حمامة السلام
الجزء السابع
اكيد مليتو من جوا الضرب والتعب وقبل ما نعرف ازا عنجد أبو نغم قرر يغير بحياته أو لأ
شو ما اشتقتو لخناقات سميرة و سعاد بس هالمرة مشاكلهم مو مع بعض و اخيرآ اتفقوا سوا بس اكيد بالشر تعالوا انشوف شو راح يعملوا
العمارة من دون ام جابر صارت بلا طعم أو لون …
سعيد اول يوم دوام اله
سميرة : الفطور جاهز
سعاد : انا راح طعميك بإيدي
سميرة: لأ انا
سعيد : ما بدي منكم شي
بلش ياكل اجى بدو ياكل بيض وكانت سميرة عاملة البيض بالقلاية يلي انضرب فيها رجع اتذكر وجعه قلب الطاولة هاي ما بدي اياها بالبيت وسحب حاله وطلع من البيت مع نظرات الاستغراب من سميرة و سعاد
بعد الظهر سميرة و سعاد قاعدين على البرندة مع يلقطتو ملوخية (هو لازم كل اكلت ملوخية بصير مشكلة ) المهم
سميرة : سعاد
سعاد : نعم
سميرة: هلأ عنجد ممكن يتزوج سعيد علينا
سعاد : والله مثل ما فكر بيوم يتزوج عليكي ممكن يفكر يتزوج علي
سميرة : طيب احنا شو ممكن نعمل
سعاد: خالتي ام جابر مين حكت العروس
سميرة : هاي الكرنيبة سارة الممرضة
سعاد : سارة … سارة….سارة ….سارة
سميرة : وك مالك الشريط علق عندك على اسم سارة
سعاد : لك هالغضيية اجت
سميرة : اي والله تعالي احكيلك شو راح نعمل
( يا ويلي عليكي يا سارة شو راح يصير فيكي من ريا و سكينه)
سعاد وقفت عند المصعد وخلته مفتوح كرمال سارة تتطلع على الدرج
سميرة بسرعة البرق جابت اكبر طشت وحطت فيه مي كانت تغسل فيهم جرابات سعيد واول ما طلعت سارة على الطابق الاول رمت سميرة عليها المي
صرخت سارة من الرعبة و اتطلعت لفوق شافت سميرة واول ما شافتها
سميرة : ييييييي عليكي شو صار فيكي لك يا سعاد شو صار معك
سعاد: اي حبيتي جيت خذي هاي الطحين يلي طلبتيه امسكي (اتخيلو الموقف سعاد بدل ما تعطتي سميرة الطحين سبحان الله وقع منها بالغلط على سارة ….. يا سلام مي وطحين معجونين بجرابات سعيد )
سميرة : له له يا ضرتي شو عملتي
سعاد: ما بعرف شو صار وقع من ايدي
سارة من تحت : العمى بقلبكم انتو الجوز ما بتشوفو
سميرة : اسمعتي شو حكت
سعاد : كأنو صار لازم نغير للخطة ب
سميرة : والله هيك شكلو
ثواني صارت سميرة و سعاد قبال سارة لبؤتين قدامهم غزال
سميرة : انتي شو جاي تعملي هون
سارة : انتي شو دخلك
سعاد: لما يتسألك ضرتي حبيبتي بتجاوبي عليها
سارة: انتو شو بدكم
وهون تلفون سارة برن
سارة : اي حبيبي ورود عم تبكي طيب جاي اساسا ام جابر مو بالبيت و انا منظري لازم اروح …. اي اي بعدين بخبرك …. بس انت اعطيها حليب ….مع السلامة
سميرة : مين ورود
سارة : ما دخلك
سعاد: بالله عنجد مين هي
سارة: بنتي
سميرة : كيف بنتك
سارة: مثل ما كل العالم بجيها اولاد
سميرة و سعاد سوا : متزوجة يعني
سارة : يهيك بحكو
سميرة و سعاد من فرحتهم حضنو سارة وصارو الثلاث عجينة تشكيلية
سارة: شو قصتكم انتو
سميرة : جد احنا اسفين ما كان قصدنا
سعاد: تعي فوق نظفي ثيابك و بنفهمك
سارة : انا مستعجلة
سميرة : ما راح تتأخري
طلعوا لفوق و حكو لسارة كل القصة
ضحكت على تفكيرهم انو ممكن هيك يطفشو شي وحدة بس اتزكرت هي ليه اجت على العمارة
سارة : اي صحيح ام جابر وين
سميرة: الها يومين مو مبينة
سارة :انا كيف بدي اوصللها لازم اشوفها
سعاد : صاير شي
سارة : هاد مو زوجي اليوم شاف اولادها طالعين من مكتب محامي صاحبه …. قام سأله شو القصه وخبرهم انو اولادها رافعين على ابوهم وامهم دعوة أنهم غير مؤهلين يسكنو لحالهم وأنهم عم يإذو الناس
سعاد: يخرب بيتهم اللهي
سميرة: مستحيل هالشي والله خالتي ام جابر ما في حدا مثلها
سارة : لازم يوصل خبر الها
سميرة : راح شوف سعيد يخبر رجال الحارة لنشوف شو راح يعملوا
يا ترى كيف راح يتصرفو الرجال و شو وقف ام جابر وقت تعرف شو عملو اولادها….
يتبع