رواية سرقت قلبي
الحلقة السابعةسناء: قولى منو يسأل عليك
-ابرار: منو-سناء: عصام سلفي-ابرار: منو عصام سلفك هدا
-سناء: الى تكردستى قدامه فالسطل شافك
وعجبتيه ويبي رقمك
على وقفت محمد عالباب سمع الجمله كلها
-محمد متكنطى : منهوا اللى يبي رقمها
-سناء: انا مقلتش رقمها .. وبعدين انت من امتى هنايا …
وناضت مشت للصاله هربت منه
-ابرار: صباح الخير
-محمد قرب منها وحط يديه عالطاولة ويشبحلها :
تعرفى رقمك نلقاه عند حد ..اقسم بالله تعرفى حساباتك??
-ابرار فرحانه حساته غار عليها : باهى غير رد الصباح
-محمد : وايمن هدا تو نعرف شغلى معاه يقول لخوه
يحترم نفسه
-ابرار?: انت بديرلى فضيحه مع خطيب اختك ولا شنو
محمد مردش عليها وطلع من جنبها وخلاها
وطلع من الحوش منغير مايفطر وسكر الباب
ابرار تكنطت من طلعته ..
وانه فاتها وهيا تتكلم وماردش عليها
_______________________
ابرار تبى تبعتله رسالة لكن ادكرت انها معندهاش رصيد
-ابرار: سنيوة عندك رصيد
-سناء: عندى ايه
-ابرار: ابعتيلى جنيه
-سناء : باهى تو نبعتلك ..
وقامت تليفونها بعتتلهاثلاثه جنيه
-سناء: شن نقوله
ابرار تشبح لتليفونها ..و تراجى فالرصيد بفارغ الصبر
ومش منتبهتلها
-سناء: قولى شن نقوله
-ابرار بعصبيه : تى منهوا
-سناء: عصام يا ريري خيرك ..مش قلتلك يبي نبعتله رقمك مع ايمن
-ابرار: لاااا ماتبعتى شى ..فوتيه
-سناء تضحك : غير جربي ياريري بالك نبدو سلفات?
-ابرار راكبة فالدروج: غير فوتينى توة يا سناء
خشت دار البنات
قامت تليفونها كتبت رساله وبعتتهاله
-ابرار ” تصدق ندمت انى جيت هنايا ”
رد عليها محمد برسالة ” امالا تبينى نشبح فالشباب
يطلبو فى رقمك ونقعد ساكت ”
-ابرار بعتت رسالة : ” ومن قالك انى منعطى رقمى”
-محمد : ” الفرحة بانت فعيونك وهيا تحكيلك”
-ابرار: ” ليش التلفيق ..انت كيف شفتهم عيونى
فرحو وانت لابد وتتصنت ..مدامه هكى كلامك .. انا
بنبعته رقمى باهى ”
-محمد رد برسالة : ” جربي ابعتيله رقمك كان
ماجبتاش فى كوفينو سيارتى ودبحته قدامك معش
نبدا محمد”
-ابرار: “مجرم..وليش هدا كله ”
-محمد: “لو نرضى ان سماح ولا سحر يبعتو ارقامهم
تو نرضالك انتى تبعتى رقمك”
ابرار انصدمت وتتكلم فى خاطرهت : معناها انا زى خواته ولا كيف ?
معش ردت عليه ..
ومحمد تكنطى بجديات تقول عليها الا عطت رقمها
لكن هوا مش تكنطى .. هوا غاير عليها …
والغيرة ديما صعبه نااار…خاصة فالبدايات
_______________________
سناء وامينة فالمطبخ
-سناء: قالى ايمن قولى لعمتك امينه تعلمك البازين
“اهو بدتنا عاد فى تسهويك المخطوبات ??”
-امينه : هاتى الطنجرة هى ودونك نعلمك
-سناء: هى خلى نجيب الطنجرة الواسعه من
المخزن … وورينى كيف نطيبه
-امينه: وين ابرار
– سناء : ركبت لدار البنات
وسناء تخمم تقول لامينه على عصام والا لا ..
وبعتالى حستها خفه ان الولد تقول عليه وهوا قاعد
غير يطلب فالرقم بس
وبدت امينه تعلم فى سناء طياب البازين
خش وسام ..
وقف جنبهم يلبس فى سناء كيف تتعلم فالبازين
-وسام : بوي طالع
-امينه : طلع من الصبح
-وسام : قتلك عمتى امينه ..كان تقوليله وسام يبي الفين دينار
-امينه : حاضر انا ماعليا الا انى نوصل الرسالة .. تو
نقوله بعتالى لما يروح
-سناء شهقت : شن طالبة منك المرة هادى يا مهبول
-وسام : مدخلكش انتى
-سناء: قصدى بيختها خطيبتك راهو..هاد الطلبات
اللى سمعنا بيهم بس ..منغير المدرق
-وسام :انتى الكلمه ماتنقالش قدامك …
وطلع وخلاهم
______________________
وروحو سحر وسماح من الجامعة ..
ركبو غيرو حوايجهم ونزلو …
سماح جنب ابرار وتهدرز عليها
وتليفون ابرار بدى يشرين ..شبحت لقاته رقم محمد …
عندها نية ترد لكن مش قادرة قدام سماح
دارت تليفونها سايلنت وحطاته فى جيبها
-سماح : شكون المتصل
-ابرار: سهام بنت خالى تو نرد عليها بعتالى
-سماح : معنديش ليها خلوق ??
ابرار تضحك
__________________________
طاب البازين
وحطو الغدى للفيتورى وخالد ووسام
على خشت محمد …
-وسام : محمد هى تعالة تغدا
-محمد : لا والله ماخاطرى
-الفيتورى : بالك ضاربها بالشوا الليل كله مع جماعته
ومحمد كل تفكيره يبي يشوف ابرار
وفالدار متع التقعميز ..حطو البنات غداهم
ابرار متكية عالفراش طلعت تليفونها شافت تلقاهم
15 مكالمة من محمد . .
تشبح للرقم بحسرة وسكتت… كان خاطرها ترد عليه ..
قعدت فاتحه صور محمد وهوا راقد
وتتفرج عليهم
ومنتبها ومركزة ان مايجوش سماح ولا سحر يشوفوها
قعمزو عالسفرة ..
-سناء: ابرار تعالى دوقى طيابى
-ابرار: والله ماخاطرى
محمد فم الباب يتنحنح : سناء
ابرار قلبها انتفض ..وناضت قعمزت وساوت وشاحها
-سناء : خش يا محمد
-محمد : السلام عليكم
-البنات وامينه : وعليكم السلام
محمد معش عرف شن بيقول ولا شن بيتسبل ..هوا
اصلا خاش بيشوف ابرار بس ??
-محمد يشبح لابرار : سناء نبى خيط الشحن ..
شحنى معش لقيته وماشريتش
-سناء: هوينا تلقاه فالدار فوق ..افتح الفردة اليمين
متع الدولاب
-محمد : شن بنقعد نفتش فالدواليب انا .. عطيهولى انتى لما تكملى
-سناء: ابرار بالله عليك عطيهوله انتى يديك نظاف
محمد وين تلقيه عاد يدور فيها فالسمى لقاها فالوطا
-ابرار: كيف بنزبطه كملى انتى واعطيهوله
-محمد : انا نبيه توا توا?
-سناء: ماك عارفتيه وين وديما تشحنى منى ولا
-ابرار: باهى اهو تو نجيبه
-محمد: تلقينى مقعمز جنب بوى
“يبعد فالشبها داير روحه ?”
ناضت وساوت وشاحها كويس …
وطلعت من جنبه
مشت فالممر متع الديار وركبت من الدروج للدور
الثانى..وخشت لدار سناء
لحقها محمد منغير مايشوفه حد ..
خش دار سناء وراها وسكرها بالمفتاح وحطه فى جيبه
-ابرار: انت خيرك ديما بعمايلك معاى ..افتح الباب
ليش اديرلى هكى على ركبت حد يلقانا هنايا والباب
مسكر شن بيقول
-محمد قرب منها وبكل هدوء: خيرك مترديش على مكالماتى
-ابرار: انا حرة منبيش نرد عليك باااهى
” وهيا قريب ماتت لما شافت رقمه ومقدرتش ترد?”
-محمد قريب يهبل من الغيرة : لا بالك خايفة حد
يلقاك انتظار تقعدى فى مشكلة
-ابرار وجعتها وتلفتت للدولاب وصوتها انخنق: محمد
انت تحكى بجديات ولا تبصر .. يعنى انت نضرتك ليا
انى بنت مش كويسة عشان اللى صار
-محمد قرب منها : لا ليش تقولى هكى..وشنهوا اللى صار
-ابرار : اللى صار انى قعدت معاك ليله كاملة بروحنا
..بالك هزيت عليا ولا طحت من عينك ..انا راهو
الظرف هوا اللى جبرنى نقعد ونسكت
-محمد شد يداها الزوز : بالعكس انتى اكثر ما زدتى
كبرتى فى عينى بعقالتك ورزانتك
-ابرار: خلاص امالا خيرك من بكرى وانت تهزب
-محمد : لان معجبنيش الكلام …واللى منرضاشى
فخواتى ..منرضاشى فيك
-ابرار?: لكن انا مش اختك ..ولا نبى فيوم نكون اختك
محمد قعد ساكت .. عجباته كلمتها
وجت وقفت جنب الباب : افتح هيا
-محمد : تعالى نبى ندوى معاك
-ابرار: مش سادك اللى قلته
-محمد قرب منها ومبتسم : لا مش سادنى ..مزال عندى نية نحكى
تلفتت للباب متبيش يشوف ابتسامتها: توة منقدرش
..خليها مرة ثانية
-محمد قرب منها: باهى نكلمك ردى عليا .. نبى نقولك حاجه
-ابرار: هنايا لا نتحشم قدام البنات ..
بعتالى بنروح حوش خالى ونرد عليك عادى ..
خمسة دقايق مش مشكلة نسمع الحاجه اللى تبى تقولها
-محمد يضحك : خمسة عينك ..وبعتالى علاش
ماشية خليك هنايا
-ابرار: لا والله هوا هداكه لازم نمشى حوش خالى
محمد عنده نية يحضنها لانه بيستاحشها ..لكن
مستحيل يدير هكى
-ابرار مدت يداها : هات المفتاح
-محمد : الليله وعد نتكلمو
-ابرار : حاضر
-محمد : تغدى توة .. مش نلقاك مقعمزة بلا غدى
وفتحلها محمد الباب وطلعت
قعد واقف عالباب يشبحلها
يشبح لمؤخراتها وافخادها .. وهيئتها كاملة وهيا تمشى
“هدا الواقع راهو ..هدا فيش يفكرو ???”
__________________________
نزلت ابرار للدور الاول وهيا طايرة من الفرح
خشت للدار لقتهم قاعدين ياكلو
-جت جنب سماح : ترا زيدى شوى..خلى ندوقو تمرميد سناء
وضحكو مع بعضهم
خش محمد للدار يتسبل يبي يشوفها تتغدا والا لا
شافها مقعمزة معاهم ..شبحلها وضحكلها
وهيا نفس الشى
-محمد : تو نشحن وتلقيه فالمربوعه شحنك باهى
-سناء: باهى
وطلع محمد ..مشى للمربوعة يتغدا مع بوه وخوته
??????
-ابرار: سناء توصلينى لحوش خالى
-سماح : تعرفى لما نسمعك بتمشى لحوش خالك يغم
عليا النفس ..تى ماهو اقعدى هنايا وريحى روحك
-ابرار : لا والله مانقدر صغار خالى ناصر بروحهم
..واحنا بس اللى لاهيات بيهم ..انا وبنات خالى
-امينه : حتى انا بنمشى معاك..لازم كلمنى ناصر قالى تعالى نبيك
-سناء: باهى انضم المطبخ ونمشو
وبالفعل ركبو البنات فوق .. وضمت سناء المطبخ
وطلعت هيا وابرار وامينه وصلتهم لحوش خوها سعيد
________________________
خشو ابرار وامينه حوش خوها سعيد
هوا فالاصل حوش بوها غير خوها سعيد كووش عليها هوا وصغاره
وهما خاشيين جو صغار ناصر يجرو لابرار
زوز بنات وولد جنى وجنان وجاد
شدتهم عمتهم امينه وتسلم عليهم وطلعتلهم كيسه
معبيه شوكلاته وحلوة وتوكات للبنات
-ربيعه تسلم على امينه : مرحبتين امينه شن حالك
-امينه : الحمد لله شن حالكم انتو يا ربيعه
وسلمت ابرار على خالتها ربيعه ..
وخشت لداخل هيا والصغار لسهام
-امينه : شن حال سعيد ومحسن
-ربيعه: سعيد باهى الحمد لله … ومحسن هاك
تشبحى فى حاله يجري عليه بوه فى تعيين وماهناك شى
-امينه : ياودى التعيينات توة واعرة
-ربيعه : كان تشوفيلنا ربيبك محمد نحس فيه مكانه
باهى فالجامعه ومعارفه هلبا بالك يديرله حل
-امينه : منعرفش الحق تو نشوفه
-ربيعه : غير يلقى بس شن يصرف على روحه..
تعرفيه انتى وليدى محسن نفسه عزيزة ..مايحب
يمد ايده حتى لبوه ..
-امينه : نعرفه والله كل تصرفاته زى جده ..تقولى
بوى مقعمز
-ربيعه : وليدى مالقى جهد …يخدم من محل الحلاق
لمحل المواد الغدائية ..خسارة غير القراية اللى تعب فيها
-امينه : والله لما نكلمه .. بالك يديرله حل
-ربيعه : ابرار وين مشت هيا والصغار
-امينه : شورها ركبت فوق مع البناويت
“محسن اكبر واحد فصغار سعيد ..ولد عقولى وسابق
عمره فالرزانه والتفكير..م 80 متخرج من التقنية
الطبيه قسم التحاليل ومش لاقى شغل ولا تعيين”
__________________
ابرار وسهام ركبو للدور الثانى مع الصغار
-ابرار: شن الموضوع المهم اللى امس قلتيلى انك تبينى فيه
-سهام : مش توة ..بعتالى لما نبدو بروحنا نقولك
وهما خاشين لصاله الدور الثانى لقو محسن مقعمز
-ابرار سلمت على محسن : اهلا محسن
-محسن : اهلا ابرار
ومشى جاد يجرى قعمز فى حجر محسن ..واخد عليه هلبا
-ابرار: خيرك
-محسن يتكلم بهدوء: لا لا شى
-ابرار: باهى لما تبى تحكى تعرف وين تلقانى
“محسن علاقته بابرار قوية..تربو مع بعضهم وحاسبه
زى خواته ..واسراره ديما معاها ”
خشو سهام وابرار للدار
-ابرار : هيا احكيلى
-سهام : نبى نطلب منك طلب
-ابرار: انتى تؤمرينى مش تطلبى
-سهام متحشمه : نبى رقم محمد
-ابرار حايرة: من محمد !!
-سهام : محمد خو سماح… ربيب امك
ابرار : ????
__________________________
خش ناصر لوسط الحوش
لقى امينه وربيعه مقعمزات يشربو فالشاهى
سلم عليهم ..وجه داير لحيهة ومتهنتك وحزين
-ناصر : ربيعه وين الصغار
-ربيعه : الصغار فوق مع سهام وابرار اهو تو نقوللهم اينزلوهم
وقفت ربيعه تنادى من دروج الدور الثانى
-ربيعه: ياسهام
-سهام : نعم يااام
-ربيعه : هاتى الصغار بوهم جى يبي يشبحهم
نزلو الصغار يجرو لناصر
وهوا يانارى ياخد ويبوس ويبكى
وخلى امينه وربيعه يبكو معاه
مسح دموعه ويضم فيهم : شنو يابابا تلعبو
-جنان : عمتى امينه جابتلنا توكات يا بابا
-ناصر: ربي يكبر قدرها عمتكم
نزلت ابرار سلمت على خالها وباست على وجهه
وخشو امينه وناصر للدار متع التقعميز
-امينه : ربيعه تعالى
-ربيعه : خليكم اهو تو شوية ونجى
-امينه : تعالى يا ربيعه ماعليك مدرق
خشو يهدرزو على ناصر فالدار
-ناصر: مشكلتى منعرفهاش يا امينه صاحبى قالى
عليها ونخاف نظلم صغارى
-امينه : يا وخى النساوين كلهم زى بعضهم
…ولامتى بتقعد هكى انت وصغارك
انت استخرت الله ولا …
-ناصر : هوا هدا ……استخرت والخيرة فيما اختاره الله
خديت رقم خوها وكلمته تفاهمت معاه وقلتله اختى
ومرت خوى تو يجوكم بعد غدوة الخميس
لكن اسمعو شروطى واضحات وقولوهملها مالاول …
عندى عشرة ايام فالشهر بايت فالبحر
وصغار خط احمر .. لو نسمع شكوى من واحد منهم مش حيصير طيب بينى وبينها
__________________________
__________________
هدرز ناصر وتغدا فى حوش خوه وروح وصل امينه لحوشها
وابرار قعدت فى حوش خالها…
مرابطين عالصغار هيا وبنات خالها من يوم توفت امهم
ودايرين بالدور عليهم كل يوم وحدة تنتبه وتبدل
وتهتم وتوكل بيش ميجيش الكيد على وحدة بس
-فالمغرب بعت محمد لابرار رساله ” نكلمك”
-ردت عليه ابرار” مزال شوى محسن ولد خالى قاعد يحوس فالصاله ”
-محمد مقعمز فى داره : اييييه علينا منو محسن هدا
ثانى .. الزح كان نلقى نحطها فى صندوق ونسكر
عليها مافيش دكر يشوفها ولا يتكلم معاها
-بعتلها محمد رسالة” باهى متعطليش ”
-سهام : ياعينى ياعينى على صوت الرسايل اللى توصل
-ابرار: هدا واحد تعرفت عليه فالكليه
-سهام : غريبه….مش ديما تقولى مفرخ الكليه
مستحيل نتعرف على واحد منهم
-ابرار: هدا جت فيه الحليوة وغيرت رائي الله غالب ???
-سهام : باهى ربي يهنى
-ابرار: شوى ثانية غير تهدا الرجل بيكلمنى ..وراس سوسو راقبيلى
-سهام : سكرى الباب بالمفتاح وعادى تمشى الامور
-ابرار: باهى
-سهام : باهى متقدريش تكلمى سماح تجيبيلى رقم محمد
-ابرار: نبى نفهم انتى تعرفيه
-سهام : شفته يومها موصل عمتى …ومن يومها وانا عقلى مش عليا
-ابرار ركبتها غيرة : وهوا يعرفك?
-سهام : امنين بيعرفنى …قلتلك انا شفته هوا ماشافنيش
-ابرار تعصبت : نقولك من توة يا سهام انا الحق صعب نجيبلك رقمه ..
وطقطق باب الدار …
محسن عطاهم جاد وقاللهم تصبحو على خير
خدت سهام جاد بدلتله ورقداته فمكانه …
دار سهام فيها زى البلكونه الصغيرونه
طفت ابرار الضى ..وفتحت باب البلكونه وطلعت قعمزت فيها
وبعتت لمحمد رسالة “اتصل”
وعلى طول تليفونها ضوى …محمد يتصل بيها
❤❤❤
__________________________
-محمد : الو
-ابرار: الو
-محمد : عطلتى عليا راهو ..معش عندى صبر نراجى
-ابرار: والله لين رقدنا صغار خالى ومحسن ولد خالى خش لداره
-محمد : اييييه علينا عاد ومنو محسن هدا ثانى
-ابرار: محسن هدا خوى اللى ماجاباتاش امى
-محمد : متاكدة
-ابرار: ايه طبعا متاكدة
-محمد : انشالله يطلع كلامك صح …
كنهدا قداش بيتعبى كوفينو سيارتى
ابرار تضحك ??
-محمد : دووم هالضحكة
-ابرار: دوم صحتك وسجودك
-محمد يضحك: لما قلتى سجودك تخايلتك وانتى
لافه الفوطه زى الباكستان وتصلى وراى ???
-ابرار: مفروض صورتنى بيها
-محمد صوته خفيف ورومنسى ويهمس همس: اصلا
انا فاتت عليا كيف مصورتكش
-ابرار: وعلاش بتصورنى
-محمد : بيش لما نستاحشك نتفرج على صورتك
-ابرار تحشمت? : تستاحشنى
-محمد : ايه نستاحشك
-ابرار : اممممم باهى
وقعدو يحكو مع بعضهم قريب للساعه 3 .. وسكرو
واستمرو عالحال هدا ليلتين ثانيات
الصبح مسجات …
وفالليل مكالمه يقعدو يحكو قريب للفجر…
حكاياتهم كلها يدكرو فى هاديكه الليله…
او يحكو على صغار خالها
او على قرايتها وموادها اللى بتنزلهم
فالليله الثانية
-محمد : على فكرة ممكن بنقريك انا راهو
-ابرار: بلحقه حيه عالجو
-محمد : والله عاطينى سنه ثانية انا ودكتور ثانى فى
نفس المادة .. لكن مش عارفه انتى عندى ولا عنده
-ابرار: ياااربى نكون عندك
محمد يضحك …
الفجر ادن ..
-ابرار: عيونى بيتسكرو خلاص يادوبك نصلى الفجر ونرقد
-محمد : تعبتى حبيبي
وسكتو الزوز لما محمد قال الكلمه الاخيرة
-محمد بدى يكحكح : احم شنو بترقدى..
-ابرار: ايه منرقد
-محمد : نوم العوافى انشالله..غدوة نحكو انشالله
-ابرار: انشالله تصبح على خير
وسكرو الخط وابرار هايمه فى كلمه حبيبى اللى قالها ليها محمد
ومحمد يكلم فى نفسه : تى مدامك تحبها يا محمد
غبي ليش ماتقوللهاش نحبك …
محلاااها الكلمه
ورقد وصورتها مافارقتش خياله
__________________________
يوم الخميس
مشو ربيعه وامينه لحوش العروس اللى بيشوفوها لناصر
العروس اسمها وداد …
شافوها البنية صح كبيرة شوى ..لكن قنينه وباهيه
طبعا امها لاقتهم بالحباب والكباب
وهيا تشكر وتعاود فى بنتها
امينه قالتلها على شروط ناصر
انه يغيب فالبحر بالعشرة ايام
وان صغاره خط احمر ..
وداد العروسة قالتلهم يا سلام صغاره فعيونى الزوز
واتفقو عالشرط والامور كلها…
وطلبت وداد شهر توتى روحها ..
بنية عاد وتبى ادير عرس وقفه وحفله
طبعا امينه فهمتها ان هما لا دايرين عرس ولا قفه ولا
زفه ولا شى …
ادير حفلتها ويروحو بيها طول لشقتها طول
وافقت وداد وقالتلهم خلاص هاداكه هوا الكلام
ودارو موعد للفضانية بيش يجى خوه سعيد لبوها
وروحو امينه وربيعه ودارو شوط بكى باهى على المرحومه
__________________________
__________________
نفس الليله فالليل
-ابرار: قلتلك منقدرش نجى
-محمد : مدخليش فيك..غدوة تكونى هنايا ولا والله
نمشى نطق على حوش خالك ونخطفك منه ??
ابرار تضحك ???
-محمد : ايه اضحكى رانى والله نديرها
-ابرار: غدوة جمعه ومعنديش حتى من يرفعنى
-محمد : خلاص امالا تعالى السبت الصبح محسن
ولد خالك بيجينى تعالى معاه …
-ابرار: وعلاش بيجيك
-محمد : بيجيبلى اوراقه ..امك كلمتنى عليه …ممكن
نحصله وين يخدم
-ابرار: ياريت تحصله
-محمد : خلاص تعالى معاه ..لكن مش بروحك خلى
بنت خالك تجى معاكم
-ابرار: حقة دكرتنى .. على دكر بنت خالى ..تصدق
شن طلبت منى يومها
-محمد : شن طلبت منك
-ابرار: طلبت منى رقمك
-محمد : وشن بدير بيه رقمى تبى تعيين حتى هيا ولا شنو ??
-ابرار: نقولك الحق …حسيتها زى معجبه
-محمد ضحك : والله
-ابرار: والله زى منحكيلك
-محمد : قوليلها محمد مش فاضى بأى معجبه
.. قوليلها محمد باله مشغول
-ابرار: وبشنو باله مشغول …
-محمد: يحب فى بنوته حلوة وقنينه زى القمر
-ابرار انصمتت لما سمعت الكلمة ?: اهاا بالصحة
عليك وعليها انشاء الله
-محمد يضحك ويتسهوك عليها : عقبالك ???
-ابرار: لا انا منفكرش فالموضوع هدا توة
-محمد : ايح ايح .. قصدك انتى قلبك قاعد فى مكانه
-ابرار: ايه فمكانه باهيووو …..وماخشه حد ..
وانت بالصحه عليك وعليها اللى تحبها هادى
-محمد : صحه ليك قلبك قاعد فمكانه ..انا قلبى
انخطف خلاص ..جت وحدة خنباته ومعش تبى
تردهولى
-ابرار?: ممكن نعرف اسمها ونعطيك رائي فيها
-محمد يضحك : خلى نتأكد من مشاعرها وبعتالى
نقولك عليها
-ابرار?: باهى ربي يحفظكم لبعضكم
-محمد : ااامين
-ابرار : هيا تصبح على خير
-محمد : خيرك بتسكرى
-ابرار: نخاف تتصل بيك وتلقاك انتظار وانسببلك مشكلة
-محمد : لا لا متخافيش مستحيل تلقانى انتظار
-ابرار تكنطت حست الدوة جديات : باهى باى توة
-محمد : تعالى
-ابرار: نعم
-محمد : بتجى السبت ولا شنو
-ابرار: لالا مش حنجى..هيا تصبح على خير
وسكرت الخط
ابرار فى خاطرها: حتى لو بنجى بعد ماطلعتلك
حبيبة غيرت رائي
???
_________________________
يوم السبت بعد الضهر …
سماح مروحه على رجليها كانت فى دورة التقوية
وصلت حوشهم لقت شاب واقف عالباب الخارجى
ويشرين …
-سماح : السلام عليكم
-الشاب: وعليكم السلام
لقاها وقفت قدام الحوش حتى هيا ..عرفها بنتهم
-الشاب: انا محسن ولد خو امينه
-سماح : اهاا محسن ولد خال ابرار ..ديما تدوى عليك وتشكر فيك
انا سماح بنت الفيتورى
-محسن مد يده وصافحها : تشرفت بيك
قعد يشبحلها ..محسن عيونه حارات
سماح واطت راسها وسكتت
-محسن : انا جاى لمحمد خوك نبيه شوى
-سماح : حاضر ..خلى يفتحو تو اناديهولك ..
الشريانه ماتخدمش راهو ..وصعب يسمعوك اطقطق
وقامت تليفونها اتصلت بعمتها امينه قالتلها افتحيلى الباب
وفعلا جت امينه فتحتلها الباب
لقت محسن ولد خوها حتى هوا كان يطقطق
دخلاته للمربوعه …
ونادت محمد …
محمد يحساب بيلقى ابرار جاية معاه
فتش بعيونه مالقاهاش …عرف انها ماجتش …
خش محمد للمربوعه لقى محسن مقعمز ..
تعرف عليه …وعجبه
خدى منه اوراقه …
وشرب معاه قهوة ..وناض محسن روح
خش محمد للصالة
-امينه : قتلك يا محمد الصبح .. كلمونا متاعين سناء ويبو يديرو البيان
-محمد: عادى وليش لا .. عالخير انشالله..شاورو بوى وردو عليهم
ومحمد يفكر فى ابرار من يوم الخميس فالليل معش ردت عليه …
وكل مايبعتلها رسالة تقوله انها لاهية ومش فاضية
وهوا كل مايشرين تليفونه يجرى يشوف يلقاها مش
هيا ..ليه ايام مسمعش صوتها ..
مستاحشها ومش قادر يقول ..يتمنى غير اطمنه
ويسمع صوتها ..حس كأنها مسافرة وهوا يراجى فيها
ندم انه بصر معاها وقاللها هكى …حسها حرجت
…وصعب يرضيها فالهاتف يبي يشوفها قدامه
…وقعد يفكر فى حيلة كيف يخليها تجى
واما محسن عاد.. روح هايم فى عمتك سماح عجباته
__________________________
تمت .. ويتبع ???
الحلقه الجاية نكملو … عرس ناصر وبيان سناء
ومحسن كيف بيدير بيش يوصل فى سماح
ومحمد المنجوه ندم عالبصارة اللى بصرها مع ابرار ..
من هاديكة البصارة ماعاد ردت عليه??
نحبكم ❤