رواية لا تسألنى من انا
#لاتسألنى_من_انا
.
?? بقلم زهور جمال الدين ??
.
?الحلقه السادسه عشر?
.
تنويه/ الحلقه تعتبر قصيرة بعدين نزلكم اضافيه
.
.
.
.
رواسى خشت لدار الصغار …
وصلاح مع امه فى المكتب يتناقشو فى حكايه عمك مختار
.. واتفق معاها انه مايحكيش الحكايه لحد ..ويفوتوها ع
اساس انهم متاكديين انه حد من الدار وزابط مكانها وين
وبعد ماطلع من المكتب لحق رواسى لدار الصغار
غيداء شافاته خاش من الممر لحقاته طول ….
وقفت تراقب ..شافاته فتح باب دار الصغار ..وخش
وقربت من الباب تتصنت …
-صلاح سكر الباب وراه وهوا حامق / انا شن قلتلك عليه البارد هدا
-رواسى دايرة الحولة / منهوا
-صلاح / معش تستغبى عليا ..نتكلم على طاهر الشياطين
-رواسى / خيره
-صلاح / ماخيره شى غير يسأل فيك كانك مرتبطه والا لا
-رواسى خافت / وانا شن دخلى فيه هوا سأل
قرب منها بسرعه خوفتها ومسك كتفها/ مش انا قلتلك معش تكلميه ولا
-رواسى / ااى ايدى ..انا ماكلمتاش ..انا رديت عليه بس
-صلاح رخى يده / انا كل مانشوفك واقفه عليه..تبدا زى النااار فى صدرى منقدرش نتحمله
وغيداء تسمع بقوة ومصدومه فى اسلوبه معاها لانه قدامهم مش هكى..
-رواسى تلفتت للجهه الثانيه بمكر / وعلاش النار هادى
-قرب منها وقف وراها / من حبي ليك ومن غيرتى عليك
وحط يده على كتافها ولفتها ليه / تحبينى
-رواسى / اكيدة نحبك ونموووت فيك
-صلاح مسك ايديها / ربي يحفظك ليا يا عمرى
-رواسى/ نمووووت فى غيرتك عليا
-صلاح / فرحانه انتى عاد
-رواسى / ايه فرحانه باهى
غيداء فم الباب مصدومه …يابسه فى مكانها …شن اللى بين صلاح ورواسى …عقلها ستك ومش قادرة تستوعب
وقعدت تسمع
-صلاح / انا معش قادر نخليك بعيدة عليا اكثر
-رواسى / انا مقدرة ضرفك ومخليك انت تتصرف
-صلاح / عيد ميلاد كركور بداية الاسبوع الجاى …يكمل على خير وبنفسخ خطوبتى طول
-رواسى / وغيداء
-صلاح فرحان / انا ماقلتلكش ..خلاص اوراق التنازل متع سلسبيل كملتهم اولامس وغيداء تنازلتلى عليها رسمى
-رواسى / معقولة !!!…باهى الحمدلله
-صلاح / معناها معش فى داعى انى نستمر فى كدبتى عليها ..ولا مزال فى داعى نغريها بالزواج
غيداء هنايا تحركت من قدام الباب وهيا فى حالة صدمه ..تضربيها بموس ماتطلعش منها قطرة دم
مشت للصالة لقت الحاجه مقعمزة مع طاهر..ستادنتها تبى تروح ..وبالفعل ولعت سيارتها وروحت
__________________________
فى حوش وليد …
خشو خالد ووليد للمربوعه …
لقو محمد بو وليد مقعمز ايراجى فيهم …
العجيبه ان محمد وخالد الباين طلعو معرفه قديمه
-خالد مستغرب / محمد !!!!
-محمد نفس الاستغراب / خالد !!
وقف محمد وسلم على خالد واضبطه
-خالد / شن حالك يا محمد وشن حال لامين
-محمد / ايييييه وين اخباره لامين قداش ليا ما ريتاش سنين
-خالد / اييييه يا دنيا …من قال اول مانطلع من الحبس نتعرف على ولدك ونقعد فى بيتك
-وليد مستغرب/ انتو شنو طلعتو معرفه ولا كيف
-خالد / احنا معارف واقارب
-وليد / كيف فهمونى
-خالد / شن حال مريم
-وليد / انت طلعت تعرف حتى امى يا عمى خالد
-محمد / هوينها صحتها خير منى
-وليد / فهمونى عاد كيف طلعتو تعرفو بعض
-محمد تلفت لوليد / عمتك سعاد رحمه الله عليه قبل
ماتتوفى مش كانت متزوجه دكتور اسمه لامين
-وليد / ايه الدكتور لامين تزوج بعدها وحدة اجنبيه
-محمد / لامين يكون نسيب عمك خالد خو مرته …فهمت
-وليد تلفت لخالد / وعنده خوه اسمه مختار ولا
-خالد / بالزبط هما هادو الله لاتربحهم هما اللى شهدو ضدى وقتها زى ماحكيتلك
-محمد/ قداش وجعتنى وقتها يا خالد ..لكن الله غالب ما باليد حيلة
-خالد / انا غير نلقى بنتى توة ..معش نبى منهم شى
-محمد / قصدك وصلك خبر انها راحت من خوالها وهيا صغيرة
-خالد ضحك / وصلنى ايه
” ماباش ايقوله انه هوا اللى خاطفها ”
-محمد / نادى امك خلى تسلم على عمك خالد .
ناض وليد اينادى فى امه …
وتلفت خالد لحمد / نقدر نعتمد عليك فى بعض الامور اللى تخص مختار ولامين
-محمد/ طبعا تقدر تعتمد عليا فى اى شى تبيه منهم
ومشى نادى وليد امه وانصدمت مريم بخالد وحست ان الدنيا مصغرها تلم من كل الجهات
ومدولهم الغدى وتغدو
__________________________
الحاجه وطاهر مقعمزين فى الصالة
-طاهر/ هوا انا سألت عليه امس قالولى مش موجود… غدوة بعاود نمشى نسأل عليه فى العيادة
-الحاجه / هيا شن علاقتها بيه صيدلانى زيها
-طاهر / ماعتقدش …هوا شخص كبير شوى فى العمر اسمه
خالد ..وقاللى الراجل متع الباب انها كانت هوا الوحيد اللى عندها حديث معاه
جى صلاح للصالة لقى طاهر مزال قاعد اضايق
-صلاح / شن حال عمى الصادق توة
-الطاهر / مانكدبش عليك متأثر هلبا لما مالقيناش غادة
-صلاح / بالصبر حيلقاها انشاء الله
-الحاجه / المهم عرف انها حيه …وسيورها تمشى لجامعتها وتتلاقو معاها
-الطاهر / انشاء الله يارب
وتلفت لصلاح / انا الحق الشغل هوا هداكا عطلت عليه ..ولازم نرجع فى اسرع وقت
-صلاح فرح / ايه احسن شى انك ترجع لبريطانيا
-الطاهر / وبما انى بنسافر ..ف الحقيقه مندسش عليكم ..انا معجب ببنت ونبى نتواصل مع اهلها قبل مانسافر
صلاح جاته صفار
-الحاجة / مبروك عليك يا وليدى ..منهيا !!
-الطاهر/ رواسى اللى تشتغل عندكم ..لو مافيش مانع نبى رقم تليفون اهلها
الحاجه فرحت هلبا بالنصيب الكويس اللى جى لرواسى
-الحاجه / خلى نعرض الامر على رواسى وكان وافقت نخليها تحكيلك وتتفاهم معاها
-صلاح متكنطى/ مش بكرى سألتها وقالتلك انها مرتبطه
-الحاجه/ لا مخطوبه ولا شى ..لا لا البنت مامعطيا لحد
-صلاح وجهه بدى احمر/ البنت ماقالتش مخطوبه ..قالت مرتبطه ..وبالك هيا مرتبطه مع حد بعلاقه
-الحاجه / لا لا ماعتقدش.. اهو قداش ليها معانا لا ريناها طالعه ولا ريناها شادة تليفون
“صلاح ايكحل والحاجه تعمى ??”
-الطاهر فرح / باهى طمنتينى خالتى فطيطيم ..امالا شوفيهالى ومادابيك تستعجلى انا مسافر الاسبوع الجاى
-الحاجه / باهى انشالله تلقى الرد عندى
-صلاح قريب يطربق/ نستادنكم
وطلع من الحوش
__________________________
وفاتو ثلاثه ايام …..
الحاجه سألت رواسى على طاهر فقالتلها انها مش مفكرة فى الارتباط حاليا وتحججت بحكايه انه ممكن مايقبلش كونها كانت عايشه فى الدار
وصلاح استريح شوى يبي ياخد شوية فرصه بس ..ايتم عيد ميلاد كركور وايدير اللى فى راسه
وغيداء تاكل فى بعضها عالكلام اللى سمعاته وتراجى فى مرواحة جيهان بعد يومين بفارغ الصبر بيش تخبرها باللى صاير وتحطها هيا فى وجه المدفع
ومختار مشى لصلاح وسأله على رواسى وصلاح رقى الازرق وقاله انه مش متزوج وماعنداش بنت بالاسم هدا ..وعلى قد ماقعد مختار ايفكر فيه بهداكه اليوم وهوا شى داير الحولة لدرجه انه شكك مختار فى نفسه وخلاه ايفكر انه يتخايل فى هداكه اليوم
والطاهر كل مايمشى يسأل على خالد يلقاه طالع …وخالد حاير من الشخص اللى قاعد ايدور فيه كل يوم لانه مش عاطى اسمه
ومريم قررت فى هداكه اليوم ترفع فطومه لحوش اهل محمود
راكبين فى السيارة غادة وفطومه ومريم
-مريم / ردى بالك اديرى اى حركه يافطومه ..والله امه كان حست بيك لما تقددك بسنونها
-فطومه تمسح فى دموعها / انا وعدتك يا خالتى مستحيل اندير حاجه
-غادة / يااااربي استر
ووصلو قدام حوش محمود
فطومه قلبها يطق وغادة ومريم احرف منها
واحنا قلوبنا اطق خايفيين من الموقف احرف منهم
وقفو قدام الباب
-مريم / خلونى انا نتكلم
-غادة/ باهى
شرينو على باب الحوش فتحت الباب احلام اخت محمود تقرا فى الاعدادى
-مريم / امك قاعدة
-احلام / قاعدة ايه
-مريم / قوليلها يبوك نساوين
-احلام / باهى
وخشت البنت شوى وطلعت قالتلهم قلتلكم امى تفضلو
وبالفعل خشو للصالة …
لقو عمتك فايزة لابسه قفطان كاتفه وفوقه ماليا …
-مريم / السلام عليكم
-فايزة / وعليكم السلام مرحبتين بيكم تفضلو
-مريم / وصلنا
وهيا قلبها فى المليون خايفه فطومه تفضحهم
خشو البنات ومريم قعمزو وبدو ينشدو شنحالكم كيف حالكم
وفايزة اتراجى فيهم يقولو هما علاش جايات
ومريم تتخضر وتتصفر
-فايزة / احلام نوضى جيبينا طاسه عصير
مريم استغربت شنو عصير وهما جايات ايعزو ..حسو انها مافهمتهمش فقررت مريم تتكلم
-مريم / احنا والله جايين انعظمولكم الاجر فى المرحوم
-فايزة استغربت / اللطف من مات
-مريم / احنا جايين انعزو فيك فى ولدك محمود
-فايزة نقزت جت واقفه / اللطف على وليدى ..توة عاطياته فطوره فى داره
-غادة عيطت / كيييف
وقفت فايزة تنادى / محمود …يامحمود
وسمعو صوت محمود من داخل / نعم يااام
وخش للصاله ….شاف فطومه انصدم
وفطومه شافاته طاحت مغمى عليها
__________________________
جيهان وصلت من السفر
مشتلها غيداء بنت خالتها تسلم عليها
وقعمزو ايهدرزو
-غيداء/ عندك علم ان صلاح عنده علاقه بوحدة
-جيهان تعيط / كيف ومن قالك
-غيداء/ فى حد شافه وخبرنى
-جيهان وقفت / منهيا البنت هادى تى والله لما نقربعها على راسها وراسه
-غيداء/ ريلاكس حبيبتى ..اهدى شوى وخليك دكيه زى بنت خالتك ..اول شى لازم تعرفى البنت منهيا وبعتالى تاخدى عليها معلومات وتتصرفى
-جيهان / منهيا البنت هادى …تى والله لما نلبسها قضيه
-غيداء وقفت بتروح / انا مانعرفهاش.. لكن شاكه فى وحدة معينه ..لما تهدى تقولك عليها منهيا ونساعدك فى فضحهم الزوز
-جيهان / والله عرفته متغير…سفرتى كلها ماكلمنيش حتى مرة ..ولما نكلمه ايدير فى روحه مشغول
-غيداء/ اتفقنا …اهدى وتعالى نفكرو مع بعض.. سلام
__________________________
فى حوش محمود العيلة كلها تلمدت
خواته الثلاثه وخوه الصغير
ومحمود من تركينه وغادة من تركينه اينوضو فى فطومه ويبخو عليها فى الميه
وغادة من دهشتها / يامحمود احنا جايين انعزو فيك نحسابوك متت
-فايزة/ من شنو بيموت بعيد السو على وليدى ..تى هادو منو يا محمود
فطومه فاقت / محمود …محمود انت حى
-محمود / انا حى يا فطومه ماتخافيش
-فطومه تبكى / نحسابك متت ..
-فايزة تلفتت لمريم / انتو منو يا وخيتى فهمينى
-محمود تلفتلها / هادى فطومه اللى حكيتلك عليها نبى
نخطبها ..وخشت للحوش والله ماعاد طالعه منه
-فايزة مصدومه / احلام …احلام وينك
-احلام / انا جنبك ياماما
-فايزة / كلمى بوك ايسكر الدكان وايجينا شكله الموضوع كبير
__________________________
تمت ….ويتبع
نحبكم❤