حمامة السلام
الجزء الثالث عشر
الوجع واحد… بس لما المواقف بتكرر
مرة ع مرة بتصير تحس انه نصل السكين ما عاد يطلع بالعكس كل مرة بزيد غرق ….وبزيد معاه الالم ومع هيك بنحاول نكابر
واقف ع باب بيت ام جابر بدو يدق ومو عارف كيف راح يتطلع بوجهها…..
هو حاسس بغلطو بس الكسر بعيون اخته عم بخليه يندم اكتر……
سمع صوت حدا نازل عن الدرج خلاه اتكركب ويقرر يرجع من محل ما طلع بس وقفو صوتها
ام جابر: ازا جاي تصالحها اتفضل اهلا وسهلا فيك بس ازا بدك ترجع تكسرها يا مروان رح اخلي الارض باللي فيها تحزن عليك
ابو نغم: هي اللي ضايقتني يا خالتي والله انا ما الي حدا غيرها ابوي ظلمها وبدل ما انا اجبر وجعها رحت زدت الوجع عليها
الدمع اللي شافته خلاها تعرف انه ندمان نزلت وفتحت باب بيتها ودخلت ونادت ع ابو جابر اللي كان يسند نعمة لتقعد…..
بس شافت اخوها رجع الدمع لعيونها ورجعت تبكي بحسرة ع حالها و جسمها برجف رجف مو من الوجع قد ما هو من القهر
حاول يقرب عليها بس لما شافها بتحتمي بابو جابر وكيف الموقف بتكرر جوا عيونها ما قدر حنى راسو والدموع تحركت بتنزل متل شلال اختلط مع شيب لحيته
ابو نغم: سامحيني اني جرت عليكي والله ما كان بقصدي كان من خوفي عليكي …..خوفي اني اموت وما لاقي حدا يحميكي ……انت اختي وبنتي ونور عيني…..انا غلطت وحقك تاج فوق راسي بس ببوس ايدك هالنظرة لا عاد تطلعيها فيني لانها بتدبحني وبتقهرني وبتخليني حس قديش الحيوانات احسن مني …
زاد صوت بكاها على حكيو وما كانت عارفة شو تحكي اصلا ما فهمت ليه كل هاد صار ؟…..مو اول مرة بتقدملها حدا وبترفضه
اصلا المعظم بفكرها عانس ويا حرام ما بعرفو انو وجع شهر خلاها تكره حتى السيرة
ابو نغم: احكي اي شي صرخي علي بس سامحيني ولا تخليني اموت بحسرتي
وقت سمعت سيرة موت ركضت ناحيته وضمته وصارت تبكي على صدرو وتبوس براسه وتضمه…
وهو شدها اله كانه ضاع منه شي واخيرا حصل عليه بحنيتها كان كل مرة بضيع وهالمرة وقت حس انها خسرها خاف يخسر الحضن الاخير من عيلته
ام جابر و زوجها تركو المكان الهم وقامو عالمطبخ ليحضرو ضيافة واكل لنعمة
ابو جابر: انحرق دمي عليها بس رغم قسوته طلع حنون
ام جابر: ما يحرق دمك ع حد يا غالي الله بيعلم شو اللي صار بينهم بس ازا طلع محقوق رح اموتو
ابو جابر: انا بقول تمشي عالمخطط القديم وتزوجيها لفادي اللي طلعتي تتفقديه
ام جابر: هشش وطي صوتك ما في حدا بعرف بالموضوع ورح حاول افتحو معهم بس اكيد مش اليوم قوم هلا خلينا نفهم شو القصة منهم
كانو قاعدين بهدوء ضيفتهم ام جابر الشاي وقعدت قبالهم
ام جابر: اه يا مروان يا ابن شريفة شو اللي صاير لحتى عملت هالعمايل
ابو نغم: رح احكيلك كل اللي صار
من اسبوع رحت عند ابو احمد عالدكان وكنا قاعدين منشور قهوة سوا وقتها فتح معي موضوع نعمة
ابو احمد: شو بقلك يا ابو نغم، ابن اخوي بدور على مرة مستورة للزواج
ابو نغم: طيب وانا شو دخلني
ابو احمد: يا سيدي القصة انه هو ارمل من سنة وعندو ولدين الله يسلملك هالبنات وبدور ع بنت ناس تدير بالها عليه وعلى اولادو وانا قلت ما النا الا المستورة اختك
انتفض ابو نغم وهو بسمع سيرة اختو ع لسان ابو احمد
ابو نغم: وليش اختي
ابو احمد: يا ابو نغم انت وراك اربع بنات غيرها والوحدة اول عن اخر مصيرها بيت جوزها
مو احسن ما الرايح والجاي بيحكي عنها عانس فكر بالموضوع وردلي خبر
واله اسبوع متل السوسة كل يوم بنق وبسال وبس قلتله اختي ما بدها تتزوج قهرني
ام جابر: شو حكى
ابو نغم: اتهمها انها ما بدها تتزوج لانها استغفر الله العظيم
(اللي بعرف ام جابر بعرف غضبها وحقانيتها)
قامت وهي معصبة واخذت ابو نغم ونزلت لعند ابو احمد اللي بس شافها وقف احتراما لالها
ام جابر: لهون وصلت معك لتزوج ابن اخوك يلي دايمآ سكران وعايش بالدين كرمال المشروب تقعد تحكي كلام طالع نازل يا عديم الشرف لك انت مستقل الحكي بأعراض الناس….. بس فهمني مين اللي وقف نصيب هالبنات مش حضرتك
ابو احمد بتوتر: ام ج
ام جابر: ولا كلمة اسمعو كلكم نعمة بنتي وبحمايتي وبنات ابو نغم الاربعة وعمتهم اولهم زواجتهم علي…… الله يطعم واحد فيكم يحكي عن شرفهن وسمعتهن وانا ام جابر
طلعت ورفعت راسها لفوق وشافت فادي مبتسم انها رجعت حق الغالية دخل لجوا وهو مرتاح
و اول ما دخلت ام جابر العمارة باس ابو نغم راسها وطلب منها السماح …..و سمحتلو ياخد اختو وبوعد منه انه ما يقرب او يفتح معها موضوع الزواج
وطلبت منه يفكر يسمحلها تتعلم شي تتسلى فيه بدل ما تضل سيرة ع كل لسان
وبس وصلت بيتها لاقت نظرة الفخر ع وجه ابو جابر ضمها ودخلو لبيتهم وسكر ورا الباب وهو بحلف براس مرتو
(لو اتغير الزمان ما ممكن يطلع متلها حمامة سلام)
يتبع