رواية ولد راجل امي

#ولد_راجل_امى

بقلم زهور جمال الدين ?
?الحلقه التاسعه ?

فى حوش ساسى ….

درست سيارة عبدالجبار ومعاه امه واخته ….
-خيريه / بالك بكرى ياوليدى
-عبدالجبار/ هما نوعهم ايفيقو بكرى …بالتاكيد كلهم نايضين
-رحمه / انزل انت طق الباب..وشوف الجو وبعتالى ننزلو احنا
-خيريه / مزال والله…امالا ليش جايه انا كانا بنخليهم ايخضرتو ولدى بروحه
-عبدالجبار/ رحمه معاها حق ياام .. ننزل انا نشوف بوها يقبلنى ولا لا وبعتالى ساهل
-خيريه / بالنسبه ليا انا رجلى على رجلك ..والله مانخليك تنزلهم بروحك
-رحمه / امالا منقعد انا بس.. هيا حتى انا ننزل معاكم
-عبدالجبار/ هيا توكلو على ربي وانزلو
نزلو من السيارة ….
حوش ساسى مافيشى جنان .. باب عالشارع طول …قدام الباب فى قريب ست درجات …
ركبو من الدروج … وطق عبدالجبار الباب …
جت نعيمه فتحت الباب ….تلاقى خيريه قدامها …رعشت مع بعضها …هادى شن جابها فالوقت هدا بالدات
-خيريه / اهلا نعيمه وخيتى شن حالك
– نعيمه متفاجئة / اخلا يا خيريه …خير انشالله شن جابكم اليوم
-عبدالجبار/ غير قوليلهم تفضلو .. وناديلى عمى ساسى
طلع حفيظ متفاجأ?/ عبدالجبار
-عبدالجبار / اهلا حفيظ شن حالك
-حفيظ / تفضل خوى شن تبى
-عبدالجبار/ عالاقل قول للنساوين تفضلو يا راجل ..
-حفيظ/ تفضلى يا حاجه …دخليهم عمتى نعيمه لوسط الحوش وناديلى بوى ….وانت تفضل للمربوعه
-عبدالجبار/ فضل عليك ويرحم والديك
وخشو خيريه وبنتها لوسط الحوش..ومعاهم نعيمه فمها مسبت من المفاجئة … قعمزتهم فالصالة ..وخشت تنادى فى ساسى

قعمز عبدالجبار فالمربوعه وجى ساسى مخلوع حتى هوا
-ساسى/ خيرك شن جاى تبى
-عبدالجبار مبتسم / غير قول كيف حالك وبعتالى نهدرزو
-ساسى/ صفيه عطيتها لراجل ثانى …ماعاد عندك علاش جاينى ولا علاش بنقولك كيف حالك
-عبدالجبار يحسابه يكدب عليه/ انا تغيرت يا عمى ..وجايها من الباب نبيها تروح لحوشها
-ساسى قعمز عالصالون / قلتلك بنتى عطيتها
-عبدالجبار/ والله يا عمى لقيت كتيبه تحت السرير….اشبح من حاطها
لانه ادكر ان حفيظ ولد بدريه مقدرش يجبد سيرتها
-ساسى يكلم فى حفيظ/ هدا مايبيش يفهم منى راهو …
فهمه انت يا حفيظ
-حفيظ / صفيه تزوجت.. امس انقرت فاتحتها على صاحب خوى علاء
-وقف عبدالجبار مصدوم/ نعم ..نعم ..وكيف ماتشاورونيش
-حفيظ/ نشاوروك بصفتك شنو
-عبدالجبار واقف/ اسأل بوك فالعرف والتقاليد المراة لما بيعطوها يقولو لراجلها رانا بنزوجوها.. بالك عنده نيه فى ردها ..لانه هوا اولى الناس بيها
-ساسى/ تى اما عرف واما تقاليد متع طيح سعدك ..نشاورك كانها عندها منك صغار انت اولى واحد بيهم …لكن هيا ماعندهاش شن يربطها بيك …وعلاش بنشاورك
-عبدالجبار متعصب/ تى كيف ياعمى …

واحتد النقاش بينهم وتعالت الاصوات لدرجه ان امه تسمع ومخلوعه فالصالة مش مستوعبه الموضوع ..وحايرة فى صفيه خيرها ماطلعتش سلمت عليهم ..ونعيمه خيرها سيبتهم وخشت للكوجينه

_________________________________________

سعيد ركب سيارة علاء حامق ….
-سعيد / لانك غبى وحمار زيادة ..عرفت علاش صار هكى
-علاء/ تو ماللى طلعنا وانت تعيط عليا وانا ساكت …شنو تحسابنى حفيظ ولد اختك
-سعيد زبط روحها زودها / ياراجل وجعتنى صفيه .. البنت قلبها صافى حليب .. ليش هكى يصير معاها
-علاء/ لانه نصيب …ونصيب حد ماياخده حد
-سعيد / وحتى هوا نادر زعميتا مش قابلها لانها كانت عند خوه …حاجه والله كبيرة ياما من خوت خدو نساوين خوتهم بالسيف وفالاخير تصكر عليهم باب وجابو منهم صغار
-علاء/ تبى الرسمى ولا …الراجل معاه حق …تى والله حتى انا لو فمكانه مانقبل ان مرت خوى تجى مرتى …لااا وياريته خوى ميت …حى ومقابلنى
-سعيد/ كلام مفرخ هدا
-علاء/ حقه تعالة جاى .. انت منين تزبطه نادر…سامحنى اختك مش فالابيض معاهم كلهم ..
-سعيد/ الكلام قديم … زمانات شوره نادر يبي يشرى سيارة وبعت لبوه … كلفنى انا نمشيله وندفع حقها ..باعتبار انى شادله محلات الجهه الغربيه متاعه
-علاء/ هكى تعرفتو قصدك
-سعيد / مزال مش هكى بس …. قول مشيتله جهه سوق السيارات اللى بيشري منه وسلمت عليه وبندفع ..الولد غير رايه وماصارش من شري السيارة
-علاء/ علاش
-سعيد / شكله الولد قاله عمران اهو بنجيك غدوة …ولما شافنى انا جيته وبوه رخى بيه تكنطى وغير رايه ..الباين عليه حساس ..
-علاء/ اهاا
-سعيد / رفعته لحوشى وفطرته …يومها تأثر هلبا الولد
..وبعدها روح …وتلاقينا بعد عامين نفس الشى فى شريه سيارة… هوا لماشافنى زبطنى وتمتيله فيها السيارة .. رضى لان بوه مش فالموضوع
-علاء/ هدا علاش مستغربتش فالطريق لما مشينا لحوشه ..
-سعيد / لا منعرفش حوشه وين .. المرتين نتلاقو فى سوق السيارت
-علاء/ تبى نحطك فى المحلات ولا وين
-سعيد/ تى محلات شنو …ارفعنى لبوك عندى معاه كلام

_________________________________________

نادر وصفيةواقفين مواجهين بعض

-صفيه / انت شن تقول .. يا غبارتى
-نادر/ عبدالجبار اللى كنتى واخدتيه خوى من بوى
-صفيه بدت تبكى / يا حليلى …ياربي ليش تعاقب فيا والله ماعمرى ضلمت
-نادر قايم يده ويتكلم بهدوء/ خوك قالى انك تزوجتى تلاثه ايام ….

وتلفت للجهه الثانيه / هوا خش عليك
-صفيه بخوف / اييييه
-تلفتلها ومسكها من كتافها / كم رقدتى معاه مرة
-صفيه / هما الثلاثه ايام كلهم مشو مشاكل وطلاقات
-نادر/ جاوبينى..كم رقدتى معاه مرة
-صفيه / مرتين
-نزل ايديه / امالا ماتلزمينيش …
-صفيه / انت شن تقول انا كنت متزوجه بالحلال
-نادر/ حاشا لله انى نقول غير هكى … لكن وحدة رقدت مع خوى وعاشراته ..والله مايعطينى قلبي ولا نيتى نعاشرها
-صفيه ترعش/ شن قصدك
-نادر/ قصدى انى تفاهمت مع خوك تقعدى هنايا وقت وتروحى حوش بوك

-صفيه انهارت / بالك تحسابونى لعبه بين ايديكم انت وخوك كل واحد ياخدنى يومين ويطلقنى
-نادر/ يابنت الناس افهمينى ..انضرى للموضوع منطقيا كيف كنتى متزوجه خوى وتبينى ندير زوجك … راهو خوى
-صفيه / المفروض انت سئلت …قلت.. لكن مش بعيدة عليك هالاخلاق مدامك ولد عمران
-نادر/ وخيره عمران .. وشن شفتى عليه
-صفيه / عموما هيا الحياة نصيبات .. واللى مكتوب عالجبين لازم تشوفه العين

عمتك امباركه تنادى/ يا صوفيه … يا صوفيه
-صفيه/ هيا ياام … هانى جايه….
ومشت وخلاته ….اتأثر لما سمع صفيه تنادى فى امه يااام ..
والموقف كله اثر فى نادر .. لانه فرح بالبنت وحسها مناسبه

امباركه طلبت فطورها من صفيه …
طلعت صفيه للمطبخ ..قسمت الفطور …جابت منه لنادر صفرة … والصفرة الثانيه ماشيه بيها لدار عمتها بيش تفطرها
-نادر/ خيرك جبتى الفطور هنايا .. انا متعود نفطر مع امى
-صفيه متبيش تشبحله/ باهى تو نحطه الفطور وخش فطرها براحتك

-نادر/ خلى الصفرة واقعدى … وتو نجيب انا فطورى ونفطر معاكم
-تلفتتله / لا سامحنى .. يانخش انا يا انت
-امباركه تنادى/ يا صوفيه وين الفطور جوعنا
-نادر/ خشى افطرى انتى وياها وتو نفطر انا هنايا
-صفيه ?/ باهى
وخشت للدار بصفرة الفطور

________________________________________

قدام حوش ساسى …
وصلو سعيد وعلاء وجوهم سود … وماصارش من الهدرزة بهدوء فالسيارة …لماوصلو كانو متناقشين بحدة على موضوع صفيه فالطريق ….
نزل سعيد متكنطى / ساسى .. يا ساسى
-نزل علاء/ بالشوى يا راجل الجيران يسمعو تو نفتح للباب واناديه
-انفتخ الباب طلع حفيظ/ خيركم تعيطو نحسابوكم درتو حادث
-وراه ساسى/ تى خيرك يا سعيد
-سعيد/ من دون الناس اكلها مالقيت الا الولد هدا تعطيه بنتك
عبدالجبار يسمع فيهم بالكلمه ..لان روشن المربوعه عالشارع ومفتوح
-ساسى مخلوع / خيره نادر…
وتلفت لولده علاء/ ماك قلت صاحبى وناشد عليه
-سعيد/ نادر يكون ولد عمران … وخو عبدالجبار راجلها الاول … كيف تعطى بنتك لزوز خوت قبل ماتسأل
عبدالجبار سمع الكلمه وطلع يجرى حامق/ شن تخرف انت يا سعيد …صفيه عطيتوها لخوى نادر
-علاء/ انت شن ادير هنايا
-عبدالجبار ايعيط / جاوبونى
-ساسى/ والله ماكنت نعرف انه ولد عمران الشياطين ولا هوا خوك …معقولة نحصل فى نفس العيلة مرتين
-سعيد / وكيف بدير توة .. وكيف بتتصرف
-نزل عبدالجبار يجرى ركب سيارته / تو نتصرف انا ….
-علاء/ تى وين ماشى يا فرخ
-ولع جبار سيارته / تى حولو من قدامى
-سعيد / الحقه شكله ماشى لخوه
ركب علاء فى سيارته ونقز خوه حفيظ جنبه وطلعو يجرو …
عبدالجبار سيارته كويسه سبقهم.. وعلاء سيارته مش اوى وقف يصبلها فى اميه وتأخر

____________________________________


فى حوش نادر …

نادر مقعمز فالصالة …وشاد طاسه الشاهى فى يده ويدخن … ويخمم …
وصفيه لداخل مع عمتها تفطر فيها …كملت فطورها.. فتحت باب الغرفه وطلعت شادة فى يدها صفرة الفطور …خشت للكوجينه حطتها … وطلعت مشت لنادر
-صفيه / خيرك مفطرتش
-نادر يدخن/ ماخاطريش

وبدى الباب ايطقطق
-عبدالجبار/ افتح يانادر … افتح
-صفيه بدت ترعش/ عبدالجبار…هدا صوت عبدالجبار
-نادر تفاجأ/ من عبدالجبار قصدك
-صفيه تعيط / عبدالجبار خوك
-امه فالدار انخلعت من صوت التخبيط/ نادر …وليدى نادر مع منو تتعارك
-نادر لوح الدخان وعفس عليه / خشى لامى نخلعت ..وديرى
بالك تطلعى
مشت تجرى للدار صكرتها بالمفتاح وخشت للعزوز تبى تهديها
طلع نادر للباب فتحه ويشبح لعبدالجبار اللى وجهه رايح اسود …
عبدالجبار مد يده ودف نادر/ حول
وخش يجرى للصاله / صفيه ….يا صفيه وينك …
وصفيه فالدار ترعش وحاطه ايديها على ودان عمتها بيش ماتسمعش وتنخلع
-نادر/ انت كيف تخش على حرمه ناس هكى لا احم ولا تستور
-عبدالجبار/ اسمع يانادر احنا خوت والمفروض…
-قص عليه / خوت فالكتيب بس
-عبدالجبار يعيط/ تاخد مرتى اللى كنت متزوجها ..وتبينى نسكت ….
ويعيط / صفيه اطلعى …صفيه …

________________________________

صفيه معش تحملت…. وقفت …لبست حجابها وفتحت دولاب العزوز طلعت شال اسود داراته نقاب …وفتحت باب الدار وطلعت
-صفيه / خيرك شن تبى
-عبدالجبار قلبه طق / صفيه ?
-نادر حامق/ انا شن قلتلك
-صفيه / سامحنى فيها هادى المرة هادى بس
وتلفتت لجبار ومدت يدها للباب/ اطلع برة
-عبدالجبار اتأثر / انا جبار يا صفيه
-صفيه / وشن يعنى ..انا معرفتى بيك كلها ثلاثه ايام ومشو فى حالهم وشلتهم من داكرتى..امى فالدار مريضه لو سمحت
منبوش مشاكل
-عبدالجبار/ امك هيا اللى وصلاتك لهدا كله …لقيت حجاب تحت سريرنا …وعرفت ان طلاقنا كان بلعبه من امك ..انا كنت عند بوك نبى نردك ..لانى قاعد نبيك وشاريك يا صفيه
نادر معش تحمل مهما يكون هادى مرته وعرضه وقاعد يتغزل فيها قدامه ….
هجم على عبدالجبار خنقه/ يا مصخ تسمع فى مرتى فالكلام قدامى يا مصخ …
وطاحو يضاربو … وخشو علاء وحفيظ ايحزو .. مشت صفيه تجرى للحمام خشت وصكرت على روحها الباب
والاولاد ايحزو والخوت يتعاركو ….
علاء شاد نادر… وحفيظ شاد جبار
-حفيظ/ انتو خوت ماتوصلش بيناتكم هكى
-عبدالجبار يعيط/ مرتى بطلقها غصبا عنك يا واطى…اتلف من ورا خوك وتاخد مرته
-علاء يعيط/ لما عطيتهاله ماكنش يعرف ان صفيه كانت واخداتك انت هاديكه الماخدة الحرفه
-نادر/ خليه مدوراش…طول عمرهم هكى صغار بوى انانيين
وكر حفيظ عبدالجبار وطلعه برة وركبه سيارته وهدده انع معش يجى على حال اخته وراجلها …
ولع جبار سيارته بغيض وطلع يجرى
علاء طلع يجرى برة / اركب يا حفيظ هدا ماشى لحوشنا غادى تخافه يتعارك مع بوك
-حفيظ/ واختك …
-علاء/ ماتخافش عليها معاها راجلها
ونادر واقف يشبحلهم فهم كلامهم كله وماباش يشدهم ويعرضلهم …

_______________________________________

خش للحوش يجرى يسمع فى امه تنادى/ يا صوفيه
خشلها قعد يهدى فيها …
-امباركه تبكى / مع من تتعارك ياوليد
-نادر يفتح فى حبوب واصفهملها دكتورها فى حال رعشت ويطلع فى حبة/ مافى شى يااام التلفزيون قوى بس
-امه خدت الحبه فى فمها / وين مرتك
-قام نادر راسه / مرتى!!
فرح ان امه جمعت معلومه من امس لليوم وقاعدة زابطه ان صفيه مرته
-نادر/ صفيه تغسل فى الماعين فى المطبخ
-امباركه / امم باهى …ساويلى المخدة منرقد
-نادر/ انتى قبل شوى فقتى ياام ..فكك منه النوم
-امباركه / حول …
وحطت راسها عالمخدة وسكرت عيونها

طلع نادر / صفيه …صفيه وينك …
فتح الديار فاضيات …مشى للحمام لقاه مصكر …
يحرك فالمقبض/ صفيه …صفيه افتحى الباب نكلم فيك ردى عليا
-صفيه مقعمزة ورا الباب وتبكى/ ياربي كل ليله ندعيلك تاخد امانتك اعلاش مخلينى لتوة فالدنيا
-نادر سخفاته/ غير افتحى الباب..راك فالحمام بطلى تدعى لربي وتدكريه وانتى فى بيت النجاسه
صفيه ساكته تطلع منها شهقه بكى مرة مرة
-نادر/ خلاص قلتلك افتحى الباب
-صفيه / لا نخاف منك
-نادر/ انا مش شخص جاهل .. رانى مثقف ..والعركه اللى صارت توة انتى ماليكش اى علاقه بيها
-صفيه وقفت وتلفتت للباب/ عبدالجبار هدا شيطان .. انانى
يبي كل شى لمصلحته
-نادر/ باهى افتحى الباب مش كويس قعادك فالحمام
فتحت الباب وطلعت …
-نادر/ ممكن معش تدكرى اسمه على لسانك ..انتى توة زوجتى .. وانا نوعى غيور على محارمى
-مدت يدها لفمه / فمك دم …
قام يده وحطها على يدها / وباسها …
-جبدت يدها وواطت راسهل / شوية بس نجيبلك معقم .. وامسح الدم …

مشى قعمز فالصالة .. وادكر انها كانت مرت خوه ..ويتخايل فيها معاه فالسرير …
جت صفيه جابت قطن ومعقم…
وبدت العزوز تنادى/ يا صوفيه …
تلفتت صفيه بتمشيلها …
-نادر / لو سمحتى
-تلفتتله / نعم
-نادر/ منكدبش عليك كونك كنتى زوجه خوى استحالة نقدر انا وياك نستمر.. ولدلك منبيش اى جميل على امى …تو نمشيلها انا …
-صفيه / توة بتخدمها انت ..وبعد نطلع انا من الحوش كيف بدير
-نادر/ نبدا ندور على بنت الحلال اللى تعاونى فيها من جديد وربي انشاءالله يعطينى على قيس نيتى
الكلمه نزلت عليها زى السم وحست ان كرامتها انجرحت
-صفيه / اسمع انا مانغصبك عليا …مهما يكون النصيب من الله… لكن امك ..ارجوك ثم ارجوك مانحرمنيش خدمتها …
لانها تقبلتنى …
وتلفتت مشت لدار امه

__________________________________________

فى نفس اليوم فالليل …

وصل عبدالجبار بامه العشيه لحوشهم ….وفالليل الدنيا خايضه … سمعت بدريه ببنتها خدت نادر ولد عمران الكبير منغير ماتقوللها …. لكن غصتها وسكتت ومازعلتش لانها عارفه ضروف بنتها … والمهم انها انسترت …
اما عمران كان عام كامل ناسيها وفايتها البنيه خلاص مشت لحوش بوها وفات موضوعها واعجابه بيها …لكن لما سمع انها خدت ولده نادر ناضو عليه المواجع .. وبدى يفكر ويتفنن كيف يقدر يرجع علاقته مع نادر ويمشيله لحوشه بيش يشوفها ???

-عبدالجبار/ والله مانى مخليه يتهنى بيهاة..وبالك حتى زواجتهم حرام لانها كانت واخدة خوه

-احمد/ يا جبار فوت موضوعها ..المراة طلقتها وكل حد مشى فى حاله
-عبدالجبار/ طلقتها اى نعم …لكن يديرو الخونه ويعطوها لخوى لا …
-احمد/ منو اللى دار عليك الخونه …خوتها مايعرفوشو ان عندك اخ غيري اصلا
-عبدالجبار/ وخالها.. اهو طلع يعرفه
-احمد / على حكايتكم قلتو خالها جاى يعارك ومصدوم كيف عطوها لخوك
-عبدالجبار/ اووووه علينا …انت جاى معاى ولا معاهم
-احمد / انا جاى مع الحق …خلى البنت فى حالها تتهنى مع راجلها وبرة انت شوفلك بنت حلال تهنيك
-ضرب مرش الروشن كصره / تبينى نخليه يتهنى بيها ..تى والله مانى مسيهاله.. ايطلقها .. حتى كانا مارجعتش ليا انا عادى.. المهم لا انا ولا هوا
-احمد حامق/ يرضيك البنت تطلق مرتين
-عبدالجبار/ كانا هدا نصيبها ماعندى مابنديرلها
خشت امهم وخواتهم يجرو
-خيريه / لاه عليك كصرت المرش يا وليدى

_______________________________________

ثانى يوم …
نادر صلى الفجر… وطلع ولع سيارته ايسخن فيها .. وخش للحوش .. ومشى لدار امه فتح الباب ..
لقى صفيه راقدة وقفطانها واصل لبطنها والغطا مغطيلها رجل والثانيه لا …ونص صدرها يبان
وقف مشوار يشبحلها ويشوف لجمالها وجسمها المتناسق المغرى لكن مقدرش يقرب منها
خش باس على راس امه …
فاقت بيه صفيه طول قعدت تغطى فى جسمها وهوا يشبحلها برغبه ….
-صفيه / خيرك لابس.. وين ماشى
-نادر/ صاحبى عنده كريه اعتدر عنها فخديتها انا
-صفيه/ قصدك بتمشى …
-نادر/ هدا عملى .. والفرصه اللى نحصلها المفروض مانضيعهاش…
-صفيه / تغيب هلبا
-نادر / خمسه ايام …
صفيه / ?
-نادر / امى فى رقبتك ..امانه عندك …والباب ماتفتحيشى لحد الا عمى عبدالكريم راجل خالتى ساكن بعدنا بحوشين

-صفيه / باهى
مدلها فلوس/ الحوش فيه الخير كله لكن لو استحقيتى حاجه ابعتى صهيب ولد صلاح ولد خالتى للمحل.. افتحى الباب ونادى عليه يجيك طول ديما يلعب فالشارع
-صفيه / باهى …
تلفت بيمشى …ناضت هيا وراه
-نادر/ خليك راقدة متفركسيش نومك
-صفيه / لا عادى خلى نسقدك
-نادر / باهى
خشت للمطبخ حطت شاهى عالنار .. وخدت بسيسه حركتها بزيت الزيتون..وحطتها فى صفرة ومعاها الشاهى ورفعتهوله للصاله
-نادر/ انتى من قالك انى نفطر فى البسيسه والشاهى لما بنسافر بالسيارة
-صفيه غمزتله / امك امبارح قالتلى انك تحرك فالبسيسه وتفطر بيها
-نادر/ لكن امى تنسى فى كل شى …شن جاها هالايام وبدت تتفكر
-صفيه / بالك فرحانه بيك انك تزوجت ….
ابتسمت / على فكرة حتى لو ماصارش من زواجنا ..لازم تتزوج طول ..لان امك فرحت هلبا بزواجتك
-نادر/ ومنين نلقالها صفيه ثانيه تحبها وتتعلق بيها من اول يوم زى ماصارلها معاك
صفيه جتها نوع من الرهبه لانه مقرب منها هلبا ونضراته خلو قلبها يطق …

شرب الشاهى وطلع …بالرغم كان عنده نيه قويه يحضنها ويبوسها …لكن مقدرش…صورت خوه قاعده بينه وبينها

ركب سيارته …وتوكل …. ويخمم/ توة كانا مش هبال نمشى للراجل فالليل ونترجاه يعطينى السفرة ونقسم عليه بالنص
تعبى وجهدى كله نقسمه عليه هدا كله غير بيش نهرب منها بس ….

______________________________________


ثانى يوم طق باب حوش نادر
جت صفيه للباب / شكون
-سعاد / انا سعاد بنت خالة نادر
-فتحت صفيه الباب/ اهلين بيك …
-سعاد تسلم / اهلين بيك وسهلين …
وراها بناتها .. ناديه وهيفا خاشات بكامل اناقتهم .. ناديه سلمت عليها كويس.. لكن هيفا تسلم فوق النفس
خشو للصالة ومنها لدار عمتك امباركه ….
خشت سعاد تسلم ووراها بناتها / اهلين خالتى
-صفيه / توة قالى عمى عبدالكريم عليكم بتجو لما خش يشوف فى امى
نادية وهيفا شبحو لبعضهم وضحكو ….
-هيفاء/ امك …شنو جايبه امك معاك هنايا
واستمرو فالضحك هيا واختها .. وامهم تفنص فيهم
-صفيه / انا نحكى على امى مباركه ..
ووقفت / عن ادنكم ندير شاهى عالنار
-سعاد/ والله مانبو نتعبوك …غير قعمزى هدرزى
-صفيه / تعبك راحه …منعطلش نحطه ونجى …
طلعت صفيه من الغرفه وتسمع فى هيفا تسحن فى امها
-هيفا/ هيا هادى اللى واخدها يا ماما …انا احلى منها بالف مرة شن عجبه فيها
-ناديه تضحك / بالنسبه للجمال لا عاااد .. البنيه قنينه وجسمها صاروخ
-هيفا/ صاروخ ايطيح عليك ايفجرك … هادى قنينه هادى
-سعاد تعض فى شاربها / اسكتو خالتى تفهم ….
انصدمت صفيه من كلامهم ومشت للمطبخ …اطلع فى براد الشاهى وسرحانه…فهمت ان فى شى بين نادر وهيفا

حطت براد الشاهى عالنار …وطلعت امعاينها القنينات .. وجهزت الصفرة وحطت فيها مترد حطت فيه حلاوات …
ورجعت للدار ….
تسمع فى هيفا/ كان مش من خوك خالد وقفلى فيها رانى توة انا مرته
-سعاد / حاشاه اوخى..شن دخله فيك وفى دبايرك
-هيفا/ يااام هوا يبينى …متاكدة منه يحبنى
قصت عليهم امباركه / صوفيه …يا صوفيه
خشت صفيه وجهها مقلوب / نعم ياااام
والبنات يضحكو على كلمه صوفيه ….
-امباركه / ساويلى مخدتى قاعديهالى منتكى

مدت صفيه يدها تساويلها فى مكانها …وتكتها …
وسعاد تهمس لبنتها / امالا بديره لخالتى انتى هدا كله …
طلعت صفيه جابت الشاهى وهيفا تشبحلها فى نضرات حقد …..
-ناديه / تقريبا قال جدى عبدالكريم ان طلع فى بينكم قرابه انتى ونادر ولا انا غالطه
-صفيه / قرابت دم مفيش.. لكن هوا يكون ولد راجل امى
-هيفا/ كيييف ..امك واخدة واحد ثانى غير بوك
-صفيه / ايه.. وبوى واخد وحدة ثانيه غير امى
هيفا قعدت تشبحلها حست ان شخصيتها قويةومعندهاش نقص …

هدرزو قيس ساعه وطلعو ….

وماقعدت صفيه تسحن …والغيرة بتقتلها …مرة تقنع نفسها انه مايبيهاش كانه يبيها راهو خداها …وساعه تدكرت صوت هيفا لما تقول لامها هوا يبينى وتقعد تسحن

اربع ايام وهيا لا ماكلة لا شراب…تسحن على هيفا واللى قالاته.. وتكطكط / مدامه يبي بنت خالته امالا ليش واخدنى

______________________________________

خامس يوم …

الساعه 2 فالليل درس نادر سيارته الكبيرة نهايه الشارع فى مكانها اللى يدرس فيه ديما …
نزل من نهايه شارعهم .. وصل لحوشهم …
فتح الباب وخش وفى يده كيسه .. يتنحنح مشى لدار امه… فتح الباب لقى صفيه مقعمزة وفى حجرها امه حاطه راسها وراقدة .. وصفيه متكيه راسها لتالى راقدة حتى هيا
-نادر/ صفيه
-صفحت صفيه عيونها شافاته فرحت/ نادر .. روحت
-خش قعمز على ركابه قدام امه / روحت ايه
-صفيه / الف الحمدلله على سلامتك
-لاحضها متغيرة / خيرك فى حاجه
-صفيه / لا لا مافى شى …
ومدت يدها على شعر عمتك مباركه/ يااام نوضى نادر روح
-نادر/ خيرك مرقدتها هكى…علاش مش فمكانها
-صفيه / لما نحطها فمكانها تبدا تبكى وتنادى يانادر وينك.. ولما نرقدها على رجلى تقعد راقدة للصبح
-نادر تأثر/ مش عارف بيش نكافيك
-صفيه / مش بجميلى
وتلفتت لوطا تشبح لعمتها / ياام ..نوضى اهو نادر مقعمز قدامك ..

فتحت عيونها / نادر.. وليدى …
وقعد يضبط فيها ويبكى/ سامحينى ياام عطلت عليك
-امباركه / وشن جبتلى
-نادر يمسح فدموعه وفتح الكيسه / جبتلك شبشب …
-امباركه زى العيل / محلااااه شبشبى اللى جابهولى وليدى
-نادر/ تتهنى بيه يااام
-قامت الشبشب/ شوفى يا صوفيه نادر شن جابلى
-صفيه/ تبيديه بالهنا
-نادر/ اديريلى شاهى
-منغير ماتشبحله / باهى
وتلفتت لعمتها / خلى نحطلك المخدة تحت راسك بيش انوض اندير لى نادر الشاهى
-تقاعدت / باهى نوضى ….
وقفت وطلعت من الدار … ورقد نادر امه فمكانها عالسرير
وطلع من الدار لحق صفيه للمطبخ

_______________________________________

خشت صفيه للمطبخ فتحت الدولاب وطلعت براد الشاهى
صبت فيه اميه وحطاته عالنار وواقفه تتفرج عليه وسرحانه

وقف نادر على باب المطبخ / فى حاجه
-تلفتتله / نعم
-نادر/ خيرك .. فى حاجه …
تلفتت للبراد / لا لا مافى شى
قرب منها ووقف وراها وقرب من ودنها / جبتلك هديه
تحركت تبى تبعد عليه .. مسكها من ايديها / خليك
طلع من جيبه سلسله دهب ومد يده حكم ضمها ليه من الخلف .. ولبسهالها …
حطت صفيه يدها ع التعليقه اللى فالسلسله/ ليش متعب روحك
-نادر/ هادى سلسله دهب مكتوب عليها صفيه
-قامتها بيدها / بلحقه …
وشافت لقت بالفعل اسمها / مدامها دهب معناها غاليه.. ليش متعب روحك
ضمها ليه وهوا واقف وراها / الغالى للغالى
-تفك فى نفسها / نااادر

لما لقاها تصد فيه وخر شوى وبعد عليها … مكنش ناوى يدير الحركه هادى ولا يوقف وراها ولا يلبسهالها السلسله .. كان ناوى يعطيهالها جنب امه …لكن الباين العقل يقرر قرار والقلب يقرر قرار … وفالاخير تربح قرارات المشاعر وهيا اللى تتنفد …

طلع للصالة قعمز وهيا جابتله الشاهى وخشت لدار امه …وهوا من التعب رقد ..حتى الشاهى ماشرباش

________________________________________


ثانى يوم الصبح

فاق نادر الساعه عشرة لقاهم فاطرين ومكملين …
خش للدار/ صباح الخير ياام …
ويشبح لصفيه…
الزوز ردو عليه / صباح الخير
-امباركه / فيسع نوضى جيبي لنادر فطوره …
-صفيه / باهى
مشت للباب بتطلع .. هوا واقف متقى نص الباب
-صفيه / ترا حول شوى منطلع
-وخر شووية/ اطلعى اهوا الباب
-صفيه/ كيف منطلع وانت واقف هكى
-نادر/ اهاا قصدك نحول
-صفيه تضحك / ايه
-حول نادر من قدام الباب وخاش للدار/ باهى اللى شوفنا ضحكتك …
خش سلم على امه وباس يدها ….
ومشى لصفيه للمطبخ
-نادر/ انا مانعرفش انبصر.. خيرك قولى
-صفيه / قلتلك مافى شى
-نادر/ كدابه
-صفيه / انا مش كدابه
-نادر/ لا كدابه .. عيونك ماتقيميش فيهم فيا .. ليش هدا كله منو مزعلك وانا مهناش
-صفيه / ماحد مزعلنى
-نادر/ باهى اشبحيلى
-شبحتله/ هااه اهو نشبحلك
وحولت عيونهةا طول لان نضرته حارة
-قرب منها / انا مش رجل كرسى فالحوش …لازم نعرف كل شى يصير بعدى
-صفيه / مافى شى بس انا حسيت انى خشيت عالخط بينك وبين هيفا بنت خالتك

-نادر/ منو هيفا هادى اللى تقولى عليها …هيفا بنت سعاد .. كانا نبيها كانت قدامى قبل ماناخد رانى خديتها
-صفيه / سمعتها بودانى تقول لامها هوا يبينى …يعنى نكدب ودانى

-نادر/ لا لا صدقى ودانك …يعنى البنت هيا اللى صادقه وراجلك هوا الكداب

طقطق باب الحوش
-نادر/ شويا بس نشوف شكون …واهو جايك مزال الحديث ايطول
وطلع للباب لقى فتحى جارهم سلم عليه وطلع …

شويا وخش مراد ولد بنت مصطفى جارهم
-مراد / يا عمتى قالتلك حناى اعطينى غاز الشاهى
-صفيه / باهى …
طلعتهوله من ورا الباب …
الولد صغير مايقدرش يرفعه …قامتهوله هيا للباب ….
-مراد / ياعمتى حطيهولى عالمرشابيدى تو نقول لخالى يجى يرفعه ..اطلعى مافى حد ….
صفيه حاطه وشاح على راسها وطلعت الغاز حطاته عالمرشبيدى …وقامت راسها لقت نادر واقف وجنبه هيفا بنت سعاد بنت خالته تدوى معاه …
نادر تلفت لقى صفيه تشبحلهم …وجعتها اللقطه خشت بسرعه وردت الباب …وهوا خلى هيفا تدوى ومشى للحوش طول بخطوات سريعه خش يدور على صفيه …

_______________________________________

تمت ….ويتبع

متابعاتى فانزاتى حبيباتى اخواتى صديقاتى نحبكم كلكم ونموت فيكم بس لازم تتفهمو انى الصبح الايام هادو معش مساعدنى نكتب… لكن فالليل نكتب بيش انزل الحلقه اول منكمل …الفجر او قبله …غايتى انكم تنوضو الصبح تلاقو الحلقه قدامكم …بس فالليل منبيش نشحطكم والله ماهو طبعى ..لانى مش حنقدر نتقيد بأى وقت ..احسن حل ارقدو والصبح تلقوها.. والحاضر يعلم الغايب

نحبكم

 

error: