رواية لا تسألنى من انا

#لاتسألنى_من_انا

??بقلم زهور جمال الدين ??
.
.
?الحلقه الثالثه ?
.
.

تعاركو هادوكا البنيات فى الممر…
وجوهم المشرفات يجرو …

-ابله سلمى: رواسى خيركم ..نعرفكم صاحبات وعاقلات
-رواسى: هما اللى بدو مش احنا
-سلمى تلفتت لغادة: خيركم ياغادة
-غادة: هازيات على صبعى الزايد يا ابله ..وهوا خلق الله
-العاملة مريومه وراها: صبع شنو
-مدت غادة يدها: انا عندى صبع صغيرون لاصق فى صبعى الصغير فى يدى اليسار ..من بكرى وهما ايعلقو عليه ..معش تحملت
-مريومه : عيب عليكم يابنات ..وحرام حتى من ربي الهمز واللمز
-سلمى مستغربه : بصراحة انا مستحيل انصدق ان انتو الاربعه ممكن تتعاركو فى يوم
-صفاء: احنا كبرنا يا ابله سلمى ..والاهانه معش نتحملوها
-سلمى : وحتى انتى شن قالولك بسلامتك
-صفاء ادمع فى عيوناتها : اللى قالوه قالوه مفيش داعى نعاود حاجه نجرحنى..لكن انتى فرخه فطومه والله ماك باردة بيها …
-سلمى قايمه صبعها وتحدر: كل وحدة فيكم اضم فمها وتخش الغرفة وترقد فى سريرها ..وانا المرة هادى بندسها عليكم لكن المرة الجايه ح توصل استاد مراد وهوا يعرف شغله معاكم …

وحزت سلمى العركه وخشو لدارهم ..والليل كله يتكلمو بالشوى مايبوش من يسمعهم …
غادة تقنع فى رواسى انها ترحع عاللى فى دماغها ..لانها حتودر حتى صفاء معاها

-رواسى: تى شن تخرفى انتى ياغادة..تى منو بوى اللى بيجينى هدا …تلقيها كدبه من الاستاد عبدالحميد
-صفاء ?: رحمه الله عليه
-فطومه: وشنو اللى يجبره يكدب .. اللى بوها متوفى ايخبرها مش مجبر ايدس عليها

رواسى قعدت تشبحلهم وساكته

-غادة : يارواسى اقعدى وراجى بوك افضلك
-رواسى حولت الغطاء ووقفت قايمه يدها اليمين: ماتجننونيش .. باهى وينه !!
عيونها دمعو : رانى تعبت من المراجا
-صفاء تلفتت للحيط وغطت راسها: بالنسبه ليا انا سلامتها الدار وقلت سوها…وانتى يارواسى لو تراجعتى براحتك
-رواسى : تراجعت عينك ..رجلى على رجلك

-غادة: خيركم سكتو
-فطومه : تصدقو يابنات انفكر انتحجب …

“فى 2002 مش كل البنات متحجبات فى ليبيا ..فى هكى وفى هكى ”

-صفاء: بالك حبيب القلب قالك تحجبى
-فطومه : هوا بصراحة يبي .. وحتى انا عندى نيه
-غادة : ربي يثبتك يا فطو
-فطومه: وانتى شنو ياغادة مازال
-غادة: منعرفش انا تعودت على نفسى بشكلى هدا ..بالرغم نص كليتنا حطو الحجاب
-فطومه: وانتو رواسى وصفاء
-رواسى : منعرفش
-صفاء: لا مش ناويه توة ?

ورقدو وهما متخدين القرار…قرار الهروب من الدار
وبالفعل ثانى يوم مشو للجامعه …

حقه انا ماقلتلكمش ..صفاء تقرا فى كليه التقنيه الطبيه
قسم مختبرات سنه ثالثه …وغادة تقرا فى الصيدله …
وفطومه تقرا فى كليه العلوم قسم كيمياء ..

هما نداد …اصلا لما يقسمو فى الغرف ايحطو نفس المواليد مع بعض عشان الدراسه بعتالى ويكتبو واجباتهم مع بعض ..

من لما وصلو للجامعه …سلمو على بعضهم بحرارة وهاتك يابكى ..
وطلعو صفاء ورواسى من الجامعه يتمشو عالسريع …انتابهم شعور انهم اول مرة يشمو هواء نضيف ..بعيدا عن التحكمات من مشرفا الدار

وفالدار فقدوهم ادان العصر ومانحكيلكمش الدنيا قامت ماقعدت …
وفطومه وغادة طلعو منها زى الشعرة من العجين بشهادة المشرفات لانهم حضرو العركه وحزو بينهم

_________________________________

طلعت رواسى للحرية

ومعاها صفاء …قعدو يتجولو فى المدينه …
هما كيف واخدين منحتهم اللى تعطيلهم فيها الدار كل شهر
وفطومه عطت لصفاء منحتها
وغادة عطت لرواسى منحتها …
جمعو مع بعضهم 350 دينار ..بما يعاد 3 الاف و500 توة
.
.
دارو…دارو…دارو ….
وادن المغرب …. وخيم الليل …
واصطدمو بواقع الحقيقة..وين بيمشو فى هالظلامات

-صفاء: رواسى انا خايفه
-رواسى : ضمى فمك توة ..نحس فى الناس بيلاحظونا

وتلفتت رواسى تلقى عيادة نساء ..

-رواسى : تعالى نخشو للعيادة نقعمزو فى الانتظار زعميتا بنعاينو

خشو للعيادة ناداهم الولد اللى فى الريسبشن
-الشاب : تفضلو
-رواسى : احنا نسألو عالحالة اللى جت توة
-الشاي شبخ للاوراق قدامه : اخر حالة خشت حالة ربيعه..هيا هادى تسالو عليها
-صفاء ترعش : ايه ربيعه
-الشاب يضحك: وخيرك ترعشى اختى ..انشالله ماعليها سو دخلوها للعمليات
-رواسى : نقدرو نشوفوها
-الشاب : ايه تفضلو فى نهايه الممر تلاقو زوجها واقف ايراجى

خشو البنات قعمزو عالكراسى ..لقو ثلاث حالات ولادة ..
كل عيلة تحسابهم مع العيلة الثانيين …
وطلعو قعمزو عالكراسى الخارجيات واللى يسألهم ايقولوله انراجو فى حالة ولادة …
العيادة زحمه ..وقعدو كل مرة يخشو ممر …
لحد ماطلع الصبح …وجت سبعه ونص وطلعو البنات من العيادة …
صفاء ندمت عالطلعه ..لكن خلاص معش فيها كيف ترجع
اما رواسى ماندمتش …

وبالفعل قعدو ايلفو وايدورو

____________________________________

اما فى الدار …

متكتمين على خبر هروب البنات الزوز ..

-مراد يخبط عالمكتب : قلتلك ملفاتهم نلقاهم على مكتبى الصبح اول مانوصل والا لا
-سالم: حاضر يا استاد مراد ..هما عندى على مكتبى ..هى لحظه بس

وطلع سعد السكرتير جاب ملفات رواسى وصفاء وخش

-سالم : اهما الملفات يا استاد مراد
-مراد : ترا جيبلى سطل حديد فاضى
-سالم مستغرب: حاضر شوى بس

وطلع من المكتب..شوى وخش ..وبالفعل جاب سطل حديد ..

وقف مراد عالشباك وحط هاداكه السطل وحدف فيه ملفات البنات
وتلفت لسالم: ماعنديش ثقه نعطيهم لحد ونقوله اخرقهم..لازم نحرقهم بنفسى..

وحطعم فى السطل ..وولع ورقه منهم بولاعه …
وانتشرت النار فى هادوكه الوريقات …انحرقو بصورهم باوراقهم الثبوتيه …بالورقه المثبت فيها المكان اللى لقوه فيه البنات ….بكل شى

-مراد : نادى العاملات كلهم وحتى متاعات النظافه ..اجتماع طارئ..

وبالفعل تلمدو كلهم واجتمع بيهم

-مراد ماد يده يتحلف : ملفات البنات حرقتهم ..واقسم بدات الله لو حد جى وسأل عليهم من الناس العاديه او من الوزارة ووحدة فيكم اتكلمت وقالت نعرفهم لما نوديها ورا الشمس

________________________________

خالد حولوه من الزنزانه اللى هوا فيها …

وحطوه فى زنزانه مع 4 اشخاص بيطلعو معاه فى نفس اليوم

ايتكم فى هادوكا الصور متع بنته ويتفرج …

ويحلم ويتخايل فى اللحظه اللى بيتلاقى فيها مع بنته

ويحكى لمسجون معاه …

-خالد : الحمد لله انها كتبوها بنفس اسمها الحقيقي ..كنهدا راهو بنتعبت بيش نلقاها
-وليد : ربي كريم يا عمى خالد
-خالد يمدله فى صورة رواسى وهيا صغيرة : شوفها محلاها
-وليد : ربي يحفظها وتشوفها عروسه ياااارب
-خالد يمسح فى دموعه : اشبح كيف بدى شكلها توة ..من لما توفى عبدالحميد صاحبي اللى حكيتلك عليه
-وليد : لكن تبى الحق قصتك غريبه يا حاج
-خالد: انشالله نحج انا وياك …قصتى قصه انسان انظلم وربيع عمره مشى فى السجن
-وليد : الغريب ليش نساباتك وقفو ضدك
-خالد: لانى منحبهمش ولا هما يحبونى
-وليد : لكن معقولة يشهدو زور..انت قلت انها ماكنتش غضبانه عندهم
-خالد: ولا عمرها غضبت ولا عمرى زعلتها
-وليد: منغير رؤية بنتك طبعا..شنو الاهداف اللى تبى اديرها بعد ماتطلع ..المقصود شغلك وغيره
-خالد : انا لا شاغلنى شغل ولا دياولى ..انا عندى ثلاث خطوط مهمه لازم نمشيلها..اولهم بنتى..وثانيهم مرت الاستاد عبدالحميد لان عندى اوراق مهمه طلعتهم من الحوش هاديكه الفترة
-وليد : وثالثهم
-خالد : الشخص اللى قتل مرتى…لااااازم نوصله ..ونعرف من باعته ..ومن وراه
-وليد : وانت كيف بتزبطه …اكيدة شكله نسيته مع مرور السنين …
-طلع خالد صورة : اهوا
-خدى وليد الصورة : منو رسمهالك هادى
-خالد : مسجون معاى زمان ..قعدت نوصفله لين قرب من الشكل وجابه ..هوا كان رسام
-وليد : وليش مادرتش نقض..وعطيتهم الصورة
-خالد : النقض يبي فلوس ..وانا خوى ماعاد خليتله علاش يولى فى القضيه نفسها ..وبالرغم كلمت فندى هنايا فل السجن ..قالى رسمه مش حاجه مهمه تنفتح عليها قضيه من ثانى
-وليد: ربي يعطيك على قيس نيتك وطببتك يااارب
-خالد : ااامين
-وليد : وين بتمشى توة لما بتطلع
خالد : بلاد الله واسعه ياولدى
-وليد : امالا تعرف كيف اطلع عندى انا عايش فالحوش بروحى بوى وانى فى مصر عندهم علاج
-خالد : قصدك عزابى انت
-وليد يضحك: ولله الحمد
-خالد : ماتقوليش عسل زيك علاش حابسينه ..دكتور وشهادتك ممتازة ..وكانا ماتبيش اتقول عادى
-وليد : لا والله عادى نقولك ليش لا..جانى واحد فى مكتبى من الحرس البلدى ..يتفتى عليا ..كلمه منى كلمه منه ضربته ..حكمو عليا سته شهور حبس
-خالد: انت دكتور شنو
-وليد: انا دكتور علاح طبيعى ..
وتلفتله : ماقلتليش حتى انت بتطلع معاى فى نفس اليوم
-خالد تنفس وسعيد : معاك فى نفس اليوم بعد شهر وثمانيه ايام بالزبط
-وليد يضحك : وعادهم باليوم
-خالد : قول بالساعه وبالدقيقه

___________________________________

نفس اليوم

البنات ايدورو ماعرفو وين بيمشو …

-صفاء تبكى: كيف بنديرو توة يارواسى ووين بنمشو
-رواسى: غبر فيك الناس تشبحلنا امسحى دموعك
-صفاء تمسح فى دموعها: باهى وين نمشو
-رواسى : انا ماعنديش ثقه الا فى شخص واخد بس
-صفاء: منهوا
-رواسى الحقينى …

وقفو تاكسى ركبو فيها ومشو ….

وقفت التاكسى خلصو ونزلو ….

وقفو قدام محل ….

-رواسى : السلام عليكم ياحاج
-الحاج مقعمز قدام الدكان : وعليكم السلام
-رواسى : لو سمحت نبو محمود
-الحاج اينادى: محمود…يا محمود تعالى زبونات يسالو عليك

جى محمود ينصدم برواسى وصفاء قدامه …

-محمود دار الحولة قدام بوه : اهلين اختى تفضلو

خش للمحل وهما وراه ….
-محمود : انتو شن اديرو هنايا المغرب
-رواسى بشموخ : احنا هربنا من الدار
-محمود انخلع ?: وفطومه وين
-صفاء: متخافش ..فطومه قعدت فى الدار مابتش تطلع معانا …
-رواسى: نبو مكان نباتو فيه
-محمود : وانا منين بنجيبلكم
-رواسى : شوفنا وراس اوخى ..الليله بس وغدوة اندبرو روسنا
-محمود : ماعنديش الا شقه خوى احمد .. هوا مسافر توة
-صفاء: ياريت والله ..وماتخافش ماحد ايدور فينا
-محمود : اطلعو اوقفو نهايه الشارع انولع سيارتى ونجيكم ..

________________________________________

وصلو نهايه الشارع وقفو شوى ويشبحو فى سيارة محمود جايه …
وقف ركبو معاه ومشى طول
رواسى من قدام ..وصفاء من الخلف …
صفاء مادة وجهها : خديت مفتاح الشقه
-محمود : مفتاحها عندى فى سيارتى …لكن انتو كيف اديرو عملة زى هادى
-رواسى : احنا العيب مانديروه ..وبنخدمو وبنعيشو منغير ظلم واستعباد
-محمود : حسستينى شادة الكتاب الاخضر وتقريلى فيه ..شنو ظلم واستعباد من معلمهملك الكلمتين هادو
صفاء ورواسى يضحكو ….

ودخلهم للشقه …وقعدو فيها واستريحو …
وثانى يوم بلغ محمود فطومه ان البنات فى شقه خوه …
بعدها بيومين طلعو هيا وغادة من الجامعه ومشولهم …

واستمرو على هالحال اسبوعين …
رواسى وصفاء مضايقات …
اما محمود وفطومه فرحانين ..لانه بدو يتلاقو فى الشقه معاهم ويهدرزو بكل راحه …..

وفى يوم لقت رواسى اعلان فى الجريدة
طالبين بنت مرافقه لطفل معاق…
فرحت طول ..وقالت لصاحبتها صفاء تمشى معاها يشوفو شنو …
-صفاء: هيا مزال فى اعلانات عالجرايد
-رواسى: تى هادى مش اى جريدة…هادى جريدة العرب وتصدر من لندن
-صفاء: معناها اكيدة ناس معبيين
-رواسى: مدامهم شارطين البيات فى المنزل عادى حتى لو دفعو شوى
-صفاء?: وانا
-رواسى: طبعا بتقعدى معاى ..حنقوللهم اننا خوات ولازم نقعدو مع بعض
-صفاء فرحت : سلم اوخيتى
-رواسى: ياحمارة احنا خوات ..انتى قاعدة تخممى

___________________________

خدو العنوان ..لقوه فى حى راقى هلبا طبعا
ركبو تاكسى ومشو ….
وقفو قدام فيلا كبيرة …وجنانها كبير هلبا ومليان شجر …لدرجه الفيلا مش باينه هلبا …

شرينو …فتحت شغالة ..

لقت زوز بنات واقفات …رواسي لابسهةسروال اسود وتيشرت احمؤ ولامه شهرها بتوكه …
وصفاء لابسه بلوزة وسروال امريكانى وفاتحه شعرها

-البنت : تفضلو
-رواسى: احنا جايين عشان الاعلان هدا ..وورتها الجريدة
-البنت : اهاا ..لحظه بس نكلم الحاجه
-رواسى : باهى

وسكرت البنت الباب ..قعدو يضحكو عالبنت كيف سكرت الباب كأنها خايفه منهم …

شويا وانفتح الباب …

-البنت : قالتلكم الحاجه تفضلو …

خشو للجنان رجليهم قريب طاحو بيش وصلو للحوش …
جنان كبير هلبا زى الحديقه …
وهما يشبحو لبعضهم ويضحكو من شدة الانبهار

وصلو للصالة …قعمزتهم البنت على الصالون …

جت شغاله ثانيه مدتلهم عصير….

يتسهوكو على بعضهم

-رواسى : تفضلى يا صفاء هانم
-صفاء: شكرا حضرت الكونتيسه …
ويضحكو ….

شوى خشت مراءة كبيرة دات وقار …لابسه عبايه قنينه وغاليه …

-الحاجه : صباح الخير
-صفاء ورواسى : صباح النور

قعمزت عالصالون ..واشرتلهم قعمزو حتى هما

-الحاجه : انا الحاجه فطيطيم ..وحضرتكم منو

-رواسى: انا رواسى خالد ..وهادى اختى صفاء
-الحاجه : انتو خوات
-رواسى : ايه
-الحاجه : قريتى الاعلان كويس
-رواسى: ايه قريته
-الحاجه : سكنك واكلك ومبيتك علينا ..ومعاشك 400 دينار
رواسى قريب زغرطت …400 دينار مش مبلغ بسيط وقتها

-الحاجه: احنا فى البدايه كنا شارطين ممرضات ..بس قبلك ثلاث ممرضات جو قعدو معانا شهر او شهرين كل وحدة وفجأة سيبو الخدمه ..بس توة معش عندنا شروط المهم وحدة تكون جليسة اطفال كويسه
-رواسى : عادى وانا معنديش مشكلة بادن الله نعجبك
-الحاجه : عطيتى علم لاهلك ان الشغل بتباتى فيه
-رواسى : الحقيقه مبدئيا مش حنخبرهم
-الحاجه تفاجئت : كيف مش حتبلغيهم .. كيف بتباتى برة الحوش منغير علمهم
-رواسى جتها فكرة : احنا الحق اهلنا يسكنو فى الدواخل .. وانا واختى نسكنو فى الداخلى متع الجامعه ..
-الحاجه : باهى وقراية الجامعه كيف بديري فيها
-رواسى: انا موقفه قيد حاليا ..وبندير مغادرة مؤقته من الداخلى
-الحاجه وجهت على صفاء:واختك فيش تقرا
-صفاء : حتى انا موقفه قيد
-الحاجه تلفتت لصفاء: انا طالبه جليسة وحدة مش اثنين
-رواسى: اختى تقعد معاى بس فى الغرفه مانبوش معاش ولا اكل ولا شى …
-الحاجه : هوا احنا بنعطوك غرفه خاصه بيك ..بسسسس
-قصت عليها رواسى وتترجا : بالله عليك ..والله اختى مانقدر نخليها بروحها فى الداخلى
-الحاجه : نفكر …
-رواسى?: منكدبش عليك يا اما انا واختى والا مانقدرش
-صفاء: لا يارواسى مدامك حصلتى شغل اربحيه واخدمى وانا تو ندبر راسى

والحاجه تتفرج عليهم باعجاب …

-رواسى: مستحيل … مستحيل انخليك بروحك ياصفاء
-صفاء: والله ماتصيرلى حاجه ..اقبليه الشغل
-الحاجه : مدامه انتو الزوز كويسات ..بنجى انا احسن منكم
وتلفتت لصفاء: قبلناك ياماما..اقعدى مع اختك فترة شغلها عندنا

ووقفت: تعالو نوريكم الطفل …

وقفو الزوز..

-رواسى: هوا ولدك
-الحاجه : لا ….. ولد ولدى صلاح

-جت الشغالة : تفضلو …
ماشيه الحاجه قدامهم …وهما والشغالةوراها…

-الشغالة : احنا عندنا قواعد … وعندنا مسميات فى البيت
-رواسى: كيف يعنى …
-الشغاله : يعنى الحاجه تنادوها مدام افطيطيم …والسيد تنادوه مستر صلاح
-صفاء: هما مش ليبيين
-الشغالة?: لا ليبيين بس كانو عايشين برة

خشو لغرفه الطفل ….معاق دهنيا …
شبح حناه ضحكلها طول ومدلها ايديه …

مشتله الحاجه: حبيبي

-رواسى: وين امه …
-الشغالة تتنحنح : احم …احم
-الحاجه : الله لا تردها ….

وتلفتتلهم: بوه مسافر حاليا .. وبيروح بعد غدوة

وتلفتت للشغالة : ورى لرواسى واختها غرفتهم …

تلفتو بيطلعو …

الحاجه: غدوة تجيبيلى اوراقك الرسمية يارواسى باهى

رواسى بدت تزرط : حاضر …

ولقت الولد يشبحلها مشتله : حبيبي

الولد يشبحلها ويناغى …

تلفتت للحاجه : كم عمره
-الحاجه : اربع سنين
-صفاء: ياروووحى ماينطقش بكل
-الحاجه : لا ….لكن احنا نجيبوله فى دكتور هنايا وقالو مع العلاج يستجيب
-رواسى : اهاا
-الحاجه بنضرة حنان : شنو قبلتى الشغل
-رواسى : قبلته ….. بس منغير مانجيبلكم اى اوراق رسميه انا او اختى
-الحاجه تفاجئت : ليش
-رواسى : انا بلغتك انى بنخبى على اهلى حكايه خدمتى …لو بعتت لبوى نبي اوراق حيشك وحيقولى شن بديري بيهم
الحاجه مستحقتها للولد …قررت انها تتنازل

-الحاجه : اوكى تمام تو نتصرف انا ..ومن غدوة الساعه 8 صباحا تبدى فى الشغل

وتلفتت للشغالة : وريهم الغرفه اللى بيسكنو فيها …

مشت الشغاله وهما وراها : مدامه انقبلتو غدوة جيبو شنط ملابسكم باهى

-يمشو وراها وصفاء اتمتم : قال ملابس قال ??

رواسى تضحك الشوى

-صفاء: قديتيلها
-رواسى تقرص فى صفاء: اسس اسكتى

وقعدو يضحكو

_______________________________

تمت …ويتبع …

سامحونى عالتأخير ….

غدوة بتطلع شخصيه البطل صلاح ….
وطلعت معانا شخصيه جديدة …….وليد
ومزال الاحداث بتحلى اكثر واكثر

بس عندى عتب عاللى تقرا وماتعلقش ..معقولة بس 700 تعليق عالحلقه ..كانت توصل 2000…
تعليقك تشجيع للكاتب …واعطاء طاقه ايجابيه ليه

نحبكم ?

error: