رواية ولد راجل امي

#ولد_راجل_امى

بقلم زهور جمال الدين ?
?الحلقه العاشرة ?

–

مراد ولد جيرانهم خش يطلب فى غاز الشاهى من صفيه .. خداته وطلعتهوله قدام الباب .. تلاقى نادر واقف مع هيفا بنت خالته..
لما شبحتلهم جت عينها فى عين نادر … هوا شافها مشالها يجرى وخلى هيفا تتكلم…
خلت صفيه الباب مفتوح وخشت تجرى للحوش مشت لدار نومها اللى ماتخشلهاش الا لما بتاخد حوايجها وصكرت بابها …وقعدت تبكى
لقى نادر الباب مفتوح خش للحوش ايدور فى صفيه ..
خش لدار امه .. لقى امه راقدة والدار فاضيه .. مش للحمام فتحه لقاه فاضى … مشى لدار النوم يفتح فيها لقاها مصكرة
-نادر/ صفيه …افتحى
صفيه ساكته
نادر يحرك فى المقبض بسرعه/ صفيه.. صفيه انتى هنايا
-صفيه صوتها باكى/ ايه هنايا شوية بس نغير فحوايجى
-نادر/ قلتلك افتحى توة
-جت للباب/ قلتلك نبدل فحوايجى خيرك
-نادر/ بتفتحى ولا نكصر الباب
-صفيه / مانبيش فاتحه باهيوو.. برة لبنت خالتك كمل هدرزتك
-نادر/ اقسم بالله عندك دقيقه .. كان ماتفتحى الباب الامانكصره
-صفيه / انلاااا مش فاتحه ..واقف انت وياها فالشارع وتهدرز ماحاسب حد
-نادر مغمض عيونه ومهدى نفسه / افتحى امى تنادى فيك
-صفيه / ماتناديش فيا … ومانيش فاتحه

انفتح باب الحوش / السلام عليكم
-نادر مستغرب/ عمى ساسى …اهلين تفضل
-ساسى / لقيت الباب مفتوح …خشيت
-نادر/ مرحبتين بيك عمى تفضل
-صفيه سمعت صوته من ورا الباب / بوى?

_______________________________________

–

هيفا قعدت واقفه فالشارع بروحها… حايرة شنو اللى خلاه مشى يجرى للحوش.. لانها ماشافتش صفيه فالباب..نادر بس شافها ….وحايرة هيا كيف باديه تسلم عليه مشى طول وسيبها ..
تبى تلحقه لحوشهم لكن ماقدرتش .. لانها تشوف فى شيبانى كبير خش عندهم …مشت روحت لحوش جدها …لقت خالها خالد مقعمز فى الصالة مع جدها …حمدت ربي لانه لو شافها واقفه فالشارع على نادر راهو عطاها طريحه
-هيفا/ السلام عليكم
-جدها وخالها / وعليكم السلام
-خالد / وين كنتى
-هيفا? / بعتتنى امى للمحل
-خالد / وين الحاجات اللى شريتيهالها …ماشايف فى يدك شى
-هيفا?/ الحاجات اللى تبيهم امى ماهناش فالمحل

وخشت للدار اللى فيها اختها ناديه
-ناديه / وين كنتى غبر فيك خالك من بكرى يسأل عليك
-هيفا / وعلاش يسأل عليا وهوا سبب خراب علاقتى مع نادر
-ناديه / نادر وانتى امتى درتو علاقه بيش يخربها خالى خالد
-هيفا / تى صكرى فمك وانتى ديما واقفه ضدى .. انا خلاص كنت بنجيب رجله للطريق لولا تدخل خالك
-ناديه / اختى كونى واقعيه متخليش الشيطان يصورلك امور ثانيه .. خالك ماوقفش فطريقك انتى ونادر…بالعكس نادر هوا اللى جى حرش فيه .. وقاله شد عليا هيفا
-هيفا / باهى شن رايك انى كنت واقفه انا ونادر توة
-ناديه / وشن تبى فيه الراجل تزوج ومشى على حاله
-هيفا / ومنقالك انى زعلانه انه تزوج …بالعكس هادى فيها مصلحه ليا
-ناديه / كيف !؟
-هيفا/ اللى يقولولها صفيه تقعد مرته ..وتخدم امه ..وانا يديرلى حوش بروحى
-ناديه / احلمى …هوا ما خداك لما كان عزرى .. بياخدك توة بعد تزوج
-هيفا / باهى تعاندينى ..
-نادية / منغير مانعاندك هدا امر مفروغ منه
-هيفا/ بااااهى تو تشوفى

_________________________________________

–

فى حوش عمران …

عمران وبدريه حاطين شاهى وحلاوات بعد الضهر ويهدرزو

-عمران / هادى بنتك.. وانتى ادرى بمصلحتك معاها
-بدريه / ياسر من اللى صارلها مع ولدك اللى هنايا …مانبيش نمشيلها ونسببلها مشكلة مع ولدك الثانى
-عمران / نادر مش زى عبدالجبار…نادر هادى وامه هاديه ..
-بدرية/ امالا علاس مطلقها مدامك تشكر فيها
-عمران / تى ماهو حكيتلك عليها وعلى مرضها زمان
-بدريه / باهى غير اشرب الشاهى
-عمران / يعنى بتمشيلها والا لا
-بدريه / وانت خيرك شاد الصحيح فى مشيانا غادى ..شكله القلب حن لامه
-عمران / يا سبحان الله فى طبعك يا مراة …انا نقولك بنتك وانت تقوليلى مرتك الاولة …مفضى بالك
-بدريه / حتى كان نبى نمشيلها تو نقول لخوى سعيد يرفعنى
-عمران / يعنى تخلينى انا اللى الراجل ولدى والمراة بنتك وتمشى مع خوك
-بدريه / ياودى نفختلى راسى …باهى لما تواتينى النيه تو نقولك
-عمران / ايوووه هكى الكلام ..هاتى طاسه الشاهى
-بدريه?/ هاك

_______________________________________

–

فى حوش نادر

صفيه فتحت الباب / اهلين بوى
ولحقتهم للصالة …سلمت على بوها وباست يده
ونادر يشبحلها ماتواتطش عنه منها
-ساسى/ ربي يحفظك يا بنيتى
-صفيه / شن حال عمتى وخوتى
-ساسى/ الحمدلله فخيار الخير …
-نادر / ديرنا فطور
-ساسى / لا والله صحتين فاطر …شنو انتو لتوة مافطرتو
-نادر / الحمدلله فطرنا من بكرى …غير خلى نديرولك فطور
-ساسى/ كان بديرو طاسه شاهى عادى .. لكن فطور لا
-نادر/ امالا حطى الغدى
-ساسى/ ولا حتى الغدى…انا جاى لصاحبي قريب عليكم قلت خلى نفوت نشوفكم شنحالك

-صفيه / مدامنى شفتك يابوى حالى باهى
-امباركه تنادى من الدار/ يا صوفيه …وينك
-صفيه / شويه بس نشوف امى وتو نجى
-ساسى/ خودى راحتك …
مشت صفيه لعمتها …..
-اتكى ساسى عالمخدة / شنو اللى سمعته هدا
-نادر/ شنهوا
-ساسى/ حاق قالو عبدالجبار خوك
-نادر/ اي والله حق … جبار خوى من بوى
-ساسى/ باهى ووين المشكلة
-نادر تفاجأ/ مفهمتش
-ساسى تقاعد شبحله / ليش تبى اطلق مرتك ..لانها كانت واخدة خوك .. ووين المشكلة .. ياما من تريس واخدين نساوين خوتهم
-نادر/ هادوكا خوتهم متوفيين .. والموضوع طبيعى..لكن انا خوى حى من دون نساوين الدنيا كلها ناخد مرته
-ساسى/ اهو انت قلتها ..علاش من دون نساوين الدنيا كلها تجيك هيا …لان عندك نصيب فيها …فهمت ولا نعاودلك .. اطلقت من خوك لان انت عندك نصيب فى ماكلة تاكلها من يدها .. عندك نصيب فى شراب تشربه من يدها ..
نادر ساكت ويشبحله …مقتنع ومش مقتنع
-ساسى/ ومرات ربي كاتب وداير صغار بينك وبينها
طلعت صفيه / بوى .. امى تبى تشوفك
-نادر / نوض عمى نسلمو على امى
وناضو الزوز خشو للدار وصفيه مشت للمطبخ

_________________________________________

–

فى حوش عبدالكريم ..

-خالد / انت من حكالك … نادر ولا منو
هيفا كيف بتطلع من الدارماشيه للمطبخ لامها … سمعت اسم نادر وقفت تتصنت
-عبدالكريم / حكالى سعيد خالها …جى للجامع يومها وبلغنى
وكلمت نادر وعاركته وهوا مصر
-خالد / وبوها قالك بيجيهم اليوم
-عبدالكريم / انا اللى قلتله امشيلهم …تلاقينا امس فى سوق السيارات وقلتله نادر بيطلقها ..الحق بنتك وتعالة هدرز على نسيبك وجها لوجه
هيفا قربت اكثر من ورا الحيط الفاصل بين الصالة والدار
-خالد/ مالاك سمعه جديدة .. مرت نادر كان واخدها خوه عبدالجبار زمان
-هيفا/ ?
-خالد / نبى نفهم …خوتها وبوها لما عطوهاله ما يعرفوش انه خو عبدالجبار نسيبهم الاول
-عبدالكريم / مايندروش … والمشكله ان عبدالجبار راجلها الاول جاى يبي يردها يحسابها قاعدة …سمع انها خدت خوه وجى دارله نهار احرف قاله طلقها
-هيفا/ ?
-خالد / قصه عجيبه غريبه …لكن النصيب يحكم
ووقف / هيا نستادنك توة يابوى
مشت هيفا تجرى خشت للحمام بيش مايشوفهاش خالها
وتخمم / صار راجلها الاول خو نادر.. ويبي يردها…ياسلااام .. انا نساعده نخليها ترجعله

________________________________________

–

ساسى ونادر طلعو من دار امباركه بعد ما سلم عليها
-نادر / خلى نشوف الشاهى ..
وخش للمطبخ …لقى صفيه توتى فى الصفرة وتحط فى الحلاوات
-نادر/ نحرش بوك توة
صفيه واخدة على خاطرها تبيش تشبحله …
-قرب منها ومسك يدها / نكلم فيك
-صفيه / لو سمحت حول متكلمنيش
-نادر / وليش هدا كله لانك لقيتينى واقف على هيفا
-صفيه / انا منحاسبش فيك …البنت تبيك وسمعتها بودانى
..انت ليش ناكر ..
-نادر/ لو نبيها ماحد يقدر يمنعنى عليها الا الله
-صفيه / خلاص امشيلها
-نادر/ بلاش دلع مفرخ .. اقسم بالله وقفت قالتلى كيف حالك ومشيت وخليتها
-صفيه / ومن قالك امشى وخليها .. قعدت معاها
-نادر/ صفيه ?.. ماتجننينيش
-جابت البراد حطاته فالصفرة وقامتها / حول بوى قاعد بروحه .. خلى نرفعله الشاهى
طلعت … وطلع نادر وراها

قعمزت هدرزت على بوها …شرب الشاهى عندهم وهدرز وطلع روح

_______________________________________

–

هيفا بدى دماغها يخدم … وبدت تدكر فى الحكايات اللى كانت تنحكى قدامها على نادر واهله من جهه بوه … ومحلات بوه اللى شادهم نسيبه اسمه سعيد ومايعطوله منهم فى شى .. معش زبطت شن ادير … قعدت اتفكر .. طول خممت فى مدكرة التليفونات بالك تلاقى فيها حل ..مشت شافت الصاله لقت جدها طالع … مشت للمدكرة جابتها وفتحتها
…قعدت ادور فى حرف العين على اسم عمران او عبدالجبار مفيش.. مشت لحرف السين .. لقت 4 ارقام اسامى صحابهم سعيد ….قامت التليفون وتتصل .. واللى يرد عليها تقوله لو سمحت نبى رقم حوش عمى عمران الارضى … اللى ردو عليها فى الثلاث ارقام الاولات اللى اسمهم سعيد قالولها منو عمران مانغرفوش حد بالاسم هدا
اخر رقم رد عليها
-سعيد / الو
-هيفا/ السلام عليكم
-سعيد/ وعليكم السلام
-هيفا/ لو سمحت خوى نبى رقم حوش عمى عمران
-سعيد / عمران نسيبى
-هيفا?/ ايوووه عمران نسيبك
-سعيد / سجلى عندك …
“لا سألها انتى شكون ولا من تبى ..توقع انها تعرف واحد من البنات ولدلك عطاها رقم حوش خيريه ..ماعطاهاش رقم حوش اخته بدريه ” ?

خدت الرقم وهيا فرحانه قريب اطير … وعلى طول كتابته فى التليفون بتضربلهم
-سعاد/ هيفا … وينك
-هيفا?/ اهو هنايا فالصالة ياام
-سعاد/ تعالى قرضى معاى البصل
-هيفا/ اوووف باهى
وناضت مشت لامها فالمطبخ تتنطش
-سعاد/ فيسع ماقلقتى من حوش جدك …وجعتيلى راسى فالحوش بالتنقريز عشان الجيان لحوش جدك .. حتى بوك وخوتك قعدو بروحهم جبتكم معاى الزوز انتى واختك
-هيفا/ ومن قالك انى قالقه
-سعاد/ انا نفهم فيك …

-هيفا/ شن قصدك ياام..انى جايه هنايا على خاطر حد معين
-سعاد/انا مقلتش …انتى اللى قلتى
-هيفا / غير هاتى البصل وينه عندى مندير
-سعاد / هوينا وراك …
جابت هيفا البصل وقشراته بسرعه خرافيه … ومداته لامها بديره بصله ..وطلعت تجرى للصالة .. خدت التليفون واتصلت
برقم حوش عمران ….ردت عليها رانيه
-رانيه/ الو
-هيفا صوتها هرب / عبدالجبار موجود
-رانيه ?/ نعم
-هيفا تلخبطت / انا نشتغل معاه ونبيه فى حاجه
-رانيه / باهى شوية بس خلى اناديهولك
وحطت التليفون شوى ومشت نادت عليه …جى عبدالجبار ايرد
-عبدالجبار / الو
-هيفا/ انت عبدالجبار
-عبدالجبار/ اى نعم …من حضرتك
-هيفا / انت تبى مرتك صفيه ..وانا نبى نادر.. مفروض نتحدو ونساعدو بعضنا
-عبدالجبار/ غير بالشوى…كييييف مفهمتش

وقعدت هيفا تحكيله ان كل واحد منهم يبي شخص ولازم يحارب على خاطره
-هيفا / انفكرو فى خطه وانفدوها الزوز …انت تعاونى وانا نعاونك
-عبدالجبار/ فكرة حلوة
-هيفا / انت من غادى وانا من هنايا نوصلو فيهم ..وعلى فكرة عند ربي مش حرام لان كل واحد فينا ايدافع على حقوقه
-عبدالجبار/ باهى متفقين …كل واحد مننا ايفكر فى افكار كيف كل واحد منهم يتخلى عالثانى
-هيفا/ كون هانى مرتك حترجعلك طول .. لانها تبدا مطلقه مرتين ومعش تلقى من ياخدها ..فتضطر ترجعلك
-عبدالجبار/ انا بنردها …لكن حتى لو معش فى نصيب بينا وما رجعتليش عادى… المهم ماتقعدلاش ..انا حلفت ووالله مانى حانث لما نطلقها منها
-هيفا?/ تم ..معناها بيناتنا التليفون

_______________________________________

–

فالليل

نادر مقعمز فى شارعهم مع الجماعه ويهدرزو فالبرودة …
هما يجبدو فالمواضيع عالرياضه والسياسه ويتناقشو .. ونادر سرحان ايخمم فى كلام ساسى نسيبه اللى قالهوله الصبح
-اتكى عليه خالد ولد خالته / وين تخمم يا نادر
-نادر/ لا شى …معاكم
-خالد / حق اللى حكاهولى بوى على خوك عبدالجبار
-نادر تلقت للجهه الثانيه?
-خالد / يانادر احنا صغار الخاله .. ونعتبرو متربيين فى نفس الحوش …راهو القصه اللى صارت معاك عاديه وصارت مع هلبا ناس …يعنى مش قضيه تخرب بيتك على خاطرها
نادر حس ان كلام نسيبه نفس كلام ولد خالته …
-خالد / وبعتالى هيا ماقعدتش عنده هلبا …يادوبك ايام
-نادر يبي يفتح قلبه ويحكى/ هيا البنت والله ماعندى منقول فيها …حال امى بدى للاحسن بعد ماجتها …
وتلفت / لكن ياراجل كونها كانت عند خوى هدا شى مخلينى نبى ننهى كل شى بينى وبينها
-خالد / ومنين تضمن انك تلاقى وحدة زيها …البنت كويسه ويتيمه .. تحصل حتى اجر سترتها …متخليش ماضى بسيط يادوب ايام يقضى علي علاقتكم
-نادر / يستر الله

نادر توة طايب من كلام نسيبه وكلام ولد خالته … حس بالفعل ان الموضوع تافه … ومايستاهلش … زواجتها الاولى هوا كان راضى بيها من قبل ماياخدها … شن فرقت خوه ولا راجل ثانى
كملو تهدريزهم وخشو لحياشهم …
خش نادر وصكر الباب … ومشى لدار امه
-نادر/ مساء الخير
-صفيه مقعمزة تتفرج على التلفزيون / مساء النور
-نادر/ تعشيتو
-صفيه / من بكرى … وخليتلك عشاك فى الكوجينه
-نادر / تجيبيهولى
-صفيه / باهى …
وطلعت من جنبه وخلاته فالدار….
جابت العشى وجت لقاته مفرش فراش كأنه بيرقد عليه
-صفيه / بترقد هنايا
-نادر/ فى مانع
-حطت الصفرة / لا الحوش حوشك
-نادر/ لو تضايقى بلاش
-صفيه ?/ لا وشنو اللى بيضايقنى …
-نادر/ انا من زمان هدا مكانى جنب امى ..غير خليتك الايام اللى فاتو تاخدى راحتك
رجعت صفيه لمكانها .. وتشبح للتلفزيون ..وبطرف عينها تشبحله كيف ماحولش عيونه من عليها
-نادر / امى راقدة من بكرى
-صفيه / صلت العشى ورقدت
-حط السندوتش متفاجأ ويشبحلها / صلت … امى تصلى
-صفيه / ايه تصلى ..امك بعقلها وتفهم …صح غايبه عليها شوية ..لكن لما تحب الشخص تسمع كلامه وتنفد اللى تطلبه منها
-نادر/ امى تحبك
-ابتسمت / ايه الحمدلله
-نادر/ وحتى انا شكلى بنحبك
-واطت راسها / لو سمحت متكلمنيش هكى
-ناض من مكانه مشى جنبها / ليش منكلمكش هكى..انا راجلك ومن حقى نقولك اللى يعجبنى
-صفيه/ راجلى اللى يقولى يابنت الناس انتى ماتلزمينيش .. ويقولى خوى بينى وبينك
-نادر/ جيت بوك اليوم اثرت فيا هلبا … وخلتنى نغير رائي فى هلبا حاجات دكرها هوا بكل بساطه ..ولقيتها بالفعل بسيطه غير انا مكبرها …
-صفيه/ انا…
-نادر/ ليش طلقك
-عيونها دمعو / انا طلبت الطلاق
-نادر/ وليش طلبتى الطلاق
-صفيه/ قصه طويله …
-نادر/ احكيهالى
وقعدت تحكيله كيف يطلق فيها اكثر من مرة فى ثلاث ايام عشان حالف على امها ماتجيهاش.. وبعدها ويرد فيها فى نفس اليوم … وحكتله كيف بعدين طلعو الطلقات مش محسوبات ومع هدا طلبت الطلاق واصرت عليه لان سبب اللى صارلهم كله هوا كره عبدالجبار لامها .. وبالتاللى الطلاق حيستمر لان امها مازالت مرت بوهم
-نادر/ نبى نبدا صفحة جديدة معاك

-عيونها دمعو/ منكدبش عليك انا خاطرى واجعنى ..من اللى صارلى زمان ..وزاد عاودلى توة ومن حظى اللى مضحكليش مرة
-مسك يدها / انا نجبرلك خاطرك
-غمضت عيونها / صعب ..
وبدت تبكى/ انا جرحى قديييم … من لما كبرت وعرفت ان امى لوحتنى انا وخوى وكبرت وتزوجت واطلقت فى ثلاث ايام زاد جرحى
-نادر/ ممكن نحضنك …
ومد ايديه وخشت حضنه وقعدت تبكى وهوا حاضنها وحاط ايديه فشعرها
-صفيه / عمرها ما سيرتى انجابت بالباهيه …لازم الكلام ميسرش خاطرى..لما صغيرة يقولو امهم لوحتهم وعانتهم مرت بوهم .. ولما كبيرة اطلقت فى ثلاثه ايام وماخلو ماقالو عليا
-نادر بهدوء/ انا نشبح فيك عاقله ورزينه …والعاقله عمره مايهمها كلام الناس
-صفيه قاعدة فحضنه / لكن سيوره الدنيا ادور والزمان يضحكلى .. لانى عمرى مادرت حاجه شر
-نادر/ نحبك
-صفيه تفاجئت/ مش كانك صخفت عليا تقولى هكى ..
مفيش داعى للشفقه…انا حكيتلك بمواجع قلبي بس
وبدت تفك فى نفسها …
شدها بين ايديه/ خليك …عمره الحب ماكان شفقه .. لما سافرت مافارقتينيش يوم .. ولما شفتك غيرتك عليا فعيونك زاد حبي ليك …

لكن المنحوس منحوس..هيا فكرت انه يقوللها فالكلام هدا بيش ياخد حقه منها … فكت نفسها من بين ايديهة
-صفيه / اسمع كانك تبى تاخد حقك ..انا مش مانعاتك .. لكن تقعد تقولى فالكلام هدا …نفرح بيه ايام وبعتالى تمشى وتخلينى لا
-نادر?/ يعنى انتى هدا رايك … وهكى قالك عقلك
-صفيه / ايه
-نادر/ لا نبى منك حق ولا نبى منك باطل
ناض خدى صفرته وطلع رقد برة

_______________________________________

–
ثانى يوم الصبح …

صفيه فاقت بكرى …نادر وامه قاعدين راقدين …هيا ماهناك مارقدت قعدت للفجر فايقه وتخمم ..
خشت لدار النوم … فتحت شنطتها وطلعت منها سروال وتيشرت قصير .. صارلها زى اللى قالت لا نبيه لا نطيق فراقه …حست بحبه بدت تبى تلبس وتفتلك بيش تلفت انتباهه اكثر واكثر ..
لبست السروال والتيسرت وفكت شهرها .. خلاته مفتوح …
وخشت دارت الفطور .. وخشت لعمتها فيقتها .. ودخلتها للحمام ودوشتلها … وطلعتها .. دخلتها لدارها مسحتلها كويس ومشطتلها شعرها …
-صفيه / الايام الجايه بتبدى اديري دوش بروحك
-نادر وقف عالباب/ صباح الخير
-امباركه / تعبتى منى
-صفيه / لا متعبتش منك .. لكن انتى رجليك صحاح ..ليش الناس تخش معاك للدوش وتغسلك … نفس الخطوات اللى ندير فيهم انا وياك ديرهم بروحك
-نادر/ بالك متقدرش بروحها
-صفيه / هدا الكلام اللى خلاها تعتمد فى كل شى عالغيرر
وتلفتتلها / ياام والله متعبت منك .. لكن نبيك تعتمدى على نفسك … انتى مش مريضه
-نادر/ فطرتو
-صفيه / الفطور واتى اهو تو نجيبه ..خشيت للحمام !!
-نادر/ خشيت ودوشت بعد ماطلعتو …برى جيبيه الفطور
-صفيه / باهى
ناضت من مكانها بتطلع من الباب
-نادر/ شنو هالاناقه هادى كلها ..منتحملش انا راهو
-صفيه تضحك / باهى حول من عالباب وبطلها الحركه اللى ادير فيها هادى
-نادر / منبيش انبطلها
-صفيه/ تى حول امك ورانا وتفهم
-نادر/ باهى اهو حولت …
-مباركه / جيبيلى اميه قبل
-نادر / اهو تو نجيبلك انا
وطلعت صفيه مشت للمطبخ … ونادر وراها … وقفت قدام الدولاب تساوى فى الصفرة ….وقف وراها نادر ومد يده فتح فردة الدولاب ولصق فيها هلبا وخدى طاسه من الدولاب
-صفيه بدلع/ حول
-حط نادر الطاسه عالدولاب وحضن صفيه / هكى تخلينى نرقد فى ليله حرفه امبارح
-صفيه فرحانه ?/ اناااا
-نادر/ انتى امالا منو غيرك متعبنى
-صفيه / التحول المفاجئ هدا يخوفنى
-مد يد على بطنها ويد على كتافها ومقرب وجهها من ودنها ورقبتها وضمها ليه / كل شى مصارش فجأة .. بالعكس كان موجود مالاول .. لكن ممكن كنت محتاج حد يعطينى دفعه
-صفيه / اهاا
-نادر / نحبك
-صفيه مبتسمه وساكته
-قرب يبوس فى رقبتها / ونبيك
-صفيه تدلع / تى باهى .. غير نفطر امى وبعتالى ساهل
-نادر يضحك / باهى

طلعو من المطبخ ومشو لدار الحاجه … حطو الفطور …
صفيه تفطر فى عمتها ونادر يبعتلها فى نضرات وحركات وهيا تضحك …
كملو الفطور … ورقدت الحاجه .. لان هما متعودين بعد الفطور ترقد ….
طلعت صفيه رافعه الفطور ومشت للمطبخ …
لحقها نادر / تعالى
مشت معاه وهيا مبتسمه وتدلع
-نادر/ بري توضى
-صفيه / باهى
-نادر/ يوم دخولنا ماصليناش مع بعض .. لهينا فى امى .. اليوم دخولنا ونبى نصلى انا وياك …
سكت شوى …..وبعدها / لو ماتبيش عادى
-صفيه مستحيه / وليش مانبيش …خلى نتوضا
-قرب منها وباسها على شفايفها / متعطليش
-ضحكت برهبه / باهى
خشت توضت وخش هوا بعدها وتوضا …
مشى لباب الحوش الرئيسى سكره بالمفتاح …خاف ينسجم وتطلع امه من الحوش مايحسش بيها ….
وخدى صفيه من يدها وخشو دار النوم … وسكرها
وقف هوا الامام وصلى وهيا وراه ….
بعد ما كمل تلفتلها / نوضى غيري حوايجك
فهمت انه يبيها تلبس روب … مشت لشنطتها فتحتها … وطلعت روب ابيص
-صفيه / ماتتلفتش لتالى .. ولا خلى نطلع نغير حوايجى فى الحمام
-نادر يضحك / متخافيش مش حنتلفت …
وحولت بنطلونها وتيشرتها … ولبست روب البيض قنين
-نادر يضحك / خلاص
-صفيه / ايه خلاص?
وقف تلفتلها … لقى جسمها ابيض وكله مفاتن
-نادر/ يا ارض احفضى ماعليكى
-صفيه / عجبتك
-مسك يدها وقعمز عالسرير وقعمزها جنبه / لعلمك انا اول مرة نشبح مراة لابسه هكى او نقعد معاها فى خلوة..
قاملها راسها / والحمدلله ربي اكرمنى بيك ادب وجمال وحشمه
قرب منها باسها / تحبينى
-صفيه / من اول يوم

قرب منها نزل على جسمها لمس وبوس وحضن وهيا حاسه ان الدنيا مش سايعتها من الفرحه …
قربها من راس السرير ورقدها ..حول تيشيرته ورقد معاها فى اجمل ساعات من حياتهم ….

__________________________________________

تمت ….ويتبع

من غدوة بيرجع وقت التنزيل زى ماكان …ثلاثه ايام ضرفى تمو ?

نحبككككككم❤