مسلسل سعاده كاذبه
مسلسل سعاده كاذبه
الحلقه 1
رجاء ؛؛ انتي هي انتي من تحسابي روحك ياحقيره نين اتفتشي دولابي لانك وليتي امري
ولا شيء شن دخلك بيا انتي راكي في نهايه بكل مرات خويا سمعتي مراااااات خويا
وياريتك مانك مراته
نعيمه ؛؛ راه خيرلك وطي صوتك راه والله انكلم خوك وايجيك يضربك تحسابيني مش عارفه ان عندك فون واتشلطي عليه يا……….
وسمعتها اميره جواء واطعت تجري
اميره ؛؛ هي انتي وياه كنكن فيش اتحسن اتعيطن علي طول حيلكن تو شيء واحد ايخش علينا
رجاء ؛؛ الحقيره القيتها اتفتش في دبشي ليش اتفتش فيهن هي من اصلا وشن دخلها بيا
نعيمه ؛؛ احترمي نفسك ومعش اتقولي حقيره
رجاء ؛؛ ﻻ حقيره ونص اخري ليش انتي خليتي فيها احترام تو نحن انخشو لشقتك المخمجه وانفتشو فيه
وبعدين ان شاءالله ايكون عندي 100 فون انتي شن دخلك بيا كل حد في حاله ولاه ناسيه ماضيك انتي
نعيمه ؛؛ ماضيا كنه ماضيا
الحمدالله ماعمره حد جابني في دوه
به يارجاء كان ما قالتها للعادل وايجي يضربك ما نقعد نا نعيمه
رجاء ؛؛ ههههه علي اساس 
عدي كسره تكسرك وانتي وهو ان شاءالله
علي خشت خالتي فاطمه
خالتي فاطمه ؛؛ رجاء شن الكلام هذا عيب عليك وعليش متعاركات
نعيمه ؛؛ خالت……..
اميره ؛؛ قاطعتها
خالتي وين ماما وايه
خالتي فاطمه ؛؛ اهن بره قاعدات اينزل من سياره
رجاء ؛؛ اكويسه ماما تو
خالتي فاطمه ؛؛ انقولو الحمدالله
واطلعن يجارن
اميره ؛ ماما ماما
ودمعتها في عينها لان شفت ماما كيف تعبانه
نا ؛؛ اميره تعالي ساعديني ابسرعه
وجتني اميره وشالت معي ماما وحطينها جو في الدار علي السرير
وخشيت نا حولت العبايه والخمار وحطيتهن في الدار واطلعت شور دار المعيشه وقعمزت احذهن
وخالتي فاطمه ؛؛ لقت رجاء تبكي
رجاء وين ايمان
رجاء ؛؛ قاعده في الحمام تدوش
وشيرت رجاء بيدها شور نعيمه وبعدين دارت بيدها شكل فون علي يدها
معناها
راه نعيمه تبي اتبص عليا عند عادل علي فوني
خالتي فاطمه ؛؛ طيح سعدكن
ولما قالتها قالتها بصوت عاليا بدرجة كلنا برمن اوجوهن
واطلعت ايمان من الحمام وجت تجري شور ماما وتمت تبكي
ماما ؛ ايمان كنك تبكي قاعده راه مافيا شيء الحمدالله
ايمان ؛؛؛ ماما وراس ماما خليك معانا راه والله ماعندنا واحد غيرك ساد بابا عد من قبل ما نفروح بيه ساد ماجانا من الهم
وتمت تبكي بكتنا معها
خالتي فاطمه ؛؛ خلاص ايمان ليش تو البكاء
ايمان ؛ والله ياخالتي تعبانا من يوم ماعشنا ونحن في شقا توفيت بابا وبعدها مرض ماما ليش هكي نا حتي كلمة يا بابا مافرحت بيها كيف البنات والله راني مكسوره وماعاد عندي جهد
نا ؛؛ قعدت نبكي وصبيت نجري شور الدار وعزقت روحي علي سرير قعدت نبكي ومنهاره لان الكلام اللي قالته ايمان كله قاعد جوه فينا بس مانحكوش بيش مانوجعوش قلب ماما اخري ساد اللي هي فيه مرض القلب مش ساهل
وجتني رجاء وخالتي فاطمه وراي ساكتني
خالتي فاطمه ؛ رجاء ياوجه الفضايح شن صار امبدري
وحكت رجاء اللي صار بينها و بين نعيمه
خالتي فاطمه ؛؛ طيح سعدك تو اتجيك ضربه من عادل انتي تو اتجيبي اخرتك بيدك
نا ؛؛ رجاء نا كم مره قالت فكينا منها نعيمه هذه لعند امتي ونحن نقعدو نشكو منها هكي ليش هكي
رجاء ،؛ والله ياحناتي القيتها اتفتش في دولابي وما تبنيش نطلق اللساني عليها تي وحق ربي انهزبها
تي قولن الحمدالله اللي ما كسرتها لاكن
خالتي فاطمه ؛ ههههههههه علي اساس انتي عندك جهد لها
طول × عرض والله انتي تو اتجيبي اخرتك بيدك
رجاء ؛؛ البركه فيك يااخويله انتي تو تقعدي اتباتي معنا وتو اتحزي علينا وتو نلبس عرم دبش بيش ما يوصلنش التشيلطات لجسمي
نا ؛؛ هههههههه ازي وانتي ديمه دايره احتياطاتك وعابيه علي خالتي المسكينه وعلي الدبش
رجاء ؛؛ ان شاءالله لعند ما اننزفو وتفتك منا خالتي
خالتي ؛ ان شاءالله يارب تنزفنا واتريح امكن واتهناء
نا ؛ بالنسبه ليا نا الحمدالله متريحه هنا وقاعده مع ماما وعندي قعدتي مع ماما بالدنيا ومافيها
رجاء ؛؛ عليك كذب فيك يا ايه كنك ديمه اتكابري واتعيشي في روحك في وهم السعاده والعائله السعيده
تي نحن اكتر بنات نبكو وننضربو من خوتك ليش التكبر والله امعيشتنا سوده البنات يقرن وعيشات حياتهن ونحن لا جينا بقرايه ولا بخوت كذا بلا كذب زايد شوفي روحك انتي اللي امدادك يامتخرج يااخر سنه في القرايه وانتي باهي اللي واخذه شهاده الثانويه
نا ؛ الله غالب كيف ماايجيك الزمان تعاليله
الله غالب جينا والقينا عندنا خوت اكبار معقدين وبوك متوفي فحبسونا في الحوش
رجاء ؛ بس هم حبسونا بعد كشفت اختك الانانيه هي ازوجت وعاشت حياتها ونحن اللي دفعنا الثمن
نا ؛؛ رجاء سكري فمك واحترمي نفسك
رجاء ؛؛ هذا الواقع كيف انسيتيه بسببها قعدتي في الحوش لا اقرايه ولا عمل قبل كنا متريحين ومتهنين
من لما سمعت الكلمه هذه حسيت كيف الموس اللي خش قلبي ووجعني طلعت ابسرعه وخشيت احذا ماما والقيت اميره عاطيتها دواء واتهدرز معها
نا ؛؛ وين نعيمه وين طبت
ايمان ؛؛ حقيتها ركبت فوق لشقتها
نا ؛؛ نبي اندير قهوه من يبي معي
اميره ؛؛ ديريلنا كلنا
نا ؛؛ به
وخشيت لمطبخ وحطيت القهوه علي النار القيت حافظه اصغيره فيها اشوية معمول حطيته
وخشت عليا اميره
اميره ؛؛ سمعتي رجاء شن دايره
نا ؛؛ اها تو قالتها ليا
اميره ؛؛ رجاء تو تجني علي روحها
نا؛؛ ما تشعفش بكل البنت هذه وخذا الحياه بالعناد وتسكير الراس
اميره ؛؛ بس اعناده هذا تو ايجبلها اخرتها علي ايدين خوتك
وحطيت القهوه ومشيت لدار نا واميره
القيتهن كلهن امقعمزات
طبعا الدار هذه هي دار معيشه بس لما مرضت ماما درلنلها سرير فيها بيش تقعد اقريبه منا وما اتكسدش
وقعمزنا وبدينا انهدرزو ونشربو في القهوه
اتخش علينا تجري موده بنت خويا عادل تقراء سنه اوله ( البصاصه امتاعتنا )
خشت تجري وهي داهشه وتحكي واتقول قلبها يبي ايوقف
موده ؛؛ اعميماتي اعميماتي
نحن ؛؛ كنك شن في
موده ؛؛ صبن صبن ابسرعه البسن دبشكن راه ماما حرشت فيكن عند بابا وبابا قال والله انكسرهن تكسير
نا ؛؛ هيييييييي طيح سعدنا صبني ابسرعه اجارن
وصبيت نا و رجاء واميره وايمان نجارو وتمين نلابسو في دبش زياده فوق دبشنا
وخشت ورانا تجري خالتي
خالتي ؛؛ بنات هاتن فوناتكن هنا اندسهن في شنطتي
وكلهن اللي عندها حاجه طلعتها ودستها في شنطت خالتي اللي هديه واللي فون واللي شحن ولللي سمعه عرمنا في شنطة خالتي
والابسن
خالتي؛ ؛ ههههههه ياما يطلع منكن انتن
رجاء خشت تحت البطنيه تبي ادير روحه راقده
ونا واميره خشين احذا ماما درنا اروحن طيوبات
وايمان ؛؛ خشت لحمام دارت روحها تتدوش
عادل ؛؛ ياكلبه انتي وهي تعالنا هنا
نحن ………….
اصبرن اصبرن
مازالتني ماتعرفتن علينا
الاب ؛ صالح متوفي
الام ؛؛ عيشه
علي؛؛مواليد 78 خويا كبير متزوج وزجته اسمها مروه
بعده
عادل ؛؛مواليد 79
متزوج وزوجته اسمها نعيمه
بعده
نجاح ؛؛ مواليد 82
اختي متزوجه وفي حالها
بعدها
خالد ؛؛ مواليد 84خاطب وعرسه اقريب وخطيبته اسمها مريم
بعدها
اميره ؛؛ 88
ايه ؛؛ اللي هي نا مواليد 90
رجاء ؛؛ وجه الفضايح 92
ايمان ؛؛ اخر عنقود95
وخالتي فاطمه هذه مرات خالي عيسى
هي صاح مرات خالي بس انعاملو فيها وكأن اختنا الكبيره لان متعلقه بينا واجد ماتحركش منا
يتبع
ها شن رايكن حلقه حلوه او ﻻ