رواية لا تسألنى من انا
#لاتسألنى_من_انا
?بقلم زهور جمال الدين?
??الحلقه الثانيه والعشرون ??
محمود مشى لبوه شاوره يرفع امه ولا لا …فقاله ديرو رايكم
كان بتمشو عادى
خدى منه مفتاح السيارة ومشى لامه ركبها ومشو لحوش
عمتك مريم حسب ماوصفتلهم هيا
محمود فرحان بيطير / يااام كان ماكش راضيه بلاش منها المشيه
-فايزة/ وراس وليدى ماشيه بطيب خاطرى ..ربي يجعلها من نصيبك
-محمود / زعما قالتلها عمتى مريم
-فايزة / قالت مش حنقوللها لين توصلو
وقف على محل خدى شوكلاته وباقة ورد…
والفرح باين عليه
__________________________
صفاء ركبت التاكسى ومشت
وصلاح شافها شدها فى جرتها ….
التاكسى تمشى وهما يمشو ..ساكتين يترقبو يبو يزبطوها وين بتمشى
وصلت مصنع العصير اللى قالتلها عليه رواسى
نزلت من التاكسى ووقف صلاح فى مكان بعيد
وقعدو حايريين انها نفس منطقه حوش وليد
وزادو تفاجؤ لما لقو صفاء فتحت الباب الخارجى لحوش
وليد وخشت لان رواسى مخليتهولها مفتوح
-صلاح انصدم / زعما صفاء منين تعرف الدكتور وليد
-خالد / اااهااا عرفتها هادى امس فى الليل بايته فى حوش وليد
-صلاح/ مستحيل ..شن تقول انت ياعمى خالد ..صفاء منين تعرف وليد…
وتلفتله / وبعتالى كيف بايته عنده !!؟
-خالد / ماتفهمش غلط يا صلاح ..البنت قالت انها عندهت
مشكله واستنجدت بالدكتور وهوا استضافها فى حوشه
-صلاح / شنهيا المشكلة اللى عندها صفاء ..ومنين تعرف
وليد بيش تمشيله ..وامس امتى طلعت وباتت هنايا وكيف
لاحضها لما طلعت
وفتح باب السيارة بينزل/ انا لازم نسألها ونفهم منها
-خالد / ماتنزلش يا صلاح ..خلينى انا نكلمها ونفهم منها
..مرات البنت لما تشوفك تخاف وتختلق اى كدبه ومعش
تفهم الحقيقه شنهيا
-صلاح / باهى انزل واسألها وانا انراجى فيك هنايا ..ممكن
تطلع تعرف مكان رواسى وداسه عليا
-خالد / كلام معقول ..لكن تصبر لين نطلعلك انشالله نقعد
لليل ..رد بالك ادير اى تصرف
-صلاح / حاضر غير انشاءالله نقدر انسيطر على روحى
__________________________
وليد ركب سيارته وطار للحوش …
وفى خاطرها / من اولها هكى ..الكلام اللى انقوله انا يطير
فى الهوا..لازم انفهمها ان كلمتى هيا المسموعه ..وكلمتى لازم
تمشى عليها حتى لو مش عاجبها
درس قدام الحوش لقى سيارة غريبه واقفه قدام حوشهم
نزل ..ومشى لباب الحوش
لقى محمود وامه خاشين من باب الجنان وصلو لباب اللوح وايطقطقو
-وليد مستغرب لانه ميهرفهمش/ السلام عليكم
-محمود تلفت وباينه السعادة على وجهه/ وعليكم السلام
ومد صبعه وجهه عليه / الدكتور وليد
-وليد / اى نعم وليد ..من حضرتك
-محمود / انا محمود وهادى امى …
-وليد زبطه / اوووو محمود …
ومد يده سلم عليه وعلى امه / آنستونا …العيلة عندهم علم انكم جايين
-فايزة / كلمت مريم بكرى ..وقالتلى تفضلى
-وليد / مرحبتين بيكم
وحط المفتاح فى الباب وفتحه /تفضلو
لقى غادة كيف حاطه يدها عالباب وبتفتح
لقت وليد ابتسمتله ….
وهوا ياسبحان الله نسى الزعل ونسى انه جاي بيحرفلها ايامها ??
-وليد / محمود وامه هنايا
-غادة همستله / عارفه بجيتهم ..يتفضلو
وبالفعل خشت فايزة سلمت على غادة وخشو للصالة
اما محمود ووليد خشو للمربوعه لقو عمك محمد بو وليد
مقعمز ايراجى فيهم لان مريم بلغاته
سلمت فايزة على مريم وقعمزت
-فايزة / شنحالكم يا مريم ..وشنحال فطومه
-مريم / انا وغادة حالنا باهى ..لكن فطومه حال عدوينك
-فايزة / عارفتها خاطرها واجعها وانا جايه بنطيبلها خاطرها
وبنحطبها لولدى محمود ..ماعندنا وين بنلقو زيها
-مريم / الحق انا مابلغتهاش بجيانك ..وقلتلها اختى جايه
ونبيك تسلمى عليها …خفت لو نقوللها عليك ترفض انها تطلع
-فايزة / وخيتى واعز يا مريم
-مريم تلفتت لغادة / بري نادى فطومه يا غادة
-غادة فرحانه / حاضر
وبالفعل ناضت ومشت لفطومه طقت عليها ..فتحت الباب وخشت
-غادة / شنو لبستى ولا كيف
-فطومه / اووووف اهو لبست سروال وبلوزة ..بنسلم وبنخش طول
-غادة / انتى غير اطلعى سلمى وبعتالى ساهل
__________________________
صفاء خشت للحوش قفتحتلها رواسى الباب على طول
واضبطو بعضهم وهاتك يا بكى
-صفاء/ هكى اديري ..تخلينى بروحى وتهربي
-رواسى/ نخليك عينك ..انتى روحى حد يخلى روحه ويهرب
-صفاء / امالا شن صار احكيلى … لكن قبل ماتحكيلى انا
جايبتلك خبر مش حتصدقيه
-رواسى / غير خلى نطلعو من الحوش ونمشو لاى مكان
ونحكو فيه
سمعو صوت …حسو ان فى حركه فى الجنان …
-رواسى بهمس / اشششش تعالى نخشو للدار لداخل
خالد خش للحوش من باب الكنشيلو …
وقف فى الجنان شوى …يخمم …
وبعتالى فتح الباب وخش …
-خالد / يابنتى …يابنتى
-صفاء من ورا باب الدار بهمس/ هدا منو
-رواسى تهمس/ هدا صاحب الدكتور وليد وساكن معاه
-خالد قرب من باب الدار/ يابنتى ياصفاء افتحى
صفاء بدت تتخضر وتتصفر ?/ منين عرف اسمى
-خالد بدى صوته كأنه بيبكى / تربحى يابنتى افتحى الباب
..سألتك بالله لو تعرفى مكان رواسى وين دلينى … رانى
تعبت وانا ندور عليها من مكان لمكان
-صفاء من غير ماتحس قربت من الباب / انت منين تعرف رواسى
__________________________
.
فطومه خشت للصاله لقت فايزة مقعمزة
انخلعت وتلفتت بترجع للدار..شدتها غادة / انتى اسمعيها وبعتالى قررى
-فايزة / شنحالك فطومه بنيتى
-فطومه عيونها تعبو دموع وصوتها انخنق/ الحمدلله
-فايزة / يافطومه نقولهالك قدام الناس .. رانى جايه نخطب
فيك لولدى محمود ..ونبيك تسامحينى على كل كلمه قلتها …
وكان تبينى انوض انبوس راسك انا مستعدة
-فطومه / لا العفو يا عمتى
-فايزة / والله محمود ماهو لاقى خير منك ..ولا انتى حتلقى خير منه …
فطومه تشبحلها وساكته قاعد خاطرها واجعها
-مريم / هاا شن قلتى يا فطومه ..فايزة جايه تخطب فيك
لولدها …وزى ماتبى انتى ..تبيهم باهى ..ماتبيهمش بردو
باهى انتى وراحتك
فطومه جت قعمزت عالصالون / انا الحق مانقدرش ناخد
واحد اهله مش راضيين عليا
ونزلو دموعها : انا تشوفو فيا لا اهل لا وخيين ..ومن زمان
خاطرى اندير امالى راجلى اهلى..وبوه بوى ..وامه امى..اما
لو كانو هما مايبونيش كيف بنديرهم امى وبوى وخواتى
ناضت فايزة من مكانها ومشتلها / بالنسبه ليا انا عرفت
غلطتى وعرفت انى ظلمت ..ووالله حاسباتك بنيتى حتى لو
ماوافتيش على ولدى
-غادة تضحك / تكلمى يا فطومه ماتعانديش مشاعرك ..انتى
تبيهم ..ليش تكدبى على روحك
-مريم / هااا يا فطومه اموافقه
-فطومه واطت راسها / مدامها عمتى فايزة تبينى وجايتنى
عن طيب خاطرها انا موافقه ..لكن لو جايتنى لان عمى
ابراهيم غاصبها انا مانيش موافقه
-قربت منها فايزة واضبتها / والله جايه من وسط قلبى غير
ارضى عليا وسامحينى ..ووافقى على ولدى
-فطومه / اموافقه
وزغرطت فايزة زغروته قويه خلت حتى اللى فى المربوعه يسمعوها
-مريم فرحانه / هاتى العصير والشوكلاته يا غادة
ناضت غادة خشت للمطبخ ….
وجى وليد للصاله / يااام وين غادة
-مريم / غادة فى المطبخ
خش وليد للمطبخ لاحق غادة
-غادة تلفتتله فرحانه / محمود خطب غادة ياوليد
-وليد يضحك/ باهى الف مبروك عليها ..زواجة الدهر انشاءالله
-غادة تصب فى العصير فى الكيسان / حقة شن حال الولد اللى داير حادث اليوم
-وليد حامق / خيرك مافوتيش عليه وسالتى بنفسك
-حطت شيشه العصير/ وين بنسأل عليه
-وليد / فى العيادة
-غادة/ انا مامشيتش للعيادة اليوم …مش انت قالتلى ماتمشيش
-وليد مستغرب/ امالا كيف الدكتور هيثم قالى انك بكرى فى الكافتيريا
-غادة / لا والله ..مش انت قلتلى مانجيش غدوة..خلاص
ماخطرش عليا اصلا انى نمشى
-وليد انطفى غضبه / معقولة مشبه عليك
– غادة / منعرفش
وشرين تليفون وليد …فتح الخط ورد / الوو
-الممرضه / اهلا دكتور كيف الحال
-وليد / الحمدلله
-الممرضه / المريض اللى اسمه الطاهر فاق كويس .. وطالب
بشدة انه يشوف الدكتورة غادة
-وليد / وشن يبي فى الدكتورة غادة
غادة قامت راسها وانتبهت بعد ماسمعت اسمها
-وليد / تو نشوف كانها فاضيه تو نجيبها معاى لما بنرجع للعيادة
وسكر الخط
-غادة / خيرهم العيادة شن يبونى
-وليد / مس العيادة يبوك ..المريض اللى انقدتوه انتى وامى طالب يشوفك
-غادة / وانت شن رايك
-وليد / لا رايك انتى ..هادى حياتك وانتى حرة فيها
-غادة / كل شى ولا زعلك ..ولو انت بتزعل بلاش منها المشيه
-وليد حسها منصاعه ليه .. غمض عيونه/ لا عادى مفيش
مشكله نرفعك معاى .مدى العصير وكملى امورك وبعد
مايروح محمود وامه تو ترفعك
-غادة فرحت / باهى
__________________________
صفاء واقفه ورا الباب ورواسى جنبها
-صفاء/ انت منين تعرفها رواسى
-خالد / يابنتى والله ماتخافى انا مش الشخص اللى بيضرها ..بس لازم نتلاقى معاها
-صفاء/ مستحيل نفتح قبل مانعرف انت شكون
.
.
__________________________
تمت ….ويتبع
تى خيرها القصه معش تبى تكمل القصه???…كل حلقه نقول هادى هيا الاخيره مايصير من الاحدات المشوقه
نحبكم هلبا ❤