رواية ولد راجل امي

#ولد_راجل_امى

بقلم زهور جمال الدين?
?الحلقه الثالثه عشر ?

–

فى حوش خيريه …

بدريه صاير فيها يانارى …تقطع القلب من البكى على ولدها
خيريه مقعمزة من تركينه وسهام جارتها من تركينه ثانيه
-بدريه / ياوليدى شن صاير فيك ..ياغالى على امك اللى سيباتك وراها ومشت فالسيارة بعيد …ياوليدى سامحنى .. ياللى تلعب فالحوش ومفرح امك …يلى تقرا وناجح كل عام
-خيريه / يابدريه عيب اللى اديرى فيه .. معقولة تعددى عالولد وهوا حى
-بدريه تبكى/ ياغبارتى …مامشو وخلونى الا وولدى صايرتله حاجه
وتلفتت لى سهام جارتها لقتها تبكى/ توة دايرة روحك تبكى .. وراس وايدى سيف الغالى تحصل تصيرله حاجه ماقاتلك حد غيرى
-خيريه /اللطف علينا … يابدريه عيب كلامك

وتبان غادة من بعيد تتكلم فالتليفون وتهمس
-غادة/ من الصبح انضرب ورفعه طول خوى جبار للمستشفى
-سعيد / وكيف ماتقوليليش من بكرى ..وخيرها بدريه ماكلمتنيش على طول
-غادة/ قصه طويلة …بدريه ماكانتش فالحوش لما نضرب
-سعيد متعصب/ غير اعطيهالى وينها
-غادة/ والله مانقدر ..نصكر انا توة وعاود انت
-سعيد / باهى غير صكرى هى

وبالفعل صكر سعيد الخط وناضت غادة بسرعه من جنب التليفون وعاود سعيد الاتصال..دت امال وقاللها ناديلى بدريه
وقفت بدريه عركتها مع سهام وجت ترد على خوها

-بدريه/ يا ولد امى وينك مخلى اختك بروحها .. تعالة سيف فالمستشفى
-سعيد / غير شن صارله وكيف انضرب
-بدريه / انت من خبرك
-سعيد / عامل عندى كلمنى شكله ترا منين سامع بلغنى
-بدريه / ولع سيارتك توة وتعالة لطرابلس
-سعيد / انا فطرابلس توة … اهو تو نمشيله
-بدريه / فوت عليا نمشى معاك
-سع / شن بيصبحنى غادى …خلى نشوف ونجيك مرة وحدة

وقعدت بدريه تحكيله على ولدها وهوا يوعد فيها انه ميعطلش عنده ويجيها يرفعها لولدها

___________________________________________

–

فى حوش عبدالكريم

صفيه حاطه التليفون فى ودانها وتسمع فى المكالمه ومصدومه .. صوت الراجل اللى يتكلم تعرفه ومتاكدة انه هوا اللى فى بالها
– عبدالجبار / شن صار حطيتى الورقه
-هيفا / طبعا نفدت كل اللى اتفقنا عليه تحسابنى ساهلة امالا …
-عبدالجبار/ ينعبى عليك منورة … وغير كانا صار اللى فى بالى ليك عندى هديه
-هيفا/ غير نفتك منها مانبى منك هدايا
-صفيه/ ??
– عبدالجبار / غير احكيلى كيف صار وشن درتى بالزبط
-هيفا/ لما قلت لامها ولدك انضرب وصارت التشكشيكه..قلت لى نادر ايجيبلى ساكو الفرخ الصغير ..
-عبدالجبار/ غير احكيلى بسرعه بنصكر
-هيفا/ خديت الورقه وحطيتها فالساكو وطلعتها قدامه قلتله هادى شنو …قري الجملة اللى مكتوبه من برة من جبار الى صفيه وجهه بدي يتلون ودس الورقه فى جيبه
-عبدالجبار/ كويس .. ياااربي يشك فيها ويطلقها
-هيفا/ اااامين
-عبدالجبار/ هيا سلامات توة مش فاضى
وصكر فى وجهها… وقعدت صفيه السماعه فى ودنها ثوانى وهيا مصدومه …وبعدها صكرتها
طلعت هيفا من المربوعه .. ومشت طول للدار اللى ترقد فيها هيا واختها …ماشافتش صفيه فى دار التقعميز

اما صفيه وقفت وهيا مغصوصه دموعها فعيونها .. وخايفه من نادر زعما شن شاف وخيره ماسألهاش
وقفت بتطلع / بالسلامه توة ابله سعاد …
جتها سعاد / مسرع اتصلتى
-صفيه / لقيت رقمها عاطل
-سعاد / انشالله ربي ايطمنك على وخيك يا بنيتى
-صفيه / صحيتى وربي يحفظك
وطلعت صفيه للممر بتروح
-سعاد/ قتلك .. خيرها ايدك ملفوفه
-صفيه / لدغتنى عقرب لما طلعنا للزردة بكرى …ورفعنى نادر للمستشفى طلعولى السم متاعها ودارولى مضاد وطلعونى
-سعاد انخلعت/ الف سلامه عليك يا صفيه .. معنداش حق نادر مايقولناش
-صفيه / لاااا والله معدور تشبحى فيها كل شى جى بالخلعه
-سعاد / تو نجيكم انا والبنات نحمدو عالسلامه
-صفيه / تفضلى فى اى وقت مرحبتين بيكم

وطلعت من حوش عبدالكريم وهيا خاطرها مكسور ..
وصلت للحوش شافت نادر مامقعمز مع جيرانه وعاطى بالضهر… فتحت الباب وخشت طول لدارها قعدت تبكى

___________________________________________

–
فى حوش نادر

امباركه تنادى/ صوفيه …يا صوفيه
صفيه سمعتها فى الدار …وقفت مسحت دموعها وطلعت من الدار مشت للحمام…غسلت وجهها ومشت لعمتها
-صفيه خشمها احمر/ نعم يااام
-امباركه / اللطف علينا .. خيرك يا بنيتى
-صفيه صوتها مغصوص/ لا لا مافى شى
-امباركه تحسابها متعاركه مع نادر / يابنيتى التريس ايعاركو ويكشخو ويضربو حتى الضرب … والمراة العاقله ايروح راجلها فالليل يلقاها تقول ماصار بينهم شى
-صفيه/لا والله يااام نادر ما معاركنى ولا جى على حالى لكن انا وجعنى خوى خاطر امى ماحصلتهاش بيش ننشدها عليه
-امباركه/وعلاش ماكلمتيهاش … شنو تليفون حوش اختى مايصلحش
-صفيه / لا .. تليفونهم كويس .. لكن تليفون امى هوا اللى ماينفعش…
وقفت/ خلى انوض نديرلك عشاك
-امباركه / جيبيلى حليب وتمر وخلاص
-صفيه / باهى …

وبالفعل مشت للمطبخ …دموعها ينزلو وهيا تمسح …
دارت الحليب والتمر ورفعاته لعمتها … تعشت وصلت العشى
-امباركه / غطينى سلم بنيتى وطفى الضى
-صفيه / مزال بكرى يااام..خيرك راقدة من توة
-امباركه / تعبتنى الطلعه.. هوا هداكه …
يسمعو فى صوت باب الحوش انفتح وتصكر .. جى نادر
فتح الباب وخش … شبح لصفيه .. ماعجباش شكلها
-نادر/ خيرك
-امباركه / قالت واجعها خوها
-نادر يشبح لصفيه / فى حاجه
-صفيه منغير ماتشبحله/ لا لا مافى شى
وتلفتت لعمتها وتساوى فى الغطا / تصبحى على خير يااام
-امباركه/ ليلتك سعيدة بنيتى
وطلعت صفيه من الدار ونادر يشبحلها

__________________________________________

فى المستشفى

عمران مقعمز قدام الغرفه اللى فيها ولده جى الدكتور يمشى بحركه سريعه وخش للغرفه اللى فيها سيف ..لاحظه عمران مشى فى جرته يجرى لاكن سكرو الباب ماخلوشى يخش..
مشى لغرفه الممرضات مشغول
-عمران / خيره الدكتور جى لغرفه سيف يجرى
-الممرضه/ ماتخافش يا حاج ارتفاع بسيط فالحرارة فبلغنا الدكتور ايجى

-عمران / كلميلى منير ولد عمى ينادى ولادى وين مشو وخلونى
-الممرضه/ منو منير
-الممرضه اللى جنبها /اللى يخدم معانا وكان معاك توة ولا
-عمران / ايه هوا
-الممرضه / انا زابطاته اهو تو نكلمه فى القسم متاعه
-عمران / قوليله قالك عمك نادى الاولاد وين مشو ايجونى يشوفو خوهم …
-الممرضه / حاضر يا حاج .. غير قعمز استريح
مشى عمران للكراسى اللى قدام الغرفه وقعمز ايراجى فى ولاده …

ويخشو رجالة مجموعه كبيرة منضمنهم سالم جارهم وجيرانه الثانيين .. ورجالة كانو صغارهم يلعبو مع سيف وقت انضرب ….سلمو على عمران
-سالم / انتم هنايا يا حاج… واحنا مشينا لمستشفى ثانيه انراجو فى ولد اسمه سيف يطلع من غرفه العمليات ..
وفالاخير طلع مش سيف ولدك
-عمران/ مدامكم مالقيتونيش غادى معناها لولد مش ليا
-محمود جاره / ماهو لما سمعنا قالونا انك مهناش وماشى لمنطقه ثانيه مع ام الولد
-خالد / الصغار يا حاج كانو يلعبو لا بيهم لا عليهم …قالو الضربه جت من برة الملعب
-عمران ?/ قدر الله وماشاء فعل

_________________________________________

–

عبدالجبار طلع من الغرفه اللى كان يحكى فيها مع هيفا …
لقى فوزى وخوه احمد واقفين يراجو قدام الباب

-عبدالجبار/ شن صار فى خوك يا احمد ….”يبي يوزعه”
-احمد / خليت بوى جنبه
خش نبيل صاحب فوزى شاد باكو بيتزا وعصير خوخ
-عبدالجبار/ لا برة لبوك متخليشى بروحه ….
-فوزى / تفضل معانا خوى قبل ماتمشى …
عطو باكو بيتزا لى عبدالجبار … وباكو قسموه احمد ونبيل وفوزى مع بعضهم ….
ومشى احمد بيش يشوف بوه … وقعمز عبدالجبار وفوزى فى الكراسى ….
-عبدالجبار/ عرفتنى
-واطى فوزى راسه/ جميلك فوق راسى والله ماننساه
-عبدالجبار بعصبيه/ زابطنى ولا لا
-فوزى / زبطك .. انت اللى مشيت للجامعه ورفعتله جماعه وضربناه زمان
-عبدالجبار/ تبى تردلى جميلى
– فوزى / قلتلك من بكرى اللى تبيه انا فيه
-عبدالجبار/ من باعتك ليا
-فوزى/موضوع وفات..ليش تنبش فيه ويوجعك خاطرك منه
-عبدالجبار/ نبى نعرف من بعتك ليا …اكثر من انك تجاوبنى ع السؤال هدا مانبيش
-فوزى/ جارك سالم
-عبدالجبار انصدم/ سالم جارنا .. وشن بينى وبينه انا بيش يبعتك ليا تضربنى ..
وتلفتله / وانت من قالك انه جارى
-فوزى / بعد ماعطانا المعلومات راقبناك ايام واتفاجئنا انه جارك
-عبدالجبار/ ريت ولد الحرام .. انا نعرف من باعته ..تى والله لما نقتله الحرايمى هدا …
-فوزى/ انا نقولك من باعته
-عبدالجبار بلهفه / منو
-فوزى / وحدة يقولولها بدريه .. لان بعد ماتمت العمليه انا طلبت سعر اكثر وديما نديرو فيها … وقتها سالم قال مش شغلى وخودو تفاهمو مع مولات المول ..وكان اسمها بدريه
تلفت عبدالجبار بغضب لى نبيل صاحب فوزى/ توصلنى لحوشنا
نبيل تلفت لى فوزى/ نوصله
-فوزى/ باهى وصله
وقف عبدالجبار بيطلع
-فوزى/ اقعد استريح وبعتالى روح
-عبدالجبار/ لا لا بنروح ضرورى.. وكانا سأل عليا خوى احمد قوله روح ….
وطلع من القسم وطلع وراه نبيل بيش يوصله ..نزلو من الاسانسير … ومشو لباب الخروج بيطلعو .. وسعيد خاش من جهه الدخول …قعد ينادى على جبار لكنه ماسمعاش ..استمر فى الخروج من المستشفى …وسعيد خش

_________________________________________

–

خش سعيد للمستشفى…سأل فالريسبشن على مكان ولد اخته فى اما دور وخدى الاسانسير وركب …خش للممر لقاه معبى بالرجالة …عمران واحمد يتناقشو مع الدكتور ..سلم عليهم ونشد على سيف…..
– الدكتور / يا حاج المفروض اتروحو الولد فالعنايه مفيش داعى لقعادكم …الزحمه والاصوات تزعج المريض
-عمران / كيف نطلع ونخلى ولدى فالعنايه ونروح عالاقل نقعد انا ولا خوه احمد ..
-سالم جارهم / اهو تو انروحو احنا يادكتور …عالاقل خليه هوا وولده
-الدكتور/ الجميع ايروح ومفيش داعى لقعادكم

واشتد االنقاش بين الدكتور وعمران والجماعه اللى معاهم …

وفالاخير قنعوه احمد وسعيد..وقالوله روح انت وجيرانك
-سعيد / اهو انا هنايا كون هانى …اصلا انا كيف وصلت ميقدرش ايطلعنى …
وتلفت لاحمد / وصل بوك وارجعلى يا احمد
-احمد / هيا يابوى نوصلك ونرجع لسعيد
-سالم / عالاقل طمن امه اكيدة حتى هيا صاير فيها
-عمران / انخش انشوفه ونمشى
تلفت الدكتور للممرضه / دخليه ..دقيقه ويطلع
2
وخش عمران لولده لقى نص راسه مربط ولما مسه لقاه زى النار …طلعاته الدكتور ….

ونزلو كلهم ماعدا سعيد …وركبو احمد وعمران السيارة وروحو للحوش

______________________________________

–

فى حوش نادر

صفيه خشت لدار نومها .. وقعمزت عالسرير …لحقها نادر .. فتح الباب وخش وسكره ..
-نادر / صفيه فى حاجه
-صفيه / وين الورقه
-نادر اتفاجأ/ ورقه شنو
-صفيه / الورقه اللى حطتهالك بنت خالتك فى ساكو خوى ولقيتها انت وخديتها
-نادر / وانتى كيف عرفتى بيها
-صفيه / سمعت هيفا بنت خالتك تتكلم فالتليفون وتحكى عليها بالصدفه انا كنت رافعه السماعه من الجهه الثانيه
-قرب منها ومسك كتافها بقوة / مع منو كانت تتكلم .. انا نبى نعرف الشخص اللى معاها ويساعد فيها منهوا
صفيه خممت للحظات … حست حتصير مشاكل وعرايك بين الخوت … قررت انها ماتقولش ان هيفا كانت تدوى مع نادر
-صفيه / تدوى مع شخص .. لكن منهوا الله اعلم
-نادر / وشن قالتله احكيلى بالزبط …
وقعدت صفيه تحكيله فى المحادثه كلها …
-صفيه / خيرك ماقلتليش
-نادر/ لانى واثق منك ومش شاك فيك
-حضناته / حكايه ثقتك فيا مش امر عادى .. وشايفتلك بيها كبيرة
-نادر/ وحكايتك انك حكيتيلى اللى صار ومادسيتيش عليا مش امر عادى وشايفلك بيها كبيرة
-صفيه / نحبك …
قعد حاضنها ويمس فشعرها ويخمم/ والله مانى ساكت والله لما نعرفك ياولد الحرام اللى تحرك فى هيفا ..ولما نشرب من دمك

_______________________________________”

فى حوش عمران….

كبرت الدوة والنقاش بين بدريه وسهام .. لدرجه جاراتهم بدت تنسحب بالوحدة وروحو كلهم قعدت بدريه مع خيريه وبناتها وسهام جارتهم
-بدريه / نخليلك ولدى تودريه ..الله لا تسامحك .. انشالله تلقيه فصغارك
-سهام / ووك عليا بعيد السو على صغارى .. احترمى نفسك يابدريه ولمى لسانك اللى زى محشه ماسالم منه حد
-بدريه / توة طلعلك لسانى طويل وزى المحشه .. فضلت كتافك من خيري..توة طلعت ماننفعش .. فروخك عرايا كان مش من فضلت صغارى تلبسيلهم فيها
-سهام وجعتها وسط كبدها / تعزرى فيا يا بدريه? ..يااما وقفت معاك غير كان منحكى
-خيريه / صلو عالنبى يا جماعه الخير .. الكلام هدا مش وقته
-سهام/ شفتيها كيف تدعى على صغارى يا عمتى خيريه
وبنات خيريه من بعيد يتفرجو ويضحكو متشمتات فى بدريه وسهام انهم واخير تعاركو …

وانفتح باب الحوش ايخش عبدالجبار زى الغول
-عبدالجبار/ يااام …فى حد من الجيران لداخل
-خيريه انخلعت/ خيرك ياوليدى مافى حد غير سهام مرت سالم جارنا وبدريه
-خش عبدالجبار/ ربي كشفك يا مصخة ..يا حقيرة
-خيريه / خيرك يا جبار ..شن فى
-عبدالجبار/ المصخة هادى اللى مقعمزتيها فى حوشك باعته جماعه بيش يتهجمو عليا و يضربونى
-بدريه مخلوعه/ اناااا.. انا ندير هكى..ليش منضربك ..ومنين بنجيبهم الجماعه هادو
-عبدالجبار/ توصى فى سالم جارنا وهوا يدورلك ويخدملك وانتى تدفعى يا بنت الحرام
-سهام / اى نعم .. صحيح كلامك هيا اللى دفعت لجماعه واجرتهم بيش يضربوك
-بدريه / سهام!!!!??.. انتى شن تخرفى
-سهام / مش تلبسى فى صغارى من فضلت صغارك .. تو نوريلك الفضلة كيف شكلها
-خيريه / معقولة يا بدريه اديري هكى .. انا اللى عاملتك كويس وعمرى ما ضريتك اتأجرى جماعه ويضربو ولدى
-رانيه / وشن تراجى منها يااام بعد خطفت بوى مننا ونكراته فينا تبيها ادير خير فى خوتى
-خيريه / ضمى فمك انتى
-بدريه/ والله مابعتله حد …اقسم بالله يكدبو عليكم
وتلفتت لسهام / خزيه عليك يا سهام يا كدابه تتبلى عليا
-عبدالجبار/ مدامك حكيتى يا سهام وقلتى الحق احكى منو حاطلى الكتيبه فى حوشى هيا والا لا
-سهام/ الكتيبه حطتها بدريه…بعتت ولدها سيف لحوشكم وقالتله حطها ..ولما معرفش خشت هيا وحطتها تحت السرير
-بدريه تعيط / كدابين …كدابين والله ماحطيتها
-فتحت امال المكتبه وطلعت كتاب القران/ احلفى عالقران كانك صادقه
-بدريه / كلكم عليا … حولو بنروح لحوشى
خش عمران واحمد / خيركم …

وقعد عبدالجبار يحكى لبوه … هوا يحكى من تركينه وسهام اتأكد فالدوة من تركينه ثانيه ..واحمد دار عليها هجوم وقف مع خوه ويسب فيها وعمران معرفش يوقف معاها …ربع ساعه وهما على هالحال

وقف سعيد فالباب اينادى ماسمعه حد …
خش لباب اللوح / يا احمد …احمد
مشتله بدريه تجرى/ خش يا وخى راهم دايرين عليا حلقه كلهم ويعاركو فيا
-سعيد / وين عمران
-بدريه / اهو لداخل هوا وولاده

-سعيد حضن بدريه/ ربي يصبرك يا وخيتى
وعلى صوته / عضم الله لكم الاجر فى سيف يا عليه …
بدريه ماستوعبتش الكلام / خيره سيف يا سعيد
-سعيد/ سيف عطاك عمره يا بنيه امى
-بدريه تعيط / لاااااا ولدى لاااا …ووك علياياخيريه تعاليلى
مشتلها خيريه وبنتها رحمه يجرو / وحدى الله يا بدريه
-عمران / خليناه فى العنايه مش حالة سو غير شن قتله
-سعيد / ارتفعتله الحرارة قريب ل 48
طلعو عبدالجبار واحمد من الحوش .. ومشو البنات اضبطو بوهم ويعزو فيه ويبكو …
سعيد وخيريه ايقيمو فى بدريه وهيا تعيط فوق فوق …
وسهام جارتهم خدت شبشبها وروحت تجرى لحوشها ..
وسمعو الجيران العياط جو يجرو …
وخش مهند ولد بدريه مع صغار الجيران ومشى لامه يبكى ..
وقامو العزى وبدو ينصبو فالخيم

________________________________________

تمت … ويتبع

جهازى العجوز استاكا امبارح …مقدرتش انديرله سوفت وير كنهدا الحلقه بطير .. توة بس انفتح ??.. اهو نزلتها الحلقه ….فى حلقه الليل نشوفو شن بيصير

نحبككككم ❤