حمامة السلام

الجزء العاشر

دموع حارقة…..وقلوب متعانقة….وعيون متعلقة بعد غياب… صدى كلمات ترددت …وذكريات لعشق ظن انه مات…..ودفن في طيات الذكريات….لتطاير شرارته من جديد بعد اول لقاء….
لا تعلم معنى العشق ان لم تكن….ترى العشاق يغيبون في هيام…..فلهيب الحب ان صدر…..لن تستطيع ايقاف امتداده الجدران…..
حاضنته بقوة وكإنه رجع الشخص اللي فيها ترمي حملها عليه بدون خوف…ما اختفت ضحكته ابدا….وزادت بس شاف الكل عندها والكل صافن مين هاد…..
ناس عرفته وناس سكنت بعد طلعته فكان الشخص الغريب بالنسبة الهم

ام جابر: الغالي ابن الغالية رجع يا ابو جابر
ابن الغوالي رجع
فادي: رب لا يحرمني منكم ويخليلي اياكم يا الغالية

تركها حاضنتو وماسك ايده بايد ابو جابر
وكانه بحكيلو لو كل العالم خذلتك انا بترك كل شي وبرجعلك وبكون متل السيف بضهرك اخباركم كان توصلني اول بإول

تركتو ام جابر يسلم عالكل وابتسم وقلبت ع ضحك بس شاف وجه سعيد
فادي: شكلو في حدا عامل فيك معروف وخلاك تعمل عملية لوجهك
سعيد: هيك يا خاين فايت وبتضحك بعد غيبتك كل هالسنين تعال يا صاحبي تعال

من حزن لجو فرح وضحك وبعتت ام جابر احمد يجيب حلو من فرحتها برجعتو
وقعدت جمبو ومنعت اي حدا يقرب منه
كانت ماسكه فيه وخايفه يهرب منها
او يفكر يغيب عن عينها
__________________________________________
كانو بنات ابو نغم قاعدين بس سمعو صوت الزغاريد طالعة من بيت ام جابر ..والرجال كلها مبسوطة وبتضحك
دخل ابو نغم وهو مرتاح وكانه كل المشكلة اللي صارت انحلت
قعد جمب مرتو واجت زهور وقعدت جمبه وهي خايفة بس الفضول غلب خوفها
زهور: بابا… مين هاد الشب اللي اجا؟
ابو نغم: وانت وين شفتيه
زهور: كنت.. كنت عم كب الزباله وقت وقف التاكسي ونزل منه والله ما حكيت معه ولا قربت عليه بس لمحته من بعيد
ضحك ع برائتها وحاول يضل عند وعده وما يصرخ عليها، دخلت نغم ونعمة وكانو بتناقشو بموضوع واندمج معهم ونسي اصلا زهور عن مين كانت بتسالو

وببيت ام جابر كانت قاعدة وهو نايم ع رجلها
كل شوي يتطلع ع ابو جابر اللي مبتسم وفرحان برجعته وام جابر اللي بتحاول تداري زعلها بس اللي بحب بعرف شو اللي بحس فيه
قام زبط قعدتو واطلع فيهم التنين
فادي: من اول ما دخلت حسيت فيه مشكلة واقعين فيها، خالتي شو فيه
دارت ام جابر دمعتها، واطلعت عليه وهي بتجبر حالها تضحك
ام جابر: تزكرت الغالية الله يرحمها، راحت وماتت بحسرتها
فادي: خالتي مو عليّ، بعرفك من نظرة عينك نجوى بعمرها ما بتعرف تخبي زعلها علي والا شو
ام جابر: الله يرضى عليك وجعي كبير يا ابني قهروني ودايقوني حرموني لمتهم واخر شي جايين يحكولي بدنا بيتك نبيعه لنعيش نسوانا وانت معلش انحرقو وموتو

فهم فادي عليها وما قدر يشوفها مكسورة قام على المطبخ ليشرب مي وهناك لاقى الورقة اللي كانت راميتها ام جابر لحتى ما تنزع فرحتهم برجعته
بس شاف اللي فيها طلع من المطبخ وهو بيطلع عليهم
فادي: شو هاد!!
ام جابر: شفتها
فادي: وصلت فيهم لهون وصلت فيهم بدهم يقعدو عندكم او يرموكم بمأوى ….الله اكبر عليهم هدول كيف بفكرو!!!!
كل هالقد هان عليهم
ام جابر: ولا تاكل هم ولا تفكر بشي فوت انت ارتاح جوا والصباح رباح يا عمري انت
فادي: ماشي بس بدي اطلع جيب كم شغلة وبرجع

طلع وهو مقهور لعند سعيد دق عليه الباب ونزل وقف بحديقة العمارة وهو بحاول يضل رايق ليفهم كل شي من سعيد
لمح طيف بنت خلته يتوه بين ذكرياته… ويبتسم بسمه حزن لحبه القديم اللي ضاع ….وضاع بين زكرياته

فلاش باك
– لو تعرفي قديش بحبك
– مو قدي يا فادي، مو قدي بس انت شايف اهلي كيف بفكرو
– يا ريت لو فيي اخطفك وخبيكي بين ضلوعي ولا خلي شخص واحد يطلع عليكي
– كل هالقد
– واكتر…. بستنى اللحظة اللي نلتم فيها استني….حكيت لخالتي ام جابر ووعدتني تساعدني
– يا ريت فيها تساعدنا يا ريت

****
طلع من ذكرياته لما شاف البنت حقيقة قدامه وبتركض لجوا بيت ابو نغم
فادي: معقول… تكون نعمة …..انتبه لسعيد وهو بقرب عليه
وقعدو وهم بيحكو عن ام جابر والمشكلة اللي صارت معها وبيفهم كل شي صار من وقت اول ارض انباعت لهلا

وببيت ابو نغم دخلت نغم بسرعة ورمت الغسيل عالتخت وهي بتلهث
دخلت نعمة و شافت وجهها الاحمر وخجلها الواضح
نعمة: شو في ليش هيك وجههك
نغم:…
نعمة: نغم
نغم: شوفي عمتي
نعمة: عم احكي معك شو قصتك
نغم: شفت شب واقف برة بالحديقة وو.. وكان بيطلع علي بطريقة غريبه
مع انه واقف بالعتمة بس لمعة عيونو بتسحر يا عمتي، بس شفت جارنا سعيد نازل دخلت ركض عالبيت

ابتسمت نعمة ع بنت اخوها وتزكرت المشاعر اللي تحركت مرة لشخص واحد بس بعد زواجها غاب
نعمة: قومي قومي قال عيونو بتسحر وبنص الليل
شكلها عيون بومة
نغم: عم تتمسخري عليّ
نعمة: لا بس انتبهي لابوكي يسمعك وحملة السماح اللي هو فيها هلأ ترجع لغضب وقسوة تحركي قدامي

حب قديم راح يرجع ….. بس في مشاعر جديدة عم تنعاش….ممكن هالشي يأثر

يتبع