حمامة السلام

الجزء الرابع

كل يوم جديد عم يحمل معه حكاية جديدة بالعمارة

سعيد بسلم عليكم و بحكيلكم اليوم انسوه وانسو نسوانه من هاد الجزء شوفو حدا غيرينا لحد ما يطلع من المشفى (مع اني خبرته الكل مشغول عليه بس خلص ما رضي بيني وبينكم الكلام خايف اتشوفو شكله بخوف من ضرب سميرة و سعاد )

طيب عند مين لازم انروح راح نرجع ننزل للطابق الاول وانشوف شو هالجلسة الهامة بين بنات ابو نغم

نغم : عمتي والله ملينا من قعدة البيت راح اتطق روحنا
نغمة :شو طالع بأيدنا ما شفتي ابوكي شو عمل معنا المرة الماضية ما خلا فينا عضمة سليمة ولا نسيتي
نغم : اخ لأ لهلأ ما انسيت هلأ على هالسيرة وجعني جسمي
يارا : وانا كمان لسى جسمي ازرق
ام نغم : الله يوفقكن لا تعملو شي يخلي ابوكم يعصب عليكن
نغم: أمي كرمال الله حاكيه يخلينا انروح ع العرس يلي بالحارة
ام نغم : يعني ابوكي برد علي
نعمة :عندي فكرة
نغم: شو قولي عمتي
نعمة: شو رأيك ام نغم تحكيلو انو يخليهم يروحو بلكي الله ببعت نصيبهم وهيك مابتوقع يرفض لانو كل همه يخلص من البنات
أم نغم : ههههههه والله ضحكتيني من زمان ماضحكت هيك كيف خطر ع بالك ع هالشي
نغم: أمي احسن من الحبس يلي عايشينها راح يطلع معنا اكتر من هيك بشوف من الشباك بنات عم تمشو ورايحين مشوار بس نحن غير عن كل العالم
أم نغم : بنتي مو كل الاباء متل ابوكي بس ابوكي متعقد ليش ما اجاه صبي ويمكن من خوفو عليكم هيك عم يعمل لان ما عندكم سند بعد ما يكبر ابوكم
نغم: بس امي ابي هيك عم يهدم حياتنا يعني بعد البكلوريا ما في جامعة والله حرام ما عم يخلينا نأمن مستقبلنا
يارا: صح والله كنت بحب المدرسة كتير
لارا :انا من هلق معد بدي كمل مدرسة لشو اوصل للبكلوريا وبعدين اقعد
زهور: انا لساتني صغيرة بس مابدي مدرسة
نغم :شفتي امي برأيك هيك صح تصرف ابي
ام نغم : لا بنتي وبعرف هالشي انا بس شو طالع بأيدي اعمل بدك اترك ابوكي وين منروح وكيف بدنا نعيش
نعمة: كرمال الله بكفي نكد وخلينا نشوف كيف بدنا نروح ع العرس
ضحكو الكل على كلام عمتهن
ام نغم :تكرمو اليوم بحكي و أن شاء الله بقتنع

بعد الغدا
ام نغم :نغم اعملي كاسة شاي بسرعة…. ابو نغم بدي اطلب طلب
ابو نغم: خير ان شاء الله
ام نغم :في عرس بالحارة وبدي اخد البنات عليه
ابونغم: لا
ام نغم: طيب سمعني انا عندي فكرة حلوة
ابو نغم :هاتي لشوف شو عندك مع اني ما بعتقد بتعرفي تفكري
ام نغم : الله يسامحك طيب هلأ اذا رحنا على العرس في نسوان كتير هناك ويمكن تعجبهم وحدة من البنات يعني اذا بقيو بالبيت كيف بدك ياهم يتزوجو
ابو نغم :ها والله بصراحة مافكرت بهالشي بس قلت يلي بعرفنا او الجيران بدل ع البنات
ام نغم : وبلكي مادلو عليهم لازم البنات يطلعو وتشوفهم الناس
ابو نغم؛ موافق اتروحو بس ما بتطولو
ام نغم :حاضر متل مابدك

انبسطو البنات كتير وفرحو وبلشو يجهزو شو بدهم يلبسو على العرس

يا الله اديه قلوبهم تعبانة ومشوار صغير فرحم وخلاهم يحلمو
نغم بتحلم بانسان يكون واعي ومتحرر مو متل ابوها
وكل وحدة منهم تفكيرها بشي وع قد عمرها
يارا ولارا وزهور كل وحدة عمتفكر بشي
اللبس وانها تكون حلوة بالعرس
_________________________________________
تاني يوم لبسو وراحو ع العرس
وكانو كتير حلوات وانيقات والبسمة مرافقتهم والفرحة يلي بقلبهم ماعاطينها لحدا

فاتو لعند العروس وشافو ناس كتير من زمان ماشافو ناس بهالعدد
انبسطو واتسلو وضحكو
وام نغم تقلهن خلينا نروح والبنات يترجوها لا خلينا شوي
ومن فرحتهم تأخرو وما حسو

وبعد هالسعادة كلها شو ناطرهن
دخلو ع البيت وهني عمحكو شو شافو بالعرس
بلاقو ابو نغم ناطرهن والنار عمتطلع من عيونو
ام نغم: احطلك عشا
ابو نغم: والله لخلي ليلتكم سودا انا بناتي يرجعو بهالوقت ع البيت
ام نغم :طول بالك لسا بكير والمكان قريب وكل الناس بالشارع
ابو نغم: وعمتحكي وتردي كمان هجم عليها ضربها كف قوي كتير
البنات خافو ع امهم كتير وصارو يبكو

نعمة عم تبعد ام نغم عنو بس هيي ما سلمت من القتلة
ضل يقتلهم ساعة والصريخ عبى العمارة

وكل الناس وقفت ع الشبابيك يتفرجو ويشوفو شو صاير
صراخ البنات وبكاهم ع امهم وع حالهنم خلا ناس تبكي بس من سماع الصوت
نغم عمتبكي وتصرخ بترجاك بكفي بكفي انت ماعندك قلب ماعندك رحمة
ابو نغم: يابنت الكلب عمتعلي صوتك وتحكي ابوكي هيك والله لربيكي من اول وجديد
كسر نغم تكسير وماتركهم لحتى تعب وصار الدم ع وجه كل وحدة فيهن
دخلو ع غرفهن والدموع مو راضية تفارق وجهن ابدا
نامو من التعب ونامت معهم كل ضحكة حلوة ضحكوها بهالمشوار

بالطابق الثالث
دخلت ام جابر على البيت ولقت ابو جابر قاعد بالبرندة
ام جابر : ليه قاعد هون و ليه كل هاي القهوة
ابو جابر : اقعدي احكيلك شو صار
حكى ابو جابر شو صار ببيت ابو نغم
ام جابر ما اتحملت هالكلام ونزلت لعند بيت ابو نغم

ام جابر من على باب البيت : انت ما عاد استحيت ما عندك شغلة بالحياة الا تضرب هالبنات
ابو نغم : شو خالتي انا بحترمك بس لا تتدخلي
ام جابر : لأ مو على كيفك
ابو نغم : لعاد يلا مع السلامة
ام جابر : شو لاحكيلك هاي آخر مرة بتفكر تضربهم المرة الجاي راح اشتكي عليك
ابو نغم : لأ ليكون مفكرة حالك حمامة السلام

ما ردت عليه وطلعت على بيتها

بكفينا اليوم هالتعب النفسي يلي عمله ابو نغم لنشوف بكرة شو في أحداث جديدة راح تصير بالعمارة
يتبع

error: