رواية لا تسألنى من انا

#لاتسألنى_من_انا

.
?? بقلم زهور جمال الدين ??

.
?الحلقه الخامسه عشر?

.
.
رواسى وصفاء قاعدين مع محمود ….

صلاح حس ان علاقته بيهم قويه …

-صلاح/ خوى انت المفروض لحقتها طول للدار

-محمود/ مالاول قعدت مغمى عليا وبعتالى..لما فقت فكرت

انها حقدت عليا من الشى اللى صار قلت خليها ترتاح وبعتالى نمشى نرضيها

-رواسى/ انت تعرف فطومه حساسه ..ومش من النوع اللى تسعى انها تاخد حقها

-صفاء/ انت غالط يا محمود وتستاهل الحبس

-محمود عيونه دمعو / بالله عليكم ماتزيدونيش على مابيا

-صلاح / خلاص يابنات توة احنا المفروض نسعو اننا نلقوها مش نقعدو انلومو ونتعاركو

-صفاء وقفت / بالنسبه ليا انا مقاطعه تامه لين ترضى عليه فطومه وتسامحه …

وتلفتت لرواسى / هيا بتروحو ولا مزال

-محمود / وين بتمشو وبتخلونى بروحى

-رواسى وقفت / ماتخافش يا محمود ح نخلوك فى الصورة لو صار معانا حاجه ..وانت نفس الشى

-صلاح مدله كرته / هادو ارقامى تقدر اتكلمنى عليهم لو وصلت لحاجه

-محمود / حاضر بادن الله

___________________________________

فى حوش الحاجه ….

غيداء وقفت سيارتها فى قراج الحوش و خشت

هما عندهم زى مربوعه صغيرة تفتح على برة …

لما خاشه للحوش تلفتت غيداء شافت مختار مقعمز

-غيداء/ السلام عليكم

-مختار / وعليكم السلام

وخشت للصاله لقت صالحه

-غيداء/ السلام عليكم

-صالحه / وعليكم السلام

-غيداء/ شنو عندكم ضيوف

-صالحه / قال يبي الحاجه فى امر ضرورى

-غيداء انخلعت / بالك جايها على خاطر موضوع اختى غادة

-صالحه / لا ماعتقدش ..الشخص اول مرة نشبحه

طلعت الحاجه من ممر الديار …

-الحاجه / اهلا غيداء جيتى فى وقتك خشى قعمزى مع الصغار مابين شفت الضيف

-غيداء/ وين رولسى !؟

-الحاجه / رواسى طالعه هيا وصفاء مشوار تبع قرايتهم

“غيداء تبى تعرف الشخص منو حتى لو وقفت وتصنتت”

-غيداء/ بالله خشى جنبهم انتى يا صالحه ..انا شويتدا بنخش الحمام حاشاك

-صالحه مايفوتش عليها شبحتلها بنضرة شك / حاشاك من السو

الحاجه تلفتت لصالحه / وصى البنت فى المطبخ على فنجان قهوة قبل

-صالحه / حاضر

ومشت الحاجه للصالون اللى فيه مختار…

__________________________________

فى حوش وليد

-مريم / لاااا انتى صبيه وحقك لازم تاخديه كامل

-غادة / انا مشكلتى فى اوراقى ماعنديش حتى ورقه

-مريم /تو عمك محمد يتصرف …هوا محامى وفالح فى الامور هادى

-غادة / قداش انتى طيبه يا عمتى مريم

-مريم / لا قولى يااام زى مايقول وليد ..انا ماعنديشبنات وانتى بنتى

وفطومه مقعمزة على تركينه فى سريرها ومهيمه وساكته وخلاص

-تلفتتلها مريم / وانتى يا انسه فطومه ..امتى بتطلعى من حزنك هدا

-فطومه قامت راسها / ااه تكلمى فيا

-مريم / ايه نكلم فيك انتى …توة اللى صار صار …موقف صار فى حياتك وتم ليش تقعدى غارقه فى الحزن عليه

-فطومه قعمزت / انا يا ابله مريم

-مريم / حتى انتى قوليلى يااام ..والله معزتكم فى قلبى من معزة ولدى وليد

-فطومه / لا خلينى نقولك يا خالتى مريم ..

-مريم / زى مايريحك يا فطومه

-فطومه / انا اللى يرحنى نمشى نعزى تمه وخواته

-مريم /غير كانك بتطلعى من الحالة اللى انتى فيها .. انا نرفعك

-غادة/ انا خايفه عليها …تتهور ولا تبكى ولا تعترف قدامهم ..فطومه نعرفها حساسه وتنهار فى لحظه

-فطومه / فى البداية ممكن صح ..لكن توة الموضوع فات عليه وقت ..وانا والله كان ترفعينى يا خالتى مريم ماندير حاجه

-مريم / خلاص غدوة انا بنمشى للعمل..ومرات نتأخر وبعد غدوة بتساخير الله نمشى انا وياك

-فطومه ناضت حضنتها / ربي يحفظك ليا ياخالتى

-تلفتت مريم لغادة/ نكملو الموضوع هدا ونلهو بعرسكم انتى ووليد

غادة واطت راسها تحشمت …

-مريم / امالا بتقعدو هكى كل واحد منكم راقد فى دار ..خلى نزوجوكم ونلمو شملكم

-فطومه/ هدا احلى خبر سمعته

________________________________

مشت الحاجه جهت الصالون

وغيداء واقفه اتراقب فيها تبى تلحقها وتتصنت

خشت الحاجه / السلام عليكم

لحقتها غيداء طول تتصنت من وراء الباب

-مختار/ وعليكم السلام

قعمزو عالصالون ….

-مختار / انتى ممكن ماتغرفينيش يا حاجه

-الحاجه / لاااا ماحصليش الشرف

-مختار/ محسوبك مختار صاحب شركه تنسيق حدائق وسبق وجينا ونضمنالكم الجردينه هنايا

-الحاجه مستغربه / مرحبتين بيك

-مختار/ والله شن بنقولك يا حاجه منحبش انلف وندور انا

-الحاجة/ خش فى الموضوع طول انشاء الله خير

-مختار/ انا وبلا مواخدة ..جاى نسأل على كنتكم

غيداء انخلعت معرفتش الدوة عليها والا على جيهان

-الحاجه باستغراب/ كنتى !!… من تقصد

-مختار/ كنتكم رواسى …

انصدمت الحاجه …وانصدمت غيداء …

وفى خاطرها / كنتهم …كيف كنتهم

-الحاجه تحكمت فى نفسها / منكدبش عليك ..انا الحق ما ماعنديش كنه

-مختار/ تى كيف يا حاجه شفتها يومها راكبه مع ولدك ورافعين بنتهم بيعاينوها فى العيادة

الحاجه حست انه من جماعه الدار وجاى يبي يرفع رواسى يردها عندهم …فخدت احتياطاتها كامله

-الحاجة/ خوى بالك غالط فى الحوش ..انا ولدى مش متزوج وماعنديش كنه

-مختار/ اللى اسمه صلاح ولدك ولا

-الحاجة / اى نعم ولدى

-مختار/ خلاص انا شفتها راكبه معاه ….

وقدم شوى فى تقعميزته / ماتخافيش يا حاجه انا خالها

-الحاجه / خالها !!! …ومادامك خالها كيف ماكش عارف بنت اختك وين

-مختار/ قصه طويلة يا حاجه ..البنت ضاعت من خوى لما كانت صغيرة ..ومعش عرفنالها مكان

-الحاجه/ كيف رايحه وهيا صغيرة وكيف عرفتها توة بعد ماكبرت

-مختار / نسخه من امها ماخلت فيها حاجه ..انا متاكد انها بنت اختى عندكم هنايا ..بالك مغيريلها اسمها

وقفت الحاجه / انا ماعنديش وحدة بالاسم هدا فى الخوش وتقدر تتواصل مع ولدى وتزيد تتاكد

-مختار/ خيرك تكدرتى يا حاجه .. انا رانى ليا فترة ندور عليها انا وخوى وكان تقدرى تساعدينا تربحى ماتبخليش

-الحاجه / قلتلك ماعنديش حد بالاسم هدا

-مختار/ امالا صحيتى ونستادنك وتو نرجع للمهندس صلاح بالك اندير انا وياه حل

-الحاجه / شرفت وانست

تحرك مختار جهه الباب بيطلع

وغيداء هربت تجرى للصاله بيش مايزبطوهاش …

وفى خاطرها الف سؤال/ ليش الحاجت نكرت وجود رواسى عندهم فى الحوش !؟ …من شنو خايفه !!

طلع مختار وخشت الحاجه …

-غيداء/ نسيت ضى السيارة والع لحظه انطفيه وانجى

وطلعت تجرى من الباب للباب الخارجى …

ونادت على مختار/ يا عمووو

تلفت مختار/ ايوووة

___________________________________

مريم قاعدة مقعمزة مع البنات وتهدرز

نادى عليها وليد من الصالةة

-وليد / يااام …يااام

-مريم / نعم يا وليد

-وليد / ترا تعالى انتى وغادة ..

ناضت غادة لمت شعرها وطلعت مع مريم للصالة

-وليد مبتسم / كيف حالكم

-مريم / اهو نحكو عالعرس ..قلتلهم لازم نستعجلو

-وليد فرح /ديرو رايكم واطلعو اشرو والفلوس ماعندكمش فيهم مشكله

غادة واطت راسها وتحشمت قدام مريم

-وليد / بنقولك حاجه يا غادة

-غادة قامت راسها / شنو

-وليد / انتى تعرفى واحد اسمه طاهر

-غادة استغربت / لا لا

-وليد / ماعندكمش واحد يخدم فى الدار بالاسم هدا

-غادة/ لا لاماعندناش الحق ..ليش تسأل

-وليد / لانه بلغونى فى العيادة انه جى و سأل عليك

-غادة انخلعت / سأل عليا !!!

-وليد / خيرك انخلعتى ماتخافيش …هوا سال البنت متع الريسبشن وقالتله انك سيبتى العيادة ومعش تجى

-مريم / اسمه الطاهر شكون …شن لقبه بالك غادة تدكر اللقب

-وليد / البنت فى الريسبشن ماعرفتش اسمه كامل …اصلا قالت حتى الاسم عرفاته لانه رد على تليفونه الشخصى وقال قوليله قالك الطاهر اهو انا فى العيادة نسأل عليها

-مريم / معناها مش شخص واحد اللى يسأل عليها ..مجموعه اشخاص

-وليد / المشكلة ان الكاميرا متع الريسبشن جابت ضهره بس..وجهه ماطلعش

-غادة وقفت مخلوعه / منو يسأل عليا ..انا مانعرفش حد خارج الدار

-وليد بحنان / خيرك يا غادة انا معاك ماتخافيش

-مريم حست ان مكانها غلط / شوى نحط الشاهى عالنار

وطلعت مشت للمطبخ

-وليد / ستاحشتك حبيبتى ..

-غادة ضحكت / اششش امى فى المطبخ تسمعنا

-وليد قرب منها / انا معش قادر راهو .. العرس بنديره اللسبوع الجاى

-غادة متحشمه / باهى غير ارجع قعمز فى مكانك امى ببتجى

-قعمز وليد / قداش نحبك وانتى تقولى امى

-غادة تضحك / باهى خلاص اسكت

جت مريم من المطبخ / قتلك بنرفع فطومه تعزى فى محمود

-وليد يضحك/ انتى عرفتى حتى محمود

-مريم / بناويتى مايدرقو عليا شى

-وليد / امشو عادى..وكان تبى نرفعكم انا مفيش مشكله

-مريم / لا تو نمشى انا وياها فى سيارتى ..نقوللهم اننا كنا زباين عنده

-وليد / وتضمنيها تسكت

-مريم / هيا وعدتنى وانشاءالله خيرر

-وليد / هيا نستادنكم اناة..وعلى فكرة غدوة بنجيب عمى خالد اللى حكيتلكم عليه انتى وبوى بيتعشى هنايا

-مريم / ايآنس وايشرف

_________________________________

غيداء لحقت مختار

-غيداء/ ياعموو

-تلفتلها مختار/ نعم

-غيداء/ على سكون كنت تسأل انا لحقت على كلامك الاخير بس

-مختار/ اللى اسمه صلاح يومها شفت معاه مرته عندها بنت صغيرة رافعين ايعاينو فيها …نبى نتاكد اسمها رواسى والا لا …وبنت شكون

غيداء/ حنحاول نساعدك بس اعطينى معلومات عليها وانت شن تقربلها

-مختار/ انا خالها

-غيداء/ وبوها وامها وين ..قصدى ليش انت اللى تسأل عليها

-مختار / امها رحمة الله عليها

-غيداء/ وبوها

-مختار/ بوها الكلب فى الحبس

-غيداء/ وعلاش اللطف شن دار

-مختار/ قتل امها

انصدمت غيداء وفرحت فى نفس الوقت لانها لقت سبب بيش تلوى لرواسى دراعها وتخليها تنفد كل اوامرها

-تلفتتله/ هات رقمك اعطيهولى واول مانلاقى معلومه نكلمك طول

-مدلها كرت / اهما ثلاث ارقام ارضيه فى مكتبى اتصلى طول

-غيداء بمكر / حاااااضر

-مختار/ هيا نستادنك

-غيداء/ ادنك معاك يا عمووو

وفى خاطرها / صار قلتلى بوها قاتل امها ….ماشى الحال

___________________________________

طاهر درس سيارته قدام حوش صلاح ويشوف فى مختار راكب سيارته وماشى وغيداء قاعدة واقفه

-طاهر/ هدا منو

-غيداء تضحك / هدا كنز

-طاهر/ كنز شنو

-غيداء/ ماديرش فى بالك ..ياحنه هدا عنده شركه متع جرادين وزراعتهم

-طاهر / اهاا

-غيداء/ قولى انت شن صار معاك فى العيادة

-طاهر / البنت قالتلى انها بالفعل اشتغلت فيها لكن ليها فترة مسيبه

-غيداء/ اووووف كل مانحلت تعقدت اكثر

-طاهر/ لكن الولد اللى فى الباب قالى انها عندها علاقة قوية بشخص كبير شوى فى العمر اسمه خالد .. قالى احتمال انه يعرف مكانها وين

-غيداء / باهى كويس ..يااارب يعرف مكانها وين ويدلنا عليها

خشت سيارة صلاح من باب القراج ….

راكبه معاه رواسى من قدام وصفاء من الخلف …

غيداء حست بغيرة قويه …نااااار

بينما طاهر فرح لشوفت رواسى

نزلو من السيارة

-صلاح والبنات / السلام عليكم

-غيداء وطاهر/ وعليكم السلام

وطاهر طبعا يشبح لرواسى بابتسامه حلوة

-طاهر/ كيف حالك انسه رواسى

-رواسى متحشمه وخايفه من صلاح / الحمدلله

وتلفتت نستادنكم ….

وخشت هيا وصفاء

وطاهر لحقهم طول ….

وصلاح يبي يمشى فى جرتهم وقفاته غيداء

غيداء/ من بكرى نراجى فيك ..نبى نمشو نحجزو التورته

-صلاح مستغرب / تورته شنو

-غيداء/ عيدميلاد عبدالرحيم ..ولا نسيت الاسبوع الجاى معش مازال هلبا

-يبي يتخلص منها / انا حجزت من امس

-غيداء/ لااااا خسارة قبل نبى نختاروها مع بعض

-صلاح / تعالى نخشو لداخل …

ومشى بسرعه يبي يلحقهم

خشو صفاء ورواسى ووراهم طاهر

-طاهر/ انسه رواسى

-تلفتت رواسى لقت صلاح كيف خاش من الباب / نعم

-طاهر/ حضرتك مرتبطه

-رواسى شبحت لصلاح / ايه

-طاهر/ بس مش شايف فى يدك دبله

-رواسى/ بس انت بالفعل مرتبطه

-طاهر مش طايب على خاطره / ربي يهنيك

-رواسى/ تسلم نستادنك

وتلفتت خشت لممر الديار هيا وصفاء

طلعت الحاجه / صلاح تعالة نبيك شوى

-غيداء كيف خاشه / الاسبوع الجاى عيد ميلاد عبدو يا ماما

-الحاجه / عالخير انشاءالله

وتلقتت لصلاح / تعالة نبيك شوى

وخشو غرفه المكتب وحكتله على مختار ..والزوز فى نفس التفكير كدبو انه ممكن ايكون خالها واتوقعو انه حد من الدار جاى يسأا عليها ..فقررو انهم اى حد يجى ينكرو وجودها عندهم

__________________________________

فى الليل

خالد ووليد وصلو قدام الاستراحة …..

بيش خالد بيتعشى معاهم وبيتعرف على بوه وامه

فتح وليد باب الاستراحة بالمفتاح وخش

-وليد/السلام عليكم

-مريم / وعليكم السلام

-وليد / وين بوى

-مريم / فى المربوعه الدخلانيه

-وليد / باهى خشى هلى يحش الراجل لداخل

وبالفعل خشت مريم …

وخشو خالد ووليد للمربوعه الدخلانيه لقو عمك محمد مقعمز

-وليد /السلام عليكم

-محمد / وعليكم السلام

وخش خالد اندهش/ محمد

-محمد مصدوم / خالد

واضبطو بعضهم ….

-وليد / انتو تعرفو بعض

-خالد / شن حال لامين

____________________________________

تمت ….ويتبع

نحبكم ❤