رواية ولد راجل امي

#ولد_راجل_امى

بقلم زهور جمال الدين?
?الحلقة الثانيه عشر ?

–

فالطريق …

بدريه تبكى …صايرة فيهم حالة تخمم فى ولدها
-بدريه / يا حليلى على وليدى زعما كيف صاير فيه
-مهند ولدها بالرغم صغير لكن يصبر فى امه / ياماما اسكتى مايصيرله شى اكيدة ضربت كورة وخلاص
-بدريه / ضربه كورة ايكلمونا عليها ويقولونا روحو..مسحيل لابدة ولدى صارتله حاجه ..
-عمران / تى ضمى فمك وانتى تفاولى عالولد من بكرى
-بدريه / احمد يا ووليدى اجرى خلى نلحقو على خوك
احمد انتبه لكلمة ياوليدى ..
-عمران / شن تلحقى عليه هادى .. فاولى خير وانتى زى الغراب من بكرى تنقى
-بدريه اعصابها فلتو / وانت خيرك واحل فى رقبتى زى الشوكة .. الولد ولدى وانا حرة نقول عليه اللى يعجبنى
-احمد / هدى عصابك يابوى … المراة معدورة .. خايفه على ولدها
-عمران / تعرفنى تنقريز النساوين منحباش.. موتى وجنونى مراة تبدا تنق وتفرفس
-بدريه تبكى/ معاك حق مدورش ياحنه كاثرين عليك …انا مكسوبى هوا وخوه …
-سيف/ وخوتى الثانيين ياماما خيرك نسيتيهم
-عمران جاته عالجرح/ ايييييه يا دنيا… سوق سوق ياولد

______________________________________

–

فى حوش نادر

طلعت صفيه من دار عمتها مشت لنادر قعمزت فى حجره وحطت راسها على صدره/ خيره حبيبي مش معدل عليا
-قام يدها وباسها/ ريتها فيا ولا فيك يا عمرى ..
-صفيه بدلع / اي باين
-حط يديه على وشاحها حوله وفتحلها شعرها / محلاك
-صفيه / انا فى شنو ولا شنو نقولك ايدى توجع فيا .. وانت ولا ناديتنى ولا عدلت عليا ولا انا فى بالك اصلا
-حط راسها على صدره/ توة انتى مش فى بالى يا مجرمه .. تى انا عندى فيك نيه مايعلم بيها الا ربي مايسدنيش فيك اسبوع كامل
صفيه تضحك ….
-امباركه تنادى/ نادر … يانادر
-نادر تلفت / نعم ياام
حولت صفيه من عليه ..ووقف هوا ومشى لامه …وصفيه قعدت فالصاله تبيش تحرج نفسها مرات كلام عائلي
فتح الباب/ نعم يااام
-امباركه عيونها مدمعات وحاطه يدها على صدرها/ عندى غمه هني
-قعمز جنبها وحضنها / خيرك ياام شن فى
-مباركه / مندرى يا وليدى حاسه ترا شن بيصير
حضنها وهوا ساكت .. عرف ان امه حست بيه وحست ان فى ناس ناوييله على شر …
-باس راسها/ةالله مافى حاجه يا غاليه وبأدن مايصيبنيش
سو مدامك انتى راضيه عليا
-مباركه / ربي يحفظكم انت وبنتى صفيه
-نادر مبتسم / تحبيها يااام
-مباركه / البنيه بدت زى عويناتى .. ربي يخليها ليا يااارب
-نادر/ صفيه ..صفيه تعالى ..
-جت صفيه / نعم …
-نادر / تعالى اسمعى امى شن تقول عليك
-صفيه قربت منهم / امى ماتقول عليا غير الخير .. لان قلبها ابيض ربي يحفظهالى

ومع كل هدا قعد نادر افكاره مشتته وسرحان

_________________________________________

–

مع المغرب …

وصل احمد قدام حوشهم …درس السيارة .. ونزلت بدريه تبكى …مشت طول خشت لحوش خيريه …وولدها مهند وراها..فتحت الباب لقت الجيران متلمدين..خشت واضبطت
خيريه وقعدو يبكو..تلقطو عليهل لجيران يحمدو بالسلامه
اما ربيباتها امال وغادة ورانيه مقعمزات ماناضتش وحدة مشتلها … لين طلعت رحمه من المطبخ سلمت عليها وحمدتلها بالسلامه
-بدريه تخبط/ وووه عليا ولدى كيف صارله ياناس ومنو اللى ضربه …
رحمه وامها يسكتو فيها …
-خيريه تعارك / خيرك تفاولى على ولدك يا مراة .. اسكتى عيب عليك
-سهام جارتهم / يابدريه وحدى الله بادن الله بسيطه ويروحلك ولدك لا سو لا سويه
-بدريه/ لازم نمشى لولدى نشوفه …
-هادية جارتهم / وخيرك مدهمتيش طول وانتم مروحين فالسيارة
-بدريه / نحسابوه روح بيه خوه هنايا ..قالولى بسيطه ميخطرش عليا قاعد بيه لتوة غادى
وتنادى بالصوت العالى / مهند… يامهند …
-رانيه?/ بالشوية الرجالة قدام الباب اهو تو اناديه انا
بدريه مش قادة تناصيها مشغولة على ولدها ..
طلعت رانيه للجنان .. ووقف ورا الباب/ مهند ..مهند تعالة
جى مهند يجرى وخش وراها …
-بدريه / برة بوك قوله قالتلك امى ارفعنى لى سيف توة
-مهند / بوى مشى هوا واحمد من بكرى
-بدريه متعصبه / ليه عليه مرفعنيش معاه..كيف يدير هكى
اعطونى الهاتف نكلم خوى سعيد

_________________________________________

–
فى حوش نادر

طلع نادر من غرفه امه .. وقعدت معاها صفيه …غطتها وخلتها ترقد .. وطلعت من الغرفه لقت نادر مقعمز فى الصالة …مشت قعمزت جنبه …
-صفيه / خيرك حبيبى فى حاجه
-نادر / لا مافى شى … تعالى …
مشت جنبه .. سعيدة باهتمامه …
-مسك يدها / توجع فيك حبيبي
-صفيه بدلع/ ايه توجع .. وراجلى حبيبى مش مدورنى ..
-نادر/ انا مش معدل عليك …
وقف مد يده / تعالى
مسكت يده ومشت معاه رفعها لدار نومهم …خشو وسكرو الباب وراهم …قعمز نادر عالسرير وجت صفيه بتقعمز جنبه
نادر/ لااا تعالى
خداها من يدها وقعمزها على فخاده متلفته له …مدت يديها وحضناته وهيا مقابلاته …

بعدها عليه وباسها من شفايفها / انا مش معدل عليك ..تى انتى كانا صارلك حاجه رانى هبلت
-صفيه / تحبنى ❤
-نادر/ انتى جزائي من الله .. مش يقولو ربي يجازى .. خلاص انا ربي جازانى بيك ..انتى رضى امى عليا
-صفيه / انا اللى ربي جازانى بيك ..شافنى كيف نضلمت وقداش تحملت فحياتى
-نادر/ تحبينى ..
-صفيه / نموت فيك وكل شى تقولهولى .. انت راجلى اللى نبى نموت وانا على دمته… نبيك طول العمر
-نادر/ ياربي اجعل يومى قبل يومك
-حطت يدها على شفايفه/ لا متقولش هكى …
خدى نادر يدها وقعد يبوس فيها .. وحط صباعها فى فمه .. انسجمو الزوز .. خلاها على رجليه ورقد عالسرير .. وضمها وحطها فوقه …
يبوس فيها / نحبك ..نحبك …
-صفيه بدلع / لاااا اهفت ..نبى نمشى لحوش خالتك نكلم امى عالارضى اكيدة وصلت توة
-لفها نادر وخلاها تحته ويبوس فيها / خوك بخير وكويس عركه كورة وتمت واكيدة داروله اللازم وارتاح .. توة نبى انا نرتاح …
وهيا تحته تضحك وتتمنع عليه تزيد فى رغبته فيها ….

_________________________________________

–

فى المستشفى …

عبدالجبار يجري بجديات .. سيف فالاخير خوه بغض النضر
عن انه ولد بدريه …
-عبدالجبار/ شنو يا دكتور ..خيرك ماطلعتش سيف لتوة
-الدكتور/ لا متخافش الحالة بسيطه.. لكن الباين ان الولد بعد منضرب طاح عالارض وخش التراب لى الجرح ولازم يبي تنضيف دقيق
-عبدالجبار/ باهى نضفتوله
-الدكتور/ اهو عنده الممرضات يديروله فى اللازم
-عبدالجبار/ بارك الله فيك يا دكتور…

ومشى قعمز عالكراسى يراجى ..تلفت عاليمين شاف راجل ماشى جهه الطوارئ خش للغرفه 4… اشتبه فيه …كأنه شايفه زمان …لحقه لنفس الغرفه ..لقى الشاب يعيط
-الشاب/يا اختى دورت فى كل مكان مالقيتهاش فصيلة الدم
-الممرضه / خوى تصرف..خوك دمه قريب تصفى من الضربه اللى جاته فى رجله .. اسعفناه لكن ضرورى من زيادة الدم
-صاحبه / اختى كانا عندكم حتى شوية اعطوه لين انزلو اعلان فالجريدة والراديو..ماتحافش يا فوزى بادن الله سليمة
تاريته الشاب خو المصاب اسمه فوزى وهوا نفسه اللى لفت نضر عبدالجبار ولحقه …
خش عبدالجبار للغرفه لقاهم يتناقشو ..
الممرضه / هيا صحيح الفصيلة صعب تلقاها .. لكن زى ماقال صاحبك نزلو اعلان فالراديو صغار الحلال هلبا حتلاقو متبرع
-نبيل صاحب فوزى / او سالبه فصيلة مش بالساهل تلتقى
-خش عبدالجبار/ كأنى فهمت انكم تبو فصيلة دم او سالبه
…اللى هيا نفس فصيلتى
-فوزى يبكى / جيت فوقتك ياشاب …خوى بين الحياة والموت .. تربح انقده ارجوك
-عبدالجبار لما قرب من فوزى زبطه من يكون لكن سكت لانه قدام موقف انسانى / حاضر .. وين غرفه التبرع
-الممرضه / الحقنى بسرعه خوى
ومشت الممرضه ومشى وراها عبدالجبار وفوزى .دخلاته لغرفة سحب الدم ودارتله الكنيولة وبدت تسحب منه .. وهوا يخمم يكلم الولد لانه زبطه شكون ولا يفوت..ومن جهه ثانيه يخمم شن صار فى صفيه وهل خوه شاف الورقه والا لا فقرر
انه يتصل بي هيفا يطمن عالموضوع
تلفت للممرضه / لو سمحتى ممكن تليفون ارضى …نبى ندير مكالمه ضروريه
-الممرضه / هنايا مفيش تليفونات .. بعد تكمل سحب دم نرفعك لغرفه ثانيه كول حاجه وتكلم بالتليفون كان تبى

________________________________________

–

فى حوش نادر ….

نادر راقد على بطنه ومتلفت جهه صفيه اللى راقدة جنبه وهيا متلفتتله ومغمضه عيونها ..حط يده على خدها ..فتحت عيونها
-صفيه مبتسمه / قصدك رقدت انا
-نادر يضحك/ مش هلبا ..ممكن عشرة دقايق
-تلفتت على ضهرها وفردت شعرها/ مش منى من التعب والاجهاد
-نادر يضحك / لكن نحلفك بدينك مش اجهاد حلو
-صفيه تضحك / مدامك حلفتنى بنعترف انه اجهاد حلو ويهبل ويزيد الحب بينى وبينك كل يوم ..
تلفتتله مدت يدها على ضهره/ حبيبى ضهرك كله عرق البس تيشرتك
-نادر يشبحلها / خليه تو يجف ..
-صفيه / نوض خش للحمام خلى نمشو لحوش خالتك انكلم امى… المغرب قريب ايأدن
-نادر/ حوش خالتى مش برانيه بري بروحك
-صفيه / لا منقدرش نمشى بروحى تعالة معاى
-نادر/ مافيهاش كيف نخلو امى بروحها احنا الزوز
-صفيه/ امى راقدة توة نمشو بسرعه ونروحو
-نادر/ حبيبتى امشى بروحك ..هادو بدو اقاربك حتى انتى.. متخافيش بري واتصلى وروحى
-صفيه / باهى
“نادر ميبيش يمشى لحوش خالته عارف روحه لو تلاقى مع هيفا بيشدها يمرجها طريحه عالعملة اللى صايرة ”
وقعد يخمم زعما من معاها ومن مشاركها فى العملة اللى دايرتها
-قامت راسها من المخدة وقعمزت عالسرير / ترا مدلى حوايجى بنمشى للدوش
-نادر/ ايييه علينا عاد .. حبيبتى خلاص فوتيه موضوع الحشم هدا .. احنا شخص واحد توة
-صفيه مبتسمه / باهى تحبنى ولا لا
-نادر يضحك / نمووت فيك❤
-صفيه / عندك علم انى لتوة ممشيتش لحوش بوى
-تلفتلها وخدى يدها باسها / امتى ماتبى نرفعك .. لكن حطى فى بالك ان ممنوع تباتى بعيدة عليا

-صفيه تضحك / احنا عندنا البنت لما تتزوج لازم تبات ليلتين عند حوش بوها
-نادر يضحك / ايه غير اعبى بس …
حط يدها على صدره / انا معش نقدر نبعد عليك حتى دقيقتين .. فمابالك يومين .. وبعتالى نخمم كيف بنرفعك ونروح .. المسافه قريب ساعه وشوى .. ومنقدرش نخلي امى مع سعاد بنت خالتى حتى ربع ساعه لانها مش متعودة عليها
-صفيه /منو سعاد!!.. انا كانا مشيت امى منرفعها معاى .. مانطمنش نخليها حتى ليك انت ..
-صفيه / ربي يحفظك ليا ومايحرمنى حنانك عليا يااارب
-نادر/ ولا يحرمنى حبك ولا وجودك فى حياتى

________________________________________

–

فى المستشفى

خش عمران يجرى للمستشفى ومعاه ولده احمد …لقى منير ولد صالح ولد عمه لابس لبسه التمريض وواقف قدام غرفه
-احمد/ منير .. يامنير

-تلفت منير/ عمى عمران .. اهلين احمد ومشالهم سلم عليهظ
-عمران / ولدى سيف جابه عبدالجبار مضروب من مبارة بكرى عندكم هنايا
-منير/ لا لا ماشفتاش .. خيره مابعتليش ماهو عارفنى نشتغل هنايا
-احمد / مش عارف شكله تلخبط .. ترا اسألنا على سيف فى اما قسم حاطينه
-منير/ تعالو وراى.. اكيدة فى قسم الجراحة مدامه مضروب
مشى جهه قسم الاسعاف بيسألهم ركبو سيف فوق ولا قاعد
وبالفعل قالتله الممرضه انهم ركبوه فوق قسم الجراحه ينضفوله
خدو الاسانسير وركبو مع بعضهم للدور السادس لقسم الجراحه …خش منير للممرضات وعمران وولده يدورو عالغرف ويدورو على سيف …
-منير/ عمى عمران
-تلفتله احمد/ شنويا منير…شن قالولك
وعمران رجليه يرعشو ومش قادر يتحرك لما مالقاش ولده
-منير/ نضفوله الجرح لكن ركبتله الحرارة …فحطوه فالعنايه
-عمران / عناية!!…علاش فالعنايه
-احمد / غير شن صاير يامنير …
-منير/ غير اهدا يا عمى .. حاطينه عاللاحتياط غادى لانه مايبوش تخشله ميكروبات من الزيارات والدوشه
-احمد لقى بوه وجهه اسود/ قعمز عالكرسى يابوى.. بالشويا عليك انشالله مع عليه سو سيف متخافش
وتلفت لمنير/ عبدالجبار وينه
-منير/ سألت البنت قالت ماشى يتبرع بالدم لمريض نفس فصيلة دمه
-عمران / توة وقته ماشى يتبرع ومخلى خوه بروحه
-منير/ سوا قعد ولا مشى نفس الشى لانه الدكتور مانع اى حد يخشله
-عمران / نوض دور على خوك يا ولد .. وقوله بوك يبيك
-احمد وقف / حاضر اهو تو نمشى نشوفه
“عمران فى خاطره خايف على عبدالجبار من نقص الدم فى جسمه ”

_________________________________________

–

فى غرفه التبرع بالدم

عبدالجبار حاط راسه لتالى عالكرسى .. زى اللى داخ شوى
-فوزى/ نمشى نجيبله حاجه سخونه تجريله دمه ونجى .. تو نجيب شاهى
-الممرضه / لااااا?.. احنا نبو نزيدوله نسبه الحديد والسكر فى جسمه .. والشاهى يمنع ارتفاع الحديد فالدم
-فوزى / امالا شن نجيبله …
-الممرضه/ جيبله اى حاجه فيها حديد .. زى عصير الخوخ مثلا .. وجيبله نشويات بيش يرتفعله السكر .. وتقدر تجيبله اى حاجه فيها فواكه البحر مفيدة جدا للمتبرع بالدم
-نبيل صاحبه/ اقعد انت توة .. وتو نمشى انا نجيبله عصير خوخ وبيتزا بفواكه البحر
-الممرضه/ وجيبله اميه لازم يشرب اميه هلبا …
وتلفتت لعبدالجبار/ اهو قريب نكملو..خدينا كميه مناسبه ..
وتلفتت لى فوزى/ شويا بس نمشى نجيب اللصقه ونجى
وطلعت من الغرفه …
عبدالجبار يشبح فوزى ماحولش عيونه من عليه.. وفوزى لاحظ الشى هدا …
قرب فوزى وقعمز عالكرسى جنبه / مش كأننا شايفين بعضنا زمان
-عبدالجبار/ ايه شايفين بعض ..زيد ادكر تو تزبطنى
-فوزى/ انا متاكد انى شايفك .. لكن !!!!
ووقف مخلوع ….زى اللى زبطه
خش احمد / السلام عليكم
-عبدالجبار / اهلا احمد
-احمد / اهلين عبدالجبار .. قالو تتبرع
-عبدالجبار/ اهو كملت .. خوك شن صار فيه
-احمد / حطوه فالعنايه قالو ارتفعتله الحرارة
-عبدالجبار/ اااه .. عنايه !!
جى فوزى يجرى شد يد عبدالجبار/ سامحنى يا وخى .. عرفتك .. والله اللى تبيه انا فيه
-عبدالجبار/ توة مش وقته الكلام .. خلى نكمل التبرع ونطمن على خوى ونفضى
-فوزى/ اللى تبيه انت يصير… تبرعك بالدم لخوى راهى مش حاجه ساهلة عندى .. انقدت خوى من الموت
-احمد / مافهمت شى انا …
خشت الممرضه / ترا اطلعو شوى لو سمحتو خلى نحوله الكنيولة وبعتالى خشو
طلعو احمد وفوزى من الغرفه …
-الممرضه تحول فى الكنيولة / قلتلى تبى التليفون ولا
-عبدالجبار نسى الموضوع?/ باهى فكرتين .. ايه كانا فى عادى هاتيه
-الممرضه / كانا تقدر وفيك حيل نرفعك للغرفه متع التليفون
-عبدالجبار / ايه نقدر .. عندى موضوع ضرورى نطمن عليه
-الممرضه / باهى

وبالفعل كملت الممرضه اموره ووقف على حيله بالرغم دايخ .. جاه خوه احمد وفوزى شدوه ورفعوه
-احمد / غير وين ماشى يا جبار انت دايخ ..خلى نروح بيك للحوش
-عبدالجبار/ شوية بس … ندير مكالمه ونطلعو ..
وبالفعل خش للغرفه وعطاته البنت التليفون

_________________________________________

–

فى حوش نادر ….

طلعت صفيه من الدوش خشت دار نومها بتلبس حوايجها … لقت نادر راقد
-صفيه/ حبيبي نوض المغرب بيأدن
-فتح عيونه / مشيتى ..

-صفيه / اهو منمشى توة .. نوض هيا
-نادر / باهى اهو منوض .. الحمام فاضى
-صفيه / فاضى غير نوض بس …
فتحت الدولاب طلعت حوايجها وحوايج لى نادر ..لبستهم وطلعت .. مشت لعمتها …
-صفيه / نضتى يا عمتى
-امباركه / نضت قبل شوى …نادر طلع ولا قاعد
-صفيه / لا قاعد .. لكن انا منمشى لحوش عمى عبدالكريم منكلم امى نشوف شن صار فى خوى سيف
-امباركه / باهى بري وسلميلى عليها
-صفيه / حاضر ..

طلعت خدت جلابيتها من المعلاق ..ولبستها ولبست حجابها
ومشت لدار النوم .. فتحت الباب لقت نادر كيف واقف بيطلع
-صفيه / اهو منمشى باهى
-نادر / متعطليش باهى
-صفيه / حاضر …
-نادر/ بينا وبينهم حوش راهو
-صفيه / ايه زابطه

ومشت للباب طلعت .. فاتت الحوش اللى جنبهم .. وطقت على باب حوش عبدالكريم .. فتحتلها ناديه …رحبت بيها وهيا تسلم وتبوس .. لدرجه ان صفيه قعدت حايرة .. وناديه بين عيونها احمد .. خاطر عرفت انه خو نادر .. وتبى تربط العلاقات …
خشت ناديه تنادى/ يااام.. يام هادى صفيه
-سعاد / اهلين صفيه شن حالك .. مرحبتين بيك نورتينا
-صفيه خجلانه/ خشيت عليكم بالخير انشاءالله ..
-سعاد/ الخير فوجهك انشاءالله …تفضلى مرحبتين بيك
-صفيه / والله مانقدر نعطل على امى وبندير العشى..غير انشغلت على امى قلت نتصل بيها من عندكم نسأل على خوى سيف
-سعاد / لا مستعجلة لا شى …والله بوى يسمع بيك جيتى وطلعتى بلا عشى لما يعاركنى
-صفيه مبتسمه / والله نجى مرة ثانيه انا ونادر وامى ..غير توة مستعجلة..
-سعاد/ عالاقل طويسه عصير ..وبعتالى اتصلى ..تفضلى للدار اصلا التليفون فيها
وتلفت لى ناديه / نادى هيفا تسلم على صفيه
-ناديه / هيفا كيف طلعت من الدوش تجفف فى شعرها ..
-سعاد / تفضلى يا صفيه .. هاتى العصير يا ناديه
خشت صفيه قعمزت شوى ماخدت خاطر .. شربت العصير..
وطلعت هيفا من الدار .. ماشافتش صفيه عندهم .. . مشت للصالة .. وشرين التليفون خشت للمربوعه ردت …وانفصلت المكالمه مازبطتش شكون

وفى الدار…
-صفيه / هوا هداكه ..خلى نتصل ونروح
-نادية / اتفضلى اهو جنبك التليفون ..
ووقفت / نستادنك انا …خودى راحتك
ناضت طلعت …شرين تشريينه وحدة وسكت ..هيفا ردت طول من المربوعه وهما مايدروش عليها
-سعاد/شكلها تشريينه وفصلت .. اتصلى يا صفيه ..خودى راحتك
ووقفت بتطلع …
-صفيه / خليك ابلة سعاد ..ماهناك عليك اسرار بننشد على خوى بس انا
-سعاد / لا لا خلى نشوف المطبخ وخودى انتى راحتك ..ربي يحفظك بنيتى ….
وطلعت من الدار
قامت صفيه التليفون بتتصل .. ولقيت شخصين يتكلمو فالتليفون … سمعت الكلام اللى يقولو فيه ونصدمت
-هيفا تتكلم فالتليفون / طبعا نفدت اللى اتفقنا عليه تحسابنى ساهلة امالا
-صفيه / ??
-هيفا / …….

________________________________________

تمت … ويتبع

زعما صفيه شن سمعت … نكملو الحلقه الجايه

المهم ستاحشتكم مصايب قلبي …وربي يبعد علينا صغار الحرام ??

نحبكككككم ❤