رواية لا تسألنى من انا
#لاتسألنى_من_انا
.
??بقلم زهور جمال??
.
?الحلقه الخامسه?
.
.
فى نفس اليوم الصبح …
خالد واقف قدام بوابة الرعايه
-خالد : انا ياخوى حتى امس جيت وخشيت علاش اتبهدل فيا
-البواب: هادوكه توكه متع امس دخلوك …لكن انا مانقدرش اندخلك يا وخى الا بأمر من الادارة لداخل
-خالد : ياخوى منين بنجيبه انا الامر وانت ماسكنى عالباب
جت ابله سلمى فايته على رجليها تبى تخشى من البوابه
-البواب: ابله سلمى تعالى شوفينا الاخ مصر انه ايخش
تلفتت سلمى لخالد …لقاته انسان واضح انه طيب ومسالم
قربت منه سلمى: تفضل خوى انت شن تبى من المبنى لداخل
-خالد : انا يا اختى جيت امس وخشيت وقالولى ان المدير فى جولة وا جعنا غدوة
-سلمى: صح المدير كان فى جولة امس…
-تلفتت للبواب: باهى ياعمى محمد خليه ايخش على مسؤليتى
-البواب: على كيفك ..لكن راهو على مسؤبيتك انتى
-سلمى: ماتخافش ياعم محمد
وتلفتت لخالد : تفضل معاى يا استاد
وخشت سلمى من البوابه الكبيرة وخش معاها خالد
-خالد : شكرا اختى انك ساعدتينى نخش هنايا ..سامحينى فى تعبك
-سلمى: ولو خوى مفيش تعب …
وقامت صبعها اشرت على مكان : الممر هدا طريق مختصر لباب الادارة
-خالد : مشكورة جدا ..وصحيتى
ومشى فى حاله للممر متع مكاتب الادارة …
وخشت هيا من باب الاخصائيات
__________________________
.
فى غرفه كركور
-رواسى : تفضلو …
خش صلاح ورا امه .. شافاته لقاته نفس الشخص اللى كانت تقرم معاه فى المطبخ …
ياغبابير السود …
وبدت ترعش مع بعضها …
خش صلاح شبحلها وضحك ولاحظ انها ترعش
وتلفت للولد ومد يده : حبيبي عبودى تعالة
…شافه الولد فرح جاه الولد يجرى وطاح …
-مشاله صلاح بسرعه : حبيبي …ستاحشتك ياعمرى
قامه وقعمز عالصالون وحطه فى حجره
والولد يشبح لصلاح ويناغى …
-صلاح: حتى سلسبيل اختك جبتها معاى حبيبى
والولد يناغى
-صلاح: فاهم عليا ..سلسبيل بيبي صغير متع ماما وبابا
…جبتهالك هنايا تقعد معاك ..
-فطيطيم : غير كيف بيفهمك ياوليدى
-صلاح : اربع سنوات مش صغير يااام…نحس فيه فاهمنى شن نقول
رواسى لقت الحديث عائلى …خدت بعضها وبتبى تطلع من الغرفه تنسحب من المواجهه مع صلاح
طلعت مشت للباب …شافها الولد الصغير طالعه وبدى يعيط ويمد فى يده عليها
-فطيطيم : تعالى وين ماشيه ..ماك عارفاته متعلق بيك
مشتله رواسى بسرعه وخداته من صلاح …وصلاح يشبحلها حاير كيف الولد تعلق بيها فى الفترة القصيرة هادى
قاماته رواسى فى غمرها : حبيبي …اششش انا قاعدة معاك مش طالعه
حط الولد راسه على كتفها وسكت
وقف صلاح : هيا نفطرو …
وطلعو كلهم للصالة …ورواسى متحشمه من الكلام اللى قالاته ..وهوا مش معدل ولا باين عليه زعلان ولا متكنطى
__________________________
مشو صلاح وامه للصالة لطاولة الفطور
ولحقتهم رواسى والولد تمشى فيه بيدها
قعمزو على طاولة الاكل …شافت لصورة الشاب الحزين اللى معلقه عالحيط وقارنتها بصلاح لقت ان اللى فى الصورة مش نفس الشخص اللى مقعمز قدامها ….
وفى خاطرها: زعما الحاجه عندها زوز اولاد …
امالا ولدها الثانى وين مرته وصغاره
توكل فى الولد وميهةسؤال ايدورو فى راسها: شنو العائلة الغريبه هادى
-الحاجه : شنو وليدى امور شغلك تمام
“باعتبار انها الليله اللى قبلها سألاته بروحه عالموضوع متع البنوته الصغيرة اللى جابها وكيف تصرف فيه ”
صلاح يشبح لرواسى: الحمدلله ..ماشيه الامور
وجت صالحه جايبه سلسبيل مبدلتلها ومتكمتها ..
-صالحه تتكلم زى الاطفال : صباح الخير يا اميمه..صباح الخير يا عمو
-الحاجه : صباح الخيرات على بنيتى…هدا وين تهنى بالى بعد جبتها ياوليدى
-صلاح : هاتيها انفطرها انا …
وخداها منها ويشبح للبنت : انا بابا ..مش عمو صح ..
-سلسبيل حروف متقطعه : بابا
ورواسى تشبحلهم وراسها بيستك مش فاهمه شى …كيف كركور ولده …وكركور خو سلسبيل …وسلسبيل تقوله يا عمو
فزوة هادى ولا شنو …
ومع هدا سكتت وخلاص …
كملو فطورهم
وقف صلاح ومد سلسبيل لامه وتلفت لرواسى: كملى فطورك والحقينى للمكتب باهى
-رواسى انصدمت : انااااا
-صلاح : ايه انتى
ومشى للمكتب متاعه ..وقعدت رواسى تمسح لكركور فى فمه
__________________________
.
فطومه ومحمود قعدو يتلاقو فى الشقه كل ثلاثاء
فى خلال الشهر اللى فات تلاقو اربع مرات
دارلها نسخه من المفتاح بيش ماتقعدش اطقطق
اول ثلاثاء تلاقو فيه كانت يانارى خايفه وترعش وخاشه فى بعضها لكن هوا يبيها بجديات ومنتبه لنفسه .. ومايبيش ايدير اى تصرف ايخليها اتكز منه …
بعد هلبا لقاءات فى الشقه
يوم الثلاث طلعت فطومه من الكليه خدت تاكسى ومشت للمنطقه اللى فيها شقه خو محمود …
ركبت من الدروج وديما ربي يستر فيها ماتتلاقاش مع حد من الجيران
ركبت للشقه فتحت الباب لقت محمود ايجهز فى الفطور
-فطومه : السلام عليكم
-محمود تلفت : وعليكم السلام حبيبتى انستى
-فطومه : الله ايآنسك.. ماشالله على صنه الدحى المقلى بالمعدنوس اتشمه من فم الباب ايسهف
-محمود : بيش تعرفى بس عندى دوق فى كل شى
-حولت فطومه جاكيتها: طبعا عندك دوق مدامك حبيتنى انا
-محمود كمل طفى الغاز ومشالها : مزال متبيش اتحولى
وشاحك
-فطومه بخجل?: بصراحة لا
-محمود ? : براحتك حبيبتى اهم شى اتكونى انتى مرتاحه
-فطومه خشت للمطبخ : نفطرو هنايا ولا نطلعو الفطور للصالة
-محمود : طبعا للصالة …
وبدو ايجهزو فى حاجات الفطور فى صحون وطلعوهم للصالة
وقعمزو فطرو مع بعضهم فى الصالة …
على حكايات وبصارة وضحك ..والساعه واحد ونص بعد ضمو الماعين والحويه طلعت روحت
وطلع هوا بعدها بربع ساعه
__________________________
خالد من لما وصل خدى موعد من المدير عن طريق السكرتير انه جاى بموضوع خاص بوحدة من نزيلات الدار
وافق المدير انه يقابله لكن مش توة مع الضهر لما يفضى …
رضى خالد وسكت وقعد مقعمز ايراجى…
.
.
.
مع الساعه واحد الضهر …
خشت سلمى للكرادورى اللى خالد مقعمز فيه تبى ..جايبه معاه اوراق لسكرتير تبى اتصورهم
-سلمى: شنو مزال خوى ماخشيتش للمدير
-خالد واضح انه سعيد : ايه شوى ثانيه اينادينى ونخش
-سلمى: بس الباين انك جاى فى موضوع مفرح..الفرح باين عليك
-خالد : جايه فى اهم موضوع فى حياتى …
-سلمى ابتسمت : ربي يوفقك
-خالد : صحيتى..
ومشت لسكرتير: شنو صورتلى
-السكرتير: لحظه بس يبو وقت …
طلع السكرتير الرئيسى من داخل الغرفه
-السكرتير: الاخ خالد
-خالد قام راسه : ايوه
-السكرتير: تفضل
وقف خالد وتلفت لسلمى وابتسملها
-سلمى ابتسمت : موفق يااارب
-خالد : شكرا ليك
خش خالد للغرفه…وسكر وراه الباب
__________________________
رواسى خلت كركور جنب الحاجه وصالحه
ومشت للاستاد صلاح فى المكتب
طقت الباب
-صلاح : تفضلى
فتحت رواسى الباب وخشت وهيا ساكته
صلاح مقعمز عالكرسى ورا المكتب ..
اشر بيده للصالون قدامه: تفضلى قعمزى
-قعمزت رواسى : شكرا
-صلاح : امى قالتلى ان معاك اختك فى نفس الغرفه
-رواسة قامت راسها شبحتله : اهاا نعاى اختى
-وخر الكرسى واتكى ويشبحلها: باهى وين اوراقكم ..شهادة ميلادكم ..حسن السيرة والسلوك
-بدت اتمتم: انا فهمت الحاجه ان ….
-قدم الكرسى واتكى بيديه على المكتب: الكلام مع امى شكل ومعاى انا شكل ثانى…هدا شغل رسمى وعقد ومعاش ضرورى يكون عندك اوراق …
هيا كيف بترد وتتعدر…وينفتح باب المكتب ….
خشت بنت تنقز من الفرحه : حبيبي ..
ومشت تجرى لصلاح اضبطاته …
صلاح انحرج من رواسى : بالشوى ..ويفك فى ايديها من رقبته : شن قايلك انا
-البنت: مانقدرش اندس فرحتى حبيبي ..مستاحشاتك هلبا
صلاح شبح لرواسى….
تلفتت البنت باستغراب وبغيرة ….
لقت بنت قنينه فاتحه شعرها على كتافها ولابسه سروال ادجين ازرق وبلوزة وردى مقعمزة قدامها
قامت صبعها باستحقار: هادى منو ….
صلاح مش راضى على تصرفاتها : هادى جليسه عبودى
تلفتتلها وبتسهويك : يعنى شغالة
صلاح حمق: قلتلك جليسه عبودى مش شغاله
-البنت: مفيش فرق
ومشت خطوات تجاه رواسى..
وقفت قدامها ومدت يده: اهلا
-رواسى صوتها هرب من الاستغراب جرأتها : اهلا بيك
-البنت : شن اسمك
-رواسى : اسمى رواسى
-البنت : وانا جيهان ..خطيبه صلاح وست البيت هدا
-رواسى : بالجودة بيك …
وتلفتت لصلاح : نستادن
صلاح متحشم : ادنك معاك
طلعت رواسى وقبل ماتسكر الباب تسمع فى صلاح ابكشخ عليها
-صلاح : انتى وبعدين معاك ومع تصرفاتك الوقحة
-جيهان : شن درت انا حبيبي …من حقى نغير عليك
-صلاح : اللهم جيبك ياطولت البال …هيا هادى حمدالله عالسلامه …طول هكى حرق دم
سكرت رواسى الباب وبعدت معش تسمع فيهم
مشت لكركور مقعمز مع حناه وسلسبيل فى حجر صالحه
__________________________
خالد مقعمز مع مدير الدار
-مراد : اتفضل يا استاد
-خالد سعيد : انا عندى بنتى عندكم هنايا فى الدار ونبى نستلمها
-مراد فرح : الله اكبر…ربي يلم شملكم لو كنت ابوها الحقيقي
-خالد استريح: انا وبوها وعندى كل الصور والدلائل
-مراد : شن اسمها البنت
-خالد : رواسى خالد
وقف مراد مخلوع وخبط عالطاولة : نعم نعم
وقف خالد : شنو فى حاجه يا استاد
-مراد : ماعنديش فى الدار بنت بالاسم هدا …
ومد يده للباب : المقابله انتهت
-خالد انهار وكل احلامه تلاشت: كيف يا خوى البنت عندك وانا متاكد منها
-مراد : قلتلك ماعنديش ..ولو سمحت تفضل خير مانجيب جماعه الامن ايطلعوك..وكانا ماعجبكش برة اشكى فيا
-خالد مد يده فوق : نشكيك للى اكبر منى ومنك ..حسيبك الله
وفتح الباب وطلع …
واضح انه حامق ….
ابله سلمى تشبحله ..ماقدرتش تكلمه من شدة غضبه …
طلع من الباب طلعت وراه ….
تنادى : يا استاد ….يا استاد
تلفت خالد وعيونه دموع : نعم
-سلمى: انشالله خير..خيركم تعاركتو
-خالد : شهادة من دينك ..معاكم بنت اسمها رواسى
-سلمى انتخصت: رواسى خالد
-خالد فرح : الحمدلله ياربي …الحمدلله ياربي
وتلفتلها : مديرك نكر ان فى بنت اسمها رواسى عندكم ليش !!
-سلمى: لان ببساطه رواسى غادرت الدار
-خالد : انتى شن تقولى ..كيف غادرت الدار …
-سلمى: طلعت هيا وصاحبتها صفاء
-خالد : وين مشت …بنتى فى خطر
-سلمى: مايقدر حد ايدلك الا صاحباتها غادة وفطومه ..انا متاكدة انهم دايرات ملعوب ..ومتاكدة ان عندهم علم بمكانها
-خالد يبكى: دلينى عليها تربحى
-سلمى: توة صعب نحكيلك ..راجينى مع الساعه 3 ونص نكمل عملى ونطلع
-خالد : متفاهمين
__________________________
جت رواسى للصالة
-تلفتت لصالحه : هادى منو
-صالحة? : خطيبه مستر صلاح
-الحاجه? : قلت ادب ..عمرى ماسمعت ببنت اتجى لحوش اهل خطيبها قبل ماتوصله ..اللطف علينا رباية ناتنه حاشاكم
-صالحه : عادات الليبيين اتغيرت يا حاجه
-رواسى: لااااا حاشاها عادات الليبيين …حتى انا عمرى ماسمعت ببنت تجى هكى بالبجاحه هادى…
-الحاجه : حاشاها ليبيا قاعد فيها الحشم ..هادى عاشت برة عندها عادى
-رواسى قلبها مليان : مش كل من تربت برة تطلع جريئة هكى
-صالحه : اى والله … اسماء حماتك طول عمرها برة ..ومع هدا بناتها ماشاءالله الصلاة والحجاب
-الحاجه : صدقتى..لكن هادى مش عارفه كيف تورطنا فيها ..والله وليدى مايبي غير انا ربي يهدينى نبيه يتزوج وخلاص
وخدت كركور وطلعت بيه للحديقه برة
وراها صالحه : رواسى زعلانه
-الحاجه : اكيدة قالتلها بعض الكلمات اقصف عمرها
__________________________
رواسى مقعمزة فى الجردينه الكبيرة متع الحوش
شافت جيهان طالعه من الباب …ركبت سيارتها وروحت
وطلع صلاح يتكلم فى الموبايل
” هداكه الوقت فى ناس عندها 0912″
وهيا شاده هادكه الولد من يده وتمشى فيه وتطلق
وايطيح ..
وترجع اتمشيه من جديد …وايطيح
وتشده …حالته اتحسنت هلبا فى المشى ..والعصبيه
صلاح يشبحلها من بعيد..قرب منها
واقفه وشادة كركور من ايديه ..جى وقف وراها
-صلاح : اسف عاللى صار فى المكتب
تلفتتله وبعصبيه ومدت صبعها فى وجهه : اسمع كانا بتقولى جيبي اوراق او شهادة او غيره خلينى انلم حوايجى وناخد اختى ونطلع ..انا لا عندى اوراق ولا حتى حاجه
-صلاح حاط ايديه فى نصه ويشبحلها: وعلاش هدا كله
-رواسى: لانى ماقلتش لاهلى انى نشتغل وكانا بنقوللهم بيمنعونى
-صلاح: هدا كله قالتهولى امى لكن ماخشش راسى
رواسى لونها تغير
-صلاح ربع ايديه على صدره وبمكر : بااااهى..مدامه امى قبلاتك منغير اوراق ..وعبودى منسجم معاك ..مفيش مشكله حتى انا قبلتك منغير اوراق رسميه
رواسى استريحت وحست بالنصر: ايوووه
-صلاح بابتسامه خبيثه : لكن انتى بنت شكون!! …ومن اى منطقه بالزبط ؟؟!!
-رواسى: كيف يعنى
-صلاح قام يده : شنو كيف يعنى واضح سؤالى ..انتى بنت منو ..شن لقبك.. واهلك وين عايشين
-رواسى بدت تزرط : هادى …هادى.. .هادى خصوصياتى
-صلاح : انتى ساكنه معانا فالحوش يعنى احنا عيلة وحدة ومفيش باس كانا عرفناك بنت شكون
-رواسى غيرت طريقتها فالدوة وبدت تتمسكن : انا اهلى ناس صاعبين وكانا سمعو بيا نخدم حيديرولى مشكلة كبيرة
-صلاح : اييييييه علينا عاد …شنو انا بندير معاك لقاء فى الجريدة هاتى لقبك شنهوا تو نزبطك انا بنت شكون
-رواسى : مانقدرش ..قبلتنى هكى باهى والا خلى نمشى
-صلاح : شنو تهددى فيا كل شويا تعاوديلى فى نفس الجمله
-رواسى تتمسكن : لا والله …لكن انا عندى ضروف
-صلاح : وامتى بيتمو الضروف هادى وتحكيلى
-رواسى انتخصت : بعد اسبوعين
-صلاح : تمام من هنايا لاسبوعين..خودى راحتك ..وبعدها تو نتفاهمو انا وانتى
وتلفت للولد ومد ايديه : عبودى تعالة هى
وبدى يلعب عليه ورواسى تشبح لصلاح
__________________________
الساعه 3 ونص ….
طلعت سلمى لقت خالد ايراجى فيها
-خالد : خيرك عطلتى
-سلمى : هدا وقتى غير انت معش عندك صبر …
لكن اسمع كيف نتاكد انك بو رواسى
طلع خالد اخر صورة لرواسى وصلاته …
وهيا فى الاعدادى : هادى رواسى
-سلمى خدت الصورة : نشهد بالله انها هيا ..مع بعض التغييرات البسيطه فى شكلها بعد ماكبرت
-خالد : صاحباتها وين نلقاهم
-سلمى : صاحباتها توة روحو للدار خلاص ..نعطيك اساميهم وكلياتهم وغدوة امشيلهم
خالد يشبح فى جردينه قريبه وفيها كراسى
-خالد : ممكن تقعمزى معاى عالكرسى شوى فى الجردينه تحكيلى على رواسى
-سلمى شدت شنطتها : حاضر
ومشو للجردينه وقعمزو عالكراسى وسلمى تحكى على رواسى وخالد يبكى
__________________________
تمت …ويتبع
نحبكم ❤