رواية ولد راجل امي
#ولد_راجل_امى
بقلم زهور جمال الدين ??
?الحلقه السادسه ?
–
فى شقه عبدالجبار
جبار وصفيه راقدين عالسرير ..هوا حاط يده على جبته ومتكى ويشبح للسقف
-عبدالجبار/ سامحينى مش قصدى نخليك تغسلى البساطات وانتى جديدة .. لكن الله غالب الشيطان الله يلعنه
-تلفتتله / لا عادى انا متعودة على غسل البساطات والضمان والطياب …متحملة المسؤليه من لما كنت صغيرة
-تلفتلها / كيف قصدك انتى تغسلى بروحك ..وين خواتك ومرت بوك
-صفيه / عندى اخت وحدة صغيرة …ومرت بوى ديما تقولى خوتك الاولاد ايحبو ماكلتك انتى بس هدا علاش انطيب انا
-سخفاته وقلبه رق/ تزلبح فيك بيش اطيبي انتى وهيا تستريح
-ابتسمت / عارفتها ..لكن انا بالفعل انطيب وانعول على خاطر خوتى علاء وحفيظ ..انا ملزومه بيهم مش هيا
-عبدالجبار/ لكن خيرك ماعمرك جيتى لحوش امك
-رقدت على ضهرها وتلفتت للسقف / امى ماتبى حد فحياتها الا راجلها وصغارها .. انا وحفيظ حاجه زايدة لما تبى تعيد على حوش جدها ولا تجيهم توسع خاطرها اتشوفنا
نزلت راسها عالمخدة/ تصبح على خير
هوا يبي يقوللها خليك .. لكنها غمضت عيونها ورقدت بالفعل من تعبها …
بالرغم عنده فيها نيه لكن سخفاته غاسلة بساطات ودايرة مجهود مع خواته ….
قعد بروحه فايق ويخمم/ البنت شن دخلها …كانا مش هبال منى …لكن الله غالب مرات الشيطان شاطر
يبي يتراجع عن قراراته فعدابها .. لانه بدى يحس ان البنت طيوبة … فى ثلاثه ايام حس بطيبتها وجمال وجهها .. ولكن يرجع تخطر عليه امها وكيف خاشه بينهم وبين بوه يرجع يصر على تكصير خشم بدريه بيها
_________________________________________
–
ثانى يوم الصبح
الساعه 9 خيريه مقعمزة تبكى …طلعت امال من دارها شافتها انخلعت
-امال / خيرك ياااام
-خيريه / خالتى الصالحة توفت فى تونس توة كلمتنى عزيزة بنتها
-امال/حناى الصالحة توفت? .. لا حول ولا قوة الا بالله العلى العظيم …عظم الله ليكم الاجر يااام … خيرها شن قتلها ماسمعناش بيها مرضت
-خيريه تمسح فدموعها / قالو امس العشيه طاحت عليهم طارو بيها لتونس ماتت الفجر اول ماوصلو
-امال / وخيرهم ماقالولكش
-خيريه / قلتلها .. قالت تلخبطنا وصار فيهم لما طاحت صايخة عليهم
-امال/ وحناى سمعت باختها توفت ولا كيف
-خيريه / خالك وحناك من بكرى مشو اول ما سمعو ..لما كلمتهم قالى خالك انهم كيف بيطلعو توة
-امال / خيرك مامشيتيش معاهم
-خيريه / كيف نمشى معاهم ونخلى بوك وخوتك …ماهم حتى هما بيمشو …ولادها صحاب خوتك هلبا …اهو كلمت بوك بيجى توة .. وبعتت رانيه اطق على عبدالجبار اتقوله
-امال / حتى جبار بيمشى ?
-خيريه / بعتت بنقوله بس ..مش حنخليه يمشى معانا وليدى قاعد عريس …لكن نمشو منغير مانقولوله يتغشش
-امال / استغربت فيك مالاول
_____________________________________
–
فى حوش عبدالجبار ….
فاقت صفيه بكرى .. خشت للمطبخ بدير الفطور ..بالرغم ماعندها فيه اماعين هلبا ولا مونه … بس دارت دحى مقلى وحطت شاهى عالنار…
قعمزت عالكرسى تراجى فالشاهى ايطيب …
وتخمم/ معقولة يا صفيه تطلقى من يوم صباحك ..
اتعبو عيونها دموع/والله كان يسمع بيا علاء مايبدا الا قاتلنى
مسحت دموعها / عليك قسم ..وعليك بخت .. الولد واضح مايبيتدنيش … ويكره امى …امالا علاش خدانى ومن غصبه عليا …حاجه اتحير … غير كان نعرف السر وليش خدانى
طق باب الحوش فاقت ..
مسحت دموعها ومشت لعبدالجبار فالدار …
-صفيه / عبدالجبار…عبدالجبار نوض الباب ايطق
-مغمض عيونه / اسألى شكون
مشت لباب الدار / شكووون
-رانيه / انا رانيه …نبى عبدالجبار ترا نوضيهولى
-رجعت للسرير/ نوض شورة اهلك يبوك
-فتح عيونه مبتسم / صباح الخير
-صفيه/ صباح النور
-عبدالجبار/ افتحيلها شوفيها شن تبى .. قوليله راقد
-صفيه / باهى
مشت للباب فتحاته / اهلا رانيه تفضلى
-رانيه / لا لا مننزل .. قولى لى جبار قالتلك امى خالتى الصالحه توفت انزل كان تبى تمشى معانا
-صفيه / حاضر تو نقوله… خير خشى افطرى معانا الفطور واتى
-صفيه / لا لا حتى انا فطورنا واتى .. امال من بكرى جهزاته .. ومزال منضم الحوش ..سلام توة ..
–
نزلت رانيه وصكرت صفيه الباب .. ونزلت رانيه من دروج جبار وخشت لباب حوشها .. ماهو دروجه خارجى …فاتت للصاله
-رانيه / قلت لمرته يمى تو تقوله وينزل
-خيريه / باهى بري نوضى احمد راقد فى داره وقوليله ينوض كانه بيمشى معانا بوك قالى ساعه ونجيكم
-رانيه / باهى تو انوضه
بدل ماتمشى لخوها خشت دارهم فتحت الباب تجرى
..ومشت تجرى لغادة تنوض فيها
-رانيه / تى نوضى يا فرخة ..نوضى نقولك ع اللى شفته
-فتحت عين ومسكرة عين / خير بلاك شن شفتى
-رانيه / جبار شكله مايرقدش مع مرته ?
-فتحت عيونها / وانتى شن دخلك فيهم .. ثانيا بالك عندها عدر شرعى ….
وقعدت تضحك وتلفتت للجهه الثانيه / خلينى نرقد وفكينى من كلامك الفاضى
-رانيه / تى نوضى يا حمارة وانتى حشيشتك نوم … امس
غادة سألتها لما بتغسل معانا البساطات وقالتلها ماجتنيش
-تلفتت غادة/ وانتى شن عرفك انه مايرقدش معاها
-رانيه / لان لما ركبتلها لقيتها فايقه ودايرة حتى الفطور ومكمله … وشعرها جاف ومش مبلول …معناها مش غاسلة
..معناها مش راقدة معاه
-غادة/ محقرك … تو تراقبى فالمراة غاسله ولا مش غاسله..
قداش قليله ادب ..
-رانيه / يا حبيبتى انا دكيه ونلاحظ.. اصلا ماخشتش دماغى جبار يناسب العقرب اللى يكرهها وياخد بنتها
-غادة/ وبالك المراة خامرة واطيب وتعول بخمرها
-رانيه / لا …ماشكلهاش …الباين عليها نضيفه
-غادة/ مع انى مش قادرة نصدقك ..لكن ممكن ويجوز
-خيريه تنادى من الصالة / رانيه … نوضتى خوك
-رانيه طلعت تجرى / هيا هى ..اهو بنوضه
ومشت تجرى لدار خوها احمد
__________________________________________
–
فى حوش بدريه ….
صكرت بدريه الخط كان يكلم فيها عمران …بلغها انه بيمشى خارج طرابلس للعزى ومرات ايبات …لو ناقصتها حاجه يجيبهالها ….
مشت للمطبخ بدير الفطور لانه بيروح عندها قبل
وتخمم / هادى فرصتى للمشى …فروخى نرفعهم معاى حتى كانا عطلت ماحد يقولى وينك …
طلعت من المطبخ مشت للصالة وقامت التليفون واتصلت بجارتها سهام .. اللى مغرقتها بالجمايل ولبس صغارها كله تعطي فيه لصغار سهام بعد يصغر عليهم .. وسهام ماتقولش معاه ثلث الثلاثه كام
اتصلت والخط ايضبح …ردت عليها
-سهام / الو
-بدريه / اهلين سهام شنحالك وكيف حال سالم والصغار
-سهام / اهوا نقولو الحمدلله يا بدريه يا وخيتى .. سالم يجرى فى التاكسى بيوفر حق خروف العيد ومش ملحق
-بدريه / اللطف العيد مزال .. اتفكرو فيه من توة
-سهام/ ماهو سالم قال انمقرسه من توة
-بدريه/ حق الخروف وعوالته كلها عليا ..غير وتى روحك اليوم عندنا وين ماشيين …سالم طلع ولا قاعد
-سهام / اهو كيف روح
-بدريه / قوليله ما يطلعش بيرفعنا مشوار
-سهام /باهى اللى قاعد ماطلعش كنهدا معاه مع المغرب بيش ايروح ونحصله
-بدريه / باهى توة بالسلامه ….والصغار نرفعوهم معانا يقعدو مع سالم فالسيارة خاطر مرات نعطلو
-سهام / بنمشو عند هداكه المكان
-بدريه/ ياودى ايه …صكرى توة عمران قريب ايروح
…بالسلامع توة
وصكرو الخط ..بعد ربع ساعه وصل عمران …فطر معاها وقالتله بتمشى للسوق مع سهام جارتهم ..
-عمران / والصغار كيف بديريلهم
-بدريه / منرفعهم معاى …
-عمران / باهى خلى نتوكل انا
-بدريه / قتلك مفاتيح الاحتياط وين حاطهم.. غير بلكونه دار الصغار مفتاحها راح
-عمران / تى كيف ايريح ..ماهو ديما نقولك انتبهى
-بدريه / والله رادة بالى ..لكن الله غالب…هما وينهم
-عمران / تلقيهم فى فردة دولاب الحوايج متاعى …شكارة تحت الحوايج المطبقات من لوطا
-بدريه?/ باهى
طلع من الحوش وبلغها انه ممكن يبات …وطلع من الحوش مشى لحوشه الثانى
____________________________________
–
فى حوش خيريه
عبدالجبار نزل لامه وسمع بوفاة خالتها …على قد ماشدت فيه امه ياوليدى عريس ياوليدى مشيتك غلط وهوا شى
-عبدالجبار/ تى ولادها صحابى وديما يجونا ونمشولهم ..
كيف مزال بنورولهم وجهى كان ماعزيتهمش
خش عمران / واتيين
-عبدالجبار/ شوى بس يا بوى نغير وننزل
-عمران / ماعليك ملام يا جبار ..كلمهم حتى بالتليفون
-عبدالجبار/ لا والله مانقدر .. شوى وننزل
وطلع من باب الحوش ركب لحوشه ..
– رانيه تنخص فى غادة /لاحظتيه حتى هوا …مش قلتلك
-غادة تضحك / عطك فقصه وانتى مايفوت عليك شى
فتح عبدالجبار باب شقته وخش
-صفيه / شنو بتمشى
-عبدالجبار مبتسم / ايه منمشى معاهم
-صفيه / نوتيلك حوايجك
-عبدالجبار/ منخش ندوش ..حدديهملى بسرعه
-صفيه / حاضر …
وتلفتت بتخش لدار النوم
-عبد الجبار/ قتلك
-تلفتت / نعم
-عبدالجبار/ سامحينى عاللى صار امس
-صفيه/ على شنو قصدك
-قرب منها / انى نزلتك تغسلى معاهم
-صفيه بابتسامه هاديه / لا مفيش مشكلة عادى
-زاد قرب اكثر/ انتى ديما هكى هاديه .. ولا غير معاى انا
-صفيه / انا هدا طبعى.. ومزال ناخدو على بعضنا تزيد تفهمنى ونفهمك اكثر
-حط يده على اكتافها/ هدا هوا اللى نبيه ..نزيدو نتعرفو على بعضنا اكثر … بصراحة حسيتك كويسه ووو
-صفيه / وشنو
-عبدالجبار/ وحلوة
صوت احمد من تحت / عبدالجبار هيا احنا فى السيارة
-عبدالجبار على صوته / اهو نازل هى
وتلفتلها / هيا سقدى بسرعه …
وخش للدوش وطلع بدل …
-عبدالجبار/ انزلى اقعدى مع خواتى لين انروح ..وكان بتنا ارقدى لوطا
-صفيه / حاضر
ابتسملها ..ونزل بسرعه ركب معاهم ومشو
___________________________________________
–
بعد ساعتين طلعت بدريه لابسه نقاب …وصغارها معاها ركبت فالكرسى الخلفى مع جارتها سهام اللى حتى هيا لابسه نقاب … وراجلها سالم ايسوق بيهم
مشى بيهم لمنطقه حوايز … ونزلهم قدام حوش عربي …
نزلو وخشو للحوش لقو نساوين قدامهم ….قعمزو ايراجو فالدور متعهم …بعض نص ساعه خشو لدورهم
قامو النقابات وسلموعالشيخه عويشه
-الشيخه عويشة / اهلا بدريه شنحالك..ليك فترة ما جيتيش هنايا
-بدريه / الحمدلله يا شيخه ..الامور ماشيه كويس معش جيتك الحق
-الشيخة / البخور الاخير اللى عطيتهولك تشادى ميه ميه
-بدريه / نبيك اديريلى زيه بالزبط
-الشيخه / مش قلتى اموركم تمام
-بدريه / مش لراجلى …لنسيبى راجل بنتى
-سهام / هوا ربيبها ولد راجلها …وواخد بنتها
-الشيخه / اهاا فهمتك …تبيه ايصير معاه زى ما صار مع عمران
-بدريه / هدا معصعص وشايف روحه .. نبى نكصرله خشمه ونجيبه تحت رجليا
-الشيخه / فلوسك معاك
-بدريه / معاى ..واللى تبيه انا فيه
دارتلها الشيخه حجاب …وقالتلها تحطه تحت سريره جهه راسه … لازم يرقد عليه سبع ليالى كاملات …
دفعت الفلوس وخداته وطلعت …
-سهام / بنتك فى طوعك ..وبتعطيهولها تحطه ولا كيف بديري
-بدريه / كانها فى طوعى راهو ماوصلتلاش اصلا …لكن تو نعرف انا كيف نتصرف
وركبت السيارة هيا وجارتها وروحو
_______________________________________
–
العصر ادن وبدريه نزلت من سيارة جارتها خشت لحوشها
ونادت ولدها مهند …وفهماته انها بتعطيه مفتاح حوش اخته صفيه.. يفتحه ويخش … ويحط الكيسه هادى تحت السرير من جهه الراس مش الرجلين
“الشيخه حطتلها الحجاب فى كيسه وربطتها”
وقعدت ساعه وهيا تفهم فيه ..انه مايشوفه حد …وقالتله انا بنخش خيريه .. ونصكر الباب وانت اركب طول لحوش اختك افتحه وخش …
ولدها مش كبير مواليد 93 ..عمره 8 سنوات ..لكن معلماته الشر ومعاودة الدوة من لما هوا صغير …
قولو تحركت بدريه وطقت على حوش خيريه من برة ..فتحتلها غادة …لقتها تبى تخش قالتلها تفضلى …
وبتصكر الباب
-بدريه / لا خليه بالك واحد من الصغار يلحقنى
-غادة?/ باهى
-بدريه / خيرك تردى فوق النفس …جايه منشبح بنتى ومنطلع راهو
-غادة?/ ومن ردك عليها
وخشو … وصكرو باب اللوح ….
سلمت بدريه على بنتها وربيباتها وقعمزت …خشو كلهم لدارهم وخلوها هيا وبنتها
-بدريه / شفتيهم المصخات خشو وخلونى…خزيه على هالربايه
صفيه ساكته مش قادرة ترد وتتكلم عليهم …
طق باب الحوش ….طلعت رانيه / اهو تو نفتح
فتحت الباب لقت مهند قدامها / تبى امك
-مهند / ايه ناديهالى
-رانيه / هدا ولدك مهند يا بدريه
بدريه انخلعت وقفت تجرى …خايفاته يقول حاجه قدامهم
-مهند / المفتاح ماباش يفتح ياااام
-بدريه تضحك فى ضحكه صفرا / هاهاها ماهو خليتلهم مفتاح الحوش …
وخدت ولدها / هيا بالسلامه
مابتش رانيه تسقدها لبرة …قربعت باب اللوح وراها وخشت
بدريه اتمتم / حطيته
-مهند/ الباب كاسح ماباش يفتح
شداته من يده بالقوة / تعالة مانعباش عليكم فى حاجه
ركبت بيه للدروج ..
فتحت الباب / خش عطك مايرفعك عليا …حط الكيسه تحت السرير وتعالة بسرعه
خش الولد يجرى لدار النوم
انفتح حوش خيريه ….
غادة تتكلم / اهو بنلم الحوايج من السطح واناى بطبقيهم راهو …
وبدت تسمع فى صوت شبشبها راكبه …
انصبت الميه فركابها من الخوف غادة بتشوفها ….
من الخلعه خشت لحوش بنتها تجرى وصكراته بالشوى ….
ركبت غادة للسطح فتحت بابه الخارجى بالقوة ..
خشت بدريه تجرى لدار النوم وحطت الحجاب بالباهى وشدت ولدها ومشت تجرى للباب فتحاته ونزلت ….
لقت بابهم مفتوح …همست لولدها / سكر بابهم اللوح
مشى مهند صكر الباب وطلعت تجرى هيا وياه ترعش مع بعضها وترقل
دخلت صغارها لحوشها وصكراته بالمفتاح …وقعدت ترعش من الموقف
_________________________________________
–
فات الوقت .. الساعه 12 فالليل
درس احمد السيارة قدام حوشهم …نزل بوه وامه وعبدالجبار
خشو للحوش …
بصراحة عبدالجبار حس انه استاحش صفيه .. واقفه جنب خواته وتشبحله …وهوا نفس الشى يشبحلها …هز براسه بمعنى هيا …وقفت هيا بتطلع
-عمران / بنيتى صفيه اديرلنا طاسه شاهى .. حسه راسى واجعنى
-صفيه / حاضر يا عمى
-خيريه / اللطف علينا .. بناويتك مسطرات اهم ..وتقول للمراة ديريلى
-عمران / باهى ..ديرو وحدة منكم
-صفيه / لااا والله ماصارت .. عمى اول مرة يطلب منى حاجه …اهو تو ندير شاهى عالسريع..
البنات امهم فنصت فيهم
-امال / اهو تو نعاونها انا
-صفيه / خليك مستريحه هيا طاسه شاهى ..
خش عبدالجبار قعمز … وخشت هيا للمطبخ …
عمران تلفت لخيريه / خلى نخش للحمام
-خيريه بصوت واطى/ بتبات هنايا
-عمران / لا ماك عارفه الليله بياتى فالحوش الثانى …
وقف مشى للممر بيخش للحمام ….لما كمل الممر خش للمطبخ بدل مايخش للحمام
وقف فالباب يشبح لصفيه وجسمها …
هيا حست ان فى وراها حد … تلفتت اتفاجئت بيه
-صفيه / تبى حاجه عمى
-عمران / غير نبى طاسه اميه …
فتحت الثلاجه وطلعت الشيشه وصبت طاسه اميه وصكرت الثلاجه ومدتها لعمران
عمران لما خدى الطاسه حط يده على يد صفيه …حست هيا ان فى حاجه مش مزبوطه ..جبدت يدها طاحت الطاسه انكصرت جو البنات يجرو
-غادة/ بووى …مش بتخش للحمام
-عمران طالع / جيت بنشرب وبعدها بنخش للحمام
-رانيه / كانا قلتنا راهو جبنالك
طلع من الممر مشى للصالة ومنها للسقيفه يلبس فى كندرته
-خيريه / بتمشى غادى
-خدى مفاتيحه وتلفت / ايه
-عبدالجبار / والشاهى
-عمران / لا لا صحتين
وطلع وصكر الباب …
-خيريه / يا صفيه طفى عالشاهى عمك طلع وما حد يبي
طلعت صفيه لونها مخطوف / باهى تصبحو على خير
وطلعت من الباب وركبت من الدروج
-وقف عبدالجبار/ هيا تصبحو على خير
-خيريه / تعالة نبيك شوى
قعمز جنبها / نعم يااام
-خيريه / البنيه هاك تشبح فيها .. كلامها من تحت سنونها …
ماتقولش بنت بدريه …سلم وليدى هنينى ..وشد حوشك ومرتك مدامها طلعت على قيس النيه
–عبدالجبار ابتسم وكأنه مقتنع / يستر الله يااام
وقعدو يهدرزو ويتكلمو مع بعض فالموضوع
________________________________________
–
فى حوش بدريه …
خش عمران للحوش لقى الاضواء مطفيه ..عرفهم راقدين ..
خش لدار النوم ويحول فحوايجه ويخمم فى صفيه/ هدا اللى بياخد ويقول تهنيت ..مش انا زوز عزايز وكل وحدة فى حوش …اهو الشباب واللحم والفم اللى زى الخاتم
-فاقت بدريه / روحت
-تلفتلها وخوا يلبس فى جلابيه النوم / روحت ايه
-بدريه / مش قلت بتباتو
-عمران / لا والله روحنا …عبدالجبار شد فالمرواحة …
وقعمز عالسرير وشبحلها / وتبى الحق حتى هما عيوو يعاركو قالولى علاش جايبه الراجل قاعد ماليشى يومين متزوج
بدريه رجعلها شهد عقلها … وادكرت انها خشت حوش صفيه ولبدت لما ركبت غادة من الدروج
ومنغير مانحس بنفسها وقت تعيط / يا غبارتى …يا نهاراتى السود على راسى
انخلع عمران / خيرك بلاك يا مراءة
______________________________________
تمت …. ويتبع
ولا نكملو وخلاص شفتكم انصدمتو من كلمه تمت??
ومنغير مانحس بنفسها وقت تعيط / يا غبارتى …يا نهاراتى السود على راسى
انخلع عمران / خيرك بلاك يا مراءة
-مشت تجرى تلبس فى جلابيتها وخدت محرمتها وطلعت تجرى/ خلينى …ووووك عليا ووك
وهوا يجرى وراها / خيرك شن جاك يا مراة
فتحت باب الحوش وطلعت تجرى وهوا وراها….مشت لحوش خيريه وبدت اطقطق وتشرين / افتحو …افتحو
اللى فالحوش انخلعو وطلع احمد يجرى فتح الباب
وخشت بدريه تجرى لقت عبدالجبار وخيريه واقفين مخلوعيت والبنات طلعو يجرو من دارهم وصفيه نزلت تجرى من حوشها
-خيريه تعيط / نحسابك متت يا عمران …خيرها بدريه تعيط
خشت صفيه من وراهم / خيركم …خيركم اللطف
-عبدالجبار/ تعالى
شدتها امها / وين تجيك …صفيه اطلقت منك
-صفيه بدت ترعش/ اهه شن تقولى يام …
وتلفتت لعبدالجبار/ انت طلقتنى
-عبدالجبار يعيط / لاااا والله ماصارت …امك شورها هبلت
-احمد/ غير اسكتو خلى نفهمو منها …خيرك يا بدريه من قالك عبدالجبار طلق صفيه
-بدريه تخبط فى صدرها / انا خشيت لحوشها بكرى .. وخوك ولد الحرام حالف عليها بالطلاق كانا خشيته
-صفيه انهارت وبدت اتخبط / حيه عليا …وووك عليا اطلقت مرتين وانا مزال ماسبعتش ..حتى اسبوع ماطقيتش …ليه عليكم دمرتونى ..وبهدلتونى
-عبدالجبار مشاله يجرى / بالشوية يا صفيه غير خلى نتاكدو
-صفيه قريب تاكله / من شنو منتاكدو …الله لا تسامحك بهدلتنى من دون اندادى
-احمد / هوا فى من يحلف على مراة امها ماتخشلهاش
…علاش هكى يا جبار هدا انت العاقل
-خيريه / كيف ركبتى ….ليه عليك اديري فى بنتك هكى
-عمران / انتى شن مركبك لحوش عبدالجبار
-بدريه تألف وتكدب/ مهند واخد مفتاح حوش خوه من مفاتيح الاحتياط بعد ماطلعتهم الصبح والعشيه جيت هنايا للبناويت وصفيه …وبعد طلعت لقيته راكبله لحقته وخشيت طلعته
-عبدالجبار يعيط وبيهد عليها شاده خوه احمد واقف بينه وبينها / حكايتك كلها كدب يا كدابه يا مصخة الله لا تربحك يا حقيرة
-بدريه / انا حقيرة يا مصخ يلى امك ماعرفتش اتربيك
-غادة/ مصمصى فمك بالزهر قبل ماتجيبي سيرت امى على لسانك
-رانيه / انتى اللى طلقتى بنتك …شنو امى هيا اللى طلقتها
-بدريه / اهه يا عقارب يلى امكم ماعرفتش اتربيكم
ومدت يدها وخدت صفيه / تعالى … حوش امك اولى بيك من حوش هالمساميم هادو
-خيريه / يا عارى …يا غبارتى …كنتى تطلق اول يوم وثانى يوم …شن مازالى انا
-عبدالجبار /مديريش فى نفسك هكى يمى ..والله لما نربيها هالحيوانه هادى
-بدريه / تربي عينك ياحقير …
شاده بنتها من يدها وتلفتت للباب لقت عمران واقف حال فمه ..
ضرباته على كتفه / رااك تقول حاجة… رد بالك اتخش تعطيهم طريحه بيش يتربو …
وطالعها ببنتها للجنان وتعيط / تى هيا الحوته خامرة من راسها…
ودفت الباب قربعاته ….وشاده صفيه من يدها ومطلعتها
-صفيه تبكى/ وين رافعتنى يااام
-بدريه تضرب على صدرها / انا امك …انا تو نوقفلهم كمشه مصخين هادو
فتحت باب الحوش بالحوش بالمفتاح وخشت …
-بدريه / اهو حوش امك …عزك ودلالك من اليوم
-صفيه / نبى نروح لحوش بوى …معش نبى نرجعله ..
-بدريه / والله كان ماشرشحتهم مانبدا اسمى بدريه صغار الكلب هادو
خش عمران سمعها / بارك الله فيك يا بدريه
-بدريه / بارك الله فيك انت عالربايه اللى كل يوم اطلقولى فى بنتى ….
قعمزت عالصالون … وخدت التليفون واتصلت بخوها سعيد حكتله عاللى صار كله وقالتله من فجر ربي تكون عندى هنايا
وخدت بنتها ودخلتها لدار التقعميز فرشتلها فراش … ورقدتها وغطتها .. وعمران واقف فالممر ويراقب …
هدت صفيه وقعدت متغطيه وقالت لامها تمشى ترقد فى دارها .. لكن بدريه رفضت وقعدت راقدة جنبها …
بدريه لما ترقد تمشى فى نوم عميق معش تدرى عليها منين زارقه …
_______________________________________
–
قيس الساعه 3 …
عمران غطت عليه حاله مايعلم بيها الا ربي … الصحيح البنيه عجباته ..والشيطان لعب بيه ..ومتاكد من بدريه نومها عميق
مشاعره غلباته .. معش حاس بنفسه خش للدار ..ومشى جهن صفيه … قعمز على ركابه قدامها
صفيه ما جاهاش نوم وتبكى …وامها من كثر العياط الل عيطاته اعصابه ارتخت بكل ومشت فى نويمه
ولما خش عمران حست بيه صفيه ..لكن غمضت عيونها ودارن روحها راقدة ….قعمز قدامها و يدها عالغطا حوله من عليها شوى ..
تقاعدت صفيه ترعش باللى فيها / عمى …انت شن ادير
-عمران/ شى غير جيت نمسحلك فى دميعاتك
وقف مخلوعه .. مسكها من كتافها …
حولتله ايديه بقوة / حول ..عيب عليك ..
وطلعو تجرى للصالة فتحت باب الحوش.. ومشت تجرى لحوش خيريه لقتهم بالفعل مازالو فايقين …
-فتح احمد الباب / صفيه …
خشت تجرى وهيا تبكى … مشت طول للصالة اضبطت خيريه …
عبدالجبار/ صفيه …خيرك يا صفيه …
-صفيه تبكى/ انت ماتكلمنيش …انت مادخلكش فيا
-غادة/ شن جابك من حوش امك …خيرك ليش جايه
فنصت فيها امها
-غادة/ والله ماقصدى حاجه …غير استغربت بس يعنى الدنيا ليل
-احمد / صكرى فمك وخشو الثلاثه لداركم
-خيريه / حتى انا بنخش لدارى …نوضى معاى يا صفيه
-عبدالجبار/ يااام نبى نتكلم معاه
-خيريه / واحنا شن وصلنا لهدا كله غير كلامك انت
ودخلتها لدارها قعدت الليل كله ادرس عليها ان المراة ماليها الا حوش راجلها .. وعبدالجبار شاريك ومن هالكلام
ماجى الصبح الا وخيريه دايرتلها غسيل دماغ …
طلعت لولدها الفجر / برة جيب الشيخ يقرالك فاتحتك ..قبل ماتفيق بيها امها مهناش واديرلك مرداح
-عبدالجبار/ الشيخ قال ما عليناش فاتحه
-خيريه / هاديكا الطلقه الاولى …لكن الثانيه لازم فاتحه ..ومس لازم وكيل ..خلاص هيا وكيلة روحها
-عبدالجبار/ وهيا موافقه
-خيريه / ايه موافقه ..غير سقد بس
وبالفعل طلع وجاب الشيخ …الساعه 8 كانت فاتحتهم مقريه
وعلى قد مادارت فيها خيريه تركب لحوشها رفضت ..قاعد واجعها خاطرها ..
واقفين صفيه وخيريه وعبدالجبار
-خيريه / يابنيتى ماتواخديشى ..وحتى الشيخ عاركه على هالحلفه الشينه ووعده ايصيم عليها ثلاث ايام
-عبدالجبار/ لا والله مانى متنازل عليها .. والحلفه قاعدة توة اكثر من قبل …مانبيهاش فى حوشى انا حر
-صفيه / شفتيه يا عمتى
-عبدالجبار/ انا طالع تو نجى
-خيريه / وين ماشى
-عبدالجبار/ بنجيبلها هديه …قالى الشيخ ضرورى منها
فتح بابهم اللوح وبيطلع يتفاجأ بدوشه وحد فى الدور الثانى يقول يا صفيه
-عبدالجبار/ منو فوق
-طلت بدريه ونازله من الدروج وتعارك / انايا عيلة اوساخ
..يلى خاطفين بنتى …نسيتو ان عندى مفتاح حوشها ..وينها بنروح بيها
-صفيه خبطت خدودها / وين كنتى ياااام
-بدريه / انتى هنايا … كنت فوق فى حوشك بناخدك ونروح بيك
-خيريه / امتى ركبتى
-بدريه/ توة
وتشبحلهم خيرهم مصدومين / خيركم شن فى
-صفيه تعيط / اطلقت ثانى يمى …اطلقت …وووووك عليا …يا حليلى …يا عارى اطلقت ثلاث مرات من راجلى فى ثلاثه ايام
جو البنات يجرو .. واحمد … وانصدمو بالخبر
-عبدالجبار / مدامك بنت بدريه تطلقى حتى عشرين مرة
وتلفتلها / الله لا تربحك خربتيلى حياتى ياواطيه
وهجم عليها يبي يضربها شده خوه احمد بالسيف ايحز فيهم
وهيا تعيط من جهه يا ولد الحرام يلى بيك يلى عليك
وعبدالجبار ايعيط / تى حول ايدك يا احمد خلينى نقتلها بنت الشياطين هادى ….
خش سعيد خوها يجرى لقى الدنيا خايضه ..قعد يحز حتى هوا ….وطاحت صفيه مغمى عليها ومشالها عبدالجبار يجرى
رفعوها للعيادة احمد وامال دخلوها للاسعاف طول
ولما مشى خالها سعيد سئل الشيخ …قالله هدا طلاق بين وواضح ماترجعش لراجلها الا بمحلل!!!..
المحلل يعنى لااااازم ولا بد انها تتزوج راجل ثانى بيش ترجع لراجلها الاول ????????
_____________________________________
تمت …ويتبع
الحلقه الجايه لازم ولابد بيخش البطل فالموضوع …
حلقه اطول من برج ايفل ??
نحبكككككم ❤