رواية ولد راجل امي

#ولد_راجل_امى

بقلم زهور جمال الدين ??
?الحلقه الخامسه عشر?

–

فى حوش عبدالكريم …

هيفا صكرت التليفون ومشت تجرى لامها …
-هيفا/ ياااام …ياام وينك
-سعاد / نقصى صوتك .. خيرك شن فى
-هيفا/ خو صفيه الثانى توفا ??
-سعاد مستوعبتش/ كيف خو صفيه الثانى توفا …مفهمتكش راهو
-هيفا/ ام صفيه عندها زوز اولاد …الاول توفا قبل اسبوعين والثانى توفا اليوم
-سعاد اتأثرت /لا حول ولا قوة الا بالله .. كيف مات يانارى وشن جاه
-هيفا/ منعرفش بيش مات .. المهم انه توفا
-سعاد انتبهت/ وانتى كن قالك
-هيفا تلخبطت/ اهاا ..توووة .. توة شرين التليفون ورديت
…كلمنى واحد..و قالى قولى لجدك راهو خو صفيه مرت نادر توفا
-سعاد/ ياودى بالك خوها اللى من بوها ..مفروض اتاكدتى
-هيفا / اتأكدت يااام .. وقاللى خوها ولد امها اللى ساكن فطرابلس
وبدى باب حوش عبدالكريم يطقطق …
طلعت ناديه فتحت تلقاها خالتها نوريه كيف وصلت هيا وبنتها اسماء….
سلمت سعاد على اختها بسرعه .. ومشت لبوها فالمربوعه قالتلها عالخبارة …اتأسف بوها للموضوع ..وبنفس الطريقه مشى هوا وسعاد بيش يخبر صفيه بوفاة خوها

________________________________________

فى حوش نادر

مقعمزة صفيه مع امباركه فى دارها …
-امباركه / يابنيتى هوا هداكه ليك شهر ونص عندنا.. المفروض ندخلوك على حوش بوك
-صفيه تقشر فى التفاحه لعمتها/ والله مانقدر يااام .. خوى ماليشى اسبوعين ..وانا ماشيه لحوش بوى ..مهما يكون مشيتى ليهم تعتبر فرح
-امباركه/الخزن فالقلب يا بنيتى..والرسول حزن ثلاثه ايام بس
-صفيه / ماشالله عليك يااام ..حسيتك بديتى زابطه وموازنه الامور
-امباركه / الحمدلله…مرات نحس فى قلبي فرحان بولدى دار عويله ..نبدا بروحى فالدار نضحك
-صفيه / انشاءالله ربي مايخليك بروحك ياضى الحوش
-امباركه / ربي يحفظك ليا
خش نادر متكدر / جيبيلى طاسه شاهى يا صفيه
-امباركه / مافيك من عناد يا وليدى..ماهو قلتلك اقعد .. ياسرك من المشى بعيد تقعد بالاسابيع
-نادر متكنطى/ ماتعرضيليش يااام ..شنو نسيب رزقى ونخلى السيارة قدام الحوش واقفه ..حتى علاء نسيبى بيمشى بسيارته
وقفت صفيه طلعت من الدار بتمشى للمطبخ
-امباركه / علاء نسيبك لا وراه عيله ولا شى…يمشى ويقعد قداش مايبي..لكن انت وراك عيلة ومسؤلية ..شغلتك ضرورى تغيرها
-وقف بيطلع / يستر الله …
وطلع مشى للمطبخ

__________________________________________

–

فى حوش خيريه

بدريه تطلق فيه عياط وبواصى/يا حليلى..بنموت..يا صغارى وين مشيتو وخليتو امكم..يا حليلى قعدت بروحى
-خيريه تصبر فيها / ربي يصبرك على ما بلاك يا بدريه

تبو الحق هيا معاها حق …فجيوة فيها ..ضربتين فالراس توجع .. حوشها فضى من الضنوة
-بدريه تعيط / ياربي الاول عيونه مافقصوش والثانى لحقه ليش خديته منى ليييش…
المرة هادى حتى ربيباتها متأثرات رانيه جنبها / شنو بتكفرى يا بدريه …هدا امر الله ساعتهم تمت

وتعبى الحوش بجاراتهم .. والرجاله تلمدو قدام الباب
والناس كلها مسخفتها بدريه واللى صارلها

بعد ربع ساعه …
وصلو عبدالجبار وعمران وصالح جارهم فى سيارة ..وسعيد خو بدريه واحمد فى سيارة ثانيه …
لقو سالم جارهم واقف مع باقى الجيران ومتأثرين …
يجيه عبدالجبار يجرى/ انت شن اديرهنايا يا مصخ ..مش لزيتك فى وفاة سيف وقلتلك منلقاش خليتك هنايا
-سالم مخلوع / سمعت العيطه جيت نجرى
-شده من رقبة سوريته / خليقتك مانشوفهاش هنايا ياواطى
.. درق وجهك
-عمران ينادى/ يا جبار ليه عليك .. الراجل فزعلنا ..احنا فى بابه توا خوك كيف ميت
-سعيد / تى عيب يا راجل فوت الموضوع
-جبار شد سالم من حوايجه وحدفه / قلتلك درق وجهك ولا طرشت

______________________________________

–
فى حوش نادر

صفيه خشت للمطبخ وهيا شادة دمعتها …خدت براد الشاهى وتلفتت بتحطه عالغاز ….
خش نادر للمطبخ وقف وراها وضمها / منستاحشك
-تلفتتله وهوا حاضنها / وانا منستاحشك اكثر منك
-نادر / عارفك زعلانه
-صفيه / لا والله مستحيل نزعل ..عارفاته شغلك ..ومكان رزقك …
وتلفتت للجهه الثانيه / صح نتمنى تقعد معانا لكن شغلك ومصدر رزقك ليه اولويه حتى هوا
حط يده على خدها ولفتها ليه / خيرك
-حطت يدها على خشمها وفمها / مافى شى
-مسك يدها وحولها / لا والله بجد ..خيرك
-بشمئزاز ومشت من قدامه / حووول … صنه فمك حاله .. برة اغسله
-حط يده على فمه ونفخ هوا وشمه / والله مافى حاجه .. خيرها صنه فمى …
-تحشمت من كلامها / والله مانعرف ..ممكن صنه الحوض
-نادر / لا الحوض نضيف
-صفيه / اييييه علينا عاد …
وتلفتت للبراد ….وطق باب الحوش

_______________________________________

_

فى حوش خيريه …

بدريه رقى عليها الضغط ومش قادرة حتى تفتح عيونها
…طاحت عليهم يحسابوها ماتت …وبدو ينادو على خوها سعيد ..خش يجرى هوا واحمد ..
-خيريه / بري مع بدريه يا غادة فيسع
ركبو احمد وسعيد من قدام.. وغادة شادة بدريه فالكرسى الخلفى ….وصلو للعيادة …خشو بيها يجرو للمستشفى دخلوهم طول جهه الاسعاف ..رقدوها على سرير
احمد وغادة خشو معاها … لكن سعيد قعد برة تحشم من احمد خاطر غادة معاهم
-الدكتور يكلم فى احمد / عندها مشكلة
-احمد / ولدها توفى بحادث
-الدكتور/ سلامت روسكم انشاءالله .. حنعطيها مهدئ توا .. وبادن الله حتستريح عليه لغدوة
-سعيد بنادى من برة / احمد …يا احمد
-تلفت احمد لغادة/ اطلعى قعمزى عالكراسى الراجل بيشوف اخته
-غادة متأثرة?/ باهى …
قامت الستار وطلعت …
واحمد بنادى/ تعالة يا سعيد ….
غادة طالعه وسعيد حاش لاخته وعيونهم فى بعض

_______________________________________

–

فى حوش نادر …

طقطق الباب …مشى نادر فتح….
لقى عمك عبدالكريم وجهه مايتفسرش …وحكاله عالوفاة .. مهند خوه حتى هوا …بصراحة اتأثر عالموضوع ..الوليدات خوت شقه ايموتو الزوز فى نفس الشهر …وخش هوا وسعاد لداخل وخبرو صفيه ….

صفيه اتأثرت هلبا بالخبر …وجعتها امها …مصيبتين فى نفس الشهر …وليداتها الزوز ايموتو …
-سعاد / يا صفيه وحدى الله
-صفيه / يا حليلى على امى …والله لما تهبل …ولادها الزوز فى نفس الشهر .. اللهم اجرنى فى مصيبتى واخلفلى خيرا منها ياااارب
-عبدالكريم من برة / عظم الله ليكم الاجر يا بنتى
-امباركه / عظم الله ليك الاجر يابنيتى …اى والله مصيبه وطاحت فيها اميمتك
-صفيه /ارفعنى توة يا نادر…ا فعنى لامى نوقف معاها فى مصيبتها
-نادر/ اصبري عليا شويا بس نشوف جماعتى عاطيهم كلمه بنمشى معاهم الليله
-سعاد/ قصدك كنت متسقد انت الليله …
-نادر / ايه كنت بنطلع الساعه 2 فالليل نمشى بالبرودة .. لكن اهو تو نكلمهم من حوش عمى عبدالكريم
وتلفت لصفيه / وتى روحك اهو تو نجى …
وشبح لى سعاد / شنو تقعدى مع امى ..
-سعاد/ اكيد منقعد معاها..بنروح بعد غدوة انتو قداش بتقعدو
-نادر/ انا بنحضر الجنازة ونروح طول …
-سعاد/ تمام …كون هانى يا وخى ..
وطلع نادر وطلعو وراه سعاد وبوها

___________________________________________

–

خس نادر لحوش عمك عبدالكريم …لقى نوريه بنت خالته
سلم عليها وعزاته فى خوه …
وطق الباب خشو مختار راجل سعاد وولادها الزوز .. سلمو على نادر وسمعو بالخبر عزوه طول .. وطمناته سعاد انها الليله بالتاكيد حترقد مع خالتها …وغدوة يروحلها هوا وتروح هيا مع راجلها وصغارها
خش نادر للمربوعه …اتصل بى علاء نسيبه وخبره بالموضوع ووصاه يستادنله من جماعته….
صكر التليفون وروح للحوش لقى صفيه جاهزة وهيا قريب تموت بالبكى على امها وشن صاير فيها …
جت سعاد… وتسقد نادر .. على اساس ان عمك عبدالكريم بيجى غدوة للجنازة فالاكيد …
صفيه ونادر طلعو..وهيفا لبست جلابيتها ومشت لامها..
فتحت سعاد الباب وقعمزو فالصالة لان امباركه حكم رقدت … قعمزت هيفا جنب امها وتقنع فيها انهم لازم يلحقو صفيه ويعزوها فى حوش بوها
-سعاد/ مانقدرش نخلى خالتى غدوة لين ايروح ولدها
-هيفا/ والله الا عيب المراة يموتولها خوتها الزوز ومانلخقوها فى ولا واحد …
-سعاد/ يابنيتى خالتى كيف بنخليها بروحها …وبعدين تعالى جاى انتى من امتى الحب هدا كله لى صفيه !!!
-هيفا/ هدا مش حب ..انا مش صغيرة ونفهم فالقدو .. مش معقولة المرة الاولى مالحقناهاش ونزيدو حتى المرة هادى
-سعاد / والله مانى عارفه..
-هيفا / اسمعى نقولك فكرة .. خالتى نوريه تقعد مع خالتى امباركه .. واحنا نمشو مع بوى و جدى .. بوى حتى هوا بيمشى على خاطر نادر
-سعاد / مدامة بوك ماشى ..واجب حتى انا نمشى معاه
-هيفا تبوس فى امها / احنا الزوز يااام تربحى ..جى خاطرى فى المشيه …
-سعاد / ترا بري ناديلى خالتك نوريه .. انا منقدرش نخلى خالتى ونطلع
-هيفا فرحانه / باهى ..

وبالفعل نادت هيفا نوريه …وشاورتها سعاد انها تقعد مع خالتها بيش تمشى مع راجلها غدوة يحضرو الجنازة.. رحبت نوريه بالفكرة ووافقت انها تقعد مع خالتها من الصبح بيش سعاد تمشى لطرابلس

________________________________________

–

فى نفس الليله وصلو نادر وصفيه …خشت صفيه لامها لقتها راقدة …عاطيينها مهدى ومنوم .. على خاطر الحالة اللى كانت فيها
-صفيه تبكى/ شن صارلها امى
-رحمه / متخافيش ضاربيلها يبرة مسكنه ومنومه
-صفيه تبكى/ يا حليى على ميمتى تعدبت بالعرق
-امال / شدة وتزول …عزانا واحد ياصفيه

بعد شوى وصل حفيظ ومعاه مرت بوه …نادى على امه
..ولكن طلعتله اخته صفيه …لان امه شبه دايخة ماتقدرش تطلعله
دارو شوط بكى الخوت الزوز..منها خوهم توفاة..ومنها امهم مريضه وراقدة بالرغم من وفاه ولدها

ومشى حفيظ جهه الرجالة قعمز مع نادر وخاله سعيد .. عبدالجبار عنده نيه يجبد حفيظ ويقعمزه جنبه لكن فات الموضوع لانه مع نادر

_________________________________________

–
فالليل …

هيفا تمولج كيف بتوصل لى عبدالجبار انها بتجى غدوة لطرابلس … وانتهزت فرصه انها بوها وخوتها وجدها وخوالها الزوز مقعمزين برة فالبرودة .. حاطين حصيرة ومقعمزين …
صكرت الباب …وخشت للمربوعه واتصلت بحوش عمران مرة واثنين وثلاثه ….
وشرين تليفون حوش عمران فى هاديكه المعمعه ..تسمع فيه امال …ناضت قامت التليفون و ردت

-امال / الو
-هيفا / انا نشتغل مع الاخ عبدالجبار..وقالو ان صارتله حالةوفاة عظم الله اجركم .. ولو فيها امكانيه قوليله انى غدوة جايه
-امال مستغربه / وين جايه مفهمتكش راهو
-هيفا تلخبطت / للشغل طبعا ..بدل الاستاد عبدالجيار
بادن الله بناخد مكانه مابين ضرفه تساوى
-امال / اهاا فهمتك …باهى اختى بارك الله فيك …تو كان جانا بعتالى نو انقوله
-هيفا/ لااا اوخيتى بالله عليك لازم اتبلغيه توة …لان غدوة ماياخدوش توقيعتى لو مابلغمهش هوا
-امال / حاضر وخيتى …

وسكرو الخط …وامال طول خدت تدابيرها وبعتت لجبار ان فى بنت اسمها هيفا كلماته ووصلتله الكلام كله …هوا زبط الدوة والمقصود …
مشى للحوش ونادى امال انها تمدله التليفون …واتصل بى هيفا واتفق معاها اتفاق وفهمها على كل شى وشن ادير بالوقت والساعه

_________________________________________

_

ثانى يوم ….

طلعت سعاد وهيفا وراجلها مختار جايبهم ولدهم فتحى وراكب معاهم عمك عبدالكريم ….وصلو عالجنازة .. سعاد وهيفا نزلو لخيمه النساوين والرجالة مشو للجامع بيعزو….

جابو تابوت مهند للحوش..امه فاقت من يبرتها وقريب بطير .. تصبر فيها بنتها من جهه وربيباتها من جهه ثانيه
خشت سعاد وبنتها هيفا سلمو على صفيه وامها وعزوهم وسط حيرة صفيه..غريبه هيفا متحبهاش ..ليش جايه تعزى فيها…
دخلو مهند شافاته امه ..وخشو خواته وخيريه …وخوتهم .. ونفس الشى صفيه ماخشتش معاهم ….
وطلعو التابوت وخلو بدريه فى حالة يرثى لها …مشو للمقبرة ودفنو مهند ….وروحو العزايه للخيمه …
عبدالجبار ينادى فى حفيظ / يا حفيظ تعالة
-جاه حفيظ / نعم
-عبدالجبار/ خواتى قالولى امك قريب تهبل .. برة ارفعها للمستشفى يضربولها يبرة ..
وقف حفيظ / اهو تو نمشى نشوفها
-عبدالجبار / تو نمشى معاك تعالة
مشو حفيظ وجبار ركبو فالسيارة ونادر يشبحلهم مستغرب شن لمهم على بعضهم
وصلو للخيمه .. ونزل عبدالجبار نادى اخته امال
-عبدالجبار/ حفيظ يبي يرفع امه للمستشفى يضربلها يبرة ..البسى انتى وبري معاها
-امال / تو بنتها تمشى معاها اكيد
-عبدالجبار/ لاااا .. امشى انتى نادر مايبيش مرته تطلع ..
-امال / تى كيف نمشى مع حفيظ بروحى . بالك احمد يقعد يعارك فيا
-عبدالجبار/ حفيظ اصغر منك ..احمد علاش بيعارك ..وبعدين ارفعى معاك حتى وحدة من بنات الجيران
امال حست خوها يودر وخلاص مافهمتش ليش.. وهوا غايته ان صفيه ماتطلعش من الحوش
وبالفعل لبست امال جلابيتها …وكلمت خولة بنت جيرانهم تمشى معاها .. جت لى بدريه بتلبسلها جلابيتها
-صفيه / وين رافعينها !!
-امال / نادانى جبار توة وقالى خوك حفيظ يبي يرفعها للمستشفى
-صفيه / غريبه حفيظ ماناداش عليا وقاللى
-امال/ هوا بعت عبدالجبار مقدرش ايناديك انتى
صفيه سمعت اسم جبار وخرت .. وكانت تبى تمشى هيا معاها لكن غيرت رايها ..حست انه بيمشى معاهم …

لبسو بدريه وطلعوها امال وخولة … وركبو مع حفيظ من تالى ورفعو بدريه للمستشفى

_________________________________________

–

هيفا مقعمزة جنب امها وتلصلص فعيونها ..لان الاتفاق اللى داراته مع عبدالجبار المفروض اديره بعد ربع ساعه من طلعت بدريه من الحوش …هما اتفقو هكى

وقفت هيفا وطلعت للخيمه.. مشت لى صفيه توشوشلها
-هيفا/ نوضى يا صفيه امك حالتها تعبانه جابوها لحوشها
-صفيه انخلعت/ كييييف .. وعلاش رفعوها غادى ..
-هيفا / نقصى صوتك… تو تنقلب كلها غادى
وتوشوش / خوك منعرفش اسمه .. قالك تعالى غادى وانتى ساكته ماتقولى لحد
-صفيه / حيه عليا امى ….
وناضت طلعت تمشى بالشوى ماتبي حد يلاحظها ..حسب توصيه خوها …قامت ستار الخيمه وطلعت ..تلاقى سيارة حفيظ كيف وقف
-مشتله صفيه / خيرها امى يا حفيظ وعلاش جبتها لحوشها
-حفيظ/ امى فالمستشفى ..خليت معاها البنات اللى مشو معاى ..وجيت منرفعك ..انتى بنتها مفروض انتى تعانيها
-صفيه / منقدرش نمشى لين نقول لنادر
-حفيظ/ اهو تو نمشوله للجامع..نستادنوه وتمشى معاى
-ركبت صفيه جنبه / باهى هى

القصه كالاتى ? عبدالجبار خمم وتكم اموره وفكر انه ينحبس هوا مع صفيه فى حوش امها … المفتاح حصله من بوه بطريقه ما وصور عليه ورده فى جيبه .. وشركائه الزوز فى العمله هيفا..وصاحبه عزو …وصى عزو انه يوقف جنب حوش بدريه .. ومخليين بابها مفتوح ..اول مايشوف صفيه خشت للحوش يصكره من

برة عليها بالمفتاح .. وبعد شوى يخش عبدالجبار ويصكر
الباب ..منغير ماتشوفه هيا ..ويمشى يخبر عمران انه شاف راجل ومراة خشو لحوشه …ولاااااازم ايجيب نادر واحمد كشهود …

وبالمرة عمك عبدالكريم كشاهد .. بيش تثبت على نادر حتى كانا بيدسها مع يقدر خاطر راجل خالته شافهم …

قولو صفيه ركبت مع خوها ومشو جهه الجامع …خش حفيظ نادى نادر وطلعه معاه بالسيارة ..ستادناته صفيه انها تمشى لامها …قاللها برى وربي يطمنكم عليها …
مشى حفيظ بالسيارة فات من قدام عبدالجبار…هوا شاف حفيظ لكن ماشافش البنت اللى راكبه معاه منهيا ..قعد يخمم مفيش غير صفيه اللى ممكن تركب معاه من قدام .. ساوره الشك … طلع من الجامع ومشى لصااحبه عزو مالقاشى فالمكان المتفق عليه .. لان جماعه الشارع شافوه واقف شكو فيه ..فغير مكانه … فات من جهه حوش بدريه لقى الباب قاعد مفتوح..يبي يخش يتاكد خاف ان صفيه رافعه معاها حد ويقعد فى قصه ثانيه …قعد يمولج كيف بيدير.. مشى طو للخيمه متع النساوين من الجهه الثانيه ..لقى بنات يلعبو برة .. نادى وحدة منهم وعطاها جنيه وقاللها ناديلى وحده اسمها هيفا لكن مش بالتشهدير …كلميها قى ودنها …وبالفعل خشت البنيه تسأل على وحدة اسمها هيفا…لقتها …كلمتها فى ودنها قالتلها يبيك واحد اسمه عبدالجبار ورا ستار الخيمه ..
طلعت هيفا بتكلم عبدالجبار وكانت هادى اول مرة عبدالجبار يشوف فيها هيفا …
-مد عبدالجبار يده / اهلا بيك
-هيفا تسلم عليه / تشرفنا
-عبدالجبار/ شن صار
-هيفا/ توة قلتلها خافت على امها طلعت طول مشت للحوش
-عبدالجبار/ توة شفت حفيظ ومعاه وحدة من قدام ..من بتكون غير صفيه
-هيفا/ تى بالك يعرف بنت ومركبها …قلتلك طلعت مشت للحوش انا متاكدة
-عبدالجبار/ اطلعى توة بري للحوش..خشى الجنان …شوفي الباب كانه مفتوح معناها ما مشتش ..وكان مصكر معناها هيا لداخل
-هيفا/ وعلاش ماتمشيش انت يا فالح وتتاكد
-عبدالجبار?/ الباين عليك لسانك طويل …منقدرش انا نخش غادى نخافها تشوفنى وتزبط الملعوب واديرلى حوسه..نبى نخش لما التريس جايين
-هيفا/ اوووف …باهى
وخشت من الخيمه مشت للجهه الثانيه .. خشت لجنان بدريه لقت باب الحوش مفتوح .. دفت الباب بتخش .. وبعتالى قعدت تخمم مفروض منخشش.. بالك حتى انا تشوفنى واديرلى وجيج .. لكن مفيش صوت فالحوش …قررت تخش تشوفها وين وتطلع بسرعه ..لكن الشيطان شاطر.. وفكرت تلبد فالحمام تشوفها شن بيصير بينها وبين جبار.. وحتى لو تمت القصه وخشو التريس وشافوها تكون هيا لابدة ومايشوفها حد …
…ولكن عمك عزو اللى موقفه جبار شافها خشت يحسابها صفيه لانه مايعرفش شكلها…. مشى يجرى للباب صكره .. ومشى للجامع دور على عبدالجبار مالقاشى …طلع من الجامع بيدوره لقاه كيف جاى
-عزو / وين كنت يا راجل
-عبدالجبار/ تى وينك انت مشيت بنكلمك مالقيتكش فمكانك
-عزو / غيرته …جماعه شارعكم شكاكين
-عبدالجبار/ باهى كيف صار
-عزو/ كون هانى .. العصفورة فالقفص من بكرى
-عبدالجبار?/ متاكد
-عزو / بايدى صكرت الباب بالمفتاح
-عبدالجبار/ خلاص نكملو الحكايه ..تمشى توة تبلغ نادر وتقوله يبلغ بوى .. وجيبهم الزوز وعبدالكريم تلقاه جنب بوى خبره انت وحطهم فالامر الواقع
-عزو / تم كون هانى ..برة بسرعه للحوش هانى لاحقك بيهم

_______________________________________

–

هيفا حست ان الحوش هدوء..كأنه مافيشى حد .. طلعت ادور فالحوش لقاته بالفعل فاضى .. ياغبارة تضرب فى خدودها وتراجى فى جبار ايجى يفتح الباب ويطلعها …
قعدت هاديه لا خبطت لا دارات حتى حاجه ..ماتبيش تخلى اى حد ينتبه انها فى فالحوش

وفى الجامع ….
عبدالجبار طلع بسرعه … مشى جهه حوش بدريه وقعد واقف …يبي لما يشوف بوه والجماعه جايين من راس الشارع يخش ويصكر الباب ..مايبيش صفيه اديرله قصه وعياط ….

اما عزو ..مشى لنادر واحمد بلغهم انه شاف مراة وراجل خاشيين حوش بدريه … وبلغو بوهم يبو المفتاح يمشو يشوفو .. لكن عمران قاللهم ضرووورى نمشى حتى انا …
ومشى عزو لعمك عبدالكريم حكاله الموضوع وقاله قالك عمى عمران الحقنى توة …عمران وصغاره مشو على رجليهم …لكن عبدالكريم صعب عليه مسافه …قاله لى فتحى ولد بنته ايوصله للحوش غادى …

عبدالجبار شاف خوته وبوه جايين ومشى يجرى للباب فتحه بالشوى وخش…مزال زعميتا مايبيش صفيه تحس بيه ويلقوها اتعيط …قعد واقف فالسقيفه منغير حس ..يراجى فيهم ايجو …

وفالشارع …وصل عبدالكريم درس السيارة ووصلو احمد ونادر ….
-عمران/ على خير يا حاج عبدالكريم …شنو بتروح
-عبدالكريم / لاااا انا جانى شاب وحكالى عاللى صاير فى حوشك وقالى قالك عمى عمران الحقنى
-عمران مستغرب/ انا ماقلتلاش .. لكن مدامك وصلت تعال اشهد معانا ….
حوش بدريه بابه فيه دروج …نزل فتحى خدى جده عبدالكريم من يده وقعد يركب فيه
-عمران مد المفتاح / هاك افتح يا احمد
خش جبار يجرى للصاله …وطلعت هيفا تجرى من الحمام

-هيفا تضرب فى وجهها / الحوش فاضى مافيشى حد الله يرزينى فيك وفيها
-جبار يهمس مايبيش الرجاله يسمعوه/ نهارلك لحرف انتى شن اديري هنايا وين صفيه
-هيفا تبكى/ البلى لاحرف مهناش شورها ما خشتش للحوش
مسكها جبار من يدها / البدى فى اى مكان بسرعه الله لا تربحك …
وخش احمد وعمران ونادر يلقو المنضر قدامهم جبار ماسك يد هيفا ويبي يهربها
ويخش وراهم عبدالكريم وخوها فتحى …كلهم تبكشو من الصدمه …
فتحى مصدوم / هيفااا…انتى شن اديري هنايا
-هيفا تنقز قريب توصل السقف/ والله ما انا يا فتحى …
والله كنت فى الخيمه …

فتحى مشى يجريلها بيقتلها …شاده نادر واحمد …
طلع عبدالجبار بيهرب وينقز فتحى يصكر الباب / توووة تقرا فاتحتها ولا والله ماعاد بايت ليله فالدنيا
-عبدالجبار/ تى حول يا مصخ انا ناخد هادى …
وهيا مشت تجرى لجدها لبدت وراه
-عمران يعيط/ انا مافاهم شى …فهمونى
-عبدالكريم / بنتنا لقيناها مع ولدكم فى حوش بروحهم ….
ولا والله خوتها وصغار عمامها ما مخليينه يزيد ليله فالدنيا
-عبدالجبار/ ساهلة امالا تحسابوها
ينقز عليه فتحى/ تعالة يا مصخ والله ماليك قاتل غيري
وطاحو يضاربو … والبنت تعيط ورا جدها …ونادر واحمد يحزو ….

المهم منى منك ومع التهديد والوعيد خاف عبدالجبار
-عبدالجبار يمسح فالدم من وجهه/ جيبو الشيخ هى..اهو تو نقرا فاتحتها …ومدامك سيفت عليا يا بوى والله ماقاعدة اكثر من شهر عندى
-فتحى/ شهر .. اسبوع ..مادخليش المهم تقرا فاتحتها مدامك مختلى بيها يا وسخ …
وتلفت لاخته / اما انتى ..اقسم برب العباد لما نشرب من دمك يا مصخه …

ونادو بوها وجابو الشيخ وقرو فاتحه هيفا وعبدالجبار منغير حتى علم امها …المهم يلمو الفضيحه ….
قرو الفاتحه وخدو بنتهم روحو بيها …ركبت جنب جدها من الخلف فحمايته هوا …البنيه تبكى ..وبوها وخوها يتنفخو .. وامها مافاهمه شى ….
وياااادااااير …يالاقى …وان الطيور على اشكالها تقع

________________________________________

تمت …ويتبع

الحلقه الجايه نكملو باقى اللى بيصير …من يتوقع جبار ياخد هيفا??…مالااااك مقلب صارلهم ?
صح عطلت عليكم لكن حلقه طويلة… وعلى فكرة الحلقه الجايه هيا الاخيرة…
وسامحونى عالتاخير

نحبكككككم ❤?