رواية سرقت قلبي
الحلقة العاشرةابرار: انتى طلبتى رقمه ولا هوا طلبه منك
-سهام : هوا طلبه عطيتهوله ودارلى تشريينه من رقمهابرار خدت صدمت عمرها ????…وفالوقت اللى يحكو فيه ابرار وسهام مع بعضهم
طلعت سهام رقم محمد ودارتله تشريينه
طبعا محمد معنداش رقم سهام ..لما جاه رقم غريب
استغرب من يكون … ممكن حد من جماعته مكلمه
من رقم ثانى
خدى الرقم وعاودله
ابرار وسهام يهدرزو .. شرين رقم سهام
وبدت تنقز فرحانه …وعيونها قلوب وتعيط وتقول
لابرار اهو رقم محمد يتصل.. اهو كلمنى
وقريب تهبل مالفرحه …
ابرار حمقت: ترا التليفون نشوف الرقم
عطتها سهام التليفون شافت لقاته بالفعل رقم محمد
منحكيلكمش عالغصه اللى صارت ل ابرار
عيونها مايكدبوش .. رقم محمد مكتوب قدامها فى
تليفون سهام
__________________________
سهام مشت تجرى للبلكونه ردت عليه وهيا تهمس
بالشوى وماتبيش ابرار تسمعها
-محمد : الو
-سهام : الو
-محمد : من معاى
-سهام تتكلم بالشوى: انا سهام اللى خديت رقمك
بكرى العشية
-محمد تحشم : سامحينى اختى ممكن انتى لمستى
التليفون بالغلط ..بس انا عاودتلك لان جتنى تشريينه
منك …ونحسابك حد من جماعتى
“مسكين يحسابها غلطت .. وهيا ماخفها الباردة ”
-سهام خشت للدار جنب ابرار وعلت صوتها : لا عادى
مش مشكلة انك اتصلت توة
-محمد : سامحينى اختى مضطر نسكر توة
-سهام : تمام زى متحب انت .. حاضر نتكالمو غدوة
.. مع السلامة
وسكرت الخط ..وعيونها قلووووب
وفرحانه قريب بطير
__________________________
ابرار مخنوقه.. مضايقه من كلام ابتسامه
وتجيها بالقاضيه من عملت محمد مع سهام
وتتكلم فى خاطرها : مستحيل محمد يكون محمد
نوعه هكى …محمد رزين ..وتخمم وهيا ساكته ….
وترجع تتكلم مع نفسها : لكن انا شفت الرقم
بعيونى ..
سهام قالتله زى متحب انت حاضر نتكالمو غدوة …
معناها هوا اللى طلب منها يتكالمو غدوة
راسها وجعها ….وشرين تليفونها رقم محمد
ماردتش …عاود مرة واثنين..وثلاثه
وهيا متردش ودايرة تليفونها صامت
بعتلها رسالة ” وينك حبيبي شغلتينى عليك ”
قرتها ومعش قدرت تشد دموعها اكثر من هكى …
تبكى بكى حار يانارى وجعتها روحها ..منين بتلقاها
ولا منين
وعاود يتصل …دارت تليفونها مقفل…
محمد قريب يهبل …مفكرها مازالت زعلانه من كلام ابتسامه
وباتو ليله حرفة هما الزوز
هوا يعاود والتليفون مقفل ..وهيا تتخايل فيه كيف
يطلب من سهام فى رقمها…
_________________________
ثانى يوم الصبح …
ابرار عليها دور متع صغار خالها
دوشتلهم ولبستهم وفطرتهم …
وهيا ساكته .. لا كلت لا فطرت .. مجرد شربت قهوة بس
وتليفونها مسكر …
-ابرار فى خاطرها : نفتح تليفونى نشوف شن
باعتلى ..
وفتحت تليفونها …
وبدو الرسايل يوصلو
25 رسالة …
“وينك حبيبي”.. “انشالله خير”.. “شغلتينى عليك ”
وخودلك من هالكلام …
هيا اللى واجعها انها شافت رقمه بالفعل يتصل بسهام …
وسهام اللئيمه طبعا ماقالتش انها كانت تشريينله بيش هوا عاود
قاعدة تقرا فالرسايل وبدى محمد يتصل …
تشبح فى رقمه …وعندها غيض منه
تبى ترد عليه تهزبه وهوا مش هاين عليها
وبدى فى بعث الرسايل
“خيرك شن صاير معاك “…”شغلتينى حبيبي”…
وهيااا شى شى …ولا تبى ترد
ومحمد عاد منحكيلكمش عليه …متحسر انه ماشدش
ابتسامه عطاها طريحه ??
يحساب ابرار متأثرة من حركه ابتسامه
نزل محمد للدور الاول …
لقى سماح وسحر وامينه
يبي يسأل سماح على ابرار ..لكن حسها خفة منه
طلع ركب سيارته
مش عارف وين بيمشى …المهم يطلع من الحوش
لانه انخنق
قلبه رفعه لشارع حوش خال ابرار
يلف ويدور فالشارع وهوا يتصل بيها وهيا متردش
حس انها زعلانه منه هوا ..
مش مسالة انها زعلانة من موقف امبارح
لكن مفيش سبب للزعل منه …هوا مادار شى يزعل
ويفكر والتخميم قريب يقتله
درس سيارته فى شارعهم
وطفى سيارته ونزل
شرين عالباب …فتحت مرام بنت خالها الصغيرة
-محمد : السلام عليكم
-مرام : وعليكم السلام
-محمد : ممكن تناديلى ابرار .. امها باعتتلها معاى حاجه
-مرام : باهى شوى بس نركب فوق اناديها
-محمد : باهى
ركبت مرام…
-.مرام : واحد من ربايب امك ترا شن جايبلك قال
امك باعتتهولك ..
ابرار فكرته خالد …
لبست وشاحها ونزلت للباب
تلقاه محمد ….
تجمدت فمكانها … منها زعلانه ومنها فرحانه
________________________
-ابتسامه : انا والله ماقلتلها حاجه.. قلتلها اول مرة
نشوفك امأنقة هكى
-وسام : وانتى ليش تقوليلها هكى
-ابتسامه : وشن فيها كلمتى
-وسام : انتى بتقعدى هكى ديما .. امتى بتهنينى
-ابتسامه : وسع وسع خودنى فى حضنك تو نحكيلك
امتى بنهنيك
-وسام يضحك: تعالى ياحبى ارقدى فى حضنى
واحكيلى
-ابتسامه : لا انا منبيش نجى فى حضنك بيش
نحكيلك
-وسام : اما ليش
-ابتسامه : نبى نبوسك
” ريتوها مطول لسانها ..وريتوها بيش كاسباته ..وهوا
زى الكبس ماصدق نخ طول ??”
__________________________
ابرار واقفه فم الباب
اتفاجئت بمحمد قدامها …
محمد يشبحلها وساكت وعيونه مليانات ملام
وهيا ساكته وتشبحله وعيونها مليانات الم
-محمد:وينك نكلم فيك مترديش?
-ابرار مواطيه راسها وزعلانه : تليفونى مش معاى
-محمد متعصب : خيرك شن فى
-ابرار بألم : ماخيرنى شى.. اسمع محسن ولد خالى
قريب يجى .. يلقانى واقفه معاك فم الباب نقعد فى
حشمه قدامه
-محمد: فهمينى شنو فى ..توووة اطلعى نبي نشوفك
برة ونتكلم معاك براحتى
-ابرار: وين بنطلع معنديش وين نمشى
-محمد شدها من يدها : قلتلك اطلعى شوى نبيك
-ابرار شدت يدها : اااى وجعتنى
-محمد خاف عليها : سامحينى حبيبتى وجعتك ..
وراس حبي تعالى شوى حتى لسيارتى اطلعى معاى
نفهم بس خيرك
-ابرار: وين بنطلع معاك فسيارتك..مستحيل منقدرش
-محمد: باهى اطلعى اى محل .. شويا بس نكلمك
براحتى
-ابرار: باهى نفضى و تو نطلع
-محمد: اراجى فيك راهو..متخلينيش هكى زى
المجنون
-ابرار : تو نمشى للسوق اللى فى نهاية الشارع
-محمد: باهى انراجى فيك راهو مش متجيش
-ابرار: باهى ?
وسكرت الباب وخشت …
ومحمد ركب سيارته ومشى لراس الشارع
وقف قدام السوق يراجى فيها فسيارته
__________________________
قعدت ابرار اكثر من نص ساعه …
وهيا تقيس فالطلعه.. زعما تطلع والا لا …لكن قلبها
واجعها ..وكيف ادير بس
وفالاخير لبست عبايتها وطلعت ..ورفعت معاها جاد
ولد خالها فى يدها …
وهيا جاية من الشارع شافها محمد …
نزل من السيارة قعد واقف وحول نضاراته ..
جت تمشى من جنبه تلفتتله وهوا قاعد واقف قدام
سيارته …شبحتلها وقامت خشمها وتلفتت لجهه الثانية
خشت ابرار للسوق ..خش وراها محمد …
مشت جهه ثلاجه العصاير لقت الممر فاضى
ومافيشى حد
-محمد يشبحلها بحنان : نحبك
ابرار ساكته
-محمد: خيرك حبيبي ..
-ابرار: مافى شى
-محمد : اشكى لحبيبك ..خيرك يا عمرى وانا ناخدلك
حقك من اللى زعلك
-ابرار انفجرت مرة وحدة : انت كداب ..منحبكش ..
ومشت بسرعه من الممر تبى تهرب منه …
-شدها من يدها : منو كداب… خيرك شن سامعه
-ابرار تلفتتله : شادها اتصالات وارقام وغراميات
-محمد : ارقام مع منو ..انت شن تحكى
-ابرار: نحكى على سهام بنت خالى اللى شادها معاها
غراميات امبارح فالليل
-محمد ?: انا .. مع منو شديت غراميات .. شن
كادبة عليك وانتى مصدقتها
-ابرار: حول يدك .. رقمك شفته بعيونى فى تليفونها
-محمد: هيا طلباته منى امس … اللى فهمته انها تبى
خدمه زى خوها
-ابرار: كداب .. انت اللى متصل بيها امبارح رقمها
عندك .. واكيدة انت اللى طالبه منها
– محمد : والله ماصارت .. لقيت رقمها فالوارد نحيابه
واحد من جماعتى عاودتله الرقم
-ابرار نزلو دموعها : كدااااب
ووقامت جاد ولد خالها فى غمرها وطلعت ابرار
بسرعه من السوق …
وروحت لحوش خالها …مسحت دموعها فالطريق وخشت
محمد روح للحوش وهوا قريب يموووت ..
يبي يكلم سهام بنت خالها يسبها ولكن خايف تصير
مشكلة لابرار لانها عندهم
يكلم فيها وهيا شى متردش
ويبعتلها فى رسايل … اعتدارات واسف …
وهيا شى شى
__________________________
-امينه : والولد باهى ياسنيوة
-سناء: دكتور يا عمتى ..ويخدم فالطبي
-امينه : ياريتها ايكون من نصيبها …و اتجى طيحتها
معاك ونتهنى عليها
-سناء: هيا كلمتنى اخته الكبيرة رسمى
-امينه : امتى.. فى البيان قصدك
-سناء: ايه بعد مالبست الدبلة..
قالتلى شاوريها هيا وامها ..وكان عجبهم الموضوع
بنجو رسمى
-امينة : خلى نكلمها ونشبحها امتى بتجى
وقامت تليفونها واتصلت برقم ابرار
-ابرار: الو اهلين يااام
-امينه : اهلين بنيتى شن حالك ..وكيف حالك حوش
خالك سعيد وصغارك خالك ناصر
-ابرار: الحمدلله كويسين كلهم
وقعدو يهدرزو شوى ويسألو على حال بعضهم
-امينه : قتلك انتى امتى بتجى هنايا
-ابرار: مندرى على روحى يااام .. عرس خالى مزاله
اسبوعين وماضنيتش نجى قبله
-امينه: نبيك فى موضوع ضرورى ..شوفى خالك
ناصر يجيبك غدوة كنهدا
وخش محمد عليهم انتظار فالتليفون … وهوا عاد
يموت ويفوت لما يلقاها انتظار
ابرار شافت رقمه ..تبى تقهره ..واكثر ما طولت
فالدوةمع امها
-ابرار: توة خالى ناصر فالبحر .. ومحسن ولد خالى
مش فاضى تعالى انتى هنايا
-امينه : لا نبيك انتى تجى هنايا …
وتشبح لسناء وتضحك
-ابرار: منعرفش تو نشوف
-امينه : باهى خلاص امالا كان هدا نبعتلك سماح
وخالد
ابرار حست ان امينه بتسكر الخط ..
ومحمد مابطلش الانتظار ..مكالمة ورا الثانيه
وهيا مزال ماتبيش تسكر
-ابرار: من جنبك يااام
-امينه : جنبى سناء
-ابرار: ترا اعطيهالى
وطاحت تهدرز عليها وتشكر فالبيان
ومحمد اعصابه ناااار .. وبدى يبعت فالرسايل
“فى منو تكلمى” ..”سكرى التليفون نبيك شوى” …
:تى والله لو نحصل عليك لما نقتلك على الانتظارهدا”
“ابرار اعصابى خلاص راهو سكرى خيرلك ”
وخودلك من هالكلام والولد قريب يموت
__________________________
ثانى يوم مشت ابرار لحوش امها …
رفعوها محسن واخته مرام والصغار
خشت حوش امها لقت سماح بس
سلمت عليهم …
-ابرار: وين امى
-سماح : طالعين هيا وسناء
-ابرار: وسحر وين
-سماح : عندها كورس
وركبو الزوز للدور الثانى …
خشو دار سماح.. يهدرزو على محسن ولد خالها
طبعا سماخ تسأل عليه وابرار ترد
ومحمد فى داره من الليله اللى قبلها مرقدش
حاس انه مظلوم ومش عارف كيف يوصلها
منغير مايحس بنفسه مشى لدار سماح
ماعنداش الا سماح رفيقتها ويقدر ايزلبحها بيش
تقنعها انها تجى
طق الباب متع الدار
فتحت سماح … لقاته محمد
وابرار عالحيط متقية متبانش ..
لكن لما سمعت صوته بدى قلبها يطق يطق
-محمد : شن الجو
-سماح : الحمدلله
-محمد : بنسألك على ابرار ..
-سماح : خيرها ابرار
-محمد: كلمتيها اليوم والا لا ..لان تقريبا السمستر ا
لثانى بدو ينزلو فالمواد ونبى نبلغها
-سماح : تفضل خش بلغها بنفسك
-محمد فرح : مفهمتكش… وينها هيا
-سماح : اهيا ابرار لداخل فالدار
محمد دخل راسه وتلفت لقاها مقعمزة عالسرير
-محمد فرحان : اهلين ابرار
-ابرار: اهلين ?..
-محمد تجرأ : ترا تعالى نبيك بروحك شوى
-سماح : اسرار علينا
-محمد : لا بنبلغها حاجات فالجامعه …
-ابرار: تو ننزلك تحت
-محمد : لا تعالى انزلى معاى
“خايفها تفوته ”
ناضت ابرار ..فى داخلها سعيدة باهتمامه بس مش
قادرة تقاوم الغيرة من اتصاله بسهام بنت خالها ولا
قادرة تسامحه على انه خدى رقمها منها
نزلو ابرار ومحمد من الدروج ..
ماشى محمد للمطبخ وهيا وقفت …
-محمد : تعالى
-ابرار: لا خلينا فالصالة
مشالها محمد ومنغير ماتتوقعه …
قامها بين يديه الزوو ودخلها للمطبخ …
ابرار عيطت ومحمد ضحك : اسكتى
وصل جنب طاولة الاكل ونزلها
وقفت ابرار على رجليها
وطلع محمد من الباب الصغير اللى فالمطبخ اللى
يطلع ع الجنان وتلفتلها : تعالى
-ابرار: لا خلينا هنايا فالمطبخ.. شُبها غادى
-محمد: قلتلك تعالى
– ابرار :وراس حبيبي منقدر
-محمد : مدامك قلتى حبيبي حاضر نقعمزو وين ماتبى
وقعمزو عالطاولة فى المطبخ
-محمد مسك يديها الزوز : تحبينى
ابرار ساكته
-محمد : جاوبينى تحبينى
-ابرار: منعرفش
-محمد : لكن انا نعرف ..انى انا نحبك ونعشقك…
وانتى كل شى بالنسبة ليا …
ابرار تشبحله …
-محمد : بس انا نلوم عليك كيف تشكى فيا حبيبي
..انا اقسم بالله مانقدرنشبح لغيرك ..ولا تملى عينى
وحدة غيرك
-ابرار: نسألك سؤال
-محمد : انتى تؤمرى مش تسالى
-ابرار: لو الوضع بالعكس ..وانت مقعمز جنب حد
واتصلت بيه انا الساعه 12 فالليل
-محمد : كنت قتلته وقتلتك
-ابرار: يعنى حلال عليك حرام عليا
-محمد : ايه حلال عليا انا بس الغيرة باهيوووو
-ابرار: بديت تقول باهيووو زى منقول فيها انا
وبدو يضحكو الزوز
-محمد : والله والله مافى مراءة فالدنيا تسواك
فعيونى غير امى
-ابرار بدلع : ايه هدا علاش تاخد فى ارقام البنات
-محمد : والله ماخديت رقم اى بنت ..
-ابرار شبحتله وبدلع : باهى تحبنى
-محمد : غير نحبك وسكتى .. انا من امس عقلى
مش عليا لانك زعلانه
-ابرار: اللى خلانى يرق قلبى عليك ..انك شاد فيا هلبا
-محمد : كمليها …وقولى شاد فيا وتترجى من امس
-ابرار: لا حاشاك
-محمد : انا على خاطرك ندير كل شى
-ابرار: باهى اسمع والله مزال نلقى رقمك عند بنية
تعرف حساباتك
-محمد : لو لقيتينى نكلم فى وحدة علقيلى المشنقه
…غير ارضى بس
ويشبحلها : نحبك هلبا يا عمرى .. وبيش تصدقى
بنفسك انها هيا اللى خدت رقمى..وان انا مطلبتاش
…اصبري واسمعى بنفسك
قام محمد تليفونه وضرب رقم سهام بنت خالها
وفتح المايك
-سهام بدلع : الووو
-محمد : اختى يومها لما خاشه انتى ..كلمتينى
وطلبتى رقمى صح ولا …
ويشبح لابرار
-سهام تلخبطت واتمتم : اي طلبته .. ماهو ..
-محمد : باهى تفضلى اى خدمه ..
-سهام : لا والله غير نبى نتعرف عليك
-محمد حط يده على يد ابرار: لا والله اختى مش
فاضى بالتعارف ..انا مرتبط وبنخطب قريبا ..
وسامحينى منبيش ندير لروحى مشاكل
-سهام فشت القمم: باهى براحتك..مع انى تمنيت ..
-قص عليها محمد : لو سمحتى احدفى الرقم …مع
السلامه
انفتح باب الحوش وخشو امينه وسناء
طلعت ابرار بسرعه من المطبخ ..
وسلمت عليهم…..
وطلع محمد من باب الجنان … ولف وخش حتى هوا
من باب الحوش الرئيسى
-سناء: سمالله .. وين كنت واقف ماشفناكش
-محمد : درست وراكم طول غير ماشفتونيش
خشو ابرار وامينه وسناء لدار التقعميز
وبعت محمد لابرار رسالة ” خشو فجأة ومزال
ماشبعتش منك”
ردت عليه ابرار” احسن تستاهل ”
-محمد : ” نبى نشوفك الليله مادامك بايته عندنا ”
-ابرار: “امالا تبى نبات معاك فى دارك ”
-محمد :” ياررررررررررريت???”
_________________________
محمد مزال مستاحشها
وتقولى تحته دودة …وتقولى ملك جى فى ودنه
وقاله خش بحداهم فى دار التقعميز
هوا خاش من فم الباب
-امينه: يابنيتى الولد دكتور وماينهانش
-سناء: هوا يبي يخطب ..مش علاقه يا ريري
-محمد : شن فى
ابرار ناضت بسرعه من جنبهم …
وخلت امها وسناء وراها
وتلفتت لمحمد وحطت صبعها على فمها بمعنى اسكت ….
“خايفته يقول لامها انه يبيها ”
-ابرار: مافى شى
-امينه : محمد مش برانى يا ابرار
-محمد يشبح لابرار ويكلم فى امينه : باهى احكولى
شن فى
-سناء: اخت ايمن كلمتنى على ابرار ..يبوها لخوهم عصام
-محمد : وهوا خوهم منين يعرفها
-سناء: هوا مايعرفهاش …هما سألونى عليها وانا
شكرتها قدامهم
-محمد : الراى الاول والاخير لابرار
وعطاها نضرة لوم …. وطلع طول من الدار …وطلع
من الحوش ركب سيارته واتصل بيها طول
ابرار طلعت للصالة ردت
-محمد : وعلاش ماتبينيش نكلم امك عليك
-ابرار: لانى نبيك تخطبنى زى كل البنات من بوى
مش من امى
-محمد : نقوللها بس انى نبيك .. ليش اتأجلى فيها
…تو عاجبك هكى ..لما امك فرحانه بالعريس وتقنع
فيك تاخديه …وانا مسكتينى ومش مخليتنى نتكلم
-ابرار تبى ترضيه : حبيبي خلى نتكلمو بعتالى فى دارك
-محمد : ضرورى تجينى لدارى ونتفاهمو
-ابرار: باهى انشالله نقدر بس
-محمد : مدخليش فيك … لاااازم اتجى
________________________
تمت …. ويتبع ???
نحبكم ❤
الحلقه الحادية عشرابرار وسماح فالدار
-سماح : تعرفى الباين عليه غير رايه-ابرار: منعرفش الحق .. لكن شفتيه بروحك اولامسفالبيان لما قالى قوليلها تفتح الباب نبى نشوفها
-سماح : انتى اللى قلتيله مش هوا اللى قالك
-ابرار: انا اللى قلت ولا هوا اللى قال مش مهم
..المهم انه عنده الرغبه يشوفك
سماح تشبحلها وساكته مش مقتنعه
-ابرار: مشكلته ولد خالى رزين هلبا زى الدراه
..ومافيش كيف حتى تخشى فيه وتتكلمى معاه
-سماح: تى حتى الارقام كلهم حرقتهم النم والشفرة
السرية كسرتها على خاطره ..
وتضحك على روحها : طحت قبل الضربه
-ابرار: باهى كان تبى تو نجيبلك شفرة مستعملة من
نفس المحل
-سماح: تبى الحق معش عندى نيه نكلم ونهدرز
..خشلى راسى ولد خالك
-ابرار تضحك: وهدا حب ولا شن اسمه
-سماح تضحك: والله مانعرف ..المهم اهو قاعدة
صامدة لين يتكرم ويحن عليا ويكلمنى
-ابرار: باهى واللى اديرلك فكرة جهنمية
-سماح : على ايديك نحجو يا ام الافكار جهنمية انتى??
__________________________
فى دار التقعميز
-امينه: معرفتش خيرها البنت
-سناء: راهو مازالت صغيرة يا عمتى بالشوى عليها
-امينه : نبى نتهنى عليها .. شنو انا قاعدتلها ديما
..تشبحى فيه بوها ..انشالله تبات عام برة الحوش
ماهوش مدورها
-سناء: تو نزيد نكلمها انا ..صراحة الولد كويس
ومتخرج وبحوشه
-امينه : صار هوا عنده حتى حوش
-سناء: ايه شارى استوديو فى عمارات الطبي
-امينه : انا البنية هادى بتجلطنى راهو
-سناء: بعيد السو عليك .. وهوا راهو فالاخير
نصيبات وكل شى من ربي
-امينه : والنعم بالله
_______________________
الساعه 9 فالليل
البنات فى دارهم يهدرزو
وسحر سرحانه وتخمم
-ابرار: خيرك سحر حسيتك مش معانا
-سحر: لا لا مافى شى
-ابرار: غير ادوى احنا خواتك انا وسماح ..كانا
مافرغتيش قلبك ليا امالا لمن …
-سحر: صار معاى موقف اليوم مش حلو فالكلية
-ابرار: شن صار معاك ..
وسماح مقعمزة معاهم وتسمع
-سحر: نحكيلكم لكن بالله منغير تسهويك ..رانى مش ناقصه
-ابرار: احكى
-سحر: اليوم جتنى بنت تهجمت عليا قدام زوز من صاحباتى
-سماح : وشن تبى منك
-سحر: جايتنى بكل وقاحه تكلم فيا على عبدالوهاب
-ابرار: خيره عبدالوهاب
-سحر : بكل وقاحة .. قالتلى كانك ماتبيشى انا نبيه
-سماح : باهى
-سحر: قلتلها اشبعى بيه هوا ليك ..وتصدقو شديت
روحى بالسيف كانا لقيت شديتها عجنتها طريحه
-ابرار قعمزت جنبها : باهى حبيبتى انتى شن اللى
مضايقك توة
-سحر بهدوء: منعرفش
-ابرار: نقولك منغير ماتتعصبي عليا
-سحر : قولى
-ابرار: سحورتى اللى انتى فيه هدا اسمه غيرة …
-سحر: مستحيل انى نغير عليه ولاندوره
-ابرار: لا انتى غايرة عليه لانك مازلتى تحبيه
-سحر : خرفى
-ابرار: اسمعى مفروض اللى نحبوهم يغلطو
ونسامحوهم ..بيش لما نغلطو احنا حتى هما
يسامحونا
-سحر: هدا ماغلطش .. هدا خان
-ابرار: بس اعتدر ومستعد يبوسلك ايديك وراسك
بيش ترضى فمفروض انك تتنازلى شوى ..الولد
يحبك ويتمنى رضاك
-سماح : فى فضانية سناء كلم خالد ..ولما جى كلمها
دارت عياط ووجيج
-ابرار: انا رائي اعطيه فرصه ثانية..ولو ريتى شى
ماعجبكش فوتيه
-سماح : تى انتى لتوة من بعده لا كلمتى ولاصاحبتى
..قعدة مخلصه ليه هوا بس
-ابرار: يومها فالكلية بنت معاى تسأل فيا عليه
تحسابه ولد عمتى
-سحر عيونها دمعو : لكن قلبي قاعد واجعنى
-ابرار: لانك تحبيه هلبا.. ومازالت الصدمه لتوة فيك
سكتت سحر وغمت راسها باليرغان وغمضت عيونها
__________________________
الساعه 11 فالليل …
نزلو سماح وابرار بيديرو نسكافيه
-سماح: هيا كيف صار فى ولد خالك .. وين الفكرة
-ابرار: ماهو سحر فوق ومنقدرش ندير قدامها شى
-سماح : باهى اهو احنا بروحنا توة
-ابرار: لا لا نبى دار مسكرة علينا احنا الزوز بس
..لانى بنعيط ??
-سماح : وعلاش بتعيطى مفهمتش??
-ابرار: تو لما يصير.. تو تفهمى
-سماح : دار محمد فاضية ..تعالى نركبولها
-ابرار عجبتها الفكرة : هى تعالى
وركبو لدار محمد ….
وسكرو الباب
وخدت ابرار تليفونها واتصلت برقم محسن ولد خالها
-محسن : الو
-ابرار: اهلين محسن كيف الحال
-محسن : الحمدلله
-ابرار: غير نكلم فى سهام نلقى فى رقمها خارج
التغطية …وانا نبيها ضرورى …
-محسن: انا مقعمز فالشارع توة .. شوية اندخلها
التليفون وعاوديلها
وقبل مايسكر محسن …بدت ابرار تعيط
-ابرار حدفت التليفون على سرير محمد وعلت
صوتها: سماح خيرك يا سماح ..ردى عليا
وسماح تضحك حايرة فيها ..
-محسن انشغل: الووو الووو ابرار خيرها سماح ردى عليا
وابرار قاعدة تعيط : اشربي امية يا سماح .. سملة عليك خيرك …
وسكرت التليفون وبدت تضحك هيا وسماح
وانفتح باب الدار خش محمد …
__________________________
امينه متكية جنب الفيتورى فى سريرهم
-الفيتورى: باهى انتى شوفيها خيرها بالك عندها حد
من متاعين بوها يبيها
-امينه : كنهدا راهو قالتلى
-الفيتورى : والله الناس كويسين والولد انا شفته لما
جونا فالفضانية تحسيه هادى وعاقل
-امينه : ياريتها تجى من نصيبه ..عالاقل تكون مع
سناء ونتهنى عليها…سناء تهنى
-الفيتورى : ربي يهدى انشالله
-امينه : انا تبى الحق ..عندى ولد خالى يقولوله
امحمد.. كلم عليها خوى ناصر ..لكن انا استكبرته
عليها ..هوا اكبر منها قريب ب اطناشن عام
-الفيتورى : وكنهدا .. اهو انا اكبر منك ب سبعطاشن
عام .. وسعيد اكبر من اهله ب خمصطاشن عام
-امينه : زعمك هكى تقول
-الفيتورى : انا والله مدابيا كنت نباها لوسام ..
لكن هوا التم على البنية مش عارفة وين عرفها
-امينه : ربي يهنيه وسام ..ابرار مستحيل تاخده …
حاسباته زى وخيها
-الفيتورى : ياريتك جبتيلها وخى منك عالاقل راك
تهنيتى عليها …و تلقاه هيا لعازة الزمان
-امينه : الله غالب يا فيتورى مش كاتب ..كان مش
من هداكة الرمى اللى عرف بيه الدكتور عندى الورم
فالرحم ..كنهدا رانى مش قدامك توة
“امينه لما خدت الفيتورى حملت طول .. وجتها
حرارة طاح منها العيل .. لما عاينت قالولها عندك ورم
فالرحم.. رفعها الفيتورى لتونس نحولها الرحم بكل ..
ودارولها خرط ..وجلسات كيماوى .. وتوة محافظه
بالدوا”
__________________________
فى دار محمد
– محمد : شن اديرو هنايا انتو الزوز
-سماح بدت ترقل: لا والله غير نبى نوريها حاجه
ومنبيش سحر تشوفها
-محمد شاك فيهم : ووينها الحاجه ترا …
وبدى تليفون ابرار يشرين وهوا ملوح على سرير محمد
شاف محمد لقاه محسن ولد خال ابرار
-محمد شبح لابرار بحمقه : خيره ولد خالك يكلم
فيك متأخر شن يبي
-ابرار خافت منه : منعرفش شن يبي.. ممكن واحد
من صغار خالى الصغيرين يبي يكلمنى
التليفون قاعد فى يد محمد ..وصلت رساله …
طلعت على واجهت التليفون ” ردى رانى قريب نهبل”
محمد انصدم .. شنو الكلام هدا .. وعلاش قريب
يهبل …يشبح لابرار ومدلها التليفون
-محمد : هاك تليفونك واقري الرسالة
-ابرار قرتها انصدمت وخافت من محمد وبدت
ترعش : لا اكيدة جايتنى بالغلط ممكن هوا بيبعتها
لحد ثانى فوصلتنى انا
-سماح : خيره شن كاتب
ابرار فى يدها التليفون مسحت الرسالة وسكرت
تليفونها طول خافت ولد خالها يعاود
-سماح : نكلم فيك خيره
-ابرار: منعرفش خيره
وطلعت من دار محمد بسرعه …وخلت الباب مفتوح
..ولحقتها سماح على طول
خشو لدارهم وسكرو الباب
ابرار رايح وجهها اسود …خايفه من ردت فعل محمد
..وكيف بتفهمه عالرسالة وهيا متقدرش تحكيله
عالمقلب اللى داروه في محسن على خاطر سماح
-سماح : محسن شن باعت
-ابرار: باعت ردى قريب نهبل
-سماح : ومحمد قراها
-ابرار: ايه قراها
-سماح : تى عادى مدوريشى خيرك خايفه انتى ..
محمد ينسى طول راهو
-ابرار: انشالله خير
-سماح : وبعتالى حتى كانا شك انك على علاقه مع
ولد خالك عادى شن ادورى فيه انتى..شن عنده قداك
-ابرار متحسرة : معاك حق عادى ايه
متحسابش سماح ان بين ابرار ومحمد حب كبير..
معاها حق تقول هكى
-سماح : باهى كيف يصير توة .. افتحى تليفونك
نكملو الخطه
ابرار عقلها وتفكيرها مع محمد ..معش عندها نيه فى شى
ومحمد فى داره قريب يموووت .. يتخايل فالرسالة
اللى باعتها محسن …وهوا غيور عاااد ..ويحلل ويجزأ
فالكلام اللى فالرساله كله
وفى خاطره شنو كاتبلها قريب يهبل..شن بينه وبينها
…اللى يبيها ترد وهوا قريب يهبل ..هدا غير اللى
عنده فيها نيه ومشغول بيها
ويرجع ايفكر: لكن مستحيل ابرار يكون هكى نوعها
…هادى حبيبتى وروحها متعلقه فيا …مستحييييل
مستحيل تلعب بيا مع واحد ثانى
__________________________
ابرار فتحت شفرتها …
وكلمت محسن ولد خالها
-محسن : خيرك سكرتى التليفون شغلتينى …خيرها سماح شن صارلها
-ابرار: طاحت داخت شورا جاها هبوط ..ليها
اسبوعين امتحانات لا ماكلة ولا شراب
-محسن : باهى ممكن نكلمها
-ابرار: عادى كلمها بس على رقمها
ابرار خافت ان محسن يطول مع سماح ..ويتصل
محمد ويخش انتظار وتقعد هيا فى قصه ثانية معاه
-محسن : لكن معنديش رقمها انا
-ابرار : اهو تو نبعتهولك فى مسج
-محسن : باهى
كتبت ابرار رقم سماح فى رسالة وبعتتاته لمحسن
-سماح : خيرك ابرار حبى كنتى تضحكى بكرى ..شن
صارلك توة
-ابرار: لا لا مافى شى
وضوى تليفون سماح لانها دايراته عالصامت ..
شافت لقاته رقم محسن ..قريب طارت بالفرح
ردت عليه …صوتها طالع تقولى فى بير
تليفونها طايح منها وسبيكر الصوت مضروب
وهوا عاد يسأل شن حالك وكيف حالك وفى قولت
علّى صوتك منسمعش فيك
استادنت منه سماح وقالتله كلمنى على رقم ابرار احسن
سكرت المكالمه وتلفتت لابرار
-سماح : بيكلمنى على رقمك راهو
-ابرار انخلعت: وعلاش بيكلمك على رقمى
-سماح : تليفونى طايح منى .. والسبيكر مضروبة
فيه …خيرك انخلعتى انتى
-ابرار: منقدرش نخلى تليفونى انتظار توة .. هاك
التليفون وحطى شفرتك فيه
وشرين تليفون ابرار …
محمد يتصل ..
ردت ابرار على طول : الووو …
وسماح اتأشرلها : شكووون
وقبل مايتكلم محمد خش محسن انتظار …
خشت بعضها ..وابرار بدت ترعش
صوت المكالمه الانتظار ينسمع فى السامسونج
-محمد : منو يتصل هدا وخاش انتظار
-ابرار ترعش : ماحد …
سكر محمد الخط ….
وطلع من داره …
ومايسمعو البنات الا فى صوت باب دارهم يطقطق
لدرجه ان سحر فاقت من النوم
فتحت سماح الباب ..
وهوا واقف زى الغول …يشبح لابرار
-محمد مد يده : ترا تليفونك
ابرار تليفونها فى يدها وترعش مع بعضها وتشبحله
خش خطوة .. خدى تليفونها …
شده فى يده : اعطينى الرقم السري متع التليفون
على طول ابرار عطتهوله : 1523
كتب محمد الرقم وانفتح التليفون
شاف المكالمات .. لقى رقم محسن هوا اللى خاش انتظار
مدهولها ويشبحلها بغضب : باهى تمام تو نتفاهمو
وطلع وسكر الباب وراه بالقوة
فى وسط دهول خواته
وسمعو صوت باب الحوش لوطا تسكر بالقوة ..
سحر : خيركم شن دايرات
ابرار قعمزت عالسرير وتبكى ….
-سماح : متزعليش منه غير بكرى لقى تليفونك
يشرين ..فحب يشوف منو يكلم فيك بس
وبعتالى تفكر سماح شوى : هوا مش شافه بكرى
الرقم …زعما شن جابه توة
وخواته لعند توة مازبطوش ان ابرار ومحمد على
علاقه حب
تليفون ابرار يشرين …رقم محسن
-ابرار تبكى ومادة التليفون لسماح : اسمعى هاك
طلعى شفرتى وحطى شفرتك انتى
وبالفعل خدت سماح التليفون طلعت شفرة ابرار
وحطت شفرتها هيا
وجت قعمزت جنب ابرار وبدت اضحك فيها
-ابرار: والله مافى حاجه يا سماح ..بري اتصلى بيه
الولد مدامه حصلتيه
-سحر: من بتكلمى
-سماح : من بنكلم يعنى .. ماى لووف الجديد طبعا
وشرينت لمحسن وعاودلها … خشت طول للبلكونه
متع دارهم …ومقعمزة تتكلم معاه
ابرار حاطة شفرتها فى يدها وتتفرج عليها …
زعماااا محمد شن يقول عليا توة وكيف بنفهمه ان
مافى بينى وبين ولد خالى شى
_________________________
محمد طلع من الحوش ركب سيارته ومشى
لوين ماشى مايعرفش ..المهم انه يطلع لانه انخنق
شنو ولد خالها هدا اللى خش عالخط
كيف يعنى تلعب علينا الزوز واللى يصدف الاول
وبعتالى يحن قلبه عليها: مستحيل تكون ابرار
بالاخلاق هادى .. ابرار متربية ومش متعت لعب
???????
واما سماح ..
خشت لبلكونه دارهم فى هاداكه الريح …فرشت
تحتها فرشه وقعمزت تهدرز على محسن
لسانها ناعم عاد .. وجرجرت عمك محسن لين كلمها
على حبه ليها
وعلى مشاعره ..وعلى كيف انها فى باله من مدة
طويلة
وهيا عاد فرحانه قريب اطير ..
وبدى هوا يحكى عالفترة اللى كلم فيها ابرار عليها انه
تحشم من ابرار يطلب رقمها
وانه قعد داير تحريات ويسأل عليها لانه ناوى الحلال معاها
وهيا نفس الشى اعترفتله انها كانت تراجى فيه
بالساعه وبالدقيقه
وحس محسن ان الشعور مابيناتهم متبادل
وبدى يحب فيها ويحكيلها انه بادى يبنى فوق حوش
بوه …وانه ناوى رمضان الجاى يكون متزوج
وسماح عاد وين تلقيها غير معندهاش جناوح ..كنهدا
راهى طارت من الفرح ومعش لقوها ??
سمعت باب الحوش انفتح …زبطت ان خوها محمد روح
فقالتله سكر .. لان خوى روح ونخافه يسمعنى
فقاللها محسن نبعتلك رصيد ونقعدو مع بعضنا رسايل
وافقت سماح طبعا …
خشت للدار وسكرت البلكونه واتكت على سريرها
ركب محمد وخش لداره ..
وابرار قريب بتموت تبى تمشيله لداره وتكلمه وتفهمه
لكن مش قادرة …
خاصه ان سماح وسحر الزوز نايضات
بيش بتتسبل بيش تطلع من الدار
المهم كلتها فى عمرها وقعدت للصبح مارقدتش
راقدة هيا وسماح مع بعضهم على سرير سماح ..
متخالفات كل وحدة منهم رجليها بحدا راس الثانية
وهما من لما صغار يرقدو هكى مع بعضهم
و عمتك سماح عاد للصبح مرقدتش …وهيا
رسالة تمشى ورساله تجى حب واشواق
وهوا محسن فالكتابه خدى راحته اكثر من المكالمة
كتبلها كل شى على مشاعره من حب ومشاعر حلوة
_________________________
الصبح
نزلو البنات بيفطرو …
كان يوم سبت عطلة …
سماح مخليه التليفون متع ابرار اللى فيه شفرتها
فالشحن
طلع محمد من داره …يشبح فى دار البنات مفتوحه
خشلها على امل يلقى ابرار
خش للدار مالقى حد .. وهوا طالع تليفون ابرار هز
انه واصلتله رسالة
مشى محمد قامه ..وهوا طبعا يعرف الرقم السري
فتحه وقري الرساله
لقاها من محسن ” صباح الخير حبيبي ربي يخليك
ليا يا مرتى …نحبك هلبا ”
محمد مش مستوعب المكتوب فالرسالة
شنو مرتى ..وشنو الكلام الفاضى هدا
فتح الرسايل يلاقى اسم محسن ..خش عليه
بدى يقرا فالرسايل
رسالة برساله هيا وياه
كلها غرام فغرام ..على قولت نحبك وتفاهم تام عالزواج
محمد قريب هبل ..قريب خش عقله وطلع
قعمز على سرير سماح وشاد تليفون ابرار فى يده
استصغر نفسه ..حس انه لعبة فى يدين بنية صغيرة
تلعب بيه .. كرامته انجرحت
رجع يقرا فالرسايل بيش يتاكد بالك فاهم غلط ..
الرسايل مكتوب فيها حبيبي.. وهوا يقول يا مرتى
محمد جاه هدوء غرييييب …
رد التليفون للشحن …
وطلع من الدار ونزل للدور الاول
لقى البنات وامينه فالمطبخ ..يتكلمو وصوتهم عالى
وقف يسمع فيهم شن يقولو
________________________
فالمطبخ مقعمزين البنات الاربعه وامينه
وامينه من الليله اللى قبلها ناوية تقول للبنات على
ولد خالها اللى جاى يخطب فى ابرار وتبيهم يقنعوها
باسلوبهم
-سناء: زى سلفى زى ولد خالك الزوز مافيهمش عيب
-ابرار هازية : انا قاعدة نقارن بين سلفك وولد خالى
واللى يفوز هوا اللى بنوافق عليه
سماح بدت تضحك
-سناء: تتسهوكى
خش محمد : خيركم تضحكو ضحكونا معاكم
-سناء: ابرار قالت بنقارن بين العرسان وبعتالى نقول رائى
-ابرار انخلعت: مقارنه شنو هادى يا سناء..انا نبصر
وانتى ماتصدقى
-محمد : ماشالله ربي يهنى .. شنو عريس ثانى منغير
عريس امس
-سحر: ابرار جايها ولد خالها يخطب فيها
-سماح : وجايها عصام سلف سناء اختك
-محمد يشبحلها وبكل قوة: تبى رائي خودى ولد
خالك خيرلك .. وتبى الحق العمر هوا هداكة لحقى
روحك
ابرار انصدمت
-سحر: ابرار مازالت صغيرة
-امينه : انا الحق ميالة لعصام سلف سناء اكثر
-محمد يكلم فى ابرار: ننصحك استخيري الله ..واللى
فيه خيرتك هوا اللى حيكون نصيبك معاه
بس انا ننصحك بولد خالك
وابرارمصدومه فكلامه
-محمد : هى نستادنكم توة
-سناء: طالع
-محمد : مزرد مع صحابى وممكن حتى بايت برة
وطلع وسكر باب الحوش وراه
ابرار معش متحكمه فى نفسها …
طلعت من جنبهم وفتحت باب الحوش منغير
مايلاحظوها ..ومشت تجرى وراه
فتحت الباب الخارجى ….
ونادت عليه : محمد
طبعا هوا حاس ان كرامته انجرحت بالهلبا …فناوى
يكلمها بكل برود ..وناوى هوا اللى يسيب قبل ما
تسيبه هيا
نزل محمد : نعم
-ابرار: شن الكلام اللى كنت تقول فيه لداخل
-محمد : والله شن بنقولك منكدبش عليك..جيت
نفكر فى موضوعنا لقيتك مش مناسبة ليا
وحتى انا مش مناسب ليك .. ربي يهنيك مع العرسان
ويكتبلم السعادة انشالله
-ابرار مش مستوعبه : محمد خيرك حبيبي شن صار
…قصدك على خاطر شفت ولد خالى متصل بيا
امبارح فالليل
-محمد : اسمعى انا عطلت توة .. وكلامى واضح ..لا
قلت ولد خالك يتصل بيك ولا سو
انا قلتلك فكرت فى موضوعنا ولقيتك مش مناسبة ليا
-ابرار دموعها فعيونها وتتكلم بكل كبرياء: وكيف
عرفت انى مناسبكش
-محمد : اولا فرق العمر.. ثانيا فرق التفكير.. ثالثا انا
حاليا مش مفكر فالزواج اصلا
-ابرار: والحب اللى كان بيناتنا
-محمد : تجربة زى تجارب كل الناس وماتكللتش
بالنجاح …عادى تصير فى ارقى العائلات
ومشى لسيارته ركب ..وقلبه غم عليه قريب يوقف
بس حس انه خدى حقه ثالث ومثلث
وخلاها هيا فالجنان .. واقفه مدهولة مش عارفه شن ادير
________________________
تمت …ويتبع ???
ياروووووحى عليها ابرار سخفتنى ..هلبا بنات
يصيرلهم المقلب هدا تنتهى علاقة حبهم بالغلط
بفعل ناس ثانية ..مش بفعلهم
غدوة نكملو انشالله
نحبكم ❤