مسلسل سعاده كاذبه
مسلسل سعاده كاذبه
الحلقه 21
ونا راقده ونتالم بدون ماانحس بروحي كريت يده وخذيتها وحطيتها علي بطني
مراد حس بيا تقرب مني اخر ولفني شوره ورقدني علي صدره
مراد ؛؛ ايه
نا ؛؛ نعم حبيبي
مراد ؛؛ استغرب وقعد ايبحت فيا
وهمس بصوت واطي في وذني
ايه
نا ؛؛ مراد حبيبي نا تعبانه خلاص
مراد ؛؛ عرفني مش بوعي وقربني منه اخره
وبعدها دق الباب انفجعنا نا ومراد ونطينا نط وصب مراد يجري وعد فتح الباب
ولقه منتصر
منتصر ؛؛ مراد نبيك في موضع ضروري
مراد ؛؛ شن في فجعتني كنك
وخش منتصر لمربوعه وخش وراه مراد
مراد ؛: احكي شن في راك فجعتني
منتصر ؛؛ غاده يا مراد مريضه لها كم يوم اتحس بس اليوم قوت معها
ونزل راسه وانحرج من مراد
بس مراد بحكم انه دكتور نساء شاطر فعرف قصد خوه طول
مراد ؛ اها اوكي باهي عارف هذه حاجه ساهله اتصير لاي عروس تو نكتبلك مهرم اديره ونوعيت مطهر معينه اديره وان شاء الله ساهله والله فجعتني يا راجل نحسابها حاجه كبيره
منتصر ؛ سامحني يا مراد اكيد ازعجتك
مراد ؛؛ ﻻ عادي ساهله اشويه بس نكتبلك الدواء
وخش مراد ولقني قاعده في الممر ومنصدمه
مراد ؛؛ ههه انتي ليش اتصبي انتي بروحك مريضه
نا ؛؛ كنه منتصر
مراد ؛؛ شيء ما تنشغليش
وخش لدار ونا لحقته وشفته طلع ورقه وكتب فيها دواء ومشي وعطها لمنتصر وعد منتصر وجا مراد ولقني راقده علي السرير وانبحت فيه
نا ؛؛ مراد كنه منتصر
مراد ؛؛ غاده تعبانه اشويه
نا :؛ كنها شن صارلها
مراد ؛؛ اشويه تعبانه ساهله عادي
نا ؛؛ حسيت روحي تعبانه بكل وقعدت انتعسر ونبكي
وجاني مراد
مراد ؛؛ ايه كنك قوت عليك
نا :؛ ﻻ عادي ديمه هكي نا لما نمرض
مراد ؛؛ قصدك تقعدي تالمي هكي
نا ؛؛ اها
وقعدت انتعسر نين مراد قرب مني وقعد ماسك يدي
مراد؛ ؛ خلاص بلا ابكاء خلاص راه انعدي انجيب ابره
نا ؛؛ ابره ﻻﻻﻻ نبيش ابره عندي نا نقعد انتالم ولا ناخذ الابره
وحطيت المخده علي وجي وقعدت نبكي ومراد رفع المخده وكرني شوره ولفني شوره
مراد ؛؛ يهمس في وذني همس
ايه خلاص راه هذه حاجه طبيعية امغير انتي تدلعي
ونا قعدت نبكي بس لما جيت في حضنه حسيت بامان وحنان وحسيت روحي دفيت وطول رقدت بدون ما انحس بروحي
ووعيت تاني يوم علي مراد وهو ايوعي فيا
نا؛؛ تي هااا تعبانه نا خطاني
مراد ؛؛؛ايه صبي ناخذ منك دم وبعدها ردي ارقدي
نا ؛؛ نطيت مره وحده وبحتت في يد مراد القيته ماسك الابره
هيييييي عليش ابره عليش دمي شن تبي فيه
مراد ؛؛ انديرلك تحاليل اليوم تاني يوم ونبي نطمن
نا ؛؛ﻻﻻ مراد اسفه نبيش اندير تحاليل نا اكويسه ما في شيء
وخشيت تحت الفوطه وغطيت روحي وجاني مراد
مراد ؛؛ ايه صبي خلاص بلا دلع نا ابرتي ساهله هيا راه نا امولع السياره لوطه في الجنان هيا بيش انشيل الدم لتحاليل طول
هيا صبي
وصبيت ومديت يدي لمراد و غمضت اعيوني
مراد ؛؛ هههه خوافه
اووووو لمار وعيتي
نا ؛؛ فتحت اعيوني وبحتت في لمار
لمار تعالي هنا حمادي واعي
وخش مراد ابره في جسمي بدون ماانحسها وسحب دم وصب ونا تفاجت لما شفته صب
نا ؛؛ كملت مراد
مراد ؛؛ اها
نا ؛؛ لمار تعالي اننوه اخره
لمار ؛؛ و حمادي
نا ؛؛ يييييي عليا
و التفت عليا مراد وقعد ايبحت فيا وامرفع حاجبه
نا ؛؛ انحرجت منه وصبيت بشويه بشويه
مراد ؛؛ يحكي وهو غمتله
خليكي تو انجيبه لكي هنا
نا ؛؛ اسفه مراد نا قصدي تعبانه بس وظهري يوجع فيا
وعد مراد بدون ماايبحت فيا او ايعبرني ومشي وجاب حمادي
نا ؛؛ اههه عمالها يا حمادي هبا تو انشيلك لحمام
وجيت نبي انصبي بشويه بشويه وشافني مراد كيف تعبانه ووجي اصفر ومش قادره انشيله
مراد ؛؛ اغسليه بسرعه بيش انزله لامي تو هي اللي اتفطره
نا ؛؛ به
ومشيت لحمام وغسلته ولابسته ولمار حتي هي لابستها وخذهم مراد ونزل بيهم
ونا طول عزقت روحي علي السرير وطول نوم بدون ماانحس بروحي ﻻ فطرت ولاشيء
مراد ؛؛ امي اهم حمادي ولمار فطريهم
عمتي ؛؛ هيييي وين اللي ينقاللها ايه كنها ما فطرتهم ولا بدت اتلز فيهم
مراد ؛؛ ﻻ ياامي بس هي مريضه اشويه
عمتي ؛؛ هيييي بدينا في الدلع من توه من اولها
بدت اتنزل فيهن نا قالت اصل نا قالت انها فرخه ومش ح تمسكهم امغير وافقت علشان تبيك بس
مراد ؛؛ بالله عليك فكيني من الكلام هذا المراه من امس مريضه وفعلا وتو قاعد وجها شابح ويلاه اقدرت اتصبي اتغيرلهم
عمتي ؛؛ باهي باهي اربح تو
ومشي مراد واقعدت عمتي منقهره علي نزلت العويل
عمتي :؛ لمار تعالي هنا صاح ايه مريضه
لمار ؛؛ بابا اليوم درلها ابره تو
عمتي ؛ هيييييي ان شاءالله حامل طيح سعدي هذه من اولها تبي تحمل
وجتها هدي
هدي ؛؛ كنك ياامي حارقه دمك من الصبح
عمتي؛ حي عليا نا
هدي ؛ تي كنك ياامي
عمتي ؛؛ الفرخه اللي فوق شكلها حامل نزل العويل وقالي مريضه ولمار قالت درلها دم ابره يعني درلها تحاليل واكيده حامل
هدي ؛؛ هيييي امي كنك انتي راهم اسبوع بس متزوجني مالهش احملت وشالت كنك انتي ركزي
عمتي ؛؛ هيييي والله صدقتي به كنها مريضه فيش اتحس
هدي ؛؛ ونا شن عرفني اتحقي فيا قاعده عندها
عمتي ؛؛ باهي هيا صبي وبلا امقاطعه وصبي ديري لعيال خوك فطور
وصبت هدي ودارت حوستها ووعت ريما وساعدتها
وبعد كم ساعه اوعيت علي صوت تسكيرت باب الشقه
وماقدرتش انصبي
مراد ؛؛؛ ايه ايه
نا ؛؛ بصوت واطي وتنبال
نعم هنا انا
وجاني مراد وخش عليا في الدار ولاقني طايحه وراقده
مراد ؛؛ ايه كنك مازالتي مريضه
نا ؛ ماتولعش الضيء خليه طافي
مراد ؛؛ استغرب كلامي و جاني وقعمز علي السرير
ايه انتي ديمه هكي معقوله
نا ؛ امسقعه بكل وراسي امصدع بكل
قرب مني مراد وحط يده علي راسي ولقني عندي الحراره
مراد ؛؛ اوووو حراره انتي اساس مريضه كنك ساكته علي روحك ليش ماقلتيها ليا في الصبح
نا؛؛ ساكته وقاعده طايحه وخلاص
مراد ؛؛ ايه تو انجي
وطلع مراد ونا انبحت فيه انحق فيه اثنين احسبت روحي انحولت غمضت اعيوني طول
وبعد بربع ساعه جاني مراد
وخش عليا طول للدار
مراد ؛؛ ايه فطرتي انتي
نا ؛؛ ﻻﻻ نبيش عنديش نيه
لاني رجعت الصبح
مراد ؛؛ انتي عندك برد وضروري نعطيك الابره هذه
نا ؛ شن ابره ﻻﻻ نبيش شكرا
مراد ؛؛ تو تبري طول يا ايه هيا
نا ؛؛ نا نحبش الاباري ساد اللي في الصبح
مراد ؛؛ باهي حسيتها انتي
نا ؛؛ ﻻﻻﻻ بس حتي لو كان نبيش ابره
مراد ؛ تقعدي هكي مريضه هيا نعطيك الابره هذه بيش تبري هيا ايه
نا ؛؛ بحتت فيه وطول قعدت نبكي
نبيش نبيش ابره نا اكويسه خلاص والله يا مراد ما انحبهن الاباري خلاص و راسي نا يا مراد نبيش ابره
مراد؛ ؛ لما شافني نبكي ومنهاره ونجده فيه ماهنتش عليه وجاني وقرب مني واضبطني ونا قعدت نبكي اخر
نا ؛؛ مراد نبي ماما نبي نمشيلها
مراد ؛؛ من جدك انتي انشيلك هكي مريضه لا مش ح انشيلك مااتفكريش
نا ؛؛ حولت من حضن مراد وابتعد منه وعطيته ظهري وقعدت نبكي
مراد تعقد مني وطلع من الدار وايخبط
نا قعدت نبكي لاني كنت محتاجه لماما حسيت روحي ضعيفه بكل ومانبي حد الا ماما بس
وانصدمت لما سمعت صوت هدي في الشقه تحكي مع مراد
هدي ؛؛ وينها ايه جبتلها غداء برودو
مراد ؛ كان متعقد بكل وايدخن
قاعده جو راه مش ح تاخذه خشي شوفيها انتي
هدي ؛؛ به
وخشت عليا نا في الدار ولقتني متغطيه في الفوطه واعيوني متورمات من البكاء
هدي ؛؛ هيييي ايه ان شاءالله تبكي علشان المرض يا هبله
نا ؛؛ نحكي بصوت واطي بكل
خير هدي
هدي ؛؛ حتي الكلام ماعندك له جهد كنك
نا ؛؛ جسمي متكسر بكل ومريضه بكل وانحس في ظهري امقطعني تقطيع
وجت هدي وحطت البرودو علي الكوميدنه اللي احذي وقربت مني وحطت يدها على راسي
هدي ؛؛ وووووو بكل حرارتك كنك عطك مراد حاجه
نا ؛؛ نبيش ناخذ حاجه ماعندي نيه حتي في العسل
هدي ؛؛ بس مراد كيف ساكت وامخليك هكي ساكته
نا ؛؛ ساكته وطايحه وانبحت فيها بس
هدي ؛؛ هيا يا ويه اشربي البرودو هذا كله خضره وعصرت عليه الليم
نا ؛؛ نبيش هدي شكرا
هدي ؛؛ سمحه هذه نبيش لا ياحنه كولي لعند امتي تبي تقعد هكي قاعد وجك اصفر بكل هيا كولي بيش تلقي جهد لمرض
نا ؛؛ هدي خلاص وراسي نبيش
هدي ؛؛ معقوله تقعدي هكي يعني تمرضي اخر راه هي كولي علي خاطر مراد بس حرام قاعد راقيله علشان مريضه
نا ؛؛ هدي مااتزريش عليا راه نا هكي لما نمرض مانبش ناكل حاجه راه هذا طبعي نحبش الدواء
هدي ،؛ ﻻ يا حنه نا اوحت فيك انكلم راجلك يشق بيك
مراد يا مراد تعال شوفها
مراد ؛؛ خش علينا والدخان في فمه
كنك
هدي ؛؛ شفت حرارتها تعالي شوفها راهي مرتفع بكل
مراد ؛؛ شن انديرلها جايبه ابره ماتبيش تاخذها
هدي ؛؛ معقوله هكي اتخليها
وجا مراد وقرب مني وكان الدخان في يده وقرب مني ونا شميت بنت الدخان حسيت كبدي بدت خلاص
هو قرب مني واجد وجاي يبي ايحط يده عليا
نا صبيت نجري من السرير شور الحمام
ومراد وهدي منصدمين وايبحتو في بعضهم
مراد انحرج قدام اخته لان نا رديته هكي
وقعد مقعمز وصبت هدي وراي ولقتني انرجع
هدي ؛؛ ﻻﻻﻻ موضوعك هكي كبير بكل ضروري تاخذي الابره يا ايه معقوله هكي
نا ؛؛ مستحيل ناخذها وطلعت من الحمام وخشيت لدار وتلقيت نا ومراد في نص الدار مراد كان يبي يطلع ونا نبي انخش
مراد بحت فيا نظره شينه بكل ونا كنت لاهي في مرضي وخشيت وطحت علي السرير اخر
مراد ؛؛ هدي خليها خلاص تو تاكل واتريح
هدي ؛؛ رد بالك منها يا مراد والله شكلها حساسها ومااتحملش في المرض تو انكلم عمتي فاطمه وانقوللها
مراد ؛؛ ﻻﻻ تقوليهش لها تو امها تنشغل تو انزرها علي الابره
وطلعت هدي وهو قعد امقعمز في الصاله وبعدها خش عليا وخذ دبشه وغيره ولابس سروال وكناتيره
ونا انبحت فيه لما جا وحط ادبشه
نا ؛؛ بصوت واطي ومخنوق
مراد
مراد ؛؛ نعم كنك
نا ؛ نبيك اتشيلني لماما
مراد ؛؛ فيش شيل نين نعطيك الابره وتبري اشويه معقوله تو هكي انشيلك لامك بيش تنشغل عليك وسكرها ريقا
نا؛؛ قعدت نبكي اخر
ومشي مراد ووته الابره وجاني
مراد ؛؛ هيا ايه نعطيها لكي بيش ترقدي و اتريحي
نا ؛؛ ﻻﻻ نبيش مستحيل ناخذها
وقعدت نبكي بصوت عالي
مراد باهي وراسي شيلني لهلي شوف ليا كم يوم متزوجه وماطلبت منك طلب نبي منك الطلب هذا بس باهي يا مراد
مراد ؛؛ تبي تمشي لهلك صاح
نا ؛؛ هزيت راسي معناها اها
مراد؛؛ صبي وتي روحك
وطلع وغمتله بكل وخبط الباب بقوه
ونا صبيت وغيرت دبشي وطلعت شنطه اصغيره وحطيت فيها دبشي
وخش عليا مراد
مراد ؛؛ عليش الشنطه
نا ؛؛ انبات عند هلي نين نبرا ومااتخافش تو ناخذهم معي العويل
مراد ؛؛ بحت فيا وهو امرفع حاجبه
تبي تمشي لهلك ابراحتك بس العويل فيش مشي ح يقعدو هنا
نا ؛؛ عمتي ماتقدرش اتعانيهم
مراد ؛؛ هيا اطلعي نبي انغير دبشي
خذيت شنطتي في يدي وعبايتي وخماري وطلعت
ولابست العبايه في الصاله وحطيت الخمار وقعمزت علي الكنبه
وانحس في جسمي تعبان بكل وانحس في دوخه
طلع عليا مراد وكان راقيله بكل وصبيت نا وطلعت وراه
نا ؛؛ مراد معاك مفتاح الشقه خلاص انسكرها
مراد ؛؛ اها اطلعي خلاص
ونزل مراد قدامي
ونا ننزل وراه بشويه لان انحس في دوخه وقبل طحت
مسكت في سوريته مراد من لاوره
مراد برم وجه بسرعه وبحت فيا ولاقني فاقده توازني
شدني من يدي وخذا مني الشنطه ونزلني بشويه ومشين شور السياره هو لما جا شور السياره سيبني وعدا ركب
ونا جيت شورها وتحشمت نركب قدام واذكرت في فرحي هو ركبني لاوره
قالت في راسي ممكن مايبنيش نركب قدام
جيت علي قصد الباب الخلفي وفتحت وخششت اكراعي برم مراد شوري ونا قعمزت
مراد ؛؛ كنك ركبتي لاوره ولا ماتبيش تركبي قدام
نا ؛؛ نحكي بصوت واطي
ﻻ بس انت امركبني زمان لاوره نحسابك تبيني نركب لاوره ديمه
مراد ؛؛ تعالي قدام
ونزلت وركبت قدام ولاول مره انحس روحي متزوجه صاح وعندي راجل ونركب معه قدام
بحت فيا مراد
مراد ؛؛ ايه كان انتي ماتبيش انعاينك نا تو انشيلك للمستشفي
نا ؛؛ كنت منحرجه
مراد ؛؛ به ناخذ الابره بيش تعطيها لكي الممرضه
ونا قعدت ساكته لاني كنت راضيه لاني نا رفضت الابره علشان متحشمه من مراد
وبحت فيا مراد وعرف قصدي ونزل من السياره وعدا ركب للشقه وجاب الابره وجاني
وطلع السياره من الجنان وهو يمشي
مراد ؛؛ ايه تبي حاجه ناقصتك حاجه
نا ؛؛ نبي صيدليه
مراد ؛؛ بس
نا ؛؛ اها نبي ناخذ حاجات ليا ولحمادي
مراد ؛؛به
وقعد يمشي بسياره ونحن ساكتين وجا علي قصاد الصيدليه
مراد ؛؛ انزلي جيبي حاجتك اوحدك احسن
نا ؛؛ انحرجت وبحتت في مراد
مراد ؛؛ كنك هيا انزلي
نا ؛؛ انزل انت جيب
مراد ؛؛ ونا شن عرفني شن تبي انزلي اوحدك
نا ؛؛ خنقتني العبره
وحكيت بصوت واطي ومخنوق
مراد عنديش افلوس نا
وحسيت وكأن حاجه كسرت فيا جوا
مراد ؛؛ باهي ليش ماتحكي من اولها كنك ساكته
وطلع الدزدان امتعه من جيبه وطلع افلوس ومدهن ليا
مراد ؛؛ خوذي حاجتك واجده بيش اطول معاك
ونا مديت يدي وفيها الرعشه وجيت نبي ناخذ الفلوس
مراد حط الفلوس في يدي ولاحظ انها ترعش ومسك يدي
مراد ؛؛ ايه ماتحرجيش مني انتي مراتي ومن طبيعي نصرف عليك
وهيا انزلي تو ننزل معاك وبلا حشم قدام الراجل وخوذي حاجتك كلها
نا ؛؛ حاضر
ونزلنا وخشينا للصيدليه وخذيت حاجتي ابسرعه وحاجات لحمادي ودفع مراد الفلوس وطلعن وركبن في السياره
مراد ؛؛ كيف حمادي عندش قطن
نا ؛؛ اقريب يكمل بيش اتشيله له
مراد ؛؛ باهي
نا ؛؛ اهن الفلوس وحطيتهن له في المكلن اللي بيني وبينه
مراد؛؛ خليهن عندك مرات تبي حاجه
نا ؛؛ ﻻﻻ شكرا ماعندي مانبي فيهم
ومشينا شور المستشفي وخشينا نا ومراد ومشينا طول شور غرفة الممرضات وعطهن الابره
وعطتني الممرضه الابره وطلعت والقيت مراد امقعمز وايهز في اكراعه وايدخن
مراد ؛؛ هيا وصبا وكان غمتله بكل
وتكه علي حلواني ونزل هو بس وخذا طبق حلويات
وحطه في السياره ومشا شور سوبر ماركت وشراء عصير
ومشينا شور هلي نزلت نا ومراد
وطلعت علينا رجاء واول ماافتحت الباب لاقتني قدامها عرفتني طول
ونا خشيت ورفعت خماري وهي نطت عليا وتمت تضبط فيا وتبكي
رجاء ؛؛ رايفنا عليك يا ويه شين الحوش بلاك
نا ؛؛ نبكي ومنهاره والله حتي نا
وطلعت ايمان ولاقتنا في الجنان
ايمان ؛؛ ويه
وخشت تجري للحوش
ماما يا ماما يا ماما ايه جت تعالي ابسرعه
رجاء ؛؛ كنه وجك هكي شابح
نا ؛؛ مريضه وحالتي حاله
ومشين بشويه شور المربوعه واتجي ماما واميره وايمان يجارن
ماما ؛؛ جتني تجري وتضبط فيا وتبكي
نجك ليا امرايفه عليكي نجك ليا نجك ليا
نا ؛؛ نجك يا ماما والله حتي. نا امرايفه عليكم نا بلاكم شيءانتو دنيتي كلها
اميره ؛؛ خشي خشي
وخشيت وتمت تضبط فيا ايمان واميره ويبكن
ماما ؛ وين راجلك يا ويه
نا ؛؛ برمت وجي وماشفتش
مش عارفه وين طب
رجاء ؛؛ ههههههههههه طيح سعدك اطلعي شوفيه
نا ؛؛ به
وطلعت وطلعت وراي ماما والقيت مراد امصبي علي السياره امتعه
ماما ؛؛ مراد تعال خش تفضل
جا مراد وسلم علي مراد
مراد ؛؛ كيف حالك يا عمتي
ماما ؛؛ اكويسه الحمدالله خش تفضل هيا خش
مراد ؛؛ ﻻ شكرا يا عمتي امغير جايبلك هذه تبكي من امس مريضه
ماما ؛؛ بحتت فيا طول
من شن مريضه
نا ؛؛ انحرجت منهم
برد ياماما بس مراد عطني دواء
ماما ؛؛ مراد خش والله في طاسة شاهي واتيه والله اتخش هيا
مراد ؛؛ باهي هيا
وخشت ماما ومشي مراد شور السياره ونزل شنطتي والحلويات والعصير
وخش ورانا وجا علي قصاد باب المربوعه وتم ايدق جاته اميره
اميره ؛؛ خيرات يا مراد كيف حالك خش هيا ماما امقعمزه جوا
مراد ؛؛ باهي هذين وين خششهن
اميره ؛؛ هات عنك
وخذت اميره الحاجات وخش علينا في الدار لاقني قاعده علي صدر ماما
ولما جت عيني في عينه حولت
ماما ؛؛ وين العويل كنكم ماجبتهم
مراد ؛؛ قاعدين عند امي
ماما ؛ بحتت فيا واتفنص وغمتلها
ايه ليش ماجبتيهم معاك
نا ؛؛ مراد مابش يا ماما
وخشت رجاء
رجاء؛؛ خير يا دكتور اهلا انستنا
مراد ؛؛ بحت في رجاء وابتسملها وسلم عليها
خيرات
رجاء ؛؛ اكيده عرفتني نا رجاء اصغر من ويه
وخشت ايمان
ايمان ؛؛ ونا ايمان اصغر وحده
مراد ؛؛ ابتسم وبحت فيا لان حس خواتي عفويات ومطلوقات مش كيفي
ماما ؛؛ اكيده تعباتك امس
نا عرفتها لما تمرض خلاص تنهتي مره وحده هي دلوعه واجد
رجاء ؛؛ ههههههههه بعدك خلاص تقعد تبكي وماتاخذش ولا حاجه عرفينها وعارفين طبعها
مراد ؛؛ اها امس سكرت راسها واقعدت تبكي وخلاص
وسمعنا الباب انطبق بقوه وواحد يجري طول نا صبيت
ومشيت شور الصاله وتلاقيت نا وخالد
جاني يجري ويضبط فيا
خالد ؛؛ اول ما شفت السياره عرفتك طول وين يا شينه معش رنيتي
رجاء ؛ وشن تبي في وجك خلاص عندها مراد
خالد ؛؛ بلاسماطه يا جالطه وحط يده علي كتفي وخششني للدار ولاقي مراد وسلم عليه
خالد؛ شن اخبارك
مراد ؛؛ تمام الحمدالله
وخشت اميره وشايله سفره كبيره فيها شاهي وقهوه وحلويات
اميره ؛ هي اللي يبي شاهي ايقولي انصبله واللي يبي قهوه ايقولي
خالد ؛؛ انغير وانجي علي السريع
مراد ؛؛ خوذ راحتك
وصبيت وجبت طفايه للمراد وحطيتها قدام
نا ؛؛ اميره القهوه مره صاح
اميره ؛؛ اها
صبي للمراد قهوه احسن
مراد ؛ بحت فيا وابتسملي
شكرا
وصبتله اميره قهوه ومديته له
رجاء ؛؛ باهي باحنه كنك معش رنيتي ولا ازوجتي وانسيتنا
نا ؛؛ والله لا بس هكي قعدت مش فاضيه
ايمان ؛؛ اكيده دهوير واوكال في مطاعم
وانحرجت وبحتت في مراد
نا ؛؛ اها
ماما ؛؛ ويه كذا حرارتك
واجد راقيه شن خذيتي
نا ؛؛ والله ماني عارفه مراد هو اللي عطني احبوب في الصبح وتو قبل مانجي خذيت ابره عندي برد قوي بس
مراد ؛؛ من الرقده علي المكيف
اميره ؛؛ ﻻ ياويه معش ترقدي علي المكيف
وجا خالد
خالد ؛؛صبيلي قهوه يا اميره
اميره ؛؛ هيا هيا وصبتله ومدتها له
وقعدو ايهدرزو اشويه خالد ومراد وماما وحسيت مراد تريح معهم وقعد ايهدرز
وبعدها رن فونه
مراد،؛ اووووو نسيت بكل اليوم عندي عياده اهو ايرنو
ماما ؛؛ كيف املاه اليوم بديت
مراد ؛؛ اها
وصبا مراد هيا نستأذنكم
ماما ؛؛ بدال عندك عياده خلاص عدي مربوحه
وطلع مراد وضربتني ماما بيش انصبي وراه
وصبيت نا وراه والقيته يلابس في كندرته
مراد ؛؛ ماشاءالله وجك قعد تمام لما شاف هلك
نا ؛؛ الحمدالله امتي اتجي
مراد ؛؛ انتي امتي تبي
نا ؛؛ نبي انبات وكان علي العويل جيبهم ليا هنا بعد ماتطلع من العياده
مراد ؛؛ ﻻ اعيال ﻻﻻ في يومين هذين هلي ماشين للبحر وهم خلوهم يمشو معهم
نا ؛؛ اها باهي
مراد ؛؛ بكره تو انجيك لان عندك ابره تانيه بيش اتصحي اكويس
نا ؛؛ به ان شاءالله
وطلع مراد ونا خشيت ابسرعه لاني كنت امرايفه موت
رجاء ؛؛ تعالي تعالي احكيلنا شن اخبارك مع الزواج
ماما ؛؛ كذا اسكتي يا رجاء
تعالي ياابنيتي احكيلي شن مراد اكويس معاك
اميره ؛؛ تي شكله ايهبل بكل وكويس
نا ؛؛ بحتت في ماما كيف انها مشغوله عليا وفي خواتي كيف انهن فرحنات به وقالت مستحيل انكد عليها
والله لعند تو اكويس بكل ومحترم وحتي العويل متريحه معهم اكويسين
ايمان ؛؛امس لما خالتي روحت منكم فرحانه بكل وقالت شكلهم متريحين بكل وحتي لما بكيتي تم يضبط فيك
نا ؛ هههههه وين خالتي تنقل في الكلام تو اتشوف الحق هو طيب وحنون
ماما ؛؛ يعني طلع اكويس يعني مااندمش روحي
رجاء ؛ تي شن اتندمي روحك شفتي شكله اكويس بكل شفتي حتي لما مرضت عالجها وجابها هنا بيش اتريح
ماما ؛؛ باهي تعالي هنا خشي وتريحي
وخشيت احذ ماما وتمينا انهدرزو وبدون مانندري علي روحي القيت روحي راقده
ووعيت علي عشاء القيتهم ايتعشو
اميره ؛؛ ها ويه شن اخبار تو
نا ؛؛ انحس في روحي امتلجه جسمي يااميره متكسر بكل ماعنديش حيل انصبي
وحطت اميره يدها علي راسي ولقتني نار بكل
اميره ؛؛ وووووو واجد هكي
ماما ياماما تعالي شوفيها
وجتني ماما
ماما ؛؛ كنها شن في
اميره؛ ؛ نار بكل ياماما تعالي شوفيها
ماما ؛ باهي عدي ديري كمدات مية زهر
وصبت اميره تجري ودارت ميه وبدت اديري كمدات
نا ؛؛ اميره نبي حمام صبيني
اميره ؛؛ باهي هيا صبي
ومسكتني اميره وصبتني وتمت تمشي بيا
ونا حسيت روحي دايخه ومعش شفت شيء قدامي وطحت
علي طولي
اميره ؛ ووو عليا ويه كنك ايمان رجاء تعالنا اجارنا
ماما ؛؛ بسم الله الرحمن الرحيم
شدنها شدنها
اميره ؛؛ صايرلها هبوط
ماما؛ ؛ اكيده مش واكله شيء
وشالني شور الدار ودرلي عطر وحطنها علي خشمي
ماما ؛ الحمدالله ها ويه اكويسه تو ياابنيتي كنك فيش اتحسي
نا ؛؛ حاسه جسمي كله فاشل وامصقعه
ماما ؛؛ اميره ادهني اختك مصاتجو
اميره ؛؛ باهي
ودهنتني اميره مصاتجو وخذيت 2 بنادولو وشربتني عصير الليمون ساخن
ورقدت وماحسيت ابروحي
رجاء ؛ رقدت صاح
اميره ؛؛ اها ان شاءالله اتصح شينه عروس وتقعد مريضه هكي بعيده عن راجلها
رجاء ؛؛ بس والله شكله اكويس اللي جابها هنا
اميره ؛؛ ايه اكويسه ونيتها بيضه وتستحق كل الخير
رجاء ؛؛ اميره شن صار في وليد
اميره ؛؛ وليد قال نبي نخطبك خلاص
رجاء ؛؛ باهي طيب فيك
اميره ؛؛ ان شاءالله خير
ورن فون رجاء علي الاضاء قدامها
رجاء ؛؛ سراج هذا اللي ايرن
اميره ؛؛ عدي طيري واحكي معه
وصبت رجاء تجري وبدت تحكي مع سراج
سراج ؛ الو حبيبي وينك
رجاء ؛ خيرات ياحبيبي شن اخبارك
سراج ؛؛ اخباري ان كل يوم انرايف عليك وانحبك اكتر من اليوم اللي قبله
رجاء ؛؛ نجك ليا حبيبي و الله حتي نا انحبك انحبك انحبك والله من يوم ماتعرفت عليك ونا متغيره بسببك والله ماكنت نحساب الحب هكي يا سروجي
سراج ؛؛ اعويناتي انتي وين قاعده
رجاء ؛ قاعده في الدار اليوم جتنا ايه مريضه وحالتها حاله
سراج ؛؛ اها كنها فيش اتحس
رجاء ؛؛ امحصله برد قوي بكل
سراج ؛؛ اعويناتي راه نا امرايف عليك ونبي انشوفك ولو تنطبق السماء علي الارض نبي انشوفك الليله
رجاء ؛؛ وين تبي اتشوفني نقدرش
سراج ؛؛ اها نبي انشوفك علي السريع عندي لكي مفاجاه
رجاء ؛؛ انشوف اجواء الحوش قبل
سراج ؛؛ خالد وين
رجاء ؛؛ خالد قاعد اطياح علي الفون يحكي مع امل
سراج ؛؛ و عادل
رجاء ؛؛ عادل ماشي للبحر هو وهله بايتن
سراج ؛؛ معناتها الجو عادي خلاص حبيبي نا نبي انشوفك علي السريع والله ماانطول علشان خاطري
ماترفيضش باهي
رجاء ؛ حبيبي نا خايفه
سراج ؛؛ اتخافي وانتي معي يا اعويناتي ومانقعدو في المستشفي الليل كله مع بعضنا
رجاء ؛ حاضر باهي سكر خليني انشوف اجواء الحوش قبل
سراج؛؛ به بيش اترني عليا راه نا في السياره ومش بعيد من حوشكم
رجاء ؛؛ يعني انت اموتي روحك صاح
سراج ؛؛ لاني امرايف عليك موت ياااعويناتي
رجاء ؛؛ باهي سلام
وصكرت رجاء ومشت ل ايمان
رجاء ؛؛ ايمان نبيك في موضوع وراس ايمان خليه سر بينتنا
ايمان ؛؛ فجعتني كنك شن في
وحكتلها رجا الموضوع
ايمان ؛؛ طيح سعدك تو يقتلك خالد
رجاء ؛ خالد لاهي مع امل وعادل مش قاعد والفرصه ماتعوضش وبعدين هو مصر عليا يبي ايشوفني قالي علي السريع
ايمان ؛؛ نا طلعني منه الموضوع هذا
رجاء ؛؛ انتي خليك هنا في الحوش بس وراقبي تحركات ماما وخالد بس
ايمان ؛؛ كان مسكوك ماتتقوليش انا معك
رجاء ؛؛ ماعليك اهو ايرن هيا اني طالعه
ايمان ؛؛ باهي اطلعي
وطلعت رجاء وردت علي الفون
رجاء ؛؛ ها وينك
سراج ؛ هيا اتجي علي قصاد الباب
رجاء؛ ؛ حاضر
سراج ؛؛ هيا تعالي افتحي الباب
ومشت رجاء وافتحت الباب ……………..
يتبع