مسلسل سعاده كاذبه 

مسلسل سعاده كاذبه

الحلقه 28

جتنا وحده اتسلم

نا ما انتبهتش بكل وكنت لاهيه في العشاء
بس حسيت الوجوه تغيرت لما جت المراه هذه وكلهم سلمو عليها ومش عاجبهم الوضع وهي اتبحت فيا واقريب تاكلني بعيونها اوكال وجتني واقربت مني

المراه ؛؛ ايه مرات مراد
نا ؛؛ بالابتسامه
ان شاءالله
المراه ؛؛ مبروك عليك
لمار ؛؛ ماماااااا
سناء ؛؛ خير يا ماما شن اخبارك

نا برمت راسي وبحتت في لمار وهي جايه لامها وتضبط فيها

وبحتت في سناء والقيتها اتبحت فيا

نا انصدمت وقعدت ساكته وحسيت بحاجه وغمت علي قلبي حسيت وكأنه موس خش لقلبي

وخنقتني العبره
تميت انبحت فيها ومنصدمه

لمار ؛؛ ماما امتي جيتي
سناء ؛؛ امبدري جيت بس ما شفتكش الا لما صبيتي علي المسرح ترقصي

وجتها هدي وسلمت عليها وبحتت فيا كيف ولقتني كيف مرتبكه وحسيت برعشه في ايديا وكراعيا وجت وقعمزت جنبي

غاده ؛؛ شن اخبارك يا اسنيوه
سناء ؛؛ اكويسه الحمدالله كنت امسافره الايام الفاتن
غاده ؛؛ باهي صحه لكي اتسافري وعايشه حياتك
سناء ؛؛ شن اخبارك يا امي واخبار صحتك
عمتي ؛؛ اكويسه الحمدالله قاعده

سناء ؛؛ وين ياالهام رايحه ماعاد اتكلمي بكل ولا خلاص علشان اطلقت تنسيني

الهام ؛؛ بحتت فيا وبعدها بحتت في سناء

ﻻ والله مشاغل الحياه

نا قعدت خنقتني العبره وامنزله راسي وفي رعشه في يديا وكرعيا

مدت يدها هدي ومسكت يدي
نا بحتت فيها وبعدها بحتت في سناء
القيته سمحه سمحه بمعني الكلمه
وفعلا لمار تشبلها واجد
بس كان جسمها شين كانت طويله واجد وعريضه واجد وشعرها كان اقصير

هاجر ؛؛ وين ياحنه وين رايحه سامنه بكل
سناء ؛؛ ههههه كان غيري ما نسمن ماعاد حد ايقولي نقصي

وبحتت فيا كانت تبي اتشوف جسمي كيف

ونا رفعت راسي وحطيت ايديا تحت احنكي لان ما نبيش ادموعي ينزلنا قدامها

هاجر ؛؛ ان شاءالله ربي ايهنيك وتزوجي

سناء ؛؛ ﻻﻻﻻ نا نزوج تاني ابدا نا كان نبي انرد لمراد اخر بس تو خليه مراد براحة هو ديمه ايدير فيها من ايام العلاقه لما انتعاركو ايدير روحه نساني وفاتني وادير علاقه تانيه بس مجرد ما انكلمه ايردلي طول عاد عشره نا وباه مش شهر ولاه شهرين والاصلا اصلا مهم ايقلدو

وبحتت فيا ونا نزلت راسي طول دمعتي انزلت وبحتت فيها والقيتهم اعيونهم كلهم عليا صبيت ابسرعه

نمشي وماانشوفش في حد قدامي وجي لوطه
واول ما خشيت للحمام اعيون اقعدن كيف الشلال وتميت نبكي ومنهاره لاني حسيت روحي ولا حاجه عند مراد حسيت روحي مانسو شيء عند مراد قدام سناء اهي هي عشرة سنين وسيبها شن نا مايبش ايسبني اللي لنا شهر بس يعرفني خسيت وكاني سلاح يبي يقهر سناء به حسيت بنار ركبت فيا

واتخش عليا هدي

هدي ؛؛ ويه كنك ياعمري والله عارفتك ح تزعلي

نا مسحت ادموعي ابسرعه وما بيتش انوضح ل هدي بس ايش انخبي ولاه انخبي كانن اعيوني ملينات ادموع

هدي ؛؛ وسعي بالك وفوتيه راه نص كلامها غايب والله مراد ماعمري شفته متريح كيف ماهو متريح من يوم زواجه منك

نا ؛؛ نبي انروح نبي انرن عليه
هدي ؛؛ ويه ما اتروحيش ما تخليهش تفرح لما اتشوفك امنكده وامروحه
نا ؛؛ انهرت مره وحده وتميت نبكي

كلامها واعر يا هدي واعر حسستني ان نا ولا شيء عند مراد حسستني ان نا وكأني سلاح بيش ينتقم بيه من سناء والله تعلقت به والله حبيته ومش مصدقه ان ايجي يوم وانكون بلاه وخايفه اتكلمه وايردلها والله واعره والله واعره يا هدي

هدي ؛؛ ويه انتي ليش تسبقي في الاحداث مراد بدال يقعد هكي متريح معاك مستحيل ايفكر ايسيبك وهي تو ايجونا ناس هيا بطلي ابكاء والله طالعه اتجنني والله اعوينه جاتك هي ما دوريش اطلعي وافرحي واضحكي انتي العروس وانتي اللي ح اتروحي وترقدي مع مراد مش هي وردي بالك اتنكدي عليه او علي روحك واكسبي حبه وخليه يعرف انك نعمه بين ايديه

نا ؛؛ الحق كلامها ريحني واجد

وقعدت علي المرايه وبرمت علي روحي وطلعنا ومشينا ابسرعه لان العريس خلاص يبي ايخش
وقعمزت نا وهدي

غاده ؛؛ وين رحتي يا ايه
نا ؛؛ مشيت غسلت ايديا
وين لمار
هاجر؛ عدت مع امها
نا ؛؛ اها به
عمتي ؛؛ بحتت فيا واعرفت اني كنت نبكي
وحاولت اتغيرلي جوي

رن عليك مراد

نا ؛؛ ﻻﻻ مارنش
عمتي ؛؛ اها غريبه خلك مراد قبل ايحب ايروح بدري
نا ؛؛ ما اتفقتش معه ساعه كم بالضبط

عمتي ؛؛ كان هذا تو اتروحي معنا
نا ؛؛ تو انشوفه

هاجر ؛؛ شوفنا شوفنا العريس طالع ايجنن ثاريته طرف ولد جيرانا هذا

الهام ؛؛ هههههههه طيح سعدك وطلع من قدامك

هاجر ؛؛ انحق فيه شلتوت مانحسابش ايهبل هكي

هدي ؛؛ ههههههه عليك نح ديمه ايهبل هو بس كان متكبر وما شايف حد قدامه

غاده ؛؛ تي بحتنا كيف ايسلم عليها

هاجر ؛؛ ةوووووووووو اضبطها كنه مستعجل هو

نا ؛؛ هههههههه تحشمن عمتي

هدي ؛؛ حي عليا نا اللي انمص في الليم

الهام ؛؛ تي حي تي كنه امشبط فيها اتقول ماحوته لقها

غاده ؛؛ هذا الحب يا عيني مش رواده نعرفه من ايام الجامعه ديمه انشوف فيه معه وكان منتصر ايسلم عليه

الهام ؛؛ اها واخذه علي العلاقه نقانه هذا الصح مالكم ومال الرواده اتقول في عصر الجاهلين قاعدين ياخذها كيف الدلعه مايعرفها من جوا بيض ولاه حمرا

واتجيها خبط من التحت من هدي
الهام ؛ اهااااا
هدي ؛؛ فنصت فيها وشريت شوري

ونا فطنت الجو بس درت روحي ما انتبهتش لاني عارفه نية الهام اكويسه وطيبه

ورن فوني
مسكته والقيته مراد
نا ؛؛ الو
مراد ؛؛ هيا اطلعي نا بره
نا ؛؛ نسمعش فيك ايوه مراد
مراد ؛ هيا هيا
نا ؛؛ معش سمعته لان كان صوت الاغاني عالي واجد

وجتني رساله منه

ايه اطلعي هيا نا بره

نا ؛ مراد بره دزلي رساله قالي هيا

عمتي ؛؛ به اطلعي ابسرعه اكيده يرجا

نا ؛؛ هيا به فيش وحده تبي اتروح معي

هاجر ؛؛ ﻻﻻ خلينا اتفرجو علي فيلم التركي اللي قدامنا احسن

نا ؛؛ ههههه به براحتكن خلاص تو ناخذ حمادي ولمار بيش انرقدهم

عمتي ؛؛ اها خوذيهم احسن مرات انطولو نحن
نا ؛؛ به
لابست عبايتي ولفيت وشاحي وحطيت الخمار بس ما نزلتش

عمتي ؛؛ خوذي الحلويات هذين معاك للمراد
نا ؛؛ به

وخذيت حلويات و البونبونايره وحطيتهن في كروسة حمادي ومشيت شور سناء

نا ؛؛ لمار هيا بابا بره
لمار ؛؛ ﻻﻻ نبي نقعد مع ماما
بحتت سناء بالاستغراب كانت اتشوف في العبايه والخمار بالدقه

سناء ؛؛ خلاص خليها تو انروح بيهم حتي حمادي نبيه
نا ؛؛ ومراد شن انقوله
سناء ؛؛ شن شن اتقولليه
قولي خذتهم سناء ومش ح يحكي شيء عارفته نا

نا ؛؛ به تو نحكيله

وخليت حمادي ولمار معها وخذيت حاجاتي وطلعت ما بيتش اناقشها وانخليها بينها وبين مراد

جيت علي قصاد الباب ونزلت خماري
وطلعت وجاء مراد قدامي وخذني ومشينا للسياره وركبت

مراد ؛؛ وين العويل
نا ؛؛ وخذتهم سناء
مراد ؛؛ انصدم وبحت فيا
كيف وخذتهم سناء كيف هي في الفرح

نا ؛؛ اها جتنا علي الطاوله وسلمت علينا

مراد ؛؛ تعقد وكانت واضحه فيه واجد

حكت معك صح

نا ؛؛ نا شخصيا ﻻﻻ ما حكتش سلمت بس

مراد ؛؛ به ها شن جو الفرح

نا ؛؛ تمام ماشاءالله عليه حلو

طبعا نا نحكي ودايره روحي امبرده بس كان خاطري نبكي وانواجه ونساله بس ما نبيش انكد عليه او عليا ومانبيش انوصل ل سناء اللي تبيه

مراد فطن ان نا ساكته وكان متاكد ان سناء مستحيل تسكت واكيده قايلتلي اي كلمه فحاول يقرب مني

مد يده علي يدي ومسكها

مراد ؛؛ رايفت عليك ياشينه الشقه امظلمه بلاك

نا ؛؛ ههه نا شينه في نظرك
مراد ؛؛ ههههه اقلبيها انتي وغمزلي

نا ؛؛ اها

ووصلنا للحوش واول ما خشت السياره للجنان طول نا رفعت الخمار لان حاميني بكل

مراد ؛؛ ههههه شكله كان غام عليك
نا ؛؛ اهاااا بكل

ونزلت من السياره ومشي مراد ايسكر في الباب وجاني وخشينا ونحن نركبو علي الدروج وهو يمشي قدامي

نا ؛؛ حبيبي
مراد ؛؛ لاف وبحت فيا
نعم
نا ؛؛ خوذ هذين اشويه

مراد ،؛ هاتي

ومديتله شنطتي والحلويات ونا طبست وحولت كندرتي ومسكتها في ايديا

مراد ؛؛ تبي تركبي الدروج وانتي حفيانه
نا ؛؛ اها ماحد ايحق فيا

مراد ؛؛ هههههه به هيا اركبي قدامي

نا ؛؛ به

وصبيت علي باب الشقه وجا مراد وفتحها

ومشيت شور الدار واول شيء درته سلحت العبايه والوشاح

ونزلت راسي لوطه وحركت شعري بيش يقعد متلوي وباين واجد
ونا امرفعه راسي

شافت مراد امصبي وايبحت فيا

مراد ؛؛ ههههههه كنك
نا ؛؛ انموج فيه
هيا حبيبي نبي انغير دبشي
مراد ؛؛ ما اتفكيرش اني نطلع من هنا بكل
نا ؛؛ مراد كنك نبي انغير

مراد ؛؛ ﻻﻻﻻ ما نيش وخليكي هكي نبي انشوفك هكي
نا ؛؛ به تعشيت حبيبي
مراد ؛؛ القيت حاتم ومنتصر جايبن العشاء نزلت معهم وكليت

نا ؛؛ من مطعم
مراد ؛؛ اها عاد انتن مشيتنا للفرح ولا وحده فكرت ادير عشاء

نا ؛؛ كان قالتلي راه درتلك عشاء قبل ما نمشي

مراد ؛؛ تي شن انقولك

انقولك ديري عشاء وانتي لابسه قفطان
وقرب مني ومسكني من عند وسطي
اقصير وضابط وحلو وجاي عليك ايجنن وطالعه فيه وكانك حورية البحر

نا ؛؛ حلو حبيبي صاح
مراد ؛؛ والله حلوه اكيده شيء حد عطاك بعين
نا ؛؛ هههههه مش عارفه
مراد ؛؛ به تعالي هنا نبيك في موضوع سري
نا ؛؛ ههههه مراد اصبر انغير قبل
مراد ؛؛ لا تو انحوله لكي نا القفطان ما اتخافيش
واضبطني بقوه ومشي وحطني علي السرير

نا ؛؛ حبيبي نسالك
مراد ؛؛ نعم
نا ؛؛ عجبتك نا
مراد ؛؛ اكيده عاحبتني وكان ماعحبتنيش راه ماخذيتكش
نا ؛؛ به مااتفكرش اتغير فيا حاجه بكل
مراد ؛؛ خاطري انحول الحشم والغموض اللي في شخصيتك

نا ؛؛ يعني نا ارقيقه واجد
مراد ؛؛ ﻻﻻ جسمك حلو وياريتك اتكوني هكي ديمه
نا ؛؛ به كان سمنت اتقولي انقصي
مراد ؛؛ نا مانحبش السمن انحب الجسم الرشيق صح نا معاك المراه بعد تزوج من طبيعي تسمن بس اتحاول هي اتصلح من روحها

وبعدها انتي شن خطرها عليك الاسئله هذين
نا ؛؛ هكي بس
مراد ؛؛ هيييييي ايه شن هذه
نا ؛؛ هيبيييييي شن
مراد ؛؛ امحنيه هنا ما ورتيهش ليا
نا ؛؛ هييييي تي كيف فطنتها حول
مراد ؛؛ تي كان مش امحنتيها ليا نا لمن امحنتيها معناها

نا ؛؛ لحبييي اللي ساكن فيا جو اللي حبيته باسرع وقت ممكن حبيت وبدون مانحس بروحي حبيته اللي خايفه يوم من الايام انتفارقو

مراد ؛؛ وشن خطره الفراق تو
نا ؛؛ هكي ديمه خايفه انك اتسيبني لان اول حب لك قعد سنين طويلة وبعدها تفارقتو

مراد ؛؛ فرق كبير بكل بينك وبينها
نا ؛؛ من الاحسن
مراد ؛؛ سكت وانصدم من سؤالي ومعش عرف ما ايقولي

نا ؛؛ السؤال واعر لدرجه هذه
مراد ؛؛ لان مش وقته
نا ؛؛ مراد انت مازالت اتحبها صاح
مراد ؛؛ ايه مش وقته الكلام هذا وبعدها لو نا نبيها راه مازالت علي ذمتي

نا ؛؛ صح انت ما تبيهش بس قلبك مازال ايحبها
مراد ؛؛ حول من جنبي

كنك شن خطره عليك الكلام هذا

نا ؛؛ صبيت ومشيت وخذيت روبي وخشيت لحمام وغيرت دبشي ولابست روب ولفيت شعري وغسلت وجي من الميك اب

وطلعت والقيت مراد علي السرير وايدخن
خشيت عليه وفتحت الدولاب وحطيت القفطان
وقعمزت علي الكرسي الزينه ودرت اكريمه للوجي وللجسمي

ومراد ايدخن بسرعه وساكت

نا ؛؛ تبي حاجه
مراد ؛؛ بحت فيا وامرفع حاجبه وما بش ايرد عليا

ونا مشيت وخذيت مخده وفوطه وطلعت للصاله

وجيت علي الكنبه وقعدت نبكي ومنهاره لاني حسيت روحي ولا حاجه عنده وان سناء مازالت هي المرتبه الاول ونا الثانيه الاحتياط يعني مش الاساس

ونا نبكي وجا مراد ولقني نبكي
مراد ؛؛ ايه
نا ؛؛ ما بيتش انرد
مراد ؛؛ ايه ردي عليا
نا ؛؛رديت من تحت الفوطه

نعم

مراد؛؛ خشي للدار ارقدي جو
نا : ﻻﻻ شكرا نبيش
مراد ؛؛ نزل عليا ومسكني ورفعني بالقوه

نا ؛؛ مراد نزلني نبيش انخش للدار
مراد ؛؛ ﻻﻻ مافيش نوم الا جو في دارك جنبي نا وفي حضني اخر

نا ؛؛ ليش نرقد في حضنك وانت من جوا ماتحبنيش
مراد ؛؛ ومن قالها
نا ؛؛ سكوتك يا مراد سكوتك نزلي هيا

مراد ؛؛ نزل كراعيا ونا جيت نبي نمشي هو كرني بقوه واضبطني

وهمس في وذني

انحبك وحق ربي انحبك ومن لما شفتك ونا نتخيل في حياتي معاك كيف اتكون ولما جيتي وعشتي معي حبيتك اكتر ولما شفت قد ايش انتي ابنيه اتهبل عايشه معي انتي ملاك بين ايديا ومانبيش نخسره

نا ؛؛ قعدت نبكي واضبطته بقوه
ليش ما اتقولها ليا من اولها ليش تسكت ليش اتخوف فيا منك ليش اتحسس فيا اني نا ولا شيء قدام سناء ليش ليش

بعدني مراد من عليه وخلي عيني اتجي في عينه

مراد ؛؛ اسف خلاص بلا بكاء يااكبيدتي تي انحبك والله انحبك يعني انتي ضروري انقولك تنحبك بيش تعرفي حبي لك يعني الحاجلت اللي اندير فيهن كله ما يثبتنش في حبي لك

ومسحلي ادموعي
وحق هالوجيه السمح انحبك
نا ؛؛ بصوت بيبي وواطي
والله انا اكتر منك

مراد ؛؛ معش ديري جو شين ومعش تطلعي من دارك لما تزعلي طلعني من الدار انتي ماتطلعيش
نا ؛؛ نقدرش انلزك
مراد ؛؛ ههههه يعني فكرتي في الموضوع هذا

نا ؛؛ هزيت راسي معناها اها
مراد ؛؛ ههههههه عارفه كان قالتلي اطلع مستحيل نطلع ومش ح انخليك تطلعي

مراد ؛؛ نا ادورتي تو في الحنه نبي انشوفها

نا ؛؛ ههههههه وماهذا اللي تبيه انت

مراد ؛؛ حطني علي السرير وولع منظومه علي اغنية احضني نفسي اضمك نفسي اكمل عمري جنبك
وطفي الضيء وخله ضيء وناسه بس
وجاني

مراد ؛؛ اكبيدتي ممكن تسمحيلي نرقصو

نا ؛؛ ههههه شن جو افلام ابيض واسود
مراد ؛؛ ما خميس اليوم نبيه رومنسي نا

نا ؛؛ ههههه به بروب هكي

مراد ؛؛ ما كان فيك جو راه قعدت بالقفطان بس شيء نكديه

نا ؛؛ باهي يا مراد تو اتشوف علي الكلمه هذه اطلع تو من الدار ولما انكملك تعال

مراد ؛؛ ﻻﻻ نبيش

نا ؛؛ تو اطلع قدامي

وصبيت وتميت اندف فيه نين طلع
من الدار وسكرتها وهو قعد ايدق

مراد ؛؛ ويه افتحي راه انكسر الباب
نا ؛؛ اصبر تو نفتح اصبر اشويه
مراد ؛؛ ﻻﻻ مانيش صابر افتحي تو
نا ؛؛ مانيش

نا ولعت الضي بسرعه وطلعت القطان ولابسته اخر من جديد

وصبيت علي المرايه ودرت رسم عين وقلم وروج احمر فاقع وعطر وموجت شعري اخر

مراد ؛؛ ايه راه والله نزعل
نا ؛؛ ما رديتش عليه
طفيت الضي وخليته علي ضيء وناسه بس ورديت الاغنيه من جديد
وفتحت الباب والقيته امصبي وغامله بكل

مراد ؛؛ اووووووووو شن اتعاندي يعني
نا ؛؛ بيش تعرف
مراد ؛؛ اهو هكي صح
وجاني وقرب مني واضبطني وبعدها نا حطيت ايديا ورا راسه وهو علي وسطي وقربني منه واجد
وتمينا نرقصو

علي الاغنيه طبعا
نا حطيت راسي علي كتفه
وكنت في حضنه وناسيه الناس بكل وانحس حضنه هذا هو مكاني

مراد ؛؛ انحبك انحبك
نا ؛؛ انموت فيك موت

ورفع مراد يده من علي وسطي وجا علي ظهر وفتحلي السوسه و……………….

نا ؛؛ حبيبي هيا صبي
مراد ؛؛ ايه اليوم جمعه ونبي انتريح
نا ؛؛ حبيبي راه ساعه توا 11 ويبك حاتم
مراد ؛؛ شن يبي
نا ؛؛ مش عارفه دز رتاج تو
مراد ؛؛ عليك قصه به تو انصبي
وصبا مراد وخش لحمام وادوش وطلع ودرتله قهوه وشربها وطول نزل ونا لابست تنوره طويله وعليها ابلوزه و درت ميك اب خفيف

ونزلت عليهم لوطه القيتهم كلهم قاعدين

الهام ؛؛ املاه امس سهرنا
نا ؛؛ اها اكيده
وسلمت عليهم وقعمزت

عمتي ؛؛ هيا ديرنا المحشي بسرعه خلوني انشوف شن قالو بره

هدي ؛ ايوه يا ماما اطلعي شوفي ابسرعه

عمتي؛ اس مش شورك الكلام هذا

وطلعت عمتي ونا تميت اندير مع الهام المحشي وهدي دارت المسير وهاجر امقعمزه وترعش وتاكل في اضافرها

وغاده تغسل في المواعين

نا جاني فضولا نعرف شن في لان الرجاله كلهم مجتمعين بس ما قدرتش

هدي ؛؛ ويه لمار وحمادي اقعدو عند امهم صاح
نا ؛؛ اها هي اللي قالت
هدي ؛؛ باهي اللي افهمت في الجو اشويه امس خميس ولابسه قفطان وامحنيه اكيده سهرتكم حلوه
نا ؛؛ ههههههه نجك

غاده ؛؛ كلنا جونا سمح امس

الهام ؛؛ ﻻ نا من بختي مافيش رومانسية امس رتاج خطرلها تمرض وترقد بينها وبين باتها

غاده ؛ هههههههه عظم بوغصاص

الهام ؛؛ هكي العويل اينكدو علي الام والاب
هدي ؛؛ صار قعدتي اتمصي في الليم كيفنا
والله امس ياما صار بعدك يا ويه

نا ؛؛ ليش شن صار
هدي ؛؛ العريس دار الفضايح ثاريته طايش
غاده ؛ ههههه حتي في جامعه ديمه معها من الصبح لعند العشيه انحق فيهم

هدي ؛؛ هابا ماشفتش حب هكي نا
الهام ؛؛ كنك انتي نسيتي حب وائل ولاه شنو
هدي ؛؛ مش وقته هذا شن خطره
الهام ؛؛ هبله
هدي ؛؛ الهام خلاص لو سمحتي نبيش نذكره
غاده ؛؛ نا بروحي سامعه قصة ونا مع الهام انتي هبله
هدي ؛؛ هبله شن هبله علشان نبني في مسقبلي قاعده
الهام ؛؛ اها ابنيه هنا في ليبيا مستقبلك باهي
هدي ؛؛ نا حره
وماحد يحكي معي في الموضوع هذا
نا ؛؛ الهام هيا كملي اللي في يدك بدال ما وعت الغاز
وصبيت نا وغسلت ايديا وولعت الغاز وحطيت طنجرة المحشي علي الغاز

الهام ؛؛ دايره مكرونه امبوخه بالتقليه معه
نا ؛؛ اهااااا انحبها حاجة التقليه

وفجاء سمعنا حس طارق عالي وايهزب فيه حاتم

هاجر ؛؛ حي عليا
نا ؛؛ انصدمت وبحتت في هاجر والقيتها امصبيه وتندب
هدي ؛؛ اسسس هاجر

طارق ؛؛ …………..

هاجر طاحت داخت

يتبع