رواية سرقت قلبي
الحلقة الرابعهحط محمد يده على مقبض الباب بيفتحه …
ويلاقى ابرار قدامه حتى هيا بتفتح الباب وبتخشتلاقو فم البابابرار شافت نرجس مع محمد فالدار بروحهم
-ابرار تشبح لعيون محمد : اسفه الباين جيت فى
وقت مش مناسب
تلفت محمد لنرجس: تبى تقوليلى حاجه تعالى لوطا
تلقينى فالصالة
وتلفت لابرار: مش كل وحدة نلقاها تراجى فيا فى دار
وتتسبل ودايرة روحها غلطت فالدار ..
وفات ابرار ونزل
ابرار انصمتت وصوتها هرب من الكلمه ..معرفتش ترد عليه
طلعت بعده نرجس : يا وخيتى بنكلمه فى موضوع
الباب تسكر بروحه ..
اللطف تلقى غير من يهزب ..وطلعت نزلت طول للدور الاول
_____________________
بعد ساعه ونص
وصلو التريس متع الفضانية ..
محمد مقعمز مع بوه وخاله فالمربوعه ما خشش لداخل بكل
والعوالة وسام وخالد وعبدالوهاب ولد عمتهم فوزية
الفيتورى معنداش خوت .. نادى نساباته رجالت خواته
واربعه من جيرانه عشرة
وصغار عمه شيابين كبار الحاج سالم والحاج خليفه
وحوش العريس جى بوه طبعا وخوته الزوز متزوجين
وخوه عصام الاصغر منه دكتور فالطبى مواليد 80و متخرج ليه سنتين ..
وجو معاهم عمامهم الثلاثه وخوالهم
الاربعه ورجالات خالاتهم وعماتهم …
المهم جابولهم 22 راجل
وجتهم حناهم حدهم ام المرحومه امهم ..
وعمتهم فوزية
ونرجس عاد تبوس وتعاود على حناها حدهم ..
وعمتك الحاجه ماشادة غير تشكر وتحط فى بنت
ولدها وفى فلاحتها وزينها
سناء مع امينه وفوزيه فالجنان واقفين على الغدى
والبنات فالكوجينه يوتو فالعصير والشاهى ويمدو
تواكم المدان كله عالدهبى …
وكل سفرة تطلع احلى من اللى قبلها
مدو اول شى شوكلاته فيريرو موضه فى هاديكة الفترة
وبعدها مدو روزاطه وعبمبر
قعدو شوى وبعدها مدو شاهى وحلويات راقيه
وبدو يسقو فالغدى ..دايرن معاه بوريك ومبطن وسلايط
مدو الغدى وتغدو التريس ودخلو السفر
المبطن والبوريك طلعو شوى ..سماح وابرار يخنبو
فيه من بعضهم..ويجرو ويبصرو
الجنان متع الحوش دورة الداير …
ابرار وهيا تجرى من الجنان تتكردس تخش رجلها فى
سطل ماشافتاش وتجى طايحه عليه
شاب سنفور ويهبل لابس زبون وداير لحية.. هوا
واحد من المعازيم بالصدفة واقف فى نفس المكان ..
لما طاحت ابرار فالسطل سمعها .. جاها يجرى : خيرك
اختى الف لاباس عليك
الشاب السنفور من يطلع ..
يطلع عصام الدكتور خو العريس طالع
يدخن برة فالجنان بعد الغدى ..
فخدى جنب بيش مايبانش من باب المربوعه
الخارجيه
________________________
لما طاحت ابرار ..بدى عصام يقول يا ساتر يا ساتر
وتحشم مقدرش يقيمها
محمد واقف فم الباب متع المربوعه .. يسمع فى
عصام وهوا يقول يا ساتر..قعد حاير خيره شن فى
جى محمد جهة عصام يجرى …يلقى ابرار طايحه …
ستر ربي انها لابسه وشاح
جى محمد يجرى متكنطى : خوى خش داخل ولا
تقدر توقف من الجهه الثانية
-عصام تحشم : سامحنى خوى ..ويمشى وهوا يتلفت
ويشبح لابرار عجباته
محمد شد ابرار من يدها ووقفها بالقوة وهوا متكنطى
-ابرار: ااى بالشوى وجعتنى خيرك
-محمد يعض فلسانه : خشى توة .. وحسابك معاى بعدين
شدت ابرار الحيط بايديها ومقدرتش تتحرك وبدت تبكى
-محمد خاف عليها : خيرك
-ابرار تبكى : رجلى مش قادرة نحركها
-محمد : باهى تسندى عليا وشدى يدى تو ندخلك انا
حطت ابرار يدها فيد محمد وقعد يمشى فيها بالشوى
لين وصلها للجنان من جهه العوالة …
نرجس شافتهم قريب ماتت
وامها وسناء وسحر وسماح مشولها يجرو شدوها ..
ودخلوها للصالة …ومحمد وراهم
-امينه : خيرها رجلك يا بنيتى
-ابرار تبكى: طحت فالسطل ومش قادرة نحركها
ومحمد قعد واقف بعيد متكى على باب المطبخ
ومربع يديه ويشبحلها
عمره ومكانته مايسمحولاش انه يوقف فى دوشة نساوين …
ومع هدا مقدرش يرجع للمربوعه ويسيبها تتألم
وفى داخله شعور هوا مش مصدقه
عنده شعور انه متمنى ياخدها فى حضنه ويسكتها
لكن الشى هدا مستحيل يصير
على جيت خالد
-خالد : سلامات سلامات خيرها ابرار
-امينه : التوت رجلها فالسطل.. شورها انكسرت
قعمز قدامها خالد وحط يده على رجلها فوق
السروال ويحرك فيها كل مرة يمس مكان عالخفيف
محمد حول تربيعت ايديه وفتح عيونه وقريب
النفس يهرب عليه ? ..ويشبح ليد خالد تتحرك على
رجل ابرار وقريب يموت ?
..مايبيش خالد يمسها بيده
-خالد : لالا مش كسر ..هدا شد عضلى الرجل اللتوت بس
وبحركه سريعه ومنغير سابق اندار شد رجل ابرار
وقامها بالقوة ومدها القدام لين قالت الرجل طق
وسمعوها كلهم
-خالد يضحك : ترا حركى رجلك توة
بدت ابرار تحرك فى رجلها عادى
-خالد : احنا فالتمارين المدربين يديرولنا هكى
-فوزية : باهى الحمدلله على سلامتك ..جاتك فالريش
وناضو كلهم رجعو للمطبخ …
وخلوها هيا مقعمزة عالصالون …
جى محمد قعمز فالصالون اللى جنبها : الف سلامه عليك انشالله ..
وسامحينى عيطت عليك .. الولد برانى ووجوده
فالمكان نرفزنى
-ابرار: لا لا عادى ..وحتى انت صحيت وسامحنى
تعبتك معاى جبتنى للمطبخ بجهدك وانا متكية عليك
-محمد : هدا اقل واجب نديره معاك
قعد يشبحلها وهيا واطت راسها
وناض هوا بيطلع يمشى للمربوعه
-ابرار: اسمع شن بنقولك
-محمد : اهلى سمونى محمد.. ماسمونيش اسمع
-ابرار: باهى يا محمد ..سامحنى عالكلمة اللى
قلتهالك امس
-محمد : اما كلمه فيهم بالزبط تبينى نسامحك عليها ..
انتى قلتى هلبا كلمات …متع انشالله تموت ..ولا ربي
يقص لسانك.. ولا انت مش زى خوتك …ولا غيرها
وغيرها
-ابرار تضحك : دير تحديد للكل .. وكلهم كلهم
سامحنى عليهم
-محمد : نسامحك بس على شرط حتى انت
تسامحينى …طولت لسانى عليك شوى امس
-ابرار : قلتلى شوى صار???
-محمد : شوى ولا هلبا المهم سامحينى
-ابرار: خلاص السماح بيناتنا
ضحكلها محمد ومشى
-طلعت نرجس : محمد اهو الشاهى الاخضر باللوز
نصبو فيه كان بترفعه للرجالة
-محمد متلفتش جيهتها : تو نبعت وسام يجيبه
ومشى للمربوعه ..
وابرار تشبحله لين وصل لباب المربوعه وخش
ساوو البنات ثلاث اقعاد من الغدى بيش يبعتوهم لحوش العريس ..
ومعاهم المبطن والبوريك والروزاطه والبكلاوة والعبمبر
وكل شى ساووه فى سفر قنينه وربطوه بالتول …
ومده وسام لعصام خو العريس
عصام خدى الحاجات ومشى بالسيارة بيش يرفعهم لامه
والطريق كله وهوا يتخايل فى ابرار قدامه
قلبه انخطف .. زى مايقولو صار معاه حب من اول نضرة
ويتخايل فيها كيف تبكى وتتدلع …
ووجهه عليه ابتسامه عريضه
__________________________
وتمت الخطبه وطلعو روحو حوش العريس
وخش الفيتورى قعمز جنب الحاجه حدهم تسأل فيه
عالناس باهيين ولا لا
وقعد بحداها يهدرز عليها
سناء فالدار مقعمزة وتبكى …
اتفكرت امها ..
خشت امينه للدار ..
-امينة: سنيوة خيرك
-سناء تمسح فدموعها : شى
-قعمزت امينه جنبها : ربي يرحمها ويوسع عليها .
-اضبطت سناء عمتها امينه : كانها حية راهى فرحانه توة ..
-امينه : عارفاتك تفكرتى امك .. حتى انا اللى
منعرفهاش اتفكرتها اليوم لا بال انتى وخواتك
-بدت سناء تبكى: ماجتش حتى وحدة من خالاتى وقالت بنت المرحومه
-امينه : سلامت اوبيك وخوتك ووخياتك .. معليش
هما تغششو على خاطر ماناديتهمش لما جو اخته
ومرت خوه
-سناء : هما زوز نساوين جو يشبحو فيا بس ..
شن بنلمد عليهم الناس انا … وهما اصلا حرجو
يحسابونى نساير فيك انتى ومانبيش انايهم على
خاطرك مرت خوك توفت …لكن هما زعلانين بلا قدو
حتى كان معندكش وفاة مكنتش بناديهم فاليوم هداكه
-امينه : معليش سيورهم يرضو ويجو فالبيان
-سناء: اللى ماجتش اليوم مانيش مناديتها فالبيان
-امينه : لااا سلم بنيتى اسكتى ومتقوليش الكلام
اللى ميجيش ..هادو خالاتك ..تسمعك عمتك فوزية
تعاودلهم الدوة ..وانا منبيش فيكم كلام
-سناء نزلو دموعها : بوى ادكر امى يا عمتى
-امينه : اللى بكيتيه انتى توة ..بكاه هوا امبارح لما ادكر امك
-سناء تبكى : ربي يرحمها ويغفرلها
وشرين تليفونها …
امينه ناضت طلعت مشت للفيتورى والحاجه
وسناء ردت عالتليفون
-سناء: الو
-ايمن : نحبك يا احلى حاجه فحياتى
-سناء: ربي يحفظك ليا
-ايمن: بس بس هكى .. جفاف تام
-سناء: كلهم يتحاوسو فالصالة منقدرش نقول اى كلمه
-ايمن : خيره صوتك هكى
-سناء متبيش تنكد عليه : لا لا مافى شى
-ايمن زابطها : خلاص حبيبي عاد .. من امبارح وانتى تبكى ..
ربي يرحمها ياسرك دموعك جفو
ايمن شاب كويس مواليد 78 متخرج من الهندسة زيها ..
لما اشتغلت سناء لقاته يشتغل قبلها فى نفس المكان ..
ومن وقت باشرت سناء فى شغلها حط ايمن عليها العين …
قعدو سنه علاقه … وتوة تقدملها
__________________________
فوزيه مقعمزة مع الحاجه حدهم
-الحاجه : شنى صار معاكم انتى وبنت خوك
-فوزية: قاعدة معاندة ومتبيش
-الحاجه : مهبولة ماتلقاش خير من ولد عمتها
-فوزية: الله غالب .. غير كان نعرف شنو اللى غيرلها رايها بس ..
كل مانسأل ولدى يقولى امر خصوصى بينى وبينها
-الحاجة : انتى كلمى اهل بوها تو تفهمها التريس
كلهم زى بعضهم وتخليها تغير رايها
-فوزية : سعدودهم باها يا حاجه
-الحاجه حدهم : شنهيا
-فوزية : اهل بوهم يا عمتى حدهم .. سعدودهم وين طاحو بيها
-الحاجه حدهم : نية خديجه بنيتى ..ماتت ماشاغلها شى غير بناويتها
-فوزية : لكن شكله محمد لتوة مزال مابلعهاش
-الحاجه حدهم : حاشاه وليدى محمد ..شن خلطه
عالنساوين ..عايش بالاحترام مع بوه واهل بوه
-فوزيه تحب القرمة ?معجبهاش الكلام : ربى
يهنيهم ببعضهم .. خلى انوض النهار راح بالله
وناضت فوزية سلمت عليهم كلهم وبعتت لمحمد
بيش يوصلها لان ولدها عبدالوهاب طلع هوا وخالد
??????
البنات فالمطبخ يغسلو فى باقى الماعين
سماح وسحر مغصوصات ودموعهم فعيونهم ادكرو امهم …
لكن مايبوش يبكو ويقلبو المناسبة لاختهم غم
ونرجس عاد خاشه طالعة ادور فى محمد
ومحمد طلع يوصل فى عمته
كملو ضمان وسيقو وتكمو
وركبو البنات لدارهم ..
ونرجس مقعمزة فالصالة موتية روحها تبى تروح
قد ماقاللها وسام خلى نوصلك وهيا تتسبل مزال
ماتبيش تروح ..
تراجى فى محمد تبيه هوا يوصلها???
______________________
-خالد : انا عن نفسى عارفك ناوى الخير و جاى من
الباب تو نزيد نحاول معاها
-عبدالوهاب : نديرو خطوبة توة وتقرا براحتها نستناها انا
-خالد : تو نكلم محمد يكلمها ..هوا نوعه ايأثر على خواتى
-عبدالوهاب : وراس خلودة شوفها ..مش معقولة
غلطة تمسح بيها تاريخى كله
-خالد : غلطتك كبيرة ولد عمتى .. وهادى يتيمة
..واى لقطة اتأثر فيها
-عبدالوهاب : تى باهى كانا شافتنى مركب معاى
وحدة… هوا الراجل تلقاه متزوج ويدير فى علاقات
فمابالك انا قاعد شاب وعزابى …
مفروض تعاقبنى ..تزعل منى …
مش عامين وانا نجرى وراها وهيا ماسحتنى من
حياتها بكل …
انا كنت حكم خاطبها وانتو كلكم عندكم علم و حتى
خالى عنده علم
-خالد : تو نشوف محمد ونرد عليك
______________________
روح محمد مهموم …
لقى نرجس مقعمزة فالصالة
-محمد : السلام عليكم
-نرجس: وعليكم السلام
-محمد: خيرك بروحك وين البنات
-نرجس: البنات ركبو فوق .. وانا بنروح من بكرى
نراجى فيك توصلنى
-محمد : معنديش سيارة توة ..سيارتى طلع فيا بوى
خداها توة بعد ما وصلت
-نرجس : لا لا ..معقولة
-محمد : زى منحكيلك ..اهو تو نقول لوسام يوصلك
-نرجس : باهى خود انت سيارة وسام ووصلنى
-محمد يضحك : وشن الفرق حتى وسام زابط نعتت حوشكم
وطلع نادى وسام قاله وصلها
-محمد : اسمع قلتلها سيارتى طلع فيها بوى ..اصبر
شوى نحولها من قدام الحوش وبعتالى اطلعو ?
-وسام : تى باهى وصلها يا راجل خود بخاطرها
البنت عاشقه فيك ومتيمه …ويضحك عليه??
-محمد: تى فكنى منها مرزن دمها ..خلى نحول
السيارة ونخش وبعتالى اطلعو باهى
تكم محمد اموره وطلعت نرجس مع وسام وصلها
وركب محمد نادى سناء …
طلعت سناء لمحمد مشت هيا وياه لداره
محمد قعد يبارك لسناء ويحكيلها على ايمن ان تعرف
عليه كويس الايام اللى فاتو ..وانه زاد تلاقى معاه
مرتين فالمطعم بعد ماجاهم ايمن بروحه للحوش …
وقعد يشكر فيه ويمدح ..وتمنالها حياة حلوة معاه
-سناء: خيره وجهك شاحب يا حميدة
-محمد اتكى عالصالون: مندسش عليك يا سنيوة ادك
رت امى …
وعيونه تعبو دموع
-سناء نزلو دموعها وتبى تغير الموضوع : حتى انت
وخى هوا هداكة لازم تشوف نصيبك
-محمد : انشالله غير خلى نهنى عليكم وحاضر
-سناء: نرجس بنت خالى واضح انها معجبة بيك …
والبنت كويسة وتستاهل كل خير
-محمد : نرجس كويسة وربي يحفظها .. لكن لما نبى
نتزوج ..تو نختار شريكه حياتى بروحى باهى
-سناء: لكن ننصحك بيها يا محمد …نرجس محترمه
هلبا وكويسة
-محمد : ماقلتش شى انا ..لكن ردى بالك اطمعيها ولا
تقولى قدامها كلمة هكى ولا هكى ..راهى البنت مش فى بالى
-سناء: براحتك يا حميدة
________________________
ابرار وسماح طلعو من الدار وبينزلو للدور الاول
ابرار شادة التليفون وتتصل ..
وفتحت سناء باب دار محمد وطلعت ..ومحمد طلع وراها
وصلو البنات للصالة..لقو حناهم حدهم مقعمزة هيا
وامينه يشربو فالشاهى ….
لحقتهم سناء حتى هيا
ومحمد قعد واقف فالدروج
يسمع فى ابرار تتكلم فالتليفون
-ابرار: هيا يا خالى المغرب ادن من بكرى
-خالها ناصر : بتصبري شوى عالق فالزحمه فى بن عاشور
-ابرار: باهى اهو تو نصبر غير تعالالى طول
-سناء: اقعدى خيرك يا ابرار
-ابرار: والله مانقدر مقسمين بالدور على صغار خالى
بيش ماحد يقلق منهم
-سناء: مرتاحه فى حوش خالك سعيد يا ابرار
-ابرار: ايه عادى .. خالتى ربيعه منشبحش فيها
هلبا .. وانا وسهام صحبتنا قوية هلبا …وديما فى
دارها احنا فوق
-سناء: اول ماتقلقلى من حوش بوك او حوش خالك
تعالى هنايا طول
-ابرار: ربي يخليكم ليا يا سنيوة ..وانا من عندى غيركم
-سماح : وحوش عمك اسماعيل نسيتيهم ..ربي
يخليهم ليك حتى هما
ناضت ابرار تجرى ورا سماح وتضرب فيها ..
-سماح :سيورك بتجى كنتهم ماعندك وين هاربة منهم
ومحمد واقف وسمع الكلام كله ….
مزبطش ..هيا ابرار مخطوبه قصدهم ولا شنو
نزل محمد من الدروج ..
-محمد : السلام عليكم
-كلهم: وعليكم السلام
-محمد يكلم فى ابرار : انا طالع كان تبى نوصلك
-ابرار: ايه ياريت لانى عطلت الحق
-محمد : باهى هيا
-ابرار: سماح البسى عبايتك وصلينى هيا
-حناهم حدهم : حتى انا حطتنى فالحوش سلم وليدى
-امينه : اقعدى باتى الليله يا حاجه وغدوة روحى
-الحاجه حدهم: وراس بنيتى مانقدر .. صلاح ولد
خوى قاعد عندى هالايام ايرادع فى اوراقه..منقدرش
نخليه يبات بروحه
-محمد : باهى اهو انا فالسيارة .. هيا سقدى يا سماح
-سماح توشوش لابرار : وراس برورة متفضحينيش
قدام محمد ..ماك عارفه المنجوه قريب يوصل من
تونس وبيكلمنى مانقدر نطلع حيزعل منى …
-ابرار: تى باهى كيف والله منقدر انروح معاه بروحى
-سماح : اهو حناى معاكم ايوصلوك انتى الاولى..
وبعتالى وهوا مروح يحط حناى فى حوشها
-ابرار: باهى قولى لحناك من هنايا ان بيوصلها هيا
بعدى نخاف تفلقنى فالطريق
-سماح تلفتت لحناها : حناى انا حسنى سقعانه شكلى
بنسبرد منقدرش نطلع من الحوش .. وصلو ابرار هيا
الاولى وبعتالى يوصلك انتى محمد باهى
-الحاجه حدهم : على كيفهم انا مانيش مستعجلة
-امينه : علاش متبيش تمشى معاها انتى يا سماح
-سماح : والله يا عمتى شكلى بنستبرد … اهو حناى
معاها يوصلها ويروحو
سكتت امينه …مدامه الحاجه معاها عادى
__________________________
لبست ابرار سبيدروها .. وخدت شنطتها
ولبست الحاجه حدهم فراشيتها وربطتها فى نصها
بمحرمه ..وطلعت
ركبت الحاجه من قدام مع محمد .. وركبت ابرار من الخلف
ساوى محمد المراية البرانية اللى عالجنب من جهه
الكرسى اللى بحدا السواق .. عدلها على ابرار ..وقعد
يشبحلها منغير ماهيا تلاحظه
ولع السيارة وقعد يسخن فيها
-الحاجه حدهم : ايييي الدنيا ظلمت انشالله صلاح
قاعد ماروحش
-محمد : هوا يروح فالليل
-الحاجه حدهم : ايه يطلع من الصبح ويروح فالليل
-محمد : باهى مزال
-الحاجه حدهم : يبهى ايامك يا وليدى والخير وراك
وقدامك .. والعقبالك ناخدولك بنت الحسب والنسب
-محمد يضحك : مزال يا حناى
-الحاجه: وين مزال وعمرك قريب الاربعين .. انا
شايفتلك بنية وعارفتها بتعجبك انشالله
-محمد : وعلاش تشوفيلى انتى يا حناى .. شنو انا
عيونى انعمو ولا شنو
-الحاجه حدهم : اللى شايفتهالك انا ماشالله عليها
ومافيش زيها فالزين والفلاحه .. حتى ابرار تعرفها وتقولك حق
-تلفت محمد لابرار: منهيا اللى يبو ياخدوهالى وانتى تعرفيها
-ابرار استغربت : والله مانعرف انهم يبو ياخدولك اصلا
-الحاجه حدهم : قلتلك ابرار تعرفها وتعرف
شكرانيتى فيها حق
-ابرار: ومنهيا اللى انا نعرفها
-الحاجه حدهم : نرجس بنت ولدى .. والله ماتلقى زيها
محمد قعد يضحك …
-الحاجه حدهم : غير قوليله عليها وعلى فلاحتها يا ابرار
-ابرار: لا من ناحية الفلاحه منحكيلكش .. حتى
الفطور فتشته مالقيتش فيه رموشها .. معنا نضيفه ومية ميه
-الحاجه حدهم: رموش شنو تقولى عليها
-ابرار قربت من ودن محمد : كان تراجى فالسيارة
تسخن راهى قريب تفوز شكله عجبك الكلام
محمد يضحك ???
-محمد : حناى صحيتى وكبر قدرك .. لكن لما نبى
نتزوج تو نعرف انا كيف نختار باهى
ومشت السيارة ..
طلع من حوشهم فالسياحية بيوصل ابرار للدهمانى
لحوش خالها وبعتالى بيرد حناه معاه لغوط الشعال وبيروح
هما كيف طلعو من شارع ابن بطوطه .. بيخش عالسمافرو
شرين رقم الحاجه…. ردت لقاته صلاح ولد خوها
-صلاح : وينك يا عمتى انا فم باب الحوش
-الحاجه : اهو وصلت انا دقيقتين ونكون عندك
وسكرت الخط
-الحاجه : سلم وليدى حطنى انا الاولى ولد خوى فم الباب
-ابرار : تى كيف يا حناى ..وصلونى انا الاولى وبعتالى روحو مع بعض
-الحاجه : والله ماصارت ولد خوى فم الباب .. شنو
متحشمه من محمد راهو زى وخيك
-محمد : حناى انا قلتلك نوصلو ابرار هيا الاولى وبعتالى ساهل
-الحاجه: يعنى ولد خوى يقعد ملوح فالشارع لين
نوصل للدهمانى ونجى ..والله ماصارت
-محمد : تى ماهو مالاول كنتى بتمشى
-الحاجه : هداكه مالاول نحسابه بكرة …لكن توة
كلمنى ولد خوى وقالى فالشارع تبينى نخليه ملوح
-ابرار: توة ليش هكى يا حناى ..باهى خليتى سماح
تجى معانا..كان ندرى هكى راهو مطلعتش بكل
وشرين رقم الحاجه ثانى
-ردت : لا لا متخافش اهو وصلت يا صلوحه
وسكرت الخط
-الحاجه : ولد خوى يرعش شنطه معبية فلوس وهوا
واقف فالشارع وتبونى نصبح فالدهمانى
نزلنى حتى اهنى فالطريق تو نكمل حتى على رجليا
-محمد تكنطى: باهى اهو تو نحطك انتى الاولى
ومشى لحوش حناه وحطها قدام الحوش
نزلت ابرار ساعدتها عالنزول
ورجعت ركبت من الخلف ووسكرت الباب …
ومشى محمد بالسيارة …
-محمد : تو كان بنرجع لسماح فالسياحية يبيلك
بيش نوصلولها عالاقل ادان العشا من الزحمه …
خلى نوصلك بسرعه وخلاص
ومشى محمد لطريق الدهمانى
وابرار مازالت راكبة فالكرسى الخلفى
وقف محمد على جنب : تعالى اركبى من قدام شن بناكلك انا
ابرار نزلت ركبت من قدام لا عرفت روحها فرحانه ولا
عرفت روحها غلطانه
مشى محمد وهما ساكتين ….ابرار عارفه ان اللى ادير
فيه غلط …لكن فى داخلها فرحانه انه مقعمزة مع
محمد بروحهم فى سيارته
______________
ابرار ومحمد ماشيين فالطريق
ماتكلموش مع بعضهم حتى كلمه
ساكتين وخلاص
وصلو جهه حوش خالها سعيد بيخشو شارعه
-محمد : سامحينى عالموقف اللى صار
-ابرار : بالعكس انت سامحنى
-محمد : لا عادى
وابرار تشوف قدام حوش خالها تلقى محسن ولد
خالها مقعمز هوا وجماعته قدام الحوش بالزبط
ونهايه السور تشبح فى خالها سعيد واقف مع جيرانه الزوز
بدت ابرار تندب : حيه عليا
-محمد : خيرك شن فى
-ابرار واطت رسها : دور السيارة وارجع بسرعه
-محمد دور السيارة ورجع : غير فهمينى شن فى
-ابرار : حيه عليا محسن ولد خالى مقعمز قدام الباب
وخالى واقف فالسور ..كان يشبحونى جاية معاك
بروحى فالليل يقتلونى
محمد طلع من شارع حوش خالها وقعد يمشى
فالشوارع اللى بعده
وهيا يدت ترعش مع بعضها
-محمد : باهى غير مترعشيش روحك
-ابرار: حيه عليا يا محمد كيف بندير توة بس
وقف محمد السيارة قدام محل …
نزل جابلها شيشه امية ..
مدهالها
-محمد : اشربي امية ومعش ترعشى روحك
ومتخافيش مدامك معاى
قامت ابرار راسها وشبحتله …
-محمد شدلها يديها الزوز : مدامك معاى مش ح
نخلى اى حد يقول عليك اى كلمه بطالة
اوثقى فيا
ابرار سكتت وهدت شوى وقعدت تشبحله
وايداها قاعدين بين يديه لكن يرعشو
-محمد مبتسم : اهدى وقوليلى انك واثقه فيا
-ابرار : باهى انا واثقه فيك
ولع محمد السيارة ومشى وهيا معاه
__________________________
انتهى ….ويتبع ??
ابرار ومحمد بروحهم فالسيارة ويدورو فالدهمانى
زعما كيف بدير ابرار وكيف بيتصرف محمد
وسحر شن قصتها مع ولد عمتها
وعصام هدا اللى طلع فالخط
الحلقه الجاية نكملو
نحبكم ❤