مسلسل سعاده كاذبه 

مسلسل سعاده كاذبه

الحلقه 17

نا ؛؛؛ اتصدقن نا بروحي بديت انميله ممكن علشان هو اللي عيشني دور العروس او لان ان نا هلاص حلاله ختي يوم اللي وعيت والقيته قدامي ما حسيتش بخوف واطمنت هكي من عند ربي مع ان نا راقيلي ان لعند تو ماطلبش يحكي معي نا تو عروسته ويالله كم يوم وانجي وانبات معه ومش عارفه ولا حاجه عليه 
اميره ؛؛ ماتخافيش يا ويه هصا دكتور و واعي وح يفهم عليك

نا ؛؛ تنهيده طويله وعميقه طالعه من جو صح

ان شاءالله

دعاء ؛؛ عارفات يا بنات علي من تو متعرفه
رجاء ؛؛ ها ها علي من
دعاء ؛؛ علي واحد ايهبل بكل من طرابلس يا نا عليا يا بنات ايهبل ودوته اتجننننننننننن

نا ؛؛ قصدك يا دعاء اتحبيه

دعاء ؛؛ تبن الحق نقاني نبيه ﻻن ايهبل وايجنن ودزالي صورته حاجه صح

اميره ؛؛ شكلك تحلمي انتي مستحيل تاخذيه وبعدين قاعد في طرابلس والبناتهم ايجننو يبي ايبحت فيك انتي كذا اسكتي

دعاء ؛؛ وكني نا شينه ولاه سوده هو قالي نا انحب الشراقه وقالي حبيت دوتك عارفات مانسكرش منه بكل ديمه يبي يقعد علي الخط حتي لما اتخش عليا امل ايقولي مااتسكريش يقعد يسمع في دوتنا

امل ؛؛ طيح سعدك قصدك يسمع فيا
دعاء؛ ؛ هههههه اها وقالي اختك هذه جالطه

رجاء ؛؛ اسمله علينا من نعيمه ل امل صبايا خوتي جالطات بكل

امل ؛؛ ههههههه من عاشره قوم 40 يوما صار منهم ونا معاشرتك من اول ما عشت

رجاء؛ ؛ اس يا جالطه
وصبت رجاء وتمت اتصفق
هيا هيا يا حناتي انتشرن وعدن اشقن بمسقبلكن هي نبي نحكي مع سراج

اميره ؛ تلزي ونا انعدي انمص اليم يعني
نا ؛؛ هي تو انمصوه نا وياك اليم
اميره ؛؛ بحتتت فيا واضحكت نعني كيفك يالله كم يوم وتو اتمصي العسل واتكوني في شهر العسل
نا ؛؛ ههههههه اس راه خيرلك

امل ؛؛ خطرها علي العسل اميره حكيتي لاختك
اميره ؛؛ وكني ياحنه اتحقي فيا متزوجه
امل ؛؛ ههههههههه لا مش هكي بس انتي عارفه اختك هبله واتهز في راسها وخلاص

نا ؛؛ بحتت فيها وامرفعه راسي

كني يا حنه مانفهمش ولا شنو وبعدين نا نبيش نعرف

اميره ؛ الاحسن ماحد ايجيها خلوها بينها وبين راجلها وبعدين دكتور نساء وعارف ومش اول وحده اتجيه

امل ؛؛ ههههههههههههه نقانك صدقتي

نا خنفتني العبره لان عرفت روحي ان ماليش اي قيمه عند مراد وان هو عايش حياته من قبل
سحبت روحي وطلعت وحطيت راسي علي المخده واقعدت افكر في حياتي كيف ح اتكون بعد كم يوم وكيف ح انعيش مع مراد وازعمه هو ايحبني
استغفرت ربي وقريت المعوذات ورقدت

واوعيت تاني اليوم خشيت لحمام توضيت وصليت الصبح وطلعت القيت ماما امتوتيتلي 7 حبات تمر

ماما ؛؛ صباح النور هيا تعالي كولي هذين بيش تقوي راه رايحه صفره وناقصه

نا ؛؛ ههههه شكرا ماما وقعمزت ناكل وبعدها صبيت ومشيت لدار ودرت شعري زيت وحطيت عسل وطلعت وقعمزت جنبهن وخواتي حيسات في الحوش اليمن فيه

ومشت ساعه وراء ساعه
وجا الليل وجت خالتي فاطمه
خالتي فاطمه ؛؛ لووووووووووووووووووووووووووووووووووليا لووووووووووووووووووووووووووووووووووليا

هيا ولعن الاغاني خلونا نرقصو هيا هيا
وولعن الاغاني وتمينا نرقصو والجو ايجننننننننننن

نعيمه ؛؛ خالتي هيا احكيلنا شن جايبه العروس
خالتي فاطمه؛؛ ييييييي خطرتن عليا تعالنا تعالنا شوفن صورت كل حاجه

نشهد بالله انها جايبه حاجات صقع بكل وايهبلن شكلها افلوس بكل وعرم وعرم ودبشها تقريبا تقعد 3 اسنين ماتشريش دبش من كثرته كلنا فتحن فمنا لما شفنا دبشها وكل حاجه جيبتها فخمه حي علي الورغيان ايجنننن بكل والحاجات امرتبتهن ترتيب حلو وامغلفته

نعيمه ؛؛ هابا علي بختك يا ايه ما القيت ما تطلعي للا مع هذه تو يقعدو ايقارنو بينك وبين دبشها

خالتي فاطمه؛؛ ﻻ يا حنه فرق بينها وبين سلفتها ايه شقتها احلي واكبر واوسع منها وبعدين ايه راجلها امثاث اوحدها مش هي امسيبها صاله جابت صالون

نا ؛؛ عادي نا مقتنعه بدبشي وبعدين نا راه خطبت شهر فكري اكويس

خالتي فاطمه؛؛ مش هذه خطبة سنتين وبراتبها
نا ؛؛ قصدك تشتغل
خالتي فاطمه؛؛ تشتغل في ضمان ياحنه وبراتبها وهلها حالتهم اكويسه

نعيمه ؛؛ ههه يا حنه احظوظ ناس

ماما ؛؛ بنات هيا صبن حطن العشاء

وعدن البنات ايحطن في العشاء

خالتي فاطمه ؛؛ ايه امتي حنتك انتي
نا ؛؛ بعد بكره ليش
خالتي فاطمه؛؛ بيش اتحني حنه سمحه وواجده
نا ؛؛ ﻻﻻ نبيش يا ماما نبيها خفيفه
خالتي فاطمه؛ غريبه ليش
نا ؛ سامطه انجيه امحنيه واجد عيني عينك نبي الزيجه ﻻ ما نقدر

نعيمه ؛ اسمله علي الراجل لا خذيتي دبش عرايس ولا حنه ولا صبغه ولا ميش مفروض انتي اديرله الحاجات هذين كلهن بيش ايحس ان في عروس بين ايديه

نا ؛ نعيمه انا انتحشم كنك انتي معقوله ناخذ دبش ارواب اقصيرات وحنه عيني عينك نبي الزواج

نعيمه ؛ تو تطلقي تو تعرفي قيمة الراجل شن وشن يبي يا طيحت السعد ياهبله

نا انصدمت من كلمة نعيمه وصبيت وخشيت لدار

ايمان ؛؛ ويه هيا تعالي عشاء
نا ؛؛ ايمان نبيش ماعنديش نيه
ايمان؛؛ تعالي ويه انتي لكي كم يوم ماتاكليش اكويس تو اطيحي علينا انتي
نا ؛ ايمان والله عنديش نيه

وتعشو هلي ونعيمه ركبت ومروه روحت

وكل وحده شقت بروحها ايش فتله وايش حواجب
خالتي فاطمه؛ بنات هيا تعالن نحني هيا
نا ؛؛ تو انجيك نا انحنيك
خالتي فاطمه ؛ ﻻ ﻻ انتي تريحي هيا اميره صبي ابسرعه
اميره ؛ هيا ياخالتي انكمل فتلة امل بس
خالتي فاطمه؛ هيا بيش اتحن حتي امكن وسالمه تعالن

وكملت اميره الفتله وطلعن وفرشن افرشات وافوط ورقدنهن لوطه وبدينا في الحنه

نا ؛؛ ماحد ايجي شور ماما تو انديرلها نا
رجاء ؛؛ خليها ويه تو انديرلها نا تريحي انتي
نا ؛؛ ﻻﻻﻻﻻ ماحد ايدير ماما الا انا

وقعمزت عند كراعيها وبديت انحط في الصقه وماما تبحت فيا واعيونها ايدمعن بس حاولت انها ماتبينش

ماما ؛؛ ويه ديرها بسيطه مااكتريش لوطه بس
خالتي سالمه؛ حتي نا نبي طشه دعاء مااكتريش
خالتي فاطمه ؛؛ نا ديرلي لعند فوق الركبه نبيها واجده

اميره ؛ هههههههههههه اي يا عروسه مين قدك ووين تبي ادلعي خالي

امل ؛؛ تي شكله خالي هو اللي عريس
نحن ؛؛ ههههههههههههههه

خالتي فاطمه؛؛ خالكن ديمه عريس من يوم ماازوجني

رجاء ؛ اسمعي اسمعي يا ايه وتعلمي شيء حاجه علي حالك
نا ؛؛ هههههههههههه تحشمن

خالتي فاطمه ؛ يييييييييييي خالكن هذا ما خذني الا لما نشف ريقي

اميره ؛ قصدك علاقه طويله
خالتي فاطمه ؛ 5 اسنين علاقه
امل ؛ ووووووووو عليا عليك كفاح 5 اسنين علاقه تي انا ماليا شيء دايره علاقه مع خالد اقريب نقتله بيش يخطبني

امبره ؛؛ ييييييي لو اتشوفي نا خوك هذا نشف ريقي ومشطلي الشيب شوفي من امتي

رجاء ؛؛ طيح سعدكن فتحتهنا دلاله امهاتكن قعدات

ماما ؛؛ ههههههههههه فنص بقيات يا سالمه ونا نبيش ناخذ لولدي وحده فانص

وبحتت في خالتي وغمزتلها

خالتي سالمه؛ لا يا حنه كان ماخذيتي بنتي مش ح ناخذ بنتك ﻻ ياحنه وحده بوحده

اميره وامل ايبحتن في ماما وخالتي ومصدمات

ماما ؛؛ ﻻ يا حنه البنت فانص ماني واخذتها ناقصني نا
خالتي سالمه؛؛ ﻻ بالكي بنتك انتي اللي محترم ومؤدبه
ماما ؛؛ بنتي مؤدبه مش كيف بنتك الباير

امل ؛؛ صبت ونطت ومنفجعه

وحق ربي يا خالتي ماني بايره نوعي بدري واندير في الغداء نا

مش يا ماما هذاك اليوم درتلكم مكرونه

نا ؛؛ اعععععععععع مكرونه
امل ؛؛ سكري فمك انتي
ماما ؛؛ وشن المكرونه واعره يعني ﻻ يا حنه ريحي اعظامك عند امك

امل ؛؛ بوي هذاك كان ما خذيت خالد ليا كم انطيح فيه اتجيني تو انتي يا خالتي اتقولي ﻻ وبعدين انتي هذاك اليوم قالتي اصحيحه خلاص ماليش دعوه به

نحن ؛؛ هههههههههههههههههههه

خالتي فاطمه ؛؛ طلعتي فضايحك يا هبله ايبصرن هذين
امل ؛ انصدمت
قصدكن انتن تو اتبصرن

ماما ؛؛ ﻻ ماانبصرش
نا ؛ قعمزي وريحي اعظامك
امل ؛؛ عارفتك يااخويله مش ح انهون عليك واتسيبني انعنز

ماما ؛؛ هههههههههه ربي يحفظكن ان شاءالله

وقعدن انهدرزو وكملن حنتهن غطينهن وردينا الباب عليهن وطلعن

امل ؛؛ وحق ربي الجو ماايتفوت تو حلال فيها قعميزه مع خالد وهدرزه لعند الصبح هنا في هالصاله

رحاء ؛؛ بعدك اللي جوا امحنيات ومستحبل ايتحركن

اميره ؛؛ محظوظه انتي ياامل تو اتحصلي هدرزه مع خالد ونا انمص هنا في اليم

امل ؛؛ وكلمي وليد ايجي
اميره ؛؛ مازلت تاكتها معه
امل ؛؛ ياهبله كلميه وهدرزي معه خيرلك من القعده اوحدك

اميره ؛؛ كسرتا الشفره
امل ؛؛ اصبري اصبري تو انكلمه انا

الو خير يا وليد

وليد ؛؛ شن تبي متصل تو
امل ؛؛ تعال نبوك في حوش خالتي
وليد ؛؛ ليل يا فرخه تو شن تبي
امل ؛؛ اميره مريضه بكل وحالتها حاله
وليد ؛؛ صاح تحكي انتي
امل ؛؛ تعال شوفها ابروحك نبوك اتجيب بنادولو لان خالد روح خلاص

وليد ؛؛ به تو انجيب وانجي
وصكر
امل ؛؛ مش قالتلك تو ايجي ايحبك ياهمي ايحبك
اميره ؛؛ وخالد وينه
امل ؛؛ تو دزلي رساله قالي في طريق جاي تو انخششه جو في الدار وانتي اقعدي في المربوعه وصكر وظلمي راه ايشوفك واحد

نا ؛؛ اميره فكك منها هذه هبله بعدها ايشوفوك يقتلوك بعدها
اميره ؛؛ﻻﻻﻻ فكيني ياامل

وخش خالد
خالد ؛؛ السلام عليكم
امل ؛؛ وعليك السلام
واغمزت لنا ونحن صبينا درنا اروحنا نبو انرقدو
رجاء بدت تحكي مع سراج وايمان مع احمد و دعاء مع الطرابلسي

وخشت امل علينا واعزقت للاميره الفون

امل ؛؛ افطني لوليد لما ايرن بيش تطلعيله انتي راه خالد قاعد جو مستحيل يطلع عليك
وطلعت
ومشت دقت الباب علي خالد
خالد ؛؛ خشي تعالي
امل ؛؛ افتحت الباب ولقته راقد علي السرير

كيف عرفتني نا
خالد ؛؛ عارفك تو اتجي تعالي حبيبي تعالي
وجاته امل وخلت الباب مفتوح وقعمزت علي الكرسي
وقعمز خالد علي السرير وتمو ايهدرزو

ورن فون امل وردت اميره عليه
وليد ؛ تعالي خوذي دواءك
اميره ؛؛ حاضر

ورتبا روحها واطلعت عليه وافتحت الباب ودارت روحه زعلانه وامطرمه شوربها قدامها

وليد ؛؛ خوذي
وبحت وركز لقها تبكي

اميره اميرتي تبكي
اميره انهرت ابكاء قدامه لما شفاته اضعفت لان كانت امرايفه عليه

خش وليد لجنان
وليد ؛؛ اميرتي حبيبي خلاص بلا ابكاء انا انموت ولا انشوف ادموعك ونا انحبك ومستحيل انتخلي عليك والله انحبك انتي خب الطفوله ومراهقه وشبابي وتو تقعدي حب شيابي

اميره :؛ انا هنت عليك يا وليد شوف لنا كم معش حكينا مع بعضنا
وليد ؛؛ به خشي تو ايشوفنا واحد خشي وتو انكلمك
اميره ؛؛ كسرتها شفرتي
وليد ؛؛ تعقد
نا شن قالت ومش قالت معش اتكسري شفرات تي كنك لما ترقالك اتكسري انتي

اميره ؛؛ ﻻني نبيش انكلمك
وليد ؛؛ انهون عليك يعني
اميره ؛؛ ﻻني نا قالت تعال اخطبني خلاص وانت ما تبيش
وليد ؛؛ نا نبيش خطبه نبي زواج طول مانبيش خةتك تيحطو العين عليك يا اميرتي افهمي ونا زروفي مازالن مانقدرش انطلع تو
اميره ؛؛ نا قالت ختي كلمه بسيطه
وليد ؛؛ امي ارفضت قالت زواج طول وما قالت ماتحشمنبش مع اختي خلاص حبيبي والله انحبك والايام اللي فاتن شينات لانهن بلاك

خلي فون امل عندك
اميره ؛؛ به
وطلع وليد واميره خشت وادموعها في اعيونها بس ادموعها انقلبن للدموع الفرح
وخشت لدار وبدت تحكي معه

ومشت الليله وجا الصبح والحوش امعبي وعندنا عرم ناس بيش يحضرو شيلت الدبش
حطينا الغداء وطول للاستشوار والميك اب ايوتن في اروحهن
ونا كل مره انجي انبحت فيهن ايوتن لروحهن ونا فرحانه وفي نفس وقت نبكي

واذن العصر وبدو ايبوبو
عادل ؛؛ هيا اطلعو ابسرعه هيا
واطلعن ونا انشوف من عند الروشن كيف رتبو دبشي انهرت ابكاء
حسيت روحي معش عندي صلاحيه في الحوش هذا حسيت وكأني التزيت من الحوش خلاص اهو دبشي طلع ونا يالله يومين ونطلع معقوله نطلع من حوش اللي عشت فيه اللي تربيت فيه معقوله خلاص ح نطلع برسمي من الحوش نكذب عليكم لو قالتلكم ان الشعور هذا شعور حلو والله شين اسمط حاجه اتشوفي الناس فرحنين بشيلت دبشك لحوش تاني

قعدت نبكي والقيت ماما تبكي معي
ماما؛؛ مبارك يا ويه
وجتني واضبطتني واقعدت تبكي
نا ؛؛ نحكي والعبره خنقتني ولما شفت ماما حاولت نمسك روحي

ماما نبيش انشوف دموعك اتخوفي فيا اخر عليك راه ونكره الزواج

ماما ؛؛ الله ايربحك دنيا واخره خلاص هيا تعالي انلمو الحوش قاعد حايس امعبي ميك اب

نا ؛؛ هيا حاضر
نابديت انظم في الحوش وماما حطت العشاء علي النار

وبعد ساعتين تقريب سمعت صوت بيبات
طلعنا ابسرعه للجنان والقينهم ايخشو

لووووووووووووووووووووووووووووووووووليا لووووووووووووووووووووووووووووووووووليا مبرووووووووووووك مبرووووووووووووووك يا ويه مبروك

وكلهن وجني وسلمن عليا وباركلي وخشو غيرو دبشهن ونا خشيت وقعمزت في الدار مع البنات

ايمان ؛؛ ماشاءالله شقه كبيره وواسعه
رجاء ؛؛ بعد ماكملن خششونا تفرجنا علي شقة سلفتك
الحق هي شقتها اتهبل وراقيه بس انتي احسن

نعيمه ؛؛ حاط دار لعويله عليك بخت يعني مش ح ايتحركو من عندك بكل من بختك

اميره ؛؛ اساس هي ازوجت وعارفتهم ح ايعشو معها

نا ؛؛ باهي فيش وحده فيكن صورتلي الشقه
امل ؛؛ نا صورتك
رجاء ؛؛ شفنا مراد اليوم
نا ؛؛ وين شفتوه
رجاء ؛؛ تلقيت نا وياه في المطبخ القيته ايعلق في الستاره
نا ؛؛ كيف ليش مالقي الا اليوم ايركبها
رجاء ؛؛ قالي المصري ماجابها ليا الا تو وام افرضت عليه ايركبها

نا ؛ به شافوه باقي العائله

رجاء ؛؛ ﻻﻻ لان طلع وقالي ماتقوليش نا مراد تو يقعدن ايسلمن عليا ويحرجني بس طالق اللحيه بكل

نا ؛؛ هو اصل عنده لحيه خفيفه
رجاء ؛ ﻻﻻ هالمره واجده
نا ؛؛ باهي هاتي الفون خليني انشوف
امل ؛؛ خوذي يا حنه

وقعدت انتفرج ورجاء اتوريلي
امل ؛؛ صورت سرقه من وراء عمتك قالت مافيش داعي لتصوير بس اتصدقي فشاكه بكل طول الوقت وهي تحكي علي تفريشت شقة سلفتك وتمت تحكي علي اساس انها جايبه حاجات واجد بكل وحلوه

نا؛؛ به ماحد حكي معها
رجاء ؛؛ حكت معها خالتي سالمه بس ماعدلتش عليها تمت اتفوت فيها

ايمان ؛؛ شكلها هكي ح اتعبك هذه
رحاء ؛؛ بينك وبينها الباب سكريه وريحي راسك

نا ؛؛ ان شاءالله خير

وحطينا العشاء وتعشينا وقعدنا انغنو ودرنا اجواء حلوه

وتاني يوم وعيت من الصبح القيت الحوش كله واعي واللي امغير

نا ؛؛ اوووو عليك نشاط

ماما ؛؛ العرب ح ايجبو السياق تعالي انتي افطري تمر
نا ؛؛ هي هي
وتوضيت وصليت الصبح وفطرت

اميره ؛ ايه انتي خشي لدار خلاص و وتي دبشك بيش تمشي لحنايه

نا ؛؛ به
رجاء ،؛ وراس ويه تعالي ديري استشوار قبل خليني ناخذو فيك حقنا قبل مااتعدي

نا؛؛ ههههه هيا ابسرعه

وخشيت لدار ودرتها وهي لابست وطول سمعنا البيبات اطلعن و استقبلو العرب

كانو جيات صبايا ورجاله وكانو جيبن معهم البدله الكبيره وطاقم الذهب وعقد والهدايا

ونا انبحت من وراء الباب انشوف في الصبايا كيف يرقصن وماسكه روحي بالغصب

وانشوف في البنات يجارن وايوتن في المثروده والقهوه والعصير
ولما كملو التضيفه روحو العرب

نا طلعت طول وشفت البدله العربيه امتعي كان لونها فوشي عجبني بكل اللون

خالتي فاطمه ؛ ويه شوفي الطاقم كبير وحلو صاح
نا ؛؛ ماشاءالله تبارك الله ايهبل وحلو

خالتي فاطمه؛؛ ذوقي نا طلعت نا ومراد شرينه عدي امشي ودسيه مع ذهبك
نا ؛؛ به حاضر علي هالصندوق الذهب اللي عندي تي شن عندي اسوره وخاتم بس

خالتي فاطمه؛؛ انتي وشطارتك بعدين خليه يشريك ذهب راه حالته اكويسه وبفلوسه زمان مرات امعبيه تعبي ذهب

نا ؛ مرات كانت معه دكتوره يعني براتبها وبفلوسها ماترجش في اي حاجه منه

خالتي فاطمه ؛ ﻻ يا ويه راه كان مراد يصرف عليها في صرف سمح كان ديمه ايكرلها في الذهب والدبش راه الراجل عليش مااتعوديه اتعوديه علي ان يشريلك ويهتم بك

اميره ؛؛ ويه تعالي شوفي السياق ماشاءالله واجد وايهبل مع ان فرح مشترك

وطلعت وشفت السياق والقيتهم ملتمات عليه

نعيمه ؛؛ ايه ايه هي وتي روحك عادل يرجا فيك
نا ؛؛ ايشلني لحنايه
نعيمه ؛ اها هيا ابسرعه راه عندي مشوار نا
نا ؛؛ هيا هيا
وخشيت وخذيت دبشي ولابست وطلعت وسيبت الحوش حايس والصبايا سيبتهن يبن يبدن ايدرن العصبان امتع بكره

وقعدت عند الحنه لعند المغرب وروحت تعباااانه وماانشوف في حاجه قدامي رقدت طول الليل

ووعيت تاني يوم ودرت دوش ولميت دبشي امتع الحنه الصغيره حطيت الجلبيه الخليجية وطاقم الذهب امتعي والكندره
وطلعت
استشورت شعري ودرت فتله وحواجب وقنع ودرتلي افلور لشعري وميك اب خفيف جدا

روحت علي المغرب القيت الحوش امعبي
واستقلبوني لووووووووووووووووووووووووووووووووووليا لووووووووووووووووووووووووووووووووووليا
وخشيت وقعمزت علي الصالون وحطو العشاء

رجاء ؛ ويه اتعشي
نا ؛ ﻻﻻ عنديش نيه
رجاء؛؛ طالع اتجنني ثاريتك اتهبلي يا ويه
نا ؛؛ هههههه صاح مع ان انحس في الميك اب قوي اشويه
رجاء ؛ بس ايحننننن

وتعشو وبدو في الشتاوي والغناوي واللي في خاطرها حاجه غنتها اللي علي المرهون واللي علي الجرح والي علي الفقد واللي علي القديم

يييييييييييي سريب بكل بس مشي الجو ايهبل وحت حفله اتجننننننننن رقصوني وغنو علي حنتي وعلي مراد

ولما جيت في الليل وحطيت راسي علي المخده
شفت البنات كلهن كيف كل وحده ماسكه فونها وتحكي ونا بكره ح نزوج وح نمشي انعيش مع راجل ماعمري حكيت معه علي الفون ولا مره سهرت معه ولا مره تعركة معه وتاسفلي واتاسفله وتميت انفكر كيف بكره ح نزوج واحد ونقعد نا وهو في نفس الحوش ويسكر علينا باب ولا مره هو قالي انحبك ولا انا حتي كلمة حبيبي ماقالنها يعني خلاص بكره ح نزوج يعني خلاص الليل هذه اخر لليله ليا في حوش هلي يعني معش انوعي علي صوت ماما اميره ايمان رجاء يعني معقوله الدنيا شينه لدرجة اتطلعلك من الحوش اللي تربيتي فيه وتمشي اتعيش مع شخص لا تعرفيه ولا يعرفك اللي بينتكم فقط ورقه وفي بوم من ايام هالورقه تنشرط وكل حده يمشي في حاله
انفكر وخايفه من فكرة ان نا ح نزوج بكره وح نقعد جنب مراد اللي مانعرفه بكل صح في حاجه فيا جو تبيه ومتريحتله بس انحس فيها واعره واعره واااااااااعره

هذاك الليله ما جاني نوم تميت نستغفر ونقراء في المعواذت نين رقدت ودمعتي علي خدي

و واعيت تاني يوم علي صوت بكاء
صبيت نجري وخشيت نجري القيت……………………..

يتبع