مسلسل سعاده كاذبه
الحلقه 15ونا بديت في روحي درت ميك اب خفيف جدا واميره درتلي استشوار وطلقت شعري ولابست قفطان شوفوني بيج وفيه ورد وردي حلو ولطيف واقصير
وجت مروه ومرات علي ونعيمه بس نا طبعا كان راقيلي من نعيمه مابيتش نطلع عليه وقعدت في الداروبعد نص ساعه اتخش عليا رجاء تجريرجاء ؛؛ ويه ويه
نا ؛؛ كنك تجري انتي
رجاء ؛؛ ويه تعالي العرب جو وشكلهم فشاكين من حالهم وخليك لابسه الكندره
نا ؛؛ حتي نا قاعده بها مش سلحتها
رجاء ؛؛ مراد شفته نزل الحاجات وجاي يبي ايعدي خالتي قالت خش سلم عليها قبل
نا :؛ قصدك مراد قاعد
رجاء؛؛ ﻻﻻ قال بعدين لما انروح تو انسلم عليها قال عندي عياده تو
نا ؛؛ يييييييي عليا تو خالتي فاطمه تحرجني واتقولي اطلعي عليه هكي بالابستي هذه
رجاء ؛؛ هيا ويه صبي تعطري واطلعي
نا ؛؛ به
صبيت بحتت في روحي علي المرايه زدت روج وحطيت عطر ورتبت شعري وطلعت طبعا نا طالقه شعري وخليته علي طوله وهو طويل تحت من ظهري بشويه
لابست خاتم بسيط واسواره ذهب اخفاف
وطلعت ونا طلعه وقلبي يرعش جو يرقص رقص جو في جسمي قالت بسم الله وخشيت عليهم في لدار الضيوف
نا خشيت ومنحرجه
السلام عليكم
كان اللي جيات خواته 3 وصلفتي وامه
اخته الكبيره حنين ؛ عليك السلام
وخشيت وسلمت عليهن ولما جيت علي عمتي ام مراد
خالتي فاطمه؛؛ هذه عمتك فتحيه ياايه
نا طبعا فهمت علي خالتي فاطمه وسلمت عليها وحبيت علي راسها وعلي يدها وقعمزت
ونا طول الوقت ونا خايفه وكان واضح عليا الخوف
وهن ايبحتن فيا من فوق للتحت ايفصلن فيا تفصيل
فتحيه ؛؛ تحكي لماما
الحق نا مانعرفها ابنيتك بس فاطمه لما حكتلنا عليها وتمت ملحه قالنا بدال انتي عارفتيها قدها وقد انها تمسك العويل واوليدي نا اموافقه
مع ان انا قالت اصغيره بس هي حكتلي ان انتي امربيتهن علي المسؤليه فرحت الحق
ماما ؛؛ والله ايه بذات من دون بناتي كلهن ماشاءالله عليها تمسك في الحوش مسك لما نمرض هي اللي تخدم عليا حتي خواتها ادف فيهن عليا ونا مرضي خلي بناتي يكبرن قبل وقتهن نا قعدا طايحه وهن اللي ايديرن كل شيء حتي ابنيتي الاخيره عطيتها المده اللي فاتت
ﻻن هن متعودات علي الحوسه الطبخ ومتعودات علي حوش العيله ونا حوشي ديمه ناس طالعه وناس خاشه
خالتي فاطمه؛؛ الحق نا اللي عجباتني مش في وجهن نشهد بالله انها امربيتهن تربيه صح وحراير وراقيات انتي عارفه يا فتحيه نا ديمه نشكرن فيهن قبل مانحكي علي ايه
عمتي فتحيه ؛؛ نا اوليدي الحق واعر هو صح حنون بس عصبي واوليدي يبي اللي اتريحه مش اللي اديرله مشاكل
هو ما طلق الاولي علشان هي هكي تبي اطلعو تبي اخشوش يا في المستشفي يا طالعه مااتفقش معها
مع ان خذها علي قصة حب كبيره كانت تقرا معه
وماحوته خذها ودلعها واجد نين هي ساحت وتمت اتامر نا قالت له قالت ان راه الصبايا يبنش دلع اللي دلعها تركب فيك بالطلبات
ياحنه تبي تخدم وراتب سمح وتبي اطعو وخلاص و هو معش تريح معها
الحق ولما طلقها هي اللي قالت ما نبيهم الاعيال تحساب روحها تمكر في مراد اوليد يقدر يزوج 4 مش امصبيه عليها
ونا تعبت ونا انعاني فيهم نا قالت ازوج وجيب وحده تمسكهم نا مراه نخدم وعندي واجبات اجتماعيه وماعد عندي حمل انتحمل هرجة عويل وعويل تو واعرين هو قبل رافض بس لما شفني تعبت وافق علي الزواج وطلب انها اتكون لا تقرا ولاتخدم قاعده في الحوش امتي مايخش يلقها قدامه امطيبه واتحددله دبشه
مع ان قالت مافيش تو من بنات تو لا تخدم ولا تقرا كلهن اللي ماتقرا تخدم بس فاطمه قالت علي ايه وهو وافق ونا قالت اللي تبيها نا مادخلنيش مرات ماتريحش معها واتجيني تقعد اتقول كلها منك
طبعا ماما انقهرت من كلام مراه لان كانت متكبره وتحكي وخشمها في السماء و هازيه عليا ونا حسيت بحاجه كيف خشت وتمت تعسر في قلبي عسر
لاني عرفته ان واخذ مراته علي حب وتخلي عنها معناها نا شن وحسيت ان هو واخذني نخدم عليه وعلي اعياله
و هي تحكي حسستني اني مش ح انتريح مع مراد
طبعا نعميه امقعمزه وعاجبها الكلام وماتبش اتصبي بكل ماتبيش اتفوت عليها كلمه بيش تشمت فيا وطول وقت اتبحت فيا بنظرة شماته
ومروه مره مره تفهم علي الجو واتخش وتقعد اتحوس مع خواتي واتقدم مع خواتي
عمتي فتحيه ؛؛ تعالي يا ايه انلابسك دبلتك
خالتي فاطمه؛؛ بنات تعالنا اهو تبي اتلابسها الدبله
وجن خواتي وتمن ايزغرتن
وهي لابستني الدبله وجت واسعه عليا
عمتي فتحيه ؛؛ املاه الخاتم واسع عليك اللي عطيته علينا
نا ؛ ﻻ والله ايجي عليا
عمتي :؛ باهي مبروك عليك
نا ؛؛ يبارك فيك وسلامت عليها وعلي ماما وخواتي وخالتي فاطمه وخواته ومرات خوه
عمتي فتحيه ؛؛ هذين افلوس بيش تشري دبشها لفرح وان شاء الله تو انسقو يوم تفريشت الشقه وراه هي فيها اثاث مش ناقصها واجد
ماما ؛؛ باهي بارك الله فيك نا قالتلي فاطمه علي حق الصاله وهذين هن وحق الحلويات واي حاجه تبو حاضر
عمتي فتحيه ؛؛ اها نا لما قالت فاطمه ديرو مشترك وافقت الحق ﻻن متعب فرح 2 مع بعضهم
و قالت بس نا خلاص حاجزه في كل حاجه قالتلي تو نعطوك الفلوس
وبعد ساعتين من الهدرزه وشروط الابله فتحيه
دق الباب
خالتي فاطمه؛؛ ايه عدي افتحي الباب اكيده مراد وقوليله ايخش
نا ؛؛ بحتت في خالتي وانحرجت وصبيت وطلعت وشيرت للخالتي وجتني
وخشينا للمطبخ
نا ؛؛ خالتي نبيش نطلع عليه
خالتي فاطمه؛؛ اطلعي سلمي عليها وخليه ايشوفك لابسه هكي بيش تعجبيه راه هذا راجلك انتي
مروه ؛ ويه اطلعي واهو وتيتلك مثرد فيه موالح وحلويات بيش تعطيهن له
نا ؛ اوووو عليك عز مانيش اطلعي انتي يا خالتي
خالتي؛؛يا هبله اطلعي انتي تو اطفشي الراجل اطلعي وخليه ايشوفك ساد المره اللي فاتت عقدتيه
نا ؛؛ خليه ايطربق هو اللي خلني نوصل معه هكي
خالتي فاطمه؛؛ طيح سعدك تبي اطفشي الراجل هو ايرن
الو اهلا مراد
مراد ؛ عمتي نا بره هيا قولي لهلي
خالتي فاطمه؛؛ ﻻ تعال خش بيش اتسلم علي ايه
مراد ؛؛ نبيش انسلم هيا قوليهن
خالتي فاطمه؛؛ باهي به
وصكرت منه
ايه اطلعي الراجل راقيله ياهبله تو اتودريه من بين ايديك
بحتت فيهن وطلعت ونا طالعه راقيلي بكل
ومشيت وطلعت لجنان وفتحت باب الشارع ومالقيت ماحد طلعت راسي بجنب وايطيح شعري وجت عيني في عين مراد وهو في السياره
طلع منها ابسرعه وصكرها بالمفتاح وخش عليا ابسرعه في الجنان وكان امفنص بكل
وخش وصكر الباب وراه ومسك يدي من مرفقي بقوه
مراد ؛؛ كنك انتي طالعه هكي فيش اديري بره في الشارع
نا؛ تي اها حول يدك
مراد ؛؛ ايبحت فيا وامفنص
شن تبي طالعه في الشارع هكي وامطلعه شعرك لمن طالعه انتي
نا ؛؛ وجعتني يدي وتميت انفك في يده وهو كل ماله يقوي اخر
حول مراد وراس مراد حول
وطلق مراد يده
مراد ؛ وهو متعقد
خشي جو
نا ؛؛ باهي وبرمت وجي وكان عيوني ملينات ادموع وخشيت وسمعت باب الحوش انفتح
جت خالتي فاطمه ؛؛ مراد مراد تعال تعال
نا بحتت في خالتي ومنصدمه
مراد ؛؛ نعم ياعمتي
خالتي ؛؛ تعال خش لمربوعه ايه تبيك هذا عليش طلعتلك
نا انصدمت من كلمة خالتي وخشيت في الممر
وهو جا وراي
مراد ؛ نعم ها
خالتي فاطمه؛ الطف يا مراد كنك مش قالت لما نروح تو انخش تعال خش ايه امتويتلك قهوه تعال اشرب
مراد ؛ كان ايبحت وراقيه وخش لمربوعه
ونا خشيت لصاله وخشت وراي خالتي
خالتي فاطمه؛؛ انتي كنك هبله ولاه مهبوله عدي خشي علي الراجل
نا ؛ نبيش اهو تو قبل ضربني يعني من ثاني مره ايشوفني ايخليني نبكي هكي
خالتي فاطمه؛؛ حتي انتي غالطه يا ايه ليش طالعه لشارع وامطلعه اشعرك عاد انتي مراته ومايرضش هو هكي وبعدين هذه الغيره هيا وراس ابنيتي خشي ماتخليش نعيمه تشمت فيك
نا ؛ مسحت ادموعي وبرمت وجهي
اميره ؛؛ ايه خوذي القهوه والحلويات قبل
نا ؛ به هاتي
وخذيت السفره ومشيت وخشيت لمربوعه والقيته هو امقعمز ومتعقد وايهز في اكراعه
نا ؛؛ تفضل
وهو رفع اعيونه عليا وخذ القهوه وقعد ايبحت فيا ونا حطيت السفره علي الطاوله وقعمزت
ونحن قاعدين في وضع سكوت
مراد ؛؛ نعم شن تبي اتقولي
نا ؛؛ ساكته ومنزله راسي لوطه
مراد ؛؛ صب وهو طالع
قولي لهلي هيا
نا ؛؛ انصدمت منه وخشيت
خالتي ؛ هكي المثرد وعدي عطيه له
خذيت المثرد وطلعت لجنان
نا ؛؛ مراد مراد
مراد ؛؛ برم وجه
نعم
نا ؛؛ تفضل ومديتله المثرد
مراد ؛؛ شكرا وخذ المثرد وطلع
ونا خشيت عليهم وقالتهم هيا
وسلمت عليهم ونا راقيلي بكل وحابسه ادموعي
وهم اطلعو نا خشيت طول لدار وغيرت دبشي وصليت المغرب وتميت نبكي ومنهاره ونبكي ووجعتني روحي كيف راضيت ياخذني هذا
هو معقد وعصبي وشكله متكبر بكل قعدت نبكي الليل كله نين دخت ورقدت
وقعد وضعي هذا لمده 3ايام وحتي نوم في الدار مع ماما مابتيش لان نبيش نشغلها لما اتشوفني نبكي في الليل
وتاني يوم من ادواخ راسي ماجتنيش نيه انصبي من فراشي وقعدت نبكي طبعا ماما تنكدت واجد لما شفتني هكي نبكي لاني مش راضيه علي زواجي
وجتني تبي اتغيرلي جوي
ماما ؛؛ ايه حبيبتي هيا تطلعي نبو نمشو نا وخالتك فاطمه نشرو مواعين لكي
نا ؛ ﻻﻻ نبيش يا ماما انحس في جسمي متكسر انتي اشري نا عارفه ذوقكن حلو وبعدين خالتي اللي تفهم لان عارفه ديكور الحوش والوان وشن ناقصة
ماما ؛؛ بس هذا بتاتك ضروري تشري
نا ؛؛ ماما انتي عارفه عادل مش ح ايخلني نطلع معكم ونا واثقه فيكم ونا مانفهمش واجد في جو البتات انتن احسن وبعدين انحس في جسمي متكسر ولما انتريح تو نطلع نشري دبشي
ماما ؛؛ به خلاص تريحي
وطلعت ماما وخالتي العشيه كلها وهي في السوق يشرن في المواعين والات الكهربائية
وفي الليل خشن وكان ايديهن امعبيات
اميره ؛؛ لووووووووووووووووووووووووو
ماشاءالله تبارك الله هذا كله في يوم واحد
ماما ؛؛ الله ايربح خالتك كانت اموتيه ورقه خشينا لمحل كبير وشرينا اللي ناقصه كلها تقريبا المطبخ خلاص اقريب انتمو
وتمن يفتحن في الحاجات والحق انا عجبني الحاجات بس كانت فرحتي ناقصه ماحسيتش روحي عروس وانوتي لدبشي لان ح ناخذ واحد مش مقتنعه به بكل
ورقدن هذاك اليوم واوعينا تاني يوم القيت اميره تندب واتعيط في الصاله
نا ؛؛ كنك شن في
اميره؛ ماما طايحه في المطبخ تعالو
وخشيت نا وخواتي كلهن نجارو عليها والقينا ماما طايحه علي الوطا وقعدن انعيطو ونبكو ومشت ايمان تجري شور نعيمه
ايمان ؛ ماما نعيمه طايحه
نعيمه ؛؛ هيييييي بعدك عادل في العمل قاعد
ايمان ؛؛ حتي خالد في العمل
نعيمه ؛؛ تو انرن عليه
ونزلت ايمان ولقتنا انعيطو
نا ؛؛ نبكي وانعيط تي وين عادل وين عادل
ايمان؛؛ مش قاعد اهو نعيمه اترن عليه
نا ؛؛ ﻻﻻﻻﻻﻻ حي عليا تو ماما اتعدي بين ايديا
رجاء ؛ ارتبكت وخشت تجري لدار ورنت علي سراج
رجاء ؛؛ سراج ماما سراج
سراج ؛؛ كانها
رحاء ؛؛ طايحه علينا يا سراج
سراج ؛؛ جيبوها تو لمستشفي ابسرعه
رجاء ؛؛ ماحد قاعد
سراج ؛؛ به اطلعن واحد من الجيران وقوله له
رجاء ؛؛ به تو نطلع
وصكرت رجاء وجت تجري
رجاء ؛؛ ايه قال سراج جبوها ابسرعه عدو قولها لواحد من جيران ايجيبها
نا ؛؛ هيا هيا
ومشيت نجري ولابست عبايتي
وطلعت نجري لجيران ونا ادق عليهم بقوه
طلع عليا ولدهم
نا ؛؛ تعال بالله عليك ماما طايحه علينا تعال شياله خالد وعادل مش قاعدين
ولد ؛؛ جارنا هيا هيا وتنها بدال ما طلعت السياره
وهو خش يجري
ونا عديت نجري لحوشنا ولابسنا ماما ابسرعه وطلعت
وطلعت نا والقيت رجاء اموتيه روحها
رجاء ؛؛ ابسرعه سراج قاعد يرجا فينا غادي
نا ؛؛ هيا هيا وطلعت وركبنا مع جارنا في السياره ونحن نبكو
جارنا ؛؛ وسعن بالك ادعلها عليش البكاء وهو ولع القرآن
ونا ورجاء خفنا واجد وتمين انعيطو اخر ونبكو
نين اوصلنا للمستشفي ونزلت رجاء تجري ولقت سراج قدامها
رجاء ؛؛ سراج تعال تعال ابسرعه
وجا سراج يجري طبعا كان معه برايله ومعه ممرضات اموتيهن معه
وركبو ماما ومشو بها يجارو وقعدنا نبكو وانعيطو وسراج خش يجري بماما
وجتنا عجوز وتمت اتهدي فينا
يابنياتي وسعن بالكن وادعلها
نا ؛؛ ياناعليا ياماما يا سندنا حي عليا نا كان اتعدي وحق ربي انعدي فيها
ورن جارنا علي خالد خويا
ونا ورجاء حالتنا حاله في المستشفي انعيطو ونبكو
وايمان في الحوش رنت علي خالتي فاطمه وقالتها
ونحن انعيطو ايجي مراد
مراد ؛؛ ايه وينها امك وينها
نا ؛؛ اول ما شفته جيت ابسرعه ونا نبكي وحالتي حاله ومسكت في دبشه
مراد وراس مراد شوف ماما خشو بها وراس مراد
مراد استغرب لما شافني اقريب منه ونبكي
نا ؛؛ ماما يا مراد ماما
رجاء ؛؛ حي عليا حي عليا
مراد ؛؛ باهي وسعن بالكن من خش معها
نا ؛؛ دكتورها سراج خش معها
مراد ؛؛ الجراح
رجاء ؛؛ اها
سراج ؛؛ باهي اطمن راهي في ايدين امينه
نا ؛؛ مراد عدي خش شوفها
مراد ؛؛ باهي امغير اسكتن قبل
وايخش علينا عادل وخالد
واو ماشافت نا خالد عديت نجري شوره ونبكي وانعيط
نا ؛؛ ماما ياخالد تبي اتسيبنا ياخالد
خالد ؛؛ كان شاد روحه وخنقته العبره قولي خير يا ايه وقعدنا نا ورجاء نضبطو في خالد
عادل ؛؛ شن صار يا مراد
مراد ؛؛ اهو نبي انخش انشوفها وانتو اطمنو راهي عند دكتور سراج
ومشي مراد وحاول انه ايخش وسراج لما اعرفه خششه معه لان اعرفه يبي يطمن
مراد ؛؛ ها دكتور شن صار معاك
سراج؛؛ هي مالها شيء دايره عمليه وهي شكلها امسيبه دواءها وسكرها هابط بكل وهو اللي تعبها واجد
مراد ؛؛ بالله عليك دكتور سراج نبيك اتكون معها
سراج ؛؛ اطمن دكتور مراد هذه مريضتي ونا اللي انتابع معها بس راه ح انخلوها في العنايه علي الاجهزه احسن
مراد ؛ به
وطلع مراد ولقي العيله كلها
خالتي فاطمه؛؛ ها مراد شن قالو
مراد ؛؛ ح تقعد علي الاجهزه تو لان سكرها هابط واماثر في قلبها لان حتي شكلها امسيبه دواءها
نا؛ ؛ تميت نندب حي عليا نا حي عليا نا كلها مني معش تميت نرقد معها حي عليا
وتمت مروه تضبط فيا واتسكت فيا ومراد ايبحت فيا ومتعصب
مراد ؛؛ روحو بيهم ماشور شيء قعدتهن هنا
خالد؛؛ وامي ح تقعد هنا
وجا سراج
سراج ؛؛ الحمدالله اسعافنها بدري وهي تو ضروري تقعد علي الاجهزه لان نا نبي نطمن عليها قبل
بس هي راه امسيبه دواءها وين الاهتمام اللي قالتلكم عليه نا مش قالت نبيش زعل ونبي تنظيم في الداوء والوكال
نا ؛؛ كلها مني ومن زواجي اقعدت مهتمه بالبتاتي وامسيبه دواءها
خالتي فاطمه؛؛ خلاص يا ويه ساهله وقولي الحمدالله اللي جت هكي
علي ؛؛ هيا روحو كلكم ماعندكم عليش قاعدين
نا ؛؛ ﻻﻻ نا قاعده معها انتو عارفين مستحيل انسيبها
عادل ؛؛ تعالي تبيك يا ايه
نا ؛؛ نعم
ومشين وابتعدنا علي الاهل
عادل ؛؛ كيف طالعه هكي بلا خمار
نا ؛؛ هييييي انسيته والله انسيته يا عادل
عادل ؛؛ انتن ما اتصدقن اتحصلن فرصه بيش اتزيطن والله تو اتشوفي يا ايه وحسابك في الحوش غادي
وجا علي ؛؛ خلاص ياعادل اختك كانت مرتبكه علي امك خلاص
وجت عيني في عين مراد وتحشمت منه لان عرف ان عادل قاعد ايهزب فيا وهو برم وجه وعدا
وعدو هلي كلهم ونا قعدت بس مع ماما
وبعدها جاني عادل طول وكلن جايبلي الخمار لابسته واقعدت امقعمزه قدام غرفة ماما لان ممنوع انخش عليها
وجاني سراج
سراج ؛ اطمني ايه حالتها اكويسه الحمدالله
نا ؛؛ان شاءالله يارب والله نا خايفه يا دكتور عليها
سراج ؛؛ ﻻﻻ اطمني انتي عارفه امك قويه بس الله الله علي مواعيد الدواء
نا ؛؛ حاضر دكتور
ومشي سراج
ونا قعدت مقعمزه ونبكي وبعدها طلعت من القسم وشفت والقيت ثلاجة ميه مشيت شورها وتميت انصب وجا واحد تمه اينابش فيا ونا مش امعدله رفعت خماري وتميت نشرب
الشاب ؛؛ نجيها ياربي ونجي حنتها والله يااعوينه اللي خاطبك وحاط الدبله في يدك
مراد ؛؛ نعم استاذ في حاجه هنا
الشاب ؛؛ ﻻ في شيء انت كنك
مراد ؛؛ والله نا اللي صاحب الدبله
الشاب ؛؛ بحت في مراد وعدي يجري
ونا قعدت انبحت في الموقف وامرفعه خماري
وقرب مني مراد ونزل الخمار
وتمه ماسكني فوق المرفق وقعد شاد عليا نين حسيتها لان القرصه واعره وهو ايزيد اخر
مراد ؛؛ مره تانيه لما تلابسي الخمار كوني قده وايديك هذين غطيهن ولا انتي فرحانه بحنتك والدبله واتوري فيهن
نا ؛؛ ﻻ والله ماهكي اه يدي يامراد
ومراد قعد شاد عليا اخر وتمه ايدف فيا قدامه شور غرفته
ونا نمشي ونبكي من شدت يده وانحاول انحول يده بس ماقدرتش لان كان قوي نين خششني لغرفه وسكر الغرفه وطلق يدي
قعدت نبكي وماسكه يدي
وهو قرب مني وامفنص ويحكي بصوت عالي
مراد ؛؛ عاجبتك المنابشه تو كنك انتي كل مالكي اديري في حركات ايكرهني فيك
كنك ماتبيش قوليها ليا وانتي دايرتني مشروع لزواج وعايشه حياتك من وراي
نا ؛؛ قعدت نبكي لاني خفت منه واجد لان شفت الشر في وجه
والله ماهكي يامراد
نا كنت نشرب في ميه هذا عليش امرفعه الخمار
مراد :؛؛روحي ماتقعديش هنا في المستشفي مره نلقاك تحكي مع دكتور ومره نلقك تضحكي لواحد اينابش شكلك طايشه انتي
نا ؛؛ مراد نبي نطلع
مراد ؛؛ فيش اطلعو نين اتروحي
نا ؛؛ ماعندي من ايروح بيا نا قاعده مع ماما هنا
ومشي مراد وراء مكتبه وقعمز وحول البالطو الابيض وولع دخان
نا ؛؛ مراد نبي نطلع
مراد ،؛؛ساكت ومابش ايرد
وقعدت نحكيله اخر وهو ماعدلش عليا
دق الباب
وصب مراد ايشوف
الممرضه ؛؛ دكتور في مريضه تبيك
مراد ؛؛ انا دوامي كمل ونا تو عندي شغل في الغرفه
وسكر الباب
نا ؛؛ مراد نبي نطلع
مراد ؛؛ ايه سكري فمك كذا
ونا تعقدت وقعمزت علي سرير الكشف و بعدها شفت ميه ومشيت نشرب لاني مازالت عطشانه
وصبيت ورفعت الخمار
وشربة وحولت الخمار والوشاح وتميت انسقم في شعري ولافيته اكويس
وهو ايبحت فيا من تحت لتحت
نا ؛؛ مراد نانحبش الدخان بنته شينه
مراد ؛؛ ساكت وايبحت فيا
ومسك فونه وتم ايرن
مراد ؛؛ الو عمتي كيف حالك
خالتي فاطمه؛؛ تمام اكويسه
مراد ؛؛ عمتي خلي حد ايجي ايروح بها قعدتها في المستشفي خطا
نا ؛؛ نطيت
ﻻ يا مراد نا نبي نقعد هذه ماما نبي نقعد معها
مراد ؛ نا قالت كلمه وحده اتروح معناها اتروح وجي هنا في المستشفي خطا
وصكر مراد
ونا تميت نبكي
نا ؛؛ انتي اناني يامراد نا نبي نقعد مع ماما ومش ح انروح
مراد ؛؛ عنديش مراه تقعد هنا
نا :؛بس اللي جوا ماما ونا ح نقعد سوء تبي او لا
مراد ؛: به يا ايه تو اتشوفي من اللي كلمة ح تمشي
ورنت خالتي فاطمه
مراد خليها تو لان عيسي راقد وتو بعدين ايجيها ايروح بها
مراد ؛؛ باهي ياعمتي بس هذه اخر جيها هنا لها
ونا قعدت مقعمزه
مراد :؛؛ اخر مره تطلعي بالبيز هذا علي يدك
نا ؛؛ نا كان عندي تلابيست دبله يعني من طبيعي انحني
مراد ؛؛ اخر مره تطلعي هكي نا قالت واطلعو بصفه عامه معش في والحنه معش نبي انشوفها هذه
نا ؛؛ ساكته ومتخزرطه
ودق الباب اخري
الممرضه ؛؛ دكتور الدكتورة سهير تبي الغرفه
مراد ؛؛ هي لاني طالع
وصب وخذا شنطته
اطلعي هيا
نا ؛؛ وين نمشي
مراد ؛؛ عدي شور غرفة امك غادي
نا فرحت ومشيت ابسرعه وكان مراد وراي يمشي وشفت ماما القيته مازال علي الاجهزه وقعمزت علي الكرسي ومراد كان امقعمز وراي وايبحت فيا وسارح
وبعد نص ساعه خش خالي وروحت معه ونا ساكته وطلعت وشفت مراد امروح حتي هو
واول ماخشيت علي خواتي انفجعن
اميره ؛؛؛ كنك يا ايه جايه
نا ؛؛ غمتلي وشفت نعيمه قاعده مارديتش عليها وخشيت لدار وقعدت نبكي وحالتي حاله
رجاء :: ايه كنك جيتي شن في
نا ؛؛ مراد قالي روحي
رجاء ؛؛ هييييييي عليش
نا ؛؛ ﻻن شاف واحد اينابش فيا قالي تو اتروحي حتي ان دوامه كمل ومابش ايروح نين شافني روحت
رجاء ؛؛ اها راه معه الحق يا ايه انتي تو مراته وعلي ذومته ونحن خطا منا اصلا انخلوك مع ماما وبعدين انسيتي انتي انك عروس
نا ؛؛ ﻻﻻ مش عروس نا نا اهم حد عندي ماما
من مراد هذا نين ايجي وايقولي تقعديش مع امك في المستشفي زي ما هو قال شرطي اتربي اعيالي اكويس نا شرطي اني نقعد مع ماما
رجاء ؛؛ خلاص ياويه تريحي راه تو كنت انكلم في سراج وقالي واضعها تمام ونا عابيه راه انجيك عند المغرب في المستشفي ونقعد انبات مع ماما
نا ؛؛ نا نبي انقول لخالتي تفسخ خطبتي خلاص مراد معش نبيه
رحاء ؛؛ طيح سعدك انتي تبي الناس تشمت فيك كنك انتي هذا راجلك ومن حق ايخاف عليك
نا سكتت وصبيت وحولت عبايتي ولما شفت ليدي القيتها امعلمه من قرصة مراد
انقهرت وتميت نبكي اخر
واذن المغرب وغيرت رجاء لابستها وخذت معها حاجات ومشت للمستشفي مع خالد
ونا قعدت في الحوش ونبكي وانفكر في مراد كيف ان هو قاسي عليا تو انا مراته معقوله كل ماانشوفه انتعقدو من بعضنا ومرتين ايبكي فيا
وخشت رجاء ولقت ماما اقعدت تبكي واتفكر في حياتها لو سيبتها ماما وجاها سراج
سراج ؛؛ رجاء اعويناتي خلاص
رجاء ؛؛ سراج كنك جاي انتي
سراج ؛؛ يعني انتي تعقلي اني نعرفك قاعده في المستشفي وماانجيكش
رجاء ؛؛ سراج شفت ماما
سراج ؛؛ والله امك وضعها اكويس ونا خليتها في العنايه لان نبيها علي الاجهزه ونبي نطمن عليها اكتر راه هي هابط سكرها و اثر علي قلبها وهو اللي خلها اطيح ادوخ شوفي انتي السكر واعر لما يهبط علي شخص عادي يا بال يهبط علي مريض القلب اكيده حاجة دقيقه اكتر
خلاص عويناتي بلا ابكاء راه والله نزعل منك وانعدي انسيبك
رجاء ،؛ نجك ليا ياحبيبي عارف والله كان ما انت قالت اطلعو لجيرانكم راه ما طلعنا ولا اخطرت علينا وشكرا لاني تعبتك معي
سراج ؛؛ اعويناتي انتي عندي بدنيا ومافيها وانا اليوم قاعد مع امك وكأني قاعد مع امي نا
وقعدو رجاء وسراج ايهدرزو
وفي الحوش خش علينا عادل افلم ومتعقد
عادل ؛؛ الحقيره وينها
نا ؛؛ انفجعت ومعش عرفته من يقصد
عادل ؛؛ ياكلبه اللي اسمك ………………..
يتبع