رواية سرقت قلبي
الحلقه التاسعه❤❤❤❤❤❤❤❤❤
-محمد: مدخليش فيك اركبى مستاحشك-ابرار: حاضر يا همىوبالفعل ابرار بدت تفكر كيف تسحب نفسها وتركب
بيش تشبح محمد
خش وسام للحوش
-وسام : السلام عليكم
-البنات : وعليكم السلام
-وسام يكلم فى سماح وسحر : هيا كان بتمشو
-سماح : هيا دقيقه وجاية ..ابرار وتى روحك
-ابرار: لا لا منيش طالعه .. الصبح طلعنى خالى رجليا قريب ايطيحو
-سحر: غير هيا بلا جو
-ابرار: لا والله بنخش نرقد توة .. ولما تروحو
نوضونى نوتو الحاجات
-وسام : غير هيا بري معانا منعطلوش
-سماح نزلت : غريبة ماكش ماشيه
-ابرار: شريت انا غير روحى وتو نوريك اللى شريته
-وسام : غير هيا سقدونى ..واسمعو راهو معنديش
بيش نزيدلكم
-سماح : سلامة محمد وبوى عطونا من بكرى ..انت
غير ارفعنا بس سادنا
-سحر: عارفينك معندكش فلوس مسلكاتك اولا بأول ???
وضحكو كلهم
-وسام تكنطى: والله غير عارف بوي بيديرلى وجيج
كنهدا والله مانى رافعكم ..خزيه
-سحر: توة تزعل من وخياتك يا ويسو ..نبصرو عليك احنا
– سناء: ابرار عزمتى سهام بنت خالك
-ابرار: الحق ما عزمتهاش ..مقلتيليش
-سناء: كلميها وهاتى نعزمها انا
ابرار خافت محمد يخش انتظار وتشوف سناء رقمه
-ابرار: معنديش رصيد ..هاتى تليفونك نكتبلك الرقم
وخدت ابرار تليفون سناء وكتبتلها رقم سهام
البنات طلعو وسناء تكلم فى سهام ..وعزمتها
__________________________
ستادنت منهم ابرار وقالتلهم انها بتركب ترقد شوى
وتو تنزل بعتالى لما يروحو البنات
وخلت امينه وسناء مقعمزين فى دار التقعميز
خشت ابرار لدار سماح ..وكلمت محمد
-ابرار: الوو
-محمد: وينك حبيبي
-ابرار: البنات طلعو وانا قعدت
-محمد : وين انتى توة
-ابرار: انا فى دار سماح
-محمد : باهى تعالى هيا
-ابرار : نرعش مع بعضى وراس حبيبي مانقدر نجيك لدارك
-محمد : بااااهى تو نتصرف انا
وسكر الخط ..
ابرار حايرة خيره سكر زعما حرج ولا شنو
وفى لحظه انفتح باب الدار خش محمد وسكر بالمفتاح
وقف قدامها …يشبحلها ومبتسم..ابرار منغير وشاح
-ابرار ?: ياحليلى منك ..اطلع ..اطلع
-محمد : مش حنطلع
-ابرار: تى وين وشاحى
محمد يضحك …جى وقف قدامها شدها من كتافها ويشبحلها معجب
-محمد : سبحان الله تهبللللى ..ربي زايدك جمال على
بنات الدنيا كلها …
ويشبحلها : تصدقى ولا كأنك نفس البنت اللى بالوشاح
-ابرار حطت يدها عل قصتها وحطتها ورا ودنها:
بلحقة??
-محمد حط يده على شعرها : قصدك هدا كله ليا انا
هيا شعرها مش طويل هلبا …واصل لعند ضهرها ..
لكن كثيف وناعم
-ابرار تدلع عليه وتضحك : والله انت والنصيب
دخل يديه الزوز فشعرها من الجيهتين ..وهيا واقفه قدامه
-محمد : اوعدينى تكونى ليا والشعر هدا مايلمسه حد قبلى انا
-ابرار: مستحيل لا قبلك ولا بعدك
-محمد : تحبينى
-ابرار: نحبك ونموت فيك وكل شى كل شى
محمد عنده نية يضمها ويبوسها ..وعارفها لو دار
هكى هيا مش حتقاومه …
لكن هوا مايبيش .. عارفها بنية ومزال ماشافت شى
..ومشاعرها محدودة
خداها من يدها وقعمزها عالسرير ..وقعمز جنبها
-محمد : ابرار توة عاجباتك تصرفاتى هكى زى
المراهق
-ابرار: كيف
-محمد : يعنى خايف عليك وفى نفس الوقت
مستاحشك ومش قادر نقاوم فكرة انك تكونى معاى
فى نفس المكان ومنشوفكش
-ابرار: الله غالب هكى الظرف
-محمد : توة عاجبك كيف نتلبد بيك من دار لدار
ابرار سكتت
-محمد : انا الحق معش يساعدنى نتلاقى معاك هكى بالدرقه …
نبى نشبحك ونكلمك قدام الكل
-ابرار: وحتى انا نبي هكى
-محمد : خلاص نخطبك الاسبوع هدا
-ابرار فرحت : باهى خلاص …
-محمد حط يده على شعرها : خلاص معش عندى
صبر ..نبى نرقد على هالشعر الحلو هدا
-ابرار متحشمه وتحول فى شعرها من يده : حبيبي
حول عاد?
_______________
بعد ربع ساعه …
-محمد : انتى ليش تماطلى
-ابرار: حبيبي انا مش نماطل … اقسم بالله بوى فالصحراء…
-محمد: انا نحكى على حوشنا نبى نكلمك عادى قدام
الجميع امك وخواتى..
خلينى نقول لامك ..ونحكى لخواتى …
-ابرار: حبيبي هوا هما كلهم عشرة ايام …يروح بوى
من الصحراء تمشى تكلمه طول
-محمد : انتى متاكدة ان بوك فالصحراء توة
-ابرار: ايه لكن ميعطلش
-محمد مسك يديها الزوز: باهى على خاطرك حنصبر عشرة ايام …
شبحلها لقاها وجها متاخد وهيا تقنع فيه …
حب انه يضحكها : حتكون اسعد لحظه فحياتى
-ابرار: قول فى حياتنا الزوز
-محمد حط يده على وجهها : تعلقت بيك هلبا يا
عمرى فالفترة القصيرة هادى
-ابرار حطت يدها على يده وغمضت عيونها : وانا نفس الشى…
وفجأة طق باب الدار …
ابرار تجمد الدم فعروقها
__________________________
الفيتورى خش للحوش
-الفيتورى : السلام عليكم
-سناء: وعليكم السلام
-الفيتورى : شنو وتيتى روحك يا خديجه
-سناء: وتيت روحى.. الحمدلله يا بوى
-الفيتورى : كان نقصاتك حاجه قولى
-سناء: ربي يحفظك يا بوى
-الفيتورى : وين امينه
-سناء: ركبت للدور الثانى ..قالت بدخل الحوايج
المغسولات من السطحه
وخشو البنات سحر وسماح ..
-سناء: خيركم روحتو ..معقولة فى ربع ساعه شريتو
-سماح : والنبى فكينى هدا المفروض الواحد
مايطلعش معاه
وجت سماح راكبة من الدروج ??
-الفيتورى يكلم فى سماح : تعالى خيركم تخاصمتو
ولا شنو
نزلت سماح من الدروج وقعمزت فالصالة وربعت
ايديها حرجانه
وخش وسام يبي يزيد يتعارك معاهم ..
وتفاجأ ببوه واقف فالصالة سكت …
_________________________
باب دار سماح يطقطق
محمد وابرار واقفين مع بعضهم والباب مسكر بالمفتاح …
ابرار ترعش …
حط محمد يده على فم ابرار .. مايبيهاش تتكلم ولا
ادير صوت من الخلعه
-خالد : سماح افتحى
ويطقطق …
-امينه واقفه وراه : سماح وسحر طالعين مع وسام
-خالد : امالا الدار من مسكرها
-امينه : ابرار راقدة لداخل
-خالد : قبل نبى شحن التليفون
-امينه : برة خود شحنى تلقاه فى دار المسند
-خالد : باهى
وهدا كله محمد فالدار واخد ابرار فى حضنه وهيا
ترعش مع بعضها
-محمد يهمس بالشوى وحط يده على شعر ابرار
ويمسح عليه : اهدى حبيبي .. اهدى بالشوى عليك
متخافيش انتى معاى رانى راجل ومانرخيش بيك
شبحتله ابرار ….
-محمد : شفتى …هدا اللى نحكى عليه انا.. لو
موضوعنا علنى راهو منتلاقوش فالديار المسكرة
-ابرار تهمس: كيف ندير توة
-محمد حضنها بالقوة : متخافيش انا معاك …
حط يديه على كتافه وشبحلها: توة اطلعى للممر
..وشوفى كان مافى حد ..طقى عالباب تو نطلع انا بسرعه
-ابرار ترعش: باهى
وبالفعل فتحت ابرار الباب وطلعت وسكراته وراها
لقت امها فالممر..
-امينه : نضتى ??
-ابرار: نضت ايه ..منو كان يطقطق
-امينه: خالد يبي الشحن من سماح …
-ابرار: وينه خالد اهو تو نعطيهوله
-امينه : لا لا نزل لوطا بياخد شحنى
-ابرار: شن اديري ياااام نعاونك
-امينه: لا كملت .. انزلى نسمع فالبنات روحو لوطا
ومشت امينه للدروج ونزلت
طقت ابرار عالدار
طلع محمد بسرعه وخش داره
ونزلت ابرار من الدروج وقلبها قاعد يطق
وصلت للصالة لقت عمها الفيتورى
-ابرار: اهلا عمى
-الفيتورى : اهلا برورة بنيتى شن حالك وشن حال حوش خالك سعيد
-ابرار: الحمد لله كلنا كويسين
-سماح : توة كيف يا بوى بترفعونا ولا شنو
-وسام : لما تتأدبى نرفعك
-الفيتورى : هى تحشمو عاد
نزل محمد من الدروج
-محمد: خيركم شن فى ..
-سماح : احنا طالعين معاه نسحابو بنشرو ..شوى ردنا للحوش
-محمد : منهوا
-سماح : خوك وسام
-وسام : وعلاش رديتكم انا …تكلمى ..احكى على
قلت ادبك وتعليقاتك البايخه
سماح سكتت وهيا اتمتم بالشوى
-الفيتورى : محمد وليدى ارفعهم انت
-محمد يشبح لابرار: هيا نوضو عادى نرفعهم
-سماح وقفت طول : هيا باهى بسرعة معش وقت …
وتلفتت لابرار: تى هيا بري معانا انتى
-ابرار: هيا عادى مدامنى رقدت شوى ?
وناضو سحر وسماح وابرار طلعو مع محمد
سحر ركبت من قدام .. وسماح وابرار من الخلف
محمد وجه المرايا على ابرار ومنزلش عينه من عليها
شرو البنات كل وحدة فيهم لبسه للبيان
وروحو
ابرار وسماح فالدار …كل وحدة تقيس للثانية فى لبستها
واتفقو انهم يمشو على رجليهم غدوة يسشورو
شعرهم عند المزينه اللى فى نهايه الشارع
وكلمت سناء شركه خدمات اتفقت معاهم يبعتولها
ثلاث بنات خدمات ..مدان وغسل اماعين
_____________________
ثانى يوم …
فاقو الساعه 9
كنس فالحوش ومسح وتسييق جنانات ..
الساعه 11 كملو ..
ودارو فطور وقعمزو فى طاولة المطبخ ..
خش محمد
-محمد : صباح الخير
-البنات وابرار: صباح النور
-سحر : قعمز افطر معانا
قعمز محمد عالكرسى …
عطاته سماح سندوتش ..
تلفت محمد لابرار : فى شاهى
-ابرار ?: فى ايه شوى بس نسخنه
قام محمد تليفونه وكتب وحطه جنبه
تليفون ابرار هزاز فى جيبها
قامت شافت لقتها رسالة من محمد ” نحبك ”
ابرار معش قادرة ادس ابتسامتها قدام البنات
خشت سناء صبحت عليهم ..
لابسه وبتمشى للمزينه ادير شعرها ومكياجها
-محمد : متسوقيش بروحك اهو تو نوصلك
-سناء: لا بتجينى سعاد صاحبتى ..مش ماشيه فسيارتى …و المزين قريب
-محمد : على راحتك ..مدام معاك صاحبتك
وطلعت سناء …
وطلعت سحر ركبت للدور الثانى ….
شوى وبدت تنادى على سماح تليفونها يشرين ..
طلعت سماح من المطبخ ركبتلها فوق
وقعدو ابرار ومحمد بروحهم
-محمد وقف واتكى عالرخامه اللى عالجنب
ويشبحلها : ستاحشتك
-ابرار تضحك : اسسس يسمعونا
-محمد : اسمعى نبى نشوفك باللبسة متع البيان مدخليش راهو
-ابرار: منقدرش … تو نصور فيها ونبعتهملك بالبلوتوت
محمد: لااااا نبى نشوفك قدامى ..
-ابرار مدتله الشاهى : باهى تو نشوف كان قدرت
..عظامى قاعدات
يرعشو من عملة امس
-محمد يضحك: الرعايش هادى كلها تقعد دكرى حلوة
نعاودوها حتى لصغارنا
وضحكو الزوز
-ابرار: هيا اطلع عاااد .. الشاهى وعطيتهولك .. وشن
تبى ثانى ياسرنى من الرعايش ??
طلع محمد للصالة وفى يده طاسه الشاهى
وطلعت ابرار لدار التقعميز لقت امها مقعمزة
قعدو يهدرزو على خالها ناصر .. وعلى قرايتها
________________________
الساعه 1
نزلت سماح ..
-سماح : ابرار هيا نمشو للمزينه
-ابرار: هيا انا واتية
طلعو للصالة لقو محمد كيف خاش من باب الحوش
-محمد : وين ماشيين
-سماح : للمزينه بنسشورو شعورنا
-محمد : اطلعو نوصلكم
-سماح : المكان قريب حتى عالرجلين
-محمد: لا لا عادى نوصلكم انا اطلعو هى
وطلعو سماح وابرار …
ركبو مع محمد …وصلهم للمزينه وعطاهم حق
السشوار.. وقاللهم لما تكملو كلمونى نجى تروح بيكم
وفعلا الساعه 2 ونص كملوه وجاهم محمد روح بيهم
ركبو للدور الثانى لقو سحر كيف كملت سشوارها
تحب ادير بروحها ..وبدو يمكيجو ويوتو فى روحهم
__________________________
الساعه 4 ….
خشت سناء للحوش مروحه من المزينه
-سناء تتكلم فالتليفون : حبيبي خشيت للحوش انا
خلاص نكلمك بعد مانلبس
وضحكت بابتسامه عريضه وسكرت الخط
خشت للصالة لقت عمتها امينه
امينه اضبطتها وسلمت عليها وزغرطت
نزلو البنات يجرو اضبطو اختهم وقعدو يسلمو عليها
-سحر تكلم فى سناء : الساعه 4 سقدى روحك الناس
على جية
ركبت سناء والبنات للدور الثانى
وامينه لابسه جلابيه وحجاب ووجها صافى ..
مقعمزة والحوش مبخر ومساوى
??????
فالدور الثانى …
ابرار لابسه ومتكمه.. شرين تليفونها
شافت الرقم ..
-شبحت لسماح : محسن ولد خالى
-ردت عليه : اهلين محسن
-محسن: اهو بنجيب سهام .. شوى وانزلى افتحيلها
-ابرار : شن رايك نخلى سماح تفتلحها ?
-محسن: انتى من جنبك توة
-ابرار: بروحى ما معاى حد وغمزت لسماح
-محسن : انتى قلتيلها
-ابرار تشبح لسماح : لا لا لتوة ماقلتلهاش
وجت سماح حطت ودنها جنب ودن ابرار اللى عليها
التليفون تبى تسمع
-محسن : باهى انتى شن رايك انكلمها ولا لا
سماح تلفتت طول لابرار تشاورلها بوجهها ا نها تقوله
ايه كلمها ???
-ابرار: اسمع انا نقوللها تنزل هيا تفتح لسهام وانت
حاول تفتح اى حديث معاها
-محسن : باهى قوليلها تفتح هيا نشوفها ..لكن
منقدرش ندوى معاها الحق
وخش محمد انتظار على تليفون ابرار …
-ابرار: باهى انت اوصل وشرينلى
” تبى تنهى المحادثه بسرعه خايفه من محمد?”
-محسن : باهى
وسكرو الخط …
ومشت ابرار على جنب على سرير سحر تبى تتصل بمحمد.. بتشرينله مقدرتش ….
لان لحقتها سماح عالسرير …
دارت ابرار تليفونها سايلنت وحطاته عالسرير
سماح تحكى مع ابرار .. ومحمد يتصل ويعاود لين
اعصابه نحرقو
سماح تحكى وتسأل على محسن …
وابرار بالها عند محمد ….
ناضت سماح من جنبها وقفت جنب الدولاب بتلبس
وابرار شافت تليفونها لقت رسالة من محمد
-محمد : “وينك حبيبي بنطلع ..نبى نشوفك..علاش اديريلى هكى ”
-ابرار تشجعت وبعتاله:” خلى باب دارك مفتوح .. شوى وبنجيك ”
-ابرار تكلم فى سماح : بنمشى شوى لسناء ونجى
-سماح : عاد انتى وتيتى روحك بسرعه ..خلى نكمل انا قبل
-ابرار: وين سحر
-سماح : نزلت لوطا
وطلعت ابرار لابسه عبايتها ووشاحها خايفه تتلاقى مع خالد …
وبدل ماتخش دار سناء …
فتحت دار محمد وخشت بسرعه …
ناض محمد طول سكر الباب بالمفتاح
جى وقف قدام ابرار ..هوا اطول منها بهلبا
حوللها عبايتها ووشاحها
وقعد يشبحلها ..عجباته هلبا
لابسه قفطان اسود قشر السمكه ..كله يلمع .. فيه
كمام ثلاث ارباع ..ورقبه سبعه …وقصير من تحت
فوق الركبه ..ولابسه معاه شخشير لحمى اسود
شفاف وكندرة على دوق محمد عالاسود عاليه
وشعرها كله فلو ومفتوح لتحت …وقصتها ماشيه مع
شعرها ..ودايرة مكياج بناتى خفيف هلبااااا
-محمد شادلها ايديها الزوز : عندك علم انك زى
الاميرات?
ابرار تشبحله وساكته ترعش …
-محمد حط جبهته على جبتها : وعندك علم ان
احتمال نخطفك الليله
-ابرار: وعندك علم انى نحبك هلبا ….
محمد يبي يحضنها ويبوسها … لا ويبي حتى يرقدها
على سريره …لكن على خاطرها مش قادر
ولكن هيا بنوته يا نارى اقصى طموحها معاه حضن ?
-محمد حضنها : العقبى لبيانا احنا
-ابرار: ياااربي غير امتى بنكون مرتك بس
-محمد : بادن الله قريب
وشرين تليفونها دايراته صامت …
لكن لما ضوى لاحظوه الزوز شافو المتصل لقوه محسن ولد خالها
-محمد طول تكنطى : هدا خيره يتصل بيك
-ابرار: جايب اخته سهام ويبينى نفتحلها الباب
-محمد : وعلاش يكلم فيك انتى .. ماهو يشرينو
عالباب واللى لوطا تو يفتحولهم
ابرار ساكته تلخبطت
-محمد يتكلم فى خاطره: ولا يبي يشوفك الحقير
-محمد : اهو تو ننزل نفتح انا
-ابرار حساته زعل وتبيه يضحك : باهى تحبنى
-محمد ضحكلها : نحبك ونكره اى راجل يتكلم معاك
وضحكو الزوز
وخدى محمد تليفونه وخداها فى حضنه وصور هوا
وياها كدا صورة
-ابرار : حتى انا نبى نصورو بتليفونى …
-محمد : هاتيه انا اطول منك
وخدى تليفونها وصور صورتين …
وبدى التليفون يشرين ثانى محسن ولد خالى
-محمد : ايييه علينا عاد
وبدت ابرار تضحك : نموووووت فيك وانت غاير
-محمد : قولى نموت فيك وانت بتموووووووت من الغيرة …
نغير عليك يا حبي…
وشبحلها : اصبري نشوف الممر وبعتالى اطلعى
بدت ابرار تلبس فى عبايتها
ومحمد طلع يراقب ملقاش حد
فتح الباب : اطلعى
وطلعت تجرى للدروج … ونزلت للدور الاول
ونزل محمد يتنحنح فالدروج
وطلع فتح الباب .. لقى محسن واقف قدامه عابى بيلقى سماح ???
“يانارى على سماح فلق كلاته ??? ”
-محسن بدى يزرط : اهلا محمد شن حالك
حتى بيساله عالاوراق نسى ..
تلفت طول لاخته سهام :انزلي
ونزلت سهام وخشت للجنان
وسلم محمد على محسن …
وركب محسن سيارته ومشى ..
خش محمد للجنان يلقى سهام قاعدة واقفه
-سهام : كيف حالك يا محمد
-محمد انصدم منين تعرفه : اهلا اختى
-سهام : ممكن لو مافيهاش احراج نبى رقمك
محمد فكرها تبى طلب او خدمه زى خوها
-محمد : نعم !!!.. كيف يعنى
-سهام : يعنى نبى رقم تليفونك
-محمد : وعلاش تبيه انشالله خير
-سهام : تو غدوة نكلمك ونقولك
-محمد حس بالاحراج: باهى
وسمالها رقمه كتباته هيا طول فى تليفونها ..
وضحكتله وخشت …
محمد قعد حاير: خيرها اهياا?
-وقف محمد فالممر ينادى : سحر
سحر سلمت على سهام ودخلتها ..
وطلعت لمحمد: نعم
-محمد : مديلى مفتاح سيارتى
سحر خشت جابتله مفتاح سيارته عطتهوله وخشت
ابرار سلمت على سهام ودخلتها تسلم على امها …
وقامت تليفونها اتصلت بسماح قالتلها ان محمد فتح
الباب وسهام خشت خلاص
وهيا تكلم فى سماح .. خش عليها محمد انتظار
سكرت منها طول وردت عليه
-محمد : اييييه علينا عاد من الانتظارات هادى
تعرفينى نكرهم ونتكهرب منهم
-ابرار: حبيبي والله نكلم فى سماح
-محمد : المهم انا نحبك هلبا هلبا واهو بنطلع
-ابرار: والرجالة اللى بيجو مع الناس كيف
-محمد : منعطلش انا تو انروح قبلهم
-ابرار: باهى نحبك هلبا
-محمد : وانا نموت فيك يا عمرى
وسكرو الخط
________________________
وبدى كل مرة يخش حد من الضيوف …
خشو خالاتهم وعمتهم …
وجت حناهم حدهم ..ابرار تبوس فيها وخلاص ماهو
هيا السبب فى هاديكه الليله الحلوة ??
وجو حوش خالهم جت نرجس وخواتها
ونرجس عاد مزال ماحستش بالحب اللى بين ابرار ومحمد
وجت ابتسامه وامها واختها ….
وابتسامه تكره ابرار وتغير منها
بعد ساعه…
وصلو حوش العريس …
ودخلو السوابيت بالتزغريط ..
جت امه ..تشبح فوق فوق منفوخه والوعارة واضحه عليها
“يانارى على سناء شكلها قداش بتعانى منها ? ”
وجو خواته الثلاثه زوز متزوجات ووحدة صبيه
وجو نساوين خوته الزوز
وجو معاهم عماتهم وخالاتهم
وجابو حاجات راقيه معاهم فالسوابيت
ونزلت سناء فى قفطان شارياته هياا …
زغرتو عليها وتفرجو
وبدو البنات يمدو ..
مدانهم كله راقى وحاجات مليحه
ومحمد قعد مقعمز مع ايمن وخوه عصام وزوز
صحابه ..وولد خالته …
ومعاهم وسام وخالد
محمد يشبح لعصام من تحت لحت كارهه ??
البنات اللى يمدوه للنساوين يمدوه للرجالة يبعتو فالعاملات
ولما جت ام العريس بتلبسها الدبله
ركبت سناء بدلت القفطان اللى جايبينهولها هما …
والبنات وراها قعدو يمدو فالعشاء..صحون
وابتسامه ونرجس يمدو معاهم
ونزلت سناء ولبستها ام العريس دبلتها
طبعا الفيتورى هوا اللى رفض ان العريس يخش ويشوفها
وقصو التورته ومدوها
وهدا كله وام العريس ماعاجبها شى
__________________________
كملو البيان والناس كلهم روحو ماعدا ابتسامه ونرجس
اهلهم روحو لكن هما زعميتا قاعدين بيعاونو فالضمان
وبعد ماكملو …
ابرار واقفه فالصالة هيا والبنات وابتسامه ونرجس
-ابتسامه? : ماشالله ابرار اول مرة نشوفك امأنقه هكى
-ابرار ديما تفوت فيها ?: صحيتى عيونك الحلوات
-ابتسامه : منين امأجراته .. مولاته دوقها يهبللل
-سماح علت صوتها : امأجراته من نفس المحل اللى
اتأجرى منه انتى
-ابرار: اسكتى يا سماح
-ابتسامه : حبى انا لبسى كله ماركات ونشرى فيه
شرى ..ومن قالك انأجر
-سماح : لا انتى توة بديتى تشري لما خداك خوى
وخشيتى عالعز ..انا قصدى على زمان يا حسرة ايام
الفقر لما كنتى اتأجرى
سحر تضحك وخلاص .. ونرجس مصدومه
-ابتسامه وقفت : انتى شن تقصدى
-سماح : اللى سمعتيه .. اسمعى من زمان قلنالك ابرار
خط احمر ..ومصمصى فمك بالزهر قبل ماتتكلمى
معاها هكى
-ابتسامه : منو ابرار هادى اللى دايرتهالى خط احمر
وهيا ادور من حوش لحوش تلقط فى رزقها
-امينه جت : خيركم شن فى
-ابرار وجعتها الكلمه : انتى وقحه انا منردش عليك
-سماح وقفت : انتى الباين عليك مهزبة..ولازم
الواحد يوريك قدرك بيش تتحشمى
على خشت وسام ومحمد سمعو الدوشه
-سماح : ياماما ابرار ادور من حوش لحوش عالاقل
امها هنايا .. انتى لا تتحشمى لا تستحى راجل قاعدة
موصلتيشى وانتى خاشه طالعه على حوش اهله
هدا كله وامينه ساكته لما لقت سماح ادافع
-ابتسامه ماشافتش وسام جى وتتكلم بتكبر :
عالاقل انا اسمه خطيبى ومتسميا على
اسمه ..مش هيا ادور فى حوش معبى بالتريس
مايقربولها شى
-محمد معش يشبح فى شى : وسام منحبش نلكلك
على نساوين …بتوقفها عند حدها ولا كيف
وتلفت لابرار لقاها عيونها معبيات دموع …
مسكها من يدها : تعالى
وخش بيها للمطبخ وخشت وراهم سماح وسحر ونرجس
-وسام يشبح لابتسامه : انا شن قلت لامك على
ابرار.. مش قلتلك ردى بالك توصلى فيها ولا
-ابتسامه بدت تنزل فى دموع التماسيح: كلكم
عليا …ديما انا الغالطه
-وسام : اقسم بالله ياتبوسى راسها توة وتستسمحى
منها .. يا تحطى دبلتك هنايا ودرب يسد مايرد
-ابتسامه : وسام تتخلى عليا بالساهل هكى
-وسام : قلتلك خواتى لا ..واولهم ابرار
-ابرار من المطبخ : خلاص يا وسام حصل خير فوت الموضوع
-محمد : ابرار تعالى…
مسكها من يدها وركب بيها من الدروج وسماح وسحر
وراهم
وتلفت لوسام : منبوش اسفها
-وسام : انا حلفت اقسم بالله كان ماتبوس راسها
وتقوللها ابرار سامحتك ماهى طالعه بالدبله
نرجس تتفرج ومدهولة ..من كثر مالعيلة كلها يدافعو عليها
مشت ابتسامه جهه ابرار للدروج .. وشدت راسها
وباست عليه وقالتلها سامحينى
وساوت وشاحها وتلفتت لوسام …
-ابتسامه : هيا وصلنى ماما واختى روحو من بكرى
-وسام : اطلعى وتو نتفاهمو فالطريق
ركبت ابرار من الدروج ومعاها محمد وسماح وسحر
ابرار شدت روحها فالصالة لكن لما ركبت فوق معش
قدرت وبدت تبكى
-محمد : خلاص عاد وسام خدالك حقك
-نرجس فى خاطرها : وسام خدالك حقك ومحمد
يواسى فيك
“ماحد حس بمشاعر محمد الا نرجس ..زبطت ان
الموضوع فيه ان.. لان اللى يحب شخص يزبطه
..وهيا تحب محمد ”
سكت ابرار لما قعد محمد يطيبلها فى خاطرها
-لحقتهم سناء: معش تبكى حبيبتى عاد .. رقبتها بظفرك
_____________________
ابرار اصرت انها تروح ليلتها لحوش خالها
على قد ماشد فيها محمد .. شى قالتله خالى جاى
فالطريق وبنروح
وبالفعل روحت لحوش خالها
سلمت عليهم كلهم …
وركبت هيا وسهام فوق للدور الثانى …
سهام تحكى عالبيان انه عجبها ..
-سهام : حقه ماقلتلكش
-ابرار: شنو
-سهام : حصلت رقمه
-ابرار: منهوا
-سهام : محمد
-ابرار مصدومه : من محمد
-سهام : محمد ربيب عمتى ماهو حكيتلك عليه
-ابرار استغربت : ومن وين حصلتيه
-سهام : هوا عطاهولى
-ابرار انصدمت : وانتى وين لقيتيه بيش عطاهولك
-سهام : يا حنه لما فتحنا باب الحوش وخشيت …..
شافنى عجبته لحقنى طول وطلب رقمى …
عطيتهوله وعطانى هوا رقمه
” الكدابة ??”
-ابرار: انتى طلبتى رقمه ولا هوا طلبه منك
-سهام : هوا طلبه عطيتهوله ودارلى تشريينه من رقمه
ابرار خدت صدمت عمرها ????…
__________________________
تمت .. ويتبع ??
حلقة اطول من ليلة بلا عشى ..
غدوة نكملو الباقى ??
نحبكم ❤