رواية ظلموني

ظلموني13
ومرة نديرهم غلاض زي جناحات الحمامة ورسمت لحية وشناب وليت مسترجلة أكثر من هداك الى متمرقد ببجامة نوم حمرا طيح سعد أيامه غسلت وجهي ودرت كحل وخلاص وشوية مسكرة ولأنى مانعرفش نديرها رموشي راحو كيف المؤشر الى يطلع ع سطح المكتب ف الكمبيوتر?? رن الجرس وكانو نسيبة ومبروكة جايبين الفطور وقعد يزغرطو ويباركولي ع أساس خوهم طلع فيها راجل وتهنينا
نسيبة وين العريس
أنا راقد
نسيبة أكيدة أمس سهرتو هلبة وهوا مش متعود
أنا نتبسم ونجامل
مبروكة العشية وتي روحك باش نرفعوك للحوش ووتعرفي ع العيلة
انا ف خاطري ريت هالعيلة المالكة الى طايحة فيها
انا تمام وروحو
ناض مطيوح السعد ودوش ولبس شورت وتيشيرت قعمزنا نفطرو وكانت تقعميزته مش زي الشباب متربع ولاركبة ونص كان ضام رجليه ومقعمز ع جنب
انا تقززت منه ماعنداش شخصية ماكانش عنده هيبه ونسيت نقولكم صوته رقيق شويا وكلامه متع دلع حللس لنم
انا حاولت نفتح معاه موضوع بالكي يقدر يتقبلني ونتقبله مواليد كم انت ومن شن متخرج وشن تحب بالزبط
ياسر أنا مواليد92 متخرج من تانية تانوي ونحب الفاشن وعروض الأزياء
أنا عيلة وخالهم ميلاد الصبر ياربي باهي شن تخدم
ياسر مانخدمش هدا كله من رزق بوي
أنا خواته الكدبات خزي ع شكالاتهم ونضت من السفرة جابلي القداد هو وهدرزته قعدت ع التلفزيون وقعدت نلقب ف القنوات يعني أحلا حاجة صارتلي من يوم تزوجت شفت التلفزيون
جت العشية ولبست قفطان أزرق ملكي طويل وفردت شعري ع جنب ومادرت غير الكحل لانى مانعرفش نمكيج
خشت عليا مبروكة خيرك هكي تقول ماك عروس
أنا خيرني
مبروكة لامكياج لاتسريحة
أنا مانعرفش الحق
مبروكة خشي ع اليوتيوب تعلمي
أنا شنو هوا التيوتيوب
مبروكة ماتعرفي تنطقي حتى اسمه فكريني نعلمك عليه
انا الله لاتسامحك يابابا خليتني مضحكة قدام الناس
مشينا لحوشهم وكان ع دورين يعنى ناس عايشة وعندهم خير سلمت ع أمه وتعرفت ع عماته وخالاته ونساوين خوته كانو هما 4 ولاد و3بنات البنت التالتة ميتة خوته كانو طروف خشو سلمو عليا نشوف واحد ننسى واحد غير البخت تعشينا وفتحتلي مبروكة اليوتيوب والفيس والوتس والفايبر والأنستا والسناب شات وورتني كيف نستعملهم روحنا للحوش خشيت لدار وغيرت دبشي وقعدت ع السرير بس مافيش نت طلعت جري لدار ياسر وفتحت عليه الباب ونسيت نخبط
ياسر كان يغير ولما سمع صوت الباب عطاني بالظهر وعصب سكري الباب وأطلعي وبدا يسب
أنا يتبع