حمامة السلام
الجزء الثامن
شو صعب الخذلان من الناس القريبة… والأصعب وقت نفكر إنهم بيوم بينعدلوا او على الأقل بيندموا
رجع سعيد على البيت وهو مكشر وشاف سميرة وسعاد عم يحبسو دموعهم ….كان صافن فيهم وكيف التنتين حاضنات بعض وبيبكو
سعيد: يا حبيبي اتفقوا التنتين ومالهم بيبكو خليني افهم شو قصتهم
قعد على الكنباي و تطلع فيهم
سعيد: شوفي وليش هيك نازلين تبكو
سميرة: سعاد احكي انت
سعاد: لا انتي احكي انت الأول
سعيد: شوفي انت واياها لا تخلوني اعصب عليكم هلأ بتحكو والا بهج وما بتعرفولي مكان
سميرة: خلص خلص رح نحكي هاد يا سيدي اجت سارة على العمارة
وحكولو شو عملو فيها وهو بيضحك على عملتهم
سعيد: الله يخزي شيطانكم وانتو من كل عقلكم عملتو هيك بالمخلوقة بس برضو ما فهمت لشو هالنواح هاد كلو
سميرة: مهو المصيبة انه خبرتنا خبرية لا بتسر خاطر ولا قلب
سعيد: واللي هي
سعاد: اولاد ابو جابر
سعيد: مالهم
سميرة: رافعين قضية على خالتي ام جابر وعمي ابو جابر انهم ما بحسنو يعيشو لحالهم
سعيد: الله لا يوفقهم تفه على هيك اولاد عاطلين، بيعو امهم وابوهم اللي فوقهم واللي تحتهم وهلا راكضين وراهم خلوهم يصفو بالشارع لا والله ما حزرو
قام من مكانه ونزل من البيت لعند ابو نغم دق عليه الباب اكتر من مرة
ابو نغم: اهلين جار هديت الباب وانت نازل دق دق شو فيه
سعيد: خبر مش منيح ضروري ضروري نلتم كلنا يا عندي يا عندك
ابو نغم: وين عندي
سعيد: هلا مش وقت غيرتك يعني فهمنا انه اللي عندك بنات، المهم الموضوع اله دخل بخالتي ام جابر الله يخليك ضروري نلتم
ابو نغم: وانا شو دخلني فيها، فوق ما هي حشرية وعاملة فيها المرة العاقلة بدك اياني اساعدها
روح ساعدها لحالك انا ما الي دخل لا فيها ولا باولادها ، والله عال لسه كل ما بدو يصير شي بدقو الباب
سكر ابو نغم الباب بعد ما تغيرت ملامح وجهه وبين عليه الزعل مع مرقة نعمة كانت رايحة للمطبخ
نعمة: اخي شو في انت بخير
ابو نغم: ما في شي اختي ، ما في شي
نعمة: علي اخي احكيلي شو اللي صاير معك حتى مبين هالقد مهموم
ابو نغم: قبل ما احكي سامحيني على كل شي عملتو فيكي
ابتسمت نعمة بوجهو وقربت وباست راسه وقعدت جنبه
نعمة: شو اللي بتحكي انت، انت اخي وسندي ولو شو ما صار ما بزعل منك…. صح كنت استنى تكون اول حدا بيطبطب علي وكنت قاسي معي شوي …. بس هاد مش معناه اكرهك …وهلا رح تحكيلي شو في والا لا
ابو نغم: انت بتعرفي انو زعلت ام جابر بحكيي، ومن بعدها ما عاد بينت بالعمارة
نعمة: اي
ابو نغم: جارنا سعيد من شوي دق الباب وحكى انه في مشكلة صايرة معها هاي وابو جابر واولادها الهم دخل
نعمة: حسبي الله عليهم من اولاد الهم ام متل السكرة واب العالم كله بتحلف بحياته ….شو اللي بدهم اياه
ابو نغم: ما بعرف يا اختي ما بعرف…. بس وقت جاب سيرتها استحيت من حالي ومن الحكي اللي قلتو عنها وما عرفت روح ساعدها او لا و خفت انه ما تقبل مساعدتي
نعمة: له يا اخي له، قوم روح شوف شو القصة وساعدهم بعمرو ما كان الجار عدو لجارو ولو صارت بينهم مشاكل يمكن تشوفها قد الدنيا وما تفكر ولو للحظة باللي صار وازا هالقد حاس بالذنب ساعدهم وقتها رح ترتاح
ابو نغم:هيك رأيك
نعمة: اي اكيد يلا روح وشوف وين الرجال ملتمين وافهم منهم شو القصة
باسها من راسها ولاول مرة بضم اخته لاله….. حس انه كان لازم من الاول ينتبه لحنيتهم…..طلع من البيت ونغم خواتها صارو يسفقو ويصفرو
نغم: ما عرفتك يا حنون انت بوس واحضان ويخليلي اياكي يا اختي شو القصة
نعمة: بس وليك بضلو ابوكي كمان
نغم: لو يعملها ويحضني هيك الا موت فوراً
نعمة: بعيد الشر عن قلبك وقلب خواتك قومي نحضر شي حلو جاي عبالي كيكة باردة وبكون ابوكي وقتها رجع
ما في اسهل من جبران الخواطر …… بكلمة ممكن انك تغير نفسية شخص … و ببسمة ممكن تبدل يوم الحكي احيانا ما بكون اله لازمة….بس التصرف هو اللي رح يثبت معزة الناس الك
يتبع