حمامة السلام

الجزء التاسع

ضجة وصوت الرجال طالع واضح اديه مقهورين

دخل ابو نغم وسلم على الكل وعينه ع سعيد اللي ما حكى لحدا عن رفضه بالاول للاجتماع والمساعدة
ابو نغم: شو القصة يا سعيد
و خبره سعيد كل القصة
ابو نغم: لا حول ولا قوة الا بالله
ابو احمد: وليل نهارك يا ابو نغم كنت زعلان بدك ولد شوف حكمة ربك هيهم 3 اولاد طلعو شياطين والعن
ابو نغم: الله يلعن الشيطان صفحة وانطوت
ابو احمد: يا رب
سعيد: هلا كيف بدنا نوصللهم خبر قبل ما يدرو وبدون ما يزعلو هون الصعب مش شي تاني
ابو نغم: بالكم رح تتحمل ام جابر
سعيد: عمرها ما كانت ضعيفة اكيد رح تتحمل

ع باب العمارة وقف تكسي ونزلو منه ام جابر وابو جابر وهم مبسوطين وبيتعكزو على بعض
شافهم احمد وطلع يركض لفوق ليخبر رجال العمارة برجعتهم

كانو بيطلعو بالدرج وهم بيضحكو
ابو جابر: شوي شوي ع مهلك
ام جابر: هههههه حاسة الدرج بيطول
ابو جابر: من زمان ما طلعنا هيك مشوار وبعدنا عن المشاكل
ام جابر: وليش الكزب والله اشتقت لبيتي والزريعات خلينا نطلع بسرعة وندخل قبل ما حدا يشوفنا

وصلو البيت وقبل ما تفتح الباب كان سعيد وابو نغم وابو احمد والجيران والجارات واقفين عالدرج
ابو جابر: بدك تهربي، هاد الكل هون
ام جابر: ما شاء الله و شوف سعيد بعد القتلة صحته متحسنة
سعيد: الحمد لله على سلامتكم شغلتو بال الكل عليكم وهيك يا خالتي بطلع ما بلاقيكي حوالي ولا بتطمني علي
ام جابر: الحمدلله على سلامتك يا ابني انت عارف العمر والواحد بحتاج راحة هلا بدنا نضل واقفين هون تفضلو نشرب كلنا كاسة شاي من تحت ايدين عمكم ابو جابر
ابو جابر: ليش لا يا اهلا وسهلا

انقسمو كلهم الرجال قعدو بمكان والستات بمكان ورغم توترهم والخوف بس شوفة البسمة على وجه ام جابر وابو جابر خلتهم يرتاحو شوي لوقت رن الجرس

راحت ام جابر تفتح الباب
*: هون بيت خالد علي وزوجته نجوى
ام جابر: ايه هاد بيته
*: هاد امر من المحكمة لحضور جلسة
ام جابر: محكمة شو؟ يا ابني شو في فهمني
*: في قضية مرفوعة على خالد علي من قبل اولاده بانه هو وزوجته غير مؤهلين للعيش لوحدهم

ام جابر ضحكت وضحكت وضحكت والكل خاف عليها
ابو جابر اخد الورقة من ايدها وشاف المكتوب فيها وزعل والدمعه كانت رح تنزل من عينه
ام جابر: اوعك…. اوعك تنزل لو دمعة عليهم مفكرين بشقفة ورقة ببيعونا بيتنا بفكرو انهم هيك رح يحطونا تحت الامر الواقع
والله ما بهنيلهم بهالبيت لحظة وما بطلعلهم في بلاطة هاد بيتنا يا ابو جابر…..اوعى تدمع وتحكي اولادي اولادك اندفنو وقت الطمع عماهم….. وقت فضلو نسوانهم ونسوا اللي رباهم وانتو ليش زعلانين اه ……..ع شو بتزعلو ع وسخ الدنيا وبلائها…….عالناس اللي بتفكر بس بحالها

الكل صار يبكي على كلام ام جابر يلي كانت تحاول تصبر حالها فيه

رن الجرس مرة تانية وهالمرة ما حدا كان قادر يفهم
ولا حدا كان متحمل اللي بصير ….ولا حتى قادرين يفهمو كيف الطمع بعمى حتى قلوب اقرب الناس

فتحت الباب ام جابر وهي رح تصرخ وتبهدل ومين ما كان يكون عالباب
شافت شب مبتسم وبيطلع عليها بحنية
*: اشتقتلك يا ست الكل
وبعد هالكلمتين ما لقت حالها الا حاضنتو وبتبكي بس دموع مش معروف هي دموع فرح او دموع قهر

يا ترى مين هالشب …ممكن يقدر يساعد ام جابر بمشكلتها
ودقة القلب اللي انتفضت بهاي الرجعة… او راح اتضل حب مطوي ….معقول تحيي قلوب ماتت من السنين

يتبع