مسلسل سعاده كاذبه 

مسلسل سعاده كاذبه
الحلقه 4وخالد خش لداره ولقي وحده راقده علي سريره
خالد ؛؛ تي من اللي هنا وجا وقرب شور سرير وحول البطنيه ولقها املهههههههه من جدك انتي جيتي ورقدتي هنا
وامل غاطسه في نومها وقعمز علي طرف السرير وتمه ايشوف في امل كيف طالقه شعرها وراقده كيف البيبي
وفجاه
الباب ؛؛ طق طقطقطق
وصب خالد ابسرعه
ونعيمه وهي تفتحت في الباب جا خالد قدام الباب وصبالها
وامل وعت وشافت روحها في سرير خالد وهو امصبي علي باب ويحكي مع نعيمهنعيمه ؛؛ خالد كنك امصبي علي الباب كنك اتوزع فياامل ؛؛ هييييييييييي شن جابني هنا

وخالد ؛؛ لف وجه وكر فنحال القهوه من يد نعيمه وسكر في وجها الباب بمفتاح

خالد ؛ اسسسسسسس انتي ليش تحكي

نعيمه ؛؛ تمت ادق علي خالد باهي يا خالد صار اتسكر عليا افتح من اللي معاك

امل ؛؛ صبت من السرير وتمت تندب

حي عليا ان شاءالله شافتني نعيمه
حي عليا بعدك ما طحت اللي فيها

وحط خالد الفنجال علي الطاوله وجا مسكها وحط يده علي فمها
اسسسسسس كنك انتي تبي الناس تعرف انك هنا يفهمونا غلط بعدها

امل ؛؛ اسكتتت وقعدت تبكي

نعيمه ؛؛ نسمع فيك راه يا خالد باهي به

امل ؛؛ وهي تبكي حولت يدها من ايدي خالد
وقعمزت علي السرير وقعدت تبكي بلا صوت وخالد تم ايبحت فيها

خالد خاف ان هله يفهمو غلط
وهذه بنت يحسبوها لها حاجة شرف وبرم وجه شور الطاوله وخبط الفنجال شور الساس

انكب وانكسر وامل خافت ووخرت وتمت تبكي

خالد ؛؛قرب منها وشد شعرها وخلها اترفع راسها وجت عينه في عينها وهي تبكي

بصوت واطي بكل

خالد ؛؛ اسسس كنك انتي شن خششك لداري انتي كيف مااتفكريش في سمعتك تو هكي نعيمه تو اتشهدر بينا وتو يفهمونا غلط انتي شن تبي جايه في داري بس نا نبي نعرف

امل ؛؛ والله مانندري علي روحي والله ماني عارفه انا امس رقدت مع البنات

وقعدت تبكي اخر وبشهقمه وكانت خنقتها العبره
شعري يا خالد حول يدك اه ياخالد شعري

حول خالد يده وسمع نعيمه عدت

خالد ؛؛ امل حولي هكي
امل ؛؛ وين انحول
خالد ؛؛ تعالي هنا تحت الطاوله

وخشت امل تحت الطاوله وكانت تبكي ومنهاره بكي ومشا خالد شور الباب وافتحه فتحه بسيطه وطلع راسه ولقي نعيمه امقعمزه في الصاله وجايبه معها خالاتي في الصاله امقعمزتهم

خش خالد وخبط الباب بقوه

خالد ؛؛ نا عارفه الحقيره هذه ادور في الحس جت قعمزت في الصاله وجايبه معها خالالتي من الخباثه امتعتها تو ما عندك وين تطلعي تو اسكتي وارضي بوضعك هنا

امل ؛؛ هييييييي حي عليا نقدرش نقعد هنا تو البنات يفقدني انت كنك

خالد؛؛ خبط راسه بيده ياعنجدك بكل انا نبي نعرف ليش اتخشي اساس لداري

ورن فون خالد وكانت خطيبته

خالد ؛؛ ييييييي مش وقتك تو

سكرت ورنت اخري

خالد ؛؛ عليك سكنان هذا اللي اديرن فيهن انتن يا بنات امغير مصايب ماعندكن ما اديرن

امل ؛؛ ماتردش عليها قدامي
خالد ؛ بحت فيها وهو رافع حاجبه

سمحه هذه مااتردش ليش انتي خطيبتي ولا هي

امل ؛؛ نكسرت ونزلت راسها وتمت تبكي ومنهاره

وخالد كانت راقيله بكل وتعقد من امل وعاندها وفتح علي مريم الخط

خالد ؛؛ الو

مريم ؛ خيرات وينك كنك مااترد
خالد ؛؛ اسف كنت في الحمام
مريم ؛؛ ماشي للجامع صح
خالد ؛ خبط راسه بيده اخري

اها اكيده ماشي

بحت في امل وهز راسه وغظ اصبعه بقوه

وصبت امل

امل ؛؛ انا نبي نطلع واللي يبي ايصير ايصير

خالد ؛؛ بحت فيها وفنص وسكر الفون واعزق وجا مسكها بقوه
وهي تمت اتقاوم فيه تبي تفتحي الباب وهو شد بيده الاثنين من الخلف وبرمها وجت عينه في عينها

خالد ؛ عارفه كان مااتريحش روحك والله انوريك انا كنك انتي تبي اتجيبي فضيحه لروحك الا انا راجل في نهايه بكل وخاطب حتي خطبه كنك انتي اوعي لنفسك

تمت تبكي امل ولفها خالد شوره لان مايحبش ايشوف بنت تبكي وهي كان عاجبها الوضع وتقعدت تبكي اخر

بعدها افطنت امل انها اقريبه من خالد بكل انحرجت و وخرت منه ودفاته وخشت تحت الطاوله
خالد حتي هو انحرج لما فطن ان كان امضبط امل ومشا وقعمز علي السرير

نعيمه ؛؛ ويه ويه حبيبتي البنات وعين
نا ؛؛؛ اها وعيات وقعدات جو
نعيمه ؛؛ وين دعاء
نا ؛؛ جو في الدار مع رجاء
وينها
وصبت وشافتها
نعيمه ؛ باهي وين امل كني ما شفتهش بكل

نا ؛؛ اكيده في الحمام بعدك هي بالها واسع في الحمام

نعيمه ؛؛ في اي حمام
نا ؛؛ ونا شن عرفني

خالد ؛؛ خزي هالحقيره هي عارفاتك انك هنا وتبي هلي يفطنو انك انتي مش قاعده بيش ايدوروك و يعرفوك في داري بس والله نا معها معها والله ما انخليها تمسك عليا حاجه هالحقيره

امل ؛؛ تحكي وهي زعلانه ودايره جو بيبي
خالودي
برم خالد وجه شور امل واول مره يفطنلها انها هي حلوه ودلوعه وبيبي

خالد ؛؛ نعم
امل ؛؛ مستمر في حو الدلع
اسفه يا خالودي والله ماني قصدتها عارفه روحي تو انسببلك مشكله

خالد ؛؛ سرح في وجها اللي امبدري وهو ايشوف فيه حلوه ودلوع
وقعد ساكت

امل ؛ خالودي كنك ساكت

خالد ؛؛ امل انتي مواليد كم
امل ؛؛ استغربت السؤال اللي مش وقته بكل
مواليد 92 ليش

خالد ؛؛ ﻻﻻ شيء نسأل بس
امل ؛؛ خالودي باهي انت شوف وحده من خواتك ايساعدنا

خالد ؛؛ ﻻﻻ خواتي لا حتي هن يفهمنا غلط ماشور شيء
تو نطلع وانشوف من بره

وصبا خالد ومش شور باب الدار وافتحه وجت عينه في عيني

نا ؛؛ خالد كنك قاعد هنا هيا امشي لصلاة

خالد ؛؛ رقيتله علشان شفته واحرجته

امل ؛؛ خالد كلم ويه راهي اكويسه ومستحيل تفهمنا غلط كلمها عادي

خالد ؛؛ باهي تو نمشي يا ويه

وخش وسكر الباب بقوه
خالد ؛؛ كنك انتي عبيطه انا ناعنديش وجه انقول لاختي تعالي ساعديني انهرب بنت من داري كنك انتي بلا عقل ولاه شنو

والله تو حلال فيك انسكر عليك وانعدي لجامع وانتغدا وانتي قاعده اوحدك وخليهم ايدورك
وامتي ما نبي انخش لدار ونرقد وناخذ راحتي

امل ؛؛ عارفتك ما انهونش عليك خالودي
خالد ؛؛ ابتسم ل امل لان جابته له بدلع

اللي معش عنده روح مع الدلع هذا
ومد طوله علي السرير وحط يده علي اعيونه وهو ايحبت فوق

امل ؛؛ خالودي
خالد ؛؛ نعم
امل ؛؛ جيعانه بكل
خالد ؛؛ ههههههههههههههه يضحك وبصوت عالي
ههههههههههههههه من جدك انتي تحكي
امل ؛؛ استغربت ضحكته
اها من جدي عليش

خالد ؛؛ كلا انتي شكلك رايقه اتفكري في اوكال تو مااتفكريش في نعيمه انتي

امل ؛؛ عارف ياخالودي الوحيده اللي تقدر علي نعيمه رجاء اختك اتهبل ديمه طالقه لسانها عليها

خالد ؛؛ هههههه عارفه الفرخه هذه

امل ؛؛ خلاص معناها كلمها وخليها هي اللي اطلعنا

وجيت انا دقيت علي باب وكانت نعيمه امصبيه وراي وحاطه اعيونها علي الباب

خالد ؛؛ من
نا ؛؛ ويه
خالد ؛؛ كنك شن تبي
نا ؛؛ قالك عادل وعلي وخالي هيا معنا لجامع
خالد ؛؛ ويه قوليهم مش ماشي نعسان ومازالت نبي نرقد

امل ؛؛ كلمها كلمها

نا ؛؛ باهي تبي حاجه انجيبلك حاجه

نعيمه؛ ؛ يابتي كنه خالد يحكي معاك من وراء الباب شن فيه حتي امبدري مابش يفتحلي الباب فتح دوب طلع يده وكر مني الفجال وسكر كنه قول طامر حاجه في داره

امل ؛؛ هه سمعت شن اتقول هذه حقيره عرفتها هيا طلعني خلاص كلم ايه تو اديرلنا جو

خالد ؛؛ باهي

وصبا وفتح الباب
خالد ؛، ايه ويه ويه
جيته انا نجري والقيت نعيمه امصادرته واتبحت فيه ومبتسمه

نا استغرب من نعيمه الابتسامه العريضه اللي عطيتها للخالد

نا ؛؛ نعم خالد
خالد ؛؛ تعالي نبيك اطلعيلي سروال من الدولاب معش القيته

نا ؛؛ باهي

وكان خالد فاتح الباب ويالله امطلع نص جسمه والنص التاني جو في الدار ولما جيت قدام الباب مسك يدي وكرني بسرعه جو لدار وسكر الباب بسرعه بمفتاح

نا ؛؛ كنك خالد
خالد ؛؛ بحت فيا وزمط ريقه وشريلي شور تحت الطاوله

طلعيلي هذه

نا ؛؛ برمت وجي شور الطاوله وبتحتت تحت
هييبيييي شن جيبك هنا وقعدت نضحك

خالد ؛؛ ههههه كنك تضحكي حسيت روحي قالتلك نكته

نا ؛؛ به هذه شن جيبها هنا

وحكلي خالد الموضوع كله

نا ؛ هههههههههه من اطياح سعدكم ما طحتو الا في نعيمه ونا انقول كنها امبدري وهي امركزه عليك وادور فيك

امل ؛؛ نسمع فيها اصلا اول ما شكت مشت جابت خالاتي في صاله وقعمزتهن

نا ؛؛ به خلوني نطلع انشوف الجو وانتو ماتطلعوش تو نصرف

خالد ؛؛ وراس ويه خلي الموضوع بيتنا نا عارف لو يسمعوها مش يفهمونا صح

نا ؛؛ عارفه عارفه ياخالد وعارفه نيتك ونية امل

وبرمت وجي شور امل وغمزتلها

معناها
اه يا خبيثه تو اتشوفي

وطلعت

والقيت نعيمه عيونها شور الدار
مشيت شور المطبخ والقيت فيه اميره و خالتي فاطمه

نا ؛؛ اخويله ممكن نطلب منك طلب

خالتي فاطمه؛؛ نعم شن في

نا ؛؛ والنبي كذا كلمي نعيمه والهيها ليا هنا في دارها لان هي امقعمزه في الصاله واحذها فون امل وخايفنها تفطن ان الفون تحتها

اميره ؛ هيييييي طيح سعد امل كنها هبله ولا مهبوله وينها هيا

نا ؛؛ نا تو نبي منك تاخذن نعيمه والهنها هنا
ونا تو انخشش خالتي شور ماما في الدار

خالتي فاطمه ؛؛ به خلاص عدي ونا تو انخششها
نا ؛؛ طلعت ومشيت شور دار ماما وحكيت مع ماما اشويه

وطلعت شور الصاله
خالتي تعالي تبيك ماما كنك امسيبتيها اوحدها

خالتي سالمه ؛؛ صبت ابسرعه هي ابروحها ماصدقت فرصه بيش أتخلص من نعيمه الفتنه

اني جيتها وبعدها طلعت علشان امبدري كانت راقده بس

وخشت خالتي سالمه لماما

واطلعت خالتي فاطمه ؛؛ نعيمه بالله تعالي كذا اشويه نبيك

نعيمه ؛ نعم كنك شن تبي

خالتي فاطمه ؛ الستر يابتي كنك ماتبيش اتصبيلي تعالي نبيك هنا في المطبخ اشويه

وانحرجت نعيمه وصبت وخشت للمطبخ ونا عديت نجري شور دار خالد

نا ؛؛ خالد هيا هيا ابسرعه خليها تطلع
خالد ؛؛ به فتح الباب

ونا قعدت امصبيه عند الصاله
وخش خالد وطلع امل من تحت الطاوله

خالد؛وهوا مبتسم
اخر مره اديريها
وغمزلها وكانت الغمزه فيها اعجاب
وصبت امل وقبل ماتطلع كرت معها دزدان امتع خالد من علي الطاوله واطلعت وهي مبتسمه
نا ؛؛ هيا تعالي خشي لحمام ابسرعه

خالد ابتسم وخش لداره وعزق روحه علي السرير ولقي البطنيه امتعت امل وضحك وقال في هقله اول مره انعيش لحظه فيها اكشن هكي
وخشت امل لحمام وتوضت ودست الدزدان عندها واطلعت ودارت روحها انها كانت في الجنان بس نعيمه شكت فيها بس معش عرفت كيف اتقوللها

وجو خالي ومعه علي وعادل وبعدها رن الجرس وطلع علي فتح ولقه وليد
وخششه وطلعت اميره ابسرعه وتمت اتبحت فيه من روشن دار ماما

ماما ؛ ان شاءالله ايكون من نصيبك
اميره ؛؛ برمت وجها شور ماما واضحكت
ان شاءالله ياماما ان شاءالله

وحطت خالتي فاطمه الغداء ونحن انتغدو
نا ؛؛ كلمتو خالد علي الغداء
اميره ؛؛ تي ما قال امبدري نبي انرد نرقد شكلها لليلت امس صباحي
امل ؛؛ تعقدت واخبطت اميره
نا ؛؛ هههههههه تو انصبي انا انكلمه

وصبيت ومشيت كلمته
خالد ؛؛ باهي تو نطلع بس يا ويه بيش اتظمي القهوه اللي انكبت هي
نا ؛؛ هيييييييييي باهي حاضر امغير هيا
وطلعت نا و وراي خالد
نا قعمزت
خالد ؛؛ السلام عليكم صحه صحه
وبحت في امل ولقها اتبحت فيه وغمزاتله وهو ضحك ومشي شور المربوعه

نعيمه ؛؛ باهي اللي طلع خالد من الدار امبدري شيء امسكر علي روحه في الدار اتقول داس حاجه ولا واخره يحكي معانا من وراء الباب شكلها تاكها مع مريم بعدك هو ايحبها موت ماايتحمل فيها حاجه
ونا ناكل جتني خبطه علي ركبتي من امل نين انغسيت في اوكالي ماعاد عرفت نضحك علي مصيبة امل ولا علي كلام نعيمه اللي متاكده من ان امل كانت مع خالد بس كانت تبي دليل

مروه ؛؛ كنك انتي بالكي كان ايغير في ادبشه ومايبش ايحلك الباب ولا تبيه يطلع عليك هكي
واتجيني الخبطه التانيه وقعدت نضحك وبصةت عالي نين رجاء افهمت الموضوع واقعدت تضحك معانا

نعيمه ؛؛ ازي ما ايضحط الشوراب الا الكلام الخارب

واطربقن ضحك كلنا

رجاء ؛؛ منك يا حنه فيش اتحقي فينا خربات ولا شنو
نعيمه ؛؛ اسكتي انتي من جت شورك يا مفصوعه

رجاء ؛؛ معش اتقولي مفصوعه راه خيرلك شن انتي اتحقي في روحك طول × عرض تحسابي الناس اللي امخاطيه
نعيمه ؛؛ رجاء راه انصبيلك وراخ انعدي ل عادل ونحكيله علي فونك

رجاء ؛؛ عدي اخرطي لنتي وياه نبي نعطيك معلومه راه عندي فونين مش فون واحد راه وان شاء الله تدفونوني ما امطلعته لكم يا ……….

خالتي سالمه ؛؛ رجاء نعيمه راه خيرلكن اسكتن يا بتي قاعدين انتغدو

رجاء؛ ؛ مش انتي اللي غااطه انا اللب غالطه امنزله من مستوي وامقعمزه معاك انتغداء مع النماذج اللي كيفك

نعيمه ؛؛ يا عيني يا مستوي انتي تي عدي شوفي ماضي اختك قبل وبعدها تعالي احكي معي

وبدون ما نندرو ونلقو رجاء زاقبه علي نعيمه
خالتي فاطمه ؛؛ ﻻﻻﻻﻻﻻﻻ طيح سعدكن سيبها

وخش خالد يجري ومسك رجاء وحولها

رجاء ؛؛ اختي معش اتجيبي سيرتها علي فمك يا واطيه

وخشو باقي الرجاله
وجا عادل يبب يضرب رجاء
امسكه خالي

خالي ؛؛ كيف تبي اتمد يدك علي اختك اليتيمه

عادل ؛ اصلا هن ما اخربن الا منكم ومن كلمة يتيمه

علي ؛؛ عاجل سكر فمك كنك انت
عادل ؛ ديمه ديرات روسهن بروس نعيمه ليش هكي

ونعيمه طبعا اتمثل ودايره روحها تبكي ومضروبه

خالتي سالمه ؛؛ حتي هي نعيمه طقت في خواتك ليش هكي هي

علي ؛ عاجل خوذ مرات واركب لشقتك وانتي يا فرخه رجاء خشي واحسابي معك
وخشت رجاء لدارها وخشت وراها انا وامل

انا ؛؛ طلعتي حاجاتك ابسرعه تو ايخشو يضربوك

طلعت الفونات وتبي اتمدهن ل امل
ايخش علينا
……………..

يتبع