رواية لا تسألنى من انا

#لاتسألنى_من_انا

.
??بقلم زهور جمال الدين ??

.
?الحلقه الثالثه عشر ?

فى حوش الحاجه …

-الصادق / مهما صار بينا من خلافات احنا عيله وحدة بيناتنا احفاد

-الحاجه / اسمع ياحاج … اللى داراته بنتك ما اديراش بنت اوصول ..وانا والله كان مش الموضوع اللى نبيك فيه مهم مانقابلها ولا نستقبلها فى حوشى..وماتواخدنيش عالكلام اللى نقول فيه

-الصادق/ مرات ماتتواخدش ياحاجه ..مرض ولدك ماكانش ساهل تعانيه بروحها .يبي جلسات ويبي كيماوى

-الحاجه /انت مقتنع بالكلام اللى تقول فيه يا حاج

-الصادق/ توة موضوع وفات وانا والله مانبى نتناقش فيه ..الصغار عطتهم هيا بقناعتها ..ومالوحتهمش فى الشارع ..مرات صدرك انتى احن عليهم من صدرها هيا

-الحاجه / سلامت عمهم ..والحمدلله ربي رزقنى ببنيه دايرتها جليسه ليهم متعلمه ومثقفه وتتعامل معاهم بالحب والحنيه

-الصادق/ ربي يبارك وانشالله ديما طايحه فى بنات الحلال
-الحاجه/ انشاءالله

-الصادق/ ماقلتيليش عالموضوع اللى تبينى فيه
-الحاجه / خلى انادى ولدى صلاح وانخشو للمكتب

وتلفتت / صالحة…يا صالحه

-جت الصالحه/ نعم يا حاجه
-الحاجه/ ناديلى على صلاح
-صالحه / حاضر

__________________________________

فى استراحة وليد

-وليد / امى وبوي قريب ايروحو
-غادة / بلحقه ..

-وليد مبتسم / الاسبوع الجاى زى اليوم ايكونو فى ليبيا

غادة زى اللى رعشت ولونها تغير

-وليد /خير ترعشى
-غادة/ واااك مشناها اللقطه كيف بتلقانا خارج الدار

-وليد / اسمعى ياغادة هدا زواج مش لعبه ..وانا برغم حبي الكبير ليك …مارضتش امى على ارتباطنا مستحيل نتخد فيه خطوة ..ونقعد انحاول لين ترضى

-غادة / كيف يعنى
-وليد / يعنى انا من اول يوم جبتك هنايا انتى وفطومه كلمت بوى وامى وحكيتلهم وحطيتهم فى الصورة

-غادة / اهاا
-وليد / مش تقولى هدا مسيطرين عليه اهله وعلى خصوصياته .. والله لا …لكن كونى نجيب بنات لاستراحتهم ونسكنهم فيها منغير علمهم والله مانقدرها

-غادة/ وامك شن قالتلك
-وليد / قالتلى دير رايك واللى تعرفه صح تصرفه لين انروحو

-غادة / ربي يردهم بالسلامه
-وليد / ااامين ..واول مابيروحو بنخطبك طول

-غادة?/ من منو بتخطبنى يا حسرة
-وليد / بنخطبك من امى ..مش قالتلى هادى من اليوم صارت بنتى ..خلاص معناها بنخطبك منها

وقعدو يهدرزو فى باب الاستراحة اكثر من نص ساعه وبعدها طلع روح ..

خشت غادة لفطومه لقتها مقعمزة حزينه …

-غادة / فطومه حبيبتى وسعى بالك
-فطومه / تربحى ياغادة ارفعينى نعزى ..خودى بخاطرى

-غادة / منقدرش نرفعك ليهم يا فطومه نخافك ماتسيطريش على اعصابك
-فطومه / نسيطر غير ارفعينى بس

-غادة/ قالى وليد خلى ايتمو ايامات العزى ويرفعك
-فطومه حطت راسها على صدر غادة / ربي يخليكم ليا انتى والدكتور ..والله لولاكم اشبح شن صار فيا

-غادة/ متقوليش هكى انتى وخيتنا يا فطومه

____________________________________رواسى فكت يدها من طاهر ..خافت من صلاح

-صلاح/ امى تنادى من بكرى
-رواسى/ والله ماسمعتها اهو تو نمشيلها

وطلعت من الغرفه وطلع صلاح وراها وسكر باب الصغار ولحقها

-صلاح/ اسمعى

رواسى تلفتت …

مسكها من يدها وجبدها ودخلها لداره وسكر الباب

-رواسى/ آي ايدى …خيرك
-صلاح/ شن الجو البارد هدا وايدك لاصقه فى يده

-رواسى/ منهوا هدا
-صلاح بغيرة/ اللى اسمه طاهر

-رواسى تتعدر / انا سلمت عليه عادى
-صلاح / اسمعى هدا واحد صايع مانبيكش تختلطى بيه نهائي

” المشكله ان طاهر عكس اللى قاله ..مهندس جيولوجى وعنده الجنسيه البريطانيه وانسان غايه فى الاحترام ?”

-صلاح/ اهو نبهتك ..مانلقاكش واقفه عليه
-رواسى فرحانه بغيرته / ياودى باهى معش ندوى معاه ..

-صلاح/ هوا ماعنده ماجايبه عندنا ..وفى حال جى اقسم بالله نلقاك معاه تعرفى شن يصيرلك
-رواسى/ باهى فهمنا افتح الباب ليش اتجيبنا فى الشبهه

تلفتت للباب تبى تفتحه ..وقف هوا وراها

-صلاح/ رواسى
– وهيا قاعدة متلفته للباب / نعم

-صلاح/ تحبينى

ايدها على مقبض الباب يرعشو

-صلاح/ جاوبينى ..انا منبيش نفرض نفسى عليك
– رواسى تلفتتله/ وانت فى حد يشوفك مايحبكش

خداها من يدها وقعمز عالسرير وقعمزها جنبه ولفتها ليه

-صلاح/ امالا ليش اتصدى فيا هكى
-رواسى مواطيه راسها / اولا انا مش من مستواك…وبعتالى عيلتى

يشبحلها/ خيرهم عيلتك ..ادوى

“يبيها تتكلم هيا وتحكيله لانه حالف لامها مايقوللهاش انه عرف”

-رواسى/ ماخيرهم شى

-صلاح/ انا بنفسخ خطوبتى من جيهان

-رواسى/ لاااااا

-صلاح / حبيبتى انا والله مالاول ناوى الفسخ ..بس قلت نتريث شوى…
وحط يده على صدره / لكن لما حبيتك ومشاعرى تحركت خلاص مع عندى وقت للمجاملة ..وياروحى مابعدك روح

ومسك يدها : وانتى روحى

وشبحلها / هااا شن قلتى

-رواسى / انا مش قدك ..انا انسانه ابسط مما تتصور

قص عليها / انا نحبك يابنت ..وانتى شنو تعبتينى راهو

-رواسى واطت راسها / خايفه

-صلاح / حبيبتى ماتخافيش طول ما انا معاك ..انا راجل ونعجبك

-رواسى/ راجل وسيد التريس ..لكن جيهان مش حتسكت

-صلاح / انا عارفها مش حتسكت ..لكن انتى فى حمايتى وتحت جناحى

-رواسى / تصدق الكلام هدا اول مرة نسمعه فى حياتى

– مسك ايديها الزوز / ومش اخر مرة ح تسمعيه …

واطت راسها تحشمت

قرب منها / نحبك

قامت راسها شبحتله

-صلاح / واخر مرة بنسئلك تحبينى والا لا

-رواسى / بصراحة اناااا

-صلاح / انتى الباين عندك حسابات ثانيه ..بس نبى نقولك كلمه تحطيها فى دماغك ..انا نبيك لو تطلعى بنت شكون

-رواسى/ خلى نطلعو قبل ماينتبهولنا
-صلاح / مانلقاكش واقفه تدوى معاهم حوش الصادق …انا راهو منحبهمش

-رواسى/ حاضر

طق الباب…

رواسى انخلعت..شدلها صلاح ايديها / اششش

وتلفت للباب/ شكون

-صالحه / الحاجه تبيك

-صلاح / قوليلها اهو جاى

-صالحه / حاضر

وتلفت لرواسى/ خلى نطلع نشوف بعتالى اطلعى انتى
..امشى لدارك طول …الصغار معاهم امهم وصالحه

-رواسى تضحك / حاضر ياهمى منك

صلاح /???

طلع من باب الغرفه شبح الممر ..واشرلها طلعت طول

وطلع هوا مشى لامه

_________________________________

خشو صلاح والحاجه والصادق للمكتب

-الحاجه / بنقولك حاجه على موضوع فات عليه زمان
..وانشاءالله يطلع حق

-الصادق يشبحلهم الزوز باستغراب/ شنهيا الحاجه هادى

-الحاجه / عندك بنت ايقولولها غادة ولا

وقف الصادق مخلوع/ خيرها غادة ..تكلمى يا حاجه …سمعتى عليها حاجه

-صلاح / غير اهدى يا عمى الصادق ..ممكن عرفنا مكانها وين

-الصادق / الله اكبر.الله اكبر..مش معقولة ترجعلى بنتى بعد سنين ..اللهم لك الحمد

وهووب ايجى الشيبانى طايح مغمى عليه

-الحاجه اتعيط / يا صلاح الحق عمك الصادق طاح

جاه صلاح يجرى قامه / عمى الصادق …عمى الصادق

تلفت لامه / جيبي اميه يااام بسرعه …

طلعت الحاجه فتحت الباب وتعيط / يا صالحه …يا صالحه وينك جيبي اميه

صالحه فى غرفة الصغار مع غيداء سمعت عياط الحاجه

وطلعو يجرو هيا وغيداء وطاهر

وجت رواسى تجرى هيا وصفاء

-الطاهر/ خيره بوى يا صلاح

-صلاح / غير قيم معاى توة نطلعوه للصاله ايشم هواء نضيف

-غيداء/ خيره بابا …حيه عليا بابا?

-صلاح / تى حولى خلى الطريق…

قاموه صلاح وطاهر بين ايديهم وطلعوه للصالة بخوه مسكين بميه وجابوله رائحه شمموهاله بيش فاق شوى

-غيداء جنبه تبكى / بابا ..خيرك اغمى عليك شن صار

-الصادق حاط يده على شعر غيداء/ ماتبكيش يا بابا …هدا اسعد يوم فى حياتى وحياتكم

-الطاهر/شن صار يابوى

-الصادق / خلى نتاكد من الكلام اللى وصلنى وبعتالى ساهل

وتلفت للحاجه / تعالى يا حاجه انتى وصلاح شويا للمكتب

وناضو خشو للمكتب .. واصر الطاهر انه يخش معاهم

وقعدو رواسى وصفاء وغيداء وصالحه فى الصالة

-رواسى/ الصغار خليتوهم بروحهم

-صالحه / انخلعنا من العياط جينا نجرورواسى ماشيه للممر وصفاء لاحقتها …

-صفاء توشوشلها/ مفضى بالك حتى امهم مانشغلتش عليهم

-رواسى ?/ ضمى فمك انا مش زيها ..انا خلاص بديت مكبدة عليهم

-صفاء/ عليهم وعلى عمهم

شبحتلها رواسى وضحكت…وخشو لدار الصغار

لحقتهم غيداء ….

وبدت تهدرز على رواسى وتتقرب منها …وتسال فيها عالصغار

استادنت منهم صفاء وطلعت

وكملت غيداء تهدريزها وجابت سيرة جيهان

-غيداء: هيا جيهان بنت خالتى تجى هنايا

-رواسى/ ايه تجى مرة مرة

-غيداء/ وشن جوها مع صلاح

-رواسى/ مانعرفش الحق ..انا مانطلعش من دار الصغار

-قربت منها غيداء/ انتى شكلك طيبه ..

-وتتنحنح / وبصراحة نبى نزيدك فى المعاش على خاطر اهتمامك بصغارى

-رواسى / اهاا

-غيداء/ ولعلمك انا مفكرة نرفع صغارى معاى لندن
…وبالتاكيد ح نرفعك معاهم مدامهم واخدين عليك

-رواسى/ بس الاستاد صلاح وامه متعلقين بيهم ..زعما يعطوهملك ..

-غيداء/ بالتاكيد يعطوهملى ..ببساطه لانى انا وصلاح بنتزوجو وبنرفعو الصغار وبنمشو لندن

رواسى انصدمت من الخبر

-غيداء/ بصراحة صلاح عم صغارى ..وانا اولى بيه من جيهان …بالك تحسابينى حق مخليه صغارى عندهم بيش نعطيهملهم ..لا ياماما انا قلب ام راهو

-رواسى/ امالا ليش عاطيتهم صغارك

-غيداء/ بيش نضغط على صلاح وامه ..لانى عرضت عليه الزواج

-رواسى/ ماشالله الحياة تغيرت وبدت المراءة هيا اللى تخطب فى الراجل

-غيداء/ انا تربيت فى لندن .وماعندناش فرق بين الرجل والمراءة

-رواسى بخوف / وهوا وافق

-غيداء/ طبعا وافق ..بس قالى اعطينى شوية وقت نتخلص من جيهان

-رواسى/ اهاا..يفسخ قصدك

-غيداءتتنحنح / بالزبط يفسخ منها ونتزوجو ..ولحد ما يفسخ منها نبيك تجيبيلى اخباره

رواسى قامت راسها وشبحتلها

-غيداء/ تو بتقولى هادى خيرها من وقت خشت طايحه طول تسال وتحكى فى اسرارها ….انا اولا انسانه عمليه ..ثانيا لانى ماعنديش وقت انا بعد غدوة بنولى لندن

-رواسى / ايه باهى …

-غيداء/ نبى اخباره هوا وجيهان امتى بيفسخو

-رواسى/ وليش عاطيه فيا الثقه وتحكيلى فى اسرارك هادى كلها

-غيداء/ لانها ببساطه مش اسرار….كل اللى فى البيت هدا عارفين انى عارضه على صلاح الزواج وهوا وافق ..وبناخد صغارى وبنتزوجو وبيمشى معاى لندن ..حتى من صالحه عارفه

-رواسى/ وجيهان حاسه بموضوعكم ولا قاعد مستغفلها الاستاد صلاح

-غيداء/ طبعا لا ماتعرفش ..ولو خنتينى وقلتيلها ح نوديك ورا الشمس

-رواسى/ لا شمس ولا قمر ولا ليا علاقه بى هالمواضيع

-غيداء/ كيف يعنى

-رواسى/ يعنى انا لا اسمع لا ارى لا اتكلمو….والكلام اللى سمعته فى بير ..وطلعينى من هالمواضيع لو سمحتى

______________________________

-الصادق يبكى/ معقولة طول هالسنين بنتى عايشه فى دار الرعايه وانا ندور برة

-صلاح / غير وسع بالك ياعمى الصادق ربي كريم وقادر ايلم شملكم امتى مايكتب هوا

-الصادق تلفت للحاجه / نبى نفهم علاش ماتبيش تقوليلى عالناس اللى دلوك ..والله انى بنقدملهم جائزة قيمه

-الحاجه / اعتبرها وصلت ..لكن هما الحق موصيينى نتكتم على اسمائهم

-الطاهر/ صدمه الحق …
ويضحك / معقولة بعد هالسنين نتلاقو مع اختى غادة

-الصادق/ نوض يا صلاح ارفعنى دار الرعايه ندور بنتى

-صلاح / غير بالشوى يا حاج ..دير احتمال انها مرات تطلع مش هيا

-الصادق / باهى غير هيا نمشو وننشدو عليها وبعتالى ساهل

-الطاهر/ هيا نوضو حتى انا بنمشى معاكم

وبالفعل طلعو من المكتب ركبو السيارة طول …

واتوجهو لدار الرعايه

_______________________________

لما وصلو دار الرعايه …رقى عمك مراد مديرها الازرق … وقاللهم ماعنديش بنت بالاسم هدا
حجه كل مرة ..لما بنت تهرب ينكرها بيش مايخشش فى اى مسؤليه عليه

لكن عمك الصادق مستغنى …وعنده القرش

وطاح يغرى فى مراد بالدولار واليورو والباوند

ومراد عيونه بدو قلوب

-مراد / نقولك الحق يا استاد الصادق

-الصادق / قول

-مراد / البنت كانت عندنا واختفت ..

وقام يده / لكن زى ماوعدتنى لا اديرلى شوشرة ولا قصص

-الطاهر/ كيف اختفت …كيف

-مراد / لو سمحت يا اخ ماتعليش صوتك

وتلفت للصادق/ المبلغ اللى وعدتنى بيه يكون عندى

-الصادق / قول بنزيدك فوقه …غير ورينى صورة ليها بيش نتاكد انها هيا

-مراد / انا نقولك انها بنتك اللى ادور فيها

-صلاح / وكيف عرفت

-قام مراد ايده ووجهها عالطاهر / لانها تشبه الاخ هلبا

-الطاهر/ باهى غير جيبنا صورة ليها تربح

قام مراد التليفون / الو …سالم ..هات ملف غادة

وخش سالم جايب ملف غادة …

والصادق والطاهر قلبهم ايطق

فتح مراد الملف وطلع صورة ليها واعطاهالهم : هادى هيا

نقز الطاهر لبوه يحضن فيه / هيا يابوى …هيا اختى غادة

-صلاح / الحمدلله

والصادق يبكى بالعبرة

مراد / توة طلعونى انا من الموضوع ودورو كيف تلقوها

____________________________

فى حوش محمود

-فايزة تخبط على فخادها / ياغبارتى …يا حظى الاسود

-محمود / تى خيرك يااام درتيها مناحه

-فايزة/ وشن تبينى نقول لعماتك المسمومات اللى يكرهونى طول عمرهم …ولدى يبي يخطب بنت من الرعايه

-محمود / وخيرهم بنات الرعايه يااام مش بنادميه

-فايزة/ لااااا بنادميه ..لكن لا معروفلهم لا اصل لا مفصل

-محمود / قلتلك هادى اهلها معروفين

-فايزة / امالا علاش لوحوها مادامها عرضهم

-محمود / يااام احنا مانعرفوش ضروف الناس وعلاش حطوها فى الدار

-فايزة / اسمع يا محمود ..بوك مستخيل انقوله .. وانت لا ولدى لا نعرفك كانا خديتها

-محمود حدف الطاولة اللى قدامه كسرها/ علاش يااام …علاش اديري هكى ..تى عيب عليك البنت بنادم راهى حتى هيا

-فايزة / هدا اخر كلام عندى .. مزال والله ..يسالونى جيرانى منين كنتك نقوللهم من الرعايه

-محمود / اسمعى يااام انا البنت بناخدها رضيتو ولا رفضتو
وانا ماشى لبوى وبنقوله

-فايزة / تعالة جاى ..ماتركبش على بوك السكر

وطلع وسكر الباب وراه

______________________________

تمت ….ويتبع

نحبكم