شر انتقام
#شر_انتقام * الحلقة الخامسة *
#الكاتبةوعدالخضر
في الصباح
لبست سحر واتجهت لمحل شرت منه مسجل صوت صغيير ، فكرت
سحر :
” وين بنحطه وين بنحطه خل نشوف شن لابس اليوم اكيد نزل ع الانستا وهو زي العيل كل شي ينزل فيه ? ”
فتحت الانستا لقاته لابس بدلة رسمية
سحر :
” بدلة رسميه اووف ماخطر عليه يلبس هك غير اليوم ع اساس راجل وهك ، ايواا عرفت شن بنشريله ”
شرت المطلوب واتجهت للمكان المنشود
وصل عزيز لقى سحر مبتسمه
جبد كرسي وقعمز فيه
عزيز : عارفه ابتسامتك هذي تفرح فيا اكتر من كل شيء
سحر : شكراا
عزيز : جيعان بنموت طلبتي ؟
سحر : اي توا يجيبوه
دقائق و كلو وكملو وطول القعدة تليفون عزيز يتصل و يقلبه ويكمل هدرزه وسحر اتشوفله بعدم مبالاة
واخيرا تكلمت
سحر : عن اذنك بنمشي الحمام ونجيك
هز براسه ايجابا
مشت وقفت قريب شوي بيش تسمعه
فتح تليفونه و رد
عزيز :ها بيبي ، توا نجيك يا قلبي خيرك بس ، نحبك حتى نا ، يلا باي
سمعت سحر الكلام وتأكدت شكوكها مسحت دمعة ساخنة ع خدها و مشت ولا كأنه صار شي
قعمزت بثقة
سحر : اسفه تأخرت عليك
عزيز : اه لالا عادي
سحر : حق عزيز جبتلك هديه صغيرونه
فتحت شنطتها ومدتله علبة فيها منديل حرير
سحر : قلت بما انك لابس بدلة رسميه تحتاج منديل زي هذا يكملك الوك
عزيز : اي صح كلامك حبي هذا علاش نحبك تفهمي في كل شي
ضحكت ببرود
حط المنديل في جيبه
عزيز : هي سحورتي وقت عليا بعدين نهدرزو
سحر : وين بتمشي ؟
عزيز : عندي موضوع بنقضيه
سحر : اهاا ربي يعاونك
طبس عليها
عزيز : نحبك
ابتسمت ببرود
سحر : حتى نا
طلع قدامها وطلعت وراه
لحقاته بالسيارة لين وصل لكافيه ونزل ونزلت وراه
سلم ع بنت شبه بالاحضان وقعمز
وقفت سحر بعيد و اتشوفلهم ، فتحت مسجل الصوت
البنت : عزوزي علاش تأخرت عليا هك
عزيز : والله يابيبي مش مني حاصلل في وحدة ضحكت عليها بكلمتين ولصقت فيا لصقه شينه
البنت : اياه من المزيتات هذين حالتهن حاله مايصدقو يلقو راجل ويلصقو فيه
سمعت سحر الكلام وشاطت فيها النار اتجهت نحوهم ومش ناوية خير ، اول ماشافها عزيز وقف بإرتباك
وبدون مقدمات عطاته كف ، الكل شافولهم بصدمة
وقفت سحر بثقة
سحر : بعد تجي تلعب العب مع وحده قدك ماتلعبش مع الاكبر منك ياعيل ?
وشافت للبنت الواقفه بصدمة
سحر : ههههههاي اني مزيته ؟
واشرت عليها من تحت لفوق
سحر : شوفي روحك وانتي الزيت يقطر منك تقطير ?
ورجعت شافت لعزيز
سحر : حسن ذوقك شوية ياولد الجباري ?
مشت كم خطوة ورجعت مره اخرى
رفعت المنديل الي جاباته ليه هدية طلعت منه مسجل الصوت ولوحاته عليه
سحر : امسح بيه دموعك يابيبي
ومشت قدامهم بكل ثقه
شافت البنت ل عزيز بإستحقار
البنت : صدقت والله عيل و يكفخو فيك قدام امة لا الله الا الله ?
طارتله
عزيز : اقلبي وجهك ناقص غير وحده زيك تتكلم
رفع مفتاح سيارته وطلع متعصب والناس يشوفو فيه ويتهامسو
اتجه للاستراحة وهو يسب ويعارك وصل وماخلى شي الا و كسره
عزيز :
” انا عزيز الجابري تضربني بنت انا ولد العز والثراء إتهيني عقاب فرخة قسم بالله لما انردلها الي دراته فيا وانكرهها في عيشتها بس گــــيـــف …”
غمض عيونه وفكر بعمق
فتح عيونه وصاح
عزيز :
” واخيرا لقـيتـها ، والله لما نخليك تبكي دم عليها ياسحر ”
============================
عند سحر
خشت دارها وارتمت ع السرير ونزلت منها دمعة مسحتها بقوة ووقفت
سحر :
” انا مش البنت الي تبكي بعد يخليها ذكر انا قوية ونقدر نعيش حياتي زي قبل واحسن واصلا هو الخاسر مش انا ”
شافت يمين ويسار
رفعت تلفيونها وولعت اغاني ورفعت ملابس النوم وخشت دوشت وطلعت تغني
أصبح وجودك عندي ماهو ضروري ??
حرماني من عطفك ترا صار ارحم???
بفرض وجودي بكبريائي وغروري ??
لأني بشعورك صدقت ماعدت اهتم ??
سمعت صوت تخبيط الباب اذنت للطارق وخشت اروى
شافتلها بإستغراب
أروى : شديري ؟
سحر وهي تهز
سحر : نغني ونرقص تعالي
أروى : لالا فكيني بنرقد
كرتها سحر من يدها
سحر : غير هيا غيري جو تمايلي يمينا ويسارا اثابك الله ?
وقعدو يضحكو
أروى : هههههه الله يجيرنا من شر هذا الضحك
سحر : عارفتيني قداش نحبكم ونخاف عليكم و ديما ح نبعد عنكم اي شر بإذن الله ، حق خواتك وين
أروى : والله مانعلم بيهم معاش جو
سحر : اخسسس من تزوجو قعدو في السنه مره بس يجونا احي عليك كان درتي هك بعد تتزوجي
توترت أروى بعد سمعت كلمة تتزوجي
أروى : اا نتزوج !
استغربت سحر من توترها
سحر : اي تتزوجي قصدي مش توا اكيد لا بس بعد تكبري مرات تفكري في الموضوع
أروى : وعلاش بعد نكبر هاني كبيره توا شن ناقصني ?
رفعت سحر حاجبها بتعجب
سحر : اوك ياكبيره هدئي روحك
شافت أروى لسحر بحنق ومشت ، سكرت البقوة
سحر :
” بسم الله خيرها اول مره اتدير هك ، اه خل نرقد غدوة نشوفها ”
حطت راسها ع المخدة ووو في سابع نومة
===========================
عند عزيز
شاد تلفيونه ويبعت في مسجات
رفع راسه وقال
عزيز :
” مازال ماريتي شي ? ”
=============================
#شر_انتقام * الحلقة السادسة *
فتح عزيز عيونه بتعب بعد ليلة مليئة بالتفكير والتخطيط والتنفيذ !
لقى الدنيا مكسرة حوليه حط يده ع عيونه
عزيز :
” اوووه شن الحوسة هذي كلها ”
سمع صوت بطنه تستنجد ، اتجه للمطبخ فتح باب الثلاجة ولقاها فااضية ، اتناول قميصه وطلع
ركب سيارته اتصل بشركة مخصصة بيش يبعتوله ناس ينفظو الاستراحة ويجبو بدال الانكسر
« بعض الاغنياء هك وللاسف عندهم كل شي ليه بديل حتى قلوب البشر ??♀ »
اتجه لحلاق و ساوى لحيته وغير قصة شعره و ماسكات و…
وبعدها مشا لأقرب مطعم و طلب فطور واتصل بصاحبه سراج
بعد دقائق وصل سراج لقى عزيز مقعمز وياكل بشراهة
جبد كرسي وقعمز جنبه
تكلم عزيز و فمه معبي أكل
عزيز : نطلبلك ؟
حط سراج يده ع صدره بمعنى الحمدالله
كمل عزيز ماكلته ومسح يده
سراج : مشاءالله شهيتك مفتوحه ووجهك منور شن صاير
اتلمس عزيز لحيته ومسح ع شعره
عزيز : طالع احليوه ولا
سراج : طالعه عليك القصة ، بس شن سبب هالتغيير
عزيز : فريسة جديدة وصغيرونه هلباااا
سراج : ايااه وسحر وين فوتتها ؟
عزيز : مامشيت بعيد قاعد في نطاق العائلة
صلح سراج تقعمزيته وشاف لعزيز بفضول
عزيز : الفريسة الجدييدة أروى
سراج : ومن تطلع أروى هذي بنت خالتها ولا تقربلها مافهمتك كيف ماطلعت من نطاق العائلة
عزيز : شن تقربلها بعدت هلبا أروى اختها
فتح سراج عيونه بصدمة ?
عزيز : هههههههه خيرك بتاكلني جديات نحكي راه بنكلم اختها ومش كلام بس ناوي ع شي اكبر
سراج : هبلت ولا صار لــ عقلك حاجة انت كيف بتخون البنت مع اختها
عزيز : خيانة شنو بس اسمه انتقام و ح يكون #شر_انتقام ، امس سحر …
وحكاله القصة كلها
سراج : انت الغالط والي داراته معاك شوية اصلا
عزيز : انت معاي ولا معاها
سراج : مع الحق ، وماليكش اي حق انت بيش تنتقم منها خلي البنت في حالها ياعزيز ياسرك
عزيز شاف لسراج بعدم مبالاة
عزيز : ياقرسون وين الحلو بس نبو انحلو
وشاف لـ سراج
عزيز : تبي اتحلي معايا ؟
وقف سراج بغضب
سراج : عزيز فكك من الي اتدير فيه ، كله بيطيح ع راسك في النهاية صدقني
عزيز : كم مره بنقولك صاحبك شديد ماينخاف عليه
سراج : خليك متذكر « كما تُدين تُدان »
ضحك عزيز بصوت عالي
عزيز : برى لخدمتك برى
شاف سراج بأسف ع حالة صحابه الميأوس منها
فتح عزيز تليفونه
عزيز :
” شن نبعتلها توا ، ايوا المسج المعتمد لكل الــبنـات ”
” أليس الصباح جميل اليوم اتدرين لماذا بسبب وجود كل جمالك فيه ، صباحو أروى ”
==========================
عند أروى
كانت شادة التلفيون وتستنى في مسج من فارس الأحلام
وصلها المسج قراته وطارت من الفرح
مرت الايام
عزيز قدر يطيح أروى المسكينه في شباكه بكلامه المعسول و قاعد يحاول يخرب بين أروى وسحر و ينشر الكره في قلب أروى اتجاه اختها
سحر قاعده في حالها تمشي خدمتها وتروح وتحاول تنسى جرح عزيز ومستغربه من تصرفات اختها العنيفة أتجاهها
في يوم
كان عزيز يكلم في أروى مكالمه
عزيز : هيا وراس حبيبي مره وحده بس
أروى : لالا مانقدرش اختي ماتخليني
عزيز : اياه علينا عاد شنو كل شي اختي اختي انتي كبيره مش محتاجه حد ياخد عنك القرارات
أروى : اي عارفه بس سحر تبي مصلحتي وديما تختارلي في الاحسن
عزيز : الحق فيا نكلم فيك بعد تكبري وتديري عقل وتختاري بروحك دوريني
وسكر الخط
عاودت أروى عليه قريب 10 مره ومايردش عليها حزنت هلبا وقعدت تبكي وتبعتله في المسجات
” اسفه سامحني ورد عليا ”
” عزيز والله مانقدرش بدونك رد ”
” بالله عليك رد نحبك اني ”
خشت عليها سحر لقتها تبكي قربت منها وحضنتها
سحر : خيرها وخيتي الصغيره من مزعلها
دفتها أروى بعيد
أروى : معاش تقوليلي صغيره انا كبيره ونعرف شن ندير
تفاجأت سحر من ردت فعل اختها
سحر : اهدي خيرك
أروى : ماخيرني شي ومعاش تدخلي فيا اطلعي برااا
سحر شافتلهاا بصدمة وطلعت بشوية
حطت يدها ع قلبها
سحر :
” شن الي مغيرك عليا هك بس ??♀ ”
وكملت أروى بكاء
====================
عند عزيز
قفل تلفيونه بعد وصل عدد المكالمات من أروى 202
وشاف لسراج المقعمز جنبه ومش طايقه
عزيز : ها شن قلت
سراج : نبي نبيع الاستراحة وناخد حقي منها
عزيز : وعلاش ؟
سراج : شن وعلاش حقي ونبيه بنكمل حوشي وندور بنت الحلال ونتزوج
عزيز : هالزمن مافيش بنات حلال راه
سراج : الطيبون للطيبات والخبيثون للخبيثات
لوح عزيز السيجارة بغل وعفس عليها
عزيز : شن قصدك ها ؟
سراج : قصدي واضح واسمعني ياعزيز مانبيش معاك كترة دوى دويت لين ريقي جف وننصح فيك ليل ونهار بس مافيش فائدة لذلك كل واحد يمشي في طريقه
عزيز : خلاص امالا نعطيك حققك وتوكل
سراج : هذا هو ، وربي يهديك
عزيز : مش محتاج شي لا هدى لا غيره فلوسك غدوة توصلك
سراج : تم
ورفع مفتاح سيارته وطلع
« احيانا انكونو امصاحبين الاشخاص الغلط و بسبب حبنا و معزتنا ليهم مانقدروش نبعدو عنهم ف نحاولو نصلحوهم بيش يكونو احسن لكن لكل شي نهاية و اي شخص عنده حد معين من الصبر لو حسيت ان الشخص الي تحاول تنصحه مش متقبل النصيحة ابعد خيرلك ووفر نصيحتك لروحك وهذا الي داره سراج »
في ليل فتح عزيز تليفونه و رد ع أروى بضجر
تكلمت أروى بصوتها المبحوح من البكاء
عزيز : صدعتيني زح خيرك توا نقفل التلفيون مرة اخرى راه
أروى : باه موافقه خلاص معاش تقفل تليفونك
صلح تقعمزيته و غير من اسلوبه
عزيز : ي قلبي انتي واني عارفتيني قداش نحبك ومستحيل نغلط فيك انتي بتقعدي مرتي و ام صغاري في حد يغلط في مرته
مسحت أروى دموعها
أروى : لا بسس مازال ماقعدت مرتك
عزيز : اييييي ي عمري انتي هذا علاش طلبت نشوفك بيش نتعرف عليك اكتر وبعدها نجي ونطلبك و حتى بيش اتشوفيني ولا ماتبيش تشوفيني
أروى : لالا نبي اكيد
عزيز : خلاص امالا كلمي اختك قوليلها توصلك للمطعم ع اساس بتتقابلي مع صحباتك واني نجيك
أروى : بس خايفه تعرف
عزيز : ايااه علينا مره اخرى رجعنا لنفس الموضوع اسمعي كان ماتبيش خلاص كل واحد يمشي في حاله
ردت أروى بسرعة
أروى : لالا خلاص نبي اسفه
عزيز : ايوا خليك هك وماتعدليش ع حد ياحب قلبي انتي
وكملو هدرزة وعزيز يتغزل ب أروى و غرقها بالكلام المعسول
============================
صباح يوم جديد
خشت أروى ع غرفة سحر
تلفتت عليها سحر بإنزعاج وكيف انها ماخبطت الباب يعني مش من عوايد أروى تقتحم خصوصيات غيرها
أروى : اسمعي اليوم بنتلاقو اني وصحباتي ونبيك ترفعيني
سحر : باه خيرك تدوي هك ؟
أروى : ماخيرني شي مهم بنمشي ساعه 5
سحر : وامتى تروحي ؟
أروى : مش عارفه امتى مانكمل نكلمك
سحر : تمام و
قبل لا تكمل سحر كلامها مشت أروى وسكرت الباب وراها بقوة ، تعجبت سحر اكتر
==========================
عند سراج
وصله مسج بإن اتودع في حسابه المصرفي مبلغ الي هو حقه في الاستراحة
دخل تليفونه في جيبه و اتجه لعمله
===========================
ساعه 5
وصلت سحر أروى للمطعم
سحر : ننزل معاك مرات مازال ماجو صحباتك
أروى : مانيش عيلة بيش تنزلي معاي
نزلت وسكرت الباب بقوة
شافت سحر لأختها بصدمة و مشت
خشت أروى بتوتر للمطعم و تشوف يمين ويسار
شاورلها عزيز بيده مشتله وقعمزت
عزيز : واخيرا ريتك وجه لوجه تهبلي يافرخه ?
ابتسمت أروى برضا
عزيز : نشربو هنا ولا في حوشنا ؟
أروى : حوشنا !
عزيز : اي حوشنا كنت ناوي نوريك حوشنا شريت حوش خيال في مزرعة هك يهبلل زي ماتبي انتي وقلت انوريه ليك لكن توا مشش عارف اكيد خايفه من اختك
أروى : لالا مش خايفه عادي نمشو انشوفوه
عزيز : اوووك حلو هلبا انشوفوه ونرجعو تمام
هزت أروى براسها ايجابا و طلع وطلعت وراه
ركبو في السيارة شد يدها وولع الاغاني
عزيز : نحبك موووت
أروى : حتى نا
عزيز : ي قلبي انتي عادي نصورو صورة نخلوها للذكرى ولا اختك ماتخليك
أروى : لا اختي ماليها علاقه بيا عادي صور
ابتسم بـ شر و صور صورة وبعتلها لـ سحر وقفل تليفونه
#شر_انتقام * الحلقة السابعة *
#الكاتبةوعدالخضر
وصلو الاستراحة خشت أروى ب خطوات غير واثقه وقلبها خايف ، شدها عزيز من خصرها و حثها ع الدخول
عزيز : خشي هذا ح يكون حوشنا
تفرجت عليه وبعد وصلو غرفة النوم قرب منها عزيز
عزيز : و ح نعبو كل هالحوش بصغارنا صح حبي
هزت أروى راسها وهي ترعش
قرب منها و حول الوشاح
عزيز : خيرك خانقه روحك بيه حوشك هذا خودي راحتك
وحط يده ع شعرها
رعشت مع بعضها
أروى : عزيـــز
حط يده ع فمها
عزيز : اشششش انتي مرتي توا ماتخافي
أروى : باااعد عنيي
عزيز : شكله مايمشي معاك الطيب انتي
وعطاهاا كف قوي لين طاحت
قعدت تزحف ع الزاوية وهو يقرب
أروى : عزيز مش قتلي مابنغلط انت وعدتني باعد عليا بالله علييك
عزيز : ههههههههههه شن بنديرلك كأنك هبله واتصدقي الي ينقالك توا بالله جايبك لاستراحة علاش بنتفرج ع جمالك مثلا ولا صدقتي انه حوشك
أروى : لااا بعد عني بعععد
وقعدت تعيط وتنادي فجأة سمعو صوت الباب انفتح جرت أروى نحو الباب لكن عزيز مسكها وسكر ع فمها
عزيز : أروى حبيبتي نبصر عليك انا راه كلها بصارة هذي واصلا درت هك بيش انخوفك بعدين نعطيك الخاتم متاع الزواج اهو المندوب وصله ماتديري صوت نجيبه ونجي باهي ؟
هزت براسها ايجابا
حول يده عن فمها وباسها ع راسها
عزيز : لحظه توا نجيك
ابتسمت ومشا
فتح باب غرفة النوم واتجه للصالة لقى سراج واقف
عزيز : سراجو صديقي القديم شن جابك اهني
سراج : جيت بنرفع اوراقي سيارتي
عزيز : اها تعالا وقت تاني مانيش فاضي تو
سراج : كيف ؟
عزيز : الي سمعته هي برا
طلعت أروى خلف عزيز من غير مايشوفها وكانت عليها حالة شافها سراج و انخلع شاورتله بمعنى اسكت
عزيز : خيرك مخلوع ؟
سراج : ااا مافيش شي
وعيونه ع اروى
تلفت عزيز وشاف أروى جرت بإتجاه الباب بيش تطلع بس شدها
عزيز : اووو اروى الحلوه طلعت ماتسمع في الكلام
نزلت دموع أروى بغزارة وشافت لـ سراج بترجي
أروى : ساعدني بالله عليك ?
سكرلها عزيز فمها
سراج : هذي اخت سحر ?
عزيز : اييي و طلعت بنوته حلوه ف قررت نكسد عليها
فتح سراج عيونه بصدمة.
سراج : حول عنها ياعزيز البنت ماليها ذنب
عزيز : اي صح ماليها ذنب و لو جينا للحق حتى اختها مادارت شي بس انا مكسد ونبي شوية اكشن في حياتي
سراج : عزيز ياسرك شن الي اتدير فيه هذا شوف البنت كيف ترعش اطلقها خليها تمشي في حالها
عزيز : مانيش طالقها لين ناخد الي نبيه ?
سراج : شن الي تبيه عقلك وين انت الي بتديره بيديروه في اختك
عزيز : بالله فكني من الدسكه القديمه هذي بندير الي نبيه تبي معاي تفضل كان هذا اطلع وفكني من دوشتك
شافت أروى لسراج بترجي
غمض سراج عيونه للحظات
سراج : تمام معاك معاك
عزيز : ايوا هذا صاحبي الي نعرفه ، لكن انا الاول تمام
هز سراج براسه إيجابا مشا عزيز وفي يده أروى تبكي
سراج ضرب عزيز ع ظهره بقوة وطاح ومعاه أروى ناضت أروى تجري شدها عزيز من رجلها تناولت المزهرية وضربت عزيز ع راسه وفقد الوعي و انفجر سيال من الدم ، قرب منها سراج ورفعها وهي ترعش وطلع بيها
بعد دقائق
سراج : يابنت وين حوش هلك بيش نوصلك
أروى : قتلته قتلته بيدي ??
شافلها بشفقة
سراج : لالا ماتخافي اكيد ماصارله شي مجرد جرح
أروى : شفت الدم بعيوني شفته
وقعدت تبكي و تندب و تعيط وعليها حالة
حن سراج ع حالتها بس ماعرفش كيف يدير
سراج : اسمعيني اوصفيلي اي حوش نوصلك ليه ونمشي نرفعه للمستشفى مابيصيرله شي
أروى : ااا مانقدرش نمشي الحوش بحالتي هذي بس كلم اختي اختي سحر
سراج : تمام عطيني رقمها
أروى : مش حافظته
ضرب راسه بكف يده
سراج :وكيف بنوصللها مش حافظه اي رقم ثاني
فكرت لثواني
أروى : ااا حافظه رقمي تلفيوني نسيته في سيارة اختي
سجل سراج الرقم
==========================
عند سحر
وصلتها الصورة وشاطت فيها النار طول طارت ع المطعم الي نزلت فيه اختها مالقتها سألت الريسبشن قالولها انها طلعت مع راجل عرفت انه عزيز ركبت سيارتها و قعدت اتدور ع اختها زي المجنونه اتصلت برقمها اتكشفت انها ناسيه التليفون في السيارة اتصلت بـ عزيز مقفل
دقائق وسمعت صوت رنين تليفون اختها
ردت بسرعة
سراج : سحر ؟ ولا
سحر : اي سحر من انت
سراج : انا سراج صاحب عزيز
سحر : صاحب عزيز اه ياكلاب والله لو تلمسو شعرة من اختي والله لما نقتلكم
سراج : هدي روحك اختك معاي وتبيك
سحر : عطيني نكلمها عطيييني
مد التلفيون ل أروى
شدت أروى التليفون ويدها ترعش
تكلمت بصوتها المبحوح
أروى : سحر
سحر : أروى حبيبتي انتي بخير دارو فيك شي تكلمي قوليلي
أروى : سحر تعالي بالله عليك تعالي
سحر : حاضر حاضر توا نجيك خليك قوية دقائق ونجيك حبيبتي ، قوليلي انتي وين بس
تلفتت يمين ويسار
أروى : مانعرفش مانعرفش
وقعدت تبكي
سحر : أروى حبيبتي ماتبكي والله نوصلك كان في اخر الدنيا ماتبكي خلاص ، عطي التلفيون للجنبك
مدت أروى التلفيون لسراج
سراج : احني في…
سحر : تمام دقائق ونكون عندكم لكن ورب العزة اتديرلها شي ندفنك في مكانك
سراج : كان نبي اندير شي راه درت لكن اني ولد ناس ونخاف ع بنات الناس تعالي ارفعي اختك
وقفل الخط وقعد يشوف ل أروى وهي تبكي مدلها مياه وحاول يهديها شوية حس انها بنت بريئة وللأسف طاحت في الشخص الغلط
بعد دقائق وصلت سحر نزلت بسرعة واتجهت لسيارة سراج فتحت الباب لقت اختها في حالة يرثى لها حضنتها بكل قوة كأنها ايديها درع تحمي بيه اختها من كل شر
أروى : قتلته ياسحر
شافت سحر لـ سراج بتساؤل
سحر : هدي روحك حبيبتي
وركبتها في سيارتها وانطلقت
حاولت تهدي اختها ومش عارفه وين ترفعها بحالتها هذي ، خطرت عليها هاجر اتصلت بيها طول
سحر : هاجر توا بنجيك طلعيلي معاك وشاح وعباية
هاجر : شن في ?
سحر : هاجر بعدين نحكيلك ديري الي قتلك عليه بس
هاجر : تمام
بعد دقائق
وصلو قدام بيت هاجر طلعتلهم هاجر وعطتهم الحاجات شافت ل أروى بصدمة تكلمت سحر
سحر : تمام صحيتي
هاجر : شن صحيتي خشو هلي مش قاعدين
سحر : لالا
هاجر : سحر مش شايفه حالة اختك خشو خليها ترتاح بعدين يصير خير
هزت سحر براسها ايجابا
وخشو
بعد دقائق
طلعت سحر من غرفة هاجر بشوية واتجهت للمكان الي فيه هاجر
هاجر : هدت شويه ؟
سحر : اي حسيت الدوش ريحها شويه
هاجر : اي صح ، حكتلك شي ؟
نزلت سحر راسها بأسف
سحر : لا وماحبيتش نضغط عليها توا نعرف من سراج شكله كويس
هاجر : هذا الي وصلها ليك
سحر : اي هوا
وسمعت رنين تلفيونها ردت
سحر : نعم سيدي ، بس عندي ظروف حاليا ، تمام دقائق ونكون عندكم
وقفلت الخط
هاجر : خدمة ؟
وقفت سحر
سحر : اي و عيلة الجابري في الموضوع ضروري نمشي كان ناضت أروى قوليلها مشت مشوار
هاجر : تمام
سحر : هاجر عارفه وقفتك معايا هذي مش ح ننساها
شكرا هلبا
هاجر : توكلي ع خدمتك احني خوات مافيش بيناتنا شكر
ابتسمت سحر واتجهت للمكان المنشود وهناك كانت الصدمة