رواية ولد راجل امي
#ولد_راجل_امى
بقلم زهور جمال الدين ??
?الحلقه السابعه ?
–
عبدالجبار طلق صفيه وردها على ثلاث ايام …تخيلو اطلقت يوم صباحها وردها فنفس اليوم واطلقت اليوم اللى بعده ورد
فالصبح.. ونفس الصبح اطلقت فيه الطلقه الثالثه رفعوها
حماتها وسلفها للمستسفى دخلوها للاسعاف ودارولها اللازم ..
خالها سعيد حضر الموضوع كله مافى شى مدسوس عليه
-عبدالجبار نادم / ياسعيد انا منبيش انطلقها ..كله من اختك طير الشر قعدت ادور لين طلقت بنتها
-سعيد / توة احنا موضوعنا مش اختى …موضوعنا بنت اختى اطلقت ثلاث مرات .. وقعادها معاكم بدى غلط
-عبدالجبار / كيف قعادها معانا امر غلط .. هدا حوش راجلها وانا نبيها ومش متنازل عليها
-سعيد / توة تحرمت عليك وصار اللى صار
وتلفت بيطلع
-عبدالجبار / وين ماشى
-سعيد / ماشى بنشوف بنت اختى شن صاير فيها
-عبدالجبار/ بنمشى معاك
-حط يده على كتفه / لا مفيش داعى ..
طلع ركب سيارته ومشى للمستشفى لحق بنت اخته
_________________________________________
–
فى حوش بدريه …
الحوش والع زى النار …بدرية صوتها فوق فوق …
واتشالى بيديها / والله لما نوريه … والله كان ما مشيت فجنازته الاسبوع هدا مانتسمى بدريه
-عمران / يا مراة مش هكى عيب عليك الكلام اللى تقولى فيه
-بدريه / اسكت انت … وانا شن جابنى لى هالحرف هادو غير همك وهم ماخدتى فيك ..الف من يتمنانى ..غير النصيف واحرف
-عمران / تى احترمينا شوية بلا كلام فاضى
-بدريه / انا غير كان نفهم امتى طلعت وليش …رقدنا جنب بعض ونراجو فى خالها بيجينا … ليش ناضت وطلعت ومشتلهم .. غير كان نفهم بس
-عمران / وانا شن عرفنى بيها ..وين ندرى عليها
-بدريه تنادى/ يا مهند ..يا سيف … اطلعو هى بنمشو
-عمران / وين بنمشو
-بدريه / مش بترفعنى نشبح بنتى …ولا لا
-وقف عمران / اطلعو هى
__________________________________________
–
فى المستشفى ..
الدكتور طلع من الغرفه …مشاله احمد
-احمد / طمنى يا دكتور
-الدكتور/ والله شن منقولك ..هيا حالتها مش خطيرة .. للكن الواضح ان فى مشكلة كبيرة صايرةمعاها
-احمد / الحق عركه بسيطه هيا وزوجها..اتأثرت هيا وطاحت
-الدكتور / عموما تقدرو تروحو بيها …لكن حاولو تخلوها تبعد عن اى مشاكل …ضغط توة بس نزل لااازم تستريح
-احمد / حاضر
مشى الدكتور وجت امال تجرى لخوها
-امال / شن قالك الدكتور
-احمد / قال تقدرو تروحو بيها … لكن بعدوها عن المشاكل
-سعيد جاى فالممر لون وجهه متغير / السلام عليكم
مشت امال لجهه الكراسى وخلتهم …
-احمد / وعليكم السلام
-سعيد / شن حالها صفيه توة
-احمد / قال كويسه لكن لازم تبعد عن المشاكل
-سعيد / بيرقدوها ولا تروح عادى
-احمد / لا قال روحو بيها …ولازم تستريح
-سعيد / تمام
خشو لصفيه لقوها تعبانه … ساوتلها امال وشاحها وساعدتها اتنوض من السرير ….طلعت صفيه للممر تساعد فيها امال … شد سعيد بنت اخته وركبها لسيارته
-احمد / اهو احنا مروحين للحوش
-سعيد / حتى انا مروح غادى خلى تركب معاى مدامنى جيت
-احمد / براحتكم
وطلعو بالسيارات … سعيد خلى احمد يمشى قدامه…وصلو للسيمافرو .. وقف سعيد سيارته جنب سيارة احمد …
ونزل روشن السيارة / قتلك
-احمد نزل روشن السيارة جهه امال/ ايووة
-سعيد / انا بنروح بي صفيه معاى لبوها … قول لعبدالجبار وبوك يلحقونا غادى
وانفتح ضى السيمافرو اخضر.. احمد لف جهه طريق حوشهم
وهوا متكنطى ماعجبتاش حركه سعيد
وسعيد شد القطران وروح لمنطقته اللى مسافتها ساعه ونص
ولما وصل احمد لحوشهم وخبر عبدالجبار باللى صار قريب طار وصارت هيجه وميجه …وخش بوهم يسأل على صفيه تبيها امها قدام الباب ….فقالوله ان صفيه فالطريق ماشيه لحوش بوها
________________________________________
–
بعد ساعه ونص …
وصل سعيد لحوش جده …نزل فتح القراج ودخل سيارته
ونزل صفيه وهيا حالتها يرثى لها …اسبوعها مزال موصلش وهيا صاير فيها هدا كله ..حنتها مازالت سودة …
خشت للمربوعه سلمت على جدها ..مزبطهاش منهيا .. يحسابها وحدة من بناويت الجيران بتاخد حاجه من الكوجينه ..
خشت للصالة قعمزت تبكى
-سعيد / احكيلى اللى صار معاك كله من اوله لاخره
وقعدت تحكيله وتبكى ومتأسفه ان هدا كله يصير معاها وهيا كيف تزوجت
-سعيد / الغلطه مش غلطتك ..الغلطه غلطتى انا وبوك … احنا عارفين تاريخ بدريه كله مع ربايبها .. كيف نخلوك تاخدى واحد منهم وهما يكرهو امك كره العمى
-صفيه / وانا وين نعرفه يا خالى… شكرتوه خديته وسكتت
-سعيد/ ماهو مرات الانسان تواجه حكايه .. يبدا يبي ينهيها بأى شكل وبأى ثمن
-صفيه / يا حليلى لما بيسمع بوى شن بيدير فيا
-سعيد / انا معاك ومتخافيش .. خلى نمشى نجيبه ونجى
وبدت صفيه ترعش
________________________________________
فى حوش عبدالجبار قامت عركه من جديد بين بدريه وصغار راجلها …ماعاد عندها على شن خايفه ..بنتها واطلقت
طلع عبدالجبار وخلاها تلعلع ركب سيارته ولعها وطلع يجرى
وخلى العركه قايمه وراه بين احمد وخواته مع بدريه … خيريه اتحز من جهه وعمران ايحز من جهه ثانيه
وفالاخير روحت لحوشها وخلت عمران عندهم
خشت للحوش قامت التليفون واتصلت
-سهام / الو
-بدريه / تعالى توة عندى
-سهام / اهلا وسهلين يا بدريه شن حالك
-بدريه / لا اهلين ولا سهلين تووووة تسيبى اللى فى يدك وتجينى
-سهام / والله مانقدر عندى عزوزتى .. نطلع ونخليها والله تبشع بيا سلفاتى
-بدريه / اسمعى .. فلوسى نبيهم .. الكتيبه اللى دارتها الشيخة انقلبت على بنتى بدل ماتعلاها عليهم فوق
-سهام انشغلت / كيف انقلبت … خيرها العفو شن صارلها
-بدريه / توة اللى صار صار …المهم توة تمشيلها قوليلها السحر انقلب راه… ولااااازم اديرلى حل !!
______________________________________
–
فى حوش سعيد …
الدنيا ناضت ماقعدت .. صدمه لى ساسى… معقولة ينضرب ضربتين من بدريه …مرة لما هيا معاه وصغيرة سيباته وخلتلع الصغار…ومرة لما كبرت ودمرت حياة بنتها
-ساسى / غير كيف صار فهمنى والبنيه وين توة
-سعيد / صفيه عندى لداخل ..لكن حلفتلك بالله يا ساسى تهدا
-ساسى/ شنو متوقعنى نقتلها مثلا ..تى هدا نصيب الله .. غير ناديهالى
-سعيد / غير خلينى نفهمك اللى صار وبعتالى دير اللى يعجبك
-ساسى / لا نسمعه منها هيا
وخش سعيد نادى صفيه ..وطلعت ترعش مع بعضها …
بوها غضبان لا سلم عليها ولا عاركها .. كاضم غضبه وخلاص
-صفيه ترعش / اهلا يا بوى
-ساسى/ اهلا بنتى ….
وقام راسه / احكيلى اللى صار كله ….
وقعدت صفيه تحكى لبوها عاللى صار وكيف حلف على امها وان مش دنبها ….
-ساسى/ هوا هدا بس اللى صار
-صفيه / والله مازدت عليه كلمه يابوى
-ساسى/ سمعتى كلمه الطلاق بودنك
-صفيه / لا
سمعو صوت سيارة وقفت قدام الباب
______________________________________
–
درس عبدالجبار سيارته … وفتح باب حوش سعيد وخش
-عبدالجبار/ السلام عليكم
-سعيد اتفاجأ/ شكلك لحقتنا طول
-عبدالجبار/ انت كيف تاخدها وتروح بيها هنايا منغير ماتشاورها
-سعيد/ وانت شن مازال ليك عندها بيش نشاورك
-ساسى / خود مرتك وروح
-سعيد / شن تقول يا ساسى نقولك حارمه عليه
-ساسى / استغفر ربك يا راجل ..صفيه مازالت مرته
-عبدالجبار انصدم / كيف .. شن تقول انت يا عمى
-ساسى يعارك / منهوا الشيخ اللى فتالك وقالك برة اقرا عليها فاتحه
-عبدالجبار/ شيخ جامعنا
-ساسى/ حلفتك باطله ..ومرتك ماطلقتش منك ولا طلقه
-سعيد / تى كيف …فهمنا
-ساسى/ يومها جارنا طلق مرته بنفس الطريقه …حلف عليها على حاجة وصارت …فتوة شيخ الجامع ان الطلاق ماصارش
صفيه انصدمت . وقفت ومشت تجرى خشت للديار لداخل .. وعبدالجبار يشبحلها
-سعيد / غير زيد فهمنا اكثر ..الحكايه فيها حرام وحلال راهو
-ساسى/ المدهب الحنبلى المتبع فالسعوديه يقول ان المراة فالحالة هادى تطلق ..لانه متشدد…بس المدهب المالكى اللى متبع فى ليبيا مخفف ويقول لا طلاق عليها
-عبدالجبار/ الحمد لله …الحمدلله ليك ياربي ..معناها طلقاتى فيها كلهم مايمشوش وفاتحتى عليها غلط
-ساسى/ طبعا غلط ..البنت مطلقتش منك اصلا .. والشيخ اللى فتالك فالموضوع اكيدة سنى متشدد
-سعيد /كانا الكلام اللى تقول فيه حاق … الشيخ اللى قري الفاتحه ينحبس طول .. يطلق ويرد من نفسه منغير مايرجع حتى للمحكمه
-عبدالجبار /لا والله مسكين انا اللى شديت فيه وجبرته لانى مانبيش الطلقات يتسجلو فى المحكمه ..قلتله بينى بين ربي عارف بالطلقات لكن مش لازم نقول عليهم لحد
وقعدو يتناقشو فالموضوع …ولام ساسى على عبدالجبار ..
كيف يخلى حلف يدمرله حياته وسعيد نفس الشى …المهم عطوه الزوز على راسه
_________________________________________
–
توة الحكايه لقولها حل وصفيه قاعدة لتوة مرت عبدالجبار وماطلقتش منه حتى طلقه وحدة … لكن المشكلة فى صفيه
…معش تبى ترجع معاه …وطالبة الطلاق .. بوها قريب يهبل سايسها زلبحها كشخ عليها ..
-صفيه / يابوى طلقنى فى ثلاثه ايام …شن متوقع منه.. تى كانا نرجع معاه لاويته الليله مطلقنى
-ساسى/ اولا هدا نصيبك ولازم تتحمليه .. وبعدين منقالك انه مش خدى موعضه وتحشم من اللى داره ومعش يكرره
-صفيه / هوا حاط امى بين عيونه … ويرقص فيا ايمين ويسار لا شايف لمشاعرى ولا لقعادى معاه
-ساسى/ توة ليش تكثري فالدوة …قلتلك وتى روحك اركبى مع راجلك روحى حوشك
-صفيه باصرار/امالا تعرف كيف يابوى كان تدبحنى وتلوحنى فحوازة مانى راجه معاه ….
كبرت الحكايه وسمعو خوتها … وبوها قريب ايجيه الضغط .. شن بيقول للناس …البنت ليها ثلاث ايام وروحت
امها تشجع فيها عالطلاق …لما شافت كيف عبدالجبار متعلق بمرته..حبت اتعدبه.. مايهمهاش بنتها تطلق .. المهم عبدالجبار
ينهان ويلزوه
الكل وقف ضدها .. ماعدا خوها علاء .. حس بيها ..وعرف انها مظلومه
-صفيه / يا علاء نقولك واخدنى بيش يكصر خشم امى بيا .. ياوخى وانا فيش جيت مشاكلهم معاها نخلص حقهم انا
-علاء/ سيوركم اديرو صغار ويتغير
-صفيه / ياوخى انا بديت خايفه حتى من بوهم ماينفعش
..وايدير فى حركات مش كويسه
-علاء حمق / اههه شن قلتى
-صفيه تبكى/ اللى سمعته
بوها قريب يهبل …لا يصبح عليها ولايمسى عليها …ماخلى ماسب فى امها ..لانها السبب فاللى صار كله وعبدالجبار رفض ايطلق لو الحكايه توصل للمحاكم ويطلبها لبيت الطاعه …..
_______________________________________
_
وبعد جهد اطلقت صفيه …بعد صبر وعناد وتحمل ايهانات من بوها شهرين كاملات …. عبدالجبار زلبحوه بيش طلقها
…قاله علاء هيا عالعناد بس ..طلقها وانا نردهالك …اتزلبح عبدالجبار وساير وطلق ….
بعد الطلق وراه علاء وجهه الحقانى ..ولزه من حوشهم … اما خوها حفيظ كان ضدها لاخر لحظه ويبيها ترجع لحوشها وراجلها .. لكن ميقدرش يسيف عليها لان علاء الكبير واقف معاها ….لكن بعد اطلقت خلاص سمع بحكايه عمران الوقح ….وقف معاها ومعش عطى لعبدالجبار وجهه …
خيريه صار فيها بعد ولدها طلق كنتها …مرضت ورقدت اسبوع فالمستشفى وصاير فيها وفبناتها …
وعبدالجبار اتأثر هلبا … البنت عجباته .. وحسها طيبه ومعشريه .. لكن الله غالب امها مشرانيه وضيعاته وضيعت بنتها
وصفيه ضغطها قعد عالى شهور .. عمتها نبيله تصبر فيها وخلاص … ومرت بوها ساكته وتعول ماتجيش على حالها ..
مش راضيه بطلاقها …معقولة ثلاثه ايام وتطلق ..فى شرع منو هدا
والناس عاد لقت موضوع يحكو بيه ويميعدو … اللى تقول راجلها طلع مش راجل هدا علاش روحت .. واللى تقول حماواتها مايندروش عليها بنت مرت بوهم ولما سمعو لزوها .. واللى تقول ماروحت فى ثلاثه ايام الا ولقى فيها علة يوم الدخول . …
المهم ماحد يقول انها هيا اللى طلبت الطلاق .. الكل يقول انهم هما طلقوها ولوحوها
_____________________________________
–
فاتت سنه ….
حالة صفيه النفسيه مدمرة .. مصبرينها خوتها الصغار ديما معاها فى الدار .. وبوها لعند الان مش راضى عليها …كانا بدى علاء فالحوش تمشى امورها تمام ..وكانا علاء جاته سفرة عالحمالة تتغير الاحوال وحتى الحمام تخشه بالدرقه لان حفيظ ماعنداش كلمه مع بوه
كل مرة يجيها حد يخطب .. اللى مرته مريضه ويبي ياخد عليها واللى مطلق واللى كبير فالعمر بيجدد شبابه …وكان بوها يوافق ولما يروح علاء يتفركش كل شى …
فى المربوعه …علاء متكى وصفيه جنبه
-صفيه / انا تعبت يا وخى … الطلاق درتوه عار ..انا لا اول وحدة ولا اخر وحدة فى ليبيا يصيرلها هكى
-علاء/ ولعند امتى بتقعدى هكى بلا زواج .. سيورنى نغيب مدة نلقى بوك قارى فاتحتك بالسيف عليك
-صفيه / تبينى نرمى روحى هكى لاى حد يجينى وخلاص .. كلهم مش مناسبين ليا ولعمرى
-قعمز مقابلها / انتى عندك حد معين ترفضى على خاطره فاللى يجيك
-انخلعت صفيه / شنو عندك حد …ماعرفتهم زمان .. بنعرفهم توة بوضعى هدا
-علاء/ مدامه هكى الكلام … امالا انا عندى صاحبي يدور
-صفيه / مدامه من طرفك نوافق وعيونى مغمضات
-علاء/ ماهو خلى نفهمك … هوا وحيد على عنده خوت ولا خوات ..يخدم على حمالة زينى .. لكن ضروفه الماديه صعبه …عنده امه مريضه هلبا ..وكل فلوسه ماشيين فدواها …
-صفيه / كيف يمشى معاك بالاسابيع وكيف امه مريضه
-علاء/ منكدبش عليك هدا سبب زواجه .. امه كانت تقعد عند خالته لما يغيب ..وخالته توفت …يبي يدير عيله وصغار يطمن على امه معاهم
-صفيه / هوا عزابى ولا مطلق
-علاء/ بتقعدى مع امه تراعيها بالاسبوع والاسبوعين ..لما هوا يكون مسافر
-صفيه/ ماجاوبتنيش
-علاء/ هوا عزابي .. وتبى الحق انا قلتله عليك ووافق…مزال نشوف رايك انتى بس
-صفيه / قلتله انى مطلقه
-علاء/ قلتله .. انتى زواجك شنهوا كله يومين ..غير انحسب عليك
-صفيه / تمام دير رايك
__________________________________________
–
وكلم علاء صاحبه وقاله ان صفيه موافقه .. وحددله يوم مع بوه بيش يخطب
-ساسى حط فنجان القهوة / انا ماقلتش شى ياولدى يا نادر.. لكن الاصول ان بوك يجى معاك مدامك قلت انه حى
نادر يشبح لعلاء لانه متفق معاه وحاكيله كل شى
-علاء/ ماهو قلتلك نادر بيجى بروحه يا بوى
-ساسى/ اسكت انت … نبى نفهم …علاش بوك مايبيش يخطبلك
-نادر بكل رزن / تصدقنى كانا نقولك بوى من لما كنت صف خامس ابتدائي ملداشفتاش
-ساسى/ الوالدة متفارقه هيا وبوك
-نادر/ من زمان ….
وحط فنجان القهوة/ عايش انا وامى بس …كانك بتعطينى مرحبتين .. وكانك ماتبيش احنا خوت واصحاب
-ساسى يبي يعطى بنته وخلاص/ لااا اناةماقلتش هكى مرحبتين بيك …ومدامه شكرك علاء معانا انت ميه ميه
-نادر/ مشكور يا عمى
-ساسى/ غير قصدى ماعندكش عمام ..ماعندكش خوال .
.ياسيدى حتى جيران
-علاء/ احمم …اح ..احم
-ساسى / اشرب قهوتك ولدى
ونعطت صفيه لنادر صاحب علاء … وقررو الخميس ايزفوها ليه …ماخبرو حد الا حفيظ ومرت بوها وخالها سعيد …ختى امها ما بلغوهاش …خافو تمشى تسحن عبدالجبار ويجى ايفشكل العرس ..لانه مزال ماتزوجش ..وقاعد عنده منوارات ايرجعها ..
ساسى مايبسش يدير عرس لبنته …ونادر نفس الشى قاله لا داير عرس ولا عازم …..
ووصل يوم الخميس … ولبست صفيه جلابيه بيضا …ودارت مكياج خفيف.. وفالمربوعه الشيخ يقرا فى فاتحتها عالعريس الجديد اللى ماشافتاش نهائيا لعند الان
_________________________________________
تمت ….. ويتبع
الكلام اللى نكتب فوق? كله صحيح عن الفتوى الحنبليه والمالكيه فى موضوع الطلاق المشروط …
الحنبليه اكدت الطلاق …والمالكيه اللى ماشيه بيها ليبيا اسقطاته وكأن الطلاق لم يقع
على فكرة الحلقه قصيرة ثلاث ارباع بس …عارفتها بس مكنت بنعتدر عن تنزيلها اليوم خاطر تعبانه … بس قلت يلا نكتبها البنات يراجو
نحبككككم ❤