رواية ولد راجل امي
#ولد_راجل_امى
بقلم زهور جمال الدين ?
?الحلقه الحاديه عشر?
–
فى حوش عبدالجبار
عبدالجبار متكى فسريره ويفكر / توة البنت اتزوجت وانسترت علاش انت شادها فى جرتها…
قعد ساكت ويشبح للسقف … ويتخايل فيها كيف توتى فالطور فالمطبخ … وبعدين تتلاشى من عينه الصورة …
تلفت للحيط ويخمم/ انت حتى ملامحها نسيتها …تكدب على روحك ولا على منو .. تى هما كلهم ثلاث ايام اللى قعدتهم معاك ليش تقلبلها فحياتها
رجع تلفت على ضهره / مرات الانسان تحبه من نضرة بس فمابلك بشخص قعد معاك ثلاثه ايام ….وماكانوش اى ايام .. بل كانو اجمل ايام …..كان مش من امها بنت الحرام اللى دارت سحر وفرقت بيناتنا
قعمز عالسرير ووجهه مقلوب / تى والله ما مخليهاله يتهنى بيها ..هادى مرتى انا … وعارفها خداته لانها ماتدريش عليا نبى نردها …
سكت يتخايل فيها لما لبست نقاب وطلعتله وتلز فيه ..
يخمم/ مرات حتى هوا حالف عليها بالطلاق .. لا مستحيل .. وليش مستحيل انا الاول كنت اندير فيها ونحلف بالطلاق
ضحك وهوا فرحان وسعيد/ صح صح .. هوا هدا الراى ..
اكيدة حالف عليها بالطلاق ماتورينيش وجهها ….كنهدا ما ماتلبسش خمار ولا يخطر عليها …
اتكى عالمخدة وهوا فرحان / والحمدلله ربي جابلى هالبنيه تساعدنى … بيش كل شى يرجع لاصله
________________________________________
–
فى حوش نادر
فى دار النوم متكى نادر على ضهره عالسرير منغير تيشرت.. وصفيه راقدة على صدره وهوا يلعب بشعرها
-نادر/ انا اليوم بس انولدت وحياتى بدت
-صفيه / نحبك
-تلفتلها قام وجهها وباسها على شفايفها / نموووت فيك
-حضناته وحشت راسها فى صدره / ياااربي هاللحظه ما تم
-نادر مبتسم/لا نبيها اتم..وتجى لحظات وايام احلى منها بينا
-قامت راسها تشبحله/رد بالك تتخلى عليا يوم..رانى انضيع
– حط ايده فى خصلات شعرها/بعد مالقيتك وعجبتينى ولقيت انك الانسانه اللى تسعدنى..معش تحلمى انك اضيعى منى .. انسى حياتك اللى فاتت كلها .. خلى داكرتك تبدا من حوشى انا بس
-ضماته ليها / محلااااك ومحلى كلامك ❤
-قام راسها /اشبحيلى
-واطت راسها / منقدر انتحشم
-نادر/ احلى حاجه فيك خجلك .. لكن اسمعى بنبدو نباتو فى دارنا من الليله راهو
-صفيه مبتسمه / حاضر
-نادر/ يحضرلك الخير يا قمر ….
وبدو يسمعو فى صوت امه تنادى/ صوفيه …ياصوفيه
-ناضت بسرعه وخدت الحاف حطاته قدام جسمها / امى تنادى ..عطينى حوايجى
-حط يده عاللحاف يجبد فيه ويضحك / حوليه
-جبداته /خلى اللحاف تحشم ?.. اللى يشوفك يقول صلاى وعاقل … مايحسابكش شويطين هكى
-نادر/ قصدك اللى يصلى ممنوع عليه يتشيطن مع مرته ?
-صفيه بدلع ومادة يدها /غير ياسرك و اعطينى حوايجى فى جنبك عااد
-حط يدها على خده / بوسينى هنايا قبل
نزلت عليه بتبوسه على خده جبدها ورقدها فوقه
-نادر/ تحسابى هروبك منى ساهل ?.. معش تحلمى
-صفيه / تى حول امى تنادى ?
ومدت يدها وخدت حوايجها ونزلت على الارض اتقت بحاشيه السرير وقعدت تلبس فيهم …
وطلعت تجرى لدار عمتها.. وهوا يضحك وسعيد بيها
_______________________________________
–
فى حوش ساسى …
-نعيمه / ربحت يا وخى.. باهى مشيتلها .. والله الايام اللى فاتو مايعلم بحالى غير ربي .. كيف البنت بتطلق مرة ثانيه وتروحلنا ..شن بتقول علينا الناس
-ساسى/ ماهو كله من ولد الحرام راجلها الاول خداها منى بتزلبيحه .. كنهدا انا تتوقعى اناسب العيلة الحرفه هادى
-نعيمه / خداها بتزلبيحه !؟..كيف
-ساسى/ ولد الحرام قالى لاعب بيها وهما صغار وفالاخير.. طلعت بنتى صافيه ومافيها شى
-نعيمه / معقولة!!… وبالك حق كلامه غير ماصارلها شى وقتها
-تلفتلها وهوا حامق/ يعنى اللى نقوله انا لازم تعانديه انتى
-نعيمه/ لاااا حاشانى .. والله الا زى ماقلت لابدة هوا اللى كادب .. ولد هاديكا العيلة نفس اخلاقهم
” طول غيرت اقوالها ?”
-ساسى/ حفيظ وين
-نعيمه / طالع مزرد مع جماعته
-ساسى/ وقت زرادى توة …ماهو قلتله يمشى مع خوه الخطرة هادى يتعلم زيه
-نعيمه / الحق ولا ولد عمه .. حفيظ يبي يكمل قرايته ..و
-قص عليها / ضمى فمك .. انا نعرف مصلحة صغارى
..المدرسه شن بديرله ..كانا كثرت 300 دينار معاش .. لكن الطانطا الخطرة اللى ماوخدمش فيها تجيب الف جنيه
-نعيمه / تى ماهو …
-ساسى/ انتى مش دخلك فصغارى .. سوا اللى منك ولا من مراة ثانيه …كلهم صغارى وانا نعرف مصلحتهم ..شوفى علاء بادى يبنى شهريته اقل شى اربعه لاف دينار
-نعيمه / نقولك الحق
-ساسى/ قولى
-نعيمه / الناس اتقولى بطل صغاره من نساوينه الثانيات وصغارك انتى قاعدين يقرو ..حتى اختك نبيله …
-قص عليها / نعم نعم ..بالك عاملة على ولدك مش حيخدم على خوته .. ولا الدكورة الثلاثه كل واحد منشيرله سيارة كبيرة ويخدم على راسه …
-نعيمه / انا قصدى …
-ساسى / خلاص عاد انهيلنا الموضوع وصبى الشاهى
-نعيمه/ باهى
______________________________________
–
–
فى حوش نادر
طلعت صفيه تجرى مشت لعمتها فتحت الباب
-صفيه / تنادى عليا يااام
-امباركه / شن بديري غدانا
-صفيه واقفه جنب الباب/ مزال ماطيبتش
-امباركه / حسه عندى قداد .. كان اديرنا دشيشه جاريه
…. تغرفى اطيبيها ولا لا
-صفيه ضحكت / طبعا نعرف انطيبها .. خلاص بادن الله نديرها غدى توة
-امباركه / خشى خيرك واقفه غادى
-صفيه تحشمت خافتها تشم عليها اى ريحه/تو نجى …خلى نمشى نحط الغدى عالنار.. ومنخش اندوش حسنى عارقه شوى
-امباركه زى اللى حست /نادر وينه امالا
-صفيه تلخبطت / نادر راقد برة
-امباركه / باهى خودى راحتك بنيتى
وطلعت صفيه وهيا متحشمه تقولى دايرة عملة …
مشت لدار نومها فتحت الباب لقت نادر متكى ويدخن
خدت التيشرت متعه حدفتهوله وهيا تضحك
-صفيه / نوض البس حوايجك امى تسأل عليك
-مد يده / تعالى
-صفيه / حبيبيىىىى
-نادر/ متخافيش تعالى …
مشت قعمزت عالسرير مقابلاته …شبحلها … نفث الدخان فى وجهها … غمضت عيونها ضحكت …
-نادر/ هكى تهبلينى تجيبينا الشبهه عالصبح ?
-صفيه/ انت مجنون ومعش صبرت
-نادر/ هوا اللى يشوفك مزال يصبر
-صفيه /??
-نادر/ الليله منرقدو هنايا باهى
-صفيه? / ترقد امى وبعتالى نجيك
-اتكى عالمخدة/ زى الخنابه
-صفيه / لااا مش هكى.. لكن فالبدايه تعودت نرقد مع امك .. مش عارفه كيف منطلع ونخليها حشمه
-نادر/ لا مش حشمه .. هدا الوضع الصحيح ..
وقفت بتطلع /هيا سقد ونوض ..
-نادر/ حاضر
وطلعت مشت بسرعه للدوش …وطلعت حطت الغدى وخش هوا بعدها
______________________________________
–
فى حوش خيريه …
غادة واقفه قدام باب دارهم …
-غادة/ تى هيا نوضى راقبيلى يا بلوة بنتصل توة
-رانيه شادة مجلة تتفرج عليها / امك وين
-غادة/امى فالدوش .. هيا تعالى الولد ايراجى فيا
-رانيه / وخوتك وين
-غادة / يرزينى فيك خوتك مهناش نوضى اوقفيلى كانا جى واحد منهم ديريلى اشارة
-رانيه / تى باهى الهم الاحرف
-امال متكيه فسريرها/ تنفعى تكونى روايه اسمها الحب المستحيل
-غادة/ اللى عند ربي مش بعيد .. غير نوضى يا رانيه شيطيلى ريقى الله يشيط ريقك
-حطت المجلة/ اهو نضت ?
-غادة/ اهو طلعت الحقينى
وطلعت بسرعه مشت لطاولة التليفون … حطت كرسى فى جنبها وقعمزت قامت التليفون واتصلت
ورانيه قعدت مقعمزة فالصالة مقابله الحمام والباب الرئيسى تراقبلها
-غادة/ الو
-سعيد/واخيرا سمعت صوتك حبيبتى..من الصبح وانا نراجى
-غادة?/ هوا هداكه حبيبى ..امى من بكرى فالصالة ناضت توة بس ..
-سعيد / المهم انا ستاحشتك هلبا .. ومعش قادر تكونى بعيدة عليا اكثر من هكى .. من يوم اللى فتحتيلى الباب السنه اللى فاتت قلت هيا هادى مرتى
-غادة / المطبات قدامنا هلبا … كان مش بوى خوتى .. وكان مش خوتى السكنه
-سعيد/ قلتلك مانقدرش نخلى جدى فالحوش وننتقل طرابلس ونخليه .. على قد ما اقنعته يبيش ينتقل
-غادة/ باهى كيف يصير
-سعيد/ مبدئيا نسكنو غادى نساير جدى .. وبعتالى ساهل
-غادة/ باهى مبدئيا نسكنو غادى.. لكن بعدها مش تقولى لا منحولوش
-سعيد / انا اللى يسعدك انتى نديره .. انا عشت وحيد ويتيم
مانبى منك شى غير تحبينى تهنينى وتحنى عليا وتسعدينى
-غادة/ كانا عالحب مافيش فالقلب غيرك .. وكانا عالسعادة انت اللى بتعيشنا فيها بحنيتك
-سعيد/ نبيك تجيبيلى عشرين عيل
-غادة/ امالا ارنب?
جت رانيه تجرى / صوت سيارة احمد ايدرس قدام الباب
-غادة / باى باى …
وصكرت التليفون وقاماته مرة ثانيه وضربت ارقام عشوائي بيش مايقعدش رقم سعيد اخر رقم ومشو يجرو لدارهم
______________________________________
–
فالليل ….
سخنت صفيه عقاب الدشيشه لعمتها تعشت بيها .. ودارت لى نادر سندوتش حاطاته قدامه …
وهوا متكى على فراش ومقابل التلفزيون ويتفرج وواضح عليه انه متعصب …
كل مشاعره متحركه من العشيه..رغبة اى عريس ليلة دخلته
كانت فى نفس اليوم..حتى الحوش مطلعش منه..هيا حاسه براجلها .. ونفس الوقت حاسه بالاحراج من العزوز …كيف بتخليها فايقه وبتمشى معاه للدار فالعشيه ..
الراجل فالموضوع هدا مايقدرش حد … يشعر انه لما يبي المفروض المراة تلبى طول.. لكن اللى عايشه مع العيلة صعب تخش لدارها غير مالعشيه للعشيه ..
قامت صفيه الصفرة وطلعت وهوا يشبحلها بعتاب…
-امباركه / خيرك يا وليدى
-تلفتلها / لا لا مافى شى ياام ..عادى اهو نتفرج
-امباركه/ كول عشاك
-نادر/ والله ماخاطرى يااام
خشت صفيه جايبه طاسه شاهى عطتها لعمتها ….
-امباركه / جبتيها فى وقتها راسى يوجع فيا هلبا
-صفيه / علاش اللطف …خيرك ياام
-امباركه / الليل كله مانرقدش يابنيتى
-صفيه / علاش …
-امباركه / قالقه …منكدبش عليك كان رقد معاى حد فى دارى هكى نقعد …مايجينيش النوم
-صفيه / مفهمتكش يااام …قصدى عليا انا !!
-امباركه / عاد مش تتغششى .. اهو يحكيلك حتى نادر.. كانا رقد معاى حد فى دارى تلقينى للصبح انفص
-صفيه / اهاا
-امباركه / سلم بنتى مسامحاتك من النومه جنبى .. ارقدى فى دارك عالاقل ايجينى النوم فالليل
نادر تلفت للتلفزيون داس ضحكته …زبط ان امه فهماته
-صفيه وجعها خاطرها / والله ماندرى عليك ماترقدديش يااام كنهدا راهو رقدت حتى فالصالة
-امباركه / كيف ترقدى فالصالة واحنا دايريلك دار…ارقدى فى دارك من الليله …وانشاءالله تسامحينى فى تعبك
-صفيه / ماهناك تعب… براحتك
-امباركه / غطينى وطفى عليا الضى والباب
-صفيه / باهى
وقف نادرمشى لامه وباسها على راسها / تبى حاجه يااام
-امباركه / نبى سلامتك يا وليدى
طلع نادر وهوا سعيد??.. وغطت صفيه عمتها وهيا واجعها خاطرها وطلعت …
__________________________________________
–
فى حوش بدريه …
-بدريه تعيط/ ووووه مافيك من تنقريز نفختلى راسى بكلامك …يا يجينا نراجو الاسبوع الجاى يفضى سعيد خوى يجينا …يا يرفعنا احمد ولدك
-عمران / خلاص امالا تحسابينى بديت شيبانى .. اقسم بالله نسوق من هنايا لتونس العاصمه ماعندى مشكلة
-بدريه / غير اسكت علينا .. اما لما مشينا العام اللى فات لحوش جدى قريب ودرتنى انا وصغارى
-عمران / هما بهايم مخليين الفتحه فالطريق منغير غلاق طاحت فيها العجلة
-بدريه / الناس كلها ما طاحتش فيها .. غير انت بس اللى عيونك عمى
-عمران / شن قلتى
-بدريه /قتلك بتكلم ولدك ولا شن درت …
مشى للتليفون الارضى ويتمتم/ والله ماتتحشمى …
قام التليفون واتصل برقم حوشه الثانى ونادى احمد وقاله يرفعهم بدريه تبى بنتها …مالاول رفض وبعد نقاش بينهم وافق انه يرفعهم … شرط عليهم يا اما يتغدو ويطلعو اويخليهم ويروح مايقعدش ايراجى فيهم …
وفرح عمران المراهق فرحة قوية.. كيف عاد بيمشى بيشوف صفيه …اللى حتى فى وضعها الجديد تكون مرته..
-عمران / خلاص اهو احمدبيرفعنا .. كلميها قوليلها
-بدريه/ مانعرفلهاش رقم نكلمها عليه الحق
-عمران / كلمى ولدك حفيظ يقوللها.. ولا قولى لخوك سعيد يعرف كيف يوصل فيها
-بدريه/ زعما كان مشينالها بلا موعد بتلزنا
-عمران / على كيفك..غير نوضى بكرى الصبح ووتى صغارك
طلع ولدهم سيف وفكرهم ان غدوة عنده مبارة مع جماعه الشارع بيلعبو مع جماعه شارع الحى الثانى ..
وبعد نقاش وافقت بدريه انه يقعد فى حوش سالم جارهم
-عمران / يعنى خوته فالحوش اللى لاصق فينا ونخليه عند جارى
-بدريه / والله هدا الموجود .. انا نطمن لسهام جارتى اكثر من بناتك العقارب
________________________________________
–
طلعت صفيه من دار عمتها وهيا واجعها خاطرها …
خشت للمطبخ بتغسل الماعين ….خش وراها نادر زبطها زعلانه وخاطرها واجعها .. وقف وراها وحضنها
-نادر/ خ يرها حبيبتى
-صوتها مغصوص/ لا لا مافى شى
-نادر/ زعلتى من امى
-صفيه/ لا لا وعلاش منزعل
-نادر يضحك/ عينى فعينك
-صفيه / نادر خلاص عااااد
-قرب من ودنها ويبوس فيها / محلاه اسمى من فمك …
تغسل فالماعين ..غاصه عبرتها وساكته ..
-نادر/ هما ماعونين وقاعدة فيهم ساعه … خلاص اغسلى ايديك
-صفيه / نمصمص الصفرة بس اهو كملت ….
مصمصت الصفرة … وطلعت هيا وياه للصاله …فى صالون عالجنب …قعمز عالكنبه وخداها من يدها وقعمزها فى حضنه / خيرك
لفت اي ديها الزوز حوالين رقبته وساكته
-نادر/ زعلانه من امى …
حضناته اكثر وساكته …
-نادر/ سبحان الله العيبه ماتطلعش من فمك …
بعدها ويشبحلها / امى عرفتنى تعبان ونبى مرتى?.. هدا علاش قالتلك اضايقت منك … عارفه انك مستحيل تسيبيها
ولدلك قالت انطلعها بالسيف عليها
-صفيه/ حيه عليا عالحشمه كانا كلامك حق?
-نادر/ كلامى حق وميه فالميه …
ضمها ليه / امى حست بحبي ليك …وحست انى معش قادر نفارقك ….
بعدها وشبحلها / انتى ملاك .. انتى انسانه مش عاديه.. امى تغيرت بعد ما انتى جيتى …بدت تتكلم زى المراة الرزينه والمتزنه
-صفيه / الحمد لله …
حطت يدها على خدوده/ بتطلع لجماعه الشارع
-نادر يضحك/ ساعه بس ونخش
-قربت منه باساته ع شفايفه/ منستاحشك
-نادر/ ماشالله وبدينا جريئين ونبوسو وحالة
-حضناته ودست وجهها فى صدره / نااادر…خلاص عاد تعرفنى نتحشم
-نادر يضحك/ وانا شن جدبنى ليك غير ادبك وحشمتك …
وقفو الزوز … وصلاته للباب تسقد فيه …
قرب منها وباسها من شفايفها/مش حنعطل
-صفيه فرحانه بيه / باهى …
طلع وصكرت الباب …وخشت لدار نومها ….حولت حوايجها قعدت فى ملابس داخليه قطعتين وطلعت روبها الموف
..شلفاته معجبهاش … مشت للشكماجه فتحت القجورة ادور فى روبها الوردى …
فتح نادر باب الدار/ نسيت دخانى …
شافاته وهيا هكى انخلعت مشت تجرى لفردة الدولاب الوسطيه فتحت واتقت وراها/ انت جيت …
-نادر فرحان / عندى نصيب نشوف هالجمال والمفاتن
صكر باب الدار / اطلعى …
-صفيه تضحك / لا مش طالعه..اطلع انت نغير وبعتالى تعالة
-نادر ماشيلها بالشوى/ بتطلعى ولا نطلعك انا ?
مشى للباب فتحه .. هربت تجرى للسرير خدت اللحاف …. ونقزت من الجيهه الثانيه وحاطه اللحاف قدامها / اطلع
-دار من ورا السرير وحول تيشيرته وحدفه / تعالى خيرك نهايتك بايته فى حضنى
-صفيه/ قصدك تقنع فيا ?
-نادر / لا نقولك فالواقع ?
وصلها ونزل اللحاف وقامها بين ايديه ورفعها للسرير …
رقدها ورقد جنبها ..
حط ايدها على ملابسها الداخليه/ حتى هادو مش لازمات …
انتى منغيرهم احلى …
وعاشو مع بعضهم ليله حلوة
_______________________________________
–
ثانى يوم فاقو بكرى …
دوشت وحضرت الفطور … وهوا نفس الشى وخش دار امه
لقاهم يفطرو .. قعمز فطر معاهم فى نفس الصفرة
-امباركه / كان نطلعو يا وليدى نشمو هوا ربي حتى شوية ونروحو
-نادر فرح / هدا اليوم الباهى يااام …الحمدلله اللى بديتى تبى توسعى خاطرك وتطلعى وتشوفى الناس
-امباركه / ماهو بديت انخمم فى حاجه بتنورعليا حياتى وبترفع الغمه اللى انا ليها
-نادر/ شنهيا يااام!!
-امباركه / صغارك يا وليدى ..نراجى فيهم بالساعه والدقيقه
صفيه تحشمت …
-ادر/ انشاءالله يااام
وتلفت لصفيه / تمشى
-صفيه / عادى ..هيا ..
-نادر/ حطينا براد شاهى وسكر وحشيشه وقهوة بس ..كله تو ناخدوه من الطريق
-صفيه/باهى …
وبالفعل وتو ارواحهم ووتو بضاعتهم … وطلع نادر ولع السيارة … لقى عمه عبدالكريم برة خبره انه بيزرد بالعويلة ماينشغلش عليهم كانا عطلو
-عبدالكريم / الحمدليك ياااربي.. معقولة امك بتزرد معاك .. الحمد لله اللى خلى حالها يتساوى
-نادر/ من اللى جتها صفيه وهيا احوالها عال العال
-عبدالكريم / هيا البنت شكلها بنت اصل ومفصل.. ربي يباركلها فى عمرها
-نادر / الحمدلله ….لكن راهو مرة ثانيه بنزردو مع بعضنا
-عبدالكريم / انت الطلعه هادى ديرها زى التجربه كان لقيت الامور تمام نمشو مرة ثانيه مع بعضنا بادن الله
ومشى طلع امه من الحوش بالشويا ركبها من قدام …وصفيه ركبت من الخلف… وركب قفه فالكوفينو ..وعبدالكريم واقف يسقد فيهم ….
هما مشو … وبعد نص ساعه درس احمد سيارته قدام حوش خوه نادر
____________________________________________
–
فالطريق فات شري دجاجه محمرة وفواكه وباكوات بيتزا ومشاريب …ومشو للشجر زى البوسكو زردو فيه …
ولعو النار وحطو براد الشاهى ايطيبو فيه …
قريب ساعه ونص وهما مزردين ويهدرزو ويضحكو …عمتك امباركه مرة تعجبهم وتهدرز ومرة يحسو امها تنتكس .. طلعو الدجاجه والبيتسا والمشاريب تغدوهم
وفجأة صفيه مادة يدها اليمين و تلدغها عقرب.. نادر شافها قتلها وركب امه ومرته وطار بيهم للمستشفى العام فالمنطقه
.. دارولها اللازم وعطوها الامصال ولفولها يدها كلهاااا بالشاش حفاضا عليها من التلوث
اما فى حوش عبدالكريم …
من لما شاف عمران زبطه طول …كيف عاد كان عديله زمان ..قاله ان نادر ماشى يزرد .. وعلى قد ما شد احمد انهم ايروحو شى حلف عليهم عبدالكريم بعد وصلتو لازم تتغدو ..
وبالفعل خشو للحوش.. بالصدفه كان يوم خميس عبدالكريم كناينه عند اهلهم وولاده الثلاثه مهناش منهم حد .. ستر ربي بنته سعاد جايه زايرة الاسبوع هدا دارتلهم الغدى
دخلت بدريه لداخل وسايرتها هيا وبناويتها …
اما هيفا طول اتصلت بي عبدالجبار لانه عاطيها حتى رقمه الارضى فالجامعه .. وحطاته فالصورة ان اهله هنايا …وانها مفكرة فى خطه ولما عرضتها عليه عجباته وقاللها نفدى طول …
دارو شاهى …
-سعاد/ هيفا ارفعى الشاهى لجدك
-هيفا بالها مشغول/ مانيش ماشيه يااام
-ناديه / مصح وجهك يعنى نمشى انا الاكبر منك
وخدت الصفرة ومشت بيها للمربوعه …
-نادية / جدى… يا جدى
فالمربوعه ..عبدالكريم/ ترا ولدى احمد ولا تصغر جيب الصفرة
-احمد/ باهى
وقف مشى للباب .. يلاقى ناديه واقفه وفى يدها صفرة
-احمد?/ مساء الخير
-ناديه / مساء الخيرات …
ومدتله الصفرة خداها وهيا تضحك لانها جريئة شوى
خش احمد مبتسم البنت عجباته …
عشرة دقايق وطلع فالباب/ يا عيله الحاج يبي اميه
جت ناديه/ اهو تو نجيبله?
-احمد / باهى ….
وهيفا تخمم وترعش فالكوجينه زعما اديرها والا لا …
بعد ماتغدو طلعو للسيارة ..يسقد فيهم عبدالكريم
-عمران/ مفيش نصيب نشوفوهم اليوم
وقفت سيارة نادر .. ونزلت صفيه شبه دايخه .. ونزل نادر امه .. جتهم طول بدريه تسلم ووراها عمران واحمد ..وخشو للحوش …هما وعبدالكريم …
وسعاد والبنات ماسمعوش ان صفيه لدغتها عقرب يحسابوها روحت وخلاص
خشت بدريه تسلم وتبوس … وصفيه ترعش من نضرات عمران ليها .. حتى سلامه عليها سخيف وقعد يلمس فى يدها بالرغم سلمت عليهم باليسار .. وسلمت على احمد عادى جدا هيا حتى من زمان مش هاديكه العلاقه والمعرفه
قعمزت بدريه وبنتها فى دار امباركه والرجالة فى الصالة
-عمران / ماتكلمونيش انا عالرقاد هنايا ..احمد هوا اللى شاد فالمرواحه
-احمد/ لا كان بتباتو براحتكم …ونوليلكم غدوة
-نادر/ حتى انت مانطلقكش توة فى عالمغاريب …باتو الليله والصباح رباح
-مهند/ ايه خلى نباتو يابابا مش قلتلى راجل صفيه خوكم
-نادر/ تعالة يابطل
________________________________________
–
بعد عشرة دقايق ….
شرين تليفون حوش عبدالكريم … ردت هيا …لقاته عبدالجبار يتصل
-عبدالجبار/ بري لبوى بسرعه قوليله سيف ولده تعاركو فالمبارة الاولاد مع بعضهم وجاته رشاده على جبهته
-هيفا/ غير بالشوى خلى نفهم
-عبدالجبار/ بدريه اللى مشتلكم ولدها انضرب قوليلهم ايروحو توة
-هيفا/ واللى اتفقنا عليه انديره
-عبدالجبار/ دبرى راسك
وصكرو الخط … وخشت دار اللى ترقد فيها هيا وامها واختها فتحت شنطت اليد متاعها ترا شن خدت منها وطلعت تجرى …
مشت لحوش نادر قعدت اطق .. طلع نادر
-هيفا / العيلة اللى كانو عندنا ولدهم ايقولوله سيف انضرب وهوا يتعارك فى مبارة
–نادر/ متاكدة
-هيفا / ايه متاكدة …
تلفت نادر بيخش
-هيفا/ اسمع
-تلفتلها / نعم
-هيفا/ عندهم ساكو صغير فيه حوايج الفرخ بالله جيبهولى منغير ماتقوللهم .. مالقيتش ستين دينار وساعتى شاكه فالفرخ خداهم
-نادر/ مصح وجهك
-هيفا / ياسيدى جيبه بيش ايكدب الله قوالى
-نادر/ راجى هنايا الولد لداخل برانى عليك ماتخشيش
-هيفا?/ حاضر يانور عيونى
-نادر/ ??
خش نادر وخبر بوه بالموضوع وبوه خبر امه وصارت خيضه بينهم …اللى يشد واللى يقول والله مانقدر لازم انروحو ..
وبدريه صاير فيها يا نارى .
شاف نادر الساكو اللى تحكى عليه هيفا خداه وطلعهولها قبل ما يطلع بوه ومرته
-نادر/ اهو الساكو بيش ايكدب الله قوالك
-هيفا / هات
فتحاته وبدت تفتش .. وطلعت من كمها ورقه وحشتها فى وسط الساكو
-نادر/ تى هيا بسرعه مبردك بوى بيطلع
طلعت هيفا الورقه / هادى شنو الرساله …
خطفها منها نادر…لقاها مكتوب عليها من برة “من صفيه الى عبدالجبار”
شاف الكلام المكتوب رعش مع بعضه ودس الورقه فى جيبه
-هيفا / ورقه شنو هادى
-نادر/ انتى مادخلكش .. روحى فيسع بوى بيطلع
مشت هيفا تجرى وهيا قريب اطير من الفرحه .. انها حطت الورقه فى الساكو منغير مايلاحظها وانها سبكت اللعبه
طلع عمران وبدريه …وطلعت صفيه ونادر ايسقدو فيهم
-صفيه / انشالله لاباس عليه يااام ..تو نلحقكم نسأل عليه
-بدريه/ لا تلحقينى ولا تعبى روحك …ضرفك واعر تعانى فعزوز انا والله مانى لايمه عليك
وطلغ احمد بالسيارة روحو لحوشهم ..
وخشو صفيه ونادر للحوش تسمع فى عمتها تنادى/يا صوفية
مشتلها صفيه تشبح فيها شن تبى …
وقعد نادر فالصالة مقعمز عالصالون …طلع الورقه وقراها
لقى صفيه تشكى فيها من عيشتها مع نادر وانها تبى تطلق بيش ترجعله .. وفى مضمون الرسالة انها تسأل فيه لو اطلقت يرخى بيها والا لا
نادر حمق ووجهه بدى اسود …لكن مش من غضبه من صفيه لاااا.. لانه حس ان فى حد يلعب فى لعبه يبي يشبك بين نادر وصفيه
ويخمن/ صفيه اصلا ماتعرفش ان امها جايه بيش تجهزلها الرساله مسبقا … ولو كانت جهزتها اليوم بيش بتكتبها بيدها الملدوغه ولا بيش ….
مافاتتش عليه …وزبط ان هيفا بدت تلعب…لكن مع منو مش معروف …
طلعت صفيه من دار عمتها مشت لنادر قعمزت فى حجره وحطت راسها على صدره/ خيره حبيبي مش معدل عليا
-قام يدها وباسها/ ريتها فيا ولا فيك يا عمرى ..
وحضنها وقعدو ساكتين …بس هوا يخمم هل يكشف لعبتها ويمشى يعطيها كفين… ولا يلعب معاهم ويرقصهم ويدير روحه عبيط مش فاهم
________________________________________
تمت …. ويتبع
الاحداث بدت تتغير .. تابعو معانا واعطونا توقعاتكم ?
نحبككككم