مسلسل سعاده كاذبه
الحلقه 23نا ؛؛ تصبح علي خير
وبرمت وجي وعطيته ظهري ورقدت بس كانت حاجه خنقتني في صدريوسمعت مراد ولع الدخان وكمله ورقد ونا برمت وجي وقعدت انحبت فيه طول الليل انشوف فيه كيف شكله حلو ولحيته زايدته حلوه
وجعتني يوم اللي ازوجت ازوجت واحد ايحب انسانه تانيه ومش ناسيه ولما سالتها عليهاحكلي عليها وكأنه مازال ايحبه موت ونا كاني صديقته لا مرات ولا شيء
بكيت نين دخت
ووعيت تاني يوم علي صوت مراد وهو يحكي علي فون في الصاله
مراد ؛؛ الو ايوه تسمعي فيا
ها شن صار عندك
انا انصدمت وصبيت ابسرعه وطلعت والقيت مراد قاعد في الصاله يحكي
مراد ؛؛ بحت فيا بالاستغراب
باهي ديري تحاليل يوم يطلع في او ما فيش تعالي اليوم في العياده بس تعالي بدري لاني ح نطلع بدري اليوم
وان شاء الله لاباس عليك سلام
وصكر مراد وبحت فيا من فوق لتحت
مراد ؛؛ صباح الخير
نا ؛؛ من مع تحكي
مراد ؛؛ صباح الخير نا قالت
نا ؛؛ صباح النور
مراد ؛؛ جا وقرب مني
ايه نا نحبش حد يسالني مع من تحكي او وين طالع او مع من
نا ؛ انحرجت منه
ومشيت وسيبته وخشيت لدار وعزقت روحي علي السرير
تميت نبكي بدون صوت خفت ايكون يحكي مع طالقيته او مع وحده تانيه
حسيت بحاجه خنقتني وحسيت بخوف
وخش عليا مراد
مراد ؛؛ ايه لما نحكي معاك معش اتسيبيني واتعدي
نا ؛؛ ما بيتش انعبره وقعدت غامه راسي اخر
مراد ؛؛ ايه نا نحكي معاك
وما بيتش انرد عليه خفت انرد ويلاحظ ان نا نبكي
مراد ؛؛ بصوت عالي
ااااايه ردي نا مش كلب ردي عليا
نا ؛؛ ساكته ومسحت دموعي من تحت البطنيه وصبيت وامنزله راسي مانبيش ايشوفني
ونا نمشي مسكني مراد من يدي
مراد ؛ راقيله
كنك مااتردي عليا
نا ؛؛ ساكته ومابيتش انعبره
مراد ؛؛ كنك انتي عايشه بمزاجك يوم تحكي معي يوم ما تحكيش يوم تبيني ويوم ما تبنيش نا مش بمزاجك يا ابله افطني لروحك راه نا صابر عليك واجد وانت شيء مش امدوره ومش امعدله وكأنه ماعندكش راجل بكل
نا ؛؛ قعدت نبكي ومنهاره
مراد ؛؛ عزقني علي السرير
اقعدي هنا مانبيش منك حاجه خليك هنا نين تشوفي المعامله السمحه شن شكلها قاعد بمزاجك نا يوم تبي ويوم ماتبيش صاح
وطلع وخبط الباب بقوه وسمعته صكر الباب بالمفتاح
ونا قعدت نبكي وخايفه والله حسيت بنار من امس من لما حكلي علي طالقيته واليوم من الصبح نوعي نسمعه يحكي مع مراه ويبني عادي انكون والله حسيت بنار فيا راه في نهايه هو راجلي اللي امس راقده علي صدره وفيه حاجه شدتني شوره
بكيت وبعدها صبيت ادوشت وتوضيت ولابست اسرتش رصاصي وعليه بدي اصفر ولابست محرمة الصلاه وصليت الصبح
ولميت الدار وطلعت للمطبخ وطلعت الحم وحطيته في مية ساخنه
وبرمت علي المطبخ والشقه وبعدها بديت اندير في الغداء
وحطيت الحم علي النار
وقالت اندير بسبوسه
ودرتها وكملت الغداء وصكرت الشقه وفتحت المكيف وبخرت وقعدت مقعمزه علي روتانا سينما
وعلي ساعه 2 سمعت صوت مفتاح باب الشقه
وخش مراد ولقني قاعده في الممر وانبحت فيه
ماباش ايعبرني ومشي وخش لدار وسكر علي روحه بيش ما انخشش عليه
نا وجعتني المعامله خنقتني العبره ومشيت للمطبخ وولعت علي الغداء انسخن فيه وقعدت انوتي في السفره ودمعتي علي خدي
وكملت حطت الغداء وسمعت باب الحمام وهو طالع مراد منه عرفته كمل ومشيت وشالت السفره في الصاله
وجا مراد للصاله وشافني انحط في السفره
مراد ؛؛ يحكي معي وهو غمتله وامرفع حاجبه
شيلي السفره للمطبخ وخشي لدار ما نبيش انشوفك
نا ؛ بحتت فيه ومنصدمه واعيوني ملينات ادموع
هذا غداء تغداء
مراد ؛؛ نا من الصبح قالتلك مانبيش حاجه منك نا مش قاعد علي مزاجك امس جيتني ومتقرب مني وفجاء برمتي خلقتك ورقدتي وخليتني واليوم في الصبح حتي صباح الخير ما اتردي عليا ونحكي معاك ما تبيش اتردي وتو دايره غداء وتبيني انتغداء لا لا يا ابله صبي شيلي سفرتك ومانبيش انحق خلقتك قدامي خشيييييييييييييييي
نا ؛؛ مراد انت اسمعني بس
مراد ؛؛ بصوت عالي
نا قالت خشييييييييي راه مازالت ما شفتي وجي التاني
وخذيت السفره ومشيت شلتها للمطبخ ورديت الحاجات وطلعت وللقيته ايصلي ومشيت ابسرعه شور الدار وتميت نبكي ومنهاره
وهو سمعت ولع Tv وبعد بنص ساعه طلعت والقيته راقد جبتله فوطه وحطيتها عليه و وطيت صوت ومشيت لدار وقعدت نين اذن العصر صبيا توضيت وصليت العصر وبعدها سمعت صوت فون مراد ايرن
مراد ؛؛ ايوه ها امي
عمتي ؛؛ خير يا مراد كيف حالك
مراد ؛؛ اكويس الحمدالله ها شن اخبار البحر عندكم وشن جو لمار وحمادي
عمتي ؛ قاعدين يلعبو مراد تعال اليوم خميس وبكره جمعه تعال وبات تعال غير جوك وانت ديمه من عياده لعياده
مراد ؛؛ مش فاضي ياامي
عمتي ؛؛ بكره جمعه تعال حتي علي المغرب وبات الجمعه راحه عاد
مراد ؛؛ باهي تو انشوف
عمتي ؛؛ اصلا نا قالت نبي مشيت بحر وما نبيش حد فيكم ايغيب بس انت ديمه هكي
مراد ؛؛ خلاص ياامي تو انشوف ممكن بعد العياده تو انجي
عمتي ؛؛ راه اتبات نرجا فيك
مراد ؛؛ حاضر
وصكر مراد وخش لحمام وتوضا وصلي العصر وخش عليا في الدار وما بش ايبحت فيا وفتح الدولاب وطلع دبشه
وطلع وغير دبشه وبعدها خش عليا وحط ادبشه علي السرير
مراد ؛؛ بيش اتوتي روحك بعد ما انروح تو نمشو للبحر راه بايتن بيش اتوتي دبش لليل
نا ؛؛بالاستغراب
بحر
مراد ؛؛ اها بحر كيف ماتبيش
نا ؛؛ به حاضر تو انوتي روحي
وتميت انبحت فيه وهو يمشط في شعره وايمشي فيه لاوراه
وكمل وحط عطر وطلع بدون ما يحكي معي ولا كلمه
ونا صبيت وتيت شنطه حطيت توته لروحي ولابسه ومنشف ومنظافاتي وحطيتله حتي هو حطيتله توته ومنشف ومنظافاته وشفت في الدولاب والقيت عنده شرت بحر وشرت عند الركبه امريكي وحطيتله عليها تيشرت ابيض
ومشيت وشفت المطبخ طلعت طاجين بسبوسه وتيته
ومشيت وتيت روحي بشويه بشويه ولابست جنيز بيج وابلوزه كحلي فيها دوائر بيج وطلعت كندره
امخططه وردي علي بيج علي ازرق وطلعت وشاح وردي وشنطه بيج
ودرت كيك خفيف رسم عين من فوق بس ودرت قلم ازرق وروج بسيط وردي وحطيت عطر وقعمزت وبعد نص ساعه خش عليا مراد
مراد ؛؛ ها وتيتي روحك
نا ؛ اها وتيت
مراد ؛؛ عندي شرت بحر ازرق طلعتيه ليا
نا ؛ اهو تعال شوف القيت واحد اخضر
مراد ؛؛ وينه
وخش وراي وطلعته له من الشنطه
مراد ؛؛ ﻻﻻ هذا اقصير واجد سامط
في واحد ازرق طويل اشويه عند الركبه
نا ؛؛ وين قاعد
مراد ؛؛ شوفيه في الدرج الاخير كذا
وفتحت الدرح والقيت شورتين ازرق و بيج طلعتهن وحطيتله غيرات
مراد ؛؛ هاتي البيج نبي نلابس تو
ومديته له وخذيت الشنطه وطلعت
وبعدها هو طلع عليا
مراد ؛؛ هيا امي امبدري واترن
نا ؛ هيا هيا
وخشيت للدار ولابست العبايه والخمار ومراد امصبي علي الباب و ايبحت فيا
مراد ؛؛ تو الخمار تبي تقعدي به علي البحر
نا ؛ بحتت فيه
عليك انت تبيني انحوله علي البحر انحوله براحتك
مراد ؛؛ ﻻﻻ حوليه من تو ما شور شيء لابسته
نا ؛؛ به حاضر
وحولت الخمار وبحتت فيه
مراد انحول العبايه بالمره لان والله لابستي مستوره شوفه هه عند الركبه
مراد ؛؛ كذا
وبحت فيا
به حوليها وهيا اطلعي ابسرعه
ونا فرحت وحولت العبايه وطلعت وخذيت طاجين البسبوسه
ونزلت وراء مراد
وركبت معه في السياره
وهو لابس نظارته وبحتت فيه وكان طالع ايجن لان اول مره انشوف هكي لابس كجول وطالع وكأنه شاب اصغير
وهو ولع الدخان
مراد ؛؛ تبي حاجه نبي انتكي علي المحل
نا ؛ لا سلامتك
مراد ؛؛ نبي ناخذ مكسرات وشكولاطات وعصير
نا ؛؛ به تمام هكي
ونزل مراد لمحل وخذا اكياس اكياس من ليزا ومكسرات وشكولاطات وعصائر وفواكه
وحطنه وركب
ومشينا وكان طول الطريق وهو ساكت ونا انبحت فيه كان انه طالع ايجنن وايهبل
مراد ؛؛ برم وجه وبحت فيا
ولقني مبتسمه
ورد بحت في الطريق وهو ساكت
ووصلنا للمكان ونزل مراد ونزلت نا معه وهو تم اينزل في الاكياس وجيته نا بيش انساعده
مراد ؛؛ انتي خوذي شنطتك بس
نا ؛؛ به
وخذيت شنطتي وهو شال الاكياس
مراد ؛؛ اووووو نسيت بكل
ايه تعالي طلعي مفتاح السياره من جيبي وسكريها
نا ؛ به
وجيته وقربت منه وانحس في رعشه في يدي وماحوتني خششت يدي في جيبه وطلعت المفتاح
مراد ؛؛ زري البطمه التانيه
نا ؛ هذه به
وزريتها وسكرتها
وقربت منه بيش انرد المفتاح في جيبه
مراد ؛؛ خليهن في شنطتك وهيا
ومشي ونا مشيت وراه
وجينا علي الشط وتمينا انبحتو واندورو فيهم
ومراد يمشي قدامي بمسافه بعيد اشويه
ونا نمشي وانبحت في البحر لان ليا زمان عليه بكل
نمشي وانبحت في الشط وبدون ما انحس بروحي خبطت في واحد
نا ؛؛ ارتبكت وبحتت فيه
ونزلت راسي
اسفه اسفه
الشاب؛ خوذي راحتك كان تبي تخبطي اخر ما يهمك شيء
وبرم مراد وشافني كيف امصبيه وامنزله راسي وانحاول انسيب الشاب وهو قاعد قدامي
واول ما جت عيني في عينه
نا ؛ مراد اصبر
وجا مراد ؛؛ نعم في حاجه
الشاب ؛ اسفين يا استاذ
مراد ؛؛ اقلب خلقتك احسنلك
الشاب ؛ ماحد جا شورك وسع بالك
مراد ؛؛ باهي هيا تحرك من قدامي
وجيته ابسرعه ومسكت في يده وشاب بحت فينا وعدا
مراد ،؛ هذه من الابتسامات اللي من امبدري اتوزعي فيهن وحرك يده بقوه وحولها من يدي
امشي قدامي
نا ابتعدت منه ومشيت قدامه
وجانا طارق يجري
طارق ؛؛ كنك يا مراد شفتك تحكي مع الشاب هذا شن اينابش
مراد ؛ لا خلاص فوته ومدله الاكياس وشالهن معه
وينهم هلك
طارق ؛؛ اهو اقريب
شن الاخبار يا ايه
نا ؛؛ بحتت فيه
تمام الحمدالله شن اخبارك انت
طارق ؛؛ اهو حال البحر
ووصلنهم وجتنا لمار تجري
لمار ؛ بابا وجاته تجري واضبطاته وهو شاله
مراد ؛؛ نعم يااعيون بابا انتي شن اتعومي قاعده
لمار ؛؛ من امس يا بابا
وسلمنا عليهم
وحمادي تم ايصفق وايقول ايييي
فرح علشان شاف مراد
وجاه مراد ونزل لمار ومسك حمادي
عمتي ؛؛ سبحان الله من امس معانا ما شفنا فرحتهم الا تو لما جا باتهم
هدي ؛؛ حتي هو باتهم تعالي يا ايه قعمزي
وجيت وقعمزت وانبحت في مراد وحمادي
حمادي كر نظارت مراد
مراد ؛ ﻻﻻ خليهم يا بابا نبيهن
وجا عمي
عمي ؛؛ اهلا وسهلا
وصبا مراد وسلم علي عمي ونا جيته وسلمت عليه
عمي ؛؛ عارف كان ما جيتش اليوم كنت عابي انجيبكم بقوه شن لعند امتي وانت من عياده لعياده راه مش هكي الحياه
مراد ؛؛ والله يا باتي هذا وين بديت كنت واخذ اجازه الاسبوع اللي فات
عمي ؛ وشن درت بها الاجازه كنت محبوس في الشقه
مراد ؛؛ اهو جيت
الهام ؛؛ مراد انصبلك قهوه
مراد ؛؛ ياريت والله
كيف وين عيت منتصر
عمتي ؛؛ امبدري وهم في البحر
ومدتله الهام القهوه ومدتلي حتي نا
الهام ؛؛ دايره بسبوسه
نا؛ ؛ اها درتها امبدري علي الغداء
هدي ؛؛ مديلي طرف بعدك اتجنن بسبوستها
الهام ؛؛ خوذي يا حنه
انمدلك طرف يا مراد
وبحتت فيه ونرجا في الرد امتعه وهو بحت فيا
مراد ؛؛ ﻻﻻ شكرا
اوووو ديمه قهوتك مزبوطه يا الهام
الهام ؛؛ ههههه عارف هذا المطلوب
وجتنا هاجر تجري وراها حاتم وطارق
وجت وراء عمي
هاجر ؛؛ بابا يا بابا قوللهم يبو ايغرقوني
طارق ؛؛ ازي تتفق عليا هي وحاتم ويمسكوني جوا والله تو انردها
حاتم ؛؛ تحشم لما شافني
مراد شن الاخبار امتي جيت
مراد ؛؛ تو جيت
الهام ؛؛ حاتم بحت في رتاج شوفها
حاتم ؛؛ برم وجه ولقها ماسكه في لمار واتكر فيها
رتاج بطلي سيبي لمار
رتاج ؛؛ يا بابا امبدري وهي ادف فيا في البحر
حاتم ؛؛ وانتي بختك بالهون ديمه كبسينك انتي
الهام ؛؛ هههههههههه ما من اهبالها
عمتي ؛؛ لمار ديمه هكي من تحت لتحت
عمي ؛؛ هههههههههه كيف باتها ديمه ايدير اللي يبيها وبدون ما حد ايحقه وبعدين نكتشفو ان هو اللي غالط
حاتم ؛ اوووو مصايب مراد زمان ديمه نزرط فيهن نا تذكرهن يا مراد
مراد ؛؛ هههههههههه واهو بنتك طالعتلك
عمتي ؛؛ سبحان الله شيطانتك زمان كيف انقلبت لما اكبرت
نا ؛؛ ابتسمت وبحتت فيه والقيته يضحك
حاتم ؛؛ هيا انخشو يا مراد
مراد ؛؛ هيا
وصبا مراد وهو حول النظاره وبحت فيا بيش انصبيله
صبيت وجيته وهو ابتعد منهم اشويه ومدلي نظارته ودخانه و فونه وفتح سوريته
ومدهن ليا
مراد ؛؛ حطينه في الشنطه
نا ؛؛ به حاضر
وخذيتهن منه وحطيتهن في شنطتي وهو خش للبحر وجاته لمار تجري وراه
مراد ؛؛ لمار خليكي هنا علي الشط نا نبي انخش جوا
لمار ؛؛ ﻻ يا بابا نبي انخش وراك
وخشو حاتم ومراد جو
هدي ؛؛ ماشاء الله عيت منتصر امبدري وهم ايعمو
عمي ؛؛ نقاني نا نبي انخش انشوف الاخبار تو انجيكم
هاجر ؛؛ هيا هدي انخشو
هدي ؛ انخشو بس طارق هذا فكينا منه
الهام ؛؛ نقاني حتي نا نبي انخش بدال حاتم جو تو يطلع ومعش ايخش معايا بعدين
هاجر ؛؛ هيا ايه معانا
نا ؛ ﻻﻻ فكينا نبيش انخش
عمتي ؛؛ خلاص خلوها اوحدها عدن خشن انتن
وصبنا هنا وخشن للبحر ونا قعدت انبحت فيهن وبعدها شفت حمادي كيف يلعب علي البحر وكل مايشوف المية جايته يمشي يهرب منها
صبيتله وحولت كندرتي وجيت شوره وقعدت انلعب فيه علي الشط وانشوف في مراد كيف ايعوم وبعدها شفت غاده ومنتصر كيف عايشين حياتهم وبعدها حاتم مشي شور الهام وقعد معها
وانبحت فيهم وسرحانه فيهم
وبدون مانحس القيت هاجر اتكر فيا وطارق ايدف فيا
نا ؛؛ ﻻﻻﻻﻻ وووووو ﻻﻻﻻ حرام عليكم نعرفش والله نعرفش
طارق ؛؛ تو خشي قدامي
نا ؛؛ انعيط بصوت عالي
مراااااد
وكرتني هاجر جو نين جت موجه قويه بكل
وطارق زقبني بقوه وانا طحت جو في موجه قويه ومعش عرفت مااندير قعدت انعيط
مرااااد
طارق ؛؛ هههههه خوافه اني ماسكك نا خلاص
نا ؛ نا قعدت نبكي
وجتني هاجر من لوطه من عند اكرعي وكرتني ونا خشيت لوطه
حاتم ؛؛ مراد مراد شوف ايه امكسدين عليها طارق وهاجر
مراد ؛ برم وجه ولاقهم ايكرو فيا
ونا انعيط واناديله
وجاني ابسرعه
مراد ؛ طارق سيبها خلاص
ولما قرب مني مراد مسكت في ارقبته وتميت نبكي
مراد ؛ معقوله هكي يا طارق تو اتشوف هالحركه السامطه اللي ديمه ادير فيها
وبحت فيا ولاقني امشعبطه في ارقبته بقوه ونبكي
مراد ؛؛ اس خلاس بلا خوف قاعد ماسك فيك نا
نا ؛ طلعني نبيش نقعد هنا امبدري ونا انعيطلك
مراد ؛ والله ما سمعتك خلاص يبحتو فيك الناس وانتي اتعيطي وامشعبط فيا هكي
نا ؛ طلعني تو انحول
وجتنا موجه كبيره وخش بيا مراد لوطه تحت
ونا مسكت فيه بقوه
طلعني طلعني تو خلاص
مراد ؛؛ به هيا وطلعني وحطني علي الشط
ونا مشيت شور الكرسي وقعمزت وهو خش اخر ونا تميت نبكي وبحتت في ايديا ومالقيتش دبلتي
انفجعت ومعش عرفته ما نحكي وخفت من عمتي سكتت وعرفتها راحت مني في البحر
ﻻني كنت لابستها لما خشيت
عمتي ؛؛ كنك انتي ما تعرفيش اتعومي
نا ؛؛ ﻻﻻ نعرفش
وجتنا غاده ومنتصر
غاده ؛ خير ياايه
نا ؛ خيرات وصبيت وسلمت عليها وسلمت علي منتصر
غاده ؛؛ نبي نمشي ندوش خلاص ظلمت الدنيا
وطلعت هدي ومعها لمار
هدي ؛؛ تو نمشي انديرلها حمام هي وحمادي
ماما ؛ خليهم تو اديرلهم ايه
نا ؛؛ صبيت خليهم تو ناخذهم
هدي ؛ ﻻﻻ تو انديرلهم علي السريع انتي خليكي هنا راه مراد ايطول في الليل ايعوم
وكلهم اطلعو عدو للشاليه وايدرو في الحمامات ونا قعدت نرجا في مراد يطلع وقعدت نبكي علي دبلتي اللي راحت
وبعد ما الدنيا ظلمت برسمي
طلع مراد ولاقني امقعمزه علي الكرسي
مراد ؛؛ كنك هنا اوحدك
نا ؛ رفعت راسي
نرجا فيك
مراد ؛؛ اكيده ادعاك علي الحمامات خليهم ايديرو علي رحتهم وقعمز علي كرسي
ونا طلعتله منشف بيش يمسح فيه
مراد؛؛ مديلي دخاني
نا ؛؛ في شنطتي الي احذاك
وبرم مراد شور الشنطه وفتحها وطلع الدخان منها وبدا ايدخن و بحت فيا
ولاقني نبكي
مراد ؛؛ كنك شن في
نا ؛ ﻻ شيء
مراد ؛؛ كيف تو جايتك حالة البكاء ولا شنو
نا ؛؛ بحتت فيه ومسكت يدي
دبلتي راحت في البحر امبدري لانها واسعه وجت موجه قويه
مراد ؛؛ شن هي مهمه عندك كيف وجدها كيف قلتها
نا؛ ؛ بحتت فيه
هي غاليه وكبيره وما عنديش غيرها وقعدت نبكي
وجتنا هدي وفي يدها حمادي
هدي ؛؛ مراد راه الحمام فاضي كان تبي الحمام وقالكم بابا تعالو لان بدا في الشويات
مراد ؛؛ هيا اني جيت
وصب مراد ونا صبيت وراه وخذيت شنطتي
ومشينا شور للشاليه
هو كان حوش كبير وحلو بانيه واحد وايجار فيه مش شابيه بسيط وعيت عمي ديمه ايجارو فيه
مراد ؛؛ ايه خشي ديري حمام انتي قبل بيش اتويتلي دبشي لما نطلع
نا ؛؛ به حاضر
وخذيت دبشي وخشيت لحمام ودرت دوش ولابست تيشرت وجينز
وخشيت عليه ابسرعه في الدار
مراد ؛ كنك تجري
نا ؛؛ لابستي اقصيره خفت حد ايشوفني
وقعمزت وبديت نمشط في شعري
مراد ؛؛ وتيلي دبشي هنا نا ماانحبش نلابس في الحمام وخليكي هنا بيش لما اناديلك اتردي عليا
نا ؛؛ به نرجا فيك
وخش مراد ونا كملت مشطت شعري وخليته مطلوق وطلعتله دبشه
وبحتت في التيشرت وبديت انحول فيه بيش نلابس ابلوزه
ونا حولته وايخش عليا مراد وهو لابس ديشنبر وشافني
ونزل راسه لوطه ونا لابست ابلوز ابسرعه وطلعت ابسرعه وقعدت قدام الباب نين هو كمل لابسه وفتح الباب
مراد ؛ كنك هنا
نا ؛؛ نبي انحط وشاح علي راسي
مراد ؛؛ خشي هيا
وخشيت وخذيت مساكه ولميت بها شعري وحطيت وشاح
وطلعت والقيتهم كلهم امقعمزين وعمي و حاتم قاعدين علي كانون
طارق ؛ اوووو الخوافه جت
غاده ؛؛ هههههههعهه من شن خايفه
طارق ؛؛ امبدري خشت للبحر اقعدت تبكي
غاده ؛؛ بالكي مش متعود عليه مشي البحر
هدي ؛؛ اتخاف منه بس
وقعمزت جنب هدي
نا ؛ هدي وين حمادي
هدي ؛؛ رقد وحطيته جو خلاص المسكين تاعب من الصبح وهو يلعب
وبحتت في مراد والقيته امقعمز لمار علي اكراعه ويحكي في وذنها
لمار ؛؛ بابا نبي شكولاطه
مراد ؛؛ في جو تلقي جيبي لروحك و رتاج
لمار ؛؛ ﻻﻻ رتاج ﻻﻻﻻﻻ
مراد ؛ هههه عيب يا بابا المكر عدي جيبي لروحك و رتاج معاك
وصبت لمار وجابت شكولاطات
وهم حطو العشاء سفرتين للرجاله ولنا
وكان اشويات وشرموله مشويه
الهام ؛؛ كولي يا ايه عليش الحشم
نا ؛؛ اهو قاعده ناكل
وبرم مراد شوري ولاقي قدامي لحم
ونا ماناكلش فيه ولاحظ ان نا ناكل في الشرموله
وهو صب وجابلي دجاجه وحول من قدامي الحم
عمتي ؛؛ مراد خلي المراه تاكل الحم كنك خذيته
مراد ؛؛ ماتاكلش في الحم نا عارفها
عمتي ؛؛ بحتت فيا واتفنص
نا ؛؛ اها اعميمه ما ناكلش فيه
طارق ؛؛ والله عليك مكسب يا مراد جايب وحده اللحم ماتاكل فيه يعني تبيش صرف واجد
مراد ؛؛ ههههههههههه
طارق ؛؛ قالك الاخرات ياكلن في الخضر واليباس
غاده ؛؛ قول اصحيحه يا طارق
طارق ؛؛ نا كان اتجيني مراه لا تاكل في اللحم والدجاح بكل احسنلي
مراد ؛؛ هههه تي اتجيك تشرط
عمتي ؛؛ كيف تاكلش في الحم وهذاك اليوم كلايتي عندنا الحم
نا ؛؛ ناكل فيه علي امبوخ بس لكن مشوي مانحبش انحس فيه سامط و واعر وقوي
عمتي ؛؛ اها بنات اخر زمن
وكملنا العشاء وصبينا ولمينا الحوسه
نا وهدي وهاجر
وغاده ومنتصر عدو ادهور مع بعضهم وعدت الهام وحاتم وعمب خش رقد وطترق حتي هو عدا ادهور وبدا ايشلط علي الفون
هدي ؛؛ خلاص ويه اطلعي كملنا
نا ؛؛ به ربي يعطيكن الصحه
هدي؛ ؛ سلمك
وطلعت وجيت عند الباب سمعت عمتي
عمتي ؛؛ مراد بلا تدليع المراه واجد راع ادلعها وبعدها اتجي علي راسك
كيف المراه اللي فاتت دلعتها نين اركبت فيك بالطالبات وباريت اتخار موضوع الحمل اشويه وخليها بيش تمسكلك عويلك واتربيهم راه كان حطت عيل في بطنها تنساهم بكل عويلك وتقعد اتعاني في مشكله هذه راه مراة الاب ما عمرها اقعدت حنون راه اللي ادير فيه كله تزيف بيش اتوثق روحها راه اطروح الصبايا نعرفهن
وشفتني هدي ونا نسمع في الكلام وخنقتني العبره لان كلام عمتي واعر واللي قهرني ان مراد ساكت ويسمع فيها وكأنه موافق
هدي ؛؛ هيا ويه كنك امصبيه هنا
نا ؛؛ ﻻ اطلعي انتي نا تو نقعد هنا
هدي ؛؛ امغير هيا بيش تطلعي تدهوري مع راجلك
وطلعت وطلعتني وجت عيني في عين مراد
هدي ؛؛ هيا لمار اتخش ترقدي جوا
لمار ؛؛ ﻻﻻ نبي نرقد مع بابا
هدي ؛؛ هيا بابا يبي يسهر
لمار ؛؛ نا وبابا نرقدو هنا في الدار هذه
هدي ؛؛ وايه وحمادي وين ايرقدو
لمار ؛؛ اعميمه ترقد بروحه اصلا هي ديمه ترقد في الدار اوحدها
عمتي ؛؛ هيييييي وحطت يدها على فمها
نا ؛؛ انحرجت ومشيت ابسرعه من قدامهم
ومراد ضرب لمار كف وخششها بقوه لدار وخلها ترقد وهو خش وقعد في الدار
هدي لحقتني ولقتني نبكي وراء الشاليه
هدي ؛؛ ايه حبيبتي عليش البكاء عادي ناس واجد هكي طولو بحكم انهم يبو ايتعرفو علي بعضهم نا نعرف ناس اقعدو شهر نين هي عرفاته اكويس
مراد قاعد في الدار ويسمع فينا
نا ؛؛ ﻻ مش هكي بس انحرجت من اعميمه بس
وبعدها نا ومراد نرقدو عادي مع بعضنا بس نحن مانبوش هي اتحسس من الموضوع وتفاجا وتلقي مراه تانيه ترقد مع بوها خاطي امها نا مانبيهش تكرهني وتحسبني واخذه مكان امها بس نرقدو لما هي ترقد في دارها
هدي ؛؛ والله عقلك كبير يا ايه وربي ايوفقك ان شاءالله
نا ؛؛ ان شاءالله
مراد ؛؛ قعد يسمع فينا وفرحان لاني مابيتش انوضح للناس ان نحن مش متفهمين مع بعضنا وما نرقدوش مع بعضنا
وقعدنا انهدرزو نا وهدي نين جانا طارق وهو كان يحكي علي فون
هدي ؛؛ ها تحكي مع من
طارق ؛؛ وانتي شن دخلك فيش اديرن هنا
هدي ؛؛ اهو جو انهدرزو
طارق ؛؛ ايه شن جو ياخوافه
نا ؛؛ هههه نقاني انخاف منه البحر
هدي؛ ؛ بكره عيت عمي جاين
طارق ؛؛ اوووو صاح
هدي ؛؛ ههععهههههههه يا عيني علي اساس مش عارف
وطلع علينا مراد وبحت فينا
مراد ؛؛ كنكم هنا
طارق؛ ؛ اسالهن هن كنهن قعدات هنا
هدي ؛؛ انهدرزو اشويه لان باقي العائله كلهم يدهور كل 2 مع بعضهم
طارق ؛؛ غاده ومنتصر امبدري وهم يمشو
ومشي مراد بدون ما يحكي معي ولا كلمه ومشي شور الشط وولع دخانه
هدي ؛؛ ايه عدي شوفي مراد اكيده يبيك
نا؛ ؛ ﻻ كان يبني راه قالها ليا عادي
ونغزتني هدي في جنبي وفنصت فيا نين انا صبيت
طارق ؛؛ وينها هاجر
هدي ؛؛ ارقدت امبدري
طارق ؛ هيا خشي حتي انتي ارقدي
وخشو هدي وطارق
ونا نمشي شور الشط وراء مراد
وقعمز مراد وجيته نا
نا ؛؛ عادي انقعمز
مراد ؛؛ رفع راسه وشافني
ابراحتك
وقعمزت جنبه وتميت انبحت في غاده ومنتصر وهم امقعمزين وخشين في بعضهم وكانهم مسلسل تركي
انبحت فيهم ومنسجمه وسارحه فيهم
مراد ؛ بحت فيا
شن تبي تقعدي ساكته
نا ؛؛منظر البحر ايجننننن وهادي
تعرف ليا زمان ما جيته مع ان غالب عليا
مراد فونك معك
مراد ؛؛ اهو في جيبي عليش
نا ؛؛ نبيه اشويه
وطلعه مراد من جيبه ومده ليا
نا ؛؛ شكرا
وبحتت في البحر وصورته وكان منظره ايجنن
وخشيت علي اغاني عنده
والقيتهن اغنيه محمد فوائد
احضني
ولعتها وتميت انغني معها بصوت واطي
احضنى نفسى اضمك
نفسى اكمل عمرى جمبك
قلبى سامع نبض قلبك هموت عليك
ياللى حبك صحا فيا كل حاجة حلوة فيا
قلبى روحى يانور عنيا انا كلى ليك
نفسى اغمض عينى واحلم ان ايدى بين اديك
واما افتح عينى القى احلى نظرة من عنيك
ياللى وصفك مستحيل كل حاجة لقتها فيك
قلبى قالك انك انت حته منه وروحوا فيك
لو تغيب عن عينه ثانيه هو بس يحس بيك
حتى وانت جنب منى يحضنك من الخوف عليك
وبحت فيا مراد وهو مبتسم
مراد ؛؛ كيف تعرفي اتغني امالاه
نا ؛؛ اتهبل الاغنيه هذه
مراد امتي تبي تشيرلي فون
مراد ؛؛ عليش
نا ؛؛ خاطري انصور فيه
مراد ؛؛ صوري في فوني تو
نا ؛؛ عادي
مراد؛؛ اها عادي شن فيها
وصبيت وصورته هو
نا ؛؛ مراد حول الدخان اشويه بس
مراد ؛؛ هه وحوله وصورته وقعمزت جنبه
نا ؛؛ مراد مازالت زعلان مني
مراد ؛؛ ايه انتي مزاجيه واجد ونا مانحبش الانسان المزجي
وبسببك شفتي شن صار شفتي لمار شن قالت بس نا خذيت قراري لما انروحو عندي موضوع ضروري انديره مش ح انخليك بمزاجك خلاص خليتك واجد هكي
نا ؛؛ قعدت نبكي وصبيت وخليته وخشيت جو مع هدي وقعدت انهدرزو
نين سمعنا باقي العائله خشو
هدي ؛؛ صبي يا حنه وعدي لراجلك
نا ؛؛ تصبحي علي الخير
هدي ؛؛ وانتي من اهله
ومشيت شور دار وفتحتها بشويه والقيت مراد راقد
طلعت وسيبته ومشيت توضيت وصليت الفجر
وشفت منظر البحر ايجنن
طلعت ومشيت شور الشط وقعدت نبكي
وجعتني ان كل مره ايصير بيني وبينه حاجز وامبدري سمعت كلام عمتي ووجعني
وبحتت في صبعي والقيته فاضي مافيش دبله قعدت ماسكه اصبعي ونبكي وجعتني ان حتي ابسط حاجه كانت دليل ان نا مرات مراد راحت حسيت وكانها اشاره ان نا ومراد مشروع زوجنا فاشل واذكرت من لما كنا اصغار معش جينا للبحر من قبل ما نجاح تزوج
اذكرتها وحسيت روحي امرايفه عليها و خاطري اتكون هنا جنبي بحكم انها متزوجه واختي الكبيره تنصحني واتقولي شن اندير مع مراد اللي بديت انحبه وانتعلق به وانحس فيه راجل بمعني كلمه ايغار عليا ولما نبكي نلقي حضنه مكان دفي ومفتوحلي في اي وقت صح هو عصبي بس حنون حنوننننن شفت الحن في اعيونه ايخاف عليا ويبني قريبه منه كحبيبه مش كزوجه وخلاص
ونا نبكي
شميت بنه نعرفها وووووواجد وغاليه عليا وديمه انحب انشمها غمضت اعيوني وتمنيت البنه تقرب مني اخر
وقربت مني اخر ونا برمت وجي و…………….
……………….
يتبع