رواية سرقت قلبي
الحلقه السادسةمحمد : انتى منين تجيبي فالفلوس ..منين تصرفى
-ابرار: باااز توة بدو سؤالين معش سؤال-محمد يضحك: صار تعرفى حتى بااز …ياشريرةابرار تضحك
“اللى سألو شن معنى بااز .. معناها اعترض ??”
-محمد : لا بجد ..من وين تصرفى ومن يعطى فيك
فى فلوس مصروفك
-ابرار: من عمى الفيتورى
-محمد استغرب : بوي ?
-ابرار : امالا كيف بوى خدانى معاه.. لان امى تعطى
فيا فمعاش كل شهر …وهدا كان شرطهالما تزوجت
بوك ان يديرلى معاش ..
وبوي قبلنى معاه لانه كان يصرف عليا وعلى خواتى من معاشى هدا
-محمد : اهاا
-ابرار: مش ملاحظ انى مش حاقدة على امى لانها تزوجت وسيبتنى
-محمد : صح .. لاحظت انك تجى لخواتى وواخدين
عليك هلبا زى وحدةمنهم
-ابرار: لان امى تزوجت بيش توكلنى ..بوك كان عنده
فيها مصلحه ..وهيا كانت عندها فيه مصلحه واتفقو
-محمد : وانتى شن عرفك الكلام هدا كله
-ابرار: امى كانت تحكيلى وتقولى انها تزوجت عشان
خاطرى ..وعشان اديرلى معاش وتصرف عليا ..خاطر
خوها سعيد مخلاهاش تخدم
-محمد وخر وحط راسه عالصالون وشبح فوق :
الامهات هادو كيف بنكافوهم بس
-ابرار: نكافوهم باننا نتخرجو وناخدو شهادات
كويسة وانحافظو على نفسنا وعلى سمعتنا
-محمد : صح صدقتى
-ابرار: توة نسأل انا
-محمد : اسألى
-ابرار: ليش تكره امى
-محمد تفاجأ من السؤال? : لا منكرهاش
-ابرار: بس تصرفاتك تقول غير هكى
-محمد : يمكن اول ماروحت من السفر متقبلتهاش
..مش لشئ فى شخصها… بس لانها فمكان امى …
بس لما شفت تصرفاتها مع بوى وخواتى ..رائي تغير تماما
-ابرار: اهاا …
وابتسمت : عطشنا ولا
ناضت ابرار للريسبشن بتجيب اميه
ومحمد غمض عيونه ومشى فالنوم …
جابت ابرار امية لقاته راقد …
خلاته راقد مابتش تكلمه وخدت التليفون صوراته ثلاث صور
________________________
ابرار مقعمزة وتتفرج على محمد وهوا راقد
عيونه مفتوحات شوى .. ويشخر??
خداه النوم من التعب رقد ممكن نص ساعه ..
وهوا راقد ومتكى على جنبه .. فاق فتح عيونه لقى
ابرار قدامه وتشبحله
طبعا لما فتح عيونه ابرار انخلعت طول وناضت دارت
روحها ماتشبحلاش
قعمز محمد : شكلى رقدت
-ابرار: ايه رقدت شوى
-محمد : وانتى مرقدتيش
-ابرار ناضت مشت للريسبشن : وهوا انا يجينى نوم
فى هالليله المباركه
-قعد محمد يضحك: لااا هيا من ناحية مباركه
..منحكيلكش ???
-جى محمد وقف قدام الريسبشن : شن تفتشى
-ابرار: ندور كانا فى قهوة راسى وجعنى
-محمد : اسمعى تعرفى كيف ..اهو فى سنفاز قريب
هنايا يمشوله الشباب على رجليهم يجيبو فالسفنز الصبح
-ابرار: وبتخلينى بروحى ..لاااا يابابا
-محمد : بلا جو عاد ..نمشى على رجليا عشرة دقايق نجيب فطور ونجى
-ابرار: وكانا حد طق الباب
-محمد : لو الباب طق معناها هادى غولة جايةبتاكلك
..لان مفيش حد هنايا بيجى الفجر
-ابرار تضحك : ويرضيك تاكلنى الغولة
-محمد وقف قدامها جنب ريسبشن المطبخ : اسمعى اليوم اهوا ..
لو مساتك انتى حاجه ..اتأكدى انى انا مش موجود على وجه الدنيا..
انا اليوم داسك ورا ضهرى ..مايوصلك شى الا بعد موتى
وبدى الفجر ايأدن ..
-محمد : صدق الحق ..نصلى ونمشى نجيب الفطور
ابرار ابتسمت
مشى محمد يتوضا ورفع قلبها معاه…
واقفه وساكته وقلبها يرقص من الفرح
اول مرة حد يقوللها انها ورا ضهر وانه حاميها
ابرار فى صمت تاااااام .. مفيش فى مخليتها الا صورة محمد …
ومفيش فى ودانها الا كلامه ليها …اول مرة تحس
انها مهمه عند شخص وانه يتمنى سلامتها ولو على حساب نفسه
???????
محمد خش للحمام توضا
وطلع صلى الفجر وقعد مقعمز ..
وخشت ابرار للحمام توضت وطلعت
خدت الفوطه مسحت وجهها …
وخشت للدار ولفت الفوطه على رجليها وشدتها كويس
وكبرت وصلت الفجر
ناض محمد من مكانه وقف على باب الدار
-محمد : كملى الفجر وتعالى نصلو الصبح مع بعضنا
وبالفعل كملت ابرار الفجر وطلعت
-محمد يضحك : لافة الفوطة زى اليمنيين ???
-ابرار : ماهو لابسه سروال ??
وقفت ابرار ورا محمد …
وكبر محمد لصلاة الفجر .. وبدى يتلو فالقران
صوته يهبل فى قراءة القران …زادت ابرار ساحت
فيه اكثر واكثر
كملو الركعتين متع الصبح ..وناض محمد لبس كندرته
-محمد : تعالى سكرى الباب وراى
جت ابرار وراه ..طلع وبتسكر الباب
-تلفتلها محمد : متخافيش باهى .. مش حنعطل عليك
-ابرار مبتسمه : مش خايفه مدامك معاى
وضحكلها محمد وطلع ..
محمد فات الجردينه متع الاستراحه وطلع من البوابة
فتحها بالشوى ومشى مسافه بسيطه جدا
لقى السنفاز فاتح ويقلى وفى زوز ولاد واقفين يشرو
شد محمد الدور وراهم قعد واقف
وسرحان بخياله …
يدكر فى ابرار كيف تعجن فالخبيزات وارتسمت
ابتسامه عريضه على وجهه
جى شاب وقف وراه مسه بالشوى فاق محمد من سرحانه
لقى شاب واحد بس قدامه فالدور
والراجل مولى المحل يقلى فالسفنز
سرح مرة ثانية …
وفى خياله كيف يصلو مع بعض .. وهما ساكتين
ومتحشمين من بعض ..
قعد يتخايل كأنهم زوز عرسان ويصلو ليله دخولهم مع بعض
المهم محمد خياله كله ماشى فى امور كأنهم اثنين
كيف متزوجين …
يتخايل فى ضحكتها وفى اسلوبها فالهدرزة ..
حس ان قلبه تحرك .. وقريب يطير من السعادة
ويتمنى اليوم ميتمش .. ويتمنى انهم مايروحوش
-صاحب المحل : كم تبى طرف خوى
محمد سرحان …
-الشاب اللى وراه : دورك خوى كم تبى طرف
-محمد : نبى 4 طروف ..
بدى الراجل يقلى فيهم
-محمد: عندك سفنز بالدحى
-صاحب المحل : ايه فيه لكن حسابه بروحه
-محمد : باهى ديرلى 4 طروف بالدحى و 4 بلا دحى
-صاحب المحل : باهى
-محمد : خوى فى قهوة هنايا
-الشاب اللى وراه : فتحو قهوة جديدة نهاية الشارع هدا
-محمد : زعما مفتوحه توة
-الشاب : ايه اكيدة فتحت ..يخدم عالناس اللى تمشى الصبح للعمل …
خدى محمد السفنز وتوجه للقهوة
لقاهم كيف باديين يخدمو
طلب منهم طلبيه 2 اكواب فروبى .. و2 نسكافيه ..
وبريوش بالشكلاطة
قعد مقعمز عالكرسى يراجى فى طلبيته وباله عند
ابرار زعما خايفه بروحها ولا كيف
________________
ابرار راقدة عالصالون و محولة وشاحها
وتفكر فى محمد
وتفكر فالصدفة الحلوة اللى جمعتهم الليله
وتسمع فالباب الخارجى انفتح
ناضت طول قعمزت ولبست وشاحها
-فتح محمد الباب ويضحك : تعالى خودى منى
-مشتله ابرار بسرعه : هدا شنو كله
-محمد : حتى انتى ضيفه عندنا ولازم نكرموك
ابرار فرحانه بكلامه ?
-محمد : هاتى صحون حطى فيهم السفنز
جابت صحنين ..حطت فيهم السفنز
وخدت طاست الفروبى وقعدت تشرب فيها
ومحمد طاح فالسفنزة بالدحى عجبه
-محمد : كولى سفنزة بالدحى حلوة راهو
بدت ابرار تاخد فى طرف من السفنزة اللى بالدحى
بروس صوابعها ..خايفه على ضوافرها ?
-محمد : مش هكى الناس تاكل فالسفنز بالدحى ..
وخدى بيده قطعه كبيرة ..
وقام يده ورهالها : هكى الناس تاكل فيه
ومد يده بحركه لا ارادية وحط القطعه متع السفنز فى فمها ..
فتحت ابرار فمها وهيا مدهولة من حركته
محمد فاق بنفسه فى اخر لحظه انه قاعد يوكل فيها
..ولكن خلى روحه عادى
كلو وفطرو وقامت ابرار الفطور كله ..
وحطاته فى اكياس وغسلت الصحون ومسحتهم
وردتهم لمكانهم
واقفين قدام الريسبشن
-محمد : هيا شنو نمشو
-ابرار واطت راسها : هيا
محمد ساكت معنداش نية ايروح بيها
قعمز عالصالون يراجى فيها
-ابرار ?: وين بتحطنى ..
محمد قعد ساكت وقعمز عالصالون
ويتكلم فى خاطره : بنحطك فى قلبي
محمد عرف روحه انه خلاص طاح ولا حدش سمى عليه
كل مشاعره بدو معاها …بدى يحب ..
الحب هدا صح والا غلط هوا مش عارف ..
المهم اللى فاهمه ان البنت عجباته وحركتله كل مشاعره
طلعت ابرار حاطه شنطتها على كتفها : هيا
طلعو مع بعضهم ..فتح السيارة لابرار وركبت ..
ورجع هوا سكر باب الاستراحه كويس
وفتح الباب الرئيسى …طلع السيارة
ورجع سكر الباب
وركب للسيارة شبحلها : نمشو
-ابرار: هيا نمشو
ومشت السيارة
__________________________
وهما فالطريق ..
ساكتين …محمد يفكر وين بيحطها وما يلاحظها حد
-محمد : اسمعى أأمن مكان نرفعك ليه هوا حوشنا
-ابرار : حتى حوش خالى عادى نقول لسهام تفتحلى ..
ونقوللها قبل بنمشى للجامعه من حوش بوي
وماصارليش وروحت هنايا
محمد سكت
وفتح الراديو .. فيه اغنية
لولا الملامة ياهوى لولا الملامة ……… لفرد جناحي علهوى زي اليمامة………
جاته عالجرح على فيها …
وقعد يسمع وهوا ساكت
_________________________
السيارة تمشى …
ومحمد يخمم
مزال مايبيش يفارقها
-محمد : لا انا نقول احسن راى روحى معاى وقولى لسهام تفتحلك..
وقوليلها نفس الحجه اللى بتقوليها لبنت خالك
-ابرار: مشكلتى منعرفش نكدب على سماح وحتزبطنى طول
-محمد : خلاص بلاش عناد روحى معاى ..
انزلك بداية الشارع وامشى على رجليك
عالاقل ترقدى وتستريحى
-ابرار : باهى
فرح محمد بجوابها …
?????
________________________
خشو السريع …
-مدلها محمد تليفونه : اكتبيلى رقمك
خدت ابرار تليفونه لقت الخلفيه متع تليفونه صورة امه
-شبحتله : ربي يرحمها
-محمد شبحلها : تعيشى وترحمى
فتحت ابرار التليفون وكتبت رقمها ومدتهوله
خداه محمد وضرب رقمها …
شرين عندها ..
-محمد : هدا رقمى
دارت ابرار حفظ للرقم ..
-محمد: فى اى لحظه تستحقينى اتصلى طول
-ابرار: انشالله
-محمد يضحك : لكن انا الحق بنتصل حتى لو ماستحقيتكش
ضحكت ابرار ..
وصلو جيهتهم ..
– محمد : اتصلى بسماح تفتحلك توة …
وانا بندرس فى راس الشارع وانتى انزلى بسرعه
…وبنقعد نراقب فيك لين تخشى الحوش
اتصلت ابرار بسماح قالتلها افتحيلى
وقف محمد السيارة لقى واحد فالشارع يسخن
فسيارته
-محمد : خليك شوى مزال تمشى السيارة قبل
وبعتالى انزلى طول
محمد قعد يشبح لابرار .. وهيا نفس الشى قعد تشبحله
النضرة بينهم قالت هلباااااا كلام
هوا كان لاقيها ماتنزلش ..
وهيا نفس الشى ماعندهاش نية تنزل
-محمد منغير مايحس بنفسه مسك يدها اليسار
بيده اليمين : ردى بالك على روحك ..واول ماتكونى
فى دار سماح ديريلى تشريينه بيش نطمن عليك
-ابرار : انشالله
مشت السيارة اللى يراجو فيها
-محمد : هي انزلى توة بسرعه
نزلت ابرار ..شبحتله وهوا نفس الشى
ومشت لين وصلت لحوش امها لقت سماح تراجى فيها
ركبو للدور الثانى منغير صوت
______________________
-سماح : وين كنتى يا منجوهه
ابرار شادة تليفونها …
ودارت تشريينه لمحمد …
محمد تنفس وارتاح وباله راق
-سماح : نكلم فيك
-ابرار: نعم
-سماح : وين كنتى
-ابرار : كنت فى حوش بوى وطلعت بنمشى للجامعه
فالطريق كلمت البنات قالو مش ماشيات
-سماح حايرة : باهى
-ابرار : يبهى ايامك .. خلاص معش قدرت نروح
غادى تيرو.. قلت نروح هنايا
سحر كانت فالحمام خشت للدار
-سحر تضحك : من اما ريح طحتى علينا
-ابرار : من ريح عين زارة وضحكو ابرار وسماح
شبحتلهم سحر ?: خزى الزوز نفس الاخلاق
-سماح تضحك : ياسرها يا ريري امس عطيتها على
راسها لين شبعت انا ??
-ابرار: تى ماهو يسخف يا نارى
-سحر: هيا بضمو افامكم الزوز ولا شنو ..صبح ونبى
نطلع رايقه للجامعه
ابرار قاعد بالها مع محمد …
رقدت على سرير سحر ..نعسانه
وصلتها رسالة من محمد ” ارقدى واستريحى توة ”
طول دارت تليفونها صامت
وبعتتله رسالة ” انت وين”
رد عليها ” شوى وبنخش للحوش ”
تبى تبعتله رسالة لقت عندها 4 قروش مايبعتوش رسالة
حطت تليفونها عالكومودينو وقالت لسماح انها بترقد
لانها مارقدتش الليله اللى قبلها قعدت تهدرز مع خواتها
بدلو سحر وسماح وطلعو مع وسام مشو للجامعه
سحر واخدة اجازة من العمل
فاقت الصبح خشت دار خواتها بتشوفهم مشو والا قاعدين …
لقت ابرار راقدة ..قعدت حايرة فيها امتى جت وهيا امبارح روحت
طلعت من دار خواتها لقت محمد فالممر كيف راكب من الدروج
-سناء: صباح الخير
-محمد : صباح النور
وهوا باله مشغول يبي يطمن ابرار وين
-محمد : خواتك مشو لقرايتهم ولا شنو
-سناء: مشو ايه ..
-محمد : امالا دارهم من فيها
-سناء: الدار فيها ابرار راقدة
-محمد ?: اهاا
-سناء: نحسابها طلعت روحت معاك امبارح ولا
-محمد : ايه حطيناها فى حوش بوها
-سناء : معناها جت الصبح .. غريبة
-محمد : مش عارف
-سناء: وانت وين كنت
-محمد : كنت بايت مع جماعتى ..ونعسااان خلاص منرقد
وخش داره ..
اتصل بابرار ماردتش لانها راقدة وناسية تليفونها
سايلنت
اتكى محمد على سريره وهوا يفكر فيها…
ومن تعبه رقد بحوايجه
____________________
نزلت سناء للدور الاول لقت امينه
قالتلها ان ابرار فوق راقدة شكلها جت الصبح
حارت امينه خيرها.. لكن خلتها راقدة مابتش تنوضها
قعدت ابرار راقدة لادان الضهر
فاقت لقت روحها على سرير سحر
طلعت خشت الحمام متع البنات
دوشت وطلعت ..فتحت دولاب سماح وخدت منها حوايج لبستهم
ونزلت للدور الاول
سألتها امها امتى جت .. قالتلها انها جت الصبح
وحكتلها نفس اللى حكاته لسماح
طلعت الخبزة تبى ادير نص …
سناء قعدت تراجى لين امينه طلعت من المطبخ
وجت قعمزت جنب ابرار
-سناء: قولى منو يسأل عليك
-ابرار: منو
-سناء: عصام سلفي
-ابرار: منو عصام سلفك هدا
-سناء: الى تكردستى قدامه فالسطل شافك
وعجبتيه ويبي رقمك
على وقفت محمد عالباب سمع الجمله كلها
-محمد متكنطى : منهوا اللى يبي رقمها
_______________________
تمت ويتبع ???
عارفة الحلقة قصيرة وعارفه روحى عطلت عليكم
بس لانه اول يوم حلقتين وانا شكلى خديت عالراحه
متع حلقة وحدة بس ??? ..غدوة نتكم الامور اكثر انشالله
جماعة الحلقة قصيرة قريب نديرلكم رابطة بروحكم ??????
نحبكم ❤