا بدت الحكايه … سنه 79 عمتك بدرية جاها ساسى يخطب ..فرحت ووافقت طول ..لا خممت فى فارق السن ولا خممت فى انه عنده عيل عمره عام قاعد لحمه حمراء يبي من يعانيه … طول اتزوجاته .. خداها صبيه عمرها 17 عام وهوا فى 35 سنه ..
هيا صغيرة عليه هلبا مواليد سنه 62.. وهوا مواليد 44 .. امها وبوها دارو حادث سيارة متوفيين من لما كانو هيا وخوتها صغار
..خداهم جدهم بو بوهم وحناهم … عندها اختها عفاف على راسها عمرها 16 سنة .. وخوها سعيد عمره 10 سنين … الجد والجدة مايتحملوش المسؤليه ..لما جاها خطاب عطوها طول
وياحنه عمك ساسى من لما شافها انخبط فيها طول.. البنيه مملحة ولسانها عسل ..وهاداكه المكياج والارواب ..شى جديد عليه ماشافاش عند المراءة الاولة …المهم خلاته ايطيح على راسه …
الولد الصغير شداته حناه وعمته نبيله قريب شهرين .. وبعتالى خلاص عطوه لبوه ركبه لمرته.. ولكن الله غالب اختياره كان غلط … بدرية ماتحملتش الولد
بعد 3 شهور
بدريه مقعمزة عالارض ومتكيه ضهرها عالسرير ..وحاطه علاء على رجليها تهز بيه باعصاب ودايرتله المرضعه فى فمه
وساسى مقعمز عالسرير
-بدرية باعصاب / ماعندى مابنديرله ولدك .. اناقاعدة عروسه وبنعيش ايامى
-ساسى/ يابدريه غير شدى الولد كويس بيشرق بالعياط وانتى داكتله الشيشه
-تهز فى رجليه بالولد بعصبيه / انا مش شغلى ..قلتلك خليه عند عمته … هيا تعرف كيف تتعامل معاه
-نزل من السرير وقرب منهاوقام الولد وبدى يترجا / اهو انا معاك ونعاونك فيه ..لكن مانقدرش انرده لاختى عيب حتى فى حقك
-وقفت / اسمع هما كلمتين ..يا انايا ولدك
-ساسى /غير وسعى بالك وكل شى يلتقاله حل
“هوا يا نارى عجباته وعجبه الجو اللى دايرتهوله معش قادر يفوتها ”
اصر ساسى ان مايعطيش ولده لاخته …وقعد الولد عند بدريه يوم ياكل ويوم لا.. لما يبكى ويجيبه بوخ ايرقده بينهم عالسرير تضايق وتبدا ادير فى حركات اغراء بيش تغريه و يحول الولد من عالسرير ….
بعد شهر طلعت بدريه حامل .. وبدى فيها هداكه الوحم ودايره روحها ادوخ حالة
-بدرية / نبيله معليشى تخلى علاء عندك
-نبيله / ياوخيتى تشبحى فيا تعينت فالمدرسة وبديت انقري..وحصتى ديما الاولى .. امتى بنفيق من النوم وامتى بندله وامتى منطلع
-وقفت بدريه / اسمعى يانبيله دفيتولى الولد وانا عروس وسكتت .. لكن وانا حامل والله ماهو قاعدلى
-نبيله باستغراب / قوليه لراجلك الكلام هدا ..علاش جايه تقولى فيه ليا
-حست ان حماتها تكنطت فغيرت اسلوبها / اوخيتى تربحى غير شديه توة مدامنى نتوحم وبعتالى ناخده
-نبيله / باهى ناخده لكن ماتعبيش عليا ..مش كارهة ولد خوى لكن انتى عارفه عرسى نهايه الصيف ..وامى عزوز كبيرة مكسوبها انا وساسى ماتقدرش تشده بعدى
-بدريه /باهى غير لين ايتم الوحم وبعتالى ساهل
-نبيله/ باهى تمام
-بدرية بخبث/ كلميه انتى خوك ..وقوليله نبى علاء عندى هالايام
-نبيلة?/ باهى فهمتك خلاص
وكلمت نبيله خوها ساسى انها تاخد ولده عندها مؤقتا .. لكن هوا رفض وبشدة
-ساسى / شن تقولىمعقولة ياوخيتى ولدى يتربي برة حوشى ..هادى لا ترضى الله ولا عبده
-نبيله / ياوخى غير فترة لما مرتك تتوحم بس
-ساسى / قلتلك لا يعنى لا
المهم على قد ماحاولت بدرية اطلع الولد من الحوش ماقدرتش معش عجبها الوضع..لقت الموضوع تعب ومسؤليه
قررت انها تتخلص من الجنين وتطلق بدت اتنقز من السرير للارض كل يوم على امل العيل اللى فى بطنها ايطيح …لكن ارادة الله فوق ارادتها وثبت الجنين …وهيا تعانى فالولد
الصغير ..قدام راجلها المعامله حلوة ومن وراه كره درجه اولى لا توكل لاتشرب وطول اليوم الولد يبكى ..وعمته تسمع وساكته معش عندها عين تركب وتكلمها عليه لان بدريه اتهمتها انها هيا اللى عبت راس خوها وخلاته يرفض اينزل الولد عندهم …
وفاتو تسعه شهور .. وفى شهر 5 سنه 80 جابت بدريه بنوته زى القمر سماها بوها “صفية ” …
بدريه من النفاس تعبانه يالله تتحمل بنتها …وعمك ساسى مانعها تنزل الولد تحت .. وجت الناس وباركت وكلت العصيدة وبدريه تغلى وماعاجبها شى …
بعد ثلاث شهور فى ليله من الليالى دارت مع راجلها عركه للسمى
-بدريه/قلتلك الفرخ هدا مايقعدليش..عجبك باهى ماعجبكش
باهى ماعجبكش كل واحد مننا يمشى فى حالة
-ساسى مغتاظ/ تى صكرى فمك ونقصى صوتك امى تسمع فيك…لعلمك انا اصلا جايبك على خاطر علاء ولدى بس راهو
-بدت اتشاللى بايديها / وليش يا بابا …شنو ناقصتنى ايد ولا رجل ..ولا تحسابنى كبرت فالعمر..تى انا كانا مش جدى سيف عليا والله ماناخدك شيبانى اكبر منى
-شدلها شعرها / توة طلعتلك شيبانى يا وسخه
-تفك فشعرها / تى حول ايدك ياللى ماتتحشمش على وجهك
وفكت شعرها / طلقنى …قلتلك توة طلقنى
-قام ايده ايحدر فيها / اسمعى ..كانك تبى تنتلفى لحوش اهلك بري مشيه جدى انشاءالله.. لكن بنتى ماتحلميش تاخديها معاك
-بدريه / مصح وجهك امالا عابى مناخدها معاى..من بيقبلنى بيها ..يابابا انا نبى نتزوج ونشوف حياتى
-ساسى / امالا مدامك بتخلى البنت بقناعتك …خلى نشفى غليلى ماللى تحملته وصبرت عليه منك عام كامل
ويحول السبته من خصره ويطيح فيها يعطيها طريحه متع نباش القبور..قريب ماتت بين ايديه ..وهيا تعطى فيه صياحات …
وبالفعل روحت لحوش بوها وطلبت الطلاق …ودارو قضيه
لكن الطلاق اتأجل لانها طلعت حامل??
__________________________
–
وفاتو الايام وفى نص سنه81 جابت بدريه ولد سماه عمك ساسى عبدالحفيظ على اسم بوه .. رضعاته بدريه شهرين وبعدها عطاته لبوه بحجة ان جايها عريس وهيا تكدب وتحط
وقعد عمك ساسى ايلاجى بهادوكا الثلاث صغار …مالقى من تاخده ..عيلة فى ليله من بيتحملهم ..اخته نبيله اجلت عرسها على خاطر وضع خوها ماتقدرش اتسيبه وامها مراءة كبيرة ماتقدرش اتشد صغيويرة صغيرين واللى خاطبها ولد عمهم قدر وضعهم واجل عرسه للصيف اللى بعده …
اما فى حوش عمك خليفه جد بدريه
-عفاف تبكى / ياوخيتى معش يبي ايرد عليا
-بدريه / وعلاش يا ماما شنو انا اول وحدة نطلق بيش ايعايرك بيا
-عفاف/ قلتله ماقتنعش .. قالى اختك هيا اللى خلتله الصغار وطلبت الطلاق مش هوا اللى طلق
-وقفت بدريه / هوا وين …هنايا ولا فى طرابلس
-عفاف تمسح فدموعها /هنايا
-بدرية / خلاص قولى لحناى بدريه مشت للمحل ترا شن بتجيب وتو تجى
-عفاف/ تى وين ماشيه وانتى عارفه ان جدى حالف عليك ماتطلعيش من الحوش
-بدريه / حاجه والله كبيرة الطلاق ..تى فكينى منه الشيبانى الخارف هدا …
ولبست فراشيتها وطلعت
“طبعا القصه ومافيها ان عفاف اخت بدريه فى يوم من الايام جت للتليفون الارضى فى حوش جدها مكالمه بالغلط شاب غالط فى رقم تليفونهم .. ومن هاديكا الغلطه تعرفو على بعض …
وقعدت شادتها معاه مكالمات فالتليفون الارضى..الشاب اسمه عبدالجليل من سكان طرابلس ويجى لمنطقه عفاف مرة مرة مع ولد خالته وراجل اخته فى نفس الوقت اسمه عمران
عمران هدا مستغنى وعنده محلات قطع غيار سيارت غادى.. حاط فيهم عمال ومرات ايجو بنفسهم ايشوفو الارادات .. “عمران هوا صاحب الرزق ”
قولوبدريه لبست فراشيتها وطلعت من الحوش ماشيه
لجهه محلات عبدالجليل تبى تتعارك معاه كيف كيف ايعزر اختها بيها وبطلاقها ….اول محل عاليمين هوا اللى فيه مكتب عبدالجليل … كلمت العامل وقالتله تبى تخش للمكتب منغير ماحد يشوفها
دخلها العامل مغطيه بالكامل مبينه عينها اليسار بس من تحت الفراشيه …
خشت للمكتب تلقى عمك عمران مقعمز …قولو ياحنه عجبها
-عمران / تفضلى اختى
-بدريه / هدا مكتب عبدالجليل
-عمران / هوا بداته ..لكن انا نسيبه عمران ..اؤمرينى
” طبعا هيا اختها حاكيتلها زمان ان عمران راجل اخت عبدالجليل هوا صاحب المحلات ”
-بدريه بصوتها المعسول / لاااا غير جاى منشكى من واحد ايعاكس نحسابه عامل عندك
-وقف عمران ولف من مكتبه وقعمز عالكرسى اللى مقابلها / اشريلى عليه بس ..واليوم انلزه من المحلات
-بدريه تضحك وباغراء/ لااا لا خلاص .. تبى الحق ضميري انبنى وقلبي وجعنى منحبش نقطع برزقة حد
-عمران رياقته سالت / يسلم قلبك الحنين …
وهيا تضحك وتتلوى / بالله ماتقعد تنشد وادور ..فوته وسامحه وخلاص
-عمران / عادى نسامحه لكن بشرط
-بدريه / وشنهوا الشرط
-عمران / تحولى الفراشيه وتخلينى نشوف الوجه اللى طالع منه الصوت الحنون هدا
طبعا هيا ماصدقت ومنغير مايحلف عليها ? حولت الفراشيه من وجهها
-عمران / تبارك الرحمن فيما خلق
-بدريه متحشمه / مش للدرجه هادى عاد
-عمران / واكثر …الله محلااااك تهبلى …
فاتو 5 شهور.. يعتبر قريب نهايه سنه 81
عبدالجليل رضى على عفاف ورجع ايكلم فيها .. اما عمران وبدريه تعرفو فيها الزوز على بعض اكثر فى خلال هالفترة عن طريق التليفون وخشو فى علاقه واعطاها ارقام مكتبه الارضى فى طرابلس وفى المحلات ..طبعا هدا كله بالسر منغير ماتقول حتى لاختها … هوا يخون فى مرته ويحب فيها وهيا تشجع فيه على الزواج منها وان ربي حلله اربعه
– عمران / انتى لو ترفضى مستحيل جدك يغصب عليك ..
وخاصه انك مطلقه وقرارك بايدك
-بدريه تكدب وتحط / ياعمران هدا ثالث واحد نرفضه على خاطرك ..كل واحد نطلع فيه علة ..كانا جدى سايرنى فى اثنين مايسايرنيش فى الثالث
-عمران متأثر/ وانا يابدرى ..كيف ندير… عارفتنى قداش نحبك وقداش متعلق بيك منقدرش على بعادك
-بدريه / ياولد الناس انا لا شرطت اطلق مرتك ولا تيتم صغارك ..الشرع حللك اربعه ..خودنى انا الثانيه
-عمران / وخيريه بنت خالتى ..وولادى وبناويتى كيف بندير وكيف بنقنعهم ..وعبدالجليل ولد خالتى والله ماهو ساكت
-بدرية / خلاص وصلنى جوابك
-عمران مخلوع / كيف يعنى.. قلتلك ماتسيبينيش ..ردى بالك
-بدريه / اول مرة نشوف راجل خايف من صغاره .. انت ما بدير حرام بيش نسيبك يوقفلك فيها ..انت بدير حلال ربي
-عمران دماغه ستك/ باهى غير خلينى هالايام ندور كيف نتصرف
-بدريه / غدوة التريس جايين لجدى وبيعطينى مانقدرش نرفض ونعاند اكثر من هكى
-عمران / باهى كيف ندير ..دبري عليا
-بدريه / نتزوجو منغير مايسمع بينا حد ..شهر شهرين لين اتكم امورك واتبلغ زوجتك
-عمران / باهى غير اعطينى وقت انفكر وانشوف كيف بيصير
-بدريه / عندك من هنايا لليل …فكر ورد عليا ..لان لو مارديتش عليا غدوة بنتسمى على واحد غيرك
طبعا عمران خمم وفكر .. وحسم امره انه يبيها .. كلمها ووافق انه ايجى لجدها ..وشرط عليها انها تعيش فى حوش واحد مع ام صغاره ..وافقت لكن شرطت جناح بروحها ويفصل بحيط بيناتهم ..ووافق ومشى لجدها خطب ..وفهمه انه بيتزوجها حاليا منغير مايقول لزوجته او اهله لان الموضوع مش ساهل وان زوجته تكون بنت خالته وحتصير اشكاليه بين العيلتين..تفهم جدها وضعه ووافق …مش لانه قدره ..لااا لانه عارف بنت ولده فالحة وتعرف امتى تقول لعويلته الثانيه فالوقت المناسب ..ولما سمعت عفاف قريب طارت
-عفاف / ليش اديري هكى يا وخيتى ..والله عبدالجليل لما يقلبها على راسى
-بدريه / ياغبيه هكى بديتو اقارب اكثر
-عفاف / تى كيغ اقارب اكثر وانتى بتجى على اخته
-بدريه بحزم / اسمعى ياماما الشرع حلل اربعه .. وكانا نصيبى فيه لا تقدرو توقفوه لا انتى ولا عبدالجليل متعك هدا
وقرو الفاتحه .. لا فكرت فصغارها ..ولا قالت يا حليلى زعما كيف صاير فيهم ..عارفه نبيله تعانى فيهم ومأجلة عرسها ..وخداها عمران وسافر بيها لتونس …وقال لاهله انه بيجيب بضاعه….عيشاته بدريه شهر من الف ليله وليله
..داراته سلطان وهيا الجاريه ….
وعبدالجليل يمشى للمحلات باعتبار نسيبه موصيه عليهم
..ويكلم فى عفاف ..وهيا تكلم فيه وترعش لاعارفه تقوله ولا عارفه ادس ….
وروح عمران بى بدريه لطرابلس امأجرلها حوش ..وهيا معيشاته فالعسل شهرين لا تنقرز ولا تقوله قول لمرتك
وفى يوم جى لخيريه مكالمه من مجهول عالتليفون الارضى قاللها فيقى ..راهو راجلك متزوج عليه من شهرين فاتو
طبعا المجهول باعتاته بدريه …
وقامت الدنيا على راس عمران ماقعدتش …دارت خيريه بنت خالته حالة كيف يتزوج عليها … قامت صغارها ومش لحوش بوها حرجانه
اما عبدالجليل لما سمع
-عبدالجليل / انتى خاينه
-عفاف تبكى/ والله ماعمرى خنتك
-عبدالجليل / اختك متزوجه نسيبى ليها شهرين ..وانا نتكلم معاك شبه كل يوم وانتى داسه عليا ..شن تسميها هادى خونه ولا لا
-عفاف / والله ماقدرت انقولهالك
-عبدالجليل / هيا كلمه وحدة.. ارقامى امسحيهم ..وانشالله ربي يسمعنا الخير على بعض
-عفاف مصدومه / انت شن تقول
-عبدالجليل / اللى سمعتيه ..من اليوم طلعينى من دماغك
__________________________
–
فى حوش ساسى
-فاطمه / ياوليدى البنيه يتيمه..وقالت نتحملهم الصغار الزوز
-ساسى/ ايييه علينا ياام .. حتى الاولة قلتو يتيمه وتبى تتزوج وفالاخير لوحتهملى زوز صغار ومشت
-فاطمه / باهى بتقعد هكى سايب.. اختك بتتزوج وانا من قال بنعيشلك بتقعد هكى
-ساسى/ ربي يطول فى عمرك ياميمتى
-فاطمه / سلم وليدى خود راى امك …سيورك تتزوج اليوم ولا غدوة..ماهو خود بنت الحلال وياسرك من البهدله
-ساسى/ باهى ديري رايك.. لكن لا داير عرس ولا رافع قفه ياسر من بنت الحرام اللى قبلها رفعتلها كل شى وسودتلى عيشتى
-فاطمه/شرطها بنعطوهولها زى كل بنيه..والعرس بناقص منه
-ساسى/ باهى زى ماتبى..لكن من توة شرطى تتحمل صغارى
تقول من توة كانا تقدرهم ولا لا
وبالفعل مشت عمتك فاطمه وخطبت لى ساسى بنيه يقولولها نعيمه .. وزفوها فى عشرة ايام وسكنوها فى نفس حوشه متع الدور الثانى اللى سكن فيه نساوينه الاولات
__________________________
–
فى حوش اهل خيريه مرت عمران الاولة
-فاطمه / يابنيتى انتى مش اول مراة ولا اخر مراة راجلها يتزوج عليها .. ياما من ضراير تفاهمو وامورهم ماشيه
-عبدالجليل متعصب /تو هدا كلام يااام ..انا قلت ماترجعلاش هدا واحد واطى …اتشد صغارها وتقعد هنايا
-فاطمه / ضم فمك واسكت وخلى اختك فى حالها ..اربع بنات وزوز ولاد من بيصرف عليهم ولا تقعد ادور واتساسى بيهم
-عبدالجليل ضرب صدره/ انا مسؤل بيهم صغار اختى
-فاطمه / الكلام فالوسع ساهل ..
-خيريه تبكى / اسمعى ياام نرجع لحوشى لكن كل وحدة فينا تسكن فى تركينه مانبيش نشبحها بكل طول عمرى
-عبدالجليل / غير احلمى .. من امس جايب عمال وترا شن ايكصرو فالحوش…شكله بيقسمه بينك وبينها
-خبطت وجهها / حيه عليا حوشى
ولدها الصغير عبدالجبار واقف فالممر ويسمع ….
-خش يجرى/ تى والله ياخالى لما نقتلها المصخة هادى اللى خدت بوى مننا
-فاطمه تشبح لعبدالجليل / عاجبك هكى توة ..عاجبك كيف الولد يدوى على بوه ..شكله من بكرى يسمع فيك
-خيريه / يا حليلى وين كانت مدسوستلى هالايام السودة
وخدت ولدها وخشت للدار اللى فيها صغارها ….
خيريه عندها 6 صغار ..بنتها الكبيرة اسمها رحمه مواليد 70 عمرها 11 سنه وتقرا صف الخامس.. والولد اللى بعدها اسمه احمد مواليد 71 عمره عشرة سنين يقرا صف الرابع . وبعده عبدالجبار مواليد 73 يقرا صف الثانى واللى بعده ثلاث بنات امال وغادة ورانيه مواليدهم 77 78 79 .. على روس بعضهم مازالو مايقروش فالمدرسه
عويلتها هلبا الحق وعلى روس بعضهم …وين بتمشى بيهم يانارى ..قررت ترجع لحوشها …طبعا عمران رحب ومشى بنفسه ركبها فالسيارة هيا والصغار وردهم للحوش ..لما خشت اتفاجئت ان الحوش بالفعل مقسوم على اثنين بينها وبين ضرتها
وفات شهرين وعمران ايحاول ايرطب بين نساوينه الزوز ويقنع فى خيريه تتعرف عليها لان بدريه ماعندهاش مانع …
وافقت خيريه .. وقررو يوم الجمعه الصبح تخش بدريه مع عمران ويفطرو مع بعضهم ….
وبالفعل جت بدريه جايبه فى يديها حكه شوكلاته وخشت ورا عمران لحوش خيريه ….
سلمت عليها خيريه بالرغم قلبها مجروح لكن خدت نصايح امها فى انها تتعاشر هيا وضرتها ..
-خيريه / تفضلى
خش عمران ووراه بدريه …..قعمزو عالصالون
ويجو احمد وعبدالجبار كل واحد فيهم فى يده سطل اميه ويصبوه على وجه بدريه
-بدريه / وووك عليا
وهاجت العيلة وماجت
__________________________
تمت …….ويتبع
الحلقه الجايه نشوفو كيف بيصير فى صفيه وخوها حفيظ وعلاء مع مرت بوهم الجديدة .. ونشوفو بدريه بترضى بالاهانه وبتسكت ولا بدير لعمران وجيج
طبعا مش كل الابطال جبنا صورهم … بعد يكبرو نحطلكم صورهم ?
استحشت تعليقاتكم مصايب قلبى??
نحبككككككم ❤