رواية لا تسألنى من انا
#لاتسألنى_من_انا
.
بقلم?? زهور جمال الدين??
.
?الحلقه الثالثة والعشرون?
? والاخيرة ?
.
.
.
صلاح مقعمز فى سيارته على مالّال …
ايراجى فى عمك خالد شن بيفهم من صفاء بيش ايجى ايخبره
عنده امل انه واخيرا بيعرف مكان رواسى وين
شرين تليفونه شاف لقاها غيداء/ اووووف مش وقتك
وحط التليفون ..عاودت ثانى …وثالث
وهوا مايبيش ايرد
وهيا عاد تاخد وتعاود فى الرقم من تليفونهم الارضى وفى
خاطرها / لازم اترد..لازم نفسد العلاقه بينك وبين جيهان
اليوم بأى طريقه
لما كثرت عليه اتصالات رد
-صلاح بعصبيه / خيرك شن تبى مابطلتيش اتصال من بكرى
-غيداء/ خيرك تكشخ عليا العفو ..شن فى
-صلاح / مافى شى ..ادوى شن تبى
-غيداء/ اولا بنقولك على خوى الطاهر دار حادث
-صلاح / مش معقولة ..سافر خوك ولا
-غيداء/ لما بيسافر جاب هديه لكركور ومشى للمطار ..الباين
انه مالقاش جوازه فرجع لحوشكم انتو قال بالك طاح غادى
قبل مايوصلنا ضرب السيارة فى الحيط
-صلاح/ وتوة كيف حاله
-غيداء/ الحمدلله حاله احسن توة …لكن انا مكلماتك على موضوع ثانى
-صلاح مستعجل / اختصرى عندى ماندير
-غيداء / نقدر انجيك اليوم للمكتب ناخد عندك فنجان قهوة ونحكو …
-صلاح / مش فاضى احكى توة …ولا خليهم وقت نفضى تو نكلمك
-غيداء / الموضوغ ايخص جيهان خطيبتك واللى داراته مع رواسى
-صلاح كل حواسه انتبهو / خيرها جيهان شن دارت ادوى دوة
-غيداء/ جيهان هيا اللى لزت رواسى من الحوش ..وقالتلها
انك انت اللى عطيتها الادن بيش اتلزها
-صلاح / مستحيل …انتى وحدة كدابه …مستحيل رولسى
تصدق انى قايل لاى حد ايلزها
-غيداء/ غير اسمعنى بس ..هيا سمعاتك بودانها
-صلاح / سمعتنى …كيف سمعتنى
-غيداء/ ماهو اللفعه جيهان قالتلك انها تبى تلز قطوسه فى
حوشكم ..وانت قلتلها لزيها وفهمت رواسى ان الكلام عليها
-صلاح / مفهمتش فهمينى
وقعدت جيهان تحكى لصلاح وتفهم فيه اللى داراته جيهان
كله تبى تضرب العلاقه مابيناتهم
-صلاح / انا مستحيل انصدقك
-غيداء: تمام اهو بنكلمها بالموبايل وبنفتح المايك واسمعها بنفسك
وبالفعل كلمتها ..وفتحت المايك وصلاح يسمع بالتليفون الارضى
وغيداء الفالحه تقوللها تبندرلها وتقوللها صحة ليك طفشتيها
وجيهان عايشه الدور وتقوللها والله ماعاد نخليها تعفسه الحوش
وصلاح يسمع فى الدوة كلها …..
سكر الخط وفتح باب السيارة ..لان باله مش عندهم …باله عند خالد وصفاء
نزل من السيارة وقرر ايخش للحوش ويشوف كل شى بنفسه
__________________________
معاد فى مكان العمل ….
لف من ورا التريلات لقى بوه كيف طالع من التريلا
-مختار / معاد انت شن ادير هنايا
-معاد / عندى مشوار بعيد وخفت ادورنى ماتلقانيش قلت نستادن منك
فتح مختار باب السيارة وركب / غير ماتعطلش حتى انا طالع توة
-معاد / حاضر يابوى
وخر مختار بالسيارة ولف وطلع من البوابه
مش معاد طول للتريلا اللى حط فيها صفاء فتح الباب
بيناديها مالقاهاش
طلع طول بيسأل الشباب كانا حد شافها …ويسمع خبطه
سيارتين بالقويه
طلع يجرى يلقى سيارة بوه متهشمه كلها من قدام
مشو يجرو هوا والعمال وماطلعو بوه من السيارة الا بستين
حكمه..ركبوه فى السيارة ورفعوه طول للمستشفى
دخلوه للعنايه طول حالته خطيرة
__________________________
صفاء واقفه ورا الباب ورواسى جنبها
-صفاء/ انت منين تعرفها رواسى
-خالد / يابنتى والله ماتخافى انا مش الشخص اللى بيضرها
..بس لازم نتلاقى معاها
-صفاء/ مستحيل نفتح قبل مانعرف انت شكون
-خالد / بس انتى مش نفس الصوت اللى كلمنى امس ..انتى شخص ثانى
-صفاء/ بتقول انت شكون ولا كيف
-خالد / انا اقرب انسان ليها ….انا بوها ….
رواسى سمعت الكلمه ….واختل توازنها ..شدت فى الحيط لكن ماطاحتش
-صفاء انخلعت / رواسى خيرك …رواسى …رواسى
-خالد سمع اسم رواسى هبل وبدى يطق عالباب بالقوة /
افتحو .. افتحو الباب
-صفاء/ رواسى خيرك
تحركت رواسى جهه الباب / انت بوي …متاكد انك بوى
-خالد يبكى / والله بوك ..انا بابا يارواسى
-رواسى قربت من الباب تبكى / انت كنت محبوس
-خالد / والله ظلم ..وغلاوتك عندى يابنتى الا ظلم
-رواسى / معناها كلامهم صح انت قتلت امى وحبسوك مؤبد
….. خسارة ماراجيتك سنوات نحسابك حق مسافر تقرا …
على قد ما مستاحشاتك زمان .. توة مستحيل نفتحلك الباب ولا نشوفك
-خالد / ليش بس ..وراس بنتى ماقتلتلها ..والله اتهمونى ظلم
-صفاء/ بوك ماقتلش امك يا رواسى
-رواسى بعصبيه / اسكتى انتى مادخلكش
وتلفتت للباب / يعنى اللى قالولى ماكدبوش عليا والموضوع بالفعل صاير
-صفاء تصيح بصوت عالى / يارواسى غير اسمعينى انتو
فاهمين غلط …كلكم فاهمين غلط
-تلفتتلها بعصبيه / شنهوا الغلط اللى احنا فاهمينا
-صفاء بالعياط / بوك ماقتلش امك …اللى قتلها خالك مختار
-خالد تشنج ويخبط عالباب / افتحو الباب …افتحو الباب
رواسى مصدومه فى الكلام اللى سمعاته ومنغير ماتحس
بنفسها فتحت الباب .. وطلعت تجرى ارتمت فى حصن بوها
هوا يحضن ويبوس وهيا تحضن وتبوس
-رواسى / ليش خليتنى فى الرعايه يابوى
-خالد يبكى / ممكن كان تصرفى غلط ..بس انا وقتها كنت
شايف انه صح ..وكانت غايتى انى نبعدك عاى خوالك
صلاح خاش من الباب ويشبح فيهم يضبطو فى بعض
انصدم وقعد واقف يشبحلهم ماتوقعش ان رواسى هنايا
وبعد فاق / رواسى …انتى هنايا
__________________________
فايزة وقفت بتروح من حوش مريم
-فايزة/ شنو يا فطومه خلاص متفاهمين
-فطومه مواطيه راسها متحشمه / ايه انشاءالله
-فايزة / مفيش زعل من طلبى يامريم ولا
-مريم / ربي مايجيب زعل بينا ..ومن حقكم وحقها ان
تطلبوها من اهلها امالا شنى ..والكلام هدا من بيزعل
-فايزة / خلاص امالا متفاهمين .. انبلغ ابراهيم باللى صار
ونخليه هوا يتصرف ويبلغ عمامك
-فطومه / باهى
وطلعو من الحوش هيا ومحمود …
فتح لامه السيارة ركبت ورجع هوا للجنان ..قال لوليد ناديلى فطومه
خش وليد ناداها …وطلعت …
-محمود / واخيرا
ضحكت فطومه
قعدت معاه ربع ساعه فى الجنان ….
وخشت …
-وليد / هيا يا غادة
-مريم / وين ماشيين
-وليد / شوية بس للعيادة ونجيبها
-مريم / ياوليدى حتى انا نبى نشوفه الولد متع الحادث
-وليد/ مفيش داعى اتعبى روحك يااام ..خليك هنايا نرفع
غادة شوى ونجيبها
وبالفعل لبست غادة وطلعت معاه وتوجهو للعيادة
__________________________
صلاح خش يجرى
-منصدم / رواسى انتى هنايا ..
رواسى زعلانه منه وتبيش تشبحله. …
ولاهيه تسلم على بوها وتبوس
-خالد / الحمدلله انى شفتك قبل مانموت
-رواسى حضناته / ربي يطول فى عمرك يابوى
-صلاح قرب منهم / ربي يخليكم لبعض
عنده نيه يكلمها ويرضيها وتحشم من بوها
-خالد تلفت لصفاء/ انتى من قالك ان مختار قتلها …
-صفاء/ انتو فى خناب خش حوشكم ليلتها
-خالد بلهفه / مزبوط
-صفاء/ هداكه الخناب باعته مختار ..يبيه يجيبله اوراق متع
ورثه عند ام رواسى ..بالصدفه انتو شفتوه وصار اللى صار
-خالد / هدا علاش شهد ضدى فى المحكمه يومها
-صلاح / احنا لازم ناخدولك حقك منهم
-خالد حط رواسى فحضنه / انا حقى خديته خلاص مدام
رواسى فى حضنى توة
-صلاح شبح لرواسى / كيف حالك يارواسى
حشت راسها فى حضن بوها
-صلاح رواسى / رواسى ..اشبحيلى
-رواسى / لو سمحت ..هدا مش وقت اى كلام
-صلاح / هدا بوك وهادى صاحبتك مافيش حد برانى …كل
الكلام اللى قالتهولك جيهان وصلنى
-نطت رواسى وقفت وقامت صبعها فى وجهه / انا سمعتك
بودانى تقوللها ديري رايك ولزيها
-صلاح / تكدب عليك ..هادى بنت كدابه ودارت عليك تمثيليه
-رواسى / نقولك سمعتك بودانى
-خالد / كيف هوا لزك ..وكيف قاعد ايدور فيك معاى
-رواسى تلفتت لبوها باستغراب/ انتو تعرفو بعض
-صلاح / من زمان ..ولو كنت نعرف انه بوك كنت خطبت منه
-رواسى تلفتت الجهه الثانيه / ياسر من الكدب
-صلاح / والله والله انها دارت عليك فيلم وح نرفعك ليها
تعترفلك بلسانها وتعتدرلك
-رواسى / لا نبى نشوفها ولا نبى منها اعتدارات
-صلاح/ خلاص بلاش
__________________________
غادة ركبت مع وليد فى السيارة وماشيين للعيادة
طول الطريق فاتحلها اغانى حب وغرام
وصلو للعيادة
-وليد / نركبو فوق طول للمريض ..شوى شوفيه ونطلعو طول
-غادة مبتسمه / حاضر
نزلو من السيارة وخشو للعيادة
ركبو من الدروج طول ..غادة بدو يداها يرعشو
-تلفتلها وليد / غادة خيرك ترعشى
-غادة / منغرفش
حست ان عندها نيه تبكى ولكن شدت نفسها
-وليد بدى فى الغيرة?/ قعمزى هنايا شوى نخشله انا الاول وتو اناديك
-قعمزت غادة / باهى
وخش وليد لغرفه الطاهر
-وليد / السلام عليكم
-الطاهر / وعليكم السلام ..جت غادة
-وليد تكنطى / جت ايه …مشغولة شوى قالت تو نركب
للغرفه خمسة دقايق بس
-الطاهر / حتى دقيقه وحدة المهم انشوفها
-وليد بعصبيه / وانت ليش تبى تشوفها باللهفه هادى
-الطاهر / قصه كبيرة صايرة فى حياتنا وحاطين فى غادة الامل
-وليد مشى للباب وفتحه بعصبيه / خشى
وقفت غادة ومشت جهه الباب بتخش
-وليد / عندك خمسه دقايق
-غاة / ياودى باهى
خشت من الباب …
والطاهر يشبحلها بلهفه …شبحها تعقد لسانه ..لقاها نسخه
من غيداء …فتأكد انها اخته
رد راسه لتالى واتكى عالمخدة ونزلو منه الدموع على طول
-الطاهر / غادة ….غادة
-وليد مشاله بسرعه / خيرك خوى انشالله خير
-الطاهر يبكى / ناديها …
-وليد ?/ تعالى
قربت غادة من الطاهر وشدت كلينكس وبدت تكسح فى دموعها ….
الطاهر مد يده يبي يمسك يد غادة
ولكن غادة تحشمت او بالاحرى خافت من وليد
-الطاهر / مدى يدك انا خوك ..مدى يدك ماتخافيش
-وليد / خيرك يا اخ شن صايرلك
-الطاهر شبح لغادة / منسألك انتى عشتى فى دار الرعايه
-غادة انخلعت / وليش تسأل
-الطاهر/ لانك انتى اختى غادة اللى ضاعت مننا زمان
-وليد / شن تحكى انت يا اخ ..شنو كل وحدة اسمها غادة
بتكون اختك
-الطاهر/ لااااااا لانها نسخه من تؤامها غيداء
غادة انخلعت/ تؤامى …
-وليد / غير راجى شوية بس خلى نفهمو
وقعد الطاهر يحكيلهم على اخته الى ضاعت منهم او
انخطفت هما مش عارفين ….
وانه متاكد انها غادة ..واكبر دليل الشبه بين التؤام الزوز
وغادة عااااد صار فيها …ومابتش تضبط الطاهر لين تجى
تؤامها وتشوفها …
وبالفعل كلم الطاهر بوه بالتليفون وناداه للعيادة قاله تعالة شوف المفاجأة
وبعد ساعه جو الصادق وغيداء …..
وكانت المفاجأة كبيرة عليهم لما شافو غادة ….
نسخه من اختها …..
مشتلها غيداء تجرى اضبطتها / غادة وخيتى الحمدلله اللى
لقيناك
اما الصادق مقعمز عالكرسى مش قادر يمشى / الحمدلله
يابنيتى اللى ربي طول فى عمرى وشفتك
وطبعا وليد مصدوم ….
يشبح للطاهر / على فكرة هادى خطيبتى ..وزوجتى قريبا بادن الله
-الطاهر / الله يبارك يا غادة …وقريب اديري حتى عويله
مشتله غادة تجرى وحضناته …وهوا يبكى وهيا تبكى
قام وليد التليفون واتصل بامه / ياااام كانا نقولك خبر مستحيل تصدقيه
-مريم / شنو ياوليدى انشاءالله خير
–وليد / لقيت بو غادة وخوتها ..
-مريم / الحمدلله ..مبروك على بنيتى اللى ردها ربي لاهلها
__________________________
بعد ايام …
روحت رواسى مع بوها للحوش
وجاهم صلاح زاير ..وطلعتله رواسى جايبه القهوة
فستأدن خالد بيمشر للحمام
حطت رواسر القهوة وبتطلع
شدها صلاح من يدها / وين ماشيه
-رواسى تضحك / تحشم بوى طالع شوى وبيرجع
-صلاح يضحك / نتحشم عينك ..انا ايام معدودة وبنجى نخطب
-رواسى / ساوى امورك مع خطيبتك وبعتالى تعالى
وتلفتت بتطلع
-صلاح / قتلك …
-تلفتت / نعم
-صلاح / نحبك ….
قعدت تضحك وبتطله تلاقت مع بوها تحشمت
_________________________
وفاتت ثلاثه شهور
فى خلال الثلاثه شهور هادو …
مختار توفى بعد مانقلوه للمستشفى بيومين …قامو عزاه وبعد عشرة ايام حزنه بيطيح
صلاح واجه جيهان بالحقيقه اللى عرفها واعترفت بغلطها
وفسخ منها خطوبته تراضى بيناتهم ..بالرغم دارت هلبا
محاولات انهم يرجعو بلا فايدة
ورواسى رجعت لحوش بوها اللى كانت ساكنه فيه وهيا
صغيرة ..ورفعت صفاء معاها
وجاها صلاح يخطب جايب امه وخلاته ..وحتى صالحه
مشت معاهم …ودارلها فضانيه كبيرة
وغادة رجعت لبوها وخوها الطاهر ..ولبالرغم اختها غيداء
شريرة فى بعض الاشياء وهاملة صغارها .ولكنها تموووت فى
اختها وفرحانه بيها وكلمت كل صاحباتها فى بريطانيا
وخبرتهم انهم واخيرا لقو اختهم الضايعه ..ومشى خطبها وليد رسمى من بوها
وفطومه نفس الشى مشى عمك ابراهيم لعمامها وخطبها
منهم رسمى لولده محمود وعطوهالهم …وقعدت مقيمه عند مريم مابتش اتسيبها …
وصفاء نفس الشى قعدت عايشه مع رواسى خلال الثلاث
شهور هادو …وجى لامين عم معاد لخالد ..وسلم عليه
واستسمحه فى اللى صار كله…وسلم على رواسى بنت اخته
بالرغم قلبها مش صافى من ناحيته …وخطب صفاء لمعاد ولد خوه ..بالرغم مش وقته لكن الولد شد وامه قالتله على كيفك ..
ودارو عرسهم الاربعه فى نفس اليوم ونفس الصالة …
الوحيد معاد مادارش عرس كبير عشان وفاه بوه
اما الثانيين داروهم اعراس امطنطنه …صلاح حتى الزكرة تضرب يومين فى جنانهم …
وكدلك وليد دارتهوله امه عرس كبير وماخلت من حضرت
ومحمود حتى هوا عرس كبير وزمزامات تخبط …حتى عمتك فايزة مش شوى
ولبسوالعرايس فلواتهم …..
وخشو للصاله كل وحدة بروحها خافو من العين ….
وداروها حفله مشتركه عرسان وعرايس… عشى فاخر
..وزمزامات …وفى نهايه الحفله كل عريس قعد واقف برة طلعوله عروسته …صورو وطلعو
رواسى ترجت بوها ايجى يسكن معاها وهوا رفض …ومع
هدا مابتش اتسيبه لين خطبتله ..انتم عارفين منو طبعا
ياحنه خطبتله الابله سلمى ..وقررو بعد ما يكمل حوستها هيا
ويوصلها لعريسها ايجيب هوا سلمى لحوشه
اما الحاجه ام صلاح مابتش ادير الكيد على رواسى فى
تربايه الصغار …جابت زوز فلبينيات يتساعدو ..المهم ايكونو تحت اشراف رواسى
وغادة خشت فى الفيلا اللى كان ساكن فيها خالد مع وليد …
صينها وشرالها دار نوم ..
وتوته توته خلصت الحدوثه ..
تمت ….نحبكم ❤