رواية ولد راجل امي
#ولد_راجل_امى
بقلم زهور جمال الدين ??
?الحلقة الرابعه ?
–
وتمت الخطبه .. وعطو الشرط لحوش ساسى
-سعيد / ياوخيتى ليه عليك دايرة لروحك هكى ..انتى مريضه على سبى بنتك من جهه.. وبنتك تبكى عليك من جهه ثانيه .. تى ماهو ديري صغارك وتعالى لبنتك ارفعى راسها قدام الناس
-بدريه / ورحمه امى ماهو واخدها ..وانا بدريه
-سعيد / ربي يهديك .. البنت فاتحاتها الاسبوع الجاى وهيا فرحانه وموافقه …ليش طول عمرك وانتى دايرة لروحك هكى .. ماعاجبك العجب
-بدريه / انت علاش ماتبيش تقولى السبب اللى خلى ساسى يعطاهالهم ..بتقنعنى انه وافق للاه فللاه.. من امتى يبي عمران ولا حتى يطيق يسمع سيرته
-سعيد / وانتى من قالك ان ساسى مش طايق عمران … ولا حتى يخطر علي باله اصلا
-بدريه تعيط / تى ماهو انت اللى تقولى وانت اللى تحكيلى عليهم …مش تقولى ان ساسى ميخليش فى صفيه تجينى لحوش جدى لين عمران ايروح …شن خطر عليه توة يعطيهاله
-سعيد / اوووووه انتى الدوة معاك زايدة … توة الاولة مالاخيرة البنت عطاها بوها …والاسبوع الجاى فاتحتها
…يعنى خلاص فوتيه الموضوع .. عالاقل اتصلى ببنتك مدامك متتبيش تمشيلها
-بدريه / ومن قالك مانكلمش فيها كل يوم بالتليفون ..شنو بالم بتعلمنى انت شنو ندير
-سعيد / هيااا بالسلامه.. زايدة الدوة
صكرت التليفون وهيا تندب / يا حليلى كيف ندير ..زعما نبعتله جماعه يعطوه على راسه لين يرزوه فى عمره
وبعتالى خطرت عليها بنتها … وجعتها … اكيدة فرحانه علاش تنقصلها فرحتها …
______________________________________
–
وفات اسبوع …
فى اسبوع العرس
احمد وعبدالجبار واقفين فالشارع يهدرزو مع خالهم عبدالجليل ….
-عبدالجليل/ هالكدبه اكدبها على واحد غيري … انت بدريه متحبش حتى اسمها ولا صنتها … وفالاخير تقولى بنتها عاجباتك ليها فترة
-عبدالجبار / توة هدا اللى صار يا خالى ماتقعدش ادقق.. وتنشد عالبسباس ومن زرعه … انا خطبت وبوها عطاهالى
-احمد / انا هدا اللى حاير فيه ..كيف عطاهالك وبيش اقنعته ..بيقعد طول عمره لغز عجيب
-عبدالجليل / انا خايفك تكون واخد البنت على خاطر امها واضيع حياتك وحياة البنت فكلام فاضى
-احمد/ حتى انا هدا اللى خايف منه .. الحق احنا البنت عمرنا ماسمعنا بيها ولا تخطر علينا
-عبدالجبار/ تى فوتو الشك يا ناس وبعتالى هادى نصيبات
-عبدالجليل تلفت لى جبار / ناديت خوك
-عبدالجبار? / خوى اهو قدامك
قرب منهم عمران
-عمران / السلام عليكم
-احمد وعبدالجبار/ وعليكم السلام يابوى
-عمران / شنحالك يا عبدالجليل
-عبدالجليل?/ الحمد لله شنحالك انت .. مبروك ماتعولو
…..كل شى بالبركه ياسى
-عمران / الله يبارك فيك والعقبالك
عبدالجليل سكت لانه لتوة مزال ماتزوجش
-احمد / المفروض درتها مع عبدالجبار يا خالى
-عبدالجليل / المفروض انت وخوك مع عبدالجبار
وتلفت لى عمران / ناديت ولدك
-عمران / من قصدك
-عبدالجليل / قصدى على نادر .. ولا ماهوش ولدك
-عمران / انت ما مدرق عليك شى يابو نسيب….وتعرف ان نادر مايسيبش فى امه دقيقه وحدة ..لدرجه انه بطل مالمدرسه من لما كان فى العدادى على خاطرها
-عبدالجليل / ماهو اختى خيريه قالتلك جيبلها شغاله ولا هاتها هنايا نعانيها وانت مابيتش …
-عمران / انت جاى اتبارك ولا جاى تقلب فالمواجع
-عبدالجليل حط يده على كتف عمران / اهو عمر مناسبك عمرى ماجبدتهولك .. لكن هدا عرس خوه معقولة ماتعزماش عليه
-عمران / ياودى عارفه والله مايجى
-عبدالجليل / انت غير قلتله
-عمران / انت من بكرى تتسوق فيا .. شن تبى تقول
-عبدالجليا / نبى نقول ان لو معدلتش ..الكتف يوم غدوة ايجى مايل قدام ربي كان ماتدريش ….
وتلفت لصغار اخته / ولا الدين يقول غير هكى
-عبدالجبار جاته عالجرح/ طبعا يجى مايل …يا تتزوج اثنين وتعدل بيناتهم ولا مفيش داعى
-عبدالجليل / فمابالك باللى عنده ثلاثه
-عمران / خديجه مش على دمتى طلقتها من لما مرضت ..
-عبدالجليل / لكن المفروض رديتها عالاقل بعد ماكبر ولدك شوى
-عمران / تى منهيا انردها وهيا جايها داء الكلاب اللى تعضه يمشى فيها
-عبدالجليل / وليش ماعضتش ولدها
-عمران / ومن قالك ماعضاتاش .. اكيدة عضاته اكثر من مرة ..لكن هوا واخد يبرة مضادة … وبعتالى انت جاى تحقق معاى ولا شن قصتك
-احمد / صح يا خالى .. اصلا هدا علاش بوها وقتها ماخلاهاش تجى لامى … قال مرات تعضها
-عبدالجليل / اليبرة اللى خداها ولدها كنتو تقدرو تاخدوها حتى انتو … لكن انت لوحت ولدك ونسيته
ومشى من جنبهم ….
وقعمز عمران عالمرشبيدى منهار
” نادر يكون ولد عمران الكبير من مرته الاولى مدكرناهاش لانه مطلق .. وهيا مريضه عندها داء الكلاب ..والوحدة ادت بيها لنوع من الاختلال فالعقل او الجنون … ”
_____________________________________
–
فى حوش خيريه
-رانيه / مانبوهاش …مش بالسيف باهى
-رحمه / ضمى فمك …خوك يبيها انتى من طلب رايك
-خيريه / ريتيهم شن دايريلى من توة …امالا لما توصل اهل خوهم شن بيديرولى
-امال / نقص ايدى من حيث مانبتت الا ولدك واخدها بيش يشعف بدرية
-رحمه / ياوخياتى ردو بالكم تحطو البنيه فرقبتكم .. هوا واخدها ناوى حاجه ثانيه خلوه بينه بين ربه.. ماتاخدوش البنت بى دنب امها
-غادة / حاشانا انا وخواتى .. اصلا قررنا لا بنكلموها ولا بنجو على حالها بنت العقرب
-خيريه / زيدو تكلمو هكى .. تو يسمعكم احمد يجى يغبرها على روسكم
-رانيه / كل شى يجى بالسيف الا حبنى يابنادم
-رحمه / حتى انتى الفصعونه الصغيرة تتمنطقى
-خيريه / الله غالب عليا انا ..الراحة مانشبحهاش لا لما كنت صغيرة ولا لما كبرت
انفتح باب الحوش وخش احمد بسرعه ..البنات انخلعو يحسابوه سمعهم …
-احمد / جيبولى مالقى اميه
-خيريه مخلوعه / خيركم اللطف شن فى
-احمد / مافى شى
ويفنص فى غادة/ تى هات ام المالقى اللى قدامك
مالقى اميه لونه احمر خطفاته غادة ومدتهوله وطلع يجرى بسرعه …
وتلفت / رحمه …تعالى
وطلع يجرى وفى جرته رحمه …..
_________________________________________
–
فتح احمد الباب وطلع بسرعه ورحمه وراه …اما خواته يبسو فمكانهم يخافو من احمد وعبدالجبار ميخلوهمش يوقفو قدام الباب…
احمد وصل لبوه وخوه
-عبدالجبار / هات الميه ..هات
-رحمه اضبح بالشوى / احمد … احمد
-احمد / شويا بس
عبدالجبار يغسل لبوه فى وجهه … هدى روحك يابوى ماصار شى
وتلفت لاحمد / دخل بوك معاى للمربوعه
وبالفعل وقفوه ومشو معاه للمربوعه … خشو هما ورحمه وسكرو الباب
جت خيريه اطق عليهم مشغولة / عبدالجبار ..خيركم شن فى
-عبدالجبار/ خشى يااام
ولما خشت لقت الجو معكر ويمسحو لبوهم فى وجهه من الميه والدنيا سلاطه
-خيريه / اللطف عليك يا عمران .. خيرك شن فى
-عمران يبكى/ انا لوحت ولدى يا خيريه
-خيريه / من ولدك
-عمران / قولى قدامهم .. انا لوحت نادر
-خيريه / لااااا الشهادة لله تبى تاخده وجده ماخلاكش … انت من قالهالك الكلمه هادى
عمران سكت
-احمد / خالى توة قالهاله
-خيريه / وليش يقولهاله وهوا عارفه الموضوع هدا بالدات يتحسس منه
الحق بوكم بعد اتزوجنا يبي ياخده…لكن جده شده وقاله خلى يقعد مع امه …لما يبدا فحجرها تقعد هاديه
-احمد/ يابوى احنا كلنا عارفينك … وجده خير ما دار..اهو ملتزم بامه توة وقايم بيها …كان خديته انت وجده مات ..امه من بيها
طق باب المربوعه وانفتح …خشت بدريه شافتهم قريب ماتت
-بدريه / عمران? …خيركم مصكرين الباب ..شن تهدرزو
-عمران / روحى هانى جايك للحوش
-بدرية / لااا نبى نفهم ..شن تخططو مع بعض
-رحمه / بوى ادكر خوى نادر ان هوا الكبير وداير عرس لى
عبدالجبار هوا الاول
-شبحت لى عبدالجبار?/ ماهو حتى احمد اكبر منه ..خيره مابكاش عليه هكى
-عمران ?/ روحى لحوشك قلتلك هانى جايك
-بدريه ?/ تى باهى وانت تعيط
-خيريه / مزال مامشيتيش لبنتك يابدريه
-تلفتتلها وبتكشيخ / نعم يا ماما… شنو انتى بتورينى نمشى لبنتى ولا مانمشيش
-رحمه / امى ما قالتلك شى يا بدريه ..خيرك تردى عليها بالطريقه هادى
وقف عبدالجبار/ اللهم طولك يا روح
وطلع من باب المربوعه …
-بدريه?/ تى بالشوى قريب طيحتنى
________________________________________
–
فالمربوعه ….
-رحمه / شنو هديت يابوى
-عمران / الحمدلله … الليمونادة تهدى الدم
وقام سماعه التليفون ومده لى رحمه / اتصلى بخوك
-رحمه / اتصلت بيه يابوى من الاسبوع اللى فات وخبرته
-عمران / ربحتى يابنيتى .. وشن قلتيله
-خيريه / قلتيله على عرس جبار ووصيته يجى يحضر
-رحمه / قلتله وقالى والله مانقدر تعرفى ضروف امى صعب نسيبها بروحها
-خيريه تشبح لى عمران / الموقف اللى صار توة كبير… وفكرنى بايام زمان لما نمشو بنطقو فيها انا وياك وبوها يلزنا
-عمران / طول عمرك قلبك كبير .. قداش تشدى فيا زمان نمشيلها
-خيريه / لكن الحمدلله انت ماقصرتش مصروفها كله عليك حتى وهيا مش على دمتك …وولدك مصروفه من يوم خلق عليك انت
-عمران / .. انا ولدى عارفه مايجيش … غير خوك يتهيبل عليا..وكتفك مايل وكتفك معوج …شن دخل ولديه هوا
-خيريه / مدوراش يا راجل…ماك عارفه زيه زى عبدالجبار نفوسهم مش راضيه
وفى الصالة
-رانيه كانت تتصنت/ فهمتهم على شنو يحكو
-غادة/ تكلمى فيسع على شنو
-رانيه / على نادر
-امال/ تى انا فحياتى كلها شايفاته مرتين …وعلاش الشهدرة هادى كلها اللى صايرة
-رانيه / مندرى
-غادة/ تى مش قلتى سمعت
-رانيه / سمعت اسمه عرفت الدوة عليه ?
________________________________________
وفاتت الايام
ووصل اسبوع العرس ..صفيه فرحانه قريب بطير .. صح متعرفاش .. لاكن سعادة اى بنيه بتبدا عروس وبتتزوج
على قد ماشدت فى امها تجيها وهيا شى عنايدية
-صفيه / ليش ياام ماتجينيش …انا مش بنتك
-بدريه / بنتى لما تسمعى كلامى .. اللى خديتيه قلتلك عليه لا وعاندتينى ووافقتى عليه
-صفيه / يمى مش انا وافقت …بوى عطانى منغير حتى مايشاورنى ..خيرك ماتبيش تصدقينى
-بدريه / قلتلك يوم الفاتحه ارفضى انه يقرا فاتحته عليك
..لكن انتى عاندتى وبديري اللى فراسك..
-صفيه / تى كيف يوم فاتحتى …ونحشم بوى قدام التريس اللى مناديهم ونحشم خوتى وخالى
-بدريه / يا مهبوله والله ماواخدك الا بيش يكسرنى انا ..
والله حياتك معاه عداب ..كانا خديتى احمد اهون لك
-صفيه/ ليش تقوليلى فالكلام هدا
-بدريه / لانه والله ما مدورك ولا انتى فى باله اصلا …ماهو كانك قوية زى امك مستحيل حد يجى يتحكم فيك ..وراك عايشه كيف ماتبى
-صفيه /?
خش علاء لقاها رافعه سماعه التليفون / مع منو تحكى
-صفيه ?/ ما مع حد
-علاء زبطها منكسرة معناها تدوى مع امها / هاتى التليفون
وخداه منها / الوو
-بدريه / ايوووه منو معاى
-علاء/ خيرك ماتبيش تجى لبنتك …عيب هدا راهو حتى قدام الناس
-بدريه / وانت منهوا بسلامتك اللى تدوى معاى هكى
-علاء/ انا خوها يا امها
-بدريه / هوا انت …مزال ناقصنى غير مفرخ
________________________________________
–
العرس كله قضاته صفيه بكى ..معقولة يا ربي امها حتى يوم عرسها ماتجيهاش …اهمال غريب من بعض الامهات
اما خالها سعيد شاد معاه الصحيح عوالة وصرف …
يوم القفه ….
حوش عمران لا رفعو قفه ولا خرفان … عطوهم كل شى فلوس … لا عمران ولا ساسى يبو تعفيس …كل واحد فيهم عنده غايه وحدة .. الولد لعب بالبنت ولازم تنستر …
اما عبدالجبار دارله بوه غدى رجالة كبير ..وعزم الاقارب والاصحاب والجيران
ثانى يوم
دارت صفيه حفلتها قيطون قدام الحوش وطيبو كسكسى بالبصلة فرقوه عالمعازيم ….
وتمت الحفله وجو حوش العريس بيروحو بيها … عبدالجبار مامشاش بنفسه بعت احمد خوه وجنبه رحمه اخته
ركبو رحمه معاهم فالسيارة …المنطقه تبعد قريب ساعه ونص على طرابلس …
فالسيارة
-رحمه/ الف مبروك يا صفيه
-صفيه بصوت واطى ومنزله الطرحه/ الله يبارك فيك
-رحمه / من اليوم انا اختك رحمه .. وهدا خوك احمد
-صفيه / تشرفت بيكم
وصلو قيطون حوش العريس …
دخلو صفيه للكوشه حاطينها فالوسط …وهيا تقلب فعيونها وادور فى امها … وامها مهناش … وعزوزتها عمتك خيريه مهناش حتى هيا بالرغم انها ماتعرفش شكلها لكن مالاحظتش ان عزوز استقبلتها
فى حوش بدريه
-خيريه / يا بدريه نوضى …ليه عليك بنتك قريب توصل .. علاش تكسري بخاطرها
-بدريه / مانيش ماشيه ..من قالك انا راضيه نعطيها لولدك اصلا
-خيريه / عارفاتك مش راضيه .. لكن توة المقصود حصل وبنتك بدت كنتى خلاص توة الزعل زايد
-بدريه / قلتلك مانيش ماشيه لعرس ولدك ولا خاشاته .. ريحى روحك
-خيريه / عرس كامل ما جيتيش لحاجه ماضقتيش نعمه ..حتى القصعه نبعتهالك بكسكسيها .. ترديلى فيها زى ماهيا وما دورتكش .. لكن هادى بنتك كبدك
بدريه عيونها دمعو
وبدو يسمعو فى صوت الكلاكسات ..
-خيريه / امالا بهناك توة .. كنتى وصلتك معش نقدر نترجاك اكثر من هكى
وتلفتت بتطلع
-بدريه / راجى…هانى جايه معاك …
وتلفتت لصغارها / نوضو هي نشوفو اختكم
وبالفعل طلعو من الباب …ومشو للقيطون .. خشو للعروسه طول …
وماتمت تبكى صفيه … وامها برغم جبروتها وكبريائها حست ان بنتها تزوجت زواجه امرمدة …وكانت ناويه توقف لعبدالجبار بالمرصاد ..غير يبدا اول جولة …
سلمت عليها خيريه بالاحضان .. وسلمو عليها حماواتها الصبايا فوق النفس … ومابوش يسلمو على بدرية ولا يباركولها برغم تفنيص امهم فيهم …
وجى العريس مدرجينه بالمولد … ومع كل طقه بندير كان قلب صفيه يطق … معقولة تاخد واحد ماتعرفاش ولا عمرها شافاته
وكملو الشباب التدريجه وخش العريس رايح زى الغزال ولابس بدله ومعاها ببيونه وخش للعروس حول من عليها الطرحه .. وجو خواته يسلمو عليه ويبكو
وخدى العروسه وركبها لشقته فالدور الثانى من الدروج البرانى اللى فالجنان ….
وروحت بدريه طول لحوشها ….وروحت الناس وتم العرس
_____________________________________
–
فى شقه عبدالجبار
فتح عبدالجبار الباب وخش هوا الاول / السلام عليكم
وقعد واقف جنب الباب وخشت هيا متحشمه …
خشو للصالة …قعدت هيا واقفه … حول هوا دجاكته ويفك فى القرواطه وهيا واقفه تشبحله
تلفتلها / متوضيه
-صوتها هرب / اه
-عبدالجبار?/ متوضيه …بيش نصلو
-صفيه ببحة صوت / لا لا
-عبدالجبار/ خشى اغسلى الزواق اللى دايراته وتوضى وتعالى صلى وراى
-صفيه / حاضر
خشت للدار حولت فيلوها ولبست جلابيه منقوشه.. تحشمت تلبس قدامه روب لانها ماتعرفاش …
خشت للحمام …تشبح لنفسها فالمرايه وتخمم/ شنو الاسلوب هدا … مش خالى شكره .. خيره هكى يتكلم
-عبدالجبار اينادى/ مزال
-صفيه / اهو بنجى هى ….
وبالفعل طلعت …وتلبس فى عبايه الصلاة وخش هوا توضا
وقف صلى وهيا وراه ….
بعد ماكمل خشو لدار النوم وسكر الباب ….
وهيا قلبها يطق .. الشخص ماتعرفاش ….
مشى للشباك فتحه .. وفتح البرسيان خلاه مفتوه شوووويه … وصكر الشباك …
ومشى للضى طفاه … بدت الغرفه مظلمه وفيها شوية ضوء خافت … وهيا مخلوعه وترعش مع بعضها
وبدون اى مقدمات مسكها من يدها / خيرك
-صفيه ترعش/ شى
وهيا لابسه الجلابيه الطرزة … ولا حتى قاللها حوليها …
خداها من يدها وجابها لطرف السرير
-عبدالجبار/ قيمى جلابيتك شويه بس
-بدت تبكى/ باهى بالشوى
-عبدالجبار/ ماتعبينيش هيا بننزل لجماعتى
وهيا تبكى وهوا كان فدماغه عمل يبي يكمله وخلاص .. مفيش داعى لاى حركات حب
وتهنت العروس
ونزل العريس لجماعته … وركبت نبيله عمة صفيه والنساوين اللى معاها ورحمه اخت عبدالجبار … بيطمنو عليها وبدو يسمعو فى ضرب السلاح .. جارهك عنده كلاشن ?
قعدو معاها شوى واطمنو وطلعو
وخلوها غارقه فدموعها
زمان الناس لازم تراجى العروس مش زى توة
______________________________________
تمت …..ويتبع
ن ح ب ك م ❤