حمامة السلام

الجزء الحادي عشر

نظفت ام جابر البيت يلي بالطابق الاخير كرمال فادي ورجع فادي سكن فيه

بس احنا هلأ راح نترك فادي و قصة ام جابر وقصص كثير راح تصير بالعمارة ونروح لعند سميرة و سعاد اليوم في تغير مفاجئ بالعلاقة بينهم يا ترى شو راح يصير بينهم و خصوصي في اكلت ملوخية……

سميرة :سعاد
سعاد:نعم
سميرة:كثير حزنت على خالتي ام جابر معقول يعني بعد ما تعبت و ربت هيك يصير فيها
سعاد: الله يعينها و يصبرها
سميرة:تخيلي ابني هيك يعمل
سعاد : احكيلك شي
سميرة:عم اسمعك
سعاد:المشكلة مو انو اولادنا يعملو فينا هيك المشكلة ازا شافونا دايمآ مشاكل و يصير بعملو مثلنا
سميرة: بهاي معك حق
سعاد: طيب هو …يعني….بصير….بنفع
سميرة:شو قصدك
سعاد: انو نتفق سوا وخلص ما عاد نتخانق
سميرة: بتصدقي اوقات كثير بصفن انو واخر هالمشاكل شو راح يصير …. خلص واقع نفرض علينا خلينا نتعايش معه
سعاد : فعلآ حياة نفرضت علينا غصب عنا رح نعيش هالحياة
سميرة: اخر هالمشاكل اكيد سعيد راح يتزوج علينا
سعاد : لأ ما اظن سعيد ما بعملها….كملي الملوخية انتي
سميرة: نعم بلشنا
سعاد: ههههههه قبل ما ترميهم مثل العادة انا بدي روح اعمل حلو لبعد الغدا
سميرة: ههههههه ازا هيك تمام يلا روحي

********
بعد العصر دخل سعيد على العمارة لأول مرة بشم ريحة ملوخية غريبة بعرف ما حدا بياكلها بالعمارة وانا نفسي بالاكلة من زمان صرت مشتري فوق ١٠٠ كيلو ما كان منهم صحن …..
خليني الحق هالريحة لشوف من وين
وصل اول طابق الريحة لسه خفيفة اكيد مو من عندهم
معقول خالتي ام جابر وصل لعندها مممممم ريحة محاشي بس اكيد مو ملوخية
وصل لعند باب بيته وفتح تمه على الآخر معقول ….
مستحيل هالريحة من عنا …. فتح الباب شوي شوي كرمال يتلقى الصدمة على مراحل ….نيجي للصدمات

_الصدمة الأولى سميرة و سعاد عم يحضرو على التلفزيون و عم يضحكو
_الصدمة الثاني طاولة السفرة معقول عليها ملوخية
_الصدمة الثالث البيت كلو متغير كل الديكور مقلوب

سميرة …. سعاد شو صاير
سميرة: الله يعطيك العافيه
سعاد : هات جاكيتك و روح غسل….سميرة حبيبتي بس ضل تحطي مي على السفرة
سميرة : اي من عيوني

قعد سعيد على طاولة السفرة وهو مو فاهم شي
سعاد : تفضل يا عمري دوق اطيب ملوخية من تحت ايدين سميرة
سميرة : بس لا تكتر لانو سعاد عملتلك حلو بشهي
سعيد : اي ….اه ماشي ….يسلمو ايديكم و يرضى عليكم
سميرة: ويخليلنا اياك
سعاد : امين يا رب…..ازا حابه اسكبي لسعيد ملوخية
سميرة : اي يلا
سعيد : قبل ما تسكبي ثواني و راجع

نزل سعيد لعند ام جابر
ام جابر : اهلا وسهلا بسعيد حماتك التنتين بحبوك عاملة محشي فوت لجوا ….. مالك هيك صافن ومصدوم صاير شي
سعيد : ما بعرف خالتي في ملوخية فوق
ام جابر : الله يجيرنا على شو هالمرة المشكلة راح تكون
سعيد : لأ جاهزة للأكل …. وحكى لام جابر كيف وضع البيت و نسوانه
ام جابر : غريبة والله ما الهم بالعادة …. طيب انت هلأ روح استمتع بأكلت هالملوخية وانا المسا بطلع بشوف شو القصة

طلع سعيد لفوق وبلش ياكل وفعلآ استمتع بالاكل ما في وحدة زعلت و لا وحدة نقت عليه كرمال الاكل

سعاد : ألف صحة و هنا خليكي سميرة انا بشيل الاكل
سميرة : لأ حبيبتي انتي حطي حلو عبال ما اشيل الاكل

اتحلى سعيد و اتحلت أيامه معه وراح ينام شوي

وما في نص ساعة إلا ام جابر اجت لعندهم
سميرة : اهلا وسهلا خالتي
سعاد : نورتينا خالتي
ام جابر : الله يرضى عليكم يا رب ….. حاسة في شي متغير بالبيت
سميرة : هاي سعاد غيرت ديكور البيت
ام جابر : غريبة عاد انتي يا سميرة ما بتحبي حدا شيل غرض من مكانه
سعاد : فهمانة عليكي خالتي…. بدي احكيلك شغلة احنا حبينا نغير من حياتنا كرمال نقدر نعيش
ام جابر : هاد هو الحكي الصح و هيك بتكون الحياة الناجحة

اوقات بنفرض علينا واقع محبورين انداريه و نسايره لانو ازا عملنا غير هيك راح نتعب…..

هلأ سميرة و سعاد اكيد راح يضل في غصة بقلبهم واكيد ما راح يحبو بعض لانو الضرة مثل ما بحكو مره ……
بس بكفي انو يجمعهم الاحترام المتبادل لحتى يعيشو سوا حياة مستقرة

يتبع