رواية سرقت قلبي
الحلقة الخامسهابرار سكتت وهدت شوى وقعدت تشبحله
وايداها قاعدين بين يديه لكن يرعشو-محمد مبتسم : اهدى وقوليلى انك واثقه فيا-ابرار : باهى انا واثقه فيك
ولع محمد السيارة ومشى وهيا معاه
الساعه 9…
يحصلو فى جزيرة الدهمانى
يلاقو عركه كبيرة صايرة بين زوز سيارات ..
ضرب وتكسير ..
شويا ويجى الدعم بدى يشد فالجماعه اللى يتعاركو
وهدا كله وهما فالسيارة والسيارة واقفه فالزحمة
وابرار تقرا فالقران …وفى قولت يا حليلى
محمد فاتح الباب ونازل …واقف يتفرج زى الناس اللى نازلة
-محمديكلم فالسيارة اللى قدامه : خوى كان توسعلى
شوى مستعجل هلبا انا
-صاحب السيارة يحرك فى ايديه : كيف بنوسعلك
اهو تشبح فيها الزحمه تقول المدينه ليلة العيد
خش محمد قعمز فالسيارة
تلفتلها
-محمد: اسمعينى بالشوى واهدى
الساعه قريب عشرة الاربع …والسيارة تشبحى فيها
واقفه منقدرش نسيبها السيارات يمشو بالشوى ..
وانا منقدرش نعرقل السير ونطفى السيارة ونطلع …
ولدلك ..خلينى ناخدلك تاكسى وارجعى لحوشنا احنا
قولى لسماح تفتحلك بالدرقه
-ابرار تبكى: لا لا عمرى ماركبت تاكسيات ..كانا
يخطفنى ولا نريح ومانزبطش كيف نوصفله الحوش
وبدت تخبط على وجهها ..يا حليلى عالعملة اللى
صارتلى ..كله من حناك ربي يهديها
-محمد قايم يديه و يعيط عليه: اسككككككتى
..شنجتينى …خلينى نعرف نفكر
وشرين تليفونها …..
شافت ابرار الرقم لقاته رقم امها تتصل بيها
بدت ترعش وتبكى : حيه عليا امى يا محمد شن بنقوللها توة
-محمد: ردى عليها ماتشغليهاش قوليلها ان خواتك
كلموك ومشيتى لحوش بوك …وماعتقدش ان امك
بتكلم بوك
سكر محمد الروشن وردت ابرار وفتحت المايك
-ابرار: الو اهلين ياااام
-امينه : وين انتى توة كلمت ربيعه قالتلى ابرار ماجتناش
-ابرار : كيف بنكلمك توة يااام … مشيت عند
بوى ..كلمونى خواتى قالولى ستاحشناك
-امينه: باهى مش مشكلة ردى بالك على روحك
-ابرار: باى يااام خلى انرد على سهام خاشة عليا انتظار
-امينه : مع السلامه
سكرت ابرار من امها وردت على سهام
-ابرار: الو
-سهام : وينك
-ابرار: روحت حوش بوى ..كلمونى خواتى
مستاحشينى هلبا ..تو غدوة نجيكم
-سهام: نبيك فى موضوع ضرورى ياريتك جيتى
-ابرار: منعطلش عليك انشالله ..تو غدوة انجى
وسكرت الخط
-محمد: برافو عليك هكى نبيك قوية
“توة يانارى حوش خالها صعب تقدر تمشيلهم وحوش
امها نفس الشى …كيف بدير بس ”
__________________________
الساعه 11 كيف فضت الزحمه من الدهمانى
وطلعت السيارة من الجزيرة
-ابرار: معناها توة لا نقدر نمشى لامى ..ولا لحوش
خالى…ارفعنى حوش بوى وخلاص
-محمد: حاضر ..وين يسكن بوك
ونعتتله ابرار حوش بوها وين.. ومشى محمد بيش يحطها غادى
وهما ماشيين فالطريق
-محمد: توة تقدرى تخشى لحوشكم عادى منغير مايشوفك حد
-ابرار: ايه تو نكلم خواى يفتحولى الباب منغير مايديرو دوشه
-محمد : بالرغم هما خواتك من بوك ..ونحسك متفاهمه معاهم ولا
-ابرار: خواتى هادو انا اللى مربيتهم .. انا عشت فى
حوش بوى راهو ..وعمتى جازية عاملتنى كويس ..
-محمد: يضرب فى كلاكس…خيره البلاد زحمه اليوم
-ابرار: ماهو من حظى انا القنين ?
__________________________
ابرار ومحمد فى هاديكة الزحمه
الساعه 11 طلعو من الدهمانى يضربوهالك للساعه
12 الا ربع بيش وصلو حوش بوها فى جنزور
وابرار ترعش مع بعضها …
-محمد : اهو وصلنا …كلمى اختك تفتحلك الحوش بالدرقه
كلمت ابرار اختها ليان
-ابرار: الوووو
-ليان : اهلين رورو كيف حالك
-ابرار: رقدتى ولا قاعدة فايقه
-ليان: لا قاعدة فايقه ..نهدرز انا وسرور بنت خالتى
-ابرار: سرور بايته معاك فالحوش
-ليان : لا احنا فى حوش اميمة
-ابرار فتحت المايك وغاصه بكيتها: كلكم مشيتو ولا
فى حد فالحوش
-ليان : لا كلنا فى حوش جدى ..
-ابرار: وبوى وين
-ليان : بوى ماشى للسبها مع صحابه دهوارى
-ابرار: باهى
-ليان: انتى تبى حاجه رورو
-ابرار: لا لا غير ستاحشتكم قلت نشوفكم وين
وسكرت التليفون
وبحركه لا ارادية منها …
طاحت تضرب فى خدودها : حيه عليا وين بنمشى ..
كانا خالى ناصر يكلم بوى ننفضح
تبكى يا نارى : انا ماعندى شى فالدنيا غير سمعتى
واخلاقى .. تشبح فيا لا ام لا بو لا حوش لا حياة
مستقرة ..ندور بين الحياش ..وفالاخير نضيع سمعتى
فى دقيقه …يااااربى علاش ايصير معاى هكى علاش
انا بالدات
-محمد شدلها يديها : خلى ايمانك بربي قوى يا
ابرار ..ربي مش حيسيبنا خيرك
-ابرار تشبحله : مش حيسيبنا ..وانت شن واصلك يا
بابا …وانت شن يعيبك .. انا اللى بايته ليله كاملة برة
الحوش …توة شنو بيقولو عليا
وشرين تليفون محمد
شاف لقاه بوه..انخلعت ابرار ..
رد محمد عالمكالمة
-الفيتورى: وينك يا محمد الساعه فاتت 12
-محمد : هوا انا كيف بنكلمك يابوى …
ويشبح لابرار: ماتنشغلوش عليا..انا بايت برة
ابرار قامت راسها وشبحتله
-الفيتورى : وين بايت
-محمد: طالع مع جماعتى بايتين برة
-الفيتورى: باهى زينه … غير رد بالك
-محمد : فى امان الله
وقعد يشبح لابرار وهيا تشبحله
-محمد : قلتلك انا معاك ومش حنتخلى عليك..بس اوثقى فيا
__________________________
محمد وابرار فالسيارة
ابرار تبكى …
-محمد : ليش تبكى انتى توة
-ابرار: لو كان بوى وامى مع بعضهم رانى مش ندور
من حوش لحوش
-محمد: ماتشكيليش نبكيلك .. انتى احمدى ربي امك
تتصل بيك وتنشد عليك وتطمن
غيرك يتمنى يسمع صوتها
-ابرار سخفها محمد : الحمدلله على اى حال
-ابرار: توة كيف يصير
-محمد: اسمعى ..توة ماعندك وين تمشى الا وين
مانمشى انا ….وانا اقسم بالله يا بنت الناس نوعدك
ماتكونى الا زى اختى لين يطلع الصبح
-ابرار: باهى وين بتحطنى
-محمد: وين بنحطك يا مهبولة ..مش حتفارقينى ولا
ح نسلم فيك لين يطلع الصبح …
واللى يقرب منك نقتله
-ابرار: كيف بدير نقعدو فالسيارة قصدك
-محمد : لا صعب نقعدو فالسيارة
وقام تليفونه ويفكر من بيكلم ..
ادكر صاحبه محمود ..دكتور معاه فالجامعه وعنده
استراحه فى تاجورا
-ابرار: من بتكلم
-محمد: صاحبى محمود عنده استراحه فى تاجورا بناخد منه مفتاحها
-ابرار: استراحه شنو ..شن تقول انت ..اهو نقعدو حتى فالسيارة
-محمد: ايه خليك بايته معاى فالسيارة وعلى عينك
ياتاجر .. ساعة ولاويتك بايته فى حبس الجديدة
-ابرار: انا منقدرش نمشى مع ولد لاستراحه
-محمد: ابرار انتى شاكه فيا ..قلتلك اقسم بالله انتى
اختى وفرقبتى وندافع عليك بدمى
ابرار سكتت
-محمد: اهلين محمود كيف الحال
-محمود: الحمدلله ..انشالله خير شفت رقمك انخلعت الوقت متاخر
-محمد: لا خير غير نبى استراحتك الليله كانها فاضيه
-محمود : خيرك انشالله خير يا حميدة
-محمد: لا غير تناقشت انا والحاج وطلعت من الحوش متنرفز ..
ويضحك : بعد طلعت معش لقيت وين نمشى ندمت على الطلعه ياراجل
-محمود يضحك: توة علاش تغشش فالحاج فى
هالليل …عموما مفتاح الاستراحه تلقاه فالاستراحه نفسها …
وقعد يوصفله وين داسه بالزبط برة الاستراحه
وتوجه محمد لاستراحهةصاحبه محمود
_____________________
ماشيين فالطريق وابرار ترعش مع بعضها
-محمد : خيرك ترعشى
ابرار ساكته وخلاص
وصل محمد لاستراحة صاحبه
فتح البوابة الرئيسيه ودخل السيارة
ورجع سكر البوابة بالشوى منغير مايفتح ضى الجنان
وجى جهة باب ابرار وفتحلها الباب : انزلى
ومشى فتح باب الاستراحة …
خشو الزوز وسكر محمد الباب
-ابرار: خليه مفتوح
-محمد: خير بلاك يابنت….كيف نخلى الباب مفتوح
على خشت قطوسة اديريلى العار بالعياط
ولا الجيران يشوفو الباب مفتوح يحسابوهم خنابه
خشت ابرار للصالة متع الاستراحه وهيا ساكته
الاستراحه من داخل مفتلكه وقنينه …
فيها صالون ودار نوم ومطبخ ريسبشن
فتح محمد ضى خااافت بيش الجيران مايفيقوش ان
الاستراحه فيها حد
قعمزت ابرار عالصالون
وقعمز محمد فى نهااااية الصالون
-ابرار: كأنه حلم ونراجى امتى نفيق منه
-محمد: خشى ارقدى فالدار توة ..والفجر نطلعو من هنايا
-ابرار قاعدة ترعش: لا لا مش جاينى نوم خلينى هنايا
-محمد: براحتك
ناض محمد مشى للريبسبشن متع المطبخ ..
فتح الثلاجه مالقى فيها شى
-محمد : جوعتى
-ابرار: لا لا
-محمد : تي انا بنموت بالجوع ..درتيلنا عياط
ورعشتينا …خليتينا ننسو حتى العشى
-ابرار : بلحقه جيعان ولا تبصر
-محمد: والله زى منحكيلك ..
-ابرار: باهى حول شوى اطلع منوالمطبخ ..
خلى نشوف شن فى بالك نقدر نطيبلك حاجه
-محمد : لا لا فكينى تكسريلهم حاجه وانتى يديك قاعدات يرعشو
-ابرار: لا والله عادى ..انت ساعدتنى ومتخليتش عليا
هدا اقل واجب نديرهولك ..انى نعشيك
الريسبشن ضيق …
طلع منه محمد ..وخشت ابرار قعدت تفتش
لقت دقيق وخميرة وحاجات العجن ..
ولقت سله الخضرة فيها بصل وبطاطا
والدولاب فيه حكه طماطم وحكه زيت ..وبس
مدت يدها ودارت عجينه وخلتها ترتاح على تركينه وتتخمر
ولهت تقلى فى بطاطا ..وبعتالى دارت زى الصالصه بالفلفل الاحمر وطماطم الحكه
خدت العجينه فردتها على سفرة وحطت فيها صالصه
البطاطا وسكرتها على هيئة نصف دائرة
ودهنت طاجين الكوشه وبدت تستف فيهم زى
السندوتشات جنب بعض
” جوعتنا الفصعونة ??”
-محمد : ماشالله عالريحه معش قادر نصبر
-ابرار: اهو بيطيبو ماياخدوش وقت هلبا
_______________________
سماح سهرانه عالتليفون ….
وسحر تقوللها سكرى منرقد عندى جامعه الصبح
سكرت سماح التليفون وتلفتت لسحر
-سماح : سخفنى بكرى عبدالوهاب ولد عمتى يسأل
فيا عليك تغديتى ولا لا
-سحر: قلنالك اسكتى عندى جامعه الصبح
-سماح : لا منيش ساكته … نبى نعرف كيف ينقلب
هداكة الحب الكبير لكره
-سحر: ربي يجيبك يا طولت البال
-سماح : انا نحبه عبدالوهاب ..ومش طايقه فيه
البهدلة اللى انتى مبهدلتيهاله
-سحر: تحبيه ..هوا ليك وبالصحة عليك
-سماح : والله من قلبك الكلام ..ياريته هوبا يرضى
بيا .. الله غالب قلبه معلق مع ناس تعبانه
-سحر: حرام عليك نعسانه نبى نرقد
-سماح : غير صفى النيه يا سحورة .. تى والله كان
تسمعى بيه خطب لما تخشى قرقارش
سحر عيونها دمعو : اوووف انتى الباين مش
ح تسكتى الليله….
وحدفت مخدتها عليها : اقعدى فيها
وطلعت من الدار
-سماح تضحك: مرجوعك ليا سناء مش فاضية.. مش
حتخليك تباتى معاها
طلعت سحر طقت على دار سناء
فتحت سناء ..لقت سحر عالباب …
خشو الزوز للغرفه ..
خدت سناء تليفونها : شوى ثانية تو نعاودلك باى توة
طلعت سحر من الدار: احرف من بعضكم انتى واختك
-سحر: تى تعالى خيرك
ورجعت سحر لدارهم
-سماح : مش قلتلك مرجوعك ليا
-سحر: بضمى فمك ولا نطلع نبات فالصالة
-سماح : لا والله سخفتينى يا نارى عندك قراية الصبح …
باهى سامحتك ارقدى فسريرك يا مدام عبدالوهاب
-سحر رقدت فمكانها : يااارب صبرنى
__________________________
ابرار فتحت الكوشة الكهربائية لقت الخبيزات طابو
طلعتهم …
وستفتهم فى صحن
وجابتهم حطتهم عالطاولة فالصالة
ومحمد يفتح فى شباك الحمام ودار النوم بيش تطلع الصنه
بدى تليفون محمد يشرين
شافت ابرار لقتها نرجس
-جى محمد مخلوع : شكون يتصل توة
-ابرار: نرجس ??
تم التشريين وسكت التليفون
-محمد: وهادى شن تبى توة
-ابرار: بالك هدا موعد اتصالها ديما
-محمد: كيف يعنى !!!
-ابرار: قصدى بالك متعودة تتصل فالوقت هدا ..
وناضت مشت للمطبخ
-محمد: انا عمرى ماتكلمت معاها لا توة ولا غير توة
-ابرار: انا هدا موضوع ميخصنيش راهو ..ماجيتش
نحاسب فيك انا بيش تتعدر
-محمد يعيط : ومن قالك نتعدر انا ..انا نحكى فالواقع
وبدى التليفون يشرين مرة ثانيه
شبحتله ابرار وتلفتت للحوض متع المطبخ
خدى محمد التليفون .. رد وفتح المايك
-نرجس تتصنع : اهليين محمد
-محمد بعصبية : شن فى انشالله خير.. انخلعت لما
لقيت رقمك فالوقت هدا …خالى فيه حاجه
-نرجس: لا الحمدلله بوى كويس ….
-محمد : امالا خيرك متصلة …
-نرجس: ماهو الايام اللى فاتو ماتردش عليا …فقلت
مدامك درت لرقمى حفظ الصبح ..اكيدة حترد عليا توة …..
-محمد تلفت لابرار : اهاا .. الايام اللى فاتو منردش
عليك صار …
ابرار تلفتت للكوشة وتمسح فيها زعميتا مش مهتمه
-نرجس: كيف حالك
-محمد : الحمدلله ..سامحينى غير بايت مع صحابي
ومنقدرش نحكى فالتليفون توة مش فاضى
-نرجس انصدمت : باهى نكلمك الصبح
قامت ابرار راسها تلفتت لمحمد
-محمد : لا لا حتى الصبح مش فاضى ..
تو لما نفضى نكلمك …هى تصبحى عل خير
وسكر الخط وشبح لابرار
-ابرار رفعت حاجب ونزلت حاجب وتشبح لمحمد
واتمتم : ايوووه هكى احسن
قعمز محمد عالطاولة بياكل
-محمد : شنو امالا ماكش واكلة معاى
-ابرار: لا والله مانقدر متعودتش ..كول انت تو ناكل
بعدك انا
-محمد يضحك: زى شيابين زمان بعد ماياكل الراجل
تاكل مرته وراه
وزمط محمد الحروف الاخيرة من الجملة اللى قالها
..حسها جملة مش فى موقعها ??
وابرار تحشمت قعدت ساكته ماعلقتش
قام محمد طرف خبيزة كلى منه شوى
عجباته هلبا
وحط الباقى عالطاولة
-ابرار تشبحله : خيرها ماعجباتكش الخبيزة
-محمد : بالعكس زى العسل
-ابرار: امالا خيرك حطيتها
-محمد : منعرفش
-ابرار جت للصاله : لقيت فيها حاجه
-محمد : لا والله ماشالله عالنظافه والبنه …لكن انا
ما تعودتش ان حد يحدفلى الماكلة ويمشى
-ابرار: لا والله ماحدفتها ..بالعكس قلت بيش تاخد
راحتك وتاكل بالنية
-محمد : لا لا توة طارت النية خلاص
-ابرار: توة من بكرى وانت تقول جعان وانا ساعه
واقفه وانطيب وفالاخير تقول منبيش
-محمد : ماهو الماكلة نية وكانا طارت النية خلاص
-قعمزت ابرار عالصالون : وشن يردها النية الطايرة
-محمد : تقعمزى تاكلى معاى
-ابرار فرحت لانه شاد فيها : باهى يا همى ..نغسل
ايديا ونجيك
-محمد : توة انا هم
-ابرار تضحك : هم مابعده هم
-ابرار: بااهى
وقعمزت ابرار كلت مع محمد ..عجبتها الخبيزة
كلت الاولى وزادت الثانية …حتى هيا جعانه
“واما من محمد منحكيلكمش …عجبوه الخبيزات وماكلة ابرار” …
طاح فى هادوكا الخبيزات زى الثور الجايع
??????????
ابرار ومحمد كملو عشاهم …
وقامت ابرار السفرة وغسلت الماعين ..ومسحتهم وردتهم لمكانهم
كملت ابرار ….جت للصاله قعمزت
-محمد : لو تبى ترقدى لداخل فالموبيليا تفضلى
ارقدى وسكرى الباب وخودى راحتك
-ابرار : خش انت ارقد فيها وخود راحتك …انا والله
ماعنديش نيه فالنوم
-محمد: لا لا انا لازم نقعد فالصالة على اى حاجه
تصير ماتدرى
-ابرار: خلاص نقعدو مع بعض انراجو لين الصبح يطلع
-محمد : انا رانى هدراز وندوى هلبا ..
-ابرار تضحك : لا عادى خود راحتك
__________________________
-محمد متكى على نهاية الصالون : شن رايك نلعبو لعبة
-ابرارمقعمزة : شنهيا اللعبة
-محمد : سؤال بسؤال
-ابرار: اللى نقدر نجاوب عليه حاضر
-محمد : واللى ماتقدريش تجاوبى عليه نشرط عليك
شرط وتنفديه
-ابرار: وانت نفس الشى
-محمد : طبعا حتى انا نفس الشى
-ابرار: من بيسأل الاول
-محمد : ابدى انتى
-ابرار مغمضه عيونها : اممممم شن منسأل .. شن منسأل …
ااه ادكرت سؤال : انت تحب نرجس بنت خالك
-محمد يضحك : نحبها زى خواتى
-ابرار: بس بس
-محمد : طبعا بس بس
-ابرار: اكيد
-محمد : مليون فالمية …
وشبحلها : توة منسال انا
-ابرار : اسال ..
-محمد : ليش يومها تبيعى فى تليفونك
-ابرار: لانى مستحقه الفلوس
-محمد : انا قلت جاوبى ..عارفتك بعتيه تبى فلوس ..
السؤال ليش تبى الفلوس شن بديري بيهم
-ابرار: منعطيهم لبوي
-محمد : هوا طلب منك
-ابرار: لا ..بس لما يضايق فالفلوس يبدا يعيط
ويضرب ويلز فى مرته ..ويتشكبن الحوش فى بعضه
-محمد يضحك : يتشكبن
-ابرار تضحك : يعنى تصير حوسه ..ولما نعطيه
فلوس يستتب الامن
-محمد : انتى منين تجيبي فالفلوس ..منين تصرفى
-ابرار: باااز توة بدو سؤالين معش سؤال
-محمد يضحك: صار تعرفى حتى بااز …ياشريرة
ابرار تضحك
-محمد : لا بجد ..من وين تصرفى ومن يعطى فيك
فى فلوس مصروفك
_________________________
تمت ويتبع ???
نكملو بعتالى فى حلقة الليل ??
ووحدة تقول قصيرة نهاراها ..اليوم حلقتين
نحبكم ❤