رواية لا تسألنى من انا
#لاتسألنى_من_انا
.
?? بقلم زهور جمال الدين??
.
?الحلقة الثامنه عشر ?
.
.
.
صلاح طلع بيشري هديه لعيد ميلاد كركور
وهوا فى الاصل يبي يطلعها ياخدلها لبسه تحضر بيها العيدميلاد ..
طلعو من الحوش ركبو فى السيارة ….
صلاح سعيد بوجودها معاه ..وهيا سعيدة اكثر منه ..
فاتحين المسجل متع السيارة واغانى حب وجو …
تلفتلها / تعرفى انى سعيد بوجودك جنبى فى السيارة ..
ونراجى امتى تركبيها معاى وانتى زوجتى
-رواسى / بس الحرب من جيهان مش ساهلة
-صلاح / تى من جيهان تمشى تشيط ..انتى معاك راجل مش عيل
-رواسى تضحك / اممممم باهى
-صلاح / انتى غير ماتدخليش بس وخلينى انا تو نتصرف
-رواسى / حاضر
-صلاح / اسمعى شويا بس نفوت على واحد صاحبي بنعطيه اوراق
-رواسى / ايه باهى عادى
ولف من الطريق وخس جيهه حوش الدكتور وليد
خش شارعهم درس السيارة …
-صلاح / منعطلش عليك …شويا بس منعطلش عليك
-رواسى / باهى
ونزل صلاح مشى جهه حوش الدكتور وليد ….
لقى باب الكنشيلو مفتوح .. فتحه وخش
ورواسى قعدت فى السيارة وتتفرج
تشبح فى شباب واقفين قدام مصنع صغير متع صناعه
عصير كيف مفتوح جديد ..اسمه عصير جوجو
قعد صلاح داخل الحوش قيس الربع ساعه وطلع …
لقاها تراجى فيه
فتح باب السيارة وركب ….
-شبحلها بابتسامه / عطلت
-رواسى / لا لا عادى
ولع السيارة ومشو
طلعها وشرالها فستان قنين …تفاجئت لما رفعها لمحلات
الملابس وتحشمت
-رواسى/ والله ماصارت عندى حوايج
-صلاح / انتى اميرة الحفله لازم تكونى اجمل وحدة فى الموجودات
__________________________
ثانى يوم فى حوش ابراهيم
فطومه مقعمزة على سرير دعاء اخت محمود …
متحشمه تقول قاعدة فى نص حوايجها
ودعاء مقعمزة عالطاولة اللى فى دارهم وتقرا واحلام متكيه فى سريرها
طقطق باب الغرفه وانفتح ….
-فايزة/ دعاء تعالى اغسلى الماعينة
-وقفت فطومه / اهو تو نطلع نغسلهم انا
-فايزة/ لا لا صحيتى اهو تو تطلع دعاء تغسلهم
وطلعت وسكرت الباب
حطت دعاء كتاباتها وطلعت ورا امها وسكرت الباب
فطومه وجعها قلبها ….وانغصت تبى تبكى
وفى خاطرها / احنا ليش الناس مش متقبلتنا ..احنا بشرعاديين زى زيهم …
وقفه …وفتحت الباب وطلعت …
فاتت من قدام المطبخ لقت دعاء كيف بادية بتغسل الماعين
قدمت وصلت لعند الصاله
-فطومه / خالتى
-فايزة تفاجئت / نعم
-فطومه / انتى ليش ماتبينييش اعطينى سبب
فايزة وقفت / يابنيتى احنا مانعرفوكش ..وتوبك مش من توبنا …
وانا الحق…..
وسكتت
-فطومه /كملى
-فايزة بهدوء ومتحشمه شوى / انتى فرضك عليا عمك
ابراهيم وهدا علاش انا سكتت …
لكن كان تبى رائي انا راس هالوليد عندى ..نبى لما نجيبله
مرة نقعمز بين الناس ونتفاخر بيها
-فطومه واطت راسها / معاك حق تو نتصرف انا
مشت جهه التليفون الارضى دارت مكالمه وتكلمت بصوت واطى …
ومشت من الصالة وخلت فايزة واقفه تشبحلها …
وخشت للحمام ومعش قدرت اتشد نفسها قعدت تبكى بحرارة …
وبعد عشرة دقايق غسلت وجهها وقوت نفسها وطلعت من الحمام
مشت طول لسرير دعاء ورقدت فيه وغطت وجهها ماتبيش حد يلاحظها …
وفات اليوم كله على فطومه زى النهارات السود
وقيس المغرب طق باب الحوش وفتحت احلام …
خش محمود فرحان
__________________________
فى حوش مريم
-مريم / ربي يهنيها انشاءالله
-محمد / لكن اناى غالطه كيف تخليهالهم.. مفروض خليناها
عندنا لين يخطبوها من اعمامها
-مريم / البنيه شدت ..وقالت نبى نقعد معاهم
-محمد / توة شن بنقولو ربي يلايمهم لبعضهم وخلاص
-مريم / انشالله ….
وتلفتتله / قتلك…
-محمد / شنو …
-مريم / خالد محيرنى
-محمد / خيره
-مريم / معقولة لا قال ينتى امتى راحت ولا مشى لنساباته
قاللهم دبرو فى البنت …قصه غريبه ولا
-محمد/ حتى انا لاحظت .. بس كل حد عنده حسابات …
بعد غدوة ح نسئله
-مريم / وين بتتلاقو بعد غدوة
-محمد / انتى مش بتمشى مع غادة لعيدميلاد ولد صلاح
صاحب ولدك وليد ..قلت مدامه الحوش فاضى نمشى لخالد نهدرز عليه
-مريم / والله مانى عارفه نمشى والا لا …هوا عيد ميلاد ولد صغير ..وبعتالى العويلة منعرهمش الحق
-محمد / ياودى شكله ولدك عاجبينه وشاد فى مشيتكم يبيكم تتعرفو عليه
-مريم / يرفع غادة تتعرف عليهم وخلاص
-محمد / كيف عاد انتى الاصل يامريم ..خودى بخاطر ولدك وبري
-مريم / انشاءالله خير .معناها غدوة نطلعو ناخدوله هديه
-محمد / القجر قدامك وخودى قداش ماتبى وبري انتى وغادة واشرو اللى يعجبكم
-مريم / ربي يطول فى عمرك ياااارب
-محمد / حددتو العرس
-مريم / بعد اسبوعين انشاءالله
-محمد / ع الخير انشاء الله
جت غادة من الممر تنحنحت ..
-غادة / السلام عليكم
-مريم ومحمد / وعليكم السلام
-غادة / شنحالك ياعمى محمد
-محمد / لاااا انا بنغير ..يعنى مريم اتقوليلها يااام وانا تقوليلى عمى
غادة ضحكت
-محمد / حتى انا تقوليل بوى
-غادة / باااهى شنحالك يابوى
-محمد / الحمدلله فى خيار الخير
وضحكو الثلاثه
-غادة / يااام كلمتنى فطومه توة
__________________________
معاد جى لحوش صلاح
لقى عمك جمعه فم الباب ..
-معاد / شن حالك عمى جمعه
-جمعه / صفاء مهناش ..
-معاد يضحك فى ضحكه صفرا / ومن قالك انا جاى على خاطر صفاء
-جمعه / امالا شن جاى تبى
-معاد / جاى نبى الاستاد صلاح
-جمعه / صلاح مهناش
-معاد / تى خيرك تسكر فيها انت يا جمعه ..اهيا سيارته
-جمعه / جمعه حاف …ماصارش من عمو..وبعتالى هوا حاط سيارته وطالع مع صاحبه
“يوزع فيه ???”
-معاد / واااك انا الفاضى ..تو نطلم صلاح بعتالى ونجى معاه
-جمعه / باهى تمام مع السلامه
-معاد / تى خيرك ادف
– جمعه / خيرك بديت دوتك هلبا …وسكر الباب وخلاه برة
معاد ماشى ويسب / تو تشوف ياجمعه الشياطين ??
__________________________
صلاح فى الممر متع الديار واقف قدام باب الصغار ايكلم فى رواسى
-صلاح / غير خلينى نشوفه عليك القفطان
-رواسى تضحك / اولا بنخليه مفاجأة لك …ثانيا منقدرش
اندخلك لدار الصغار توة ولا نقدر نلبس ونطلع للممر بالقفطان
-صلاح / توة ليش هكى يا مجرمه
-مربعه ايديها / هدا هوا نبيكش تشوفه توة دبر راسك ..نبيك
تشوفه عليا فى يوم العيد ميلاد وتقولى عجبك والا لا
-صلاح / انتى تعجبينى كان تلبسى خيشه
-رواسى / تعيش وتجيبلى حبيبة ..ربي يحفظك ليا حبيبي ومايحرمنى منك
-صلاح / انتى غيرتى هلبا فى حياتى ..غيرتينى
بالكامل ..احلوت الدنيا فى عيونى بعد ماتعرفت عليك
-رواسى / وانا من يوم عرفتك نسيت الماضى اللى كنت
فيه ..وعايشة بيك وبحنانك وبلطافتك معاى
-صلاح يضحك / خلينى نخش للدار شوى
-رواسى / قلتلك الاااااا???
طلعت الحاجه من دارها / روحتو
رواسى انخلعت خافتها تكون سمعتهم
-صلاح / ايه روحنا من بكرى
-الحاجه / وشن خديتو
-صلاح / حجزنا التورته ووالتزيين وحاجات العيدميلاد كلها
-الحاجه / باهى ربي يحفظك يا وليدى اتعيش واديرله عيد ميلاد
-صلاح مبتسم / هدا كركور الغالى ياااام ..يستاهل اكثر من هكى
__________________________
محمود للحوش فرحان وسعيد
-محمود / السلام عليكم
-فايزة / وعليكم السلام
-محمود / بنخش لدارى شوية يااام
-فايزة / سلم اوليدى فكنى من بوك وعياطه عليا…قالك ماتخشش للحوش ولا
-محمود خاش / تى قلتلك نبى دارى يااام ..عندى كرت مهم نبيه
وخش لداره وفتش ودور على الكرت اللى يبيه وشى شى ماحصلاش…على قد مافتش
طلع للصاله / يااام عندى كرت لونه احمر مكتوب فيه ارقام تليفونات بالك شفتوه طايح
-فايزة/ ماطاح شى فى الحوش باوليدى كل يوم واحنا نضمو ونسيقو تشبح فينا
-محمود / تى بالك طاح هنايا ولا هنايا..الكرت مهم عندى الكرت هلبا بالك تلقيهولى
-فايزة : والله يا وليدى ماريناه …بالك طاح منك هنايا ولا هنايا ….ولا بالك طاح فى حوايجك
-محمود : باهى تو ندور عليه كويس فى المحل
وتنحنح / يااااك انكلم فطومه شويا
-فايزة / ياراجل شن قالك بوك
-محمود ماشى جهه دار خواته / شووويا بس يااام
وقف ينادى / فطومه …فطومه
طلعت احلام / قالتلك شوية بس وجايه للصالة
مشى محمود جهه الصالة ….شويا وجت فطومه
-فطومه / مساء الخير
-محمود / مساءالنور …اسمعى فى حاجه كنت نبى نديرهالك
مفاجئة لكن الباين انها فشلت
-فطومه / شنو
-محمود / رواسى جتنى للمحل وسألت عليكم انتى وغادة
-فطومه فرحت / رواسى ..وينها رواسى محتاجتها هلبا انا
-محمود/ خطيبها اعطانى كرت فيه ارقامه لكن راح منى معش لقيته
-فطومه / خطيبها .. قصدك رواسى انخطبت
-محمود / الباين هكى ..لكن انا ح ندوره الكرت واكيدة حنلقاه بادن الله
شرين باب الحوش
-فايزة/ احلام افتحى الباب
طلعت احلام فتحت الباب وخشت ومعاها مريم وغادة
-محمود / غادة ..خيركم شن فى
-غادة / فطومه كلمتنى قالتلى تعالى
– تلفت لفطومه / خيرك يافطومه شن فى
-فطومه جمعت قوتها / بنمشى معاهم
-محمود ضحك/ وين بتمشى معاهم
-فطومه / انا قعدت معاكم يومين هنايا فى الحوش
..وسامحنى ماستريحتش …احنا مش لبعضنا يامحمود
-محمود / فطومه انتى بعقلك ..خيرك هبلتى
-مريم / فى حد ضايقك
-فطومه / بالعكس اقسم بالله مافى حد جى جيهتى ..لكن خلونى على راحتى ..
وتلفتت لمحمود / سامحنى يامحمود مفيش نصيب ..ربي يجيبهالك زينه
-محمود مصدوم / تكلمى يااام
-فايزة / كل شى ايجى بالسيف الا حبنى يابنادم ..خلو البنت على راحتها
-مريم / امالا انا فى السيارة …
وطلعت ورقه وبيرو وكتبت رقمها
وتلفتت لاحلام اخت محمود مدتلها ورقه / هدا رقم تليفونى
خداته احلام منها
“مريم متوقعه انه عارض وحترجعلهم فطومه فحبت يكون رقمها عندهم ”
وطلعت …وطلعت وراها غادة وهيا فى حالة صدمه وعارفه ان فطومه صاير معاها شى
اما فايزة فى داخلها سعادة وارتياح جت منك ياجامع
ومحمود طلع ورا فطومه للجنان / فى حد ضايقك ..امى لزاتك ..صارحينى ماتهبلينيش
-فطومه / نقولك الحق ..فى شخص من طرف خالتى مريم كلمهم عليا المدة اللى فاتت ..وكل حى ياخد نصيبه فى الدنيا
-شدها من كتافها / منهوا الشخص هدا ..كلمتيه ..شفتيه
-فطومه / لا كلمته ولا شفته … وانت معش نبيك مش بالغصب هيا
وفكت نفسها منه وركبت مع مريم فى السيارة
روحو للحوش وعلى قد ماسألوها وهيا شى ماتبيش ترد ولا تحكى …
خشت للدار وسكرتها بالمفتاح ورقدت عالمخدة وهيا تبكى
__________________________
اليوم اللى بعده
-صلاح / هيا واتيين ولا شنو
-رواسى / شويا بس انكمل فطور كركور ونطلعو
-صلاح / ماهو انا عندى شغل مانبيش نعطل
-رواسى/ لا ماتخافش مش حنعطلوك هيا مراجعه بس عند الدكتور مش حيعطل فيها
-صلاح / باهى هاتيها ونراجى فيك برة فى الصاله
-رواسى / باهى
وطلع صلاح للصالة قايم سلسبيل لقى امه مقعمزة
-الحاجه / والله بنيتى مافيها حاجه ..غير زايد بتردها للدكتور
-صلاح / تعرفينى يااام حريص عالمعاينه ..ولعلمك المراجعه اهم من المعاينه
-الحاجه / على راحتك يا وليدى ..كنت نبى نكلمك على موضوع جيهان
-صلاح / يااام اطلعى منه انتى الموضوع وخلينى انا نتصرف
..انتى تبينى سعيد ولا
-الحاجه / وشن نبى ثانى امالا ياوليدى
-صلاح / انا سعادتى مش معاها ..سعادتى مع غيرها ..
ومستحيل نفرط فى سعادتى بيش نرضيها هيا ولا نرضى امها
جت رواسى قايمه كركور فى غمرها / انا واتيه
-الحاجه / هاتيه عبودى …
-صلاح وقف / هيا عطلنا
وطلعو ركبو فى السيارة ومعاهم سلسبيل ومشو للعيادة
خدو رقم ..وخشو للدكتور ..وطمنهم على سلسبيل …
وطلعو من غرفه الدكتور …
-صلاح / راجينى هنايا شوى نركب فوق لغرفه الدكتور وليد
صاحبى فى اوراق بناخدهم منه ونجى
-رواسى / باهى
قعدت مقعمزة وفى حجرها البنيه وركب هوا فوق للدكتور ونزل هوا وياه …
واشرلها / تعالى
مشت رواسى لصلاح خدى منها سلسبيل طول
-صلاح / الدكتور وليد صاحبى
-وليد / مساء الخير
-رواسى/ مساء النور
-صلاح / هادى خطيبتى
-وليد / الله يبارك ..ربي يهنيكم
رواسى تحشمت منه واطت راسها
-صلاح / خلاص امالا نتلاقو فى عيد ميلاد ولدى يادكتور..
لازم تجى حتى انت مع العويلةة
-وليد / حاضر بادن الله …
-صلاح / هيا نستادنوك
-وليد / لحظه بس غادة خطيبتى نص ساعه و توصل خلى نعرفوهم على بعض
-صلاح / هيا تشتغل معاك هنايا
-وليد / كانت موقفه العمل معانا ..واليوم رجعت
-صلاح / اهاا كويس
-وليد / هيا بالتاكيد قريب توصل .تعالو نقعمزو فى مكتبى شوى
-صلاح / توة انا مستعجل هلبا وعطلت عندى موعد ..غدوة
يتعرفو على بعضهم فى العيدميلاد
-وليد / انشاءالله ..
وتلفت لرواسى / فرصه سعيدة
وطلعو ركبو فى السيارة
-رواسى/ تصدق لما قال اسم غادة رعشت مع بعضى
-صلاح / ليش حبيبتى
-رواسى/ فكرنى بصاحبتى غادة ربي يدكرها بالخير وين ماتكون
-صلاح / غادة بنت الصادق
-رواسى / ايه
__________________________
ثانى يوم وصل عيد ميلاد كركور
هداكه الجنان كله زينا …جايبيين شركه اتنظم
اضواء والعاب اطفال …
صلاح واخد اجازة من شغله …
غير حوايجه وطلع للصاله ….
يلقى جيهان مقعمزة تراجى فيه ..شافاته طلع وقفت طول
-جيهان / حبيبي …هكى ليا ثلاثه ايام مروحة مدورتنيش بكل
-صلاح ببرود / اهلا جيهان
خشت غيداء من باب الحوش / السلام عليكم
-صلاح وجيهان / وعليكم السلام
-غيداء/ شنو صلاح كل شى تمام مافيش شى ناقص
طلعت رواسى من الممر وفى يدها سلسبيل تبى تعطيها
للحاجه فى تحسابها فى الصالة
-غيداء شافتها / انا عازمه ناس وشخصيات مهمه ..مانبيش الشغالين يطلعو للجنان بكل
رواسى سمعتها
تلفت صلاح لقى رواسى جايه وفى يدها سلسبيل
-تلفتلها / صباح الخير
-رواسى / صباح النور نحساب الحاجه هنايا جايبتلها سلسبيل
-صلاح / امى مازالت فى دارها تعالى نرفعوهالها
-رواسى/ باهى
ومشى صلاح جهه الممر ووراه رواسى
-جيهان تعيط/ صلااااح
-تلفتلها / شويا بس نصبح على امى معاهم وتو نجى…
وخشو للممر
غيداء/ اسمعى الوضع معش ينسكت عليه
-جيهان / قصدك رواسى ولا
-غيداء/ ومن غيرها وهيا تتلصق عليه
وتلفتتلها / لكن اسمعى لقيتلك الخطه اللى تريحك منها
-جيهان / شنهيا قوليهالى تربحى
-غيداء/ تعالى نطلعو للجنان ونفهمك شن اديرى بعتالى ..
نخاف حد يسمعنا هنايا
-جيهان / تعالى
__________________________
تمت …ويتبع
زعما غيداء الشياطين شن مفكرة ادير لرواسى ..
عموما القصه وصلت للنهايه معش مزال فيها هلبا …
تابعونا
نحبككككم ❤