أحببت عدوي

احببت عدوي

الحلقة 21

أحمد/ اني جاي حاب نقولك أول شي حمد لله علي سلامتك

رواد/ الله يسلمك وتاني شي جاي انت مش تقولي سيب بنتي في حالها وخليها وهي مش ليك صح ولا

أحمد/ يارواد اسمعني

رواد/ عمي احمد لو سمحت انت اسمعني اني نبي نقولك شي مهم اني نحب بنتك من كل قلبي وهي تحبني واني مش ناوي نضحك عليها بدليل اني نبي نخطبها عمي القصة طويلة ووسع بالك انت مش عارف كيف شكل علاقتنا في الاول اني كنت نكره بنتك وهي نفس الشي كانت تكرهني اني تعرفت علي دينا وحبيتها ونسيت كرهي ليها وماكنتش حابب اني نصارحها بمشاعري لاني كنت خايف مش انها تردني ولا تكون متبادلنيش نفس الشعور لا بالعكس مع انه لو رفضنتي كنت رح نسبب احراج ليا وليها اني كنت خايف لو نصارحها نخوضوا علاقة وهي تكون رافضة الزواج في الوقت الحالي ونظطر اني نكون معاها في علاقة وصاراحتا اني مش حاب ندير علاقة ونغضب ربي مع اني عارف روحي في مواقف صارت بينا هي غلط وراجا دماغك مايمشيش بعيد لا مصار شي خطير لاني مستحيل نفكر اني ناذي دينا ولو بكلمة ياعمي اني نبي بنتك بالحلال حتي لما قتلي انك مش موافق كانت في هلبا تصرفات نقدر نتاخذها بس اني ولد عالم وناس وقبل هذا كله اني راجل نخاف ربي في نفسي وفي بنت الناس الي معاي والحمد لله اكبر دليل علي كلامي اني قدرت نقنع دينا وانها تتحجب

احمد/ شن يظمن لي ان كلامك صح

رواد/ بعد الي قلته مزال تبي ضمان به مش راح نعطيك ضمان لان دينا مش سلعة بس راح نقولك هلبا اشياء كنت نقدر نديرها اولا كنت نقدر نكون ولد حرام وحشاني طبعا اني يا عمي سافرت مع بنتك بروحنا ويشهد ربي اني مافكرت حتي تفكير سي فيها بلعكس كنت نتمنى اني نقدر نعمي عيون الناس عليها قعدنا مع بعض 3 ايام وكنت نقدر فيهم ندير علاقة معاها ونجيبلك العار تانيا لو كنت اقل شوي من ولد حرام راهو كنت نتزوجها عرفي ونستغلها
تالتا لو كنت اني نبي نديرها بالعناد فيك كنت نقنعها ونرفعها ونتزوجها في محكمة وطابعا مافيش حد يقدر يوقفنا بالغين راشدين الزوز فوق السن القانوني الزوز ولله الحمد مسلمين يعني زواجنا شرعي مش مدني ومن نفس البلاد الي انت رافضني علي خاطرها يعني طوول للمحكمة ولا سفارة وانتهي الموضوع
لكن لاني ولد ناس ومتربي ونخاف ربي قلت لبنتك لا نحاول نقنع بوك مرة واتنين وميه وحتي الف ونقولهالك ومستعد نعاودها لو ترفضني مية مرة راح نتقدم نطلب يد دينا منك مليوون مرة لاني نحب بنتك ونبيها بالحلال

احمد/انت عارف اني سياسي ولو ارتبطت بي بنتي ممكن يكون في خطر علي حياتك

رواد/ قصدك راح نموت عمي احمد اني مستعد نموت مية مرة في سبيل دينا تعيش ودليل قدامك يعني هادي متبيش ضمان

أحمد/ههههه لا هادي صح تمام يعني بعد الي قلته كله انت مصر وتبي تتزوج بنتي

رواد/ ليا الشرف واني مش عيل وطايش ومتاكد من مشاعري وعارف شن نبي وكل الي نحلم بيه لقيته في دينا

احمد/ اني متأكد من انك راح تقدر تسعد بنتي وعموما اول مرة تكون مش ذكي

رواد/ علاش كيف؟

أحمد/اني مجيتش مش نقولك سيب بنتي اني جيت مش نقولك انك انت الوحيد الي ممكن نامن علي بنتي معاه يا ولدي اني عطيتك لو رب العالمين عطاك

رواد/ بجد ياعمي مش عارف شن نقولك يعني اني تهورت في كلامي اسف جدا

أحمد/لا يا ولدي اني حبيت نعرف صدق مشاعرك مع بنتي وصدقتك من كلامك وتفكيرك فيها

رواد/ ربي شاهد ياعمي اني ولا في يوم ولا دقيقة ولا لحظة فكرت اني نخدعها ولا اني نكذب عليها

أحمد/ متأكد يا ولدي اني من يوم الحادث واني قاعد نفكر ونفكر بس اسمعني راهو دينا متعرفش باني جاي لعندك

أحمد/ كويس كويس اصلا منبيهاش تعرف لاني حقيقتا طلبت يدك منها بس هي مزال مسالتهاش بالك تكون ماتبيش تتزوجني

أحمد/ ههه لالا بنتي زي امها واضح عليها انها تحبك وتبيك

رواد/ تحشم هلبااا من كلمة أحمد وغيرله الموضوع
عمي شن حاب تشرب

احمد/ لا سلامتك تأخرت ولازم نروح عندي شغل

رواد/علي راحتك وشكرا ياعمي لثقتك فيها

أحمد/ اني نبي راجل وسند ليا ولبنتي

رواد/ تأكد ياعمي راح نكون سندها وحمايتها وعزوتها بإذن الله

احمد/ واثق فيك ولو ماكنتش واثق مكنتش تحلم بظفر منها

رواد/هههههه الحمد لله

روح أحمد ورواد كان فرحان والفرحة مش سايعاته وهو في عز الفرحة ومبتسم

ام رواد/ رواد وينك حني روحنا

رواد/ تعالي يا أمي اني في الدار

نيرمين /خيرك مبتسم شن في إن شاء الله خير

رواد/ خير خير لكن شن هالكيسات جبتوا السوق كله

ام رواد/ بكل اختك هادي ربي بعتهالي مش تصرف فلوسي

نيرمين /ربي يحفظك يا ماما تعيشي وتصرفي

ام رواد/ اي اي هذا الي فالحة فيه تاكلي بعقلي حلاوة

رواد/ به كملتوا عراك كم لاني في موضوع مهم نبي نقول لكم عليه

أم رواد/ إن شاء الله خير قول شن في؟

رواد/ به لكن ديرولنا طاسة شاهي وحاجة ناكلوها ونحكي لكم

نيرمين/ به به هي ماشية الموضوع مهم شكله

ومشت نيرمين ودارت براد شاهي وحطت شوية نواشف ومسكرات تصبيرة لين تسمع موضوع المهم

رواد/ الموضوع ومافيه …………….

ابو رواد/ انت قلت الكلام هوا للراجل!

رواد/ اي قلته ومستعد نعاوده مية مرة لاني كلامي حق واني مشيتله من الباب وهو مرضاش لسبب تافه

نيرمين/ به هو شن قالك؟

رواد/ قالي …….

ام رواد/ رووووروووووي مبروك يا ولدي اهو الرجل حس بغلطه وعرفك انك راجل وشاري بنته وتبيها

رواد/اي هو عرف واقتنع بكلامي وعرف اني نحكي بجد اني نبي بنته بشرع ربي ومدرتش غلط

نيرمين/ الحمد لله الحق دينا بنت تجنن وتخش للقلب ع طول

ام رواد/ الحمد لله ياولدي من لما شفتها كيف خايفة عليك البنت طول خشت قلبي وحبيتها وقلت يارب اجعلها من نصيبك

رواد/ هذا كله بفضل الله ورضاك ودعاك يا أمي

وامتدت السهرة العائلية لطوال الليل وبعد حوالي أسبوع وبعد مارواد شد صحته وفي يوم الي بيرجع فيه للعمل ناض الصبح وتوضي وصلى الصبح وفطر ونزل ركب لسيارته وخدي فونه
و طووووط طوووط

دينا/ زعلانه منك

رواد/ههههه صباح الخير الناس تقول

دينا/ وينك قداش ليك مدورتنيش

رواد\الحمد لله بخير وانتي شن حالك؟

دينا/ ههههه مش راح نسأل عليك لانك مزعلني وينك أسبوع منسمعش صوتك الا مرتين

رواد/ اسف وحقك عليا وعارف اني مقصر وغالط لكن انتي تعرفي اني مش فاضي

دينا/شن وراك وانت حتي الشغل اليوم بس بترجعله فهمني

رواد/ عيوني اني نسوق شوي ونوصل وبعد الشغل نتفاهموا تمام وراح نرضيك صدقيني

دينا /به خلاص لكن مش راح نرضي صدقني

رواد/ راح ترضي صدقيني دينا

دينا/نعم

رواد/ واللهي واللهي نحبـــــــــك يا شينة

دينا/ هههههه واللهي واللهي الا لما تشوف عليها مقاطعة متاعك

رواد/ مسمومة مافيش نحبك بالكذب

دينا/ لالالالالا مافيش ومش راح تسمعها عقاب

رواد/ به به زي ماتبي باي

وسكر رواد ومسافة الطريق ووصل للشركة وطول مشي لمكتبه الشغل كان متراكم عليه وبدي فيها
وفات اليوم كله وعقاب فيه محاولتش دينا تمشيله لمكتبه
وبعد نهاية الدوام طلع رواد من مكتبه ومشي لمكتبها وطق طق

رواد/ سلام

دينا /اهلا أستاذ تفضل

رواد/ حلوة منك أستاذ به منبيش ندير مشكلة هي امشي معاي

دينا/ لا معليش منقدرش

رواد/ وعلاش شن المانع؟!

دينا /المانع اني عرفت الصح من الغلط وانت مش محرم ليا فلهذا مش راح نركب معاك اسفة

رواد/ لا والله حلو التزمتي بالرسمي به صح كلامك لكن قريبا راح نكون زوجك يا عسل

دينا/ من قال انت متقدمتليش واني موافقتش

رواد/ به خلاص بلاش دوة زايدة كل واحد يمشي بسيارته غير تبعيني بس

دينا/ وين ماشين؟

رواد/ دينا مطلعيش جنوني وين ماشين مكان عاااام خيرك شن جاك أكيد يعني مش راح نرفعك لمكان مقطوع ومافيشي حد الا اني وانت والشيطان تالتنا ههههه

دينا/ قليل أدب تعرف لو مكنتش واثقة فيك مستحيل نمشي معاك

رواد/ ههه الحمد لله الثقة في عيلتكم بالبلاش

دينا/ شنو قصدك؟

رواد/ متحطيش في بالك هيا وقت دنيا قريب ظلم وانت مسؤولة راه ونقولك الشيطان شاطر

دينا/ خلالالاص يا بايخ هي امشي
ونزلوا وكل واحد ركب في سيارته
وفي نص الطريق توقف دينا

شاف رواد من مرايا ونزل

رواد/ شن صار خيرك؟

دينا/ العجلة انطبقت

رواد/ لالا هههههههههه محلاها فيك انزلي هيا اركبي في سيارتي

دينا/ لا واللهي وسيارتي

رواد/ غير هيا تو نلقالها حل ههه نيتي بيضاء وخدمتني

دينا/ ه ه ه ه با هي ونزلت دينا
وجت بتركب في سيارة وخلت رواد يركب قبلها ولما هيا راكبة فتحت الباب الخلفي وركبت

رواد/ شن يقولوله هوا بالزبط

دينا/ امشي وانت ساكت قداش بنعاود مرة حرررام انت مش محرمي والشيطان شاطر وانت شيطان

رواد/ به مشكورة يا ملاك لكن شيطان مش القدام بس راه حتي التالي فيه شياطين يخي هههه

دينا/ رواد خلاص

رواد/ ياعيــون رواد خلاص سكتت بس علي فكرة لقطتك هيا خلاتك تزيدي تكبري في عيني

دينا/هه علاش ؟

رواد/ عارف انك واثقة فيا واني واثق فيك وفي نفسي بس هكي عندي ثقة انك راح تصوني اسمي وشرفي

دينا/ اه يعني مثلا حني متزوجين توا انت حتي خطبة مخطبتنيش خليني ساكته فالح في الكلام بس

رواد/ يتمتم في سره تو تشوفي شنو هو فالح في الكلام بس

رواد/ دندونتي بنقولك حاجة

دينا/اسسس سوق وانت ساكت

ووصلوا دينا ورواد لمكان كان شاليه علي الشط والدنيا مظلمة ودينا خايفة

دينا/ شن مكان هوا وعلاش جبتني

رواد/ شن خفتي مني مش علي أساس واثقة فيا وتحبيني

دينا/ رواد شن في بديت نخاف