رواية لا تسألنى من انا
#لاتسألنى_من_انا
.
??بقلم زهور جمال الدين ??
.
.?الحلقة الثانية ?
.
.
عبدالحميد قعد متواصل مع خالد ….
وقعد يتفق معاه شن ايحط فى الملف بيش بعد مايطلع يزبط بنته …على موت ولا على حيا
واول شى داره عبدالحميد انه خلى صورة فى الملف و جاب الثانيه لبوها ..بيش فى حال ان عبدالحميد مش موجود وهوا بيدورها بعد تكبر اول شى يطابق الصورة اللى عنده بالصورة اللى فى الملف ..
-خالد: ليش كاتب الاسم رواسى… ياراجل مش قلتلك غيرلها اسمها
-عبدالحميد : البنية تتكلم كيف نقدر نغيرلها اسمها ..من لما سألوها العاملات قالت اسمها رواسى وبوها اسمه خالد
-خالد يصفق فى ايديه فى بعضهم : لا حول ولا قوة الا بالله حتى اسمى كتبتوه
-عبدالحميد : مافيهاش كيف يا خالد..زى ماحكيتلك البنتت تتكلم وكان بنغير الاسم بنفضح روحى .. لكن ماتخافش انا معاها والله مايقدر حد يوصلها
-خالد : ربك يستر …توة شن الراى قبلتوها عندكم ولا كيف
-عبدالحميد: مزال ثلاثه ايام وتكمل الشهر..بعدها حيضمها المركز لدار الرعايه لعدم وجود بلاغ عنعا .. ونقدرو نديرولها ملف رسمى ورقم عندنا
-خالد : امالا توة وين حاطينها ..ومش قلتلى فتحتولها ملف وصورتوها
-عبدالحميد : توة قاعدة فى الدور الاول اسمها ستاند باى…نوكلوها ونشربوها ونديرولها ملف الاقامه المبدئية ..لكن تقعد تحت وماتركبش للغرف فوق لين تبدا معانا رسمى ونفتحولها ملف رسمى
-خالد حط يده على قلبه وبدى يبكى : كبدى انعصرت ياراجل
-عبدالحميد متأثر: متخافش عليها يا خالد والله زى وحدة من صغارى
__________________________
عند خوال رواسى …
لامين شاد فى يده صورة فيها بناته الزوز ورواسى واقفين مع بعض.. صورهم فى المعرض مع بعض قبل ماتريح منه
-لامين : معقولة هكى ..فص ملح وداب..وين اختفت البنت..جميع المراكز مشينالهم وشفنا البنات الضايعات من اهلهم وهيا شى مالقينالها صنه
-مختار : انت السبب يا لامين ..قلتلك خلى البنت لين نسافر بيها وانت شى مافيك الا العناد
-لامين : انا اللى طلعت معاندى ماهو….واحنا شن وصلنا لهدا كله غير عنادك انت
-مختار عاطى بالضهر يولع فى سبسى : ماهو صنعتك ..توة بدير الحق كله عليا انا
وتلفتله وقام صبعه وجهه ليه: اسمع الراجل اجرناه مع بعضنا ..حتى حسابه دفعناه بالنص متقعدش اتحط فاللوم عليا
-لامين تعصب وركب عليه السكر: انا قلتلك اقتل اختك
…انا قتلك يتم بنتها ..انا قتلك احبس راجلها
جاه مختار يجرى: اسسسس اسسسس فضحتنا
-لامين يبكى: ضيعت لاختك عمرها وهيا فى عز شبابها وتوة جاى تعيط عليا وتنفخ فى دخانك فى وجهى
-مختار يترجى: ياسيدى انت خوى الكبير وحقك على راسى
..وسامحنى توة شن سبب العياط هدا كله بس..منو الغالط. ياسيدى انا الغالط ونستاهل ميه شبشب على راسى غير اهدا بس
-لامين يطير فى دفالاته ويساوى فى نضارته : معش تعصبنى
..ومعش تفكرنى فى العملة السودة اللى درتها لاختك
-مختار : اسمع ماتشكهاش فيا وتقول العملة اللى درتها ..قول اللى درناها …واحنا الزوز ماكانش قصدنا لا ضرب لاقتل.. كنا نبو وريقات متع حصتها اللى داستهم عندها بس
-لامين يمسح فدموعه: الطمع عمى عيونا وودر اختك
-مختار تعصب: ايييه علينا عاد تى ماهو قلنا نقص صوتك
-لامين : انا الاسبوع الجاى مسافر بريطانيا ثانى درت عقد مع جامعه غادى بنبدا نعطى فيها محاضرات…لاااازم تكون داير حل لقصة بنت اختك قبل مانسافر
-مختار : ايصير خير
__________________________
عبدالحميد وقف لان الزيارة انتهت
وخالد نزلو دموعه وبدى يبكى
-عبدالحميد : توة غير شن يبكى فيك ياراجل
-خالد : شاغلتنى بنتى
-عبدالحميد : قلتلك فى الحفظ والصون ..
-خالد : والله عارفك قدها ..وانا بمن متهنى غير بيك انت
وقف عبدالحميد وخر الكرسى وبيطلع
وتلفتله: والله سؤال ايدور فى خاطرى وعندى نيه نسألهولك
-خالد : شنهوا اسأل
-عبدالحميد : مدامك خايف عليها من التبهديل ..ليش ماخليتهاش مع خوالها
-خالد يمسح فدموعه: الاولة حزت عليا نفسى كيف يلوحونى فالحبس وياخدو بنتى ..والثانيه خالها لامين زوجته اجنبيه ومش مسلمه اصلا …وبناتها واخدات راحتهم حتى من بطونهم عريانه وقت يلبسو..ونخاف على بنتى من ربايه زى هكى
-عبدالحميد : وخالها الثانى
-خالد: مختار عنده ثلاث دكورة ..منقدرش نخلى بنتى تعيش وسطهم …
وبعتالى سيورنى نطلعلها …
__________________________
وفاتو الثلاثه ايام …
وتسكر المحضر اللى فتحوه فى المركز
وضمو رواسى لدار الرعاية وفتحولها ملف جديد رسمى انها اصبحت احدى افراد الدار
وركبو رواسى للدور الثانى …
حطوها فى غرفه رقم 6 …..
ساكنين فيها صفاء وفطومه وغادة …
فطومه بنيه هادية هلبا ..وعندها تأخر شوى فى النطق
..وهيا نفسها اللى رفعوها للمركز بدل رواسى?..قصتها انها جابوها عمامها بعد ماتوفو بوها وامها فى حادث ..كان عمرها عام وثمانيه شهور …لما صغيرة ايجوها فى الاعياد ويجيبولها فى حوايج …وبعد سنوات فاتوها ومعش يزبطو على شكلها كيف…عمرها 4 سنوات توة …
وصفاء امها وبوها حيين ..لكن الله غالب بو صفاء انسان مش مزبوط ويتبع فى النساوين هلبا …ركبه مرض الايدز حاشاكم.
..ومنغير مايدرى على نفسه نقله لامها..فخافو على بنتهم تنعدا منهم ..وحطوها فى دار الرعايهة..والدار قبلتها لاسباب صحية…بوها توفى بعد سنه من وجودها فى الدار لكن امها قاعدة حيه ومرة مرة يرفعوها اتزور فيها لانها حاطينها فى غرفه عزل فى المستشفى
اما غادة لقوها ملوحه قدام جامع مش معروف اصلها منين
وضافولهم رواسى للغرفه …دارولها سرير..وعطوها فردة فى الدولاب حطولها فيها حوايجها…
-العاملة: رواسى سلم على صاحباتك الجدد
رواسى مشتلهم مدت يدها تسلم
-صفاء: انتى شن اشمك
-رواسى: اسمى رواسى
-فطومه : حتى انتى بابا وماما ماتو
-رواسى: بابا ماقتلش ماما
-العاملة : شن تدوو انتو ..شنو قتل وماقتلش ..يلا سلمو على بعضكم وخلاص
.
__________________________
وبعد سنتين ….
رواسى عمرها ست سنين ….
بدت تقرا فى المدرسه… وتتعرف على بنات..وتسأل امالا انا وين بابا وماما…
طبعا يقرو فيهم فى مدارس عامه قراب عالدار
وعبدالحميد كان مهتم بيها هلبا
فى ساحة الخارجية للدار …رواسى شافت غبدالحميد واقف مشتله تجرى
-عبدالحميد: شنو بنتى رواسى كتبتى الواجب
-رواسى: انا ماقتلكش عالواجب يا عمو..انا قلتلك وين بابا وماما
-عبدالحميد : بنتى ماهو قلتلك ماما رحمه الله عليها..وبابا مسافر يقرا برة اول مابيروح بيجيك ياخدك
-رواسى: باهى مزال بيعطل
-عبدالحميد : سلم بنتى معش تخممى فيه الموضوع هدالما ايروح تو ايجيك باهى
-رواسى : باهى
من بعيد صفاء اتنادى: رواسى تعالى هيا دورك فى النقيزة
مشت رواسى تجرى بتاخد دورها
-ابله نوارة واقفه جنب عبدالحميد: مش عارفه ليش عندى شعور انك تعرف اهلها البنيه ..وعندى شعور ان وراها قصه كبيرة
عبدالحميد ضحك …
-ابله نوارة: ربي يحفظهم اهلها وين ماكانو..ولو عندهم نصيب فيها حيتلاقو معاها
عبدالحميد سكت لاعطاها حق ولا باطل
__________________________
طبعا العاملات معاملتهم مع البنات متفاوته …فى اللى حنينه عليهم ..وفى اللى تكشخ ..وفى اللى تخدم بنيه ..وفى اللى تخدم فوق النفس…
الله غالب هدا طبع من ربي..والطبع غلاب
طبعا اللى تسأل ايقولولها ماما متوفيه وادعيلها بالرحمه ..
ومن هالكلام ….
لكن الصغيويرة كلهم روحهم فى ابله نوارة …
ايحبوها وهيا تعامل فيهم بحب وحنان ..ماعندهاش تعالى عليهم ….اعمار البنات اللى فالدار من عمر شهور الى 12 سنه بس
وفى يوم عيد الطفل….
دارولهم تورته كبيرة وزينه والعاب ….
طبعا البنات الاربعه صاحبات الروح بالروح …
وهما يحتفلو واقفين على منصه كبيرة …وتجى هاديكه المنصه طايحه بالصغيويرة ….
كلهم طاحو يبكو لكن ضرباتهم سطحية ماعدا رواسى وصفاء انجرحو وحوايجهم كلهم راحو دمايات
رفعوهم للمستشفى …رواسى خيطولها اربع غرزات فى فخدتها اليمين …وصفاء خيطولها تحت حاجبها اليسار غرزتين
خدالها عبدالحميد صورة فى الاحتفال قبل ما ايطيحو بيش يرفعها لبوها …
ولكن لما طاحت وخيطولها بعد ماروحت جاب الصوار و صورلها مكان الخياطه
-عبدالحميد: على موت ولا على حيي بنتك عندها خياطه اربع غرزات فى فخدتها اليمين
-خالد مخلوع : خيرها
-عبدالحميد مدله الصور: هاك شوفها ماتخافش بسيطه ..لكن انت مفروض تفرح بيها تهى امارة اتميزلك بنتك
وعمك خالد يانارى ياخد ويلمد فى الصور ويتفرج ويبوس ويعاود
__________________________
بعد سته سنين ….
رواسى عمرها 12 سنه وتقرا صف السادس…
وكان من المفروض ينتقلو هيا والبنات اللى فى عمرها لمبنى ثانى وادارة ثانيه ….
يبكو دايرينه عزى على فراق ابله نوارة
-نوارة تبكى: ربي يحفظكم ليا حبيباتى والله حتى انا ماهاين عليا فراقكم ….
وحاطه قدامهم ملابس اكوام اكوام …
-نوارة : هيا كل وحدة تختار الملابس اللى تناسبها …بارك الله فى اصحاب الخير..وراهو الملابس كلهم مغسولات
البنات خشو فى هادوكا الكومات ويختارو …
ماعدا رواسى وغادة
-عبدالحميد ينادى : رواسى خيركم انتى وغادة ..مدو ايديكم خودو اللى يعجبك
قعدو يشبحوله وساكتات
-نوارة : تعرف يا استاد عبدالحميد ..غادة ورواسى تحسهم بنات عائلات ولا ..ومتأصل فى دمهم
-عبدالحميد : رواسى جتنا قريب الاربع سنوات ممكن تكون بنت عيله ..لكن غادة جت فالقماطه منين بتعرف ان اهلها تصرفاتهم راقيه وشبعانين
-نوارة : وراسك وراثه فى الدم …وكان نشوفو اهل غادة تلقاهم ناس راقيه ومعبية…عندى نضرة رانى انا
-عبدالحميد يشبح لغادة ورواسى: العلم عند الله
__________________________
انتقلو البنات للدار الثانيه
وياشينك تحويلة ….
تقولى سجن …
صح هما خايفين عالبنات لانهم فى مرحلة مراهقه …لكن خانقينهم هلبا …مش قادرات حتى يتنفسو ..
ومديرهم استاد مراد …
شخصيه وقراويط …ومصاريف وفد ماشى ووفد جاى…
والمفروض البنات اولى بالمصاريف هادو …
بعد ثلاث سنوات
رواسى وصاحباتها يقرو ثالثه اعدادى…طبعا قرايتهم فى مدارس عامه …
لكن الدار اتوصى فيهم انهم مايقولوش انهم بنات دار الرعايه
عشان نفسيتهم
هما يرممولهم فى شخصيتهم ويبوهم يقرو ويتخرجو
العاملات فى اللى تتعامل بطيبه ..وفى اللى تتسمسم
وفى الى غايرة من البنات ..وخاصه اللى ايكونو جميلات
الوحيدة اللى يحبوها ابله سلمى ..
كانت مش متزوجه ..ولدلك تلقاها متواجدة هلبا فى الدار..وكانت طيبه معاهم وتحبهم وتود فيهم وادس عليهم
البنات مروحين من المدرسه…
-رواسى : خلى روحك رزينه وماتشبحيلاش
-فطومه بهدوء: مانقدرش ..لما نوصل جنبه نبدا نرعش وعيونى مايتحولوش من عليه
-صفاء: غير شوفيه كيف يساوى فى حوايجه عارفنا قريب نوصلو
وصلو البنات جنب محل اماعين ..حاجاته كلهم راقيات
-محمود : ممكن لحظه ..
البنات مواطيات راسهم ويضحكو …ومشو فى طريقهم
لحقهم محمود
-صفاء: حيه يابنات راهو الولد لاحقنا
-رواسى ?: حيه غبارة بيعرفك من بنات الدار يا فطومه
-غادة : اوقفى وردى عليه احسن مايلحقنا
-فطومه : حيه عليا مانقدرش …
-محمود : ممكن لحظه
رواسى تلفتتله : تفضل من تبى انتى
-محمود : هاديكا الى عيونها خضر
واشر على فطومه …
-رواسى : عندك دقيقه راهو
رواسى ديما هيا قائدة العصابه ???
-فطومه برقه : لاااا منقدرش انكلمه
-محمود : لحظه بس ماتخافيش
-غادة : بري يافطومه شوفيه شن يبى ..اهو نراجو فيك
تحركت فطومه قربت منه …
مدلها رساله: لو سمحتى اقريها وردى عليا غدوة
-خدتها فطومه : باهى لو سمحت معش تلحقنا
-محمود سمع صوتها قريب داب: حاضر
خدت الرسالةودستها فى كتاباتها ومشت تجرى للبنات
قعدو يضحكو ومشو طول روحو
__________________________
فالليل فطومه متكيه فى سريرها ومدبله عويناتها
-رواسى : شن قال
-فطومه : قولى شنو ماقالش
-غادة : ياعينى ياعينى
-صفاء تضحك: ياعينى ياليلي
العاملة خبطت الباب : نووووم
-غادة: ننصحك يافطومه قبل ماتعيشى فى الغرام وتحلمى قوليله انك وحدة من بنات الدار
-فطومه : لكن انا اهلى معروفين منهما ونقدر انعرفه عليهم
-غادة وجعتها : اهاا
رواسى فهمت ان غادة تألمت لانها منغير اهل معروفين
ناضت من مكانها تجرى وقعمزت جنب غادة
-رواسى : احنا كلنا خوات ولا
-غادة عيونها دمعو وصوتها مخنوق: ايه طبعا خوات
-صفاء مشت لسرير غادة وفطومه ناضت تجرى من مكانها مشتلها : يعطينى قصه فى لسانى ..انا اقسم بالله مانقصد
-غادة تبى تخفف الموضوع : الحب عمالك عيونك ??
-صفاء: قولى فقصهم
-واسى تبى اضحك غادة شادة صبعها الصغيرون : انا خاطرى نعرف الصبع هدا شنهوا اللى نلبتلك
-غادة تضحك : وااااك الف مرة نقولك منعرفش شكله وراثه من اهلى ???
-صفاء: ايخوف لما نقعد نشبحله
-غادة: مصحك ???
وقعدو يضحكو …
__________________________
ثانى يوم البنات اتفقو انهم وهما مروحين يخطمو على محل اللى يخدم فيه محمود
بيش يعطو فرصه لفطومه انها تحكى معاه …
وبالفعل حكتله فطومه على حياتها فى الدار..وان عمامها يسكنو فى المنطقه الفولانيه ولاكنها ماتعرفهمش ومايجوش يشبحو فيها
طبعا محمود انصدم صدمه حياته ..هوا يبيها بصدق..كان اكبر منها ويقرا فى سنه ثانيه جامعه اقتصاد ..
وقعد ساكت …وخاب امل فطومه وطلعت هيا وصاحباتها روحو
ودارتلهم عزى فى الغرفه على بكى وعلى خنانات ..وهيا تلعن فى حضها
ثانى يوم مشو للمدرسه …وهما مروحين ..
وقف قدامهم محمود …وشبح لفطومه : نبيك
وفطومه وين تلقيها عاد …وصاحباتها فرحولها
-فطومه : واهلك
-محمود : من الساعه هادى لين نتخرجو ايدير الله الف طريق …
وحزنو البنات حزن شديد على الاستاد عبدالحميد …سمعو بيه دار حادث وتوفى
وخالد فى السجن قريب يهبل …لانه معش جاه ولا سمع على بنته خبر….
بعد خمسه شهور بعد طلع مسجون معاهم ووصاه يمشى يسأل عليه فى حوشه …جاه الخبر زى الصاعقه ان عبدالحميد توفى
لكن خالد مطمن لانه عنده كل المعلومات على بنتهىووين مكانها وعنده صورها وكل شى
اول مايطلع يمشيلها ويستلمها
__________________________
وفاتو 6 سنوات ثانيه
سنه 2002 …
رواسى عمرها 21 سنه ….تقرا سنه ثالثه علوم سلوكيه
وخالد وين تلقيه عاد ..الشعر كله راح شيب …ويراجى بالساعه والدقيقه امتى ايتمو العامين ويروح لبنته
نادوه فى ادارة السجن
-خالد : نعم يافندى
-الرائد: حبيت نبلغك خبر ح يفرحك
-خالد وجهه نور: هاا بشرنى يافندى
-الرائد: فترة عقوبتك انتهت ..والسنتين اللى مازالو خديت عليهم اعفاء لحسن السيرة والسلوك
-خالد طول جت بنته بين عيونه وبدى يبكى ونزل على ركابه وسجد : الحمدلله ليك يااارب العالمين
-الرايد يضحك: خلاص امالا جهز نفسك بعد شهرين الخروج
اما فى الدار
البنات مقعمزات فى غرفتهم ويتناقشو
-رواسى: انا قرارى خديته خلاص
-صفاء: وانا معاك فى اللى بديريه تعرفينى مانوخرش
-غادة: لكن الامر هدا خطير ويبي تفكير
-رواسى: ياسر من الاهانات ..احنا معش صغار ..ونغرفو نحافظو على نفسنا ونتصرفو
-فطومه: وانا وين بنمشى
-صفاء: امشى لمحمود ..كانه يبيك يتزوجك طول
-رواسى: انا غدوة من الجامعه تشاو تشاو
-غادة : غير زيدو فكرو يابنات
-صفاء: احنا فكرنا وقررنا خلاص
-فطومه : نقوللكم حاجه …خلونى نشاور محمود قبل
-صفاء: مفيش وقت احنا غدوة مسافرات خلاص
-رواسى فرحانه وتضحك : اناى درتيها سفرة ??
-صفاء: امالا الطلوع من الجحيم شن تسميه …سفر للجنه
-غادة: انا الحقيقه مش حنقدر نطلع من الدار ماعنديش وين نمشى
-رواسى : معناها نوضو نتعاركو توة زى ماتفاهمنا بيش مايديرولكمش غدوة وجيج وتحقيق قولت احنا تعاركنا معاهم
-صفاء تضحك: نوضو هى …
وطلعو للممر وطاحو يتعاركو تنتيش شعر …رواسى وصفاء فى صف … وفطومه وغادة فى صف ثانى
__________________________
تمت …..ويتبع
رواسى وصفاء بيهربو من دار الرعايه .. وخالد بيطلعوه من السجن
رواسى كيف بدير فى قرايتها لانها هربن ومعش تقدر تمشى للجامعه
غدوة نفهمو اكثر فى قصتها ..ووين بتمشى زعما ?
نحبكم ❤