شر انتقام
#شر_انتقام * الحلقة التاسعة *
#الكاتبةوعدالخضر
ناضت سحر ع صوت تخبيط الباب فتحت عيونها بتعب واذنت للطارق خشت أروى مبتسمه
أروى : صباح الخير سحر ، ااا جيت بنعتذر عن كل شي درته و معاملتي السيئة ليك الفتره الي فاتت مش عارفه كيف لعب في عقلي واقنعني انك ماتبيليش الخير اسفه من اليوم ح نكون قوية زيك ومش ح نخلي اي حد يضحك عليا
ابتسمت سحر وشاورت ل اختها بيش تقرب منها و حضنتها
سحر : الضربة الي ماتقتلك اتقويك نبيك هك قوية تمام
هزت أروى برأسها ايجابا
أروى : بسسس سحر بعد كنت معاه وو جاب سيرتك هو يعرفك يعني ؟
توترت سحر
أروى : لو ماتبيش تقولي عادي
سحر : لالا من حقك تعرفي هو نفس الشخص الي ضربلي سيارتي قبل فتره و بعدها ضحك عليا زي مادار معاك وصدقت انه يحبني و بعدها اكتشفت خيانته وخليته
أروى : باه علاش دار فيا هك
سحر : والله مش عارفه مع انه هو الغالط وهو الي خان بس ممكن لأني ضربته
حطت أروى يدها ع فمها
أروى : ضربتيه ?
سحر : مش ضرب ضرب هو كف واحد بس
قطع كلامها صوت رنين تلفيونها رفعت التليفون ولقاته رقم غريب
أروى : منو ع صبح هك ؟
سحر : والله مانعلم رقم غريب
أروى : احي سحر بالك عزيز هذا ماترديش
سحر : هههههههه شن بيدير يعني بيطلعلي من التلفيون مثلا خيرك يابنت اقوي شوي
وردت ببرود
سحر : اه سيدي الوزير اهلا ، اي انا ، تمام ثواني ونكون عندهم ، مع سلامة
قفلت الخط بضجر
أروى : شن في وزير شنو
سحر : وزير الداخليه يبيني نمشي نزور عزيز بوجهه الشين توا بالله ليل كله ماشيه جايه لين روحي طلعت ومازال يقولي نمشي نزوره
أروى : وعلاش اتزوريه يعني ؟
سحر : هك ياحنه الحكومة يدحنسو للعائلات الغنية لأن يمولو فيهم
أروى : اهااا وعلاش مايخلو اي شرطي يمشي بدالك
سحر : احه شرطي صغير و عيلة الجابري امالا تبي يسكرولنا المركز يابنتي الحكومة قريب يقدسو العائلات الغنية وتوا بنرفع معاي باقة ورد و جو
أروى : ااهااا بس انتي ماتحبيش الجو هذا
سحر : اكيد مانحبه بس الله غالب انا عبد المأمور كان قلت لا نضيع
نزلت أروى راسها بأسف
طبطبت عليها سحر
سحر : توا تكبري وتفهمي اكتر ، هي اطلعلي خل نوتي روحي وقت عليا
بعد ساعة
خشت سحر غرفة عزيز في المستشفى ومعاها شرطي رافع باقة الورد ولابسه بدلة الخدمة وواقفة بكل شموخ
لقت سالم معاه حولت الطاقية وشافتلهم بإبتسامة
توتر عزيز خوفا من ان سحر تفضحه قدام خوه
تكلمت بثقة
سحر : مرحبا انا وكيلة النيابة سحر حامد ووكلت بمهمة الطمئنان ع ولدكم وانحمدله السلامة
تقدم سالم
سالم : انا سالم خوه الكبير
ومد يده وصافحها وضغط ع يدها
شافتله بإستغراب من حركته
سحر : اتشرفنا
تلفتت ع الشرطي واشرتله حط الباقة ع الكرسي ورجع لمكانه
شاف سالم للباقة بإعجاب
سالم : شكرا ع ذوقك الرفيع
ابتسمت وشافت لعزيز بسخرية
سحر : بالشفاء
وطلعت
تلفت سالم ع عزيز وتكلم بجدية
سالم : خيرك توترت هك ؟ مداير شي
عزيز : ااا لالا مش مداير شي والله
سالم : عزيز بنقولك كلمتين واسمعني كويس
بلع عزيز ريقه بخوف
سالم : تحملت طيشك من صغرك واني ال كنت محتاج من يتحملني قلت فتره ويكبر تماديت تسب وتلعن وتصرف وتهيج وامداير حاجات ماتنقال وقلت يلا مدام ماطق فيا بـ شي انخليه ع راحته لكن انوض اليوم ع صوت تليفوني الي ماوقف اتصالات من امس من الصحافة والاعلام واديرلنا العار و بتطلع علينا سمعة وكلام فاضي لـ هنا و خلاص كان ماتعقل وتشد روحك وتفكك من الصياعة والكلام الفاضي وربي نحرمك من كل شي ولا عاد تلقى لا تاكل لا تشرب ، عندك شهر لا اكثر كان ماعدلت من روحك وعقلت ودرت شي مقيوم ح انفذ كلامي
عزيز : شن اتهدد فيا ولا كيف نسيت انها فلوس بوي و عندي حق فيها
سالم : فلوس بوي تمام الشركة بعد وفاة بوي الله يرحمه كم كانو يبعتولنا كل شهر
عزيز : مش عارف كلام قديم مانتذكر
سالم : اني نتذكر كانو يبعتولنا 500 انت 100 وانا 100 ورهف 100 و الباقي مصاريف الحوش عند امي ولا
عزيز : اي صح بس شن دخل هذا في هذا
سالم : نقولك كيف العز هذا كله انا درته بتعبي وجهدي و الفروع كلها بإسمي ماعدا شركة بوي وهذا كله ماعمري فتحت فمي بكلمة ومخليك ع راحتك بس انت ماينفع فيك الخير ، تبي تقعد صايع ضايع تقعد بعيد عنا وكل شهر يوصلوك 100 لا ياسيدي 200 حقي مانبيشي وشوف هال200 ع شن تلحق
عزيز : ااا
سالم : هذا الي عندي ياما تضيع بروحك يااما تقعد راجل و مش ح ينقصك شي
ساوى سالم جاكيته وطلع
ضرب عزيز الطاولة المجاورة بيده
عزيز : شهر شن بندير فيه يعني شن الشي المقيوم الي بنديره ها
قطع عليه صوت التليفون شاف الإسم حبيبة قلبي اعتلت الابتسامة وجهه وقلبه طار من الفرحة ورد بلهفة
عند أروى
قعمزت قدام المرايا وتشوف لروحها وتذكرت الي صار وتذكرت سراج وكلامه وكيف وقف معاها ومااتخلى عنها وكيف حاول يحميها و يهديها ، ابتسمت
قطع تفكيرها صوت رنين تليفونها
لقاته رقم غريب قلبت التليفون وصلها مسج
” انا سراج حبيت نتطمن عليك ”
عاودتله لا شعوريا
أروى : سراج
سراج : عيونه
تحشمت وهو انتبه لروحه
سراج : اا اتصلت بيش نتطمن عليك اسف لو ازعجتك
أروى : لا أبدا اتصل في اي وقت
سراج : هههههههه مدام عطيتيني الأذن مش ح نوقف اتصالات
أروى : ههههههه ياريت
وكملو هدرزه
=========================
مرت الايام
سراج كانت نيته طيبة و حب أروى من اول ماشافها رغم الموقف الي لقاها فيه
أروى حست ان سراج انسان شهم ويستاهل تعطيه فرصة يعيشها الحب الحقيقي وكانت اتبادله نفس المشاعر بسبب وقفته معاها
سحر لغت فكرة الحب وإلارتباط نهائيا من حياتها ووصلتها المعلومات الي طلبتها ع عزيز
في يوم
كان يتكلم عزيز في التليفون
عزيز : والله استااحشتك لنم
حنان : نو نو مانقدرش نشوفك حتى لو في كافي هلي مايخلونيش
عزيز : شن الحل باه
حنان : اممم الحل في يدك حبيبي
عزيز : شن هوا ي عمري قوليلي بس وانديره
حنان : نتزوجو وديما نكون معاك ومعاش تستاحشني نهائيا
عزيز : ياقلبي انتي بس كيف بنعيشك مش خبرتك ع كلام سالم
حنان : ايييي هنا المغزى ياحبي ماه كان تزوجت معنتى عقلت وبتشد حوش
ضرب الكلام في راس عزيز وقعد يفكر في كلامها
حنان : ها شن قلت
عزيز : فكرة مليحه والله توا نخبر امي ونجوكم في اقرب وقت
حنان : تمام حبيبي لافيو
وقفل الخط
خش عزيز ع امه
عزيز : يام نبي منك حاجه
غيثيه : تفضل ياوليدي ان شاء الله خير
عزيز : في بنت في راسي ونبيك تطلبيها ليا خلاص بنكمل نص ديني
زغرطت غيثيه وحضنت ولدها
غيثيه : يوم السعد والله واخيرا ياوليدي ربي هداك وبتتزوج بس من هي البنت
ابتسم برضا
عزيز : حنان بنت جيرانا الهادي جيرانا في الحوش القديم
غيثيه : اي اي عرفتهم بنت سليمه باه كويسه البنت خلاص امالا نمشولهم الاسبوع الجاي
عزيز : تمام مهم تمشو
خبط الباب
خشو رهف وسالم
رهف : ماما خيرك تزغرطي من تزوج
غيثيه : تعالو باركو لخوكم بيتزوج
رهف : خونا من عزيز ?
عزيز : اي عزيز خيرني مش مالي عينك ?
رهف : ااا لالا بس استغربت باه من بيتزوج
غيثيه : بنت عمتك سليمه جيرانا زمان
رهف : حناان ولا والله عرفتها من هم صغار يتغامزو لبعض و يضاحكو والله الا عرفت ان في قصة في الموضوع
شافلها عزيز وكشخ عليها
عزيز : امي اني طالع
وطلع ولحقه سالم في الممر
سالم : عزيز
تلفت عليه عزيز
حط سالم يده ع كتف عزيز
سالم : مبروك زينة العقل الي درته وان شاء الله ربي يهنيك وسحبت كلامي الاول مدام عقلت وبتشد حوش
ابتسم عزيز بإنتصار
عزيز : يبارك فيك العقبه لك
ابتسم سالم ومشا
وقف عزيز
عزيز :
” والله كلامك صح ياحنونه اصلا بنات الناس مشاءالله عليهم عقل و زين ”