رواية سرقت قلبي
الحلقة الثالثهابرار لانها كانت مع محمد ..فنست انها تسلم عليه قدامهم
-سناء: ابرار خيرك سلمى على محمدابرار تسلم على محمد لاول مرة …-ابرار: اهلا محمد
-محمد: اهلين ابرار …
وعيونهم يشبحو لبعض ..
رجعت ابرار قعمزت فى مكانها …
-وسام : ابرار نبيك شويا ترا تعالى
ناض وسام مشى للمطبخ .. وناضت ابرار وقفت ولحقاته
ومحمد حتى هوا لحقهم بعيونه ..
شاطت فيه النار ..قعد حاير كيف عادى امها سكتت
ان ابرار ووسام يمشو بروحهم
تعصب هلبا.. حس ان الحوش وكالة منغير بواب
منغير مايشعر بنفسه …
ناض وقف ..وتخيلو شن دار ???
لحقهم للكوجينه?
لقى وسام مقعمز عالطاولة وابرار تحط فى السزوا
متع القهوة عالنار
-ابرار: قلتلك فوته الموضوع يا وسام
لما خش محمد طول سكتت ابرار ..
وهوا قعد يشبحلها بنضرة غل
-محمد : احم… فى امية فالثلاجه
ويشبحلها وعيونه حمر
ابرار شافتله وخافت من نضرته عطت بالضهر تلفتت للسزوا …
وسام بعفوية : هوينا فى شيش امية عالطاولة فالصالة
زاد تكنطى محمد حس ان وسام يوزع فيه : الشيش
اللى فالصالة مفتوحات كلهم
-وسام : امتى لحقو فتحوهم كلهم ..انا توة قبل شوى حطيتهم
خدى محمد شيشه المية من الثلاجة وطلع
وقبل مايطلع عطى لابرار نضرة زى النار ومشى ..
لكن هيا عاطية بالضهر وماشافتاش
-وسام : انتى كيف ماتقولليليش عاللى صار فالكلية
-ابرار: يا وسام قلتلك عادى والله مافى مشكلة..انا
تعودت عليها خلاص ..وسيورها تتزوجك وتفهم
شنهيا علاقتى بيك
-وسام : لا انا مفهمها من اول يوم خواتى خط احمر وانتى من ضمنهم
-ابرار: يا وسام هيا مش حاسبتنى اختك ..ولما ادافع
عليا قدامها تزيد هيا تحقد عليا ..الموضوع هدا
مسببلى ازمة كبيرة معاها
-وسام : لا تو نخليها تركب على رقبتى وادلدل رجليها ….
انا عموما نبهت عليها تكلمك وتعتدر منك …وهيا
كلماتك ولقت تليفونك مسكر
محمد فالصالة قريب يموت …
مش عاجبه اجتماع ابرار ووسام بروحهم ..
وحاير كيف الامر ماشى هادى قدام امينه وقدام
سناء وما حد علق على وجودهم بروحهم
وبعتالى شنهوا الموضوع اللى ابرار تقول لوسام فوته
دماغه يخدم ويخمم ويحلل
ولكن مشكلة محمد انه هوا ميعرفش انها عاشت
بالفعل زى اختهم..ويعاملو فيها كلهم على هدا الاساس
لكن محمد ماعجباش الشى اللى قاعد يصير
_________________________
نزلت سماح من الدور الثانى
-سماح : وين ابرار
-سناء : ابرار فالمطبخ مع وسام
-سماح تضحك : نفس الموضوع قصدكم
-سناء: اكيدة نفس الموضوع وشن بيتغير ??
محمد قريب تنبتله قرون .. شنهوا الموضوع اللى
كلهم عارفينه ولكن لما خش هوا للمطبخ سكتو
ومابوش يقولوه قدامه ??
المهم محمد لو وزنوله ضغطه فى هداكه اليوم راهو لقوت 200 عالاقل ??
-سناء: باهى اللى جتيها معاك ابرار يا عمتي امينه ..
بكرى كلمتها بنقوللها اتجى تحضر لقيت رقمها مسكر
-امينه :قالت تليفونها طاح فالمية .. تو يجف وتفتحه
محمد سمع الجملة قام راسه طول شبح لامينه
-سناء: تشري واحد ثانى وتريح روحها خير ..
لان التليفون بعد مايطيح فالمية معش يرجع يخدم راهو
-سماح: لا لا انا تليفونى يومها تبزعت عليه طاست امية ..
جففته على طول بسشوار وبيته ليله كاملة فى سطل رز ..اهو يخدم عادى مافيشى شى
-سناء: الله اعلم
مشت سماح للمطبخ …خشت سلمت على ابرار
وبدى محمد يسمع فى صوت الضحك
وهوا قاعدة والعه فيه النار..وقريب يموت كيف كيف واخدة راحتها قدام وسام ..
مش عارف علاش خاطره يخش يطلعها من شعرها من بحداهم غير متحشم ??
شويا وطلع وسام قعمز فالصالة ..ويلبس فى سناء على موضوع الخطوبة ..
-وسام : اسمعى راهو بنتزوج انا وياك فى ليله وحدة
-سناء: بالك الهانم خطيبتك ترفض
-وسام : لا لا عادى هيا كانا لاقيه اليوم قبل غدوة
-امينه: انشالله انت ووخيك محمد فى ليله وحدة
-وسام يشبح لمحمد : يا ريت والله
محمد فى عالم ثانى .. حواسه كلها قاعدة فالمطبخ …
مزال عنده شحنه غيظ كان لاقى يعلق فى حد فيهم ??
-وسام : هيه يا خونا نكلمو فيك
-محمد انتبه : ااه والله ماسمعتك
-سناء: اللى واكل عقلك
-وسام : يتهنى بيه
وضحكو مع بعضهم …
محمد تقول نابته تحته دودة..والغيظ بدى باين على وجهه ..
ناض خش للمطبخ ثانى
لقى سماح وابرار يصبو فالقهوة
-محمد : سماح ترا اركبى جيبيلى باكو الدخان من دارى
-سماح : باهى …
وطلعت ركبت للدور الثانى
قرب محمد من ابرار .. وهوا زى الثور الهايج
-محمد : ماشالله فالدور الثانى مع محمد وفالدور
الاول مع وسام ..والحبل عالجرار
-ابرار عيونها دمعو : احترم نفسك انت شن تقصد
انا قلتلك دارك غلطت فيها .. ووسام نتكلم معاه زى خوى
-محمد قرب منها وعض لسانه : نقصد كيف بنت فى
عمرك انتى فالجامعه وجاية مستفردة بشاب فى
الكوجينه بروحها وعلى عينك يا تاجر
-ابرار: قلت هدا خوى ..عيب عليك
-محمد : والله ..صار قلتيلى خوك
-ابرار: انت خيره هكى كلامك معاى ..انت لمن طالع خوتك مش هكى
-محمد: ماهو انا العوج وتكسير الرقبه مايمشوش معاى ..
هدا علاش كلامى مايعجبش فيك
وضحك وشبحلها باستهزاء
خشت سماح للمطبخ حست ان الجو مش تمام
-سماح تكلم فى محمد : هاك اهوا الدخان
-ابرار : سماح اهيا القهوة واتيه ارفعيها
وطلعت ابرار وخلتهم بالمطبخ
__________________________
خشت ابرار للصالة قعمزت
ولحقوها محمد وسماح …
سماح تمد فالقهوة …
خدت امينه وسناء كل وحدة فنجان …
وسام مايبيش لان عنده حموضه
مدت لابرار فقالتلها انهامتبيش ..قد ماشدت فيها مابتش تاخد
ومحمد يشبحلها بدى ضميره ايأنب فيه .. حس انه قسى عليها شويا..
سماح تمدله فالقهوة منتبهش ليها
-سماح : محمد نكلم فيك خود قهوة
-محمد مد يده: باهى صحيتى
-ابرار: هيا سماح نعاونك كان بتوتي حاجه لمناسبة غدوة
-سماح : غدوة انوضو بكرى ونوتو كل شى طازة
-امينه : خلى غدوة خير .. شنو بتبيتو الحاجات فى باكواتهم من الليلة
-ابرار صوتها مغصوص : ماهو انا شوى ثانية بنروح
محمد تفاجأ وتلفتلها
-امينه : من بيروح بيك فى هالليل
-ابرار: اهو تو نكلم خالى ناصر يجينى ..ولا يروحو بيا سماح ووسام
-سناء: اقسم بالله تروحى ماعاد مكلماتك
-ابرار: ماتحلفيش يا سناء .. سهام بنت خالى تراجى
فيا قلتلها بنروح الليله
-امينه : كان ندرى عليك جاية وبتروحى راهو
ماجبتكش معاى فى هالليل
-محمد : لا خليك الليله صعب حد يوصلك او يجيك فالليل..
-ابرار تلفتتله : لا بنروح انا ?
-محمد تلفتلها : خلاص عاد قلتلك الليله باتى ..
ولما يطلع النهار براحتك كان بتروحى
سكتت ابرار
-امينه انشغلت : ابرار خيرك
-ابرار تداركت الامر وحست انهم لاحظو عليها
حاجه : لا ياااام غير ادكرت مرت خالى
-سناء: هكى منزعل انا .. يعنى حزنتى على مرت خالك ومافرحتيليش انا
الميت يبي والحى يبي
-ابرار: بلا جو عاد يا سناء كيف مفرحتلكش ..خلاص اهو قاعدة انا
محمد منغير مايحس بنفسه لقى روحه استريح بخبر قعادها
-ابرار: وين سحر
-امينه : بعد مانزلت معاك رجعت ركبت ..قالت عندها امتحان غدوة
-ابرار: سماح هيا نركبو فوق
-سماح : هى نوضى
وتلفتت ابرار لسناء : الحقينا باهى
-سناء: اهو جايه
ومزال محمد الفضول بيقتله فالموضوع اللى دار بين وسام وابرار وكلهم يعرفوه الا هوا
-محمد يوشوش لسناء: سمعتكم تقولو نفس الموضوع اللى بين ابرار ووسام
شنهوا الموضوع ؟!
-سناء: خطيبت خوك وسام تغير عليه من ابرار ..
وكل ماتتلاقى هيا و ابرار فالكليه لازم اديرلها لقطه
-محمد : وعلاش يعنى
-سناء: منعرفش علاش .. بالرغم وسام بالدات
معنداش اى علاقه بابرار ولا يطلع فيها هيا وسماح
-محمد : اهاا
-سناء: انا حايرة امالا خطيبة خالد اللى يطلع فيهم ديما شن بديرلها
وقعدت تضحك
حس محمد انه قسى عليها شوى ..وهيا مش ناقصه
-سناء: واللى يحيرك ان خوك وسام توصله توصله الدوة ..??
-محمد : شن دارتلها زعما توة خطيبة وسام
-سناء: الله اعلم ..زمان كنا نكبرو فالقصه
ونجو كلنا ضد ابتسامة ..لكن لما لقينا ابرار مكبرة
عقلها وقالتنا فوتوها سيورها تفهم ان وسام زى خوى ..
خلاص فوتناها ومعش ندورو فيها
-محمد : خطيبة وسام اسمها ابتسامة
-سناء: ايه هكى اسمها وضحكت ???
خش الفيتورى للحوش : السلام عليكم
-كلهم : وعليكم السلام
قعمز الفيتورى فالصالة …
وناضت سناء تحشمت من بوها غدوة فضانيتها عاد
ومشت امينه تجيب فى تمر وحليب للفيتورى لانه
كل ليله يتعشى خفيف هكى
وقعدو وسام ومحمد والفيتورى يهدرزو عالفضانية
غدوة وشن يبو وشن مايبوش ومن هالكلام
ومحمد عقله فوق فى دار خواته
يبي حيله كيف يخشلهم ويستفرد ب ابرار ويعتدرلها
على طول لسانه معاها بكرى …
” ولى عليه خاطره ??”
لكن هوا نوعه يتحشم من خواته ومستحيل يخش دارهم ..
وكيف الحيلة ياربي
__________________________
قعدو البنات وابرار ايطبقو فالكلينكس فى دار سناء
لان سحر تقرا فالدار الثانية عندها امتحان
جى خالد وركب مع خواته فوق
وقعدو يبصرو على سناء ودارو عليها جو
ومحمد يبي حيلة كيف ايطلع ابرار من جنبهم
طلع للسيارة ..وجاب تليفونها
وخش للحوش …
لقى امينه قاعدة مقعمزة مع بوه
مدلها التليفون ..
-محمد : مش عارف التليفون هدا لمنو
-امينه : هدا تليفون ابرار …وين لقيته
-محمد : لقيته فالجنان
ضوى فى يد امينه ..فتحاته لقاته يخدم ..
-امينه : اهو رجع يخدم ثانى تليفونها …
وبدت تنادى.. ابرار .. يا ابرار
-الفيتورى: شنو تليفونها كان فاسد
-امينه : ايه .. قالت تبزعت عليه امية
طلت ابرار من الدور الثانى : نعم ياااام
-امينه : تعالى اهو تليفونك طايح منك
-ابرار مستغربة : تليفونى !!! وين لقيتيه طايح منى
-امينه : غير تعالى انزلى لوطا شوى
نزلت ابرار للدور الاول … سلمت على عمها الفيتورى
وماتبيش تشبح جهه محمد بكل
-امينه مدت لابرار تليفونها : هاك تليفونك وردى بالك من حاجتك
-ابرار: انتى وين لقيتيه يااام
-امينه : لقاه محمد طايح منك فالجنان
تلفتت ابرار لمحمد …
-محمد يضحك : ردى بالك من حاجتك زى ماقالتلك امك
ابرار اغتاظت وخدت تليفونها وسكتت …ماتبيش
تفضح روحها قدام امها وتقول انها كانت بايعاته
__________________________
خدت ابرار تليفونها وبتركب
-محمد : معليشى اديريلى طاسة شاهى
-ابرار استغربت فيه وردت منغير ماتشبحله : هى
شوى انادى سماح وننزلو نديرولك شاهى حاضر
-محمد : الشاهى طايب واتى ..صبيلى طاسة بس
-ابرار تحشمت قدام عمها الفيتورى : باهى هى تو نجيبلك
خشت ابرار للمطبخ …
لحقها محمد …لقاها كيف حطت الشاهى عالنار بتسخنه
-محمد : انا الحق منبيش شاهى
-طفت ابرار الغاز : باهى براحتك
وجت طالعه
-شدها محمد من يدها : تعالى
-ابرار : حول يدك خيرك شن تبى
-محمد : نبى ندوى معاكة
-ابرار : ادوى شن تبى
-محمد : نبى نتعدر منك..ونطيبلك خاطرك..عارف
روحى بكرى جرحتك..حقك عليا
-ابرار : قصدك بكرى لما عزرتنى ..انى فالدور الثانى
مع محمد وفالدور الاول مع وسام
-محمد : باهى انا قاعد نعتدر منك وقلتك غلطت فيك وحقك عليا…
-ابرار بغيظ : اعتدارك مش مقبول .. وحق التليفون
متاعى اللى دفعته فيه للمحل حيوصلك
-محمد : انا قاعد نفتح معاك فى صفحة جديد .. سامحينى
-ابرار : منيش مسامحاتك
-محمد شدها من يدها : ليش
-ابرار: لانى نكرهك
محمد تكنطى وعلى طول ضرورى منها ردت الفعل والكرامة عاد
-محمد : تعرفى حتى انا معنديش ليك خلوق..
وماستريحتلكش نحس فيك خبيثة ..
لكن قلت نعمل بأصلى ونعتدرلك..لكن الباين عليك ماتستاهلش
-شبحتله ابرار بغضب: انا خبيثة …انشالله ربي
يقطعلك لسانك من عروقه على كلامك الزفت هدا …
وجت بتطلع ….
رجعت تلفتتله : ولا نقولك انشالله تموت باهيووو
وطلعت من المطبخ بسرعه وركبت للدور الثانى ..
وخلت محمد بروحه فالمطبخ
________________
_________________
خشت ابرار لدار سناء …
وهيا خايفه من الكلمه اللى قالتها لمحمد ???
خايفه يحرش فيها امها
ومحمد ركب حتى هوا خش داره
اتكى على سريره …
ويدكر فى كلمة انشالله تموت .. و قريب يموت
بالضحك …
حط يديه الزوز ورا راسه عالمخدة
ويتكلم فى خاطره : خطيرة البنت هادى… دمه
خفيف زى العسل ..ولسانها متبري منها
ورقدو البنات وابرار
وناضو ثانى يوم من الساعه 9 …
بيش بيعولو للفضانية …لقو امينه فايقه قبلها وموتية
الطنجرة الكبيرة والماعين …وجايبة الركاب من المخزن
صبحو على امينه وبدو فالعوالة
ابرار لابسه سروال امريكانى ازرق وبلوزة سودة وفانيليا زرقا
ولابسة وشاح …
فطرو هيا وسماح وسناء…
وبدو يقرضو فالبصل …
-سناء: عمتى امينه انا نقول لما بيجونا النساوين
نشرو حتى جاهز …خير ما اتعبى روحك
-ابرار: قصدك النساوين لتوة ماجوش
-سناء: بعد وفاة مرت خالك ممكن بثلاث
اسابيع ..بعد ماروحت عمتى امينه ..جت اخته ومرت
خوه هنايا شافونى .. لكن امه مزال ماجتش
-امينه: كانا بنمدو حار نشرو شرى .. لكن كانا بنقعدو تو نطيب انا
شرين الباب …
-سناء: هادى اكيدة نرجس بنت خالى
نرجس صاحبة سناء هلبا … وعزمتها بيش تحضر معاها فضانيتها
طلعت سماح فتحت الباب …
وخشت هيا ونرجس .. وسلمت نرجس عليهم كلهم
نرجس مواليد 80 تشتغل فى مكتب محرر عقود متخرجه من القانون
___________________
محمد نازل فالدروج وسماح راكبة للدور الثانى..
صبحو على بعضهم
خش محمد للمطبخ صبح عليهم كلهم …
ويشبح لابرار وهيا مواطية راسها ماردتش اصلا
-نرجس محولة وشاحها : اهلين محمد كيف حالك
-محمد : اهلا نرجس شن حال خالى
-نرجس : الحمدلله يسلم عليكم كلكم …
امينه وسناء طلعو للجنان يركبو فى بمبلة الغاز فالركاب
والمطبخ قعدو فيه نرجس وابرار ومحمد
-نرجس: خيرك معش جيت
-محمد يشبح مرة مرة لابرار : عادى والله مشاغل
وعمل كيف بادى فيه فالجامعه
-نرجس: حتى اول امس كلمتك اكثر من مرة وانت مارديتش
قامت ابرار راسها وشبحتلهم وجت عينها فى عين محمد
-محمد : ممكن غير معرفتاش رقمك ..لانى الارقام
الغريبة منردش عليها
-نرجس: ماهو عطيتهولك يومها رقمى
-محمد : تصدقى نسيت مادرتلاش حفظ
-نرجس: باهى اهو تو نشرينلك توة وديرله حفظ
وشرين تليفون محمد فى جيبه .
-محمد : باهى تو نديرله حفظ
-سناء تنادى : نرجس ترا تعالى شويا
مشت نرجس للباب متع المطبخ اللى يفتح عالجنان
وتشوف فى سناء شن تبى
قرب محمد من ابرار وقف جنبها ويشبحلها ويضحك فى خاطره
-محمد : مفيش فطور
-شبحتله ابرار : خلاها هيا اديرلك فطور اللى تبعتو
فالارقام لبعضكم
-محمد يضحك: لا انا نبى الفطور منك انتى اللى
تدعى عليا بالموت
-ابرار : مدامنى ندعى عليك بالموت منها تخاف
نديرلك سم هارى مش فطور
-محمد يضحك : حتى سم هارى راضى بيه منك
نرجس سمعت ضحكته خشت تجرى
-نرجس: محمد تبى حاجه
-ابرار : يبي فطور
-نرجس فرحانه : من عيونى
وطلعت تجرى تجيب فالولاعه من سناء
-محمد : علاش قلتيلها
-ابرار: وشن تبى احسن من فطورك جايك من عيونها..
غير رد بالك تلقاه معبى رموش بس
وطلعت للجنان ورا امها وسناء
وجو التريس متاعين الفضانيه …
وقال الفيتورى لصغاره بدلو البسو زبونات …
وبالفعل ركبو بدلو فوق..
ونزلو كل واحد لابس زبون
دارت امينه البخور ..بخرت وسام وخالد …
وعطت المبخرة لسناء بيش تبخر محمد لانها تتحشم منه
تمشى عمتك نرجس خطفت المبخرة وبدت تبخر فى محمد …
-محمد يعيط عليها : هدا شنو منحباش
-نرجس: هدا بخور عالعين .. والعين حق
سماح وسحر يضحكو عليها
محمد دور فالحوش بعيونه لقاهم كلهم موجودين ماعدا ابرار
خش للمطبخ مالقاهاش …طلع للجنان متع العوالة مالقاهاش ثانى ..
فتح الحمام لقاه فاضى
قال فى خاطره اكيدة انها فالدار فوق بروحها
ركب يبي يدورها ..مش عارف شن بيقوللها
المهم انه يبي يحكى معاها وخلاص
وهوا راكب فالدروج شافاته نرجس ..لانها مركزة معاه
ركب للدور الثانى …
فتح باب دار سماح وخش …يحساب بيلقى ابرار ..
وابرار فالحمام متع الدور الثانى
لقى الدار فاضيه
لحقاته طول نرجس ..خشت وراه وسكرت الباب وراها
-نرجس: محمد نبيك فى موضوع بروحك
-محمد انخلع : تعالى ننزلو لوطا وقوليلى زى مايعجبك
وحط يده على مقبض الباب بيفتحه …
ويلاقى ابرار حتى هيا بتفتح الباب وبتخش
تلاقو فم الباب
ابرار شافت نرجس مع محمد فالدار بروحهم
-ابرار تشبح لعيون محمد : اسفه الباين جيت فى
وقت مش مناسب
_____________________
تمت ويتبع????
ابرار تحساب محمد فى موعد غرامى مع نرجس بروحهم
زعما محمد بيقعد يبررلها فى موقفه ..والا مش حيدورها
عموما الحلقه الجايه نحكو عالفضانيه
نحبكم ❤