رواية ولد راجل امي

#ولد_راجل_امى

بقلم زهور جمال الدين
الحلقه الرابعه عشر

–

فى حوش نادر

نادر فى دار النوم وصفيه كيف طلعت من الحمام …خشت للدار ماسكه فوطه وتمسح فى يدها
-نادر مبتسم/ هدا كله غسل اماعين وهما صفرة حليب وسندوتش ليا
-صفيه تضحك وجايه للسرير/ لااا يافالح انا نغسل بنضافه .. تحسابه ساهل امالا
قعمزت وحولت الروب الخارجى وقعدت فالروب الداخلى بس .. قامت اللحاف ورقدت ..
مد نادر يده عالمخده / تعالى
-رقدت على يده وضمها ليه/ شن اللى مخليك فرحانه ..باينه بطيري من الفرح
– قربت منه وباساته ع شفايفه/ لانى نحبك .. وسعيدة انى طحت فى راجل حنين وواثق من نفسه …
تقاعد من جنبها رقد عليها من جهه صدره وحط ايديه ع الجنب / كملى وبعدين
-صفيه تضحك / ولا قبلين .. حول انت شكلك ماتشبعش
-يضحك / وعلاش بنشبع …حد شريكى
-صفيه تضحك وحاطه ايديها على صدره / والله مشغولة على خوى
-حط يديها على شعرها / لاااا واجب تنشغلى عليه ومن قالك لا .. لكن البعيد يبي والقريب يبي
-صفيه تضحك / يا حليلى من هالقريب تعبنى
-نزل يبوس فيها / تو انا نتعب …
ويبوس / ااه قولى
وهيا تضحك وتزيد فى الرغبه عنده

________________________________________

–

فى حوش عمران

الدنيا خشت بعضها …تخلطت تريس ونساوين .. بدريه مقدرش خوها سعيد يقيمها مع خيريه
-ينادى/ يا احمد … تعالى يا احمد وينك
خش احمد من الجنان شد بدريه من يدها ويدخلو فيها لداخل للحوش..اول مرة احمد يسخف على بدريه
وهيا بطير بين ايديهم زى الدجاجه المدبوحه ….وهما مدخلينها فنص احمد فخواته خاطر سعيد خاش للصالة مشو بسرعه للممر المتقى على جنب
حطو بدريه وهيا تنتش/ يا حليلى ..ساغبارتى ..يا وليدى وين مشيت وخليت امك …ياقهرت ايامى …يا كسرت ايديا
-رحمه جنبها تصبر فيها/ سلامه مهند يا بدريه ربي ماخلاكش
صاخت عليهم قريب اغمى عليها …
-سعيد يبكى تأثر بأخته / هات الميه يا احمد
-خش احمد يجرى للمطبخ طلع مالقى صب فيه اميه وطلع يجرى لقى خواته واقفات / تطلع وحدة نقصلها رجليها
ومشى يجرى مد المالقى لى سعيد ..خداه حط يده فالميه ويبخ فيها …
خش ولدها مهند يجرى مع صغار الجيران مشى لامه يبكى
وبدريه فوق فوق/وخيك مشى وخلانه يا مهند ووه عليا ووه
خشت جارتهم مفيده تجرى/ شن صار يا عيله ووك عليا حاق سيف مات …
وبدو الجارت بالوحدة .. ركن ايعزى فى خيريه وركن ايعزى فى بدريه …والعياط دايراته بدريه متع جهال قريب تقلب الدنيا …طلع ولدها مهند مع الاولاد يبكى هوا وياهم …
وفالشارع …
ويبان عمران مقعمز يبكى مع جيرانه وجبار ايصبر فيه
-عمران يشبح لجبار / يجرو عالدنيا .. ويخاصمو قالو وقلنا ودرتو ودرنا…مايحسابوهاش فانيه .. واخرتها قبر
عبدالجبار تلفت للجهه الثانيه / كلمت الناس يا احمد
-احمد / كلمته قالى بيجيبها هوا توة
-عبدالجبار/ خيمه ولا زوز وصيته
-احمد / لااا خيمه بخيط الضى متاعها …احنا منمشو نقعمزو فالجامع علاش الخيمه
-عبدالجبار/ دير رايك

جى سعيد خو بدريه …اضبط عمران وعزاه .. وقعدو يعزو فيه جماعه الشارع واحد ورا الثانى
-سعيد / يا احمد طلعلى التليفون ولا افتحولى حوش بدريه نتكلم فى تليفونها …لازم نخبر صغارها يجو لامهم
-عمران ينادى/ يا مهند …تعالو جاى وين ماشيين للشارع الرئيسى السيارات يجرو
-مهند / اهو جاى يا بوى
-سعيد يدوى لاحمد / نكلم حفيظ وهوا يمشى لاخته يقوللها
-انتخص عبدالجبار/ انا عندى رقم عبدالكريم جار خوى نادر
-سعيد انتبه / وانت منين تعرفه رقم عبدالكريم
-جبار اتلخبط/لاااماهو نعرف ولده صلاح زمان عاطينى رقمه
-سعيد/ جيبه الرقم خلى نكلمهم ايطقو على نادر يقولوله
-جبار / باهى

وبالفعل اتخد سعيد خطواته واتصل بحوش ساسى بلغ علاء يقول لحفيظ … واتصل بحوش عبدالكريم …رد عليه عبدالكريم نفسه وخبره وقاله بادن الله نقوللهم

__________________________________________

–

فى حوش عبدالكريم

عبدالكريم صكر سماعه التليفون وبدى ينادى/ سعاد ..وينك يا سعاد تعالى
-فى الدار ناضت سعاد ولمت شعرها ونزلت كمامها/ نعم يابوى .. انشاءالله خير
-عبدالكريم / ريتى الناس اللى كانو عندنا وروحو على خاطر ولدهم انضرب
-سعاد / قصدك امالى صفيه عيال نادر ولد خالتى
-عبدالكريم / همااا .. اهل صفيه
-سعاد / خيرهم يا بوى
-عبدالكريم / الولد اللى روحو على خاطره توفى
-ضربت خدودها / ووك عليك صفيه
-جوها هيفا وناديه يجرو/ خيرها صفيه
-سعاد/ خوها اللى نضرب توفا ….

ومشو سعاد وبوها لحوش نادر طقو عليهم ….نادر وصفيه مازالو فايقين…. طلع نادر فتح لقى العويله ..لبست صفيه عبايتها وطلعت لما سمعت صوت سعاد ….
وقالو لصفيه على موتت خوها …وبكت بالشهقه …وجعها خوها ووجعتها امها… وحتى نادر وجعه ..ماهوا الا خوه فالنهايه ….
-سعاد / خالتى كون هانى عليها يانادر …برو للعزى وعزو واقعدو قداش ماتبو

-نادر/ لا لا تو نمشى نحضر الجنازة ونروح لامى .. وصفيه كان تبى تقعد عادى
-سعاد / براحتك يا نادر .. والليله تو نقعد هنايا مع خالتى وغدوة تو نرفعها لحوش بوى
-نادر/ لا اقعدى بيها هنايا انا الليله الجايه بادن الله نبات فالحوش
وخش نادر لامه وقاللها عالخبر…نادت صفيه وعزتها .. وسقدو حوش عبدالكريم وخشو دوشو وجهزو نفسهم .. وجت سعاد وخوها عليوة لحوش نادر ولد خالتهم .. وركب هوا سيارته الصغيرة ومشى هوا وياها

_________________________________________

–
فى طرابلس

وصلو نادر وصفيه قريب الساعه 2 فالليل …خشو منطقه حوش عمران ….نادر باين عليه متنرفز
– صفيه / فى حاجه
-نادر/ والله كانا مش على خاطرك انتى مانعفسها
-صفيه مستغربه / حبيبي انت قلبك ابيض .. متخليهمش ايفسدولك روحك الطيبه …
تلفتتله/ بالك مفكر انى جايه وعادى …شوف رجليا كيف يرعشو …انا حوش بوك مالقيتش فيه الخير…بس لقيت فى حوش امك الخير كله
-مسكلها يدها / ربي مايغيبك عليا …
-صفيه / ولا يحرمنى منك
-نادر/ انا بنروح غدوة …واقعدى انتى ليلتين مع امك وبعتالى نجيك
-صفيه / باهى غير اضحك بس متخلينيش مشغولة
-نادر ضحك / وانا نقدر نشغلك ..ربي يخليك ليا

وصلو قدام الخيمه …صفيه بدت تبكى
-نادر/ انزلى توة .. وحوايجك تو نبعتهملك فالليل
-صفيه تبكى / باهى
وفتحت باب السيارة ونزلت … لقت الخيمه مبنيه ولكن كلهم فالحوش لداخل …
خشت تبكى …مشت طول لامها حضنتها وقعدت تبكى هيا وياها … وسلمت على عمتها خيريه وبكت معاها وجنبها رحمه سلمت عليها نفس الشى …ومشولها غادة وامال سلمو عليها.. وفنصت غادة فى رانيه .. جتها وسلمت عليها حتى هيا ….

ومشى نادر للجامع …سلم على بوه وعزاه …وسلم على خوته .. احمد سلم عليه كويس لكن عبدالجبار سلام فوق النفس …

وبعد ساعتين مشى لحوش خيريه …نادى على صفيه يبي يعطيها حوايجها .. طلعوله خواته سلمو عليه بحراررة
ونادى على بدريه نسيبته عزاها وخشت … وطلعت خيريه سلمت عليه
-خيريه / شنحال امك توة
-مبتسم ويشبح لصفيه / الحمدلله …حالتها تحسنت هلبا بعد ماتزوجت
-خيريه / بتقولى على صفيه …ياسعد اللى تجييها كنه ..
-رحمه / نقدر نجيكم لحوشكم يا وخى
-نادر / وعلاش لا … مرحبتين بيكم كلكم ..وانتى بالدات يا رحمه تعرفى ان معزتك خاصه عندى
-صفيه / مرحبتين بيكم كلكم تنورونا

وقفت سيارة حفيظ .. جاى هوا وعلاء جاببين معاهم نعيمه مرت بوهم ..نزلهم علاء قدام الحوش ومشى للجامع اللى فيه التريس …لقى نادر قعمز جنبه طول وجبار يشبحلهم الزوز
بنص عين ..قريب بيموت ..
حفيظ نادى على امه بيعزيها…طلعتله وداراته شوط بكى مع حفيظ ولدها ومعاهم صفيه ونعيمه

وباتو صفيه ونادر هاديكا الليله فطرابلس

_______________________________________

–
ثانى يوم جنازة سيف ….

غسلوه وكفنوه وقاللهم الشيخ مفيش باس ترفعوه لامه تشوفه …وداروه فالتابوت وحطوه فى السيارة ورفعوه لحوشهم …
-عبدالجبار/ شوف اختك يا سعيد كان تبى ندخلوه لحوشها هيا ويطلع منه
-سعيد / وشن معنى الحياش الزوز لبوه ولا ..يطلع من اى واحد فيهم …اختى توة مافيهاش عقل بيش تقرر
-عبدالجبار / تم زى مايعجبك …

ونزلو التابوت ودخلوه لمربوعه خيريه …خش معاه عبدالجبار واحمد وسعيد خو بدريه …
وبدريه تمولج من الصبح تراجى فى ولدها …بعد دخلو سيف فالتابوت نادو على امه ومرت بوه وخواته …بدريه شادتها رحمه بنت راجلها .. اما بنتها صفيه مابتش تخش لانها عارفه ان جبار معاهم ..
بدريه لما دخلوها وشافت ولدها..ورولها عيونه وخشمه وفمه بس…خاطر جبهته مضروبه…ولكنها لما شافاتهماصبرتش..
وهاتك ياعياط وبدت تخبط فى وجهها ومحرمتها طاحت ..
صفيه سمعت امها فتحت الباب وخشت تجرى ..وجبار انتبهالها
-صفيه شادة ايدين امها / وحدى الله يااام وقولى لا اله الا الله …
-بدريه / لا اله الا الله ….يا حليلى على وليدى ..يا غبارتى
..يا ظلام حوشى ..
سعيد مالاول يشبح لغادة من بعيد وخايف من جبار انه يقرب من النساوين لكن معش فيها كيف اخته تعيط هلبا مشالها ..سعيد شادها من جهه وصفيه من جههة …فرفشت منهم قريب تخبش وجهها …صفيه تشد فيها طيحتلها وشاحها من تفرفيشها ..وطاح شعرها وبانت قصتها وجبار يشبحلها …احساس الحب اللى حسه لما كانت معاه صحاله من جديد
-سعيد / قيمى وشاحك يا صفيه …
بدت تساوى فى وشاحها مخلوعه / بنطلع يا خالى وشد امى انت ….

وبالفعل طلعت صفيه … وجبار ماحولش عيونه من عليها …
وطلعو التابوت وطلعو النساوين للخيمه…
صفيه مقعمزة جنب امها تصبر فيها … ماناضتش من جنبها بكل .. وخيريه تشبحلها بعين الحسرة لانها كانت عاجبتها

________________________________________

–

فى نفس اليوم فالليل

نادى نادر على صفيه …طلعتله من ورا ستار الخيمه …
-نادر متكدر/ خلاص اهو منروح
-صفيه / طريق السلامه انشاءالله
-نادر متكنطى/ وامتى نجيك

-صفيه مستغربه فيه/ امتى مايسعدك
-نادر/ باهى بالسلامه …
وتلفت بيمشى ….
-صفيه / نادر فى حاجه
-نادر / قصدى ضرورى تقعدى انتى هنايا

-صفيه حست بيه غاير/ لا مش ضرورى الحق
-نادر / خلاص امالا طلعى حوايجك وهيا
-صفيه / باهى شوى بس ونطلع
-نادر/ نراجى فيك فالسيارة

خشت صفيه متحشمه انها بتروح من اول يوم …حتى نعيمه مرت بوها اللى جايه على خاطرها مازالت بايته
-صفيه تنادى/ رحمه
-تلفتت رحمه / نعم
-صفيه / تعالى …

ومشو للممر
-صفيه / نادر قالى هيا…وانا متحشمه من امى ومن الاقارب
-رحمه / لا بتسد عليك امك ..ولا بيسدو عليك الاقارب .. مدامه راجلك قالك هيا كندرتك والسيارة
-صفيه استريحت شوى/ هكى تقولى
-رحمه / مش مستحقه نقاش…خليها فى وجهها هوا ..قولت راجلى قالى هيا
-خيريه مقعمزة جنب بدريه وتشبح فيهم من بعيد وحايرة خيرهم / رحمه..يارحمه …خيركم
-قربت رحمه من امها/ نادر قال لصفيه هيا
قامت راسها بدريه انتبهت
-خيريه / اللطف من اول يوم بيروح بيها
-رحمه / هوا بارك الله فيه اللى جابها …مهما يكون هدا حوش راجلها الاول
-خيريه/ صدقتى …كبيرة منه
-بدريه تنادى/ صفيه ….صفيه
-جتها صفيه متحشمه / نعم
-بدريه / ديري حوايجك واركبى مع راجلك روحى…عزوزتك شفتها بعيونى ماتتخلاش بروحها …معدورة يا بنيتى
-صفيه / باهى …خلى نجيب حوايجى من الدار

وبالفعل خشت صفيه تبكى جابت حوايجها .. سخفتها امها كيف خايفه عليها المرة هادى …سلمت عليهم كلهم وطلعت لقت علاء واقف على نادر ماهو صاحبه …سلم على صفيه وعزاها وركبت مع نادر وروحو

_____________________________________

–

بعد اسبوع ….
جبار يحكى مع هيفا بالتليفون ….

-عبدالجبار/ شفتها … وياريتنى ماشفتها
-هيفا/ ريت الخاينه …وين شفتها
–عبدالجبار / صفيه ماتخونش… صفيه معدنها دهب
-هيفا تكنطت/ كان نعرف بس بيش ساحرتكم اللى تشكرو فيها كلكم …
-عبدالجبار/ ادبها … حشمتها .. برائتها .. هدا كله لاحظته بعد ما خسرتها
-هيفا ولعت/ باهى توة كيف بدير بعد ولد خالة امى طلع ديوث وشاف الرسالة وفات الموضوع
-عبدالجبار/ وهدا اللى بيجننى انا…فى حلقه مفقودة فالموضوع …كيف يقرا الكلام ويسكت ..
-هيفا/ باهى اعطينى مالاخير كيف بدير …لانى انا بنغير الطريق معاك وبنبدا فالشيوخ والبخور .. نجى حتى ضرة عليها ماعنديش مشكلة
-عبدالجبار/ لاااا ردى بالك ترخى بيا …الا مانفكر فى طريقه نخليه ايطلقها بالثلاثه …ولما يصير هكى …انا ضامن بوها يعطيهالى ..حتى بالسيف عليها

_________________________________________

–

بعد اسبوعين من وفاة سيف

-خيريه / يا وخيتى تعرفينى مش كارهاتك كان تقعدى عندى عمر .. لكن هوا هداكه روحى لحوشك وافتحيه
-بدريه تبكى/ والله مانقدر نخشه …ايدبرلى ايجار ولا يشريلى حوش ثانى
-فتحيه جارتهم / اما هدا الهبال ..كانا كل مراة مات ولدها باعت معش يقعد حد …صلى عالنبى وادكرى الله وروحى لحوشك …الراجل متحشم يقولهالك ..لكن هوا هداكه ..
-وقفت بدريه / نخش الحمام حاشاكم ونجى

طلعت من الدار وصلت للباب…تسمع فى همس ودوشه
-امال / يا غبارة …يا كارثه ..هادى كيف بنقولولها
-غادة/ ياحلييييلها النار الاولة قاعدة مابردتش
-جتهم بدريه زى المجنونه / خيركم …شن فى …ونار شنو اللى مابردتش
-خيريه سمعت الدوشه طلعت تجرى / خيركم شن فى
-رانيه / خوى مهند ضرباته سيارة ومات فمكانه
– طاحت بدريه عالارض تخبط/ووه عليا ووه..وه صغارى ووه
-خيريه تخبط فى افخادها / من قاللكم يا غبارة سودة على روسنا
-امال تبكى/ توة عمى صالح قالى …وهوينا خوتى وبوى لحقوه للمستشفى
-بدريه / ووووك عليا ووك
-خشت جارتهم فاطمه/ سمعتوووو
-خيريه / ياوخيتى بالك كدب ..غير زيدو تأكدو
-فاطمه / البركه فروسكم ياوخياتى ..توة ولدى اسامه روح قالى رفعوه متوفى

وقامت الوفاة …يا غبابير بدريه على راسها …مات الاول وفى نفس الشهر لحق الثانى

عبدالجبار من البريد يكلم فى هيفا/ خوى الثانى توفا .. وبأى طريقه لااااازم تجى هنايا …عندى موال فراسى نبى نغنيه ولااااازم تعاونينى فيه

______________________________________

تمت …. ويتبع

زعما عبدالجبار شن ناوى.. ربك يستر

نحبككككم ❤