رواية ولد راجل امي

#ولد_راجل_امى

بقلم زهور جمال الدين ?
?الحلقه الخامسه?

–

نزل العريس لجماعته …ضربت عليه الزكرة شوى .. ورقصو صحابه الكل …وصوت سيارة حوش العروسه مروحين .. عمتها وراجلها وخالها سعيد وسيارتين معاهم

وكملت الزكرة وركب العريس لشقته …
فتح الباب لقاها مقعمزة فالصالة شعرها مبلول مدوشه … ولابسه قفطان حوش طويل وكمامه طوال ….
-عبدالجبار/ السلام عليكم
-صفيه بصوت خفيف/ عليكم السلام …
-عبدالجبار/ هدا شنو اللى لابساته
حطت ايديها على قفطانها / شنو قصدك ..عادى قفطان
-عبدالجبار/ وهدا قفطان تلبسه عروس
-صفيه / والله جديد
خش عبدالجبار لدار النوم ويتمتم / مالاك حصله…

طلع ماسك فوطه وتوتة وخش للحمام … بعد ربع ساعه طلع لابس توتة … خش داره واتكى فى سريره … ويتخايل فى بدريه كيف واقفه جنبهم فالكوشه وتشبحله بحقد
ويخمم / خزيه على هالشكل المقلب .. شن جاب امها للعرس الباردة ….اكيدة امى مشتلها ..طول عمرنا مامواطينا قدامها حد الا هيا بطيبتها …
انتبه ان صفيه ماخشتش للدار …
-ينادى / ماكش راقدة
-صفيه من الطالة / اهو جايه
وخشت لدارها منغير مايكلمها …. قامت لحاف السرير ورقدت … رقدت متلفته عطياته بالضهر.. وهوا متكى فاتح عيونه وساكت يخمم

______________________________________

–
ثانى يوم

فاقت صفيه الصبح وعبدالجبار فى جنبها …قعدت تشبحله
…شكله قنين ..
ناضت من السرير خشت للحمام .. غسلت وجهها وتوضت
وطلعت لبست المصليه وصلت …
قعدت مقعمزة عالصلايه وتخمم / انتى ليش حايرة انه يكلم فيك هكى …. اهو حتى انتى متحشمه منه … يعنى الامر عادى
طق باب الحوش ….
ناضت من مكانها مشت للباب .. فتحت ..لقت رانيه قدامها قايمه صفرة
-صفيه مبتسمه / صباح الخير
-رانيه فوق النفس/ صباح النور ….
ودخلت الصفرة من الباب / ترا شوى ..بندخل الصفرة
صفيه استغربت / تفضلى
خشت للصالة حطت الصفرة عالارض/ قالتلك امى اهو فطوركم
وتلفتت طلعت من الباب وقربعاته …خلت صفيه واقفه وراها تشبح
تقربيعت الباب فيقت عبدالجبار من النوم … ناض من سريره وطلع

_____________________________________

–
فى حوش خيريه ….

رانيه نازلة تتنطش ….خشت للمطبخ لقت غادة ورحمه يردو فالطواسى لصناديقهم
-رانيه / اقسم بالله العظيم ماعاد مركبتلها حاجه .. مزال غير نركب الماكلة لبنت العقرب
-غادة / تبى تتسمسم اهو تتفضل لوطا تاكل معانا ..
-رحمه / ياوخياتى خيركم هكى تتكلمو هكى اللطف … اقسم بالله لما تجوزت حمواتى قعدو اسبوع وهما يركبولى فالغدا والعشى لعندى فوق
-غادة/ غدى وعشى ..مش الهانم تنوض من سريرها تلقى الشغالات جايبات الفطور ..هوينا امها اطيبلها ولا جعنها مافطرت
خشت خيريه / ركبتى الفطور لحوش خوك
-رانيه متلفته للصناديق / ركبته ايه
وبدى باب الحوش ايطقطق …
-خيريه / غادة افتحى الباب ..احمد مشى يرد فالخيم للمحل
-غادة / باهى
طلعت غادة من المطبخ مشت للباب تفتح
فتحت الباب تلاقى سعيد خال صفيه واقف
-سعيد?/ صباح الخير
-اتقت غادة ورا الباب?/ صباح النور .. احمد مهناش راهو
-سعيد مبتسم / انا خال صفيه جايبلها حوايجها
-غادة?/ اهاا مرحبتين بيك .. هيا قاعدة فوق فى شقتها تقدر تركبلها
-سعيد / شكلى جيت بكرى ..تو نحطهم عند اختى بدريه وهيا تعطيهملها
غادة عارفه علاقه بدريه بعبد الجبار ومدى كرهه ليها / اسمع تعرف كيف
-سعيد / كيف
-غادة / انا اهو بنخش للسقيفه وانت دخلهم للمربوعه اهيا على يدك اليمين
-سعيد / باهى اهو تو ندخلهم … قتلك
-غادة / نعم
-سعيد/ انتى شن اسمك
-غادة فرحانه/ اسمى غادة
-تحشم من حركته / ماهو بيش نقوللها حطيتهم عند غادة تنزل تاخدهم …
-غادة مبتسمه / لا عادى
من ورا سعيد طالع صوت بدريه / سعيد .. امتى جيت
تلفتلها لقاها شاده صفرة / اهلين بدريه شن حالك
خشت غادة طول لصالة حوشهم

______________________________________

–
فى الكوجينه

-خيريه / بنيتى حتى انتى تعبتى وتبهدلتى .. ديري صغارك وروحى
-رحمه / لااااوالله ماصارت ..نكمل معاكم الحوسه وبعتالى ساهل
-امال/ راجلك ثانى مرة يبعتلك صغاره يقولك هيا …بري روحى واغسلى حوايجكم وبعتالى ولى
-رحمه / باهى تو بعد يصلى الجمعه ايجينى وانروح …
خشت غادة ادس فى ابتسامتها
-خيريه / منو عالباب
-غادة عاطيه بالضهر متلفتله للصندوق متع الطواسى/ شوره خال صفيه جايبلها حوايجها
-خيريه / وشن قلتيله
-تلفتتلها / قالى بنحطهم عند امها …شوى قلتله خليهم هنايا و فتحتله باب المربوعه وقلتله حطهم فيها
-خيريه / ربحتى يابنيتى …باهى قلتيله خليهم هنايا ..
-رحمه / تى والله كانا حطهم عند امها ماعاد يخليها جبار تاخدهم
-امال / ربك ستر ..

عالصندوق غادة ورانيه متقابلات ايردو فالطواسى …

رانيه / خيرك عطلتى شكله انفتح ميعاد

-غادة بابتسامه عريضه / اسكتى توة ..بعتالى نحكيلك فى دارنا لما نبدو بروحنا
-رانيه تهمس/ اصلا عرفتهم العيون يضحكو مش بلاش
-غادة تضحك/ ضمى فمك
-رانيه/ قنين
-غادة مغمضه عيونها ومبتسمه / طرف .. يقتل
جت رحمه وقفت جنبهم / غير كان نعرف شن تقولو …وعلى منو تتهامسو
-غادة انخلعت / لا لا شى

_____________________________________

–
بدرية واقفه ورا سعيد …ونادت عليه تلفتلها

-بدريه / شن ادير هنايا
-سعيد / جايب لى صفيه شناطيها
-بدريه / وخيرك ماجبتهمش عندى
-سعيد/ لا عادى اهو بنحطهملها فى مربوعه شيابينها وهيا بعتالى تقول لراجلها ايركبهملها
-بدريه / اقطع هالشيابين
-سعيد / شن قلتى مسمعتكش
-بدريه / قلتلك اهو راكبتلها تو نقوللها عليهم انا .. انت برة للحوش تو تلاقى عمران يفطر ..افطر معاه انركب انا لصفيه الفطور ونجيك
-سعيد / دايرتلها حتى فطور …بارك الله فيك ..وربي يزيد فهدايتك
-بدريه / شنو تحسابنى مستيبعه بنتى … ولا على خاطر ممشيتش لعرسها فى حوش ساسى .. اولا انا دايرتلها فطور لانى عارفه المساميم اللى لوطا مستحيل يدوروها ..ثانيا هادى بنتى لازم انكبر بيها قدامهم ونواطى خشوهم قدامها
-سعيد يضحك / ياودى سلم اميمتها واللى فات مات واحنا صغار اليوم …
-بدريه / غير برة للحوش منعطلش عليكم انا نحط الصفرة ونطلع
-سعيد / باهى
ومشى لحوش بدريه بيش يفطر مع عمران

______________________________________

–

فى شقه عبدالجبار
جبار طلع من داره فاق على صوت التقربيعه

-عبدالجبار/ شن التقربيع هدا
-صفيه / صباح الخير
-عبدالجبار/ صباح النور .. منو عالباب
-صفيه / جت وحدة من خواتك طقت الباب جايبه الفطور
-عبدالجبار / وكيف تفتحى الباب منغير ماتقوليلى
-صفيه مستغربه / قصدك لما بنفتح الباب لازم نشاورك
-مشى عبدالجبار للباب وهوا متعصب فتحه وشبحلها / الباب اهوا قبل ما تفتحيه هكى لازم تقوليلى وتشاورينى فاهمه

ودف الباب من يده بلقوة ضرب الفردة الثانيه ..بس متصكرش كويس..
-صفيه باندهاش / باهى لما انت فالعمل كيف ندير لازم نتصل بيك ونقولك
-عبدالجبار متعصب/ ايه لازم تتصلى بيا وتقوليلى ..بالعربيه انا مش اى حد نبيه يخش حوشى ..فى ناس مانبيهاش تخشه بكل طول العمر
-صفيه / ناس متخشش هنايا !!.. زى منو قصدك
-عبدالجبار/ زى امك مثلا …منبيش نشبح خليقتها فالحوش بكل
-صفيه / اولا حسن اسلوبك ..ثانيا تبينى لما تجى امى نلزها ومانفتحلهاش الباب ولا كيف
-عبدالجبار/ ايه ماتفتحيلهاش الباب بكل منغير حتى ماتشاورينى
-صفيه مستغربه وبهدوء / شنو الكلام هدا اللى تقول فيه
-عبدالجبار/ نقولك من توة تبى تستريحى فحياتك امك تنسيها نهائيا

-صفيه/ لو حد ايقولك انسى امك ولزها ترضاها على نفسك
-عبدالجبار/ وشنو امى زى امك المسصخة
-قامت يدها / الكلام اللى تقول فيها كله عيب عليك .. انا امى مش مصخة
-عبدالجبار/ مدامه هكى الكلام ولسانك طلع اطول من لسانك امك … امالا والله لو رجل امك تعفس بساط حوشى انتى طالق منى …باهى هكى ولا مش باهى
-صفيه انخلعت/ اللطف علينا شن الكلام هدا اللى تقول فيه

انفتح باب الحوش خشت صفيه وصغارها / صباح الخير
…خيره اصواتكم طالعه لبرة
-عبدالجبار/ انتى كيف خشيتى .. ومن فتحلك الباب
-بدريه / الباب مفتوح لقيته ..
وشبحت لبنتها / خيره وجهك رايح اسود
-عبدالجبار/ سود ايامك …طلقتى بنتك يا بلوة وهيا ماطقتش عندى 24 ساعه
-طاحت منها الصفرة / طلاق شنو اللى تقول عليها ..اللطف عليها بنتى

______________________________________

وخشت بعضها الحكايه …..

لما فهمت بدريه انه حالف عليها بالطلاق بدت تخبط / حيه عليا بنتى ..الله لاتربحك يا ولد الحرام …
وماخلت ماقالتله

صفيه طول خشت دارها تبكى منهارة …الطلاق واضح وصحيح وبين .. امها داست بساط الحوش ..معناها الطلقه مشت فيها

لما صار عياط بدريه ركبو البنات يجرو لحوش خوهم …
خشت رحمه هيا الاولة …مشت تجرى لعبدالجبار
-رحمه / خيركم اللطف
-عبدالجبار مخلوع من العملة ..يهمس/ صفيه اطلقت منى
-خبطت رحمه وجهها / نهار احرش …خير بلاك ..
وتلفتت لخواتها الزوز / انزلو …انزلو لوطا ونادو امى
-رانيه/ غير شن فى …وخيرها تعيط
وبدريه عاد معش سكتت/ يا عيلة مساميم ..والله مانى ساكته …والله لما نحرقكم واحد واحد
-رحمه تعيط / قلتلكم انزلو ونادو امى ….

نزلو البنات وركبت خيريه …ولحقها عمران ومعاه سعيد نسيبه ماهو كيف واصل …
وبدى عمران يعارك ..وسعيد متأسف للموقف …
وبدريه تنوح / ياحليلى بنتى قعدت ليله عند راجلها واطلقت …شن بتقول عليها الناس…كان نحلف للصبح ماحد يصدقنى
-عبدالجبار متعصب/ تى ماهو كله منك يا…..
وسكت تحشم من بوه
-بدريه / هادى عملة يديرها ولدك يا خيريه … هدا انتى الساهيه امالا كانك ناويتلى كيف درتو
-خيريه / غير اسكتى علينا بس…الليله ماتبات الا وهوا رادها

-عبدالجبار/ ماك كنتى رافضه الموضوع …شن جاك توة وحلاك تعيطى وتندبي
-بدريه تشبحله وعنده نيه تاكله/ والله مانبيلك وجه ولا طايب على خاطرى تاخدها .. لكن ليله واطلقها ..ليه عليك ..والله بوها وخوتها يدبحوها
-سعيد متعصب / خلاص يابدريه اسكتى …كان مزال عندهم نيه فى بعض .. تو بعد الجمعه نجيبو الشيخ ويقرالهم فاتحه
-بدريه / عندهم نيه فى بعض !!.. عندهم ولا ماعندهمش .. الليله ايردها
-عبدالجبار يعيط / تى كله منك انتى يا وجه الشر…تى اقسم بالله كان ماتسكتى عناد فيك مانى رادها
-خيريه / تحشم بوك مقعمز .
-عمران / هيا وينها البنت
-خيريه/ فى دارها ومعاها رحمه
-عمران وقف/ بنمشى نصلى الجمعه انشدوها كان تبى تولى لراجلها نجيبلهم الشيخ يقرالهم فاتحه
ومشى للباب وسعيد وراه …
-عمران بنضرة غضب / جبار انزل وراى نمشو للجمعه
-عبدالجبار/ باهى نبدل ونلحقك
ونزلو عمران وسعيد
مشى عبدالجبار لداره …فتح الباب لقى صفيه مقعمزة عالسرير وتبكى ورحمه تهدى فيها
شبحلها وجعاته كيف صارتلها العملة …فتح الدولاب خدى حوايجه وطلع …
-شبح لبدريه / كله منك يا خامرة
-بدريه / انا خامرة يا متع العار يا واطى …علاش واخد بنتى بيش تواطيلى خشمى ..وراسك مقيوم فوقك وفوق اهلك كلهم
-عبدالجبار/ تى كانا ماكصرتاش معش ننتسمى جبار
-خيريه / يا وليدى تحشم واطلع
باب دار صفيه مفتوح …تسمع فالحوار وحالة فمها مستغربه فى كميه الكره اللى بين راجلها وامها
-عبدالجبار/ وانا حلفت …تى والله تحطى رجلك فى حوشى ماتبدا بنتك الا على دمت روحها
-خيريه / يا وليدى انزل…شن لازك على هالكلام توة

ونزل عبدالجبار بدل حوايجه فى حوش امه وسط حيرة خواته البنات …وطلع صلى الجمعه …وكلم بوه الشيخ وقاله انها الطلقه الاولى ماعليهاش فاتحه …يقوللها رددتكى الى عصمتى وهيا تقوله موافقه ويجيبلها هوا هديه زى نوع من المهر …وبالفعل دار هدا كله ….

وركب لحوشه …ماطيبلهاش خاطرها بكلمه …بل بالعكس رقد معاها واستمتع …وفالاخير تلفتت للجهه الثانيه وقعدت تبكى للصبح وهوا راقد

_____________________________________

–

ثانى يوم ….

نزلت صفيه لحوش خيريه …لقت امها مقعمزة فالصالة مع عمتها
-صفيه دابله / صباح الخير
-بدريه / سامحينى يابنيتى عالموقف اللى درتهولك
…وتفاهمت مع خيريه نجى نشوفك هنايا لبين ما عمك عمران يشوف حل مع هالمنجوه
-صفيه قعمزت / لا عادى ياام .. كاتب ربى
وقعدو يهدرزو شوى ..واستغربت صفيه ولا وحدة من حماواتها جت للصالة…فهمت ان العيلة كلها مش فالابيض مع امها مش غير راجلها
وقفت بدريه بتروح لحوشها …سقدتها بنتها للباب …
-بدريه / وراس بنيتى لما نعرف شغلى معاه
-صفيه / يمى تربحى خليه فى حاله …تو سيورها تتصفى القلوب
فتح عبدالجبار الباب حمق لما لقى مرته مع بدريه
خشت صفيه للصاله مخلوعه …

وقعدو بدريه وعبدالجبار فالباب
-بدريه / اسمع يا جبار… عارفاتك تكرهنى وتحقد عليا من زمان …لكن ياعنبو نهار امس واحنا صغار اليوم .. خلينا نتصالحو ..راهو الكبد حارة واللى تبيه انا فيه
-عبدالجبار بنضرة انتصار / تخلى بوى لامى …وتمشى فحالك ..
-بدريه / مصح وجهك … تبينى نطلق من راجلى بعد درت منه صغار
-عبدالجبار/ عادى ..انتى متعودة عالطلاق بوى مش اول راجل تاخديه
-بدريه / اما اقسم بالله ماتتحشم .. وراسك هدا تو نعرف كيف نكصرهولك ..
-عبدالجبار/ اطلعى برة يا قليلة الادب
-مسكت كتفه ودفاته / حول ..تو نعرف شغلى معاك
-طول جى فى باله انها بتقلب بوه عليه / اعلى مافى خيلك اركبيه

____________________________________

–
عبدالجبار بدى ناوى لبدريه عالصحيح …ويبي يكرهها فحياتها عن طريق بنتها

يوم السبت بعد الصباح بيوم
خوات عبدالجبار كملو ضمان الحوش والتسييق ومطلعين بساطات الحوش فالعشيه للجنان يغسلو فيهم
خش عبدالجبار لقاهم طارحين بساط ويكدو فيه

ركب للحوش فتح الباب لقى صفيه فالدوش …قعد فى دار النوم ايراجى فيها …
طلعت لقاته فالدار …هيا قاعدة واخدة على خاطرها من حكايه الطلاق ..ومزال ماخدتش عليه عالمزبوط

-صفيه منغير ماتشبحله / السلام عليكم
-عبدالجبار/ خيرك ركبتى من حوش العيلة
-صفيه / عادى غسلنا اماعين الغدى..خشو البنات دارهم شوى ركبت انا للحوش
-عبدالجبار/ كيف يعمى خشو دارهم …هوينهم فى الجنان يغسلو فالبساطات..خيرك ماعاونتيهمش
-صفيه / والله ماقالولى
-عبدالجبار/ اهو انا قلتلك ..انزلى عاونى
مع ان صفيه مستغربه كيف عروسه تنزل تغسل البساطات ..
ولكنها لبست جلابيتها ونزلت للبنات فالجنان

_____________________________________

–
فالجنان …

صفيه شدت المكنسه وبتمشى للبساط معاهم
-امال / والله ماصارت ..انتى عروسه جديدة بتغسلى معانا البساطات
-رانيه / كانا نبو تغسلى معانا راهو قلنالك …ماهو بكرى كنتى معانا
-صفيه بابتسامه / لا والله عادى …مفيش تعب نعاونكم
-امال/ ياااام …ياام تعالى

طلعت خيريه / شن اديري هنايا يا صفيه …اركبى لحوشك
وتضحك/ خدمه العروس اتجيب الفقر
-قربت منها صفيه وتهمس/ قالى جبار انزلى اغسلى معاهم البساطات … فكينى منه تو كانا ركبت ايكشخ عليا
-خيرية/ قلتلك اركبى …مفيش عروس اضم حوسه عرس راجلها
طلع عبدالجبار للباب/ خيركم
-رانيه / صفيه نزلت بتعاونا فغسيل البساطات …شوى قلنالها لا تو نكملوهم بروحنا
-عبدالجبار/ انا قلتلها انزلى عاونيهم …
وتلفتلها/ ماتركبيش لين تكملى معاهم الغسل
وطلع مستعجل من الحوش

البنات رضو بالامر الواقع وخلوها اضم معاهم ….

________________________________________

–
عبدالجبار طلع للشارع ايدور فى واحد من خوته صغار بدريه
لقى سيف يلعب فالكورة مع الصغار
-عبدالجبار/ سيف …سيف تعالى
-جاه سيف/ نعم
-عبدالجبار طلع دينار من جيبه وعطاهوله / هاك خود دينار برة اشرى بيه حلوة
-سيف فرحان / تى والله ماك عادى يا جبار
-عبدالجبار/ قبل ماتمشى للدكان وتشرى …برة لى امك قوللها اختى صفيه تغسل فالبساطات فى حوش خيريه
-سيف / باهى
-عبدالجبار/ اسمع مش تقوللها قالى جبار
-سيف / لا لا منقوللهاش ….
ومشى عبدالجبار وقف بعيد ويراقب …لقى بدريه طالعه بقفطان الحوش وحاطه محرمه على راسها …

قربعت باب الجنان وخشت..لقت بنتها بالفعل تغسل فالبساط معاهم …قريب ماتت ….ماخلت كلمه ماحطتها

-بدريه/ يابايرات يا خامرات يا متاعين الوسخ المدكوك
..جايبين بينتى اضملكم خمركم
-رانيه / احترمى نفسك يا بدريه …بنتك واقفه مانبوش نسمعوك وصخ ودانك قدامها
-صفيه / ياام انا نبى نغسل ..والله ماخلونى ..انا شديت فيهم
-بدريه / ضمى فمك انتى حسابك معاى بعدين
-طلعت خيريه / خيركم شن فى
-بدريه / شن فىىىى … دايرة بنتى خدامه لبناويتك الخامرات

وكبرت العركه..مالاول البنات كانو متحشمين من مرت خوهم
لكن لما تمادت بدريه عطوها على راسها …هيا تعزر وهما ايعزرو
…خيريه تسكت فى بناويتها وصفيه تسكت فى امها
الاصوات تعالت …خش عمران ايكشخ
-عمران / خيركم …خير بلاكم اصواتكم طالعه لاخر الدنيا
-بدريه تصفق بايديها / تعالة شوف بناويتك شن دايرات
يشبح فى وجه غريب واقف بينهم / هادى منو
-خيريه / هادى صفيه اهل عبدالجبار
-عمران / صفيه ??❤❤… ماشاءءءءالله
الشيبانى المراهق عجباته كنته ….

تمت العركه …وروحو للحوش ….

___________________________________________

–

فالليل بدريه تعشى فولادها
-سيف / حقه ماقلتلكش يمى
-بدريه وجهها اسود / شنو
-سيف / خوى عبدالجبار هوا اللى قالى برة لامك قوللها صفيه تغسل فالبساط
-بدريه قريب ماتت/ باهى كول وصكر فمك

كملو الصغار العشى ودخلتهم لدارهم رقدتهم .. ومشت لدارها …رقدت عالسرير
عمران راقد جنبها يتخايل فى صفيه/هدا اللى بياخد ولا لوح
….بيضا حمرا حتى ضحكتها فيها النص ..
وبدريه تخمم/ صار تبى دمى ينحرق يا جبار … ورحمه امى مانى مفوتتهالك …غير يطلع الصبح بس .. غدوة من الفجر نمشى عند الشيخه عويشه ونجيبلك بخور نخليك زى الكلب وراى انا وبنتى …غير اصبر عليا شوياااا بس

______________________________________

تمت ….ويتبع

والله يابنات تعليقاتكم اتخجل فيا ..والله اكرمتونى فوق الكرم.. نتمنى نردلكم من جمايلكم ولو حتة????

تصدقو ياجماعه الخير جعت..انخليكم تقرو و ننزل اندير براونيز فالميكرويف ..كيكه سريعه وطعمتها خيااال

نحبكككككككم ❤