رواية ولد راجل امي
#ولد_راجل_امى
بقلم زهور جمال الدين?
?الحلقه الثالثه?
–
فى دار خيريه …
-عبدالجبار قارن حواجبه / نويت نتزوج
-خيريه / هدا احلى خبر تقولهولى …لكن خيرك مش فرحان
-فاق بنفسه / لااا عادى
-خيريه / عندك وحدة معينه ولا تبى ندورلك
-عبدالجبار/ لا فى وحدة معينه نبيك تمشيلها
-خيريه فرحانه / ومنو هادى اللى حطيت عليها العين امها داعيتلها ليله القدر ياوليدى
-عبدالجبار تلخبط وز اللى تحشم / والله شن منقولك يااام … انا الحق من فترة شايف بنيه وعجبتنى ..و …
-خيريه / وخيره ياوليدى … خيرك متحشم ..تختارها انت خير ما نختارلك انا ولا وحدة من خواتك …
-عبدالجبار /هيا البنت مش ساكنه فطرابلس …من منطقه ثانيه … وليا فترة متعرف عليها .. خلى نشوف راى اماليها ونقولك اسمها ونرفعك تخطبيها
-خيريه / خلاص متفاهمين يا وليدى … والله حسك فرحتنى على هالصبح …
طلع عبدالجبار من جنب امه …
ويضحك فى خاطره/ الحمدلله انها ماسألتنيش على اسم البنت كنهدا شن منقوللها وانا حتى اسمها منعرفاش
وصل قدام الجامعه درس سيارته وسرح / توة كان تسمع هاديكا العقرب انى مناخد بنتها والله ماهى مخليتنى .. احسن حاجه نضمن الموضوع زى ماخخمت امبارح وبعتالى نقوللهم كلهم …
نزل من السيارة وخش لكليه الاقتصاد وين مايحاضر هوا
_________________________________________
–
بعد يومين …
عبدالجبار فى سيارته …ماشى لمنطقه امالى بدرية ..منغير مايقول لحد …قصد حوش جدها …طق عالباب …يسمع فى صوت شيبانى طالع من المربوعه البرانيه
-خليفه / اشكووون
-عبدالجبار مشى لقدام باب المربوعه / السلام عليكم
-خليفه / وعليكم السلام تفضل
-عبدالجبار/ ندور فى سعيد .. نبيه فى موضوع
خليفه / تلقاه فى دكاكين عمران نسيبه ..عالرئيسى هوينهم
عبدالجبار نزلت عليه الكلمه زى الجمرة … المحلات اللى كان فيهم خاله بدى فيهم سعيد نسيبه الجديد…
طلع من الحوش ويخمم فى خاطره / كيف عاد ..بدرية هيا اللى تحكم وتطلق وتحط فى اللى يعجبها فالمحلات ..
ركب سيارته وقاعد ياكل فى بعضه ويخمم / خوى احمد قريب بتموت خاطر يخدم مع بوى .. وهيا مريسه خوها على محلات يسوو قريب المليون
وصل قدام المحلات .. نادى على سعيد بعتله عامل
لما طلع سعيد مازبطش عبدالجبار لانهم عمرهم ماتلاقو
… عرفه عبدالجبار بنفسه وانه ولد عمران ..فرحب بيه سعيد ترحيب شديد
-عبدالجبار / نبيك فى موضوع ضرورى …لكن فى حوشكم
-سعيد مستغرب/ باهى شوى بس نوصى العمال ونجيك
وبالفعل ركب معاه للسيارة وروحو لحوش خليفه ..خشو للصالة باعتبار الحوش مافيه حد ..حناه توفت وجده يقعد فالنهار فالمربوعه وماباش يتزوج
-سعيد / اهو جينا للحوش تفضل
_______________________________________
–
فى حوش بدريه
بدريه تتكلم فالتليفون الارضى مع واحد من عمال المحلات متع عمران اللى فى منطقه اماليها ..دايراته عين ليها غادى يراقبلها فى راجلها
-بدريه / متاكد انت …تى بالك احمد راهم يشبهو بعضهم هلبا
-العامل / هوا اللى قالى نبى سعيد وقوله يبيك عبدالجبار
-بدريه / غبر فيه انشاءالله شن مرفعه غادى ..وشن يبي من خوى سعيد…هما فالمكتب توة !!
-العامل / لا طلعو مشو لحوش الاستاد سعيد
-بدريه / باهى غير صكر توة …وتو نفهم شنو القصه
وسكرت الخط …
وقعدت تتصل برقم حوش جدها تلاقى فيه عاطل
وقفت تاكل فى بعضها وتخمم / شن تخطط ياولد الحرام .. شنو اللى تبى تقوله لخوى ..
خشت تلبس فى جلابيتها / تو نمشى للعقرب امه ونفهم منها ليش ماشى ..ولا بالك هيا اللى باعتاته
لبست ودارت صغارها قدامها وطلعت من الحوش وصكراته ومشت لحوش خيريه اطقطق
_________________________________________
–
فتحت رانيه الباب لقت بدريه قدامها اتفاجئت
-رانيه? / نعم
-بدريه / تحشمى وافتحى الباب نبى امك
-رانيه / امى راقدة
-خيريه تنادى من داخل/ منو عالباب يا رانيه
-بدريه ?/ هادى هيا امك الراقدة … حولى من قدامى نبيها
حولت رانيه من ورا الباب وخشت بدريه للحوش
-خيريه / اهلين يا بدريه تفضلى
-رانيه / ?
-بدريه / لا اهلين ولا سهلين.. ولدك ليش باعتاته لحوش جدى
-خيريه / منو ولدى
-بدريه / ايه زيدى مشيه عليا …ديري روحك طيبه و ماكش عارفه على من ندوى .. تى اقسم بالله ماتطلعى الا انتى باعتيه
-طلعت امال من الدار/ نقصى صوتك واحترمى نفسك ..انتى فى حوش محترم
-بدريه / احترام النفس خليته ليكم انتو ياعقارب ..يلى سمكم يسد بلاد كاملة تتسمم ..
-رانيه/ منجوش فى نص سمك انتى يالفعه
-بدريه تكشخ على خيريه / شدى عليا بناتك العقارب هادو
…وتوووووة نبى نعرف ولدك الكداب علاش باعتيه لحوش جدى… شن باعتاته ايقول ويكدب عليا غادى
-رانيه / انتى الكدابه مش خوى
-بدريه / ماشالله عالربايه يا خيريه .. طالعيلك نسخه طبق الاصل
-امال / وخيرها ربايتنا …خير من رباية بعض الناس خطافين تريس من نساوينهم وصغارهم
-بدريه / ?
-خيريه تلفتت لبناويتها / هيا صكرى فمك انتى وياها ياسر
وتلفتت لبدريه / ربي يسامحك عالكلام اللى قلتيه كله
…وبالنسبه لولدى انا مش عارفه منو من ولادى تتكلمى عليه … وعلى اى حال من يكون فيهم انا مابعتاش
-بدريه / تو نفهم انا وبعتالى يصير خير ..لكن اقسم بالله يا خيريه المرة هادى نا حتمشى بالساهل
-رانيه / اعلى مافى خيلك اركبيه
بدرية تشبحلهم بغل ..وخدت صغارها ومشت بتطلع / والله لما نقربعها عليكم يا كمشه مجرمه
فتحت الباب بتطلع شافت عمران درس سيارته ونزل منها …
ردت الباب زى ماكان وولت لى صطالة خيريه
_______________________________________
–
فى حوش سعيد
سعيد جايب براد شاهى فى صفرة ومعاه زوز طواسى
حطهم عالطاولة
-عبدالجبار / علاش متعب روحك
-سعيد / تعبك راحة خوى عبدو…..
بدى يصب فالشاهى / بوك وامك شنحالهم…واهلك واختى بدريه
-خدى عبدالجبار طاسه الشاهى/ الحمدلله فخيار الخير …
وتلفتله / انت اكيدة تبى تعرف سبب جيتى ومناداتى ليك للحوش
-سعيد مبتسم / كان تقعد عندى عشرة ايام مانسئلك علاش جاى…رانا بدو ونعرفو الصايبة وولاد بيتيه
-عبدالجبار / ونعما الناس ربي يحفظكم
وحط طاسه الشاهى
-سعيد / اشرب يا راجل
-عبدالجبار / انا الحق جايك فى موضوع زواج … وقاصدك
-سعيد / مايغلاش عليك لكن انا ماعنديش خوات صبايا ?.. انت عارفهم هما زوز ومتزوجات … وحدة منهم عند بوك
-عبدالجبار/ عارف ان ماعندكش خوات للزواج … لكن انا جاى منعرض عليك موضوعى لانه اصلا فيه مشكلة
-سعيد / احكى .. اهو نسمع فيك
-عبدالجبار/ انا عاجبتنى بنت …اخلاقها وسمعتها وسمعت بوها ….
تنحنح/ وخوالها
-سعيد / ايه باهى وين المشكلة
-عبدالجبار/ المشكلة فى امها ماتبينيش ..وديما وهيا تاخد وتحط عليا فالكلام منغير وجه حق
-سعيد / وعلاش ..انت شن بينك وبينها
-عبدالجبار/ بالمختصر خوى سعيد …انا نبى نبعت امى تخطب بنت اختك … وخايف تردوها
-سعيد/ من بنت اختى!!! ….وتفاجأ/ قصدك صفيه
-عبدالجبار بصوت واطى / هيا اسمها صفيه …
-سعيد / نعم
-عبدالجبار/ قلتلك ايه بالزبط هيا
سعيد فاتح فمه حاير شن خطر بنت اخته علي عبدالجبار وهوا وامها زى النار والبارود لان توصل فيه بعض القصص
ولما فاق من تفاجئه/ والله شن منقولك يا خوى عبدالجبار .. لكن منكدبش عليك الموضوع هدا شبه مستحيل ..حتى لو رضت امها ..مستحيل يرضى بوها ..هدا غير راى البنت وخوتها
-عبدالجبار / معناها انا هكى توة ضميري مرتاح ..ودرت اللى عليا
_______________________________________
–
فى حوش ساسى
صفيه فالمطبخ اطيب فالغدى …
-نعيمه / صفيه هيا سقدى بالغدى خوك عصام بيتوكل
-صفيه / شوية بس يا عمتى ..اهو بنسقى
طلعت نعيمه من المطبخ لقت ساسى وعصام خاشين من برة وايديهم سود من تغيير زيت السيارة
-نعيمه / الله يعاون
-ساسى / الله يسلمك
علاء ماعنداش ليها هلبا خلوق ماردش …خش جهه المطبخ
-علاء/ مزال الغدى
-صفيه مبتسمه / لا خلاص اهو واتى
-علاء / من لما جيت كل يوم اطيبي انتى …امالا مرت بوك امتى اطيب
-قربت منه / اولا اسمها عمتك …ثانيا انا نحب الطياب
-تلفت علاء بيطلع / صار قلتيلى انتى تحبى الطياب
-نعيمه تنادى / يا صفيه هيااا خوك قريب يمشى
-صفيه / هيا معش نعطل يا عمتى
كملت صفيه الغدى وحطاته فالصفرة … ورفعاته للصالة لبوها وخوتها الزوز …وخشت توتى فالصفرة الثانيه لعمتها وهيا والصغار
_______________________________________
–
فى حوش خيريه
بدريه بدل ماكانت بتطلع .. خممت تخميمه وولت للصالة….
ومقدرة ان عمران يبي دقيقتين ويخش
-بدريه / تى والله مانى ساكته ولما نقربعها على روسكم
فتح عمران الباب وخش.. يسمع فالدوة تفاجأ ووقف يسمع
-رانيه / تتقربع على راسك انشالله
-بدريه / صار انا كدابه ..شكلها قلوبكم عليا دم
-امال / قلوبنا دم وقطران وسم باهي…
-بدريه / علاش تعاملو فيا هكى وانا نحبكم …ومن لما جبت صغارى وانا حاسبتكم زيهم ونحاول نتقرب منكم
-خيريه تكشخ على بناتها / تى ضمى فمك انتى وياها وخشو لداركم
-امال / ماناش ساكتين يااام ..تقول على خوتى كدابين وتبينا نسكتولها
-بدريه تتمسكن / انا قلت على خوتك كدابين .. امتى …
-رانيه / مصح وجهك …زى الحربه تغيري فى جلدك فدقيقه
-امال تضحك / الحربه هاديكا خليها تبخر فيها وادير فسحورات لبوى
-بدريه / ربي يسامحكم ..ماعندى منقول
-رانيه تضحك / انتى خيرك تتكلمى هكى
-خش عمران / لانها متربيه مش زيكم انتو يللى معرفتش انربيكم
-رانيه وامال انخلعو / بوووى
-عمران / ايه بوكم يامصخات يلى حشمتونى
وتلفت لى بدريه/ بري روحى للحوش …وسامحينى عاللى قالوهولك بناويتى كله ..امسحيها فوجهى
-رانيه / يابوى ماكنتش تتكلم هكى ..كانت تسب فينا احنا وامى
-عمران / اطلعى يا بدريه
-بدريه مخليا عمران وراها وتشبح للبنات / لا لا عادى هادو خوات صغارى وانا مسامحتهم
وتشبح للبنات وتضحك فى ضحكه انتصار
وخدت صغارها وطلعت ….
-عمران يشبح لخيريه / سمعت بودنى …بالك ودنى تكدب
-امال / غيرت اسلوبها لما انت خشيت يابوى …
-عمران / ومن قاللها انا جيت ..زى ما انتو ما شفتونيش حتى هيا ماشافتنيش ..
-رانيه / اكيدة شافاتك فالشارع لما طلعت بتروح وبعتالى ولت
-عمران / يعنى مصرين اتكدبوها المراة
واستمر النقاش بينهم وبين بوهم واحتد …وقعد على اهانات على سب عاى كلام وجعهم من بوهم …خلى البنات يبكو وخلاص …لانهم حاسين انه مش بس مفضل بدريه علي امهم …بل مفضلها حتى عليهم هما…
خيريه ادافع وهوا يهاجم .. سمعهم وسخ ودانهم على خاطرها ..خشو لدارهم يبكو الزوز
________________________________________
–
فى حوش سعيد
-سعيد تعصب/ كيف يعنى ضميرك مرتاح ودرت اللى عليك
-عبدالجبار / ماهو كان تهدى شوى انا نفهمك اللى صار
-سعيد تعصب اكثر/ وشنو اللى صار …ادوى
-عبدالجبار/ اعطينى الامان قبل
-سعيد حدف صفرة الشاهى / تى امان شنو ادوى.. شن داير مع البنت
-عبدالجبار/ غير اهدى بس وصلى عالنبى
-سعيد / عليه الصلاة والسلام ..احكى معش عندى صبر
-عبدالجبار/ زمان لما صغير …جيت مرة مع بوى هنايا يوصل فى مرته ..قعدنا تغدينا ..جت بنتها مازالت صغيرة وقتها .. لقيتها فالدار بروحها …
-سعيد / كمل وشن صار
-عبدالجبار / منعرفش شن صار .. ندكر لعب بيا الشيطان ولعبت انا بيها شويا …نخاف روحى غلطلها فى حاجهة.. وبينى وبين ضميري نبى نستر عليها ..
يهجم عليه سعيد / ااه يا مصخ يا حقير
وبدى يضرب فيه وعبدالجبار يشدله فى ايديه
-عبدالجبار / نكون حقير لو فوتتها ودسيت القصه هادى.. لكن البنت مرات تكون سليمه ومع هدا نبى نضحى وناخدها
-سعيد / اضحى بشنو يا مصخ يا متع العار …تى والله لما تاخدها
-عبدالجبار فرح وحس انه نجح فى خطته / وانا علاش جيتك امالا … مش بيش نستر عالبنيه
-سعيد / الكلام هدا يموت هنايا بينى وبينك ..نى اقسم بالله خوتك لما يقتلوها
وقعمز عالكرسى متأثر
-عبدالجبار/ انى يا سعيد جاى برجليا.. ونبى ماحد غاصبنى… بتعطونى البنيه باهى …ماتبوش بنتكم عندكم وانا ارضيت ضميري
-سعيد / نوض بالك نمشو لى بوها
وبالفعل طلعو ركبو للسيارة …مشو لحوش ساسى …
درسو السيارة قدام الباب …لقو علاء كيف راكب للحمالة وبيتوكل
-سعيد/ انزل يا علاء نبيك شوى
-علاء/ والله يا سعيد نستادنك قدامى سفر متع ليله كاملة .. هوينا بوى لداخل
-سعيد متعصب/ غير انزل توة شوى نبيك انت وبوك وبعتالى ساهل
-علاء/ باهى
ومشو جهه باب الحوش بيخشو
-علاء/ والشاب اللى معاك قوله ينزل
-سعيد / تى نادى بوك كانا نبى انزله راهو نزلته
-علاء/ باهى ياسعيد خيرك ادف ?
وخشو للحوش …ونادى علاء على بوه قاله يبيك سعيد فالمربوعه ….
“علاقه سعيد وساسى طيبه …لان سعيد متعلق بصغار اخته ويجيهم ديما ”
مشى ساسى للمربوعه …خش هوا وعلاء
-سعيد / ترا وصيلنا على شاهى قوى يا عليوة ..وسكر الباب وراك
-علاء ضحك/ انشاءالله
وطلع علاء وطلع وخلى ساسى وسعيد فالمربوعه …
سعيد خش فالموضوع طول .. وحكى كل شى لى ساسى
-ساس بيندب / معقولة بنتى صفيه
-سعيد / البنت مادنبهاش ..والولد قال مرات هكى ومرات هكى
-ساسى متعصب/ نقعد فى هكى وهكى انا
-سعيد / ومن قالك تقعد ..هوينا الولد جاى بييها على سنه الله ورسوله
-ساسى يكطكت/ نعطى لى عمران انا … تى والله
-قص عليه سعيد / ملتحلفش يا راجل ..شوق مصلحة بنتك وين ..يجوز انها انعابت … وبعتالى كيف ببتصرف
-ساسى حامق / تى والله لما نقتله ونشرب من دمه
-سعيد / ولما تقتله شن استفدت ..وبنتك من بيها
-ساسى حاط ايده اليمين على جبهته / رانى دماغى مش عليا توة …انت خالها ودير رايك
-سعيد / القصه تموت هنايا .. مايسمع بيها حد حتى خوتها
-ساسى/ رد بالك هالقصه تطلع …
-سعيد / خاصه ان البنت غافله …وهوا الولد بارك الله فيه
.. والله حتى انا تعصبت بكرى وتعاركت معاه لكن لما جيت نخمم فيها ..لقيت الولد ولد اصل ووالله يستاهل تحيه على اعترافه بغلطه …ومشكور انه جاى يصلحها
-ساسى متأثر/ وتبينى نشكره …الله لا تسامحه
________________________________________
–
الكل سمع بالموضوع…علاء ماصارش من سفرته يومتها .. وتفاجأ بالموضوع ….فالبدايه خوتها رفضو وخاصه حفيظ ..لا يحب راجل امه ولا يحب ولاده بالرغم انه مايعرفهمش….
روح يومها عبدالجبار وسمع بعركه بدريه لامه وهزيبة بوه لخواته …غصها وسكت
-عبدالجبار/ مادوريش يا رانيه …اللى اديره فالرخيص تلقاه فالغالى
وقال عبدالجبار لبوه الموضوع متع الخطوبه … وحكاله نفس القصه اللى حكاها لى سعيد … وشدد عليه ان الموضوع لازم يقعد سر عمران لما لقى الموضوع اخلاقى ..قرر انه يرضخ ويوافق عالموضوع مدامه فيها سمعه البنية…
لما سمعت بدريه بخطبه عبدالجبار لبنتها قريب طارت ..واللى محيرها كيف كلهم موافقين فى صوت واحد
-سعيد / البنيه عند بوها وهوا يقرر يعطيها والا لا
-بدريه / البنت بنتى ..وانا نحكم فيها نعطيهاله ولا لا
-سعيد/ صفيه مستحيل تخالف شور بوها ولعلمك سااسى موافق
-بدريه /انتو شنو اللى مخليكم موافقين عليهم كلكم هكى فى راى واحد …
متعصبه / تى بيش اقنعكم كلكم هكى وخلاكم صوت واحد
-اختى / البنت موافقه وبوها موافق وانا خالها موافق .. تم انشالله مبروكه عليها
وسكرو الخط ومزالت بدريه تندب على بنتها اللى خداها عبدالجبار عين تضحك عين تبكى
تتكلم مع عمران
-بدريه / شن قالك ولدك بيش اقنعك وخلاك توافق هكى طول
-عمران / قالى بوى منتزوج ..قلتله انشالله مبروك عليك
-بدريه / ومالقيتو الا بنتى تاخدوها
-عمران / فالاخير نصيبات
-بدريه / كيف قصدك …
-قص عليها / اييييه علينا عاااد خلينى منرقد وانتى تنقى من الصبح
اما خيريه مستغربه ومدهولة … وبناتها اضايقو من الناس كلها مالقى غير بنت العقرب بدريه
صفيه اكثر وحدة مستغربه …الولد لا يعرفها ولا تعرفه
…منين خطرت عليه … وكيف خمم فيها …ومع انها وافقت من اول ما كلمها بوها …لقت حفيظ وعلاء موافقين زادت ارتاحت ….
ومشى عمران يخطبك ….وعطاهاله يحى …وحددو العرس بعد شهرين … وهدا كله وبدريه ادير فالمشاكل وقريب بتموت كيف يعطو بنتها لربيبها
_________________________________
تمت …ويتبع
ن ح بكم ❤❤