رواية سرقت قلبي ‏ ‏

#سرقت_قلبي
الحلقه الثانية-ابرار بصوت واطى : موبايل شنو

-محمد: موبايلى اللى خنبتيه من الشنطه يا خنابة
الشنطه اللى كنتى تفتشى فيها يومها-امينه : خيركم شن توشوشو

-سماح تضحك : انا سمعت كلمه موبايل

-محمد تلفت لامينه : لا موبايل لا سو ..

قلتلها موضوع يخصنى انا وياك يا حاجه ..

شن جاية تعيط هيا

-امينه : صدقت يا وليدى هيا شن دخلها

محمد بحركه لا ارادية تلفتلها لما قالتله يا وليدى

وملامح وجهه كأنه ماعجباتاش الكلمه

-تلفت محمد لسماح : لما يجفو حوايجى لميهم

وحطيهملى فى دارى باهى …

وشبح ل ابرار وطلع من الصاله ..

ركب من الدروج للدور الثانى

________________________

سلمت ابرار على امها …

وخشو هيا وسماح لدار الجلسة اللى فالصالة

-سماح : شنو جبتيها

-ابرار : ايه جبتها ..قالى صاحب المحل هيا بأسم واحد سودانى

-سماح : هاتيها بسرعه قبل ما يشوفك حد

حطت ابرار يدها فى شنطتها وطلت ورقة ملفوفة فيها شفرة تليفون

خدتها سماح بسرعه …وحطتها فى جيبها

-ابرار : بتكلميه الليله

-سماح : بنكلمه ايه.. غير ادعيلى بس مايفيقش بيا

خالد ..المرة اللى فاتت قريب سمعنى

-ابرار : باهى انشالله خير

وقامت تليفونها كلمت خالها ناصر ايجى يروح بيها

-سماح : تى خيرك تكلمى فيه

-ابرار : والله عندى مندير ومانقدر نقعد يا سماح …

هيا وجعتها حركة محمد مع امها ..وعياطه عليها

ورعشت من كلمت الموبايل المسروق …

فضلت انها تهرب من الحوش

-سماح : خلى انوض اندس الشفرة فوق احسن ما

اطيح منى ونقعدو فى سين وجيم

-ابرار : باهى اهو بنراجيك متعطليش قبل ما يجى خالى

-سماح : باهى

وطلعت ركبت للدور الثانى لغرفتها هيا وسحر بيش ادس الشفرة

___________________________

محمد غير حوايجه ونزل بيطلع عنده مشوار

وهوا طالع يشبح فى ابرار فالدار فاتحه تليفونها وتتصل

خشلها للدار انخلعت ابرار وسكرت تليفونها وحطاته جنبها

-ابرار وقفت مخلوعة : خيرك انت شن تبى منى

-محمد: نبى تليفونى ..مستعد نشريه منك بالفلوس

-ابرارقامت يدها : احترم نفسك واعرف شن تدوى انا

عينى مليانه ..مش مستحقة نخنب منك

-محمد: تليفون فالشنطه .. وماحد غيرك فتحها

وبعدها التليفون اختفى يعنى منو خداه جو الجنون قاموه

-ابرار: بالك حد قبلي فتش الشنطه وخنبه منك

-محمد: اللى بيخنب التليفون راهو رفع الشنطه كلها

-ابرار: اهو انا تتهم فيا بالتليفون والشنطه لقيتها فمكانها انت

-محمد : لا انا لحقت عليك قبل ماتقيميها

لما درهلها كبدها قررت تحرقله اعصابه وتكدب عليه

وتقوله ان تليفونه عندها

-ابرار: تعرف كيف تليفونك عندى واعلى مافى خيلك اركبه

-محمد : متجننينيش هاتى التلفون.. فيه ارقام مهمه

وفيه اميلات مهمه…نبيه ضرورى

-ابرار : تى والله ماعندى ونحرقلك فعصابك زى ماحرقتلى اعصابى ..

وقامت تليفونها فى وجهه .. اهوا تليفونى الوحيد ولو مستحقه هاك خوده

وهيا مشهرة يدها بالتليفون فى وجه محمد …شرين تليفونها

مكتوب حبي القوي يتصل بك

-شبحلها محمد بهزوة: حبك القوى يتصل بيك

وعطى بالضهر بيطلع

فتحت هيا الخط على طول …وفتحت المايك

-ابرار : ايوة خالى

-ناصر: هيا اطلعى انا برة

-ابرار: اهو جاية ياخالى…خمسة دقايق بس

وجت طالعة تلفتت لمحمد : ويحرم عليا مزال انخشه

الحوش هدا لما انت تكون فيه عقابها تخنبنى ..

-محمد عض لسانه : قلتلك تليفونى نبيه ..الحركات

هادى مش عليا انا اديريها

خافت ابرار وطلعت من الدار تجرى

______________________________

طلعت ابرار مشت لامها فالمطبخ

سماح كيف نزلت

لكن ماوقفتش معاهم ..عاطيتهم راحتهم

شوى واتصل بيها خالها ناصر قاللها هيا اطلعى

وتسمع فى صوت صغاره معاه

ناصر تزوج طبعا وعنده زوز بنات وولد ..

طلعت ابرار وروحت مع خالها

بالرغم امها قعدت تشد فيها لكن هيا رفضت وتسبلت بالقراية

لكن هيا فالحقيقه اضايقت من وجود محمد ومن

الهجوم اللى داره عليها فالزوز لقاءات اللى بيناتهم

وروحت لحوش بوها

_______________________

ثانى يوم

امينه جاها خبر

اتصلت بيها ربيعه مرت خوها سعيد .. قالتلها ان

احلام مرت ناصر دارت حادث بسيارتها

رفعها وسام طار بيها لمستشفى الطبى

لقت الدنيا حايسة فى بعضها وخوها سعيد واقف مصدوم

-امينه : ياوخى ياسعيد شن صار فى عيال خوك

-سعيد : عطاتك عمرها

-امينه مصدومه وتبكى : انا لله وانا اليه لراجعون

وقامو العزى ويانارى صغارها الثلاثه تيتمو بعدها

وفات اسبوع عالوفاة

وهادوكا الصغار لاهيه بيهم ابرار وبنات خالها سعيد سهام ومرام

سهام م 86 اكبر من ابرار بعام.. ومرام اصغر منها بعامين م 89

امينه جوها ربيباتها يعزو وقعدو مقعمزين جنب ابرار

وامينه قريب طارت على مرت خوها ..

كانت حنينه زى ماكان خوها ناصر حنين عليها

وقعدت اسبوع كامل فالوفاة

____________________________

فى نفس اسبوع الوفاة

محمد مضايق من داره

لانه لما روح رجع لنفس داره اللى كانت جنب دار امه….

ولكن توة الدار قريبه من مرت بوه

مش مستريحش فيها بكل

فأستادن من خواته سماح وسحر انه يغير الغرفه

معاهم ..وقالوله عادى خود دارنا

فجاب محمد عمال .. غيرو دار خواته قضوها

وركبوها فى داره هوا

وداره هوا ركبوها فى دار خواته

لما روحت امينه من عزى مرت خوها تفاجئت

بالتغيير لكن ماعلقتش

لان سبب تفاهمها مع ربيباتها انها ماتدخلش فى

امورهم الشخصيه ولا دايرة روحها مسيطرة عالحوش

-امينه: شنو غيرتو الديار

-سحر تحشمت: ماهو الدار ليها فترة مسكرة ..ومنشعه..

ومحمد متحملش الريحه فقال نغيرو خير

-امينه : اللى يبيه خوكم قولوله باهى .. خلى ياخد عالجو هنايا ويتأقلم

-سحر: اهو نسايرو واحنا شن ورانا

نزلت امينه للمطبخ …

ومن يوم جتهم وهيا اللى اطيب فالغدى رسمى

حتى بعد ماتخرجت سناء من كلية الهندسة قعدت لاهية فالخدمه

وقعدت قضيه الحوش كله على امينه

______________________________

امينه اطيب فالغدى

خش الفيتورى للحوش

غسلت امينه يديها ونقصت النار عالغدى

ومشت للفيتورى …

معوداته لما يخش تمشى تستقبله طول

-الفيتورى: السلام عليكم

-امينه : وعليكم السلام ..شن حالك يا حاج

وخدت منه كيسة فيها تفاح

-الفيتورى : يعطيك الصحه يا امينه .. شن درتينا غدى

-على خشت سحر للصاله : اهلا يا بوي

-الفيتورى: اهلا حرحورة شن حالك بنيتى

-امينه تضحك : درت بازين .. عارفاتك تبيه

-الفيتورى : اهو لينا اسبوع ناكلو فى تمرميد الحرحورة وسماح وخلاص

شن بنديرو هى ??

-سحر: امس درتلكم سكالوب كليتو يديكم وراه يا بوى

-الفيتورى يضحك: ايه اهو متشوفيش فى ايديا مقطوعات

وبدو يضحكو الثلاثه

-الفيتورى: انا المالوب ولا شن سميتيه هدا مايشبعنيش ..

نبى غير الرز والكسكسى غير سايرتك امس

-سحر تضحك: زعما حتى محمد ماعجباش وغير سايرنى بس ???

-الفيتورى: لا هدا فالاكيد نشبح فيه يبلع بالسيف و مسايرك وخلاص ?

-سحر: ياودى اهو عمتى امينه روحت .. وكل يوم تلقى الغدى يفحفح ??

-الفيتورى : ابرار وين توة يا امينه

-امينه : فى حوش خالها سعيد ..قاعدة مع بنات خالها شادين صغار ناصر

-الفيتورى: خوالهم ماتكلموش عليهم

-امينه : الحق خالاتهم قعدو شادين فيهم ..لكن ناصر روحه فصغاره

وهما هوا هداكه قعدو اسبوع هنايا ..وروحو امس لبنغازى

حتى هما الناس تراجى فيهم غادى تبى تعزيهم

-الفيتورى : ربي يطيحه فى بنت حلال كيفك يتهنى على صغاره معاها

-امينه : ربي يجيبلهم اميمه ترعاهم يااارب

________________________

فى نفس الوقت

ابرار روحت حوش بوها بتجيب حوايجها

جوها خواتها يجرو ليان وليالى ..

ليان مواليد 93 عمرها 13 سنه .. وليالى مواليد 96 عمرها 10 سنوات

وعندها زوز خوت اولاد صغيرين عمر عمره 8 سنوات و مهند عمره 6 سنوات

سلمت عليهم ابرار

-ابرار: وين عمتى جازية

-ليالى : ماما فى حوش جدى ليها ثلاثه ايام

-ابرار: تى كيف ..وانتو من معاكم

-ليان : بابا ماخلاهاش ترفعنا معاها

-مهند : نبى ماما يا ابرار ..معرفتش نحل الواجب

جازية كانت تعامل فى ابرار كويس ..لانها كانت

مستفادة من المعاش اللى دايرته امينه لبنتها

وبالرغم ان امينه كانت عارفة ان معاش ابرار تصرف فيه العيلة كلها

لكن كانت راضيه المهم يعاملو بنتها كويس

وبعتالى ابرار كانت نوعها هادية ومش متعبه

وكانت تغيب بالايام تقعد عند امها ..

وجازية ماكانتش تضايق منها

ولما جازية تمشى عند اهلها معناها مصطفى ضاربها ولازها ..لانه معنداش فلوس

ومن لما كبرت ابرار وبدت تعرف تتصرف ..

بدت كل ما بوها يديرها ويلز جازيه …

تجيبله فلوس من امها وتعطيهمله ع اساس معاشها وتحل الازمه

تزهى الحمامه عاد عند مصطفى ويستتب الامن وترجع جازية لحوشها

مشت ابرار لبوها فالمربوعه

-ابرار: شن حالك يا بوى

-مصطفى متكنطى : اهلا من جابك

-ابرار: جابنى خالى سعيد وبيرجعلى بعتالى

-مصطفى: وخيره ماخشش سلم ولا قاتليله بوه

-ابرار: قتلك بوى انا الشهر هدا بناخد نص معاشى بكرى ..

وتو نجيبهولك غدوة انشالله

-مصطفى انقلبت ملامحه للسعادة طول : بلحقة..سلم بنيتى

-ابرار: باهى برة جيب عمتى جازية للحوش ..

-مصطفى : باهى تو نجيبها بعتالى فالليل

-ابرار: انا جيت بنرفع حوايجى يا بوى ..بنمشى عند

خالى سعيد بنعاون بنات خالى فى صغار خالى ناصر

-مصطفى: وقرايتك كيف بديري فيها

-ابرار: انا توة عطلة ..بعد شهرين يبدا السمستر اللى بعده

-مصطفى : باهى بري ..

-ابرار: باهى منطلع شوى للمحلات اللى جنبنا نشري

حاجات ناقصتنى ونجى باهى

-مصطفى : ارفعى معاك خوك عمر ماتطلعيش بروحك

-ابرار : باهى

وبالفعل خدت خوها عمر فى يدها وطلعت

مشت لمحل الموبايلات ..

بتبيع موبايله لانها وعدت بوها بالفلوس غدوة

___________________________

محمد درس السيارة قدام حوش محمود صاحبه

-محمد : الووو

-احمد : اهلين محمد

-محمد : اطلع هى انا فم باب حوشكم

-احمد : جبته المبلغ كامل

-محمد : نصه بس …نشوفها السيارة وبعتالى ساهل

-احمد : اهو جاي

انهى محمد المكالمه ومقعمز فالسيارة يراجى ..

وادا بيه يشبح فى ابرار تمشى فالشارع ومعاها ولد صغير ..

وخشت محل الموبايلات

محمد فرصته عاد يشدها بالثابت وهيا تبيع فى موبايله

خشت ابرار للمحل …

نزل هوا من سيارته وقعد شوى متحركش يعطى فيها

فى فرصه تبيعه بيش يعلق عليها بالجرم المشهود

شويا وتحرك محمد توجه للمحل

-ابرار داخل المحل: علاش خوى 200 دينار انا شارياته قريب ب 400

“بالله لما كان احلى موبايل فى ليبيا ب400 دينار?

-البياع : هادى الاسعار اختى ..وهوا مستعمل

محمد يسمع فيها ..خش للمحل

-محمد : شنهوا اللى شريتيه ب 400

ابرار نخلعت وتلفتتله ….وقعدت ساكته

-محمد : خوى هدا التليفون ليا لو سمحت ترا نشوفه

-ابرار شبحتله : عيب عليك قاعد تعاود في نفس الكلام

محمد ماردش عليها ..ومد يده خدى الموبايل من الولد شافه

لقاه مش موبايله .. تحشم منها …وتلفتلها

-محمد: خيرك تبيعى فى تليفونك

-ابرار : مدخلكش انت …

وتلفتت ابرار للولد اللى يبيع : باهى خوى كويسات 200 هاتهم ..

-محمد يعض فلسانه : غبية انتى ..كيف تبيعى تليفون فيه صورك

-ابرار: درتله سوفت وير داتى ..من الثلاث بطم متع

الاقفال ..وتسفتر وانحدف منه كل شى

-البياع : خوى احنا عندنا ضمير راهو

-محمد : انت عندك ضمير ..

لكن كانا يطيح التليفون فى يد واحد معنداش ضمير

ابرار زايد عندها الكلام لانها هداكه الوقت الموبايلات

كيف طالعات جدد عالناس

واكثرهم مايعرفوش ان بالفعل المحلات يقدرو يطلعو الصور

وهيا مستحقه المبلغ ..فمردتش على محمد ..وباعت

التليفون واستلمت 200 دينار

-محمد : وانت لو بتبيعه بقداش سعره التليفون هدا

-البياع: فى حدود 300

طلع محمد من جيبه ربطه فلوس ..عد منها 300

دينار وعطاهم للبياع وخدى التليفون

-ابرار: تليفونى ??

-محمد : لا ياماما انتى بعتيه خلاص ..توة بدى تليفونى انا

خدى محمد التليفون حطه فى جيبه ومشى وخلاها

وهيا تشبحله مصدومه

روحت ابرار بالفلوس للحوش ووصت خوها عمر

مايعاود شى من اللى صار

_________________________

سناء فى مكتبها …

تشتغل مهندسة تبع مكتب الانشاءات الهندسية الليبية

طق باب مكتبها …

قامت راسها .. ابتسمت

-ايمن: صباح الورد

-سناء : صباح الخيرات

-ايمن خش قعمز قدام مكتبها : ستاحشتك

-سناء : اسسسس يسمعك حد

-ايمن: تى هما توة بيسمعونى ..ورينى حد فالمصلحة كلها مش زابطنى

-سناء تضحك : باهى اطلع فكنى من الشبهه وراس ايمونه

-ايمن : ايييه علينا عاد .. الباب مفتوح وين الشبها بس

سناء تضحك

-ايمن : خوك محمد روح ولا

-سناء : روح ايه

-ايمن : خلاص حجتك بطلت .. وبنجيب اهلى مدامه خوك موجود

-سناء : توة جيب اهلك وشارعكم كله كان تبى مدامه

محمد موجود وبيحضر

-ايمن : خلاص امالا .. عطينى اسبوع عشرة ايام

وتبدى خطيبة ايمن عبدالسلام

-سناء: واحلى ايمونه فالدنيا

???????

_________________________

فى حوش الفيتورى البازين واتى ..

خش محمد : السلام عليكم

-الفيتورى : وعليكم السلام … شنو خديت السيارة

-محمد : شفتها وما عجبتنيش

-الفيتورى : وخيرك ماجبتش خديجه معاك

محمد قلبه طق لما سمع اسم امه

-سماح : يا بوى قلنالك معش تقول لسناء خديجه

مرات عمتى امينه تتحسس

-الفيتورى على صوته : حاق تتحسسى يا امينه لما انادى فى سناء خديجه

-جت امينه : وعلاش بنتحسس بالعكس ..على

كلامكم قلتو انها نسخه من امها

محمد حس ان امينه نوعها متفهمه شوى

وحس ان خواته متآلفين معاها

-محمد : كلمتها سناء بيش بنفوت عليها…شوى

قالتلى بتروح مع صاحبتها

خش وسام من الباب سلم عليهم …

وبعتت امينه سماح تنادى على خالد

وجابو البازين وكلو

خشت سناء لقت خوتها وبوها ياكلو

سلمت عليهم وردو السلام

وخشت لداخل للدار لقت خواتها وامينه يراجو فيها

-سناء: عمتى امينه بعد الغدى نبيك شويا

-امينه : باهى

وكملو غداهم وقامو البنات السفر وغسلو الماعين

ودارت سحر شاهى اخضر وقعمزت تهدرز على محمد ووسام

سحر قعدت مقعمزة جنب امينه وحكتلها على ايمن وانه يبى يجيب اهله

وقالتلها قولى لبوى … ومحمد خوى تو نقوله انا

_____________________

اليوم اللى بعده

امينه سقدت الفيتورى مستعجل للعمل ..

وهيا بتمشى لحوش خوها سعيد بتشوف صغار ناصر

واستاحشت بنتها ابرار

مقعمزة فالصالة بحجابها تراجى فى وسام ينزل بيش بيوصلها ..

ووسام فالدوش وهيا تراجى …

نزل محمد بيطلع لقاها فالصالة صبح عليها

-محمد : شنو طالعه

” لتوة محمد مانادهاش باسمها ”

-امينه : ايه نراجى فى وسام بيحطنى فى حوش خوى سعيد انشالله

-محمد بخجل: اهو انا طالع كان تبى نحطك

-امينه تحشمت منه : لا علاش نتعب فيك

-محمد : لا مفيش تعب ..اهو فالسيارة نراجى فيك

ركبت امينه طقت على وسام وقالتله انها مشت مع محمد

ونزلت طلعت وسكرات الباب

وركبت مع محمد فالسيارة ورفعها لحوش خوها سعيد

لما قريب توصل كلمت ابرار بيش تقوللها افتحيلى الباب

-امينه: غريبه رقم ابرار من امس مقفل ..اكيدة تليفونها فسد

محمد انتبه وادكر انها باعت تليفونها وهوا شراه

عنده نيه يفتح قجر السيارة ويعطى تليفون ابرار

لامها تعطيهولها .. لكن فضل انه يسكت خير ماتقعد

ابرار فى مشكلة

شرينت على سهام بنت خوها قالتلها افتحيلى الباب

نزلت امينه وقالتله بالسلامه

فتحت سهام الباب وشافت محمد …

عجبها ..قنين زى القمر ولابس بدلة ومجنتل

ومشى محمد منغير مايتلفت

خشت امينه سلمت على سهام

-سهام خفيفه منغير ماتحس بروحها: منهوا هدا ياعمتى اللى موصلك

-امينه : هدا محمد ولد عمك الفيتورى

-سهام : اللى كان مسافر برة

-امينه : ايه

سهام يانارى بدى قلبها يرقص

وخشو وسكرو الباب

خشت لقت صغار ناصر اضبطتهم وقعدت تبكى

سلمت على ابرار

-امينه : خيره تليفونك

-ابرار : طاح فالمية

-امينه : وكيف يطيح منك .. ماهو انتبهى لحاجتك

-ابرار: تو يجف ونفتحه

_____________________________

بعد شهر ونص

محمد فات موضوع التليفون متاعه ..

ونزل الارقان والايميلات من الكمبيوتر متاعه لانه دايرلهم حفظ

المرحومه مرت خو امينه ربعنت

امينه فى حوش خوها سعيد …

كلمت خوها ناصر وقالتله تعالة نبيك

عياله ربعنت .. وصغارها يدورو والبنات لاهيات بيهم

قررت تعارك خوها يشوف بنت حلال

جى ناصر.. داير لحية ..وحالته حالة

قعدت تكلم فيه امينه انه لازم يعمر حوشه ..مش على خاطره

على خاطر صغاره اللى يدورو فى حوش عمهم

اقتنع وقاللها تو نوصى حد يشوفلى بنت حلال وانشالله خير

تليفون امينه شرين ..ردت لقتها سماح

-سماح : شنحالك عمتى امينه

-امينه: اهلين سماح

-سماح : عطينى ابرار كانها جنبك

مدت امينه التليفون لابرار

-ابرار: الو

-سماح : معقولة قريب شهر ونص ما جيتيناش ..من

قبل وفاة مرت خالك

-ابرار: والله الضروف تشوفى فيها يا سماح

-سماح : عطلة السمستر متعك قريب اتم ..الليلة

تجى مع امك ولا والله ماعاد مكلماتك

-ابرار: والله كانا قدرت حاضر

-سماح : لا ضرورى تجى تحضرى فضانية سناء ..

انتى اختنا الرابعه ولازم تعولى معانا

-ابرار: غير ماهداهاش ربي سناء.. قلنالها من المدة

اللى فاتت ديري الفضانية ووالله عادى

-سماح : لا عاد حتى على خاطر عمتى امينه جمايلها علينا هلبا

-ابرار: باهى تو نجى الليله نوتى معاكم كل شى

_________________________

تعشت امينه فى حوش خوها سعيد

بعد ماكبرو هيا وربيعه بدت امورهم تمام مع بعضهم

كلمت امينه خوها ناصر وقالتله وصلنى للحوش

وبدلت ابرار حوايجها وطلعت روحت مع امها

وصلو للحوش خشت امينه فتحت الباب بالمفتاح

الصالة هدوء ومافيهاش حد الفيتورى مزال ماروحش

سماح فالدوش …وسحر فى دارهم

ومحمد مع سناء فى دارها يتفاهمو على امور الفصانية

وخالد ووسام طالعين

-ابرار: خلى نركب فوق لسماح ..

-امينه: اركبى

ركبت ابرار مع الدروج للدور الثانى ..

وانفتح باب الحوش خش وسام …

ابرار فالدور الثانى …مشت لدار سماح …

فتحت الباب وخشت

لقت موبيليا وحدة ثانية …وسرير واحد بس

هيا معندهاش علم انهم بدلو الديار هما ومحمد

وانفتح الباب وراها وخش محمد

انصدم لما لقاها واقفه فى داره

سكر الباب وخش

-محمد: توة لمانخش لدارى ونلقاك فيها ومسكرة الباب شن بنفكر انا

-ابرار : نهار احرش ..اطلع واتحشم انت كيف تخش هنايا

-محمد عص لسانه : هادى دارى يا ماما ….

ولما نلقاك فيها بنفكر انك يا اما خاشة بتزيدى تخنبى حاجه ثانية ..

واما خاشة بتردى التليفون اللى خنبتيه لمكانه …

مشت ابرار تجرى للباب تبى تطلع …

وتسمع فى سناء اطق على سماح فالحمام تبي تخش

وبدت ابرار تضرب فى وجهها : حيه عليا شن بيقولو

عليا خواتك لما يلقونى معاك فالدار

محمد حس ان الموضوع كبير .. وفهم ان ابرار غلطت

تحساب البنات مازالو هنايا

-محمد : غير اسكتى نقصى صوتك وتو نعرف انا

كيف نطلعك مايشوفك حد

وبدت سناء تنادى : محمد ..محمد

مشى يجرى محمد للمفتاح وسكر باب الدار

بعدها بلحظه حطت سناء يدها على مقبض دار محمد وتبى تفتحها

لقت الدار مسكرة

-سناء: محمد ترا افتح شويا نبيك

ابرار تخبط على وجهها

-محمد : انغير فحوايجى شويا وننزل لوطا يا سناء

-سناء : تمام تلقانى نراجى فيك لوطا

ويسمع فى صوتها نازلةمن الدروج

وتلفت لابرار لقاها تبكى وحالتها حالة

-محمد ماد يده ومش قادر يحطها عليها خايفها

تفهمه غلط : باهى اهدى خلاص

-ابرار: يا حليلي شن بيقولو عليا توة

-محمد : مايقولو عليك شى اسكتى بس

وسمعو صوت الحمام انفتح وطلعت منه سماح

وبدى وسام ينادى : يا ابرار .. يا ابرار

-ابرار تسمع فيه : حيه عليا وسام ينادى شن بيقول عليا حتى هوا

-محمد : وخيرك خايفه من وسام ..شن بينك وبينه انتى

ابرار تبكى وصايرة فيها حالة

-محمد : قلتلك اهدى ..خلى نطلع للممر .. نديرلك

اشارة اطلعى اجرى للحمام وسكرى عليك الباب

-ابرار: باهى هيا بسرعه

-محمد تلفتلها : واغسلى وجهك

وطلع طول للممر…دارلها اشارة

طلعت تجرى خشت للحمام.. وسكرت الباب

ورجع محمد لداره واقف ورا الباب يسمع

وسام بدى ينادى من جديد : تى وينها ابرار

طلعت سحر من دارها وطلت من الدروج : ابرار مش

هنايا راهو ..امتى جت

-امينه : توة ركبت

طقت سحر على باب الحمام: ابرار انتى هنايا

-ابرار: ايه اهو انا فالحمام تو ننزل

كلمتهم سحر وقالتلهم مشغولة شويا تو تنزل

فتح محمد باب داره ونزل للدورالاول قعمز عالصالون

وفى خاطره يضحك عليها : هالبنت هادى مصيبه

-سناء : مش قلت بتغير حوايجك

-محمد : ماصارليش

طلعت ابرار من الحمام تلاقت مع سحر فالممر نزلو

مع بعضهم للدورالاول

سلمت ابرار على سناء ووسام وقعمزت

-سناء : خيرك يا ابرار سلمى على محمد

ناضت ابرار من مكانها مشتله ومدت يدها …

وكانت اول مرة يد محمد تلمس يد ابرار

شبحو لبعضهم الزوز

-ابرار: اهلا محمد

-محمد صافحها بقوة : اهلا بيك يا ابرار

____________________________

انتهى ويتبع ???

الحلقة كل يوم حتنزل بين 8 ونص ..و 9 ونص ليلا

قدرو ضروفى حبوباتى ..

نحبكم

 

error: